Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇမႃႇၵု

Chapter    ၁    ၂     ၃     ၄     ၅     ၆     ၇     ၈     ၉     ၁၀      ၁၁     ၁၂     ၁၃     ၁၄     ၁၅     ၁၆   

၉

၁ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵူၼ်းၵမ်ႈၽွင်ႈဢၼ်ၸုၵ်းယူႇၵႃႈတီႈၼႆႉၸူဝ်ႈဢၼ်ၶဝ်ဢမ်ႇပႆႇလႆႈႁၼ်မိူင်းၽြႃးပဵၼ်ၸဝ်ႈတႄႇပဵၼ်တၼ်းၶူဝ်းၸဝ်ႈထၢင်ႇသႃးၼၼ်ႉၸိုင်ၶဝ်တၵ်းဢမ်ႇလႆႈႁွတ်ႈထိုင်တၢင်းတၢႆ၊ဝႃႈၼင်ႇၼႆဢေႃႈ။ 

ႁၢင်ႊၽၢင်ၸဝ်ႈယေႇသုလႅၵ်ႈလၢႆႈ

၂ မိူဝ်ႈဢၼ်ပူၼ်ႉႁူၵ်းဝၼ်းယဝ်ႉၸဝ်ႈယေႇသုႁွင်ႉဢဝ်ပေႇတရု၊ယႃႇၵုပ်ႉတင်းယုဝ်းႁၢၼ်ႇလႄႈၶိုၼ်ႈၵႂႃႇၵႃႈၼိူဝ်လွႆဢၼ်သုင်ၵႃႈတီႈဢၼ်တၵ်းမီးၶဝ်ၼၼ်ႉၵူၺ်းဢေႃႈ။ 

၃ ၵႃႈတီႈၽၢႆႇၼႃႈၶဝ်ၸိူဝ်းၼၼ်ႉ

မၼ်းၸဝ်ႈမီးႁၢင်ႊၽၢင်ဢၼ်လၢၵ်ႇလၢႆးလႄႈၶူဝ်းၼုင်ႈမၼ်းၸဝ်ႈၵေႃႈႁိူဝ်ႈႁိူင်းၽိူၵ်ႇၶၢဝ်ၼႃႇထၼ်ႈပေႃးၵူၼ်းသၵ်ႉၶူဝ်းၵႃႈၼိူဝ်လိၼ်မိူင်းၼႆႉသေၵေႃႉသေၵူၼ်းဢမ်ႇသၵ်ႉလႆႈႁႂ်ႈၽိူၵ်ႇၶၢဝ်လႆႈထၢၼ်ႇၼၼ်ႉဢေႃႈ။ 

၄ မုဝ်းသေႇတင်းဢေးလိယၵေႃႈထၢင်ႇသႃးပေႃႇမႃးလႄႈလၢတ်ႈၵႂၢမ်းတေႃႇၵၼ်တင်းၸဝ်ႈယေႇသုဢေႃႈ။ မိူဝ်ႈၼၼ်ႉပေႇတရုလဝ်ႈလၢတ်ႈတီႈၸဝ်ႈယေႇသုလႄႈဝႃႈ၊-

၅ ၸဝ်ႈႁဝ်း၊ၵႃႈတီႈၼႆႉပဵၼ်တီႈဢၼ်လီပုၼ်ႈဢၼ်ႁဝ်းၶႃႈတၵ်းယူႇၼၼ်ႉၶႃႈဢေႃႈ။ ႁႂ်ႈႁဝ်းၶႃႈလႆႈႁဵတ်းသုမ်ႉသၢမ်လင်ပုၼ်ႈၸဝ်ႈႁဝ်းလင်ၼိုင်ႈပုၼ်ႈမုဝ်းသေႇလင်ၼိုင်ႈပုၼ်ႈဢေးလိယလင်ၼိုင်ႈသေၵမ်းၶႃႈ၊ဝႃႈၼင်ႇၼႆဢေႃႈ။ 

