Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇမႃႇၵု

Chapter    ၁    ၂     ၃     ၄     ၅     ၆     ၇     ၈     ၉     ၁၀      ၁၁     ၁၂     ၁၃     ၁၄     ၁၅     ၁၆   

၁၃

ၼီႉမိၵ်ႈလၵ်ႈၶၼႃႇတီႈသုတ်းလိၼ်မိူင်း

၁ ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉဢွၵ်ႇၵႃႈၼႂ်းပိၵ်ႉမၢၼ်ႇၸဝ်ႈၵႂႃႇယူႇၼၼ်ႉၸိုင်တပႄးၸဝ်ႈၵေႃႉၼိုင်ႈလဝ်ႈလၢတ်ႈလႄႈဝႃႈ၊-သြႃႇၸဝ်ႈတူၺ်းသေၵမ်းၶႃႈ။ မၢၵ်ႇႁိၼ်ၸိူဝ်းၼႆႉယႂ်ႇၼႃႇလူင်လၢင်ၶႃႈဢေႃႈ။ ႁိူၼ်းတိူၵ်ႈၸိူဝ်းၼႆႉယႂ်ႇၼႃႇလူင်လၢင်ၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-

၂ တေႃႈလဵဝ်ၼႆႉမႂ်းႁၼ်တိူၵ်ႈဢၼ်ယႂ်ႇၼႃႇၸိူဝ်းၼႆႉယူႇဢမ်ႇၸႂ်ႈႁိုဝ်။ မၢၵ်ႇႁိၼ်ဢၼ်ယင်းဢမ်ႇလႆႈၶၢမ်ႇတၢင်းဢၼ်ၶျႃးတူၵ်းလႄႈတၵ်းတၢင်ႇယူႇၵႃႈၼိူဝ်ၵၼ်ၼၼ်ႉတၵ်းဢမ်ႇလႆႈမီးသလေုၵ်ႉ၊ဝႃႈၼင်ႇၼႆဢေႃႈ။ 

၃ လိုၼ်းၼၼ်ႉၼႂ်းမိူဝ်ႈဢၼ်မၼ်းၸဝ်ႈၼင်ႈယူႇၵႃႈၼိူဝ်လွႆသၼ်ႇလုၼ်ႇလႄႈဝၢႆႇၼႃႈတေႃႇပိၵ်ႉမၢၼ်ႇၸဝ်ႈယူႇၼၼ်ႉၸိုင်တီႈဢၼ်ပိူၼ်ႈဢမ်ႇမီးၼၼ်ႉပေႇတရု၊ယႃႇၵုပ်ႉ၊ယုဝ်းႁၢၼ်ႇ၊တင်းဢၼ်ႇတရေႇ၊ၶဝ်လဝ်ႈထၢမ်လႄႈဝႃႈ၊-

၄ လွင်ႈတၢင်းၸိူဝ်းၼႆႉတၵ်းပဵၼ်မႃးၶိင်ႇမိူဝ်ႈလႂ်ၶႃႈ။ မိူဝ်ႈဢၼ်လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉၸမ်ၶိင်ႇဢၼ်တၵ်းတဵမ်ထူၼ်ႈၼၼ်ႉတၵ်းမီးၼီႉမိၵ်ႈလၵ်ႈၶၼႃႇဢၼ်လႂ်ၶႃႈ။ ၸဝ်ႈႁဝ်းၶႅၼ်းတေႃႈလၢတ်ႈပၼ်တီႈႁဝ်းၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။ 

၅ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၼင်ႇႁိုဝ်ၽူႈလႂ်တၵ်းဢမ်ႇလႆႈပႅတ်ႉလႆႈလႅၼ်သူၸိုင်ႁဵတ်းသတိတႃႉ။ 

၆ ၵူၼ်းၼမ်ၼႃႇတၵ်းဢဝ်ၸိုဝ်သဵင်ၵဝ်သေလႄႈမႃးဝႃႈ၊-ၵဝ်ၼႆႉပဵၼ်ၸဝ်ႈၼၼ်ႉဢေႃႈ၊ဝႃႈၼႆလႄႈပႅတ်ႉလႅၼ်ၵူၼ်းၼမ်ၼႃႇဢေႃႈ။ 

