Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၈

ၸိူဝ်းၸဝ်ႈလႂ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသေး

၁ သေႃးလုၵေႃႈလႆႈၸႂ်ၼႂ်းလွင်ႈတၢင်းဢၼ်ဢဝ်မၼ်းတၢႆၼၼ်ႉဢေႃႈ။မိူဝ်ႈၼၼ်ႉၸိူဝ်းၸဝ်ႈဢၼ်မီးၵႃႈ

ၼႂ်းဝဵင်းယေႇရုသလႅမ်ႇၼၼ်ႉလႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသေးၼႃႇလူင်လၢင်လႄႈလိူဝ်သေတမၢၼ်ႇၸဝ်ႈတင်းလၢႆၼၼ်ႉၵူၼ်းၶဝ်ႈၸိူဝ်းၸဝ်ႈတင်းသဵင်ႈတင်းလူင်ၽၢတ်ႇၽႄၵၼ်ၵႂႃႇၵႃႈၼႂ်းမိူင်းယုတတင်းမိူင်းသမႃႇရိၵူႈတီႈၵူႈလႅၼ်ဢေႃႈ။

၂ ၶဝ်ၸိူဝ်းဢၼ်ရူဝ်ႇသေႇၽြႃးၼၼ်ႉသၢင်းၵျူဝ်ႇသထေႇၽၢၼ်ႇသေယဝ်ႉႁဵတ်းသဵင်ႁႆႈသဵင်ႁွင်ႉယႂ်ႇၼႃႇပုၼ်ႈမၼ်းဢေႃႈ။

၃ သေႃးလုၵေႃႈတႄႇၸႃႉယႃႉၵဝ်းၸိူဝ်းၸဝ်ႈဢေႃႈ။မၼ်းၶဝ်ႈၵႃႈၼႂ်းႁိူၼ်းလင်ၼိုင်ႈယဝ်ႉလင်ၼိုင်ႈသေလႄႈတိုတ်ႉၸၼ်ဢဝ်ၽူႈယိင်းၽူႈၸၢႆးသေယဝ်ႉဢဝ်ၶင်ဝႆႉၵႃႈၼႂ်းထွင်ႇဢေႃႈ။

ၽိလိပ်ႉပုၼႂ်းဝဵင်းသမႃႇရိ

၄ ၶဝ်ၸိူဝ်းဢၼ်လႆႈၽၢတ်ႇၽႄၵၼ်ၵႂႃႇၵူႈတီႈၵူႈလႅၼ်ၼၼ်ႉၵေႃႈလႄႇလဵပ်ႈႁေႃးလၢတ်ႈၼုၵ်ႉၵပၢတ်ႈတြႃးသတၢင်းသိူဝ်းပျေႃႇၸဝ်ႈဢေႃႈ။

၅ ၽိလိပ်ႉပုၵေႃႈလူင်းၵႂႃႇၵႃႈတီႈဝဵင်းသမႃႇရိသေလႄႈႁေႃးလၢတ်ႈလွင်ႈၸဝ်ႈၶရိၸ်ႉဢေႃႈ။

၆ မိူဝ်ႈဢၼ်ၵူၼ်းၸူႉၵူၼ်းတုမ်ၸိူဝ်းၼၼ်ႉလႆႈငိၼ်းလႆႈႁၼ်ၼီႉမိၵ်ႈလၵ်ႈၶၼႃႇဢၼ်ၽိလိပ်ႉပုႁဵတ်းၼၼ်ႉၸိုင်ၶဝ်ၽွမ်ႉၵၼ်ထွမ်ႇဢဝ်ၵႂၢမ်းမၼ်းဢေႃႈ။

၇ လွင်ႈမၼ်းၸမ်းၽီႁၢႆႉႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇသေလႄႈဢွၵ်ႇပၢႆသေၵႃႈၼႂ်းၵူၼ်းဢၼ်ၽီႁၢႆႉၶဝ်ႈၼၼ်ႉၼမ်ၼႃႇဢေႃႈ။ၶဝ်ၸိူဝ်းဢၼ်တူဝ်ဢမ်ႇတူင်ႉဢမ်ႇၼိုင်လႆႈဢိၵ်ႇတင်းၶဝ်ၸိူဝ်းဢၼ်တိၼ်ဢမ်ႇလီလႂ်ၸိူဝ်းၼၼ်ႉၵေႃႈႁွတ်ႈထိုင်တၢင်းဢၼ်ၶႅၼ်းမႃးဢေႃႈ။

