Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၁၉ 

ၵႄႇၵူၼ်းၵဵပ်းၶွၼ်ႇၸၵ်ႉၶေး

၁ မၼ်းၸဝ်ႈၶဝ်ႈၵႂႃႇၵႃႈၼႂ်းဝဵင်းယေႇရိၶုဝ်းလႄႈၸွမ်းတၢင်းၵႂႃႇယူႇဢေႃႈ။

၂ ၵူၼ်းၵေႃႉၼိုင်ႈဢၼ်လႆႈၸိုဝ်ၸၵ်ႉၶေးၼၼ်ႉမီးၵႃႈတီႈၼၼ်ႉဢေႃႈ။မၼ်းပဵၼ်ၵႄႇၵူၼ်းၵဵပ်းၶွၼ်ႇလႄႈမၢၵ်ႈမီးဢေႃႈ။

၃ မၼ်းမီးၸႂ်ဢၼ်ၶႂ်ႈတူၺ်းၶႂ်ႈႁၼ်ၸဝ်ႈယေႇသုပဵၼ်ၵူၼ်းၸိူဝ်ႉၼင်ႇႁိုဝ်ဝႃႈၼႆသေၵေႃႈပိူဝ်ႈဢၼ်မၼ်းပဵၼ်ၵူၼ်းပွၵ်းၵူၼ်းဢႅၵ်းၵူၺ်းဢမ်ႇၵႃးမီးၵူၼ်းၸူႉၵူၼ်းတုမ်ၼမ်ၼႃႇလႄႈမၼ်းဢမ်ႇတူၺ်းဢမ်ႇႁၼ်မၼ်းၸဝ်ႈလႆႈ။

၄ မိူဝ်ႈဢၼ်ၸဝ်ႈယေႇသုၸမ်မႃးႁိမ်းတၢင်းသဵၼ်ႈၼၼ်ႉၸိုင်မၼ်းလႅၼ်ႈၵႂႃႇၵႃႈတီႈၽၢႆႇၼႃႈဢွၼ်တၢင်းသေယဝ်ႉၶိုၼ်ႈၵႂႃႇၵႃႈၼိူဝ်တူၼ်ႈမၢၵ်ႇလိူဝ်ႇသၢင်းၽေႃးႁႂ်ႈလႆႈတူၺ်းလႆႈႁၼ်မၼ်းၸဝ်ႈဢေႃႈ။

၅ မိူဝ်ႈဢၼ်ၸဝ်ႈယေႇသုႁွတ်ႈထိုင်မႃးၵႃႈႁိမ်းၼၼ်ႉၸိုင်မၼ်းၸဝ်ႈႁႅၼ်တူၺ်းလႄႈႁၼ်ၸၵ်ႉၶေးၼၼ်ႉသေယဝ်ႉ၊မၼ်းၸဝ်ႈလၢတ်ႈဝႃႈ၊-

၆ ၸၵ်ႉၶေးဢိူၺ်း။လူင်းမႃးၶၼ်ၶၼ်ၽႂ်းၽႂ်းတႃႉ။မိူဝ်ႈၼႆႉၵဝ်တၵ်းလိုဝ်ႈသဝ်းၵႃႈတီႈႁိူၼ်းမႂ်းဢိူဝ်ႈ၊ဝႃႈၼင်ႇၼႆဢေႃႈ။မၼ်းၵေႃႈလူင်းၶၼ်ၶၼ်ၽႂ်းၽႂ်းသေယဝ်ႉမီးၸႂ်ဢၼ်သိူဝ်းပျေႃႇၼႃႇလႄႈႁပ်ႉၶၢမ်ႇၶႅၵ်ႇမၼ်းၸဝ်ႈၵႃႈတီႈႁိူၼ်းမၼ်းဢေႃႈ။

