Shan Missions

လိၵ်ႈဢေႃးဝႃႇတႃ့ၵလႃႇတိ

Chapter        ၁          ၂          ၃          ၄          ၅          ၆       

၃

ၵွပ်ႈတၢင်းယုမ်ႇမၢတ်ႈလႄႈလႆႈႁပ်ႉဢဝ်ဝိၺိၺ်ႇမူတ်းၸၢင်ႇၸဝ်ႈ

၁ ၵူၼ်းၵလႃႇတိဢၼ်ငိူဝ်ႈၶဝ်ဢိူၺ်း၊ၸဝ်ႈယေႇသုၶရိၸ်ႉဢၼ်ၶၢမ်ႇတၢင်းတၢႆၵႃႈၼိူဝ်သဝ်လၵ်းဝႃးမိုဝ်းၼၼ်ႉလႆႈၶၢမ်ႇတၢင်းဢၼ်ၼႄပျႃးထၢင်ႇထၢင်ႇသႃးသႃးသိုဝ်ႈၼႃႈတႂ်ႈတႃသူယဝ်ႉ။ၽူႈလႂ်သမ်ႉၸူဝ်းသူဢမ်ႇႁႂ်ႈသူလႆႈထွမ်ႇဢဝ်သမ်ႇမႃႇတြႃး။

၂ သူလႆႈၶၢမ်ႇဢဝ်ဝိၺိၺ်ႇၸဝ်ႈၵွပ်ႈပိူဝ်ႈတၢင်းၵမ်တၢင်းၵျၢင်ႉပိင်းၺၢပ်ႈတြႃးၼၼ်ႉႁိုဝ်။ဢမ်ႇၼၼ်ၵေႃႈသူလႆႈၶၢမ်ႇဢဝ်ၵွပ်ႈပိူဝ်ႈတၢင်းဢၼ်လႆႈထွမ်ႇလႆႈငိၼ်းတြႃးတၢင်းယုမ်ႇမၢတ်ႈၼၼ်ႉႁိုဝ်၊ဝႃႈၼႆ၊ၵဝ်ၶႂ်ႈထၢမ်တီႈသူဢေႃႈ။

၃ သူငိူဝ်ႈထၢၼ်ႇၼႆႉႁိုဝ်။သူဢိင်ဝိၺိၺ်ႇၸဝ်ႈသေလႄႈၸႃႉႁဵတ်းသေယဝ်ႉ၊တေႃႈလဵဝ်ၼႆႉသမ်ႉတၵ်းဢိင်ၸႃႇတိၵူၼ်းသေလႄႈႁႂ်ႈယဝ်ႉတူဝ်ႁိုဝ်။

၄ သူၶၢမ်ႇတၢင်းယၢပ်ႇတၢင်းၽိုတ်ႇထၢၼ်ႇၼႆႉတၵ်းႁႂ်ႈလႆႈပဵၼ်လၢႆလၢႆလွၵ်ႇလွၵ်ႇယဝ်ႉႁိုဝ်။တၵ်းလႆႈပဵၼ်လၢႆလၢႆလွၵ်ႇလွၵ်ႇႁိုဝ်။

၅ လိူဝ်သေၼၼ်ႉၽူႈဢၼ်ပၼ်ဝိၺိၺ်ႇၸဝ်ႈတီႈသူလႄႈၼႄပျႃးတၼ်းၶူဝ်းၼမ်ၼႃႇၼႂ်းသူၼၼ်ႉၼႄပျႃးၵွပ်ႈပိူဝ်ႈတၢင်းၵမ်တၢင်းၵျၢင်ႉပိင်းၺၢပ်ႈတြႃးႁိုဝ်။ၼႄပျႃးၵွပ်ႈပိူဝ်ႈတၢင်းယုမ်ႇမၢတ်ႈၼႂ်းတၢင်းဢၼ်ထွမ်ႇငိၼ်းတြႃးၼၼ်ႉႁိုဝ်။

ပုင်ႇသၢၵ်ႈသေႇဢႃႇပြႁၢမ်ႇ

၆ မိူၼ်ၼင်ႇဢႃႇပြႁၢမ်ႇယုမ်ႇမၢတ်ႈၽြႃးပဵၼ်ၸဝ်ႈလႄႈမၼ်းၸဝ်ႈမၢတ်ႈမၼ်းပဵၼ်ၸိူဝ်ႉၼင်ႇၵူၼ်းသိုဝ်ႈတေႃႇဢေႃႈ။

