Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၄

ၸဝ်ႈယေႇသုၶၢမ်ႇတၢင်းဢၼ်ၸႃႇတၢၼ်ႇမႃႇၼၢတ်ႈၸၢမ်းတူၺ်း

၁ ၸဝ်ႈယေႇသုၼၼ်ႉတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈယူႇသေလႄႈၼႂ်းမိူဝ်ႈဢၼ်လုၵ်ႉသေၵႃႈတီႈၼမ်ႉႁွင်ႊယေႃးတၢၼ်ႇၶိုၼ်းမိူဝ်းယူႇၼၼ်ႉၸိုင်ဝိၺိၺ်ႇမူတ်းၸၢင်ႇၸဝ်ႈဢဝ်မၼ်းၸဝ်ႈၵႂႃႇသူင်ႇၵႃႈတီႈၼႂ်းထိူၼ်ႇဢေႃႈ။

၂ သီႇသိပ်းဝၼ်းတဵမ်တဵမ်မၼ်းၸဝ်ႈၶၢမ်ႇတၢင်းဢၼ်ၸႃႇတၢၼ်ႇမႃႇၼၢတ်ႈၸုင်ႇၸၢမ်းၸူဝ်းဢဝ်ဢေႃႈ။သီႇသိပ်းဝၼ်းတဵမ်တဵမ်မၼ်းၸဝ်ႈဢမ်ႇၵိၼ်တၢင်းၵိၼ်တၢင်းၶူပ်း။ပူၼ်ႉသေၶိင်ႇၼၼ်ႉယဝ်ႉမၼ်းၸဝ်ႈတွင်ႉမႆႈဢေႃႈ။

၃ ၸႃႇတၢၼ်ႇမႃႇၼၢတ်ႈလဝ်လၢတ်ႈလႄႈဝႃႈ၊-ပေႃးၸဝ်ႈႁဝ်းၸႂ်ႈလုၵ်ႈၽြႃးပဵၼ်ၸဝ်ႈတႄႉၸိုင်မီးဢမိင်ႉႁႂ်ႈမၢၵ်ႇႁိၼ်ၼႆႉပဵၼ်ၶဝ်ႈမုၼ်းသေလႄႈၵိၼ်သေၵမ်း၊ဝႃႈၼင်ႇၼႆဢေႃႈ။

၄ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ဢၼ်မီးၼႂ်းၵျၢမ်းလိၵ်ႈလႄႈဝႃႈၸမ်း၊-ၵူၼ်းတၵ်းလႆႈဢဝ်ၶဝ်ႈမုၼ်းလဵင်ႉၸႂ်ၵူၺ်းဢမ်ႇၸႂ်ႈဝႃႈၼင်ႇၼႆဢေႃႈ။

၅ ၵမ်းၼၼ်ႉၸႃႇတၢၼ်ႇမႃႇၼၢတ်ႈသမ်ႉဢဝ်မၼ်းၸဝ်ႈၵႂႃႇၵႃႈၼိူဝ်လွႆဢၼ်သုင်ၼၼ်ႉလႄႈၼႄပျႃႉမိူင်းၵူၼ်းတင်းသဵင်ႈတင်းလူင်ဢၼ်မီးၵႃႈၼႂ်းလေႃးၵႃႉၼႆႉၼၼ်ႉတီႈမၼ်းၸဝ်ႈသေလႄႈလၢတ်ႈဝႃႈ၊-

၆ ပေႃးၸဝ်ႈႁဝ်းႁဵတ်းဝၢတ်ႈၵူဝ်းၵႂၢႆႇဝႆႈသႃၵဝ်ၸိုင်ၵဝ်တၵ်းပၼ်မုၼ်တၼ်းၶူဝ်းဢႃႇၼႃႇဢၼ်လႆႈဢုပ်ႉပိူင်ႇၵႃႈမီးတင်းသဵင်ႈတင်းလူင်ၸိူဝ်းၼႆႉၵႃႈတီႈၸဝ်ႈႁဝ်းၶႃႈဢေႃႈ။

