Gal 4

လိၵ်ႈဢေႃးဝႃႇတႃ့ၵလႃႇတိ

၄

ယႃႇႁႂ်ႈလႆႈၶိုၼ်းပဵၼ်ၶႃႈ

၁ ၵဝ်သမ်ႉဝႃႈထႅင်ႈၸမ်း၊ၵေႃႉဢၼ်တၵ်းၶၢမ်ႇဢမူၺ်ႇၼၼ်ႉပဵၵ်ႉသမ်ႉပဵၼ်ၵေႃႉဢၼ်ထိူၵ်ႈပိူင်ႇဢုၵ်ႉၸႃႇၵႃႈမီးတင်းသဵင်ႈတင်းလူင်သေၵေႃႈမိူဝ်ႈဢၼ်မၼ်းယင်းပဵၼ်လုၵ်ႈဢွၼ်ႇယူႇၼၼ်ႉမၼ်းမိူၼ်ၸိူဝ်ႉၼင်ႇၶႃႈၵူၺ်းဢေႃႈ။

၂ ၸူဝ်ႈဢၼ်ၶိင်ႇၵႃႇလႃႉဢၼ်ပေႃႈမၼ်းၸီႇယၢင်ႇဝႆႉၼၼ်ႉဢမ်ႇပႆႇႁွတ်ႈပႆႇထိုင်ၼၼ်ႉမၼ်းလႆႈမီးယူႇၵႃႈၼႂ်းမိုဝ်းၶဝ်ၸိူဝ်းဢၼ်ပႂ်ႉမၼ်းထိင်းမၼ်း၊ဢုပ်ႉပိူင်ႇၼိူဝ်မၼ်းၼၼ်ႉယူႇဢေႃႈ။

၃ မိူၼ်ၸိူဝ်ႉၼင်ႇၼၼ်ႁဝ်းၼႆႉၵေႃႈၼႂ်းမိူဝ်ႈဢၼ်ယင်းတိုၵ်ႉပဵၼ်လုၵ်ႈဢွၼ်ႇယူႇၼၼ်ႉလႆႈၶၢမ်ႇႁဵတ်းၶႃႈၵႃႈၼႂ်းတြႃးလေႃးၵီႇဢၼ်ဢမ်ႇၸေးဢမ်ႇၸုမ်ႇၼၼ်ႉဢေႃႈ။

၄ မိူဝ်ႈဢၼ်ၶိင်ႇၵႃႇလႃႉၸေးယဝ်ႉၼၼ်ႉၸိုင်ၽြႃးပဵၼ်ၸဝ်ႈပွႆႇၸႂ်ႉလုၵ်ႈၸဝ်ႈဢၼ်ဢဝ်ပတိၵ်ႉသၼ်ႇထေႇၼႂ်းတွင်ႉမေႈယိင်းသေလႄႈ

၅ ၵိူတ်ႇလဵင်ႉမႃးတႂ်ႈပိင်းၺၢပ်ႈတြႃးႁႂ်ႈလႆႈထူတ်ႇဢဝ်ႁဝ်းဢၼ်မီးယူႇၼႂ်းမိုဝ်းပိင်းၺၢပ်ႈတြႃးလႄႈႁႂ်ႈႁဝ်းလႆႈၶၢမ်ႇဢဝ်ဢရႃႇလုၵ်ႈၸဝ်ႈဢေႃႈ။

၆ ပိူဝ်ႈဢၼ်သူပဵၼ်လုၵ်ႈလႄႈၽြႃးပဵၼ်ၸဝ်ႈပွႆႇၸႂ်ႉဝိၺိၺ်ႇလုၵ်ႈၸဝ်ႈဢၼ်ႁွင်ႉဢပ်ႉပႃႉ(ပေႃႈ)ၼၼ်ႉမႃးၵႃႈၼႂ်းႁူဝ်ၸႂ်သူဢေႃႈ။

၇ ပေႃးပဵၼ်ၸိူဝ်ႉၼင်ႇၼႆၸိုင်ၵမ်းလိုၼ်းသူဢမ်ႇပဵၼ်ၶႃႈဢၼ်လႆႈၶၢမ်ႇတၢင်းၸႂ်ႉတၢင်းသွႆၼၼ်ႉလႄႈပဵၼ်လုၵ်ႈယဝ်ႉဢေႃႈ။ပေႃးပဵၼ်လုၵ်ႈၸိုင်ပဵၼ်ၵေႃႉဢၼ်မီးဢၶႂင်ႉႁႂ်ႈလႆႈၶၢမ်ႇဢမူၺ်ႇဢေႃႈ။