၇ ၶဝ်ၸိူဝ်းဢၼ်မီးတၢင်းယုမ်ႇမၢတ်ႈၼၼ်ႉပဵၼ်လုၵ်ႈဢႃႇပြႁၢမ်ႇဝႃႈၼႆဢွၼ်ၵၼ်ႁူႉတႃႉ။

၈ ၵျၢမ်းလိၵ်ႈႁၼ်ထႃႈဝႆႉလွင်ႈဢၼ်ၽြႃးပဵၼ်ၸဝ်ႈတၵ်းႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆႁွတ်ႈထိုင်တၢင်းသိုဝ်ႈတေႃႇၵႂပ်ႈပိူဝ်ႈတၢင်းယုမ်ႇမၢတ်ႈလႄႈဢေႃႈ။ယင်းပေႃးလႆႈႁေႃးမွၵ်ႇလၢတ်ႈတြႃးသတၢင်းသိူဝ်းပျေႃႇၼႆႉတီႈဢႃႇပြႁၢမ်ႇမိူဝ်ႈဢွၼ်ၼႆႉၼၼ်ႉလႄႈဝႃႈ၊-ၵူၼ်းမဵဝ်းတင်းသဵင်ႈတင်းလူင်တၵ်းလႆႈၶၢမ်ႇတၢင်းလီမင်ႇၵလႃႇၵႃႈၼႂ်းမႂ်းဢေႃႈ၊ဝႃႈၼင်ႇၼႆဢေႃႈ။

၉ ပေႃးပဵၼ်ၸိူဝ်ႉၼင်ႇၼႆၸိုင်ၶဝ်ၸိူဝ်းဢၼ်မီးတၢင်းယုမ်ႇမၢတ်ႈၼၼ်ႉတၵ်းလႆႈၶၢမ်ႇတၢင်းလီမင်ႇၵလႃႇလူၺ်ႈၵၼ်တင်းဢႃႇပြႁၢမ်ႇဢၼ်ယုမ်ႇမၢတ်ႈၼၼ်ႉဢေႃႈ။

၁၀ ၶဝ်ၸိူဝ်းဢၼ်ဢိင်ပိုင်ႈတၢင်းၵမ်တၢင်းၵျၢင်ႉပိင်းၺၢပ်ႈတြႃးၵႃႈမီးတင်းသဵင်ႈတင်းလူင်ၼၼ်ႉၸၢပ်ႈသႅင်ႇၵၼ်တင်းတၢင်းဢၼ်ၵိၼ်ႇဝႃႈဢေႃႈ။လွင်ႈမၼ်းၸမ်းၵျၢမ်းလိၵ်ႈမီးဝႆႉလႄႈဝႃႈ၊-ၶဝ်ၸိူဝ်းဢၼ်ဢမ်ႇၵမ်ဢမ်ႇၵျၢင်ႉဢမ်ႇၸွမ်းၵႃႈမီးတင်းသိင်ႈတင်းမူတ်းဢၼ်ပႃးၼႂ်းၵျၢမ်းပိင်းၺၢပ်ႈတိၼၼ်ႉပဵၼ်ၵေႃႉဢၼ်လႆႈၶၢမ်ႇတၢင်းဢၼ်ၵိၼ်ႇၵူႈၵေႃႉၵူႈၵူၼ်းဢေႃႈ၊ဝႃႈၼင်ႇၼႆဢေႃႈ။

၁၁ လိူဝ်သေၼၼ်ႉလွင်ႈဢၼ်ၽူႈလႂ်ဢမ်ႇႁွတ်ႈထိုင်တၢင်းဢၼ်သိုဝ်ႈတေႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈလႆႈၵွပ်ႈပိူဝ်ႈပိင်းၺၢပ်ႈတြႃးၼၼ်ႉ၊ဝႃႈၼႆထၢင်ႇသႃးဝႆႉယူႇဢေႃႈ။လွင်ႈမၼ်းၸမ်းၵေႃႉဢၼ်သိုဝ်ႈတေႃႇၼၼ်ႉတၵ်းဢသၢၵ်ႈလိပ်းၵွပ်ႈပိူဝ်ႈတၢင်းယုမ်ႇမၢတ်ႈၼၼ်ႉဢေႃႈ။