၇ ၵူၼ်းတင်းသဵင်ႈတင်းလူင်ႁၼ်လွင်ႈတီႈႁႅင်းၼၼ်ႉသေယဝ်ႉသေႉသွမ်းတၢင်ႇဢပျႅတ်ႈဝႃႈ၊-မၼ်းၸဝ်ႈၶဝ်ႈၵႃႈၼႂ်းႁိူၼ်းၵေႃႉဢၼ်မီးဢပျႅတ်ႈၼၼ်ႉလႄႈၶၢမ်ႇဢဝ်တၢင်းဢၼ်ႁဵတ်းလဵင်ႉႁဵတ်းလူလူင်ပေႇ၊ဝႃႈၼင်ႇၼႆဢေႃႈ။

၈ ၸၵ်ႉၶေးၵေႃႈၸုၵ်းယူႇသေလႄႈလဝ်ႈလၢတ်ႈတီႈၸဝ်ႈၽြႃးလႄႈဝႃႈ၊-ၸဝ်ႈႁဝ်း၊ၵဝ်ၶႃႈဢဝ်ဢုၵ်ႉၸႃႇၶူဝ်းလဵင်းၵဝ်ၶႃႈၶိုင်ႈၼိုင်ႈပၼ်တီႈၶဝ်ၸိူဝ်းဢၼ်ယၢၵ်ႈၽၢၼ်တင်းလၢႆၼၼ်ႉၶႃႈဢေႃႈ။ဢုၵ်ႉၸႃႇၶူဝ်းလဵင်းၽူႈလႂ်သေဢမ်ႇဝႃႈပေႃးၵဝ်ၶႃႈႁဵတ်းဢမ်ႇတြႃးလႄႈလႆႈဢဝ်မႅၼ်ႈဢိတ်းၼိုင်ႈၵေႃႈၵဝ်ၶႃႈသမ်ႉၶိုၼ်းတၵ်းပၼ်ၶိုၼ်းသီႇပုၼ်ႊၶႃႈဢေႃႈ၊ဝႃႈၼင်ႇၼႆဢေႃႈ။

၉ ၸဝ်ႈယေႇသုၵေႃႈလၢတ်ႈတီႈမၼ်းလႄႈဝႃႈ၊-ပိူဝ်ႈဢၼ်ၵေႃႉၼႆႉပဵၼ်လုၵ်ႈဢႃႇပြႁၢမ်ႇလႄႈၼႂ်းဝၼ်းမိူဝ်ႈၼႆႉၵျေးၸူးတၢင်းဢၼ်ၵႄႇၶျွတ်ႈဢဝ်ၼၼ်ႉႁွတ်ႈထိုင်ၵႃႈၼိူဝ်ႁိူၼ်းၼႆႉယဝ်ႉ။

၁၀ လုၵ်ႈၵူၼ်းမႃးႁႂ်ႈလႆႈႁႃႁႂ်ႈလႆႈၵႄႇၶျွတ်ႈဢဝ်ၶဝ်ၸိူဝ်းဢၼ်ႁၢႆၵႂႃႇၼၼ်ႉဢေႃႈ၊ဝႃႈၼင်ႇၼႆဢေႃႈ။

ဢူႉပမႃႇငိုၼ်းဢၼ်ဢၢပ်ႈဝႆႉ

၁၁ မိူဝ်ႈဢၼ်ၶဝ်လႆႈငိၼ်းလွင်ႈတၢင်းၸိူဝ်းၼၼ်ႉယဝ်ႉပိူဝ်ႈဢၼ်မၼ်းၸဝ်ႈႁွတ်ႈၸမ်မႃးၵႃႈတီႈႁိမ်းဝဵင်းယေႇရုသလႅမ်ႇဢိၵ်ႇတင်းပိူဝ်ႈဢၼ်ၵူၼ်းတင်းလၢႆထၢင်ႇဝႃႈမိူင်းၽြႃးပဵၼ်ၸဝ်ႈတၵ်းပေႃႇမႃးၵမ်းလဵဝ်ဝႃႈၼင်ႇၼႆလႄႈမၼ်းၸဝ်ႈသမ်ႉလၢတ်ႈၵႂၢမ်းဢူႉပမႃႇၵႃႈၼႂ်းပရိၵ်ႈသၢတ်ႈၼၼ်ႉထႅင်ႈလႄႈဝႃႈ၊-

