Shan Missions

GENESIS

ၵျၢမ်းငဝ်ႈၵမ်ႇၽႃႇ

ၵျၢမ်းငဝ်ႈၵမ်ႇၽႃႇ ၼႆ့ပဵၼ် မုဝ်းသေႇ တႅမ်ႈဝႆ့မိူဝ်ႈပီႊမိူင်း ၸဝ်ႈယေႇသုၶရိၸ့် ပႆႇပေႃႇ 1450 -1410 BC ၼၼ်ႉဢေႃႈ။

ဢဵၼ်းဢၢၼ်းၵျၢမ်းငဝ်ႈၵမ်ႇၽႃႇၸမ်းၼင်ႇႁိုဝ်တေလႆႈပဵၼ်တၢင်းဢၼ်မၢတ်ႈတွင်းလွင်ႈတၢင်းဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၵမ်ႇၽႃႇလိၼ်မိူင်းၵႃႈမီးတင်းသဵင်ႈတင်းမူတ်းလႄႈႁႂ်ႈၵူၼ်းတင်းသဵင်ႈႁဵတ်းဝၢတ်ႈၵူဝ်းၵွႆႇဝႆႈသႃ မၼ်းၸဝ်ႈၼၼ့်ဢေႃႈ။

ၵျၢမ်းငဝ်ႈၵမ်ႇၽႃႇ

၁

မိူဝ်ႈၵေႃႇၸႃႉႁူဝ်ပိုင်း

၁ မိူဝ်ႈၵေႃႇၸႃႉႁူဝ်ပိုင်းၼၼ်ႉ ၽြႃးပဵၼ်ၸဝ်ႈ ၽၢၼ်ႇသၢင်းႁဵတ်းပဵၼ်ၵၢင်ႁၢဝ်တင်းလိၼ်မိူင်းဢေႃႈ။

လိၼ်မိူင်းၼၼ်ႉ ဢမ်ႇမီးႁၢင်ႊၽၢင်လႄႈ ပဵၼ်ဢၼ် ပဝ်ႇလၢပ်ႈဝႆႉဢေႃႈ။

၂ လပ်းသိင်ႇမုင်းႁူမ်ႇၵႃႈၼိူဝ်တီႈဢၼ်လိုၵ်ႉဢၼ်လမ်ႇၼၼ်ႉဝႆႉလႄႈ ဝိၺိၼ်ႇၽြႃးပဵၼ်ၸဝ်ႈၵိင်းဝၢပ်ႈယူႇၵႃႈၼိူဝ်ပၢင်ႇၽိဝ်ၼမ်ႉဢေႃႈ။

၃ ၽြႃးပဵၼ်ၸဝ်ႈမီးဢမိင်ႉဝႃႈ၊- ႁႂ်ႈဢၼ်လႅင်းပဵၼ်မႃးသေ၊ ဝႃႈၼင်ႇၼႆလႄႈဢၼ်လႅင်းပေႃႇပဵၼ်မႃးဢေႃႈ။

၄ ၽြႃးပဵၼ်ၸဝ်ႈ ႁၼ်ဢၼ်လႅင်းၼၼ်ႉ ပဵၼ်ဢၼ်လီလႄမၼ်းၸဝ်ႈၽႄ ဢၼ်လႅင်းတင်းဢၼ်လပ်းသိင်ႇဢေႃႈ။

၅ ၽြႃးပဵၼ်ၸဝ်ႈႁွင်ႉႁိၵ်ႈဢၼ်လႅင်းၼၼ်ႉဝႃႈ၊ၵႃႈဝၼ်း၊ဢၼ်လပ်းသိင်ႇၼၼ်ႉဝႃႈ၊ၵႃႈၶိုၼ်း၊ ဝႃႈၼႆလႄႈပဵၼ်ႁူဝ်ၶမ်ႈ၊ႁူဝ်ၼႂ်၊ဝၼ်းပထမဢေႃႈ။

၆ ၵမ်းၼၼ်ႉၽြႃးပဵၼ်ၸဝ်ႈဝႃႈ၊-ႁႂ်ႈၼႃႈၽႃႉပဵၼ်မႃးၵႃႈၼႂ်းၶိုင်ႈၵၢင်ၼမ်ႉသေ။

၇ ႁႂ်ႈၼမ်ႉၼင်ႇၵၼ်ၽေၵၼ်သေ၊ဝႃႈၼင်ႇၼႆသေယဝ်ႉ၊ ၽြႃးပဵၼ်ၸဝ်ႈႁဵတ်းပဵၼ်ၼႃႈၽႃႉလႄႈ ၽႄၼမ်ႉဢၼ်မီးၵႃႈၼိူဝ်ၽႃႉ တင်းၼမ်ႉဢၼ်မီးၵႃႈတႂ်ႈၽႃႉၼၼ်ႉလႄႈၸင်ႇပဵၼ်ၸိူဝ်ႉၼင်ႇၼၼ်ဢေႃႈ။