၇ တၵ်းပဵၼ်ၶွင်ၸဝ်ႈႁဝ်းၶႃႈဢေႃႈ။လွင်ႈမၼ်းၸမ်းလွင်ႈတၢင်းၸိူဝ်းၼႆႉယင်းပေႃးလႆႈဢၢပ်ႈဝႆႉတီႈၵဝ်ယဝ်ႉ။ၵဝ်ပၼ်လႆႈတီႈၵေႃႉဢၼ်ၵဝ်ၶႂ်ႈပၼ်ၼၼ်ႉဢေႃႈ၊ဝႃႈၼင်ႇၼႆဢေႃႈ။

၈ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ဢၼ်မီးၼႂ်းၵျၢမ်းလိၵ်ႈလႄႈဝႃႈၸမ်း၊-မႂ်းတၵ်းလႆႈၵူဝ်းၵႂၢႆႇဝႆႈသႃၽြႃးပဵၼ်ၸဝ်ႈမႂ်းထႃႇဝရႃႉၽြႃးသူႇလဵဝ်ပႃးလဵဝ်ၵူၺ်းဢေႃႈ။တၵ်းလႆႈႁဵတ်းဝၢတ်ႈတီႈမၼ်းၸဝ်ႈၼၼ်ႉၵူၺ်းဢေႃႈ၊ဝႃႈၼင်ႇၼႆဢေႃႈ။

၉ ၵမ်းၼၼ်ႉၸႃႇတၢၼ်ႇမႃႇၼၢတ်ႈသမ်ႉဢဝ်မၼ်းၸဝ်ႈၵႂႃႇၵႃႈတီႈဝဵင်းယေႇရုသလႅမ်ႇလႄႈႁႂ်ႈမၼ်းၸဝ်ႈၸုၵ်းယူႇၵႃႈၼိူဝ်ပၢႆၸိၵ်းၸွမ်ပိၵ်ႉမၢၼ်ႇၸဝ်ႈယဝ်ႉၸင်ႇလၢတ်ႈလႄႈဝႃႈ၊-ပေႃးၸဝ်ႈႁဝ်းၸႂ်ႈလုၵ်ႈၽြႃးပဵၼ်ၸဝ်ႈတႄႉၸိုင်ၸဝ်ႈႁဝ်းဢဝ်တူဝ်ၸဝ်ႈၵဝ်ႇတူၵ်းသေၵႃႈတီႈၼိူဝ်ၼႆႉၵႂႃႇၵႃႈတႂ်ႈသေၵမ်း။

၁၀ ဢၼ်မီးၼႂ်းၵျၢမ်းလိၵ်ႈလႄႈဝႃႈ၊-ၼင်ႇႁိုဝ်တၵ်းပႂ်ႉလူပႂ်ႉတူၺ်းမႂ်းလႄႈဢမ်ႇပၼ်ႁႂ်ႈတိၼ်မႂ်းတိူဝ်ႉမၢၵ်ႇႁိၼ်ၸိုင်မၼ်းၸဝ်ႈတၵ်းသင်ႇလၢတ်ႈလွင်ႈမႂ်းဝႆႉတီႈတမၢၼ်ႇၵၢင်ႁၢဝ်တင်းလၢႆလႄႈ၊

၁၁ ၶဝ်ၵေႃႈတၵ်းဢဝ်တင်းမိုဝ်းၶဝ်ႁႄႉႁွပ်ႇယွင်ႊဢဝ်မႂ်းဝႆႉဢေႃႈ၊ဝႃႈၼင်ႇၼႆယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-