၁၂ ဢမၢတ်ႈၵေႃႉၼိုင်ႈမၼ်းမီးတၢင်းၵျၢမ်ႇတၢင်းပွင်တၵ်းၵႂႃႇမိူင်းဢၼ်ၵႆလႄႈၶၢမ်ႇဢဝ်ဢရႃႇၶုၼ်လူင်ယဝ်ႉၸင်ႇတၵ်းၶိုၼ်းမႃးၵႃႈတီႈမိူင်းတူဝ်ၸဝ်ႈၵဝ်ႇဢေႃႈ။

၁၃ ၸူဝ်ႈဢၼ်ဢမ်ႇပႆႇၵႂႃႇၼၼ်ႉမၼ်းႁွင်ႉဢဝ်ၵူၼ်းဢွၼ်ႇမၼ်းသိပ်းၵေႃႉသေယဝ်ႉဢဝ်ငိုၼ်းဢၢပ်ႈပၼ်ယေႈၵေႃႉယေႈၸွႆႉသေလႄႈသင်ႇဝႃႈ၊-ၸူဝ်ႈဢၼ်ၵဝ်ဢမ်ႇပႆႇၶိုၼ်းမႃးၼၼ်ႉၸိုင်ဢဝ်ႁဵတ်းတၢင်းၵႃႉတၢင်းၶၢႆတႃႉ၊ဝႃႈၼင်ႇၼႆဢေႃႈ။

၁၄ ၵူၺ်းၵႃႈၵူၼ်းတင်းလၢႆသီႇၵေႉႁေႈတႃတေႃႇမၼ်းလႄႈပွႆႇၸႂ်ႉၵူၼ်းၵႂႃႇၸွမ်းပႃႈလင်မၼ်းသေယဝ်ႉလၢတ်ႈဝႃႈ၊-ႁဝ်းဢမ်ႇၶႂ်ႈၶၢမ်ႇလွင်ႈဢၼ်မၼ်းတမေႃးဢုပ်ႉပိူင်ႇႁဵတ်းၶုၼ်ႁဝ်း၊ဝႃႈၼင်ႇၼႆဢေႃႈ။

၁၅ ဝၢႆးသေမၼ်းၶၢမ်ႇဢဝ်ဢရႃႇၶုၼ်လူင်ယဝ်ႉၶိုၼ်းမႃးလႄႈမီးဢမိင်ႉႁႂ်ႈႁွင်ႉဢဝ်ၵူၼ်းဢွၼ်ႇဢၼ်ၶၢမ်ႇဢဝ်ငိုၼ်းၸိူဝ်းၼၼ်ႉမႃးႁင်းၽႂ်ႁင်းမၼ်းႁႂ်ႈလႆႈႁူႉလွင်ႈဢၼ်ၶဝ်လႆႈဢမႅတ်ႈမၼ်းထၼ်ႇႁိုဝ်ၼၼ်ႉဢေႃႈ။ၵေႃႉပထမၼၼ်ႉမႃးလႄႈလၢတ်ႈဝႃႈ၊-

၁၆ ၸဝ်ႈႁဝ်း၊ငိုၼ်းၸွႆႉၼိုင်ႈဢၼ်ၸဝ်ႈႁဝ်းပၼ်ၼၼ်ႉလႆႈဢမႅတ်ႈမၼ်းသိပ်းၸွႆႉၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈမၼ်းၵေႃႈလၢတ်ႈလႄႈဝႃႈ၊-

၁၇ လီယဝ်ႉ၊ၵူၼ်းဢွၼ်ႇဢၼ်လီၼႆႉဢိူၺ်း၊ၵွပ်ႈပိူဝ်ႈမႂ်းႁဵတ်းသႅတ်ႈၸႃႇၵႃႈတီႈၶိူင်ႈပိူင်ဢၼ်လဵၵ်ႉဢၼ်ၵေႇၼႆႉလႄႈႁႂ်ႈမႂ်းဢုပ်ႉပိူင်ႇဝဵင်းသိပ်းဝဵင်းတႃႉ၊ဝႃႈၼင်ႇၼႆဢေႃႈ။