၈ ၼႂ်းဝဵင်းၼၼ်ႉမီးတၢင်းဢၼ်သိူဝ်းၸူမ်းၼႃႇလူင်လၢင်ဢေႃႈ။

သြႃႇၽီမေႃႇသိမုၼ်ႇ

၉ ၵူၼ်းၵေႃႉၼိုင်ႈဢၼ်လႆႈၸိုဝ်သိမုၼ်ႇၼၼ်ႉမီးယူႇၵႃႈၼႂ်းဝဵင်းၼၼ်ႉဢွၼ်တၢင်းလႄႈႁဵတ်းတင်းဢတၢတ်ႈၽီမေႃႇလႄႈလၢတ်ႈဝႃႈ၊-ၵဝ်ၼႆႉပဵၼ်ၵေႃႉဢၼ်လၢၵ်ႇလၢႆးဢေႃႈ၊ဝႃႈၼင်ႇၼႆလႄႈႁႂ်ႈၵူၼ်းမဵဝ်းသမႃႇရိၸိူဝ်းၼၼ်ႉၵႂင်ၸႂ်ယုင်ႈၸႂ်ယူႇဢေႃႈ။

၁၀ ၵူၼ်းၸဵမ်လဵၵ်ႉၸဵမ်ယႂ်ႇၵႃႈမီးၸိူဝ်းၼၼ်ႉၵေႃႈထွမ်ႇဢဝ်ၸွမ်းမၼ်းလႄႈဝႃႈ၊-ၵေႃႉၼႆႉပဵၼ်မႁႃႇတၼ်းၶူဝ်းၽြႃးပဵၼ်ၸဝ်ႈဢေႃႈ၊ဝႃႈၼင်ႇၼႆဢေႃႈ။

၁၁ လွင်ႈတၢင်းဢၼ်ၶဝ်ထွမ်ႇဢဝ်ၸွမ်းမၼ်းၼၼ်ႉၸမ်းၵွပ်ႈပိူဝ်ႈမၼ်းႁဵတ်းဢတၢတ်ႈၽီမေႃႇလႄႈႁႂ်ႈၶဝ်ၵႂင်ၸႂ်ႁိုင်ၼႃႇယဝ်ႉဢေႃႈ။

၁၂ မိူဝ်ႈဢၼ်ၶဝ်ယုမ်ႇမၢတ်ႈဢၼ်ၽိလိပ်ႉပုႁေႃးလၢတ်ႈတြႃးသတၢင်းသိူဝ်းပျေႃႇဢၼ်ၸၢပ်ႈသႅင်ႇၵၼ်တင်းမိူင်းၽြႃးပဵၼ်ၸဝ်ႈဢိၵ်ႇတင်းၼႃႇမႃႉၸိုဝ်သဵင်ၸဝ်ႈယေႇသုၼၼ်ႉၸိုင်ၸဵမ်ယိင်းၸဵမ်ၸၢႆးၼမ်ၼႃႇၶၢမ်ႇဢဝ်ပပ်ႉတိၸၢမ်ႇဢေႃႈ။

၁၃ သိမုၼ်ႇၵေႃႈယုမ်ႇမၢတ်ႈလႄႈၶၢမ်ႇဢဝ်ပပ်ႉတိၸၢမ်ႇယဝ်ႉၸင်ႇယူႇလူၺ်ႈၵၼ်တင်းၽိလိပ်ႉပုသေယဝ်ႉလႆႈႁၼ်တၼ်းၶူဝ်းဢၼ်လၢၵ်ႇလၢႆးဢိၵ်ႇတင်းၼီႉမိၵ်ႈလၵ်ႈၶၼႃႇဢၼ်ယႂ်ႇၼႃႇတင်းလၢႆဢၼ်ၽိလိပ်ႉပုႁဵတ်းၸိူဝ်းၼၼ်ႉလႄႈၵႂင်ၸႂ်ၼႃႇလူင်လၢင်ဢေႃႈ။

၁၄ မိူဝ်ႈဢၼ်တမၢၼ်ႇၸဝ်ႈဢၼ်မီးၵႃႈၼႂ်ဝဵင်းယေႇရုသလႅမ်ႇတင်းလၢႆၼၼ်ႉလႆႈငိၼ်းသတၢင်းသဵင်ၶၢဝ်ႇလွင်ႈဢၼ်ၵူၼ်းဝဵင်းသမႃႇရိၸိူဝ်းၼၼ်ႉလႆႈၶၢမ်ႇဢဝ်ၼုၵ်ႉၵပၢတ်ႈတြႃးၸဝ်ႈယဝ်ႉၼၼ်ႉၸိုင်ၶဝ်ပွႆႇၸႂ်ႉပေႇတရုတင်းယုဝ်းႁၢၼ်ႇၵႂႃႇတီႈၶဝ်ဢေႃႈ။