၇ မိူဝ်ႈဢၼ်သူငိၼ်းလွင်ႈဢၼ်တိုၵ်းသိုၵ်းလႂ်သတၢင်းသဵင်ၶၢဝ်ႇလွင်ႈတၢင်းဢၼ်တိုၵ်းသိုၵ်းလႂ်ၼၼ်ႉၸိုင်ယႃႇပေမႆႈၸႂ်ၶီၸႂ်။ လွင်ႈတၢင်းၸိူဝ်းၼႆႉတၵ်းလႆႈပဵၼ်ဢေႃႈ။ ၼႂ်းဝႃႈၼၼ်သေၵေႃႈဢမ်ႇပႆႇပဵၼ်တီႈသုတ်ႈတီႈၵွႆလူးၵွၼ်ႇ။ 

၈ ၵူၼ်းမဵဝ်းၼိုင်ႈလႄႈမဵဝ်းၼိုင်ႈမိူင်းၼိုင်ႈလႄႈမိူင်းၼိုင်ႈတၵ်းၶတ်းတႃႉၵၼ်ဢေႃႈ။ တၵ်းပဵၼ်တၢင်းဢၼ်ဢိင်ႇသၼ်ႇၵူႈတီႈၵူႈလႅၼ်ဢေႃႈ။ တၢင်းဢၼ်ဢိုပ်းတၢင်းၵိၼ်လႂ်တၢင်းဢၼ်ဢမ်ႇတႄႇဢမ်ႇၼိမ်လႂ်ၵေႃႈတၵ်းပဵၼ်မႃးဢေႃႈ။ 

၉ လွင်ႈတၢင်းၸိူဝ်းၼႆႉပဵၼ်ၵေႃႇၸႃႉငဝ်ႈႁၢၵ်ႈတုၵ်ႉၶႃႉတၢင်းၶီတၢင်းမႆႈဢေႃႈ။ သူႁဵတ်းသတိတႃႉ။ လွင်ႈမၼ်းၸမ်းၶဝ်တၵ်းဢဝ်သူဢၢပ်ႈၵႃႈတီႈလုမ်းလူင်ဢေႃႈ။ တၵ်းပေႃႉယႅၼ်ႉသူၵႃႈၼႂ်းၸရွပ်ႈႁေႃးတြႃးလႂ်ဢေႃႈ။ ၼင်ႇႁိုဝ်သူတၵ်းပဵၼ်သၢၵ်ႈသေႇတီႈၶဝ်ၼၼ်ႉၸိုင်ၵွပ်ႈပိူဝ်ႈၵဝ်လႄႈသူတၵ်းႁွတ်ႈထိုင်ၵႃႈတီႈၽၢႆႇၼႃႈဢမၢတ်ႈၽွင်းမိူင်းလႂ်ဢိၵ်ႇတင်းၶုၼ်ႁေႃၶမ်းလႂ်ဢေႃႈ။ 

၁၀ တၵ်းႁေႃးလၢတ်ႈတြႃးသတၢင်းသိူဝ်းပျေႃႇတီႈၵူၼ်းမဵဝ်းတင်းသဵင်ႈတင်းလူင်ဢွၼ်တၢင်းဢေႃႈ။ 

၁၁ မိူဝ်ႈဢၼ်ၶဝ်ဢဝ်သူၵႂႃႇႁႂ်ႈလႆႈဢၢပ်ႈၼၼ်ႉၸိုင်တၵ်းလႆႈလၢတ်ႈၸိူဝ်ႉၼင်ႇႁိုဝ်ဝႃႈၼႆယႃႇပေမႆႈၸႂ်။ ယႃႇပေၶႆႈၸႂ်ဝူၼ်ႉၸႂ်ဝႆႉဢွၼ်တၢင်း။ 