၆ ပိူဝ်ႈဢၼ်ၶဝ်ၵူဝ်ၼႃႇၵင်ႊၼႃႇလႄႈၶဝ်ၸင်ႇလၢတ်ႈၸိူဝ်ႉၼင်ႇၼၼ်ဢေႃႈ။ 

၇ မိူဝ်ႈၼၼ်ႉမွၵ်ႇၵုမ်ႈမုင်းႁူမ်ႇၶဝ်သေယဝ်ႉသဵင်ပဵၼ်မႃးၵႃႈၼႂ်းမွၵ်ႇၵုမ်ႈၼၼ်ႉလႄႈဝႃႈ၊-ၵေႃႉၼႆႉၸမ်းပဵၼ်လုၵ်ႈဢၼ်ၵဝ်ႁၵ်ႉၼႃႇဢေႃႈ။ ထွမ်ႇဢဝ်ၵႂၢမ်းမၼ်းတႃႉ၊ဝႃႈၼင်ႇၼႆဢေႃႈ။ 

၈ မိူဝ်ႈဢၼ်ၶဝ်တူၺ်းလဵပ်ႈႁွပ်ႈၵႃႈတီႈႁိမ်းၶဝ်ၼၼ်ႉၸိုင်လိူဝ်သေၸဝ်ႈယေႇသုပႃးလဵဝ်ဢိၵ်ႇတင်းတူဝ်ၶဝ်ၼၼ်ႉၶဝ်ဢမ်ႇႁၼ်ၽူႈလႂ်သေၵေႃႉသေၵူၼ်း။ 

၉ ၼႂ်းမိူဝ်ႈဢၼ်ၶဝ်လူင်းသေၵႃႈၼိူဝ်လွႆမႃးယူႇၼၼ်ႉၸိုင်ၼင်ႇႁိုဝ်ၶဝ်တၵ်းဢမ်ႇမွၵ်ႇလၢတ်ႈလွင်ႈတၢင်းဢၼ်ၶဝ်လႆႈႁၼ်ၸိူဝ်းၼၼ်ႉတီႈၽူႈလႂ်သေၵေႃႉသေၵူၼ်းတေႃႇထိုင်ႁွတ်ႈၸူဝ်ႈဢၼ်လုၵ်ႈၵူၼ်းဢမ်ႇပႆႇလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉၸိုင်မၼ်းၸဝ်ႈပိင်းၺၢပ်ႈဝႆႉတီႈၶဝ်ဢေႃႈ။ 

၁၀ ၶဝ်ၵေႃႈတွင်းဝႆႉၵႂၢမ်းၼၼ်ႉလႄႈၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်လၢတ်ႈၸႃၵၼ်လႄႈဝႃႈ၊-တၢင်းဢၼ်လုၵ်ႈၵူၼ်းလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉပဵၼ်ၸိူဝ်ႉၼင်ႇႁိုဝ်ၼေႃး၊ဝႃႈၼင်ႇၼႆဢေႃႈ။ 

၁၁ ၵမ်းၼၼ်ႉၶဝ်လဝ်ႈထၢမ်လႄႈဝႃႈ၊-ဢေးလိယတၵ်းလႆႈမႃးဢွၼ်တၢင်းဝႃႈၼႆႁဵတ်းသင်လႄႈၵူၼ်းထုတ်ႇၵျၢမ်းတင်းလၢႆဝႃႈၼင်ႇၼႆၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈၶိုၼ်းလၢတ်ႈတီႈၶဝ်လႄႈဝႃႈ၊-

၁၂ ဢေးလိယတၵ်းလႆႈမႃးဢွၼ်တၢင်းလႄႈမႄးႁႅၼ်းဝႆႉတင်းသဵင်ႈတင်းလူင်ဢမၢၼ်ႇၶၼ်ပဵၼ်ဢေႃႈ။ လွင်ႈလုၵ်ႈၵူၼ်းၸိုင်တႅမ်ႈဝႆႉၵႃႈၼႂ်းၵျၢမ်းလိၵ်ႈၸိူဝ်ႉၼင်ႇႁိုဝ်ဝႃႈၼႆၸမ်းတၵ်းလႆႈၶၢမ်ႇတုၵ်ႉၶႃႉၼႃႇဢိၵ်ႇတင်းတၢင်းဢၼ်ပိူၼ်ႈသေႉသွမ်းပႄႇပႅတ်ႈဢေႃႈ၊မီးမႃးၼင်ႇၼႆဢေႃႈ။ 

၁၃ ၵဝ်ဝႃႈတီႈၸိုဝ်ႈတီႈၸႂ်ႈၸမ်းဢေးလိယႁွတ်ႈမႃးယဝ်ႉ။ မႅၼ်ႈၼင်ႇဢၼ်တႅမ်ႈဝႆႉၼႂ်းၵျၢမ်းလိၵ်ႈၼၼ်ႉၵူၼ်းတင်းလၢႆႁဵတ်းတီႈမၼ်းၵႃႈၼင်ႇဢၼ်ၶဝ်ၶႂ်ႈႁဵတ်းၼၼ်ႉယဝ်ႉ၊ဝႃႈၼင်ႇၼႆဢေႃႈ။ 