၈ ၽြႃးပဵၼ်ၸဝ်ႈႁွင်ႉႁိၵ်ႈၼႃႈၽႃႉၼၼ်ႉဝႃႈ၊ၵၢင်ႁၢဝ်၊ ဝႃႈၼႆလႄႈ ပဵၼ်ႁူဝ်ၶမ်ႈ၊ႁူဝ်ၼႂ်၊ဝၼ်းတုတိယဢေႃႈ။

၉ ၵမ်းၼၼ်ႉၽြႃးပဵၼ်ၸဝ်ႈဝႃႈ၊-ႁႂ်ႈၼမ်ႉဢၼ်မီးၵႃႈတႂ်ႈၵၢင်ႁၢဝ်ၼႆႉၸူႉၵၼ်တုမ်ၵၼ်ယူႇတီႈလဵဝ်သေ။ႁႂ်ႈၵုင်းပေႃႇဢွၵ်ႇသေ၊ဝႃႈၼင်ႇၼႆလႄႈ ၸင်ႇပဵၼ်ၸိူဝ်ႉၼင်ႇၼၼ်ဢေႃႈ။

၁၀ ၽြႃးပဵၼ်ၸဝ်ႈႁွင်ႉႁိၵ်ႈၵုင်းၼၼ်ႉဝႃႈ၊လိၼ်၊တီႈဢၼ်ၸူႉၵၼ်တုမ်ၵၼ်ၼၼ်ႉဝႃႈ၊ ပၢင်ႇလၢႆႇ၊လႄႈ ၽြႃးပဵၼ်ႈၸဝ်ႈ ႁၼ်လွင်ႈတၢင်းၼၼ်ႉ ပဵၼ်ဢၼ်လီဢေႃႈ။

၁၁ ၵမ်းၼၼ်ႉၽြႃးပဵၼ်ၸဝ်ႈဝႃႈ၊-လိၼ်ၼႆႉႁႂ်ႈတူၼ်ႈယိူဝ်ႈလႂ်၊ တူၼ်ႈၶဝ်ႈဢၼ်ၸၢင်ႊႁႂ်ႈပဵၼ်မၢၵ်ႇၶဝ်ႈမဵတ်ႉၶဝ်ႈလႂ် တူၼ်ႈမႆႉဢၼ်ၸၢင်ႊႁႂ်ႈပဵၼ်မၢၵ်ႇမႆႉမၢၵ်ႇတွၵ်ႇလႄႈပႃးၸိူဝ်ႉပႃးၽၼ်းတီႈ တူဝ်ၸဝ်ႈၵဝ်ႇယူႇလႂ်ၼၼ်ႉဢွၵ်ႇပဵၼ်မႃးၵႃႈၼိူဝ်လိၼ်သေ၊ ဝႃႈၼင်ႇၼႆႇလႄႈ ၸင်ႇပဵၼ်ၸိူဝ်ႉၼင်ႇၼၼ်ဢေႃႈ။

၁၂ လိၼ်ၼႆႉ ႁႂ်ႈတူၼ်ႈယိူဝ်ႈလႂ်တူၼ်ႈၶဝ်ႈဢၼ်ၸၢင်ႊႁႂ်ႈပဵၼ်မၢၵ်ႇၶဝ်ႈမဵတ်ႉၶဝ်ႈလႂ်၊ တူၼ်ႈမႆႉဢၼ်ၸၢင်ႊႁႂ်ႈပဵၼ်မၢၵ်ႇမႆႉမၢၵ်ႇတွၵ်ႇလႄႈ ပႃးၸိူဝ်ႉပႃးၽၼ်း တီႈတူဝ်ၸဝ်ႈၵဝ်ႇယူႇလႂ်ၼၼ်ႉဢွၵ်ႇပဵၼ်မႃးဢေႃႈ။

၁၃ ၽြႃးပဵၼ်ၸဝ်ႈႁၼ်လွင်ႈတၢင်းၼၼ်ႉ ပဵၼ်ဢၼ်လီလႄႈပဵၼ်ႁူဝ်ၶမ်ႈ၊ ပဵၼ်ႁူဝ်ၼႂ်၊ဝၼ်းတတိယဢေႃႈ။

