Shan Missions

ၵျၢမ်းငဝ်ႈၵမ်ႇၽႃႇ

၁   ၂   ၃   ၄   ၅   ၆   ၇   ၈   ၉   ၁၀   ၁၁   ၁၂   ၁၃   ၁၄   ၁၅   ၁၆   ၁၇   ၁၈   ၁၉   ၂၀   ၂၁   ၂၂   ၂၃   ၂၄   ၂၅   ၂၆   ၂၇   ၂၈   ၂၉

၃၀   ၃၁   ၃၂   ၃၃   ၃၄   ၃၅   ၃၆   ၃၇   ၃၈   ၃၉   ၄၀   ၄၁   ၄၂   ၄၃   ၄၄   ၄၅   ၄၆   ၄၇   ၄၈   ၄၉   ၅၀   

၁၉

ဝဵင်းသေႃးတုင်ႇတင်းဝဵင်းၵေႃးမေႃ:ရလႆႈၶၢမ်ႇတၢင်းဢၼ်ၽႆးၸုတ်ႇပႅတ်ႈ

၁ တမၢၼ်ႇၵၢင်ႁၢဝ်သွင်ပႃးၼၼ်ႉ ၶိင်ႇႁူဝ်ၶမ်ႈႁွတ်ႈထိုင်မႃးၵႃႈတီႈဝဵင်း သေႃးတုင်ႇ ဢေႃႈ။ လေႃးတ ၼင်ႈယူႇၵႃႈႁိမ်းႁူးၽၵ်းတူဝဵင်းလႄႈ ႁၼ်ၶဝ်သေယဝ်ႉလုၵ်ႉၵွႃႇႁႂ်ႈလႆႈႁပ်ႉႁူဝ်တၢင်းၶဝ်လႄႈ ၶုပ်ႉမူပ်ႇၵႃႈၼိူဝ်လိၼ် သေလႄႈဝႃႈ၊-

၂ တူၺ်းၶႃႈလူႊ၊ၸဝ်ႈၵဝ်ၶႃႈၶဝ်ဢိူၺ်း။ၶႅၼ်းတေႃႈၶဝ်ႈၵႃႈၼႂ်းႁိူၼ်းၶႃႈၸဝ်ႈသေလႄႈ ယူႇတင်းၶိုၼ်းသေၵမ်းတီႈၶႃႈ။ သုၵ်ႈတိၼ်သေၵမ်းတီႈၶႃႈ။ ၶိင်ႇၵၢင်ၼႂ်ၸဝ်ႉၸင်ႇလုၵ်ႉလႄႈၵွႃႇသေၵမ်းတီႈၶႃႈ၊ဝႃႈၼင်ႇၼႆဢေႃႈ။ၶဝ်ၼၼ်ႉၵေႃႈလၢတ်ႈလႄႈဝႃႈ၊- ႁဝ်းဢမ်ႇၶဝ်ႈယဝ်ႉ။ ႁဝ်းတၵ်းယူႇၵႃႈတီႈၵၢင် တၢင်းၼႆႉတင်းၶိုၼ်းဢေႃႈ၊ဝႃႈၼင်ႇၼႆသေၵေႃႈ၊ ၵွပ်ႈပိူဝ်ႈဢၼ် မၼ်းတွင်းပၢၼ်ႇၸူဝ်းဢဝ်ၶဝ်ၼႃႇလႄႈၶဝ်ၵေႃႈၵွႃႇၸူးၵႃႈတီႈဢၼ်မၼ်းယူႇၼၼ်ႉလႄႈ ၶဝ်ႈၵႃႈၼႂ်းႁိူၼ်းမၼ်းဢေႃႈ။

၃ မၼ်းၵေႃႈႁဵတ်းပွႆးပုၼ်ႈၶဝ်လႄႈ လိုင်ႈၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉသေယဝ်ႉၶဝ်ဢွၼ်ၵၼ်ၵိၼ်ဢေႃႈ။

၄ၸူဝ်ႈဢၼ်ၶဝ်ဢမ်ႇပႆႇၼွၼ်းၼၼ်ႉ၊ ၵူၼ်းၸၢႆးဝဵင်းသေႃးတုင်ႇ လဵၵ်ႉလဵၵ်ႉယႂ်ႇယႂ်ႇဢၼ်လုၵ်ႉသေၵူႈတီႈၵူႈလႅၼ်မႃးတင်းသဵင်ႈတင်းလူင်ၸိူဝ်းၼၼ်ႉ ဢွၼ်ၵၼ်ဝႅင်းႁွပ်ႈႁိူၼ်းမၼ်းလႄႈသႅၼ်ႇႁွင်ႉတီႈ လေႃးတ လႄႈ ဝႃႈ၊-