၁၈ ၵေႃႉတုတိယၼၼ်ႉၵေႃႈမႃးလႄႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ငိုၼ်းၸွႆႉၼိုင်ႈဢၼ်ၸဝ်ႈႁဝ်းပၼ်ၼၼ်ႉလႆႈဢမႅတ်ႈမၼ်းႁႃႈၸွႆႉၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊

၁၉ ၸဝ်ႈမၼ်းၵေႃႈလၢတ်ႈလႄႈဝႃႈ၊-ႁႂ်ႈမႂ်းဢုပ်ႉပိူင်ႇဝဵင်းႁႃႈဝဵင်းတႃႉဝႃႈၼင်ႇၼႆဢေႃႈ။ၵူၼ်းၸႂ်ႉတၢင်ႇၵေႃႉၵေႃႈမႃးလႄႈလဝ်ႈလၢတ်ႈဝႃႈ၊-

၂၀ ၸဝ်ႈႁဝ်း၊တူၺ်းလူး။ငိုၼ်းၸဝ်ႈႁဝ်းၸွႆႉၼိုင်ႈၼႆႉၵဝ်ၶႃႈဢဝ်ပူၵ်ႉဝႆႉၼႂ်းၽႃႈၸဵတ်ႉၼႆႉမီးယူႇၶႃႈဢေႃႈ။

၂၁ ၵႂပ်ႈပိူဝ်ႈၵဝ်ၶႃႈႁူႉလွင်ႈဢၼ်ၸဝ်ႈႁဝ်းၼႆႉပဵၼ်ၵေႃႉဢၼ်ႁဝ်ႉၵျႅမ်းၸၢင်ႊၸူႉဢဝ်သိမ်းဢဝ်ဢၼ်တူဝ်ၸဝ်ႈၵဝ်ႇဢမ်ႇႁဵတ်းဢမ်ႇသၢင်ႈၸၢင်ႊပၢတ်ႇဢဝ်ဢၼ်တူဝ်ၸဝ်ႈၵဝ်ႇဢမ်ႇဝၢၼ်ႇဢမ်ႇသွမ်ႈၼၼ်ႉလႄႈၵဝ်ၶႃႈၵူဝ်ၸဝ်ႈႁဝ်းၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်

၂၂ ၸဝ်ႈမၼ်းၵေႃႈလၢတ်ႈလႄႈဝႃႈ၊-ၵူၼ်းဢွၼ်ႇဢၼ်ႁၢႆႉဢၼ်မိူၵ်ႈၼႆႉဢိူၺ်းၵဝ်တၵ်းၸီႇယၢင်ႇဢမူႉမႂ်းၸွမ်းၼင်ႇၵႂၢမ်းမႂ်းယူႇဢိူဝ်ႈ။ပေႃးမႂ်းႁူႉလွင်ႈဢၼ်ၵဝ်ပဵၼ်ၵေႃႉဢၼ်ၸၢင်ႊႁဵတ်းယၢပ်ႇႁဵတ်းယဵၼ်းၸၢင်ႊၸူႉဢဝ်သိမ်းဢဝ်ဢၼ်တူဝ်ၸဝ်ႈၵဝ်ႇဢမ်ႇၸူႉဢမ်ႇသိမ်းၸၢင်ႊပၢတ်ႇဢဝ်ဢၼ်တူဝ်ၸဝ်ႈၵဝ်ႇဢမ်ႇဝၢၼ်ႇဢမ်ႇသွမ်ႈၼၼ်ႉၸိုင်၊

၂၃ ႁဵတ်းသင်လႄႈမႂ်းသမ်ႉဢမ်ႇဢဝ်ငိုၼ်းၵဝ်ၼႆႉၵႂႃႇဢၢပ်ႈပၼ်တီႈၶဝ်ၸိူဝ်းဢၼ်လႅၵ်ႈငိုၼ်းၼၼ်ႉ။ပေႃးဢၢပ်ႈပၼ်ၶဝ်ၸိုင်မိူဝ်ႈဢၼ်ၵဝ်ၶိုၼ်းမႃးၼၼ်ႉၵဝ်တၵ်းလႆႈဢရၢင်းမၼ်းတင်းၶီႈမၼ်းယူႇဢိူဝ်း၊ဝႃႈၼင်ႇၼႆဢေႃႈ။