၁၅ ၶဝ်ႁွတ်ႈထိုင်သေယဝ်ႉလွင်ႈၼင်ႇႁိုဝ်ၵူၼ်းဝဵင်းၸိူဝ်းၼၼ်ႉတၵ်းလႆႈၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈၸိုင်သူးတွင်းပၼ်ၶဝ်ဢေႃႈ။

၁၆ လွင်ႈမၼ်းၸမ်းၶဝ်လႆႈၶၢမ်ႇဢဝ်ပပ်ႉတိၸၢမ်ႇၼႂ်းၼႃႇမႃႉၸိုဝ်သဵင်ၸဝ်ႈယေႇသုၼၼ်ႉၵူၺ်းလႄႈဝိၺိၺ်ႇမူတ်းၸၢင်ႇၸဝ်ႈယင်းဢမ်ႇပႆႇလႆႈလူင်းမႃးၵႃႈၼိူဝ်ၶဝ်သေၵေႃႉသေၵူၼ်းၼၼ်ႉဢေႃႈ။

၁၇ မိူဝ်ႈၼၼ်ႉပေႇတရုတင်းယုဝ်းႁၢၼ်ႇဢဝ်မိုဝ်းတၢင်ႇၵႃႈၼိူဝ်ၶဝ်လႄႈၶဝ်ၵေႃႈလႆႈႁပ်ႉၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈဢေႃႈ။

၁၈ မိူဝ်ႈဢၼ်သိမုၼ်ႇလႆႈႁၼ်ဝိၺိၺ်ႇမူတ်းၸၢင်ႇၸဝ်ႈလူင်းမႃးၵွပ်ႈပိူဝ်ႈတမၢၼ်ႇၸဝ်ႈဢဝ်မိုဝ်းတၢင်ႇၵႃႈၼိူဝ်ၶဝ်ၼၼ်ႉၸိုင်မၼ်းဢဝ်ငိုၼ်းမႃးသေလႄႈယွၼ်းဝႃႈ၊-

၁၉ ၼင်ႇႁိုဝ်ၵေႃႉဢၼ်လႆႈၶၢမ်ႇတၢင်းဢၼ်ၵဝ်ၶႃႈဢဝ်မိုဝ်းတၢင်ႇၼၼ်ႉတၵ်းလႆႈႁပ်ႉၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈၸိုင်ပၼ်တၼ်းၶူဝ်းတီႈၵဝ်ၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။

၂၀ ပေႇတရုၵေႃႈလၢတ်ႈတီႈမၼ်းလႄႈဝႃႈ၊-ပိူဝ်ႈဢၼ်မႂ်းထၢင်ႇမႂ်းတၵ်းဢဝ်တင်းငိုၼ်းသိုဝ်ႉဢဝ်သူႉၵျေးၸူးၽြႃးပဵၼ်ၸဝ်ႈလႆႈၼၼ်ႉလႄႈႁႂ်ႈငိုၼ်းမႂ်းႁွတ်ႈထိုင်တၢင်းလူႉတၢင်းလႅဝ်လူၺ်ႈၵၼ်တင်းမႂ်းတႃႉ။

၂၁ မႂ်းၼႆႉဢမ်ႇၸႂ်ႈၵေႃႉဢၼ်ၶဝ်ႈပႃးၼႂ်းဢမူႉၸဝ်ႈၼႆႉ။လွင်ႈမၼ်းၸမ်းႁူဝ်ၸႂ်မႂ်းဢမ်ႇမီးတၢင်းဢၼ်သိုဝ်ႈတေႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈ။

၂၂ ပိူဝ်ႈၼႆလႄႈၶုၵ်းၸႂ်လႆႈမႆႈၸႂ်တၢင်းဢၼ်ႁၢႆႉမိူၵ်ႈမႂ်းၼၼ်ႉလႄႈတွင်းပၢၼ်ႇတေႃႈလဵဝ်တႃႉ။မၼ်းၸဝ်ႈၸၢင်ႊၶေးတၵ်းပွႆႇလွတ်ႈဢပျႅတ်ႈတၢင်းၵျၢမ်ႇတၢင်းပွင်ၼႂ်းႁူဝ်ၸႂ်မႂ်းၼၼ်ႉယူႇဢေႃႈ။