၅ ၵူၼ်းဢၼ်မႃးၶဝ်ႈမီးၵႃႈၼႂ်းႁိူၼ်းမႂ်းၶမ်ႈၼႆႉၸိူဝ်းၼၼ်ႉမီးၵႃႈလႂ်။ႁဝ်းၶႂ်ႈသိူၵ်ႈသမ်ႇၵၼ်တင်းၶဝ်ဢိူဝ်ႈ။ဢဝ်ၶဝ်ဢွၵ်ႇမႃးၸူးၵႃႈတီႈႁဝ်းတႃႉ၊ ဝႃႈၼင်ႇၼႆဢေႃႈ။

၆ လေႃးတ ၵေႃႈဢွၵ်ႇၵႃႈၼွၵ်ႈၽၵ်းတူၸူးတီႈၶဝ်လႄႈဢိုတ်းၽၵ်းတူၽၢႆႇတၢင်းလင်မၼ်းသေယဝ်ႉ လၢတ်ႈ ဝႃႈ၊-ပီႈၼွင်ႉၶဝ်ဢိူၺ်း။

၇ ၶႅၼ်းတေႃႈယႃႇပေႁဵတ်းဢမူႉဢႃႉထမ်ႇမႃႉထၢၼ်ႇၼႆႉသေၵမ်း။ ၵဝ်ၶႃႈမီးလုၵ်ႈယိင်းသွင်ၵေႃႉ ဢၼ်ဢမ်ႇပႆႇသိူၵ်ႈသမ်ႉၵၼ်တင်းၵူၼ်းၸၢႆး သေပွၵ်ႈၼၼ်ႉဢေႃႈ။

၈ ပၼ်ဢၶႂၢင်ႉႁႂ်ႈလႆႈဢဝ်ဢွၵ်ႇပၼ်တီႈသူသေၵမ်း။ၶႂ်ႈႁဵတ်းၸိူဝ်ႉၼင်ႇႁိုဝ်တီႈၶဝ်ၵေႃႈႁဵတ်းတႃႉ။ တီႈၵူၼ်းၶႅၵ်ႇၸိူဝ်းၼႆႉၸိုင်၊ယႃႇပေႁဵတ်းၵႃႈသင်တီႈၶဝ်သေၵမ်း။ လွင်ႈမၼ်းၸမ်း၊ ၶဝ်ၼႆႉၶဝ်ႈသွၼ်ႈပိုင်ႈၵႃႈတႂ်ႈမုင်းႁိူၼ်းၵဝ်ၶႃႈဢေႃႈ၊ ဝႃႈၼင်ႇၼႆဢေႃႈ။

၉ ပဵၵ်ႉသမ်ႉဝႃႈၼင်ႇၼႆသေၵေႃႈ ၶဝ်ၼၼ်ႉလၢတ်ႈလႄႈဝႃႈ၊-သုတ်ႉဝေႈတႃႉ။ ဢၢႆႈၼႆႉမၼ်းမႃးႁႂ်ႈလႆႈသွၼ်ႈပိုင်ႈသူၵူၺ်းဢေႃႈ။မၼ်းတၵ်းလႆႈႁဵတ်းၵေႃႉဢၼ်ၸီႇယၢင်ႇတြႃးၵႃႈၼိူဝ်ႁဝ်းႁိုဝ်။ တေႃႈလဵဝ်ၼႆႉႁဝ်းတၵ်းႁဵတ်းဢမူႉဢၼ်ႁုၵ်းဢၼ်ႁၢႆႉ တီႈမႂ်း ၼႃႇသေဢမူႉဢၼ်ႁဵတ်းတီႈၶဝ်ၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊ၽိုတ်ႉဢီး လေႃးတ ႁႅင်းႁႅင်းလႄႈသုတ်ႉၸမ်မႃးႁႂ်ႈ လႆႈဢဝ်ၽၵ်းတူတႅၵ်ႇလႅဝ်ဢေႃႈ။