လုၵ်ႈဢွၼ်ႇဢၼ်ၽီဢႃႉၶဝ်ႈႁၢႆၶႅၼ်း

၁၄ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈဢၼ်တပႄးၸဝ်ႈတင်းလၢႆမီးၼၼ်ႉၸိုင်ၶဝ်ႁၼ်ၵူၼ်းၸူႉၵူၼ်းတုမ်ၼမ်ၼႃႇလွမ်ႉႁွပ်ႈၶဝ်ၼၼ်ႉယူႇလႄႈၵူၼ်းထုတ်ႇၵျၢမ်းတင်းလၢႆတွင်ႈထၢမ်လၢတ်ႈၸႃၵၼ်တင်းၶဝ်ယူႇဢေႃႈ။ 

၁၅ ၵူၼ်းဢၼ်ၸူႉဢၼ်တုမ်တင်းသဵင်ႈတင်းလူင်ၸိူဝ်းၼၼ်ႉမိူဝ်ႈဢၼ်ႁၼ်မၼ်းၸဝ်ႈၸိုင်ဢၢမ်းၼႃႇလူင်လၢင်ၵမ်းလဵဝ်လႄႈလႅၼ်ႈမႃးတီႈမၼ်းၸဝ်ႈသေလႄႈတၵ်ႉလၢတ်ႈဢေႃႈ။ 

၁၆ မၼ်းၸဝ်ႈၵေႃႈထၢမ်တီႈၵူၼ်းထုတ်ႇၵျၢမ်းၸိူဝ်းၼၼ်ႉလႄႈဝႃႈ၊-သူတွင်ႈထၢမ်လၢတ်ႈၸႃၵၼ်လွင်ႈသင်၊မိူဝ်ႈဢၼ်ဝႃႈၼင်ႇၼႆၸိုင်ၵူၼ်းဢၼ်ပႃးၼႂ်းၶဝ်ၸိူဝ်းဢၼ်ၸူႉၵၼ်တုမ်ၵၼ်ၸိူဝ်းၼၼ်ႉၵေႃႉၼိုင်ႈလဝ်ႈလၢတ်ႈလႄႈဝႃႈ၊-

၁၇ သြႃႇၸဝ်ႈ၊ၵဝ်ၶႃႈဢဝ်လုၵ်ႈၸၢႆးၵဝ်ၶႃႈဢၼ်လႆႈၶၢမ်ႇတၢင်းဢၼ်ၽီဢႃႉၶဝ်ႈၼၼ်ႉမႃးတီႈၸဝ်ႈႁဝ်းၶႃႈဢေႃႈ။ 

၁၈ တီႈလႂ်တၼ်းလႂ်သေဢမ်ႇဝႃႈၽီၼၼ်ႉတီႉဢဝ်မၼ်းႁႂ်ႈမၼ်းလူမ်ႉၵႃႈၼိူဝ်လိၼ်သေလႄႈဢွၵ်ႇပူၵ်ႇၵႃႈၼႂ်းသူပ်းမၼ်းယူႇၵတ်းၶဵဝ်ႈၵတ်းၽၢၼ်ႈယူႇသေလႄႈယွမ်ၵႂႃႇယူႇၶႃႈဢေႃႈ။ ၵဝ်ၶႃႈယွၼ်းတီႈတပႄးၸဝ်ႈတင်းလၢႆႁႂ်ႈၶဝ်ႁေႃႈၽီႁၢႆႉၼၼ်ႉဢွၵ်ႇပႅတ်ႈသေၵေႃႈၶဝ်ဢမ်ႇတတ်ႈၼိုင်ႇလႆႈၶႃႈ၊ဝႃႈၼင်ႇၼႆဢေႃႈ။ 

၁၉ မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-ၵူၼ်းမဵဝ်းဢၼ်ဢမ်ႇမီးတၢင်းယုမ်ႇမၢတ်ႈၼႆႉဢိူၺ်း။ ၵဝ်တၵ်းလႆႈယူႇလူၺ်ႈၵၼ်တင်းသူလၢႆၶိင်ႇလၢႆမိူဝ်ႈ။ တၵ်းလႆႈယိူၼ်ႉၶၢမ်ႇသူလၢႆၶိင်ႇလၢႆမိူဝ်ႈ။ ဢဝ်လုၵ်ႈဢွၼ်ႇၼၼ်ႉ