၈ ၵူၺ်းၵႃႈမိူဝ်ႈၵွၼ်ႇဢွၼ်မိူဝ်ႈဢၼ်သူဢမ်ႇပႆႇႁူႉၽြႃးပဵၼ်ၸဝ်ႈၼၼ်ႉသူပဵၼ်ၶႃႈၸႃႇတိဢၼ်ဢမ်ႇၸႂ်ႈၽြႃးၼၼ်ႉဢေႃႈ။

၉ တေႃႈလဵဝ်ၼႆႉၸမ်းသူႁူႉၽြႃးပဵၼ်ၸဝ်ႈယဝ်ႉဢမ်ႇၵႃးၽြႃးပဵၼ်ၸဝ်ႈႁူႉသူယဝ်ႉလႄႈႁဵတ်းသင်လႄႈသူသမ်ႉၶႂ်ႈၶၢႆႉပုတ်ႈၶိုၼ်းၵႂႃႇၵႃႈၼႂ်းမိုဝ်းတြႃးဢၼ်ဢမ်ႇမီးႁႅင်းဢၼ်ဢမ်ႇပၼ်ၵတ်းယဵၼ်ၶျၢမ်းသႃႇလႆႈၼၼ်ႉ။သူၶႂ်ႈၶိုၼ်းၶၢမ်ႇႁဵတ်းၶႃႈၵႃႈၼႂ်းတြႃးလေႃးၵီႇၼၼ်ႉလူင်ပေႇ။

၁၀ သူပႂ်ႉပီႊပႂ်ႉလိူၼ်ပႂ်ႉဝၼ်းပႂ်ႉၶိင်ႇၵႃႇလႃႉၼမ်ၼႃႇလူင်ပေႇ။

၁၁ ၵဝ်ၵူဝ်တၢင်းဢၼ်ၵဝ်ၵႆႉၶတ်းၸႂ်ႁဵတ်းၵႃႈၼႂ်းသူၼၼ်ႉတၵ်းပဵၼ်လၢႆလၢႆဢမ်ႇပွင်ႇလွင်ႈၵႃႈသင်ၵူၺ်းဢေႃႈ။

ပေႃးလုလႅင်ၸႂ််ပုၼ်ႈၵူၼ်းၵလႃႇတိၶဝ်

၁၂ ပီႈၼွင်ႉၶဝ်ဢိူၺ်း၊ၵဝ်တွင်းပၢၼ်ႇသူၸိူဝ်ႉၼင်ႇဢၼ်ၵဝ်ပဵၼ်ၸိူဝ်ႉၼင်ႇသူၼၼ်ႉသူၵေႃႈႁႂ်ႈပဵၼ်ၸိူဝ်ႉၼင်ႇၵဝ်တႃႉ။

၁၃ သူဢမ်ႇၽိတ်းပိူင်ႈၵဝ်လႃးလႃး။သူႁူႉလွင်ႈဢၼ်ၵဝ်ႁေႃးလၢတ်ႈတြႃးသတၢင်းသိူဝ်းပျေႃႇတီႈသူမိူဝ်ႈဢွၼ်တၢင်းၼၼ်ႉၵွပ်ႈပိူဝ်ႈတၢင်းၶႆႈတၢင်းပဵၼ်တူဝ်ၶိင်းၵဝ်ဢေႃႈ။

၁၄ ပဵၵ်ႉသမ်ႉဝႃႈတၢင်းပဵၼ်တူဝ်ၶိင်းၵဝ်ၼႆႉပဵၼ်တၢင်းဢၼ်ၸၢမ်းတူၺ်းသူသေၵေႃႈသူယင်းဢမ်ႇႁဵတ်းဢၼ်ဢမ်ႇပေႃးၼင်ႇႁိုဝ်တီႈၵဝ်လႄႈဢမ်ႇပႄႇဢမ်ႇပႅတ်ႈၵဝ်။သူႁပ်ႉတုင်းဢဝ်ၵဝ်မိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈ၊မိူၼ်ၸိူဝ်ႉၼင်ႇၸဝ်ႈယေႇသုၶရိၸ်ႉၼၼ်ႉဢေႃႈ။