၁၀ မိူဝ်ႈၼၼ်ႉတမၢၼ်ႇၵၢင်ႁၢဝ်ဢၼ်မီးၼႂ်းႁိူၼ်းၸိူဝ်းၼၼ်ႉ ယိုၼ်းမိုဝ်းဢွၵ်ႇၵႃႈၼွၵ်ႈလႄႈ တိုတ်ႉၸၼ်ဢဝ်လေႃးတၶဝ်ႈၵႃႈၼႂ်း ႁိူၼ်းသေယဝ်ႉဢိုတ်းၽၵ်းတူပႅတ်ႈဢေႃႈ။

၁၁ ၶဝ်ပၼ်တၢမ်ႇတီႈ ၵူၼ်းၸိူဝ်းဢၼ် မီးၵႃႈတီႈၼႃႈၽၵ်းတူႁိူၼ်း ၸိူဝ်းၼၼ်ႉၸဵမ်လဵၵ်ႉၸဵမ်ယႂ်ႇ တႃမွတ်ႇၵွႃႇထၼ်ႈပေႃး ၶဝ်ႁွတ်ႈထိုင်တၢင်းယၢပ်ႇၸႂ်ၽိုတ်ႇၸႂ်ၼႃလူင်လၢင်တေႃႇၶဝ်ပေႃးဢမ်ႇႁၼ်ၽၵ်းတူႁိူၼ်းလႆႈဢေႃႈ။

၁၂တမၢၼ်ႇၵၢင်ႁၢဝ်ၸိူဝ်းၼၼ်ႉၵေႃႈ၊ လၢတ်ႈတီႈလေႃးတ လႄႈဝႃႈ၊-ၵႃႈတီႈၼႆႉမီးၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉလူးၵွၼ်ႁိုဝ်။ဢဝ်လုၵ်ႈၶူၺ်မႂ်း၊လုၵ်ႈၸၢႆးမႂ်း လုၵ်ႈယိင်းမႂ်းဢိၵ်ႇတင်း ၵႃႈဢၼ်မီးၵႃႈတီႈမႂ်းၵႃႈၼႂ်းဝဵင်းၼႆႉၸိူဝ်းၼၼ်ႉသေယဝ်ႉ ဢွၵ်ႇသေၵႃႈ တီႈၼႆႉၵွႃႇတႃႉ။

၁၃ ႁဝ်းတၵ်းလႆႈယႃႉတီႈၼႆႉပႅတ်ႈယဝ်ႉ။လွင်ႈမၼ်းၸမ်း၊ ၵွပ်ႈပိူဝ်ႈသဵင်ႈတၢင်းဢၼ်ၵူၼ်းတီႈၼႆႉဢွၼ်ၵၼ်ႁွင်ႉသႅၼ်ႇၼၼ်ႉယႂ်ႇၼႃႇလူင်လၢင် ၵႃႈတီႈၽၢႆႇၼႃႈထႃႇဝရႃႉၽြႃးလႄႈ ထႃႇဝရႃႉၽြႃးပွႆႇၸႂ်ႉႁဝ်းမႃး ႁႂ်ႈလႆႈယႃႉဝဵင်းၼႆႉပႅတ်ႈယဝ်ႉ၊ဝႃႈၼင်ႇၼႆဢေႃႈ။

၁၄ လေႃးတ ၵေႃႈဢွၵ်ႇၵွႃႇမွၵ်ႇလၢတ်ႈတီႈလုၵ်ႈၶူၺ်မၼ်းဢၼ်မၢႆၵၼ်ဝႆႉတင်းလုၵ်ႈယိင်းမၼ်းဝႆႉ ၸိူဝ်းၼၼ်ႉလႄႈဝႃႈ၊-လုၵ်ႉတႃႉ။ ဢွၵ်ႇသေၵႃႈၼႂ်းတီႈၼႆႉၵွႃႇတႃႉ။ထႃႇဝရႃႉၽြႃးတၵ်းယႃႉဝဵင်းၼႆႉပႅတ်ႈယဝ်ႉ၊ ဝႃႈၼင်ႇၼႆသေၵေႃႈ လုၵ်ႈၶူၺ်မၼ်းၸိူဝ်းၼၼ်ႉထၢင်ႇဝႃႈမၼ်းယဝ်ႉယွၵ်ႇလဵၼ်ႈၶဝ်ၵူၺ်းၼႆဢေႃႈ။