၂၄ မၼ်းသမ်ႉလၢတ်ႈတီႈၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းမၼ်းတင်းလၢႆၼၼ်ႉလႄႈဝႃႈ၊-ၼုၵ်ႈဢဝ်ငိုၼ်းၸွႆႉၼိုင်ႈဢၼ်မီးၼႂ်းမိုဝ်းမၼ်းၼၼ်ႉသေလႄႈပၼ်တီႈၵေႃႉဢၼ်မီးသိပ်းၼိုင်ႈၼၼ်ႉတႃႉ၊ဝႃႈၼင်ႇၼႆဢေႃႈ။

၂၅ ၶဝ်ၸိူဝ်းၼၼ်ႉၵေႃႈလၢတ်ႈလႄႈဝႃႈ၊-ၸဝ်ႈႁဝ်း၊ၵႃႈတီႈၵေႃႉၼၼ်ႉယင်းမီးသိပ်းၸွႆႉယဝ်ႉၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈၼၼ်ႉၵေႃႈလၢတ်ႈလႄႈဝႃႈ၊-

၂၆ ၵဝ်ဝႃႈတီႈသူၸမ်းၽူႈလႂ်သေဢမ်ႇဝႃႈၵေႃႉဢၼ်မီးၼၼ်ႉတီႈၵေႃႉၼၼ်ႉတၵ်းပၼ်ထႅင်ႈလူးၵွၼ်ႇဢေႃႈ။ၽူႈလႂ်သေဢမ်ႇဝႃႈၵေႃႉဢၼ်ဢမ်ႇမီးၼၼ်ႉတီႈၵေႃႉၼၼ်ႉတၵ်းၼုၵ်ႈဢဝ်ၵႃႈဢၼ်မၼ်းမီးတင်းသဵင်ႈတင်းလူင်ၼၼ်ႉလူးၵွၼ်ႇဢေႃႈ။

၂၇ လိူဝ်သေၼၼ်ႉႁွင်ႉဢဝ်ရၢၼ်ႇသူႇၵဝ်တင်းလၢႆဢၼ်ဢမ်ႇၶႂ်ႈၶၢမ်ႇတၢင်းဢၼ်ၵဝ်ဢုပ်ႉပိူင်ႇၼၼ်ႉမႃးတီႈၵဝ်တႃႉ။ဢဝ်ၶဝ်တၢႆၵႃႈတီႈၽၢႆႇၼႃႈၵဝ်ၼႆႉတႃႉ၊ဝႃႈၼင်ႇၼႆဢေႃႈ။

ၵျွႃးၶဝ်ႈဝဵင်းယေႇရုသလႅမ်ႇ

၂၈ မၼ်းၸဝ်ႈဝႃႈၸိူဝ်ႉၼင်ႇၼၼ်သေယဝ်ႉဢွၼ်ႁူဝ်တပႄးၸဝ်ႈတင်းလၢႆၸွမ်းတၢင်းၵႂႃႇၸူးၵႃႈတီႈဝဵင်းယေႇရုသလႅမ်ႇပုၼ်ႉဢေႃႈ။

၂၉ မိူဝ်ႈဢၼ်မၼ်းၸဝ်ႈႁွတ်ႈၸမ်ၵႃႈတီႈဝၢၼ်ႈပိတ်ႉၽႃႇၵေႇတင်းဝၢၼ်ႈပေႇထၼိၵႃႈတီႈလွႆဢၼ်လႆႈႁွင်ႉႁိၵ်ႈၸိုဝ်လွႆသၼ်ႇလုၼ်ႇၼၼ်ႉၸိုင်မၼ်းၸဝ်ႈပွႆႇၸႂ်ႉတပႄးၸဝ်ႈသွင်ၵေႃႉၵႂႃႇလႄႈသင်ႇလၢတ်ႈဝႃႈ၊-

