Shan Missions

၄

 ၵႃႇဢိၼတင်းဢႃႇပေႇလ

၁ လိုၼ်းၼၼ်ႉ ဢႃႇတမ်ႇ သိူၵ်ႈသမ်ႇၵၼ်တင်းမေးမၼ်းဢေးဝ လႄႈ ဢေးဝ ၼၼ်ႉပႃးပတိၵ်ႉသၼ်ႇထေႇသေယဝ်ႉၵိူတ်ႇလဵင်ႉလုၵ်ႈၸၢႆး ၵႃႇဢိၼ ဢေႃႈ။မၼ်းဝႃႈ၊-ၵွပ်ႈပိူဝ်ႈထႃႇဝရႃႉၽြႃးၸွႆႈထႅမ်လႄႈ ၵဝ်လႆႈၵူၼ်းၸၢႆးယဝ်ႉ၊ဝႃႈၼႆဢေႃႈ။

၂ ဝၢႆးၼၼ်ႉ သမ်ႉၵိူတ်ႇလဵင်ႉၼွင်ႉၸၢႆးမၼ်း ဢႃႇပေႇလဢေႃႈ။ ဢႃႇပေႇလ ပဵၼ်ၵူၼ်းလဵင်ႉသူဝ်းဢေႃႈ။ ၵႃႇဢိၼ ပဵၼ်ၵူၼ်းဢၼ်ႁဵတ်းႁႆႊႁဵတ်းၼႃးဢေႃႈ။

၃ မိူဝ်ႈဢၼ်ၶိင်ႇမၼ်းထူၼ်ႈၼၼ်ႉ၊ ၵႃႇဢိၼ ဢဝ်မၢၵ်ႇၼိူဝ်လိၼ်မႃး ႁႂ်ႈပဵၼ်ပုၼ်ႈဢၼ်တၵ်းပုၵ်ႉၸေႃႇထႃႇ ဝရႃႉၽြႃးဢေႃႈ။

၄ ဢႃႇပေႇလ ၵေႃႈဢဝ်တူဝ်ဢၼ်ၵိူတ်ႇလဵင်ႉဢွၼ်တၢင်းပိူၼ်ႈ ၼႂ်းၽုင်သူဝ်းမၼ်းၼၼ်ႉၵမ်ႈၽွင်ႈဢိၵ်ႇတင်း ၵွၼ်ႈၶႆၵွၼ်ႈမၼ်းသူဝ်းၼၼ်ႉမႃးဢေႃႈ။ ထႃႇဝရႃႉၽြႃးထုၵ်ႇၸႂ်ၵျိူၵ်ႈၸႂ် ဢႃႇပေႇလ တင်းတၢင်းပုၵ်ႉၸေႃႇမၼ်းဢေႃႈ။

၅ ၵႃႇဢိၼ ဢိၵ်ႇတင်းတၢင်းပုၵ်ႉၸေႃႇမၼ်းၸမ်း မၼ်းၸဝ်ႈဢမ်ႇထုၵ်ႇၸႂ်ၵျိူၵ်ႈၸႂ်။ပိူဝ်ႈၼႆလႄႈ ၵႃႇဢိၼ ၸႂ်မႆႈၶႂ်ႈၸႃႉၼႃႇ လူင်လၢင်လႄႈၼႃႈလူႉဢေႃႈ။

၆ ထႃႇဝရႃႉၽြႃးၵေႃႈလၢတ်ႈတီႈ ၵႃႇဢိၼ ဝႃႈ၊- ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈမႂ်းၸႂ်မႆႈ။ ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈ မႂ်းၼႃႈလူႉ။

၇ ပေႃးမႂ်းႁဵတ်းဢၼ်လီၸိုင်မႂ်းတၵ်းဢမ်ႇလႆႈဢၶႂၢင်ႉႁိုဝ်။ပေႃးမႂ်းဢမ်ႇႁဵတ်းဢၼ်လီၸိုင်ဢပျႅတ်ႈၶူပ်ႉမူပ်ႇမီးယူႇႁိမ်းၽၵ်းတူမႂ်းဢေႃႈ။ ဢပျႅတ်ႈၼၼ်ႉၶႂ်ႈလႆႈမႂ်းဢေႃႈ။ ၵူၺ်းၵႃႈမႂ်းတၵ်းလႆႈဢုပ်ႉပိူင်ႇမၼ်းဢေႃႈ၊ဝႃႈၼင်ႇၼႆဢေႃႈ။