၁၅ မိူဝ်ႈဢၼ်မိူင်းလႅင်းမႃးၼၼ်ႉ တမၢၼ်ႇၵၢင်ႁၢဝ်ၸိူဝ်းၼၼ်ႉတိုၵ်းယူင်းႁႂ်ႈ လေႃးတ ႁဵတ်းၶၼ်ၶၼ်ၽႂ်းၽႂ်းလႄႈဝႃႈ၊- မႂ်းလုၵ်ႉလႄႈဢဝ်မေးမႂ်းဢိၵ်ႇတင်းလုၵ်ႈယိင်းမႂ်းသွင်ၵေႃႉ ဢၼ်မီးယူႇၵႃႈတီႈၼႆႉၸိူဝ်းၼႆႉလႄႈဢွၵ်ႇၵွႃႇတႃႉ။ပေႃးဢမ်ႇၼၼ်မႂ်းတၵ်းႁွတ်ႈထိုင်တၢင်းဢၼ်သုမ်းဢၼ်ၸွမ်း ၵႃႈၼႂ်းဢပျႅတ်ႈဝဵင်းၼႆႉဢေႃႈ၊ ပိၵ်ႉသမ်ႉဝႃႈၼင်ႇၼႆသေၵေႃႈ

၁၆ မၼ်းယင်းႁဵတ်းၵွႆႈႁဵတ်းထိူင်းယူႇလႄႈ ပိူဝ်ႈဢၼ် ထႃႇဝရႃႉၽြႃး ဢိတ်းလူလႄႈ တမၢၼ်ႇၵၢင်ႁၢဝ်ၸိူဝ်းၼၼ်ႉ တိုတ်ႉၸၼ်ဢဝ်မိုဝ်းမၼ်းတင်းမိုဝ်းမေးမၼ်း တင်းမိုဝ်းလုၵ်ႈယိင်းမၼ်းသွင်ၵေႃႉၼၼ်ႉသေယဝ်ႉ ဢဝ်ဢွၵ်ႇၵွႃႇဝႆႉၵႃႈတီႈၼွၵ်ႈဝဵင်းဢေႃႈ။

၁၇ ဝၢႆးသေ ဢဝ်ၶဝ်ဢွၵ်ႇၵႃႈၼွၵ်ႈယဝ်ႉၼၼ်ႉၸိုင်မၼ်းၸဝ်ႈလၢတ်ႈလႄႈဝႃႈ၊-ၶုၼ်ႇလႅၼ်ႈပၢႆႁႂ်ႈလွတ်ႈၽေးႁႂ်ႈဢသၢၵ်ႈမႂ်းလႆႈၵတ်းယဵၼ်ၶျၢမ်းသႃႇတႃႉ။ယႃႇပေဝၢႆႇတူၺ်းၶိုၼ်းတၢင်းလင်။ ယႃႇပေယူႇၵႃႈၼႂ်းပၢင်ႇပဵင်းၼႆႉလႃးလႃး။ လႅၼ်ပၢႆၵွႃႇၵႃႈၼိူဝ်လွႆတႃႉ။ ပေႃးဢမ်ႇၼၼ်မႂ်းတၵ်းသုမ်းတၵ်းၸွမ်းဢေႃႈ၊ ဝႃႈၼင်ႇ ၼႆဢေႃႈ။

၁၈ လေႃးတ ၵေႃႈလဝ်ႈလၢတ်ႈလႄႈဝႃႈ၊-ၸဝ်ႈၵဝ်ၶႃႈဢိူၺ်း။ ယႃႇပဝေႃႈၸိူဝ်ႉၼင်ႇၼၼ်သေၵမ်းတီႈၶႃႈ။တေႃႈလဵဝ်ၼႆႉၶႃႈၸဝ်ႈလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းတီႈၶႃႈယဝ်ႉ။ ၸဝ်ႈႁဝ်းႁႂ်ႈၵျေးၸူးၵရူႉၼႃႇၸဝ်ႈႁဝ်း ႁွတ်ႈထိုင်ၵႃႈၼိူဝ်ၶႃႈၸဝ်ႈလႄႈႁႂ်ႈဢသၢၵ်ႈၶႃႈၸဝ်ႈ လႆႈၵတ်းယဵၼ်ၶျၢမ်းသႃႇ တီႈၶႃႈဢေႃႈ။