၃၀ သူၵႂႃႇၵႃႈတီႈဝၢၼ်ႈဢၼ်မီးပႃႈၼႃႈသူၼၼ်ႉတႃႉ။မိူဝ်ႈဢၼ်ႁွတ်ႈထိုင်ၵႃႈတီႈဝၢၼ်ႈၼၼ်ႉၸိုင်သူတၵ်းထူပ်းႁၼ်မႃႉလီႈဢွၼ်ႇဢၼ်ၽႂ်ဢမ်ႇပႆႇၶီႇသေပွၵ်ႈၼၼ်ႉမတ်ႉဝႆႉယူႇဢေႃႈ။ၵႄႈလႄႈဢဝ်မႃးတႃႉ။

၃၁ ပေႃးပိူၼ်ႈထၢမ်သူဝႃႈ၊-ႁဵတ်းသင်ၵႄႈဢဝ်မႃႉလီႈဢွၼ်ႇၼႆႉဝႃႈၼႆၸိုင်သူၶိုၼ်းလၢတ်ႈဝႃႈ၊-ၸဝ်ႈႁဝ်းမီးဢလူဝ်ႇဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။

၃၂ ၶဝ်ၸိူဝ်းဢၼ်မၼ်းၸဝ်ႈပွႆႇၸႂ်ႉၵႂႃႇၼၼ်ႉၵေႃႈၵႂႃႇလႄႈထူပ်းႁၼ်ၸိူဝ်ႉၼင်ႇၵႂၢမ်းဢၼ်မၼ်းၸဝ်ႈသင်ႇလၢတ်ႈဝႆႉၼၼ်ႉဢေႃႈ။

၃၃ ၼႂ်းမိူဝ်ႈဢၼ်ၶဝ်ယင်းတိုၵ်ႉၵႄႈဢဝ်မႃႉလီႈဢွၼ်ႇယူႇၼၼ်ႉၸဝ်ႈမႃႉလီႈဢွၼ်ႇၶဝ်ဢွၼ်ၵၼ်ထၢမ်လႄႈဝႃႈ၊-ႁဵတ်းသင်လႄႈသူၵႄႈဢဝ်မႃႉလီႈဢွၼ်ႇႁဝ်းၼႆႉမိူဝ်ႈဢၼ်ဝႃႈၼင်ႇၼႆၸိုင်

၃၄ ၶဝ်ၵေႃႈၶိုၼ်းလၢတ်ႈလႄႈဝႃႈ၊-ၸဝ်ႈႁဝ်းမီးဢလူဝ်ႇၶႃႈဢေႃႈ၊ဝႃႈၼင်ႇၼႆဢေႃႈ။

၃၅ ၶဝ်ဢဝ်မႃႉလီႈဢွၼ်ႇၼၼ်ႉၵႂႃႇၵႃႈတီႈၸဝ်ႈယေႇသုလႄႈဢဝ်ၶူဝ်းၼုင်ႈၶဝ်တၢင်ႇသႂ်ႇၵႃႈၼိူဝ်လင်မၼ်းယဝ်ႉၸင်ႇႁႂ်ႈမၼ်းၸဝ်ႈၶီႇဢေႃႈ။

၃၆ ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉၵႂႃႇတၢင်းယူႇၼၼ်ႉၸိုင်ၵူၼ်းတင်းလၢႆဢဝ်ၶူဝ်းၼုင်ႈၶဝ်သိူဝ်ႇဝႆႉပူးဝႆႉၵႃႈၼိူဝ်တၢင်းဢေႃႈ။