၁၂ ဢၼ်မီးၼႂ်းၵျၢမ်းလိၵ်ႈထႅင်ႈလႄႈဝႃႈၸမ်းမႂ်းဢမ်ႇလႆႈႁဵတ်းတၢင်းဢၼ်ၸၢမ်းတူၺ်းၽြႃးပဵၼ်ၸဝ်ႈမႂ်းထႃႇဝရႃႉၽြႃးၼၼ်ႉ၊ဝႃႈၼင်ႇၼႆဢေႃႈ။

၁၃ ၸႃႇတၢၼ်ႇမႃႇၼၢတ်ႈၼၼ်ႉမိူဝ်ႈဢၼ်ႁဵတ်းတၢင်းဢၼ်ၸုင်ႇၸၢမ်းၸူဝ်းဢဝ်တင်းသဵင်ႈတင်းလူင်ယဝ်ႉတူဝ်ၸိုင်ဢွၵ်ႇသေၵႃႈတီႈမၼ်းၸဝ်ႈၼၼ်ႉၵႂႃႇဢေႃႈ။

၁၄ ၸဝ်ႈယေႇသုၼၼ်ႉပႃးတင်းတၼ်းၶူဝ်းဝိၺိၺ်ႇမူတ်းၸၢင်ႇၸဝ်ႈသေယဝ်ႉၶိုၼ်းမိူဝ်းၵႂႃႇမိူင်းၵႃႇလိလႄးပုၼ်ႉလႄႈသတၢင်းသဵင်ၶၢဝ်ႇမၼ်းၸဝ်ႈၸွတ်ႇတူဝ်ၵႂႃႇၵႃႈတီႈႁိမ်းႁွမ်းၵူႈတီႈၵူႈလႅၼ်ဢေႃႈ။

၁၅ မၼ်းၸဝ်ႈသင်ႇသွၼ်ပၼ်ၵႃႈၼႂ်းၸရွပ်ႈႁေႃးတြႃးတင်းလၢႆလႄႈၵူၼ်းတင်းသဵင်ႈတင်းလူင်ယွင်ႈယေႃးမၼ်းၸဝ်ႈဢေႃႈ။

၁၆ မိူဝ်ႈဢၼ်ၶိုၼ်းႁွတ်ႈထိုင်ၵႃႈတီႈဝဵင်းၼႃႇၸရႅတ်ႉတီႈဢၼ်မၼ်းၸဝ်ႈယႂ်ႇမႃးၼၼ်ႉၸိုင်ၵႃႈၼင်ႇဢၼ်ထုင်းၸၢမ်ႇမီးဝႆႉၼၼ်ႉမၼ်းၸဝ်ႈၶဝ်ႈၵႃႈၼႂ်းၸရွပ်ႈႁေႃးတြႃးသေလႄႈလုၵ်ႉၸုၵ်းႁႂ်ႈလႆႈၽတ်းၵျၢမ်းလိၵ်ႈၼႂ်းဝၼ်းၵမ်သိၼ်ဢေႃႈ။

၁၇ မၼ်းၸဝ်ႈႁပ်ႉၶၢမ်ႇဢဝ်ၵျၢမ်းလိၵ်ႈပရေႃးၽႅတ်ႈဢိသႃႇယလႄႈမိူဝ်ႈဢၼ်ၽုၺ်ႇၵျၢမ်းလိၵ်ႈၼၼ်ႉၸိုင်ထူပ်းႁၼ်ၵျၢမ်းလိၵ်ႈတီႈဢၼ်ဝႃႈ၊-