၂၃ ၵဝ်ႁူႉလွင်ႈဢၼ်မႂ်းမီးၼႂ်းလီႈဢၼ်ၶူမ်ၼႃႇၼၼ်ႉလႄႈလႆႈၶၢမ်ႇတၢင်းဢၼ်တူႉၸရိူၵ်ႈဢပျႅတ်ႈမတ်ႉၽုၵ်ႇဝႆႉဢေႃႈ၊ဝႃႈၼင်ႇၼႆဢေႃႈ။

၂၄ သိမုၼ်ႇၵေႃႈၶိုၼ်းလၢတ်ႈလႄႈဝႃႈ၊-ၼင်ႇႁိုဝ်လွင်ႈတၢင်းဢၼ်ၸဝ်ႈဝႃႈၼႆႉတၵ်းဢမ်ႇႁွတ်ႈဢမ်ႇထိုင်မႃးၵႃႈၼိူဝ်ၵဝ်ၶႃႈသေၸိူဝ်ႉသေပိူင်ၸိုင်သူးတွင်းတီႈထႃႇဝရႃႉၽြႃးပုၼ်ႈၵဝ်ၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။

၂၅ တမၢၼ်ႇၸဝ်ႈၸိူဝ်းၼၼ်ႉဝၢႆးသေၶမ်ႇသၢၵ်ႈသေႇႁေႃးလၢတ်ႈၼုၵ်ႉၵပၢတ်ႈၸဝ်ႈၽြႃးယဝ်ႉၶဝ်ၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇဢေႃႈ။ၼႂ်းသဵၼ်ႈတၢင်းၼၼ်ႉၵေႃႈၶဝ်ႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈၼႂ်းဝၢၼ်ႈသမႃႇရိၼမ်ၼႃႇဢေႃႈ။

ၽိလိပ်ႉပုတင်းၵူၼ်းမိူင်းဢိသယေႃႇပိ

၂၆ ၵမ်းၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးလၢတ်ႈတီႈၽိလိပ်ႉပုလႄႈဝႃႈ၊-မႂ်းလုၵ်ႉလႄႈၵႂႃႇၼႃႈတၢင်းၸၢၼ်းၸူးၵႃႈတီႈသဵၼ်ႈတၢင်းဢၼ်လုၵ်ႉသေၵႃႈတီႈဝဵင်းယေႇရုသလႅမ်ႇလူင်းၵႂႃႇၵႃႈတီႈဝဵင်းၵႃႇၸပုၼ်ႉတႃႉ၊ဝႃႈၼင်ႇၼႆဢေႃႈ။သဵၼ်ႈတၢင်းၼၼ်ႉၸမ်းပဵၼ်တၢင်းထိူၼ်ႇဢေႃႈ။

၂၇ မၼ်းၵေႃႈလုၵ်ႉၵႂႃႇၸိူဝ်ႉၼင်ႇဢမိင်ႉၸဝ်ႈမီးၼၼ်ႉလႄႈၵႂႃႇထူပ်းႁၼ်ၵူၼ်းမိူင်းဢိသယေႃႇပိၵေႃႉၼိုင်ႈဢၼ်ပဵၼ်ၵူၼ်းတွၼ်လႄႈပဵၼ်ဢမၢတ်ႈလူင်ဢၼ်ပႂ်ႉၽၼ်ႇတႃႇၼၢင်းႁေႃၶမ်းၵၢၼ်ႇတေႇၵိဢၼ်ဢုပ်ႉပိူင်ႇမိူင်းဢိသယေႃႇပိၼၼ်ႉဢေႃႈ။

၂၈ ဢမၢတ်ႈလူင်ၼၼ်ႉမၼ်းၵႂႃႇၵႃႈတီႈဝဵင်းယေႇရုသလႅမ်ႇႁဵတ်းဝၢတ်ႈၵူဝ်းၵႂၢႆႇၽြႃးသေယဝ်ႉပွၵ်ႈၶိုၼ်းမိူဝ်းယူႇလႄႈၼင်ႈယူႇၵႃႈၼိူဝ်လေႃႉရထႃးမၼ်းသေယဝ်ႉၽတ်းဢၢၼ်ႇၵျၢမ်းပရေႃးၽႅတ်ႈဢိသႃႇယယူႇဢေႃႈ။