၁၅ ပေႃးပဵၼ်ၸိူဝ်ႉၼင်ႇၼႆၸိုင်တေႃႈမိူဝ်လဵဝ်ၼႆႉတၢင်းသိူဝ်းပျေႃႇသူမီးၵႃႈတီႈလႂ်။မိူဝ်ႈဢွၼ်ၼၼ်ႉပေႃးတၵ်းလႆႈဢဝ်မၢၵ်ႇတႃသူဢွၵ်ႇသေလႄႈပၼ်တီႈၵဝ်ၼႆၵေႃႈ၊သူတၵ်းပၼ်ယူႇဢေႃႈ၊ဝႃႈၼႆၵဝ်ၶၢမ်ႇသၢၵ်ႈသေႇဢေႃႈ။

၁၆ တေႃႈလဵဝ်ၼႆႉၸမ်းၵွပ်ႈပိူဝ်ႈၵဝ်ႁေႃးလၢတ်ႈသမ်ႇမႃႇတြႃးၵႃႈတီႈသူလႄႈၵဝ်လႆႈပဵၼ်ရၢၼ်ႇသူႇသူႁိုဝ်။

၁၇ ပိူၼ်ႈႁၵ်ႉသူတႄႉဝႃႈၼႆႁႂ်ႈၸႂ်ႈသေလူးၵွၼ်ႇတႃႉ။တၢင်းဢၼ်ၶဝ်ႁၵ်ႉသူၼၼ်ႉႁႂ်ႈသူလီငၢမ်းဢမ်ႇၸႂ်ႈ။ၶဝ်ၶႂ်ႈႁႂ်ႈသူႁၵ်ႉၶဝ်လႄႈႁႂ်ႈသူပႄႇပႅတ်ႈႁဝ်းဢေႃႈ။

၁၈ သူထုၵ်ႇလီႁၵ်ႉလွင်ႈဢၼ်လီဢၼ်ငၢမ်းၼၼ်ႉသေႇသေႇဢေႃႈ။

၁၉ လုၵ်ႈဢွၼ်ႇလၢင်းဢွၼ်ႇဢၼ်ၵဝ်ႁၵ်ႉၶဝ်ဢူၺ်း၊ၵဝ်လႆႈၶၢမ်ႇဝူၺ်ႇတၼႃႇပုၼ်ႈသူမိူၼ်ၼင်ႇမေႈလႆႈၶၢမ်ႇဝူၺ်ႇတၼႃႇဢၼ်လဵင်ႉလုၵ်ႈၼၼ်ႉတေႃႇထိုင်ႁွတ်ႈၸဝ်ႈၶရိၸ်ႉတၵ်းတႄႇယူႇၵႃႈၼႂ်းသူၼၼ်ႉဢေႃႈ။

၂၀ ပိူဝ်ႈဢၼ်ၵဝ်မီးၸႂ်ဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈၵႃႈၼိူဝ်သူလႄႈၵဝ်မီးဢလူဝ်ႇၶႂ်ႈထူပ်းႁၼ်သူတေႃႈလဵဝ်ၼႆႉလႄႈလႅၵ်ႈလၢႆသဵင်ၵႂၢမ်းၵဝ်ဢေႃႈ။

ၵႂၢမ်းဢူႉပမႃႇဢႃႇပြႁၢမ်ႇ

၂၁ သူၸိူဝ်းဢၼ်ၶႂ်ႈယူႇတႂ်ႈပိင်းၺၢပ်ႈတြႃးၶဝ်ဢိူၺ်း၊သူဢမ်ႇႁူႉဢမ်ႇငိၼ်းပဵင်းၺၢပ်ႈတြႃးႁိုဝ်။

၂၂ ဢၼ်မႃးၼႂ်းၵျၢမ်းလိၵ်ႈလႄႈဝႃႈ၊ဢႃႇပြႁၢမ်ႇမီးလုၵ်ႈၸၢႆးသွင်ၵေႃႉဢေႃႈ။လုၵ်ႈၸၢႆးၵေႃႉၼိုင်ႈၸမ်းပဵၼ်လုၵ်ႈၸၢႆးမေႈယိင်းဢၼ်ပဵၼ်ၶႃႈၼၼ်ႉဢေႃႈ။ၵေႃႉၼိုင်ႈၸမ်း၊ပဵၼ်လုၵ်ႈၸၢႆးမေႈယိင်းဢၼ်ဢမ်ႇၸႂ်ႈၶႃႈၼၼ်ႉဢေႃႈ။