၁၈ ဝိၺိၺ်ႇထႃႇဝရႃႉၽြႃးၼၼ်ႉတႄႇယူႇၼိူဝ်ၵဝ်ဢေႃႈ။လွင်ႈမၼ်းၸမ်းၼင်ႇႁိုဝ်တၵ်းလႆႈမွၵ်ႇလၢတ်ႈသတၢင်းသိူဝ်းပျေႃႇၵႃႈတီႈၵူၼ်းၽၢၼ်တင်းလၢႆၼၼ်ႉမၼ်းၸဝ်ႈပၼ်ၽိၵ်ႉသိၵ်ႈတီႈၵဝ်ယဝ်ႉ။ၼင်ႇႁိုဝ်တၵ်းလႆႈၼႄပျႃးလွင်ႈတၢင်းဢၼ်ပွႆႇလွတ်ႈတီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တီႉဢဝ်ၶင်ဝႆႉယူႇၼၼ်ႉဢိၵ်ႇတင်းလွင်ႈတၢင်းဢၼ်ၶဝ်ၸိူဝ်းဢၼ်တႃမွတ်ႇတင်းလၢႆတၵ်းၶိုၼ်းႁၼ်လႄႈသင်ၼင်ႇႁိုဝ်တၵ်းလႆႈၵႄႇသႄႇဢဝ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသေးၼၼ်ႉလႄႈသင်၊

၁၉ ၼင်ႇႁိုဝ်တၵ်းလႆႈမွၵ်ႇလၢတ်ႈၶိင်ႇၵႃႇလႃႉပီႊမင်ႇၵလႃႇထႃႇဝရႃႉၽြႃးၼၼ်ႉလႄႈသင်၊မၼ်းၸဝ်ႈပွႆႇၸႂ်ႉၵဝ်မႃးယဝ်ႉ၊ဝႃႈၼင်ႇၼႆဢေႃႈ။

၂၀ မၼ်းၸဝ်ႈဢဝ်ၵျၢမ်းလိၵ်ႈၼၼ်ႉႁမ်းၵဵၼ်လႄႈပၼ်တီႈၵေႃႉဢၼ်ပႂ်ႉၸရွပ်ႈႁေႃးတြႃးၼၼ်ႉယဝ်ႉၸင်ႇၼင်ႈသေဢေႃႈ။ၶဝ်ၸိူဝ်းဢၼ်မီးယူႇၵႃႈၼႂ်းၸရွပ်ႈႁေႃးတြႃးတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ယႅၵ်ႉတူၺ်းမၼ်းၸဝ်ႈၸေးၸေးယူႇဢေႃႈ။

၂၁ မၼ်းၸဝ်ႈၵေႃႈလၢတ်ႈလႄႈဝႃႈ၊-ဝၼ်းမိူဝ်ႈၼႆႉၼႂ်းၵျၢမ်းလိၵ်ႈတီႈၼႆႉတဵမ်ထူၼ်ႈၵႃႈတီႈႁူသူယဝ်ႉ၊ဝႃႈၼင်ႇၼႆဢေႃႈ။

၂၂ ၶဝ်တင်းသဵင်ႈတင်းလူင်ႁပ်ႉတုင်းဢဝ်မၼ်းၸဝ်ႈလႄႈဢၢမ်းဢေႃးၵႂၢမ်းလီၵႂၢမ်းဝၢၼ်ဢၼ်ဢွၵ်ႇသူပ်းမၼ်းၸဝ်ႈၼၼ်ႉလႄႈဝႃႈ၊-ၵေႃႉၼႆႉပဵၼ်လုၵ်ႈၸၢႆးယုဝ်းသႅပ်ႉဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။

၂၃ မၼ်းၸဝ်ႈၵေႃႈလၢတ်ႈလႄႈဝႃႈ၊-ဢမၢၼ်ႇၶၼ်ပဵၼ်သူတၵ်းဢဝ်ၵႂၢမ်းဢူႉပမႃႇလႄႈဝႃႈ၊-မေႃယႃဢိူၺ်း။ႁႂ်ႈတၢင်းၶႆႈတၢင်းပဵၼ်တူဝ်ၸဝ်ႈၵဝ်ႇႁၢႆတႃႉ။ၵႃႈဢၼ်ႁဝ်းလႆႈငိၼ်းလွင်ႈဢၼ်မႂ်းႁဵတ်းၼႂ်းဝဵင်းၵပိူဝ်ႇၼေႇဢုမ်ႇၼၼ်ႉတင်းသဵင်ႈတင်းလူင်ၼၼ်ႉၵႃႈၼႂ်းဝဵင်းၸဝ်ႈၵဝ်ႇၼႆႉၵေႃႈႁဵတ်းသေၵမ်းတႃႉ၊ဝႃႈၼင်ႇၼႆဢိူဝ်ႈ။