၂၉ မိူဝ်ႈၼၼ်ႉဝိၺိၺ်ႇမူတ်းၸၢင်ႇၸဝ်ႈပၼ်ပျႃႇတိၵ်ႈတီႈၽိလိပ်ႉပုလႄႈဝႃႈ၊-သုတ်ႉၸမ်ၵႂႃႇၸူးၵႃႈတီႈလေႃႉရထႃးၼၼ်ႉတႃႉ၊ဝႃႈၼႆလႄႈၵႃႈၼင်ႇဢၼ်ဝႃႈၼၼ်ႉၽိလိပ်ႉပုၵေႃႈ

၃၀ လႅၼ်ႈၵႂႃႇၸူးၵႃႈတီႈလေႃႉရထႃးလႄႈလႆႈငိၼ်းသဵင်ဢမၢတ်ႈလူင်ၽတ်းဢၢၼ်ႇၵျၢမ်းပရေႃးၽႅတ်ႈဢိသႃႇယယူႇလႄႈမၼ်းလဝ်ႈထၢမ်ဝႃႈ၊-ၸဝ်ႈဢမၢတ်ႈလူင်ၸွင်ႇႁူႉပွင်ႇၸႂ်လွင်ႈဢၼ်ၽတ်းယူႇၼၼ်ႉၶႃႈႁိုဝ်၊ဝႃႈၼင်ႇၼႆဢေႃႈ။

၃၁ ဢမၢတ်ႈလူင်ၼၼ်ႉၵေႃႈလၢတ်ႈဝႃႈ၊-ပေႃးဢမ်ႇမီးၵေႃႉဢၼ်လၢတ်ႈပၼ်သွၼ်ပၼ်ၼၼ်ႉတၵ်းႁူႉလႆႈၸိူဝ်ႉၼင်ႇႁိုဝ်၊ဝႃႈၼင်ႇၼႆယဝ်ႉၸင်ႇမၼ်းႁွင်ႉဢဝ်ၽိလိပ်ႉပုႁႂ်ႈလႆႈၶိုၼ်ႈၼိူဝ်လေႃႉရထႃးၼင်ႈယူႇလူၺ်ႈၵၼ်တင်းမၼ်းဢေႃႈ။

၃၂ ၼႂ်းၵျၢမ်းလိၵ်ႈတီႈဢၼ်ဢမၢတ်ႈလူင်ၽတ်းယူႇၼၼ်ႉမီးဝႆႉလႄႈဝႃႈ၊-မၼ်းၶၢမ်ႇတၢင်းဢၼ်ဢဝ်ၵႂႃႇမိူၼ်ၸိူဝ်ႉၼင်ႇသူဝ်းဢၼ်ဢဝ်ၵႂႃႇႁႂ်ႈလႆႈၶၢမ်ႇတၢႆၼၼ်ႉဢေႃႈ။ၸိူဝ်ႉၼင်ႇဢၼ်သူဝ်းဢွၼ်ႇယင်းဢမ်ႇႁွင်ႉသႅၼ်ႇၵႃႈတီႈၽၢႆႇၼႃႈၵေႃႉဢၼ်ႁႆးၶူၼ်မၼ်းၼၼ်ႉမၼ်းၵေႃႈယင်းဢမ်ႇပိုတ်ႇပၢၵ်ႇမၼ်းလႄႈယူႇဢေႃႈ။

၃၃ မိူဝ်ႈဢၼ်မၼ်းလႆႈၶၢမ်ႇတၢင်းဢၼ်ဢၼ်ၶျႃးတူၵ်းတီႈတႅမ်ႇယူႇၼၼ်ႉပိူၼ်ႈဢမ်ႇပၼ်တၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉတီႈမၼ်းပိူဝ်ႈဢၼ်သိမ်းဢဝ်ဢသၢၵ်ႈမၼ်းၵႃႈတီႈလိၼ်မိူင်းၼႆႉယဝ်ႉလႄႈၽူႈလႂ်တၵ်းၸီႉမွၵ်ႇၼႄပျႃႉမဵဝ်းၸိူဝ်ႉၶိူဝ်းမၼ်းၼၼ်ႉ၊ဝႃႈၼင်ႇၼႆဢေႃႈ။