၁၂ ပိင်းၺၢပ်ႈတြႃးဢမ်ႇၸၢပ်ႈသႅင်ႇၵၼ်တင်းတၢင်းယုမ်ႇမၢတ်ႈ။ၵေႃႉဢၼ်ဢိင်ပိုင်ႈတၢင်းၵမ်တၢင်းၵျၢင်ႉၼၼ်ႉတၵ်းလႆႈလိပ်းၸွမ်းၼင်ႇတၢင်းၵမ်တၢင်းၵျၢင်ႉၼၼ်ႉဢေႃႈ။

၁၃ မႅၼ်ႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊-ၵေႃႉဢၼ်လႆႈၶၢမ်ႇတၢင်းဢၼ်ဢဝ်ႁွႆႈဢဝ်ၽႅၼ်ၵႃႈၼိူဝ်သဝ်လၵ်းဝႃးမိုဝ်းၼၼ်ႉပဵၼ်ၵေႃႉဢၼ်လႆႈၶၢမ်ႇတၢင်းဢၼ်ၵိၼ်ႇဝႃႈဢေႃႈ၊ဝႃႈၼင်ႇၼႆၼၼ်ႉၸဝ်ႈၶရိၸ်ႉၼၼ်ႉလႆႈၶၢမ်ႇတၢင်းဢၼ်ၵိၼ်ႇဝႃႈပုၼ်ႈႁဝ်းလႄႈထူတ်ႇဢဝ်ႁဝ်းဢွၵ်ႇသေၵႃႈၼႂ်းတၢင်းဢၼ်ပိင်းၺၢပ်ႈတြႃးၵိၼ်ႇဝႃႈၼၼ်ႉယဝ်ႉ။

၁၄ လွင်ႈမၼ်းၸမ်းလွင်ႈၼင်ႇႁိုဝ်တၢင်းလီမင်ႇၵလႃႇဢၼ်ဢႃႇပြႁၢမ်ႇလႆႈၶၢမ်ႇဢဝ်ၼၼ်ႉတၵ်းလႆႈႁွတ်ႈထိုင်မႃးၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းၵွပ်ႈပိူဝ်ႈၸဝ်ႈယေႇသုၶရိၸ်ႉဢိၵ်ႇတင်းလွင်ႈၼင်ႇႁိုဝ်တၵ်းလႆႈၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈဢၼ်ၸၢပ်ႈသႅင်ႇၵၼ်တင်းၵတိၸဝ်ႈၵွပ်ႈပိူဝ်ႈတၢင်းယုမ်ႇမၢတ်ႈၼၼ်ႉၸင်ႇပဵၼ်ဢေႃႈ။

၁၅ ပီႈၼွင်ႉၶဝ်ဢိူၺ်း၊ၵဝ်တၵ်းလၢတ်ႈၸွမ်းၼင်ႇဝေႃးႁႃႇရႃႉၵူၼ်းလူးၵွၼ်ႇဢေႃႈ။ၽူႈလႂ်ၵေႃႈဢမ်ႇလႆႈပႄႇပႅတ်ႈ၊ဢမ်ႇလႆႈသမ်ႉၶိုၼ်းထၢပ်ႈသႂ်ႇထႅင်ႈၼိူဝ်ပတိၺိၼ်ႇၵူၼ်းဢၼ်ပေႃးလႆႈၶျူၵ်ႉလိၵ်ႈလႄႁပ်ႉတုင်းဢဝ်မႃးယဝ်ႉၼၼ်ႉ။

၁၆ ၵတိဢၼ်မၼ်းၸဝ်ႈဝႆႉတီႈဢႃႇပြႁၢမ်ႇဢိၵ်ႇတင်းၸိူဝ်ႉၶိူဝ်းမၼ်းၸိူဝ်းၼၼ်ႉဢမ်ႇၸႂ်ႈမၼ်းၸဝ်ႈၶႂ်ႈဝႃႈတီႈၵူၼ်းၼမ်ၼႃႇ။မၼ်းၸဝ်ႈၶႂ်ႈဝႃႈလွင်ႈၵေႃႉလဵဝ်ၵူၺ်းဢေႃႈ။ၵေႃႉၼၼ်ႉၸမ်းပဵၼ်ၸဝ်ႈၶရိၸ်ႉဢေႃႈ။