၈ ၵႃႇဢိၼ လၢတ်ႈၵႂၢမ်းတေႃႇၵၼ်တင်းၼွင်ႉၸၢႆးမၼ်းဢႃႇပေႇလ သေယဝ်ႉသွင်ၶႃၵွႃႇႁွတ်ႈထိုင်ၵႃႈတီႈတူင်ႈၼႃးဢေႃႈ။ ၵႃႈၼႂ်းတူင်ႈၼႃးၼၼ်ႉ ၵႃႇဢိၼ ႁဵတ်းတၢင်းၽိတ်းသႂ်ႇၼွင်ႉၸၢႆးမၼ်း ဢႃႇပေႇလ လႄႈဢဝ် မၼ်းတၢႆဢေႃႈ။

၉ ထႃႇဝရႃႉၽြႃးၵေႃႈထၢမ်တီႈ ၵႃႇဢိၼဝႃႈ၊-ၼွင်ႉၸၢႆးမႂ်း ဢႃႇပေႇလ မီးၵႃႈလႂ်၊ဝႃႈၼင်ႇၼႆဢေႃႈ။မၼ်းၵေႃႈလၢတ်ႈလႄႈဝႃႈ၊ၶႃႈၸဝ်ႈဢမ်ႇႁူႉၶႃႈ။ၶႃႈၸဝ်ႈ ပဵၼ်ၵေႃႉဢၼ်လူတူၺ်းၼွင်ႉၸၢႆးၶႃႈၸဝ်ႈၶႃႈ ႁိုဝ်း၊ဝႃႈၼင်ႇၼႆဢေႃႈ။

၁၀ မၼ်းၸဝ်ႈၵေႃႈဝႃႈ၊-မႂ်းႁဵတ်းၸိူဝ်ႉၼင်ႇႁိုဝ်ယဝ်ႉ။သဵင်လိူတ်ႈၼွင်ႉၸၢႆးမႂ်းႁွင်ႉသႅၼ်ႇႁႃ ၵဝ်ယူႇၵႃႈတီႈၼႂ်းလိၼ်ၼၼ်ႉလူင်ပေႇ။

၁၁ ၸႃႉၸဵမ်တေႃႈလဵဝ်ၼႆႉမႂ်းလႆႈၶၢမ်ႇတၢင်းၵိၼ်ႇတၢင်းဝႃႈ ႁေႃႈႁိုပ်ႉဢွၵ်ႇသေၵႃႈတီႈလိၼ် ဢၼ်ၽုၺ်ႇသူပ်းမၼ်းႁႂ်ႈလႆႈၶၢမ်ႇဢဝ်လိူတ်ႈၼွင်ႉၸၢႆးမႂ်းၵႃႈၼႂ်းမိုဝ်းမႂ်းၼၼ်ႉယဝ်ႉ။

၁၂ မိူဝ်ႈဢၼ်မႂ်းႁဵတ်းၵႃႈတီႈလိၼ်ၸိုင်၊ လိၼ်တၵ်းဢမ်ႇပၼ်မၢၵ်ႇၶဝ်ႈမဵတ်ႉၶဝ်ႈ ၸွမ်းၼင်ႇပၵတိပၵ်းၵဝ်ႇပိူင်ၵဝ် ၼၼ်ႉတီႈမႂ်း။

၁၃ မႂ်းတၵ်းလႆႈပဵၼ်ၵေႃႉဢၼ်ဢွၵ်ႇပၢႆပိူၼ်ႈ၊ၵေႃႉဢၼ်လႄႇၵွႃႇၵူႈတီႈၵူႈလႅၼ် ၵႃႈၼိူဝ်လိၼ်မိူင်းၼႆႉ ဢေႃႈ၊ဝႃႈၼင်ႇၼႆဢေႃႈ။ၵႃႇဢိၼ ၵေႃႈလဝ်ႈလၢတ်ႈတီႈထႃႇဝရႃႉၽြႃးလႄႈဝႃႈ၊-ဢပျႅတ်ႈၶႃႈၸဝ်ႈၼႆႉယႂ်ႇ ၼႃႇထၼ်ႈပေႃး ဢမ်ႇၶၢမ်ႇလႆႈတီႈၶႃႈယဝ်ႉ။