၃၄ ဢမၢတ်ႈၼၼ်ႉၵေႃႈတွင်ႈထၢမ်တီႈၽိလိပ်ႉပုလႄႈဝႃႈ၊-ပရေႃးၽႅတ်ႈၼႆႉလၢတ်ႈၸိူဝ်ႉၼင်ႇၼႆလွင်ႈၽူႈလႂ်။လၢတ်ႈလွင်ႈတူဝ်ၸဝ်ႈၵဝ်ႇႁိုဝ်။ဢမ်ႇၼၼ်ၵေႃႈလၢတ်ႈလွင်ႈပိူၼ်ႈတၢင်ႇၵေႃႉႁိုဝ်၊

၃၅ ဝႃႈၼင်ႇၼႆလႄႈၽိလိပ်ႉပုၵေႃႈဢဝ်ၸႃႉၸဵမ်တီႈႁႅင်းၼႂ်းၵျၢမ်းလိၵ်ႈၼၼ်ႉႁေႃးလၢတ်ႈတြႃးသတၢင်းသိူဝ်းပျေႃႇလွင်ႈၸဝ်ႈယေႇသုၼၼ်ႉပၼ်မၼ်းဢေႃႈ။

၃၆ ၼႂ်းမိူဝ်ႈဢၼ်ၶဝ်ယင်းတိုၵ်ႉၸွမ်းတၢင်းၵႂႃႇယူႇၼၼ်ႉၶဝ်ႁွတ်ႈထိုင်ၵႃႈတီႈဢၼ်မီးၼမ်ႉၼၼ်ႉလႄႈဢမၢတ်ႈလူင်ၵေႃႈလၢတ်ႈလႄႈဝႃႈ၊-

၃၇ တူၺ်းလူ။တီႈၼႆႉမီးၼမ်ႉဢေႃႈ။ၼင်ႇႁိုဝ်ၵဝ်တၵ်းလႆႈၶၢမ်ႇဢဝ်ပပ်ႉတိၸၢမ်ႇၼၼ်ႉၸိုင်တၵ်းမီးလွင်ႈတၢင်းၵႃႈသင်ဢၼ်တေႁၢမ်ႈတၢပ်ႈႁႄႉၶႅၼ်ၵဝ်၊ဝႃႈၼင်ႇၼႆသေယဝ်ႉ၊

၃၈ ပၼ်ဢမိင်ႉႁႂ်ႈလေႃႉရထႃးၵိုတ်းသဝ်းယဝ်ႉၸင်ႇၽိလိပ်ႉပုဢိၵ်ႇတင်းဢမၢတ်ႈလူင်ၼၼ်ႉလူင်းၵႂႃႇၵႃႈၼႂ်းၼမ်ႉလႄႈၽိလိပ်ႉပုပၼ်ပပ်ႉတိၸၢမ်ႇတီႈမၼ်းဢေႃႈ။

၃၉ မိူဝ်ႈဢၼ်ၶဝ်လုၵ်ႉသေၵႃႈၼႂ်းၼမ်ႉဢွၵ်ႇမႃးယဝ်ႉၼၼ်ႉၸိုင်ဝိၺိၺ်ႇမူတ်းၸၢင်ႇၸဝ်ႈၶိုၵ်ႉၶၵ်ႉတိုတ်ႉၸၼ်ဢဝ်ၽိလိပ်ႉပုၵႂႃႇလႄႈၵမ်းလိုၼ်းဢမၢတ်ႈလူင်ၼၼ်ႉယင်းဢမ်ႇၶိုၼ်းလႆႈႁၼ်မၼ်းထႅင်ႈသေပွၵ်ႈယဝ်ႉ။ဢမၢတ်ႈလူင်ၼၼ်ႉမီးၸႂ်ဢၼ်သိူဝ်းသႂၢင်ႇၼႃႇလႄႈၵႂႃႇၸွမ်းသဵၼ်ႈတၢင်းဢၼ်မၼ်းတၵ်းလႆႈၵႂႃႇၼၼ်ႉဢေႃႈ။

၄၀ ၽိလိပ်ႉပုၼၼ်ႉသမ်ႉၶိုၼ်းၵႂႃႇပေႃႇၵႃႈတီႈၼႂ်းဝဵင်းဢၸုတ်ႉလႄႈႁေႃးလၢတ်ႈတြႃးသတၢင်းသိူဝ်းပျေႃႇၼႂ်းဝဵင်းတင်းသဵင်ႈတင်းလူင်ၸွမ်းတၢင်းၵႂႃႇတေႃႇထိုင်ႁွတ်ႈမၼ်းႁွတ်ႈထိုင်ၵႂႃႇၵႃႈတီႈဝဵင်းၵေႇသရိပုၼ်ႉဢေႃႈ။