လၢတ်ႈၵႂၢမ်းဢၼ်သူလႆႈမိူဝ်ႈၶိင်ႇၼၼ်ႉၵူၺ်းတႃႉ။ လွင်ႈမၼ်းၸမ်းၵႂၢမ်းၼၼ်ႉပဵၼ်သူလၢတ်ႈဢမ်ႇၸႂ်ႈ။ ပဵၼ်ဝိၺိၺ်ႇမူတ်းၸၢင်ႇၸဝ်ႈလၢတ်ႈဢေႃႈ။ 

၁၂ ၶိင်ႇၵႃႇလႃႉမိူဝ်ႈၼၼ်ႉပီႈၼွင်ႉၵၼ်ၵေႃႉၼိုင်ႈလႄႈၵေႃႉၼိုင်ႈတၵ်းဢဝ်ၵၼ်ဢၢပ်ႈႁႂ်ႈလႆႈတၢႆဢေႃႈ။ ပေႃႈတၵ်းဢဝ်လုၵ်ႈလၢင်းဢၢပ်ႈဢေႃႈ။ လုၵ်ႈလၢင်းၵေႃႈတၵ်းလုၵ်ႉယူႇၽၢႆႇၼိုင်ႈတင်းပေႃႈမေႈသေလႄႈႁႂ်ႈလႆႈတၢႆဢေႃႈ။ 

၁၃ ၵူၼ်းတင်းသဵင်ႈတင်းလူင်တၵ်းၸင်းသူၵွပ်ႈပိူဝ်ႈၸိုဝ်သဵင်ၵဝ်ဢေႃႈ။ ၽူႈလႂ်သေဢမ်ႇဝႃႈၵေႃႉဢၼ်မၼ်ႈၶိုင်ႇတေႃႇထိုင်ႁွတ်ႈတီႈသုတ်းတီႈၵွႆၼၼ်ႉၵေႃႉၼၼ်ႉတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။ 

၁၄ မိူဝ်ႈဢၼ်သူလႆႈႁၼ်လွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်ၸၢင်ႊယႃႉၸၢင်ႊယူၵ်ႉၼၼ်ႉၸုၵ်းယူႇၵႃႈၼႂ်းတီႈဢၼ်ဢမ်ႇထုၵ်ႇလီၼၼ်ႉၸိုင်ႁႂ်ႈၵေႃႉဢၼ်လူႈတူၺ်းၵျၢမ်းလိၵ်ႈၼၼ်ႉႁူႉတႃႉ။ 

၁၅ မိူဝ်ႈဢၼ်လႆႈႁၼ်ၸိူဝ်ႉၼင်ႇၼၼ်ၸိုင်ႁႂ်ႈၶဝ်ၸိူဝ်းဢၼ်မီးၼႂ်းမိူင်းယုတၼၼ်ႉပၢႆႊၶိုၼ်ႈၵႂႃႇၵႃႈၼိူဝ်လွႆပုၼ်ႉတႃႉ။ ယႃႇႁႂ်ႈၵေႃႉဢၼ်မီးယူႇၵႃႈၼိူဝ်ၸွမ်ႁိူၼ်းၼၼ်ႉလူင်းၵႂႃႇၵႃႈၼႂ်းႁိူၼ်းႁႂ်ႈလႆႈဢဝ်သေၸိူဝ်ႉသေပိူင်။ 

၁၆ ၵေႃႉဢၼ်မီးၵႃႈၼႂ်းတူင်ႈၼႃးၵေႃႈယႃႇႁႂ်ႈၶိုၼ်းမိူဝ်းတၢင်းလင်ႁႂ်ႈလႆႈဢဝ်ၶူဝ်းၼုင်ႈတၢင်းမႆႊမၼ်း။ 