၂၃ လုၵ်ႈၸၢႆးမေႈယိင်းၶႃႈၼၼ်ႉပဵၼ်လုၵ်ႈဢၼ်ၵိူတ်ႇလဵင်ႉမႃးၸွမ်းလူၺ်ႈၸႃႇတိၵူၼ်းဢေႃႈ။လုၵ်ႈၸၢႆးမေႈယိင်းဢၼ်ဢမ်ႇၸႂ်ႈၶႃႈၼၼ်ႉပဵၼ်လုၵ်ႈဢၼ်ၵိူတ်ႇလဵင်ႉမႃးၸွမ်းလူၺ်ႈၵတိၸဝ်ႈဢေႃႈ။

၂၄ လွင်ႈတၢင်းၸိူဝ်းၼၼ်ႉပဵၼ်ပုင်ႇဢူႉပမႃႇဢေႃႈ။မေႈယိင်းသွင်ၵေႃႉၼၼ်ႉၶႂ်ႈဝႃႈပတိၺိၺ်ႇတြႃးသွင်ပႃးဢေႃႈ။မေႈယိင်းဢၼ်လႆႈၸိုဝ်ႁႃႇၵရၼႆႉပဵၼ်တြႃးဢၼ်ၸီႇယၢင်ႇၵႃႈၼိူဝ်လွႆသိၼႃႇလႄႈၵိူတ်ႇလဵင်ႉၶႃႈၵူၺ်းဢေႃႈ။

၂၅ ႁႃႇၵရၼႆႉပဵၼ်လွႆသိၼႃႇဢၼ်မီးယူႇၼႂ်းမိူင်းဢရေႇပျႃႉၼၼ်ႉဢေႃႈ။မိူၼ်ၵၼ်တင်းဝဵင်းယေႇရုသလႅမ်ႇဢၼ်မီးယူႇတေႃႈလဵဝ်ၼႆႉဢေႃႈ။မၼ်းဢိၵ်ႇတင်းလုၵ်ႈမၼ်းတင်းလၢႆၼၼ်ႉလႆႈၶၢမ်ႇႁဵတ်းၶႃႈဢေႃႈ။

၂၆ ၵူၺ်းၵႃႈဝဵင်းယေႇရုသလႅမ်ႇဢၼ်မီးၵႃႈၼိူဝ်ၸမ်း၊ပဵၼ်မေႈယိင်းဢၼ်ဢမ်ႇၸႂ်ႈၶႃႈဢၼ်ပဵၼ်မေႈႁဝ်းၼၼ်ႉဢေႃႈ။ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်း၊-

၂၇ မေႈမၼ်ဢၼ်ဢမ်ႇၵိူတ်ႇလဵင်ႉလုၵ်ႈဢိူၺ်း၊သိူဝ်းပျေႃႇတႃႉ။မေႈယိင်းဢၼ်ဢမ်ႇပႆႇၶၢမ်ႇဝူၺ်ႇတၼႃႇတၢင်းဢၼ်ၵိူတ်ႇလဵင်ႉလုၵ်ႈၼၼ်ႉဢိူၺ်း၊ႁွင်ႉပဝ်ႇႁွင်ႉသႅၼ်ႇတႃႉ။လွင်ႈမၼ်းၸမ်းမေႈယိင်းဢၼ်ၸုၼ်ႉပႅတ်ႈဝႆႉၼၼ်ႉယဵင်ႈၶႅၼ်းၵိူတ်ႇလဵင်ႉလုၵ်ႈလဵင်ႉလၢင်းၼမ်ၼႃႇသေမေႈယိင်းဢၼ်မီးၽူဝ်ၼၼ်ႉယဝ်ႉ၊ဝႃႈၼင်ႇၼႆဢေႃႈ။

၂၈ ပီႈၼွင်ႉၶဝ်ဢိူၺ်း၊သူပဵၼ်လုၵ်ႈဢၼ်ၸၢပ်ႈသႅင်ႇၵၼ်တင်းၵတိၸဝ်ႈမိူၼ်ၸိူဝ်ႉၼင်ႇဢိၸၢၵ်ႉၼၼ်ႉဢေႃႈ။