၁၄ ၵမ်းၼၼ်ႉၽြႃးပဵၼ်ၸဝ်ႈဝႃႈ၊- ၼင်ႇႁိုဝ်တၵ်းႁႂ်ႈၵႃႈဝၼ်းတင်းၵႃႈၶိုၼ်းပႅၵ်ႇပိူင်ႈၵၼ်ၸိုင် ႁႂ်ႈႁိူၼ်းဢၼ်ႁိူဝ်ႈဢၼ်လႅင်းတင်းလၢႆ ပဵၼ်မႃးၵႃႈၼႂ်းၶိုင်ႈၵၢင်ၼႃႈၽႃႉၵၢင်ႁၢဝ်သေ။

၁၅ ႁႂ်ႈပဵၼ်ပုၼ်ႈၼီႉမိၵ်ႈလၵ်ႈၶၼႃႇလႂ်၊ၶိင်ႇဢၼ်မၵ်းၶၢၼ်းဝႆႉလႂ်၊ဝၼ်းလႂ်၊ပီႊလႂ်သေ။ ႁႂ်ႈၶဝ်ပဵၼ်ႁိူၼ်း ဢၼ်ႁိူဝ်ႈဢၼ်လႅင်းယူႇၵႃႈၼႂ်းၼႃႈၽႃႉၵၢင်ႁၢဝ်ႁႂ်ႈလႆႈလႅင်းထွင်ႇလိၼ်မိူင်း သေဝႃႈၼင်ႇၼႆလႄႈၸင်ႇပဵၼ်ၸိူဝ်ႉၼင်ႇၼၼ်ဢေႃႈ။

၁၆ ၼင်ႇၼၼ်လႄႈ ၽြႃးပဵၼ်ၸဝ်ႈႁဵတ်းပဵၼ်ႁိူၼ်းဢၼ်ႁိူဝ်ႈဢၼ်လႅင်းလူင်သွင်လုၵ်ႈ ဢၼ်ဝႃႈ ဢၼ်ယႂ်ႇလုၵ်ႈၼိုင်ႈ ပုၼ်ႈဢၼ်တၵ်းဢုပ်ႉပိူင်ႇၵႃႈဝၼ်းဢၼ်လဵၵ်ႉလုၵ်ႈၼိုင်ႈ

၁၇ ပုၼ်ႈဢၼ်တၵ်းဢုပ်ႉပိူင်ႇၵႃႈၶိုၼ်းဢိၵ်ႇတင်းလၢဝ်ႈတင်းလၢႆသေယဝ်ႉ၊ ၽြႃးပဵၼ်ၸဝ်ႈဢဝ်ဝႆႉၵႃႈၼိူဝ်ၽႃႉၵၢင်ႁၢဝ် ႁႂ်ႈလႆႈလႅင်းထွင်ႇလိၼ်မိူင်းဢိၵ်ႇတင်းႁႂ်ႈလႆႈဢုပ်ႉပိူင်ႇ

၁၈ ၵႃႈဝၼ်းတင်းၵႃႈၶိုၼ်းလႄႈၽေဢၼ်လႅင်းတင်းလပ်းသိင်ႇဝႆႉဢေႃႈ။

၁၉ ၽြႃးပဵၼ်ၸဝ်ႈ ႁၼ်လွင်ႈတၢင်းၼၼ်ႉပဵၼ်ဢၼ်လီလႄႈပဵၼ်ႁူဝ်ၶမ်ႈ၊ပဵၼ်ႁူဝ်ၼႂ်၊ ဝၼ်းၸတုၵ်ႉထဢေႃႈ။

၂၀ ၵမ်းၼၼ်ႉၽြႃးပဵၼ်ၸဝ်ႈဝႃႈ၊- ႁႂ်ႈၵိူတ်ႇလဵင်ႉတရိၵ်ႈသၢၼ်ႇဢၼ်ဢသၢၵ်ႈလိပ်းယူႇလႄႈ ၸၢင်ႊတူင်ႉၸၢင်ႊၼိုင်ယႂ်ႇယႂ်ႇၼမ်ၼမ်ၵႃႈၼႂ်းၼမ်ႉမႃးသေ။ၼူၵ်ႉၵေႃႈႁႂ်ႈမိၼ်ၵႃႈၼိူဝ်လိၼ်မိူင်းၼႂ်းၼႃႈၽႃႉၵၢင်ႁၢဝ်သေ၊ ဝႃႈၼင်ႇၼႆဢေႃႈ။