၁၇ ဝၼ်းၼၼ်ႉတီႈမေႈယိင်းဢၼ်တူဝ်ဢမ်ႇသႃႇဢိၵ်ႇတင်းမေႈယိင်းဢၼ်မီးလုၵ်ႈဢွၼ်ႇဢၼ်ဢမ်ႇပႆႇၽၢတ်ႇၼူမ်းတင်းလၢႆၼၼ်ႉတၵ်းမီးဢႃႉမင်ႇၵလႃႇဢေႃႈ။ 

၁၈ လွင်ႈၼင်ႇႁိုဝ်ၶိင်ႇၼၼ်ႉတၵ်းဢမ်ႇလႆႈတူၵ်းမိူဝ်ႈၶိင်ႇၵတ်းၸိုင်သူးတွင်းတႃႉ။ 

၁၉ လွင်ႈမၼ်းၸမ်းတုၵ်ႉၶႃႉဢၼ်ဢမ်ႇတွၼ်ႉပဵၼ်သေပွၵ်ႈၸဵမ်မိူဝ်ႈၵေႃႇၸႃႉၵမ်ႇၽႃႇဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ႁၢၼ်ႉတေႃႇဝၼ်းမိူဝ်ႈလဵဝ်ၵမ်းလိုၼ်းမိူဝ်းၼႃႈၵေႃႈ

တၵ်းဢမ်ႇပဵၼ်ထႅင်ႈသေပွၵ်ႈၼၼ်ႉတၵ်းပဵၼ်ၼႂ်းၶိင်ႇၵႃႇလႃႉမိူဝ်ႈၼၼ်ႉဢေႃႈ။ 

၂၀ ပေႃးၽြႃးပဵၼ်ၸဝ်ႈဢမ်ႇႁႂ်ႈၶိင်ႇၵႃႇလႃႉၼၼ်ႉပွတ်းၸိုင်ၽူႈလႂ်ဢမ်ႇလွတ်ႈလႆႈသေၵေႃႉသေၵူၼ်း။ ၵွပ်ႈပိူဝ်ႈၶဝ်ၸိူဝ်းဢၼ်မၼ်းၸဝ်ႈလိူၵ်ႈၵဵပ်းဢဝ်ၼၼ်ႉလႄႈမၼ်းၸဝ်ႈႁႂ်ႈၶိင်ႇၵႃႇလႃႉၼၼ်ႉပွတ်းဢေႃႈ။ 

၂၁ မိူဝ်ႈၼၼ်ႉပေႃးသေၵေႃႉသေၵူၼ်းဝႃႈ၊-တူၺ်းလူႊၸဝ်ႈၶရိၸ်ႉမီးၵႃႈတီႈၼႆႉဢေႃႈမီးၵႃႈတီႈၼၼ်ႉဢေႃႈ၊ဝႃႈၼင်ႇၼႆၵေႃႈ၊ယႃႇပေယုမ်ႇ။ 

၂၂ လွင်ႈမၼ်းၸမ်း၊ၶဝ်ၸိူဝ်းဢၼ်ႁဵတ်းမိူၼ်ၼင်ႇႁၢင်ႊၸဝ်ႈၶရိၸ်ႉဢိၵ်ႇတင်းမိၵ်ႉသႃႇပရေႃးၽႅတ်ႈတင်းလၢႆတၵ်းပေႃႇမႃးလႄႈတၵ်းၼႄပျႃးၼီႉမိၵ်ႈလၵ်ႈၶၼႃႇဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆႁႂ်ႈလႆႈပႅတ်ႉလႅၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်လိူၵ်ႈၵဵပ်းဢဝ်ၸိူဝ်းၼၼ်ႉဢေႃႈ။ 

၂၃ သူႁဵတ်းသတိတႃႉ။ တူၺ်းလူႊၵဝ်လၢတ်ႈလွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉဝႆႉဢွၼ်တၢင်းယဝ်ႉ။ 