၂၄ ၼႂ်းဝႃႈၼၼ်သေၵေႃႈၵဝ်ဝႃႈတီႈၸိုဝ်ႈတီႈၸႂ်ႈၸမ်းပရေႃးၽႅတ်ႈၵေႃႉဢၼ်လႆႈၶၢမ်ႇတၢင်းဢၼ်ႁပ်ႉတုင်းဢဝ်တီႈမိူင်းတူဝ်ၸဝ်ႈၵဝ်ႇၼၼ်ႉဢမ်ႇမီးသေၵေႃႉ။

၂၅ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၼႂ်းၸူဝ်ႈပၢၼ်ပရေႃးၽႅတ်ႈဢေးလိယၼၼ်ႉပဵၼ်ဢၼ်ၽႃႉလႅင်ႊသၢမ်ပီႊပၢႆႁူၵ်းလိူၼ်တဵမ်တဵမ်လႄႈၵႃႈတီႈမိူင်းၼႆႉတင်းမိူင်းတၢင်းၵိၼ်တၢင်းၶူပ်းၵႃႊပဵင်းၼႃႇလူင်လၢင်ဢေႃႈ။ၼႂ်းမိူင်းဢိသရေႇလၼၼ်ႉၵေႃႈမီးမေႈမုၵ်ႉမေႈမၢႆႈၼမ်ၼႃႇဢေႃႈ။

၂၆ ၼႂ်းဝႃႈၼၼ်သေၵေႃႈလိူဝ်သမေေႈမုၵ်ႉမေႈမၢႆႈၵေႃႉၼိုင်ႈဢၼ်ပဵၼ်ၵူၼ်းဝဵင်းၸႃႇရိပ်ႉတမိူင်းၸိတုမ်ႇၼၼ်ႉဢေးလိယဢမ်ႇလႆႈၶၢမ်ႇတၢင်းဢၼ်ပွႆႇၸႂ်ႉၵႂႃႇၸူးၵႃႈတီႈမေႈမုၵ်ႉမေႈမၢႆႈၸိူဝ်းၼၼ်ႉသေၵေႃႉ။

၂၇ ၼႂ်းၸူဝ်ႈပၢၼ်ပရေႃးၽႅတ်ႈဢေးလိသေးၼၼ်ႉၵေႃႈၵႃႈတီႈမိူင်းဢိသရေႇလၼႆႉမီးၵူၼ်းပဵၼ်တုတ်ႈၼမ်ၼႃႇဢေႃႈ။လိူဝ်သေၵူၼ်းသုရိဢၼ်လႆႈၸိုဝ်ၼေႇမၢၼ်ႇၼၼ်ႉၽူႈလႂ်ဢမ်ႇႁွတ်ႈထိုင်တၢင်းဢၼ်မူတ်းသႂ်သေၵေႃႉသေၵူၼ်း၊ဝႃႈၼင်ႇၼႆဢေႃႈ။

၂၈ ၶဝ်ၸိူဝ်းဢၼ်မီးၼႂ်းၸရွပ်ႈႁေႃးတြႃးတင်းသဵင်ႈတင်းလူင်ၸိူဝ်းၼၼ်ႉမိူဝ်ႈဢၼ်လႆႈငိၼ်းၵႂၢမ်းမၼ်းၸဝ်ႈၼၼ်ႉၸိုင်မီးတၢင်းဢၼ်ၸႂ်မႆႈၶႂ်ႈၸႃႉၼႃႇလူင်လၢင်လႄႈ၊ႁိုပ်ႉမၼ်းၸဝ်ႈဢွၵ်ႇၵႂႃႇၵႃႈတီႈၼွၵ်ႈဝဵင်းယဝ်ႉၸင်ႇ