၂၁ ၼင်ႇၼၼ်လႄႈ ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၸႃႉၸဵမ်ပႃႊလူင်တင်းလၢႆလႄႈ တရိၵ်ႈသၢၼ်ႇဢၼ်ဢသၢၵ်ႈလိပ်းလႄႈ တူင်ႉၼိုင်ၼၼ်ႉၵိူတ်ႇလဵင်ႉမႃးမဵဝ်းလႂ်မဵဝ်းၼၼ်ႉၼမ်ၼႃႇ ၵႃႈမီးတင်းသဵင်ႈတင်းလူင်ဢိၵ်ႇတင်း ၼူၵ်ႉဢၼ်ၸၢင်ႊမိၼ်ၵႃႈမီးတင်းသဵင်ႈတင်းလူင်လႄႈ ၽြႃးပဵၼ်ၸဝ်ႈႁၼ်လွင်ႈတၢင်းၼၼ်ႉပဵၼ်ဢၼ်လီဢေႃႈ။

၂၂ ၽြႃးပဵၼ်ၸဝ်ႈပၼ်တၢင်းလီတီႈၶဝ်လႄႈဝႃႈ၊- ၵိူတ်ႇလဵင်ႉလုၵ်ႈလဵင်ႉလၢင်းလႄႈ ယႂ်ႇၽႄႈၼမ်ၵိုၼ်းတႃႉ။ ႁႂ်ႈတဵမ်ၼမ်ႉပၢင်ႇလၢႆႇတင်းလၢႆတႃႉ။

၂၃ ၼူၵ်ႉၵေႃႈႁႂ်ႈယႂ်ႇၽႄႈၼမ်ၵိုၼ်းမႃးၵႃႈၼိူဝ်လိၼ်တႃႉ၊ဝႃႈၼင်ႇၼႆလႄႈ ပဵၼ်ႁူဝ်ၶမ်ႈ ပဵၼ်ႁူဝ်ၼႂ်ဝၼ်းပိၼ်ႇၸမဢေႃႈ။

၂၄ ၵမ်းၼၼ်ႉၽြႃးပဵၼ်ၸဝ်ႈဝႃႈ၊-ႁႂ်ႈၵိူတ်ႇလဵင်ႉသတ်ႉတဝႃႇဢၼ်ဢသၢၵ်ႈလိပ်းယူႇမဵဝ်းလႂ်မဵဝ်းၼၼ်ႉ ဢၼ်ပဵၼ်တူဝ်ယဵၼ်ႇတူဝ်ငႄႈလႂ် တရိၵ်ႈသၢၼ်ႇဢၼ်ၸၢင်ႊၵွႃႇၸၢင်ႊၵၢၼ်းလႂ်၊တူဝ်ႁၢႆႉလႂ်၊ ၵႃႈၼိူဝ်လိၼ်မႃးသေ၊ဝႃႈၼင်ႇၼႆလႄႈၸင်ႇပဵၼ်ၸိူဝ်ႉၼင်ႇၼၼ်ဢေႃႈ။

၂၅ ၼင်ႇၼၼ်လႄႈၽြႃးပဵၼ်ၸဝ်ႈႁဵတ်းပဵၼ်တူဝ်ႁၢႆႉ မဵဝ်းလႂ်မဵဝ်းၼၼ်ႉ၊ တူဝ်ယဵၼ်ႇတူဝ်ငႄႈမဵဝ်းလႂ်မဵဝ်းၼၼ်ႉ၊တရိၵ်ႈသၢၼ်ႇ ဢၼ်ၸၢင်ႊၵွႃႇၸၢင်ႊၵၢၼ်းၵႃႈၼိူဝ်လိၼ်မဵဝ်းလႂ်မဵဝ်းၼၼ်ႉလႄႈ ၽြႃးပဵၼ်ၸဝ်ႈႁၼ်လွင်ႈတၢင်းၼၼ်ႉပဵၼ်ဢၼ်လီဢေႃႈ။

၂၆ ၵမ်းၼၼ်ႉၽြႃးပဵၼ်ၸဝ်ႈဝႃႈ၊- ႁဵတ်းပဵၼ်ၵူၼ်းၸွမ်းၼင်ႇပုင်ႇႁၢင်ႊႁဝ်း၊ ႁၢင်ႊၽၢင်ဢၼ်လဵဝ်ၵၼ်တင်းႁဝ်းတႃႉႁဝ်း။ႁႂ်ႈမၼ်းဢုပ်ႉပိူင်ႇပႃႊပၢင်ႇလၢႆႇလႂ်၊ၼူၵ်ႉၵၢင်ႁၢဝ်လႂ်၊တူဝ်ယဵၼ်ႇတူဝ်ငႄႈလႂ်၊ လိၼ်တင်းသဵင်ႈတင်းလူင်တင်းတရိၵ်ႈသၢၼ်ႇ ဢၼ်ၸၢင်ႊၵွႃႇၸၢင်ႊၵၢၼ်းၵႃႈၼိူဝ်လိၼ်ၵူႈၸိူဝ်ႉၵူႈပိူင်လႂ်သေ၊ ဝႃႈၼင်ႇၼႆ ဢေႃႈ။