၁၄ တူၺ်းသေၵမ်းတီႈၶႃႈ။ ဝၼ်းမိူဝ်ႈၼႆႉၸဝ်ႈႁဝ်းႁေႃႈၶႃႈၸဝ်ႈဢွၵ်ႇသေ ၵႃႈၼိူဝ်ၼႃႈလိၼ်တီႈၶႃႈယဝ်ႉ။ ၶႃႈၸဝ်ႈတၵ်းလႆႈၶၢမ်ႇတၢင်းဢၼ် သိူင်ႇမႅပ်းၵႃႈတီႈၼႃႈၸဝ်ႈႁဝ်းတီႈၶႃႈယဝ်ႉ။ၵႃႈၼိူဝ်လိၼ်မိူင်းၼႆႉၵေႃႈတၵ်းလႆႈပဵၼ်ၵေႃႉဢၼ်ဢွၵ်ႇပၢႆပိူၼ်ႈ၊ ၵေႃႉဢၼ်လႄႇၵွႃႇၵူႈတီႈၵူႈလႅၼ်တီႈၶႃႈယဝ်ႉ။ၵေႃႉဢၼ်ထူပ်းႁၼ်ၶႃႈၸဝ်ႈၼၼ်ႉ တၵ်းဢဝ်ၶႃႈၸဝ်ႈတၢႆတီႈၶႃႈဢေႃႈ၊ ဝႃႈၼင်ႇၼႆဢေႃႈ။

၁၅ ထႃႇဝရႃႉၽြႃးၵေႃႈလၢတ်ႈတီႈမၼ်းဝႃႈ၊-ပိူဝ်ႈၼႆလႄႈၽူႈလႂ်သေဢမ်ႇဝႃႈၵေႃႉဢၼ်ဢဝ်ၵႃႇဢိၼ တၢႆၼၼ်ႉတၵ်းလႆႈၶၢမ်ႇတၢမ်ႇဢပျႅတ်ႈၸဵတ်းပုၼ်ႊဢေႃႈ၊ ဝႃႈၼင်ႇၼႆသေယဝ်ႉ၊ ၼင်ႇႁိုဝ်ၶဝ်ၸိူဝ်းဢၼ်ထူပ်းႁၼ် ၵႃႇဢိၼ ၼၼ်ႉသေၵေႃႉသေၵူၼ်းတၵ်းဢမ်ႇလႆႈဢဝ်မၼ်းတၢႆၸိုင် ထႃႇဝရႃႉၽြႃးပၼ်တီႈမၢတ်ႈတီႈတွင်းတီႈမၼ်းဝႆႉဢေႃႈ။

၁၆ ၵႃႇဢိၼ ဢွၵ်ႇသေၵႃႈတီႈထႃႇဝရႃႉၽြႃးၵွႃႇသေယဝ်ႉယူႇၵႃႈၼႂ်းမိူင်း ၼေႃႇတ ၵႃႈတီႈၽၢႆႇဝၼ်းဢွၵ်ႇမိူင်းဢေႇတိၼ်ႇၼၼ်ႉဢေႃႈ။

၁၇ မိူဝ်ႈၼၼ်ႉ ၵႃႇဢိၼ သိူၵ်ႈသမ်ႇၵၼ်တင်းမေးမၼ်းလႄႈ မေးမၼ်းပႃးပတိၵ်ႉသၼ်ႇထေႇသေယဝ်ႉၵိူတ်ႇလဵင်ႉ ဢေးၼွၵ် မႃးဢေႃႈ။ ၵႃႇဢိၼ ၵေႃႈတႄႇႁဵတ်းဝဵင်းလႄႈ ၸွမ်းလူၺ်ႈၸိုဝ်ႈသဵင်လုၵ်ႈၸၢႆးမၼ်းၼၼ်ႉႁွင်ႉႁိၵ်ႈၸိုဝ်ႈဝဵင်းၼၼ်ႉဝႃႈ ဝဵင်း ဢေးၼွၵ် ဢေႃႈ။

၁၈ဢေးၼွၵ် သမ်ႉမီးလုၵ်ႈၸၢႆး ဢိရတ်ႉ၊ ဢိရတ်ႉ သမ်ႉမီးလုၵ်ႈၸၢႆး မရုယေႇလ၊ မရုယေႇလ သမ်ႉမီးလုၵ်ႈၸၢႆး မသုသလ၊ မသုသလ သမ်ႉမီးလုၵ်ႈၸၢႆး လႃႇမိၵ်ႉဢေႃႈ။

၁၉ လႃႇမိၵ်ႉ ဢဝ်မေးသွင်ၵေႃႉ ဢၼ်လႆႈၸိုဝ်ႈ ဢႃႇတတင်း ၸီႇယ ဢေႃႈ။

၂၀ ဢႃႇတ ၵိူတ်ႇလဵင်ႉ ယႃႇပလဢေႃႈ။ မၼ်းပဵၼ်ပေႃႈ ပဵၼ်သြႃႇၶဝ်ၸိူဝ်းဢၼ်ယူႇၼႂ်းသုမ်ႉထဵင်လႂ် ဢိၵ်ႇတင်း ၶဝ်ၸိူဝ်းဢၼ်လဵင်ႉထိင်းသူဝ်းဝူဝ်းလႂ်ၼၼ်ႉဢေႃႈ။