၁၉ ၶႃႈၸဝ်ႈဢမ်ႇလႅၼ်ၶိုၼ်ႈၵွႃႇၵႃႈၼိူဝ်လွႆၼၼ်ႉလႆႈလႄႈ ၽေးတၵ်းႁွတ်ႈထိုင် ၵႃႈၼိူဝ်ၶႃႈ ၸဝ်ႈလႄႈတၵ်းတၢႆတီႈၶႃႈဢေႃႈ။

၂၀ တူၺ်းတီႈၶႃႈလူႊ၊ဝဵင်းဢွၼ်ႇၼၼ်ႉၸမ်လႄႈ ပၢႆၵွႃႇၸူးလႆႈငၢႆႈယူႇတီႈၶႃႈဢေႃႈ။ ႁႂ်ႈလႆႈလႅၼ်ႈပၢႆလွတ်ႈၽေးၵွႃႇၸူးၵႃႈတီႈဝဵင်းၼၼ်ႉသေၵမ်းၶႃႈ။ ဝဵင်းၼၼ်ႉပဵၼ်ဝဵင်းဢၼ်လဵၵ်ႉဢၼ်ဢွၼ်ႇဢမ်ႇၸႂ်ႈၶႃႈႁိုဝ်။ သင်ပေႃးလႆႈပၢႆၵွႃႇတီႈၼၼ်ႉၸိုင် ဢသၢၵ်ႈၶႃႈၸဝ်ႈတၵ်းလႆႈၵတ်းယဵၼ်ၶျၢမ်းသႃႇယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။

၂၁ မၼ်းၸဝ်ႈၵေႃႈလၢတ်ႈလႄႈဝႃႈ၊-တူၺ်းလူႊ၊ၼႂ်းတီႈႁဵင်းၼႆႉၵေႃႈ ၵဝ်လႆႈထွမ်ႇဢဝ်ၵႂၢမ်းမႂ်းလႄႈတၵ်းဢမ်ႇ ယႃႉဝဵင်းဢၼ်မႂ်းတွင်းပၢၼ်ႇၼၼ်ႉပႅတ်ႈၵူၺ်း။ ႁဵတ်းၶၼ်ၶၼ်ၽႂ်းၽႂ်းလႄႈ လႅၼ်ႈပၢႆလွတ်ႈၽေးၵွႃႇၸူးၵႃႈတီႈဝဵင်းၼၼ်ႉတႃႉ။ ၸူဝ်ႈဢၼ်မႂ်းဢမ်ႇပႆႇလႆႈႁွတ်ႈထိုင်ၵႃႈတီႈဝဵင်းၼၼ်ႉၸိုင် ၵဝ်ဢမ်ႇႁဵတ်းၵႃႈသင်သေၸိူဝ်ႉသေပိူင်ၵူၺ်း၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈဝဵင်းၼၼ်ႉ၊ လႆႈႁွင်ႉႁိၵ်ႈၸိုဝ်ႈဝႃႈဝဵင်း ၸေႃႇရ ဢေႃႈ။

၂၃ မိူဝ်ႈဢၼ် လေႃးတ ႁွတ်ႈထိုင်ၵႃႈၼႂ်းဝဵင်း ၸေႃႇရၼၼ်ႉပဵၼ်ၶိင်ႇဢၼ်ၵၢင်ၼႂ်ဝၼ်းဢွၵ်ႇဢေႃႈ။

၂၄ မိူဝ်ႈၼၼ်ႉ ထႃႇဝရႃႉၽြႃးႁႂ်ႈၽူၼ်ဢၼ်ပဵၼ်ၽႆးတင်းၵၢၼ်ႉ လုၵ်ႉသေၵႃႈတီႈမၼ်းၸဝ်ႈ ၵႃႈၼိူဝ်ၵၢင်ႁၢဝ်ပုၼ်ႉတူၵ်းလူင်းမႃးၵႃႈၼိူဝ်ဝဵင်း သေႃးတုင်ႇ တင်းဝဵင်း ၵေႃးမေႃးရ ဢေႃႈ။

၂၅ မၼ်းၸဝ်ႈၶႂၢမ်ႈပိၼ်ႈဝဵင်းၸိူဝ်းၼၼ်ႉပၢင်ႇပဵင်းၸိူဝ်းၼၼ်ႉ တင်းသဵင်ႈတင်းလူင်ၵူၼ်းဝဵင်းတင်းသဵင်ႈတင်းလူင် ၵႃႈဢၼ်ဢွၵ်ႇၵႃႈၼိူဝ်လိၼ် ၸိူဝ်းၼၼ်ႉတင်းသဵင်ႈတင်းလူင်ပႅတ်ႈဢေႃႈ။