၁၇ ၵဝ်ၶႂ်ႈဝႃႈၸမ်းပိင်းၺၢပ်ႈတြႃးဢၼ်ပဵၼ်မႃးလိုၼ်းသေၼၼ်ႉပီႊမိူင်းသီႇပၢၵ်ႇသၢမ်သိပ်းပီႊၼၼ်ႉဢမ်ႇယႃႉပႅတ်ႈပတိၺိၺ်ႇတြႃးဢၼ်ၽြႃးပဵၼ်ၸဝ်ႈႁႂ်ႈတႄႇဝႆႉယဝ်ႉမိူဝ်ႈဢွၼ်တၢင်းၼၼ်ႉ။ဢမ်ႇႁႂ်ႈၵတိၸဝ်ႈၼၼ်ႉပဵၼ်လၢႆလၢႆလွၵ်ႇလွၵ်ႇလႆႈ။

၁၈ လိူဝ်သေၼၼ်ႉပေႃးဢမူၺ်ႇၸဝ်ႈၼၼ်ႉတႄႇၼိူဝ်ပိင်းၺၢပ်ႈတြႃးၸိုင်ဢမ်ႇတႄႇၼိူဝ်ၵတိၸဝ်ႈယဝ်ႉ။ၽြႃးပဵၼ်ၸဝ်ႈဢိတ်းလူပၼ်ဢမူၺ်ႇၸဝ်ႈၼၼ်ႉတီႈဢႃႇပြႁၢမ်ႇၸွမ်းၼင်ႇၵတိၸဝ်ႈဢေႃႈ။

ပိင်းၺၢပ်ႈတြႃး

၁၉ ပေႃးပဵၼ်ၸိူဝ်ႉၼင်ႇၼႆၸိုင်ပိင်းၺၢပ်ႈတြႃးမီးဢၵျူဝ်းၸိူဝ်ႉၼင်ႇႁိုဝ်ဝႃႈၼႆၸမ်းၸူဝ်ႈဢၼ်ၸိူဝ်ႉၶိူဝ်းဢၼ်ၸဝ်ႈပၼ်ၵတိဝႆႉၼၼ်ႉဢမ်ႇပႆႇႁွတ်ႈပႆႇၽႅဝ်မႃးၼၼ်ႉၸိုင်မၼ်းၸဝ်ႈၸင်ႇထၢပ်ႈပၼ်တြႃးၼႆႉထႅင်ႈၵွပ်ႈပိူဝ်ႈတူႉၸရိူၵ်ႈဢပျႅတ်ႈဢေႃႈ။မၼ်းၸဝ်ႈဢဝ်တမၢၼ်ႇၵၢင်ႁၢဝ်တင်းလၢႆသေလႄႈပၼ်ပိင်းၺၢပ်ႈတြႃးၼၼ်ႉၵႃႈၼႂ်းမိုဝ်းၵူၼ်းဝူင်ႈၵၢင်ဢေႃႈ။

၂၀ ၵူၼ်းဝူင်ႈၵၢင်ၸမ်းတၢင်ႈတူဝ်ၵေႃႉလဵဝ်ၵူၺ်းဢမ်ႇၸႂ်။ၽြႃးပဵၼ်ၸဝ်ႈၸမ်းပဵၼ်သူႇလဵဝ်ဢေႃႈ။ပေႃးပဵၼ်ၸိူဝ်ႉၼင်ႇၼႆၸိုင်ပိင်းၺၢပ်ႈတြႃးပဵၼ်ဢၼ်ၶတ်းၵၼ်တင်းၵတိၽြႃးပဵၼ်ၸဝ်ႈႁိုဝ်။

၂၁ ဢမ်ႇၸႂ်ႈၸိူဝ်ႉၼင်ႇၼၼ်။ပေႃးပိင်းၺၢပ်ႈတြႃးဢၼ်ၽြႃးပဵၼ်ၸဝ်ႈပၼ်ၼၼ်ႉၸၢင်ႊႁဵတ်းႁႂ်ႈဢသၢၵ်ႈလိပ်းၸိုင်တၢင်းဢၼ်သိုဝ်ႈတေႃႇၼၼ်ႉၵေႃႈၸၢင်ႊတေလႆႈၵွပ်ႈပိူဝ်ႈပိင်းၺၢပ်ႈတြႃးယူႇဢေႃႈ။

၂၂ ၵျၢမ်းလိၵ်ႈလၢတ်ႈဝႆႉဝႃႈၵူၼ်းတင်းသဵင်ႈတင်းၶမ်ဝႆႉၼႂ်းဢပျႅတ်ႈဢေႃႈ။ၵူၺ်းၵႃႈၶဝ်ၸိူဝ်းဢၼ်ယုမ်ႇမၢတ်ႈၼၼ်ႉတၵ်းလႆႈၸိူဝ်ႉၼင်ႇဢၼ်ၵတိၸဝ်ႈမီးဢၼ်ၸၢပ်ႈသႅင်ႇၵၼ်တင်းတၢင်းယုမ်ႇမၢတ်ႈၼႂ်းၸဝ်ႈယေႇသုၶရိၸ်ႉၼၼ်ႉဢေႃႈ။