၃၇ မိူဝ်ႈဢၼ်မၼ်းၸဝ်ႈႁွတ်ႈၸမ်မႃးၵႃႈတီႈႁိမ်းဢၼ်လူင်းၵႃႈၼိူဝ်လွႆသၼ်ႇလုၼ်ႇၼၼ်ႉၸိုင်တပႄးၸဝ်ႈတင်းသဵင်ႈတင်းလူင်ၼၼ်ႉၵွပ်ႈပိူဝ်ႈတၼ်းၶူဝ်းၸဝ်ႈဢၼ်ၶဝ်လႆႈႁၼ်မႃးယဝ်ႉၼၼ်ႉလႄႈမီးၸႂ်ဢၼ်သိူဝ်းသႂၢင်ႇဢွၼ်ၵၼ်ႁွင်ႉသႅၼ်ႇႁဵတ်းထေႃးပၼႃႇတီႈၽြႃးပဵၼ်ၸဝ်ႈလႄႈဝႃႈ၊-

၃၈ ႁႂ်ႈၸဝ်ႈဢၼ်ပႃးတင်းဢၶႂၢင်ႉၽြႃးပဵၼ်ၸဝ်ႈလႄႈမႃးၼႆႉမီးမင်ႇၵလႃႇသေၵမ်းလူၺ်ႈ။ႁႂ်ႈတၢင်းၼိမ်မီးၵႃႈၼိူဝ်မိူင်းၵၢင်ႁၢဝ်ပုၼ်ႉသေၵမ်းလူၺ်ႈ။ႁႂ်ႈမူၼ်ၽုင်းယႂ်ႇၵႃႈၼိူဝ်ၸိၵ်းၸွမ်ၵၢင်ႁၢဝ်ပုၼ်ႉသေၵမ်းလူၺ်ႈဝႃႈၼင်ႇၼႆဢေႃႈ။

၃၉ ၽႃႇရိသေးဢၼ်ပႃးၼႂ်းၵူၼ်းၸူႉၵူၼ်းတုမ်ၸိူဝ်းၼၼ်ႉၵမ်ႈၽွင်ႈၵေႃႈလဝ်ႈလၢတ်ႈလႄႈဝႃႈ၊-သြႃႇၸဝ်ႈ၊သင်ႇသွၼ်တပႄးၸဝ်ႈႁဝ်းၸိူဝ်းၼႆႉသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-

၄၀ ၵဝ်ဝႃႈတီႈသူၸမ်းပေႃးၶဝ်ၸိူဝ်းၼႆႉယူႇတဵတ်ႇတဵတ်ႇယဵၼ်ယဵၼ်ၸိုင်မၢၵ်ႇႁိၼ်တင်းလၢႆတၵ်းႁွင်ႉသႅၼ်ႇဢေႃႈ၊ဝႃႈၼင်ႇၼႆဢေႃႈ။

၄၁ မိူဝ်ႈဢၼ်မၼ်းၸဝ်ႈႁွတ်ႈၸမ်ၵႃႈတီႈႁိမ်းဝဵင်းယေႇရုသလႅမ်ႇၼၼ်ႉၸိုင်မၼ်းၸဝ်ႈမုင်ႈႁၼ်ဝဵင်းၼၼ်ႉသေယဝ်ႉၼမ်ႉတႃတူၵ်းၵႂပ်ႈဝဵင်းၼၼ်ႉလႄႈဝႃႈ၊-

၄၂ ၼႂ်းၸူဝ်ႈပၢၼ်မႂ်းၶိင်ႇၵႃႇလႃႉတေႃႈလဵဝ်ၼႆႉပေႃးမႂ်းလႆႈႁူႉလွင်ႈတၢင်းဢၼ်ၸၢပ်ႈသႅင်ႇၵၼ်တင်းတၢင်းၼိမ်မႂ်းတင်းလၢႆၼၼ်ႉၸိုင်မႂ်းမီးမင်ႇၵလႃႇဢေႃႈ။တေႃႈလဵဝ်ၼႆႉၸမ်းလွင်ႈတၢင်းၸိူဝ်းၼၼ်ႉသိူင်ႇဝႆႉလပ်ႉဝႆႉၵႃႈတီႈမၢၵ်ႇတႃမႂ်းယဝ်ႉ။