၂၆ မေးမၼ်းၸမ်း ဝၢႆႇတူၺ်းၶိုၼ်းတၢင်းလင်လႄႈပဵၼ်သဝ်ၵိူဝ်ၵွႃႇသေဢေႃႈ။

၂၇ ၶိင်ႇၵၢင်ၼႂ်ၸဝ်ႉၸဝ်ႉ ဢႃႇပြႁမ်ႇ လုၵ်ႉလႄႈၵွႃႇၸူးတီႈဢၼ်မၼ်းၸုၵ်းယူႇၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉသေယဝ်ႉ

၂၈ မုင်ႈတူၺ်းၸႃႉၸဵမ်ဝဵင်း သေႃးတုင်ႇ လႄႈဝဵင်း ၵေႃးမေႃးရ ဢိၵ်ႇတင်းၵႃႈဢၼ်ပဵၼ်ပၢင်ႇပဵင်းၵူႈတီႈၵူႈလႅၼ်ၸိူဝ်းၼၼ်ႉလႄႈ ႁၼ်ဢၢႆၵႂၼ်းမိူင်းၼၼ်ႉၶိုၼ်ႈယူႇ မိူၼ်ၸိူဝ်ႉၼင်ႇဢၢႆၵႂၼ်းမုၵ်ႈၽႆးဢေႃႈ။

၂၉ ၼင်ႇၼၼ်လႄႈ မိူဝ်ႈဢၼ်ၽြႃးပဵၼ်ၸဝ်ႈ ယႃႉဝဵင်းဢၼ်မီးၵႃႈၼႂ်းပၢင်ႇပဵင်းၸိူဝ်းၼၼ်ႉပႅတ်ႈၼၼ်ႉ ၽြႃးပဵၼ်ၸဝ်ႈၶုၵ်းၸႂ်လႆႈၶႆႈၸႂ်ထူပ်း ဢႃႇပြႁမ်ႇ လႄႈၼႂ်းမိူဝ်ႈဢၼ်ၶႂၢမ်ႈပိၼ်ႈဝဵင်းဢၼ် လေႃးတ ယူႇၼၼ်ႉၸိုင်မၼ်းၸဝ်ႈပွႆႇ လေႃးတလွတ်ႈၵႃႈၼႂ်းတၢင်းဢၼ်ၶႂၢမ်ႈပိၼ်ႈပႅတ်ႈၼၼ်ႉဢေႃႈ။

 လေႃးတတင်းလုၵ်ႈသၢဝ်မၼ်း

၃၀ လေႃးတ သမ်ႉဢွၵ်ႇသေၵႃႈၼႂ်းဝဵင်းၸေႃႇရလႄႈယူႇၵႃႈၼိူဝ်လွႆ လူၺ်ႈၵၼ်တင်းလုၵ်ႈယိင်းမၼ်းသွင်ၵေႃႉၼၼ်ႉဢေႃႈ။မၼ်းဢမ်ႇႁတ်းယူႇၵႃႈၼႂ်းဝဵင်း ၸေႃႇရလႄႈ ယူႇၵႃႈၼႂ်းထမ်ႈလူၺ်ႈၵၼ်တင်းလုၵ်ႈယိင်းမၼ်း သွင်ၵေႃႉၼၼ်ႉဢေႃႈ။

၃၁ လုၵ်ႈယိင်းၵေႃႉယႂ်ႇလၢတ်ႈတီႈၼွင်ႉယိင်းမၼ်းလႄႈဝႃႈ၊-ပေႃႈႁဝ်းၼႆႉထဝ်ႈယဝ်ႉ။ၵႃႈၼိူဝ်လိၼ်မိူင်းၼႆႉ ၽူႈၸၢႆးဢၼ်တၵ်းလႆႈၶဝ်ႈၸူးတီႈႁဝ်းၸွမ်းၼင်ႇ ၽႃႇသႃႇၵူၼ်းၵႃႈၼိူဝ်လိၼ်မိူင်းတင်းသဵင်ႈတင်းလူင်ၼၼ်ႉ ဢမ်ႇမီးသေၵေႃႉသေၵူၼ်း။