၂၃ ၸူဝ်ႈဢၼ်တြႃးတၢင်းယုမ်ႇမၢတ်ႈဢမ်ႇပႆႇႁွတ်ႈပႆႇထိုင်ၼၼ်ႉၸိုင်ပိင်းၺၢပ်ႈတြႃးထိင်းၶျူၵ်ႉပႂ်ႉထိင်းႁဝ်းယူႇလႄႈႁဝ်းမုင်ႈထႃႈမွင်းထႃႈတြႃးတၢင်းယုမ်ႇမၢတ်ႈဢၼ်တၵ်းပေႃႇမႃးၵမ်းလိုၼ်းၼၼ်ႉဢေႃႈ။

၂၄ ပိူဝ်ႈၼႆလႄႈၼင်ႇႁိုဝ်ႁဝ်းတၵ်းႁွတ်ႈထိုင်တၢင်းဢၼ်သိုဝ်ႈတေႃႇၵွပ်ႈပိူဝ်ႈတၢင်းယုမ်ႇမၢတ်ႈၼၼ်ႉၸိုင်ပိင်းၺၢပ်ႈတြႃးပဵၼ်ၽူႈဢၼ်ပႂ်ႉဢၼ်ထိင်းႁဝ်းလႄႈဢဝ်ႁဝ်းၵႂႃႇၸူးၵႃႈတီႈၸဝ်ႈၶရိၸ်ႉဢေႃႈ။

၂၅ မိူဝ်ႈဢၼ်တြႃးတၢင်းယုမ်ႇမၢတ်ႈႁွတ်ႈထိုင်မႃးယဝ်ႉၼၼ်ႉႁဝ်းလွတ်ႈသေၵႃႈၼႂ်းမိုဝ်းၽူႈဢၼ်ပႂ်ႉထိင်းၼၼ်ႉဢေႃႈ။

၂၆ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်း၊သူၵႃႈမီးတင်းသဵင်ႈတင်းလူင်ပဵၼ်လုၵ်ႈၽြႃးပဵၼ်ၸဝ်ႈၵွပ်ႈပိူဝ်ႈယုမ်ႇမၢတ်ႈၸဝ်ႈယေႇသုၶရိၸ်ႉၼၼ်ႉဢေႃႈ။

၂၇ သူၸိူဝ်းဢၼ်ၶၢမ်ႇပပ်ႉတိၸၢမ်ႇၼႂ်းၸဝ်ႈၶရိၸ်ႉၵႃႈမီးတင်းသဵင်ႈတင်းလူင်ၼၼ်ႉပဵၼ်ၵေႃႉဢၼ်ဢဝ်ၸဝ်ႈၶရိၸ်ႉၼုင်ႈမႆႊဝႆႉဢေႃႈ။ၵႃႈၼႂ်းၸဝ်ႈၶရိၸ်ႉၼၼ်ႉဢမ်ႇမီးၵူၼ်းယုတ၊ဢမ်ႇမီးၵူၼ်းႁေႇလသ၊ဢမ်ႇမီးၶႃႈ၊ဢမ်ႇမီးၵူၼ်းလွတ်ႈ၊ဢမ်ႇမီးၵူၼ်းၸၢႆး၊ဢမ်ႇမီးၵူၼ်းယိင်း။

၂၈ ၵႃႈၼႂ်းၸဝ်ႈၶရိၸ်ႉၼၼ်ႉသူၵႃႈမီးတင်းသဵင်ႈတင်းလူင်ပဵၼ်ဢၼ်လဵဝ်ၵၼ်ယဝ်ႉ။

၂၉ ပေႃးသူၸၢပ်ႈသႅင်ႇၵၼ်တင်းၸဝ်ႈၶရိၸ်ႉၸိုင်သူပဵၼ်ၸိူဝ်ႉၶိူဝ်းဢႃႇပြႁၢမ်ႇလႄႈတႄႇယူႇၼႂ်းတၢင်းဢၼ်ၶၢမ်ႇဢမူၺ်ႇၸွမ်းၼင်ႇၵတိၸဝ်ႈၼၼ်ႉဢေႃႈ။