၂၉ ၼင်ႇႁိုဝ်တၵ်းလႆႈဢီးမၼ်းၸဝ်ႈတူၵ်းပႅတ်ႈၸိုင်ဢဝ်မၼ်းၸဝ်ႈၵႂႃႇၵႃႈတီႈႁိမ်းလိၼ်သုတ်းပၢႆလွႆတီႈဢၼ်ဝဵင်းတႄႇဝႆႉၼၼ်ႉဢေႃႈ။

၃၀ ၵူၺ်းၵႃႈမၼ်းၸဝ်ႈလတ်းၵႃႈၼႂ်းၶိုင်ႈၵၢင်ၶဝ်လႄႈဢွၵ်ႇသေၵႃႈတီႈၼၼ်ႉၵႂႃႇဢေႃႈ။

ၸဝ်ႈယေႇသုႁေႃႈႁိုပ်ႉၽီႁၢႆႉ

၃၁ မၼ်းၸဝ်ႈႁွတ်ႈထိုင်ၵႂႃႇၵႃႈတီႈဝဵင်းၵပိူဝ်ႇၼေႇဢုမ်ႇမိူင်းၵႃႇလိလႄးပုၼ်ႉလႄႈသင်ႇသွၼ်ပၼ်ယူႇၼႂ်းဝၼ်းၵမ်သိၼ်ဢေႃႈ။

၃၂ ပိူဝ်ႈဢၼ်ၵႂၢမ်းမၼ်းၸဝ်ႈပႃးတင်းဢႃႇၼႃႇတၼ်းၶူဝ်းလႄႈပရိၵ်ႈသၢတ်ႈတင်းလၢႆဢၢမ်းၼႃႇလူင်လၢင်လွင်ႈတၢင်းဢၼ်မၼ်းၸဝ်ႈသင်ႇသွၼ်ပၼ်ၼၼ်ႉဢေႃႈ။

၃၃ ၵႃႈၼႂ်းၸရွပ်ႈႁေႃးတြႃးၼၼ်ႉမီးၵူၼ်းၵေႃႉၼိုင်ႈဢၼ်ၽီၵူဝ်ႈၵိူၵ်ႇၶဝ်ႈၼၼ်ႉဢေႃႈ။မၼ်းႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈဝႃႈ၊-

၃၄ ဢူဝ်း၊ၸဝ်ႈယေႇသုၵူၼ်းဝဵင်းၼႃႇၸရႅတ်ႉတီႈၶႃႈ။ၸဝ်ႈႁဝ်းၸၢပ်ႈသႅင်ႇၵၼ်တင်းၵဝ်ၶႃႈၸိူဝ်ႉၼင်ႇႁိုဝ်ၶႃႈ။ၸဝ်ႈႁဝ်းမႃးႁႂ်ႈလႆႈယႃႉပႅတ်ႈၵဝ်ၶႃႈၶႃႈႁိုဝ်း။လွင်ႈဢၼ်ၸဝ်ႈႁဝ်းပဵၼ်ၽူႈလႂ်ၼၼ်ႉၵဝ်ၶႃႈႁူႉယူႇၶႃႈဢေႃႈ။ပဵၼ်ၵူၼ်းမူတ်းၸၢင်ႇၽြႃးပဵၼ်ၸဝ်ႈၶႃႈဢေႃႈ၊ဝႃႈၼင်ႇၼႆဢေႃႈ။