၂၉ ၸိူဝ်ႉၼင်ႇဢၼ်လုၵ်ႈဢၼ်ၵိူတ်ႇလဵင်ႉမႃးၸွမ်းလူၺ်ႈၸႃႇတိပၵတိၼၼ်ႉၼိၵ်ႈၸၢၵ်ႈငႅၼ်းသေးလုၵ်ႈဢၼ်ၵိူတ်ႇလဵင်ႉမႃးၸွမ်းလူၺ်ႈဝိၺိၺ်ႇၸဝ်ႈၼၼ်ႉ၊တေႃႈလဵဝ်ၼႆႉၵေႃႈပဵၼ်ဝႆႉယူႇဢေႃႈ။

၃၀ ၵူၺ်းၵႃႈၵျၢမ်းလိၵ်ႈမီးမႃးၸိူဝ်ႉႁိုဝ်ဝႃႈၼႆၸမ်းႁေႃႈမေႈယိင်းၶႃႈဢိၵ်ႇတင်းလုၵ်ႈၸၢႆးမၼ်းဢွၵ်ႇပႅတ်ႈသေတႃႉ။လုၵ်ႈၸၢႆးမေႈယိင်းၶႃႈၼၼ်ႉဢမ်ႇလႆႈၶၢမ်ႇဢမူၺ်ႇလူၺ်ႈၵၼ်တင်းလုၵ်ႈၸၢႆးမေႈယိင်းဢၼ်ဢမ်ႇၸႂ်ႈၶႃႈၼၼ်ႉ၊ဝႃႈၼင်ႇၼႆဢေႃႈ။

၃၁ တေႃႈလဵဝ်ၼႆႉ၊ပီႈၼွင်ႉၶဝ်ဢိူၺ်း၊ႁဝ်းပဵၼ်လုၵ်ႈလၢင်းမေႈယိင်းၶႃႈဢမ်ႇၸႂ်ႈ။ပဵၼ်လုၵ်ႈလၢင်းမေႈယိင်းဢၼ်လွတ်ႈဢေႃႈ။

ထမ်ႇမႃႉ ၵျၢမ်းၵဝ်ႇ

ၵျၢမ်းငဝ်ႈၵမ်ႇၽႃႇ ၵျၢမ်းဢၼ်ဢွၵ်ႇၵွႃႇ ၵျၢမ်းဢၼ်ႁဵတ်းဝၢတ်ႈ

ၵျၢမ်းဢၼ်ယူႇၼႂ်းထိူၼ်ႇ ၵျၢမ်းဢၼ်ႁေႃးတြႃး လိၵ်ႈမၢတ်ႈလွင်ႈယေႃးသု

လိၵ်ႈမၢတ်ႈလွင်ႈၵူၼ်းလူင်ဢၼ်ၸီႇယၢင်ႇတြႃး ဝုတ်ႉထုရုထ

ထမ်ႇမႃႉရႃႇၸဝၢင်ႇၽိုၼ်ပထမ ထမ်ႇမႃႉရႃႇၸဝၢင်ႇၽိုၼ်တုတိယ

ထမ်ႇမႃႉရႃႇၸဝၢင်ႇၽိုၼ်တတိယ ထမ်ႇမႃႉရႃႇၸဝၢင်ႇၽိုၼ်ၸတုၵ်ႉထ

ရႃႇၸဝၢင်ႇၶျူၵ်ႉၽိုၼ်ပထမ ရႃႇၸဝၢင်ႇၶျူၵ်ႉၽိုၼ်တုတိယ

လိၵ်ႈမၢတ်ႈလွင်ႈဢေႇၸရ လိၵ်ႈမၢတ်ႈလွင်ႈၼေႇႁမိ ဝုတ်ႉထုဢေးသတႃႇ

ဝုတ်ႉထုယေႃႇၽ ၵျၢမ်းသႃႇလၢမ်ႇ ၵျၢမ်းလိၵ်ႈသုၵ်ႉတၢမ်ႇ

ၵျၢမ်းလိၵ်ႈတေႇသၼႃႇ

လိၵ်ႈႁဵတ်းၵႂၢမ်းသေႃးလမုၼ်ႇ ၵျၢမ်းဢၼႃႇၵၢတ်ႈတိဢိသႃႇယ