၂၇ ၼင်ႇၼၼ်လႄႈၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၶဝ်ဢေႃႈ။ ၶဝ်ၼၼ်ႉၸိုင်၊မၼ်းၸဝ်ႈၽၢၼ်ႇသၢင်းႁဵတ်းပဵၼ်ၵူၼ်းၸၢႆးၵူၼ်းယိင်းဢေႃႈ။

၂၈ ၽြႃးပဵၼ်ၸဝ်ႈပၼ်တၢင်းလီတီႈၶဝ်လႄႈဝႃႈ၊- ၵိူတ်ႇလဵင်ႉလုၵ်ႈလဵင်ႉလၢင်းလႄႈယႂ်ႇၽႄႈၼမ်ၵိုၼ်းတႃႉ။ ႁႂ်ႈတဵမ်လိၼ်မိူင်းလႄႈပႄႉၼႅင်ႇတႃႉ။ ဢုပ်ႉပိူင်ႇပႃႊပၢင်ႇလၢႆႇလႂ်ၼူၵ်ႉၵၢင်ႁၢဝ်လႂ် တရိၵ်ႈသၢၼ်ႇဢၼ်ဢသၢၵ်ႈလိပ်းယူႇလႄႈ ၸၢင်ႊၵွႃႇၸၢင်ႊၵၢၼ်းၵႃႈၼိူဝ်လိၼ်ၵူႈၸိူဝ်ႉၵူႈပိူင်လႂ်တႃႉ၊ဝႃႈၼင်ႇၼႆဢေႃႈ။

၂၉ ၽြႃးပဵၼ်ၸဝ်ႈဝႃႈ၊- တူၺ်းလူႊ၊ၵဝ်ပၼ်တူၼ်ႈၶဝ်ႈၵူႈၸိူဝ်ႉၵူႈပိူင် ဢၼ်ၸၢင်ႊႁႂ်ႈပဵၼ်မၢၵ်ႇၶဝ်ႈမဵတ်ႉၶဝ်ႈၵႃႈၼိူဝ်လိၼ်ၵူႈတီႈၵူႈလႅၼ်၊ တူၼ်ႈမႆႉဢၼ်တဵမ်ဝႆႉတင်းမၢၵ်ႇ ဢၼ်ႁႂ်ႈပဵၼ်ၸိူဝ်ႉပဵၼ်ၽၼ်း ၵူႈၸိူဝ်ႉၵူႈပိူင်တီႈသူဢေႃႈ။

၃၀ ပဵၼ်ပုၼ်ႈဢၼ်သူတၵ်းၵိၼ်ဢေႃႈ။ တီႈတူဝ်ဢၼ်ယူႇၵႃႈၼိူဝ်လိၼ်လႂ်၊ ၼူၵ်ႉၵၢင်ႁၢဝ်လႂ်၊တရိၵ်ႈသၢၼ်ႇဢၼ်ဢသၢၵ်ႈလိပ်းယူႇလႄႈ ၸၢင်ႊၵွႃႇၸၢင်ႊၵၢၼ်းၵႃႈၼိူဝ်လိၼ်လႂ်၊ ၵႃႈမီးတင်းသဵင်ႈတင်းလူင်ၵေႃႈ ၵဝ်ပၼ်တူၼ်ႈယိူဝ်ႈတူၼ်ႈယႃႈၵူႈမဵဝ်းပုၼ်ႈဢၼ်ၶဝ်တၵ်းၵိၼ်ဢေႃႈ၊ ဝႃႈၼင်ႇၼႆလႄႈ ၸင်ႇပဵၼ်ၸိူဝ်ႉၼင်ႇၼၼ်ဢေႃႈ။

၃၁ ၽြႃးပဵၼ်ၸဝ်ႈလူတူၺ်း တၢင်းဢၼ်မၼ်းၸဝ်ႈႁဵတ်းပဵၼ် တင်းသဵင်ႈတင်းလူင်ၸိူဝ်းၼၼ်ႉသေယဝ်ႉ ႁၼ်လွင်ႈ ဢၼ်ပဵၼ်ဢၼ်လီၼႃလူင်လၢင်လႄႈ ပဵၼ်ႁူဝ်ၶမ်ႈ၊ႁူဝ်ၼႂ်၊ ဝၼ်းသထမဢေႃႈ။