၄၃ လွင်ႈမၼ်းၸမ်းပိူဝ်ႈဢၼ်မႂ်းဢမ်ႇႁူႉဢမ်ႇတွင်းၵျေးၸူးမၼ်းၸဝ်ႈဢၼ်ပႂ်ႉလူပႂ်ႉတူၺ်းပွင်ႁဵတ်းတီႈမႂ်းၼၼ်ႉလႄႈၶိင်ႇၵႃႇလႃႉဢၼ်ရၢၼ်ႇသူႇမႂ်းတၵ်းတႄႇတပ်ႉတင်ႈတပ်ႉၵႃႈတီႈႁိမ်းႁွမ်းမႂ်းသေလႄႈလွမ်ႉႁွပ်ႈသီႇၼႃႈသီႇၽၢႆႇၶင်ဝႆႉသေယဝ်ႉ

၄၄ တၵ်းႁႂ်ႈမႂ်းဢိၵ်ႇတင်းလုၵ်ႈလၢင်းမႂ်းတင်းလၢႆတူၵ်းလူင်းပဵင်းၵၼ်တင်းလိၼ်လႄႈၶဝ်တေဢမ်ႇႁႂ်ႈမၢၵ်ႇႁိၼ်လုၵ်ႉၼိုင်ႈတၵ်းၵိုတ်းတၢင်ႇဝႆႉၵႃႈၼိူဝ်လုၵ်ႉၼိုင်ႈၼၼ်ႉတၵ်းႁွတ်ႈထိုင်မႃးယူႇဢေႃႈ၊ဝႃႈၼင်ႇၼႆဢေႃႈ။

ၼႂ်းၵျွင်းပိၵ်ႉမၢၼ်ႇၽြႃးပဵၼ်ၸဝ်ႈ

၄၅ မၼ်းၸဝ်ႈၶဝ်ႈၵႃႈၼႂ်းပိၵ်ႉမၢၼ်ႇၸဝ်ႈသေယဝ်ႉႁေႃႈၶဝ်ၸိူဝ်းဢၼ်သိုဝ်ႉဢၼ်ၶၢႆၵႃႈၼႂ်းပိၵ်ႉမၢၼ်ႇၸဝ်ႈတင်းလၢႆၼၼ်ႉဢွၵ်ႇပႅတ်ႈလႄႈဝႃႈ၊-ႁိူၼ်းၵဝ်ၼႆႉပဵၼ်ႁိူၼ်းတီႈဢၼ်သူးတွင်းဢေႃႈ။

၄၆ ၼႂ်းဝႃႈၼၼ်သေၵေႃႈသူႁဵတ်းႁႂ်ႈပဵၼ်ထမ်ႈၸူၼ်ယူႇယဝ်ႉလူင်ပေႇ၊ဝႃႈၼႆတႅမ်ႈဝႆႉၼႂ်းၵျၢမ်းလိၵ်ႈၸိူဝ်ႉၼင်ႇၼႆယဝ်ႉ၊ဝႃႈၼင်ႇၼႆဢေႃႈ။

၄၇ မၼ်းၸဝ်ႈသင်ႇသွၼ်သုင်းမႃႉပၼ်ၼႂ်းပိၵ်ႉမၢၼ်ႇၸဝ်ႈယူႇၵူႈဝၼ်းဢေႃႈ။ပဵၵ်ႉသမ်ႉယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းတင်းလၢႆၸိူဝ်းၼၼ်ႉ

၄၈ ၵျၢမ်ႇႁႃႁႂ်ႈလႆႈဢဝ်မၼ်းၸဝ်ႈတၢႆသေၵေႃႈပိူဝ်ႈဢၼ်ၵူၼ်းတင်းသဵင်ႈတင်းလူင်ထွမ်ႇၵႂၢမ်းမၼ်းၸဝ်ႈၸေးၸေးယူႇလႄႈၶဝ်ဢမ်ႇထူပ်းဢမ်ႇလႆႈဢၶႂၢင်ႉဢၼ်တၵ်းလႆႈဢဝ်မၼ်းၸဝ်ႈတၢႆၼၼ်ႉ။