၃၅ ၸဝ်ႈယေႇသုၵေႃႈပၼ်ဢမိင်ႉဝႃႈ၊-ယူႇတဵတ်ႇတဵတ်ႇတႃႉ။ဢွၵ်ႇသေၵႃႈၼႂ်းမၼ်းၵႂႃႇတႃႉ၊မိူဝ်ႈဢၼ်ဝႃႈၼင်ႇၼႆၸိုင်ၽီႁၢႆႉၼၼ်ႉၵေႃႈႁႂ်ႈၵူၼ်းၵေႃႉၼၼ်ႉလူမ်ႉတူၵ်းၵႃႈၼႂ်းၵၢင်ၶဝ်သေယဝ်ႉဢမ်ႇပၼ်ၽေးဢူႉပၢတ်ႈသင်လႄႈဢွၵ်ႇၵႂႃႇသေဢေႃႈ။

၃၆ ၵူၼ်းတင်းသဵင်ႈတင်းလူင်ၵႂင်ၸႂ်ယုင်ႈၸႂ်ၼႃႇလႄႈၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်လၢတ်ႈၸႃၵၼ်လႄႈဝႃႈ၊-ၵႂၢမ်းၼႆႉပဵၼ်ၵႂၢမ်းၸိူဝ်ႉၼင်ႇႁိုဝ်။မၼ်းၸဝ်ႈဢဝ်တင်းဢႃႇၼႃႇတၼ်းၶူဝ်းႁိုပ်ႉၽီဢၼ်ၵူဝ်ႈၵိူၵ်ႇလႄႈၶဝ်ၵေႃႈဢွၵ်ႇၵႂႃႇလူင်ပေႇ၊ဝႃႈၼင်ႇၼႆဢေႃႈ။

၃၇ သတၢင်းသဵင်ၶၢဝ်ႇမၼ်းၸဝ်ႈၼၼ်ႉၸွတ်ႇၸႅတ်ႇၵႂႃႇၵူႈတီႈၵူႈလႅၼ်ဢေႃႈ။

ၸဝ်ႈယေႇသုႁႂ်ႈၵူၼ်းပဵၼ်ၼမ်ၼႃႇႁၢႆၶႅၼ်း

၃၈ မၼ်းၸဝ်ႈလုၵ်ႉသေၵႃႈၼႂ်းၸရွပ်ႈႁေႃးတြႃးဢွၵ်ႇၵႂႃႇလႄႈၶဝ်ႈၵႃႈၼႂ်းႁိူၼ်းပေႇတရုဢေႃႈ။ဢွၵ်ႇၼၢႆးပေႇတရုၼၼ်ႉၼၢဝ်ၼႃႇလူင်လၢင်လႄႈၶဝ်လဝ်ႈယွၼ်းႁႂ်ႈမၼ်းၸဝ်ႈၸွႆႈထႅမ်ဢေႃႈ။

၃၉ မၼ်းၸဝ်ႈၸုၵ်းယူႇၵႃႈတီႈႁိမ်းမေႈယိင်းၼၼ်ႉသေယဝ်ႉသင်ႇသွၼ်တၢင်းၼၢဝ်မၼ်းလႄႈၼၢဝ်မၼ်းႁၢႆၶႅၼ်းၵမ်းလဵဝ်သေယဝ်ႉမၼ်းလုၵ်ႉလႄႈႁဵတ်းဝၢတ်ႈၶႅၵ်ႇဢေႃႈ။

၄၀ ယၢမ်းမိူဝ်ႈဢၼ်ၵၢင်ဝၼ်းတူၵ်းၸိုင်ၵေႃႉသေႈၶဝ်ၸိူဝ်းဢၼ်မီးတၢင်းၶႆႈတၢင်းပဵၼ်ၵူႈၸိူဝ်ႉၵူႈပိူင်ၸိူဝ်းၼၼ်ႉဢွၼ်ၵၼ်ဢဝ်ၵူၼ်းၶႆႈၵူၼ်းပဵၼ်တင်းလၢႆမႃးတီႈမၼ်းၸဝ်ႈဢေႃႈ။မၼ်းၸဝ်ႈဢဝ်မိုဝ်းတၢင်ႇၵႃႈၼိူဝ်ၵူၼ်းၸိူဝ်းၼၼ်ႉႁင်းၽႂ်ႇႁင်းမၼ်းလႄႈႁႂ်ႈတၢင်းၶႆႈတၢင်းပဵၼ်ၶဝ်ႁၢႆဢေႃႈ။