မႃးတီႈၵဝ်တႃႉ၊ဝႃႈၼႆလႄႈ၊ၵႃႈၼင်ႇဢၼ်ဝႃႈၼၼ်ႉၶဝ်ဢဝ်မႃးတီႈမၼ်းၸဝ်ႈဢေႃႈ။ 

၂၀ ၽီၼၼ်ႉႁၼ်မၼ်းၸဝ်ႈသေယဝ်ႉႁႂ်ႈလုၵ်ႈဢွၼ်ႇၼၼ်ႉၵႅၼ်ႇၶႅင်ၵႂႃႇၵမ်းလဵဝ်လႄႈလုၵ်ႈဢွၼ်ႇၼၼ်ႉၵေႃႈလူမ်ႉၵႂႃႇၵႃႈၼိူဝ်လိၼ်သေယဝ်ႉပူၵ်ႇဢွၵ်ႇသူပ်းယူႇသေလႄႈၵိင်ႈၵႂႃႇၵိင်ႈမႃးယူဢေႃႈ။ 

၂၁ မၼ်းၸဝ်ႈၵေႃႈထၢမ်တီႈပေႃႈလုၵ်ႈဢွၼ်ႇၼၼ်ႉလႄႈဝႃႈ၊-လွင်ႈဢၼ်ပဵၼ်တီႈလုၵ်ႈဢွၼ်ႇၼႆႉႁိုင်ၵႃႈႁိုဝ်ယဝ်ႉ၊မိူဝ်ႈဢၼ်ဝႃႈၼင်ႇၼႆ

ၸိုင်ပေႃႈမၼ်းၵေႃႈလဝ်ႈလၢတ်ႈလႄႈဝႃႈ၊-ပဵၼ်မႃးၸဵမ်မိူဝ်ႈမၼ်းယင်းလဵၵ်ႉယင်းဢွၼ်ႇၼၼ်ႉၶႃႈဢေႃႈ။ 

၂၂ ၼင်ႇႁိုဝ်တၵ်းႁႂ်ႈမၼ်းလႆႈႁွတ်ႈထိုင်တၢင်းလူႉတၢင်းတၢႆၸိုင်ၽီႁၢႆႉၼၼ်ႉႁဵတ်းႁႂ်ႈမၼ်းလူမ်ႉတူၵ်းၵႃႈၼႂ်းၽႆးၵႃႈၼႂ်းၼမ်ႉၶိူဝ်းၶိူဝ်းယႂ်းယႂ်းၶႃႈဢေႃႈ။ ၼႂ်းဝႃႈၼၼ်သေၵေႃႈပေႃးၸဝ်ႈႁဝ်းတတ်ႈၼိုင်ႇလႆႈသေဢိတ်းသေဢီႈၸိုင်ဢိတ်းလူႁဝ်းၶႃႈလႄႈၸွႆႈထႅမ်သေၵမ်းၶႃႈ၊ဝႃႈၼင်ႇၼႆဢေႃႈ။ 

၂၃ ၸဝ်ႈယေႇသုၵေႃႈလၢတ်ႈဝႃႈ၊-မႂ်းဝႃႈပေႃးၵဝ်တတ်ႈၼိုင်ႇလႆႈသေဢိတ်းသေဢီႈ၊ဝႃႈၼင်ႇၼႆလူင်ပေႇ။ တီႈၵေႃႉဢၼ်ယုမ်ႇမၢတ်ႈၼၼ်ႉတတ်ႈၼိုင်ႇလႆႈယူႇၵူႈၸိူဝ်ႈၵူႈပိူင်ဢေႃႈ၊ဝႃႈၼင်ႇၼႆဢေႃႈ။ 

၂၄ ပေႃႈလုၵ်ႈဢွၼ်ႇၼၼ်ႉၵေႃႈႁွင်ႉသႅၼ်ႇၵမ်းလဵဝ်လႄႈၶိုၼ်းလဝ်ႈလၢတ်ႈလႄႈဝႃႈ၊-ၵဝ်ၶႃႈယုမ်ႇမၢတ်ႈယူႇၶႃႈဢေႃႈ။ ၸွႆႈထႅမ်တၢင်းဢၼ်ၵဝ်ၶႃႈယုမ်ႇမၢတ်ႈၼၼ်ႉသေၵမ်းၶႃႈ၊ဝႃႈၼင်ႇၼႆဢေႃႈ။ 