၃၂ မႃးဢိူၺ်း။ တိုၵ်းၼမ်ႉၸပိတ်ႉပၼ်တီႈပေႃႈႁႃးတႃႉႁႃး။ၶဝ်ႈၼွၼ်းလူၺ်ႈၵၼ်တင်းမၼ်းလႄႈ ႁႂ်ႈၸိူဝ်ႉၶိူဝ်းပေႃႈႁႃးလႆႈသိုပ်ႇၵွႃႇတႃႉႁႃး၊ ဝႃႈၼင်ႇၼႆဢေႃႈ။

၃၃ ၼႂ်းၶိုၼ်းၼၼ်ႉ သွင်ၶႃတိုၵ်းၼမ်ႉၸပိတ်ႉပၼ်ပေႃႈသွင်ၶႃသေယဝ်ႉ လုၵ်ႈယိင်းၵေႃႉယႂ်ႇ ၶဝ်ႈၸူးလႄႈၼွၼ်းလူၺ်ႈၵၼ်တင်းပေႃႈမၼ်းဢေႃႈ။ ပေႃႈမၼ်းဢမ်ႇႁူႉလွင်ႈဢၼ်မၼ်းၼွၼ်း လွင်ႈဢၼ်မၼ်းလုၵ်ႉၼၼ်ႉ။

၃၄ ၼႂ်းဝၼ်းမိူဝ်ႈၽုၵ်ႈၵေႃႉယႂ်ႇၼၼ်ႉ လၢတ်ႈတီႈၼွင်ႉယိင်းမၼ်းဝႃႈ၊-မိူဝ်ႈၶမ်ႈဝႃးၵဝ်လႆႈၼွၼ်းလူၺ်ႈၵၼ်တင်းပေႃႈၵဝ်ယဝ်ႉ။ ၶမ်ႈၼႆႉသမ်ႉတိုၵ်းၼမ်ႉၸပိတ်ႉပၼ်တီႈမၼ်းထႅင်ႈတႃႉႁႃး။မႂ်းၶဝ်ႈၸူးလႄႈၼွၼ်းလူၺ်ႈၵၼ်တင်းမၼ်းႁႂ်ႈၸိူဝ်ႉၶိူဝ်းမၼ်းလႆႈသိုပ်ႇၵွႃႇတႃႉ၊ ဝႃႈၼင်ႇ ၼႆဢေႃႈ။

၃၅ ၶိုၼ်းၼၼ်ႉၵေႃႈ သွင်ၶႃႈသမ်ႉတိုၵ်းၼမ်ႉၸပိတ်ႉပၼ်တီႈပေႃႈသွင်ၶႃႈသေယဝ်ႉ လုၵ်ႈယိင်းၵေႃႉလဵၵ်ႉၶဝ်ႈၸူးလႄႈ ၼွၼ်းလူၺ်ႈၵၼ်တင်းပေႃႈမၼ်းဢေႃႈ။ ပေႃႈမၼ်းဢမ်ႇႁူႉလွင်ႈဢၼ်မၼ်းၼွၼ်းလွင်ႈဢၼ်မၼ်းလုၵ်ႉၼၼ်ႉ။

၃၆ ၼင်ႇၼၼ်လႄႈ လုၵ်ႈယိင်းလေႃးတ သွင်ၵေႃႉၼၼ်ႉ ပႃးပတိၵ်ႉသၼ်ႇထေႇပေႃႈ သွင်ၶႃႈၼၼ်ႉဢေႃႈ။

၃၇ လုၵ်ႈယိင်းၵေႃႉယႂ်ႇၼၼ်ႉၵိူတ်ႇလဵင်ႉလုၵ်ႈၸၢႆးလႄႈ ႁွင်ႉႁိၵ်ႈၸိုဝ်ႈမၼ်းဝႃႈ၊ မေႃႇၽဢေႃႈ။ မၼ်းပဵၼ်ပေႃႈၵူၼ်း မေႃႇၽ တင်းလၢႆတေႃႇ ထိုင်ႁွတ်ႈဝၼ်းမိူဝ်ႈၼႆႉဢေႃႈ။

၃၈ လုၵ်ႈယိင်းၵေႃႉလဵၵ်ႉၵိူတ်ႇလဵင်ႉလုၵ်ႈၸၢႆးလႄႈႁွင်ႉႁိၵ်ႈၸိုဝ်ႈမၼ်းဝႃႈ၊-ပိၼ်ႇဢမ်ႇမိ ဢေႃႈ။ မၼ်းပဵၼ်ပေႃႈၵူၼ်း ဢမ်ႇမုၼ်ႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။