၂၄ ဝၢႆးလင်ၶိင်ႇၵႃႇလႃႉတုၵ်ႉၶႃႉတၢင်းၽၢၼ်ၼၼ်ႉၵၢင်ဝၼ်းတၵ်းလပ်းသိင်ႇဢေႃႈ။ 

၂၅ လိူၼ်တၵ်းဢမ်ႇပၼ်ဢၼ်လႅင်း။ လၢဝ်ၵၢင်ႁၢဝ်တၵ်းတူၵ်းသေၵႃႈၼိူဝ်ၵၢင်ႁၢဝ်ဢေႃႈ။ တၼ်းၶူဝ်းၵၢင်ႁၢဝ်တင်းလၢႆၵေႃႈတၵ်းသၼ်ႇၶွၼ်းဝႆဢေႃႈ။ 

၂၆ မိူဝ်ႈၼၼ်ႉၵူၼ်းတင်းလၢႆတၵ်းလႆႈႁၼ်လုၵ်ႈၵူၼ်းပႃးတင်းမူၼ်တၼ်းၶူဝ်းဢႃႇၼူႉၽေႃႇမၼ်းၸဝ်ႈဢၼ်ယႂ်ႇၼႃႇၼၼ်ႉသေလႄႈၵျွႃးမႃးၵႃႈၼိူဝ်မွၵ်ႇၵုမ်ႈဢေႃႈ။ 

၂၇ မိူဝ်ႈၼၼ်ႉမၼ်းၸဝ်ႈတၵ်းပွႆႇၸႂ်ႉတမၢၼ်ႇၵၢင်ႁၢဝ်ၸဝ်ႈတင်းလၢႆမႃးလႄႈႁႂ်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်လိူၵ်ႈၵဵပ်းဢဝ်ယဝ်ႉၼၼ်ႉလုၵ်ႉသေၵႃႈတီႈသီႇၸဵင်ႇပႅတ်ႇၼႃႈၵူႈတီႈၵူႈလႅၼ်တႂ်ႈၽႃႉၵၢင်ႁၢဝ်မႃးၸူႉၵၼ်တုမ်ၵၼ်ဢေႃႈ။ 

၂၈ ဢဝ်တူၼ်ႈမၢၵ်ႇလိူဝ်ႇသၢင်းၽေႃးႁဵတ်းဢူႉပမႃႇလႄႈသွၼ်ဢဝ်တႃႉ။ မိူဝ်ႈဢၼ်ၵိင်ႇမၼ်းၶႃႊမၼ်းၼုမ်ႇလႄႈဢွၵ်ႇမႂ်ႊယူႇၼၼ်ႉၸိုင်သူႁူႉလွင်ႈဢၼ်ဝႃႈၸမ်တၵ်းႁွတ်ႈထိုင်ၶိင်ႇႁႅင်ႈဢေႃႈ။ 

၂၉ မိူၼ်ၼင်ႇၼၼ်မိူဝ်ႈဢၼ်သူႁၼ်လွင်ႈတၢင်းၸိူဝ်းၼႆႉပဵၼ်မႃးယူႇၼၼ်ႉၸိုင်ႁူႉလွင်ႈဢၼ်ဝႃႈၶိင်ႇမိူဝ်ႈၼၼ်ႉလုၵ်ႈၵူၼ်းႁွတ်ႈၸမ်မႃးၵႃႈတီႈႁိမ်းၽၵ်းတူယဝ်ႉ၊ဢၼ်ဝႃႈၼၼ်ႉတႃႉ။ 

၃၀ ၵဝ်ဝႃႈတီႈၸိုဝ်ႈတီႈၸႂ်ႈၸမ်းလွင်ႈတၢင်းတင်းသဵင်ႈတင်းလူင်ၸိူဝ်းၼႆႉတၵ်းပဵၼ်မႃးၸူဝ်ႈဢၼ်ၵူၼ်းဢၼ်မီးယူႇတေႃႈလဵဝ်ၸိူဝ်းၼႆႉယင်းဢမ်ႇပႆႇသဵင်ႈပႆႇမူတ်းၼၼ်ႉဢေႃႈ။ 