၂၅ ၸဝ်ႈယေႇသုႁၼ်ၵူၼ်းၼမ်ၼႃႇလႅၼ်ႈမႃးၸူႉၵၼ်တုမ်ၵၼ်ယူႇလႄႈမၼ်းၸဝ်ႈသင်ႇသွၼ်ၽီဢၼ်ၵူဝ်ႈၵိူၵ်ႇၼၼ်ႉလႄႈဝႃႈ၊-ၽီဢၼ်ဢႃႉလႄႈႁူၼူၵ်ႇၼႆႉဢိူၺ်း၊ဢွၵ်ႇသေၵႃႈၼႂ်းလုၵ်ႈဢွၼ်ႇၼႆႉၵႂႃႇတႃႉ။ ၵမ်းလိုၼ်းယႃႇပေၶဝ်ႈၼႂ်းမၼ်းထႅင်ႈ၊ၵဝ်မီးဢမိင်ႉဢေႃႈ၊

၂၆ မိူဝ်ႈဢၼ်ဝႃႈၼင်ႇၼႆၼၼ်ႉၸိုင်၊ၽီၼၼ်ႉႁွင်ႉသႅၼ်ႇလႄႈႁႂ်ႈလုၵ်ႈဢွၼ်ႇၼၼ်ႉၵႅၼ်ႇၶႅင်ၵႂႃႇယဝ်ႉၸင်ႇဢွၵ်ႇပၢႆႊၵႂႃႇဢေႃႈ။ လုၵ်ႈဢွၼ်ႇၼၼ်ႉၵေႃႈမူၼ်ၸိူဝ်ႉၼင်ႇတၢႆယဝ်ႉလႄႈၵူၼ်းၼမ်ၼႃႇထၢင်ႇဝႃႈမၼ်းတၢႆယဝ်ႉ၊ဝႃႈၼင်ႇၼႆဢေႃႈ။ 

၂၇ ၸဝ်ႈယေႇသုယိပ်းဢဝ်မိုဝ်းမၼ်းသေယဝ်ႉယုၵ်ႉယွင်ႊလႄႈမၼ်းၵေႃႈလုၵ်ႉမႃးဢေႃႈ။ 

၂၈ မၼ်းၸဝ်ႈၶဝ်ႈၵႃႈၼႂ်းႁိူဝ်းယဝ်ႉၸင်ႇတပႄးၸဝ်ႈၸိူဝ်းၼၼ်ႉမႃးတဵတ်ႇတဵတ်ႇလႄႈလဝ်ႈထၢမ်လႄႈဝႃႈ၊-ႁဵတ်းသင်လႄႈႁဝ်းၶႃႈဢမ်ႇႁေႃႈၽီၼၼ်ႉဢွၵ်ႇပႅတ်ႈလႆႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-

၂၉ လိူဝ်သေတၢင်းဢၼ်ၵမ်တၢင်းၵိၼ်လႄႈသူးတွင်းၼၼ်ႉမဵဝ်းၼႆႉဢမ်ႇၸၢင်ႊဢွၵ်ႇလႆႈ၊ဝႃႈၼင်ႇၼႆဢေႃႈ။ 

၃၀ ၼႂ်းမိူဝ်ႈဢၼ်ၶဝ်ဢွၵ်ႇသေၵႃႈတီႈၼၼ်ႉလႄႈၸွမ်းတၢင်းလတ်းၵႂႃႇၼႂ်းမိူင်းၵႃႇလိလႄးယူႇၼၼ်ႉမၼ်းၸဝ်ႈဢမ်ႇမီးဢလူဝ်ႇၶႂ်ႈႁႂ်ႈၽူႈလႂ်သေၵေႃႉသေၵူၼ်းလႆႈႁူႉ။ 

၃၁ လွင်ႈမၼ်းၸမ်းမၼ်းၸဝ်ႈသင်ႇလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-လုၵ်ႈၵူၼ်းတၵ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းတင်းလၢႆဢေႃႈ။ မၼ်းတၵ်းၶၢမ်ႇတၢႆဢေႃႈ။ ၶၢမ်ႇယဝ်ႉၸင်ႇတၵ်းလုၵ်ႉၶိုၼ်းလိပ်းၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉဢေႃႈ၊ဝႃႈၼင်ႇၼႆဢေႃႈ။ 