၄၁ ၽီႁၢႆႉတင်းလၢႆၵေႃႈဢွၵ်ႇသေၵႃႈၼႂ်းၵူၼ်းၼမ်ၼႃႇၵႂႃႇသေယဝ်ႉႁွင်ႉသႅၼ်ႇဝႃႈ၊-ၸဝ်ႈႁဝ်းပဵၼ်လုၵ်ႈၽြႃးပဵၼ်ၸဝ်ႈၶႃႈဢေႃႈ၊ဝႃႈၼင်ႇၼႆဢေႃႈ။ပိူဝ်ႈဢၼ်ၶဝ်ႁူႉလွင်ႈဢၼ်မၼ်းၸဝ်ႈပဵၼ်ၸဝ်ႈၶရိၸ်ႉၼၼ်ႉလႄႈလွင်ႈၼင်ႇႁိုဝ်ၶဝ်တၵ်းဢမ်ႇလႆႈလၢတ်ႈလွင်ႈၼၼ်ႉၸိုင်မၼ်းၸဝ်ႈႁႄႉၶႅၼ်သင်ႇသွၼ်ၶဝ်ဢေႃႈ။

၄၂ မိူဝ်ႈဢၼ်မိူင်းလႅင်းမႃးၸိုင်မၼ်းၸဝ်ႈဢွၵ်ႇၵႂႃႇၸူးၵႃႈတီႈထိူၼ်ႇပုၼ်ႉလႄႈၵူၼ်းၸူႉၵူၼ်းတုမ်တင်းလၢႆၵေႃႈႁႃမၼ်းၸဝ်ႈဢေႃႈ။မိူဝ်ႈဢၼ်ႁွတ်ႈထိုင်ၵႃႈတီႈမၼ်းၸဝ်ႈၼၼ်ႉၼင်ႇႁိုဝ်မၼ်းၸဝ်ႈတၵ်းဢမ်ႇဢွၵ်ႇသေၵႃႈတီႈၶဝ်ၼၼ်ႉၵႂႃႇၸိုင်ၶဝ်ႁၢမ်ႈတၢပ်ႈႁႄႉၶႅၼ်မၼ်းၸဝ်ႈဢေႃႈ။

၄၃ မၼ်းၸဝ်ႈၵေႃႈလၢတ်ႈလႄႈဝႃႈ၊-ၵဝ်တၵ်းလႆႈႁေႃးလၢတ်ႈတြႃးသတၢင်းသိူဝ်းပျေႃႇဢၼ်ၸၢပ်ႈသႅင်ႇၵၼ်တင်းမိူင်းၽြႃးပဵၼ်ၸဝ်ႈၼၼ်ႉၼႂ်းဝၢၼ်ႈၼႂ်းဝဵင်းတၢင်ႇတီႈတၢင်ႇလႅၼ်တင်းလၢႆဢေႃႈ။ၵဝ်လႆႈၶၢမ်ႇတၢင်းဢၼ်ပွႆႇၸႂ်ႉမႃးပုၼ်ႈဢၼ်တၵ်းလႆႈႁဵတ်းၸိူဝ်ႉၼင်ႇၼႆယဝ်ႉ၊

၄၄ ဝႃႈၼင်ႇၼႆယဝ်ႉၸင်ႇမၼ်းၸဝ်ႈႁေႃးလၢတ်ႈၵႃႈတီႈၼႂ်းၸရွပ်ႈႁေႃးတြႃးမိူင်းၵႃႇလိလႄးတင်းလၢႆဢေႃႈ။