၃၁ ပဵၵ်ႉသမ်ႉၽႃႉၵၢင်ႁၢဝ်တင်းလိၼ်မိူင်းၼႆႉတၵ်းႁၢႆလၢႆၵႂႃႇသေၵေႃႈၵႂၢမ်းၵဝ်

ၼႆႉတၵ်းဢမ်ႇႁၢႆလႆႈ။ 

ၶိင်ႇလႂ်မိူဝ်ႈလႂ်ဢမ်ႇႁုႉ

၃၂ ၶိင်ႇၼႃႇရီဝၼ်းၼၼ်ႉၸမ်းၽႂ်ဢမ်ႇႁူႉ။ တမၢၼ်ႇၵၢင်ႁၢဝ်တင်းလၢႆၵေႃႈဢမ်ႇႁူႉ။ လုၵ်ႈၸဝ်ႈၵေႃႈဢမ်ႇႁူႉ။ 

၃၃ ပေႃႈၸဝ်ႈပႃးလဵဝ်ၵူၺ်းႁူႉဢေႃႈ။ ပိူဝ်ႈဢၼ်သူဢမ်ႇႁူႉၶိင်ႇၵႃႇလႃႉၼၼ်ႉတၵ်းႁွတ်ႈထိုင်မႃးမိူဝ်ႈလႂ်ၼၼ်ႉလႄႈႁဵတ်းသတိလႄႈပႂ်ႉထႃႈယူႇတႃႉ။ 

၃၄ ဢူႉပမႃႇၸမ်းလုၵ်ႈၵူၼ်းၼၼ်ႉမိူၼ်ၸိူဝ်ႉၼင်ႇၵူၼ်းၵေႃႉၼိုင်ႈဢၼ်ဢဝ်ပုၼ်ႈၽွၼ်းဢၢပ်ႈပၼ်တီႈၵူၼ်းဢွၼ်ႇတူဝ်ၸဝ်ႈၵဝ်ႇတင်းလၢႆဢၼ်တၵ်းလႆႈႁဵတ်းႁင်းၽႂ်ႁင်းမၼ်းၼၼ်ႉသေလႄႈသင်ႇလၢတ်ႈဝႆႉတီႈၵေႃႉဢၼ်ပႂ်ႉၽၵ်းတူၼၼ်ႉလႄႈဝႃႈ၊-ပႂ်ႉၽၵ်းတူတႃႉ၊ဝႃႈၼင်ႇၼႆယဝ်ႉၸင်ႇၵႂႃႇတၢင်ႇဝၢၼ်ႈတၢင်ႇမိူင်းသေဢေႃႈ။ 

၃၅ ပိူဝ်ႈဢၼ်သူဢမ်ႇႁူႉၸဝ်ႈႁိူၼ်းၼၼ်ႉတၵ်းၶိုၼ်းႁွတ်ႈမႃးမိူဝ်ႈလႂ်ၶိင်ႇလႂ်၊တၵ်းပဵၼ်ၶိင်ႇႁူဝ်ၶမ်ႈႁိုဝ်၊ၶိင်ႇတဵင်ႈၶိုၼ်းႁိုဝ်၊ၶိင်ႇၵႆႇၶၼ်ႁိုဝ်၊ၶိင်ႇၵၢင်ၼႂ်ႁိုဝ်ၼၼ်ႉလႄႈပႂ်ႉထႃႈယူႇတႃႉ။ 

၃၆ ပေႃးဢမ်ႇၼၼ်မၼ်းတၵ်းၶိုၵ်ႉၶၵ်ႉၶိုၼ်းမႃးလႄႈထူပ်းႁၼ်သူၼွၼ်းလပ်းယူႇဢေႃႈ။ 

၃၇ ဢၼ်ၵဝ်လၢတ်ႈတီႈသူဝႃႈ၊-ပႂ်ႉထႃႈယူႇတႃႉ၊ဝႃႈၼင်ႇၼႆၼၼ်ႉၵဝ်ဝႃႈတီႈၵူၼ်းတင်းသဵင်ႈတင်းလူင်ဢေႃႈ၊ဝႃႈၼင်ႇၼႆဢေႃႈ။