၃၂ ၶဝ်ၼၼ်ႉပဵၵ်ႉသမ်ႉဢမ်ႇႁူႉဢထိၵ်ႈပႄႇၵႂၢမ်းၼၼ်ႉသေၵေႃႈၶဝ်ဢမ်ႇႁတ်းလဝ်ႈႁတ်းထၢမ်တီႈမၼ်းၸဝ်ႈ။ 

ၵေႃႉလႂ်ယႂ်ႇမျၢတ်ႈသေပိူၼ်ႈ

၃၃ ၶဝ်ႁွတ်ႈထိုင်ၵႃႈတီႈဝဵင်းၵပိူဝ်ႇၼေႇဢုမ်ႇၼၼ်ႉသေယဝ်ႉမိူဝ်ႈဢၼ်မၼ်းၸဝ်ႈမီးယူႇၵႃႈၼႂ်းႁိူၼ်းၸိုင်မၼ်းၸဝ်ႈထၢမ်တီႈၶဝ်လႄႈဝႃႈ၊-သူၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်ထဵင်ၵၼ်ၼႂ်းတၢင်းၼၼ်ႉလွင်ႈတၢင်းၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၼၼ်ႉဢမ်ႇတၵ်ႉသဵင်လႄႈယူႇဢေႃႈ။ 

၃၄ လွင်ႈမၼ်းၸမ်းၶဝ်ၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်ထဵင်ၵၼ်လူၺ်ႈလွင်ႈဢၼ်ဝႃႈၽူႈလႂ်တၵ်းပဵၼ်ၵေႃႉဢၼ်ယႂ်ႇမျၢတ်ႈသေပိူၼ်ႈဢၼ်ဝႃႈၼၼ်ႉဢေႃႈ။ မိူဝ်ႈၼၼ်ႉမၼ်းၸဝ်ႈၼင်ႈသေယဝ်ႉႁွင်ႉတပႄးၸဝ်ႈသိပ်းသွင်ပႃးမႃးလႄႈလၢတ်ႈဝႃႈ၊-

၃၅ ပေႃးသေၵေႃႉသေၵူၼ်းၶႂ်ႈပဵၼ်ႁူဝ်ပိူၼ်ႈၸိုင်မၼ်းတၵ်းလႆႈပဵၼ်ၵေႃႉလိုၼ်းလင်သုတ်းပိူၼ်ႈဢေႃႈ။ တၵ်းလႆႈပဵၼ်ၵူၼ်းၸႂ်ႉၵူၼ်းသွႆတီႈၵူၼ်းတင်းသဵင်ႈတင်းလူင်ဢေႃႈ၊ဝႃႈၼင်ႇၼႆဢေႃႈ။ 

၃၆ မၼ်းၸဝ်ႈသမ်ႉဢဝ်လုၵ်ႈဢွၼ်ႇၵေႃႉၼိုင်ႈဝႆႉၵႃႈၼႂ်းၵၢင်ၶဝ်ယဝ်ႉၸင်ႇဢဝ်တင်းမိုဝ်းမၼ်းၸဝ်ႈဢုမ်ႈႁွပ်ႇလႄႈဝႃႈ၊-

၃၇ ၽူႈလႂ်သေဢမ်ႇဝႃႈၵေႃႉဢၼ်ဢိင်ပိုင်ႈၸိုဝ်သဵင်ၵဝ်သေလႄႈႁပ်ႉတုင်းဢဝ်လုၵ်ႈဢွၼ်ႇၸိူဝ်ႉၼင်ႇၼႆသေၵေႃႉသေၵူၼ်းၼၼ်ႉၵေႃႉၼၼ်ႉႁပ်ႉတုင်းဢဝ်ၵဝ်ဢေႃႈ။ ၽူႈလႂ်သေဢမ်ႇဝႃႈၵေႃႉဢၼ်ႁပ်ႉတုင်းဢဝ်ၵဝ်ၼၼ်ႉၵေႃႉၼၼ်ႉႁပ်ႉတုင်းဢဝ်ၵဝ်ၵူၺ်းဢမ်ႇၸႂ်ႈ။ ႁပ်ႉတုင်းဢဝ်ၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ၊ဝႃႈၼင်ႇၼႆဢေႃႈ။ 