၂၁ ၼွင်ႉၸၢႆးမၼ်းၸမ်းလႆႈၸိုဝ်ႈ ယုပလ လႄႈပဵၼ်ပေႃႈပဵၼ်သြႃႇ ၶဝ်ၸိူဝ်းဢၼ်ၸၢင်ႊလဵတ်းတိင်ႇပဝ်ႇၼႄးၶရႃႇတင်းသဵင်ႈတင်းလူင်ၼၼ်ႉဢေႃႈ။

၂၂ ၸိလ ၵေႃႈၵိူတ်ႇလဵင်ႉ တုပလၵႃႇဢိၼ မႃးဢေႃႈ။မၼ်းပဵၼ်သြႃႇၸၢင်ႊလဵၵ်းၸၢင်ႊၶမ်း တင်းသဵင်ႈတင်းလူင်ဢေႃႈ။ၼွင်ႉယိင်း တုပလၵႃႇဢိၼ ၸမ်းလႆႈၸိုဝ်ႈ ၼေႇမ ဢေႃႈ။

၂၃ လႃႇမိၵ်ႉ ၵေႃႈလၢတ်ႈတီႈမေးမၼ်းၸိူဝ်းၼၼ်ႉလႄႈဝႃႈ၊- ဢႃႇတ တင်း ၸိလ ၶဝ်ဢိူၺ်း၊မၢတ်ႈတွင်းၵႂၢမ်းဢၼ်ၵဝ်လၢတ်ႈၼႆႉဝႆႉတႃႉ။ မေးလႃႇမိၵ်ႉ ၶဝ်ဢိူၺ်း။ ထွမ်ႇငိၼ်းတႃႉ။ ၵဝ်လႆႈဢဝ်တၢႆမႃးယဝ်ႉၵူၼ်းၵေႃႉၼိုင်ႈ ဢၼ်ႁဵတ်းႁႂ်ႈၵဝ်ၸဵပ်းသႅပ်ႇ၊ ၽူႈမၢဝ်ႇၵေႃႉၼိုင်ႈဢၼ်ႁႂ်ႈၵဝ်တိူဝ်ႉမၢတ်ႇၼၼ်ႉဢေႃႈ။

၂၄ ပေႃး ၵႃႇဢိၼ လႆႈၶၢမ်ႇတွပ်ႇတႅၼ်း ၸဵတ်းပုၼ်ႊၸိုင်လႃႇမိၵ်ႉ တၵ်းလႆႈၶၢမ်ႇတွပ်ႇတႅၼ်း ၸဵတ်းသိပ်းၸဵတ်းပုၼ်ႊဢေႃႈ၊ဝႃႈၼင်ႇၼႆဢေႃႈ။

၂၅ ဢႃႇတမ်ႇ ၵေႃႈသမ်ႉသိူၵ်ႈသမ်ႇၵၼ်တင်းမေးမၼ်းသေယဝ်ႉၵိူတ်ႇလဵင်ႉလုၵ်ႈၸၢႆးမႃးလႄႈႁွင်ႉႁိၵ်ႈၸိုဝ်ႈ သေႇထဢေႃႈ။ လွင်ႈမၼ်းၸမ်း၊မၼ်းဝႃႈ၊- ၽြႃးပဵၼ်ၸဝ်ႈၶၢၼ်းဝႆႉၸိူဝ်ႉၶိူဝ်းတၢင်ႇၸိူဝ်ႉတၢင်ႇၶိူဝ်း ႁႂ်ႈပဵၼ်တၢင်တူဝ် ဢႃႇပေႇလ ပုၼ်ႈၵဝ်ၶႃႈၵွပ်ႈပိူဝ်ႈဢၼ် ၵႃႇဢိၼဢဝ်မၼ်းတၢႆၼၼ်ႉယဝ်ႉ၊ဝႃႈၼင်ႇၼႆဢေႃႈ။သေႇထ ၵေႃႈမီးလုၵ်ႈၸၢႆးလႄႈႁွင်ႉႁိၵ်ႈၸိုဝ်ႈ ဢေႇၼုတ်ႉဢေႃႈ။ ၼႂ်းၶိင်ႇၵႃႇလႃႉၼၼ်ႉၶဝ်ၸႃႉႁွင်ႉႁႃၼႃႇမႃႉၸိုဝ်ႈသဵင်ထႃႇဝရႃႉၽြႃးဢေႃႈ။