ၵေႃႉဢၼ်ဢမ်ႇမီးၽၢႆႇရၢၼ်ႇသူႇႁဝ်းၼၼ်ႉပဵၼ်ၵူၼ်းၽၢႆႇႁဝ်း

၃၈ ယုဝ်းႁၢၼ်ႇၵေႃႈလၢတ်ႈလႄဝႃႈ၊-သြႃႇၸဝ်ႈ၊ႁဝ်းၶႃႈလႆႈထူပ်းၺႃးၵူၼ်းၵေႃႉၼိုင်ႈမၼ်းဢိင်ပိုင်ႈၸိုဝ်သဵင်ၸဝ်ႈႁဝ်းသေလႄႈႁေႃႈၽီႁၢႆႉဢွၵ်ႇပႅတ်ႈယူႇၶႃႈဢေႃႈ။ မၼ်းဢမ်ႇၸႂ်ႈၵေႃႉဢၼ်ၸွမ်းလူၺ်ႈၵၼ်တင်းႁဝ်းၶႃႈ။ ပိူဝ်ႈဢၼ်မၼ်းဢမ်ႇၶဝ်ႈပႃးလူၺ်ႈၵၼ်တင်းႁဝ်းၶႃႈလႄႈႁဝ်းၶႃႈႁႄႉၶႅၼ်မၼ်းယူႇၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈလၢတ်ႈလႄႈဝႃႈ၊-

၃၉ ယႃႇပေႁႄႉၶႅၼ်မၼ်း။ လွင်ႈမၼ်းၸမ်းၵေႃႉဢၼ်ဢိင်ပိုင်ႈၸိုဝ်သဵင်ၵဝ်သေယဝ်ႉၼႄပျႃႉတၼ်းၶူဝ်းလႄႈသမ်ႉၶိုၼ်းသေႉသွမ်းၵဝ်ငၢႆႈငၢႆႈၼၼ်ႉဢမ်ႇမီးသေၵေႃႉသေၵူၼ်း။ 

၄၀ ၵေႃႉဢၼ်ဢမ်ႇမီးၽၢႆႇရၢၼ်ႇသူႇႁဝ်းၼၼ်ႉမီးၽၢႆႇႁဝ်းဢေႃႈ။ 

၄၁ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၽူႈလႂ်သေဢမ်ႇဝႃႈၵေႃႉဢၼ်ပၼ်ၼမ်ႉၵိၼ်ၵွၵ်းၼိုင်ႈတီႈသူၼႂ်းၼႃႇမႃႉၸိုဝ်သဵင်ၵဝ်ၵွပ်ႈပိူဝ်ႈသူပဵၼ်တပႄးၵဝ်ၼၼ်ႉၵေႃႉၼၼ်ႉယင်းဢမ်ႇလႆႈၶၢမ်ႇသူႉၵျေးၸူးလႄႈတၵ်ႈဢမ်ႇလႆႈယူႇ။ 

တၢင်းဢၼ်ႁဵတ်းႁႂ်ႈၽိတ်းပိူင်ႈဢပျႅတ်ႈ

၄၂ ၽူႈလႂ်သေဢမ်ႇဝႃႈၵေႃႉဢၼ်ႁဵတ်းႁႂ်ႈလုၵ်ႈဢွၼ်ႇဢၼ်ယုမ်ႇမၢတ်ႈၵဝ်ၼၼ်ႉသေၵေႃႉၵေႃႉလႆႈၶီႈလိုတ်းလႄႈလူမ်ႉၼၼ်ႉတီႈၵေႃႉၼၼ်ႉပေႃးမၼ်းၶၢမ်ႇဢဝ်တၢင်းဢၼ်ဢဝ်မၢၵ်ႇႁိၼ်လူၺ်ႁွႆႈသႂ်ႇၵႃႈတီႈၶေႃးမၼ်းလႄႈၶျႃးတူၵ်းၵႂႃႇၵႃႈၼႂ်းၼမ်ႉပၢင်ႇလၢႆႇၼၼ်ႉၸိုင်ယဵင်ႈၶႅၼ်းတၵ်းလီဢေႃႈ။ 

၄၃ ပေႃးမိုဝ်းမႂ်းႁဵတ်းႁႂ်ႈမႂ်းၶီႈလိုတ်းလႄႈလူမ်ႉၸိုင်တႅပ်းပႅတ်ႈသေတႃႉ။ တၢင်းဢၼ်မိုဝ်းလူႉသေၵေႃႈပေႃးလႆႈၶဝ်ႈၵႃႈၼႂ်းတၢင်းဢၼ်ဢသၢၵ်ႈလိပ်းၸိုင်ယဵင်ႈၶႅၼ်းတၵ်းလီသေတၢင်းဢၼ်မီးမိုဝ်းသွင်ၶွၼ်လႄႈ

၄၄ လႆႈၶၢမ်ႇတၢင်းဢၼ်ၶျႃးတူၵ်းသႂ်ႇၵႃႈၼႂ်းငႃႈရၢႆးၵႃႈၼႂ်းၽႆးဢၼ်ဢမ်ႇထၢတ်ႇဢမ်ႇယဵၼ်လႆႈ၊တီႈဢၼ်မူင်ႈဢမ်ႇတၢႆၽႆးဢမ်ႇမွတ်ႇၼၼ်ႉဢေႃႈ။ 

၄၅ ပေႃးတိၼ်မႂ်းႁဵတ်းႁႂ်ႈမႂ်းၶီႈလိုတ်းၸိုင်တႅပ်းပႅတ်ႈသေတႃႉ။ 

၄၆ တၢင်းဢၼ်တိၼ်လူႉသေၵေႃႈပေႃးလႆႈၶဝ်ႈၵႃႈၼႂ်းတၢင်းဢၼ်ဢသၢၵ်ႈလိပ်းၸိုင်ယဵင်ႈၶႅၼ်းတၵ်းလီသေတၢင်းဢၼ်မီးတိၼ်သွင်ၶွၼ်လႄႈလႆႈၶၢမ်ႇတၢင်းဢၼ်ၶျႃးတူၵ်းသႂ်ႇၵႃႈၼႂ်းငႃႈရၢႆးၵႃႈၼႂ်းၽႆးဢၼ်ဢမ်ႇထၢတ်ႇဢမ်ႇယဵၼ်လႆႈ၊တီႈဢၼ်မူင်ႈဢမ်ႇတၢႆၽႆးဢမ်ႇမွတ်ႇၼၼ်ႉဢေႃႈ။ 

၄၇ ပေႃးမၢၵ်ႇတႃမႂ်းႁဵတ်းႁႂ်ႈမႂ်းၶီႈလိုတ်းလႄႈလူမ်ႉၸိုင်ၶွၵ်းဢွၵ်ႇပႅတ်ႈသေတႃႉ။ တၢင်းဢၼ်မီးမၢၵ်ႇတႃၶွၼ်ၼိုင်ႈလႄႈလႆႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈၼၼ်ႉယဵင်ႈၶႅၼ်းလီသေတၢင်းဢၼ်မီးမၢၵ်ႇတႃသွင်ၶွၼ်လႄႈ

၄၈ လႆႈၶၢမ်ႇတၢင်းဢၼ်ၶျႃးတူၵ်းၵႃႈၼႂ်းငႃႈရၢႆးတီႈဢၼ်မူင်ႈဢမ်ႇတၢႆၽႆးဢမ်ႇမွတ်ႇၼၼ်ႉဢေႃႈ။ 

၄၉ ၵူၼ်းၵႃႈမီးတင်းသဵင်ႈတင်းလူင်တၵ်းလႆႈၶၢမ်ႇတၢင်းဢၼ်ဢဝ်ၵိူဝႆ်းသႂ်ႇဢေႃႈ။ တူဝ်ယိၸ်ႉဢၼ်ပုၵ်ႉၸေႃႇၵႃႈမီးတင်းသဵင်ႈတင်းလူင်ၵေႃႈတၵ်းလႆႈၶၢမ်ႇတၢင်း

ဢၼ်ဢဝ်ၵိူဝ်သႂ်ႇဢေႃႈ။ 

၅၀ ၵိူဝ်ၼႆႉလီဢေႃႈ။ၼႂ်းဝႃႈၼၼ်သေၵေႃႈပေႃးဢၼ်ၸဵမ်းမၼ်းႁၢႆၵႂႃႇယဝ်ႉၸိုင်တၵ်းၶိုၼ်းလႆႈဢၼ်ၸဵမ်းမၼ်းၸိူဝ်ႉၼင်ႇႁိုဝ်။ ၵႃႈၼႂ်းသူၼႆႉႁႂ်ႈမီးၵိူဝ်တႃႉ။ ၵေႃႉၼိုင်ႈလႄႈၵေႃႉၼိုင်ႈယူႇထုၵ်ႇထုၵ်ႇၵၼ်တႃႉ၊ဝႃႈၼင်ႇၼႆဢေႃႈ။