Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၂၁ 

တၢင်းလူႇမေႈမၢႆႈ

၁ လိုၼ်းၼၼ်ႉမၼ်းၸဝ်ႈမုင်ႈတူၺ်းလႄႈႁၼ်ၶဝ်ၸိူဝ်းဢၼ်ၸၢင်ႊမၢၵ်ႈၸၢင်ႊမီးတင်းလၢႆဢဝ်တႃႇၼႃႉတၢင်းလူႇမႃးသႂ်ႇၵႃႈၼႂ်းတိူၵ်ႈၽၼ်ႇတႃႇၸဝ်ႈၼၼ်ႉဢေႃႈ။

၂ မၼ်းၸဝ်ႈႁၼ်မေႈမုၵ်ႉမေႈမၢႆႈဢၼ်ၽၢၼ်ၼႃႇၼၼ်ႉၵေႃႉၼိုင်ႈဢဝ်တွင်းလႅင်ႊသွင်ၶႅပ်းသႂ်ႇၼႂ်းတိူၵ်ႈၽၼ်ႇတႃႇၸဝ်ႈယူႇလႄႈ၊မၼ်းၸဝ်ႈလၢတ်ႈဝႃႈ။-

၃ ၵဝ်ဝႃႈတီႈၸိုဝ်ႈတီႈၸႂ်ႈၸမ်းမေႈမုၵ်ႉမေႈမၢႆႈဢၼ်ၽၢၼ်ၼႆႉယဵင်ႈၶႅၼ်းသႂ်ႇၼမ်သေပိူၼ်ႈတၢင်ႇၵေႃႉတင်းသဵင်ႈတင်းလူင်ၸိူဝ်းၼၼ်ႉယဝ်ႉ။လွင်ႈမၼ်းၸမ်းၶဝ်တင်းသဵင်ႈတင်းလူင်ၸိူဝ်းၼၼ်ႉၼုၵ်ႈဢဝ်သေၵႃႈၼႂ်းၸေးၸိမ်ႇဢၼ်ၶဝ်မီးၼမ်ၼႃႇၼၼ်ႉသေလႄႈႁဵတ်းတၢင်းလူႇတီႈၽြႃးပဵၼ်ၸဝ်ႈဢေႃႈ။

၄ မေႈယိင်းၵေႃႉၼႆႉၸမ်းၼုၵ်ႈဢဝ်ၵႃႈၼႂ်းတၢင်းၽၢၼ်မၼ်းဢၼ်တၵ်းလႆႈလဵင်ႉဢသၢၵ်ႈမၼ်းၵႃႈဢၼ်မၼ်းမီးၼၼ်ႉသေလႄႈလူႇယဝ်ႉ၊ဝႃႈၼင်ႇၼႆဢေႃႈ။

လၵ်ႈၶၼႃႇၵမ်ႇၽႃႇတီႈသုတ်း

၅ တပႄးၸဝ်ႈၵမ်ႈၽွင်ႈလၢတ်ႈလွင်ႈပိၵ်ႉမၢၼ်ႇၸဝ်ႈဢၼ်ဢဝ်တင်းမၢၵ်ႇႁိၼ်ၽႅပ်ႉဢၼ်ႁၢင်ႊလီဢိၵ်ႇတင်းတၢင်းဢၼ်ပုၵ်ႉၸေႃႇတင်းလၢႆႁၢင်ႈၶိူင်ႈမႄးဝႆႉၼၼ်ႉၸိုင်၊မၼ်းၸဝ်ႈၵေႃႈလၢတ်ႈလႄႈဝႃႈ၊-

၆ တေႃႈလဵဝ်ၼႆႉသူလႆႈႁၼ်ၶိူင်ႈပိူင်ၸိူဝ်းၼႆႉယူႇဢေႃႈ။ၵူၺ်းၵႃႈၶိင်ႇဢၼ်မၢၵ်ႇႁိၼ်လုၵ်ႈၼိုင်ႈၵေႃႈယင်းဢမ်ႇလႆႈၵိုတ်းလႆႈၵျၢၼ်ႇလႄႈတၵ်းလႆႈၶၢမ်ႇတၢင်းဢၼ်ၶျႃးတူၵ်းၼၼ်ႉတၵ်းႁွတ်ႈထိုင်မႃးယူႇဢေႃႈ၊ဝႃႈၼင်ႇၼႆဢေႃႈ။

၇ ၶဝ်ၼၼ်ႉၵေႃႈလဝ်ႈထၢမ်လႄႈဝႃႈ၊-သြႃႇၸဝ်ႈလွင်ႈတၢင်းၸိူဝ်းၼႆႉတၵ်းပဵၼ်မႃးၶိင်ႇမိူဝ်ႈလႂ်ၶႃႈ။မိူဝ်ႈၶိင်ႇဢၼ်လွင်ႈတၢင်းၸိူဝ်းၼႆႉၸမ်တၵ်းပဵၼ်မႃးၼၼ်ႉတၵ်းမီးၼီႉမိၵ်ႈလၵ်ႈၶၼႃႇဢၼ်လႂ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈလၢတ်ႈလႄႈဝႃႈ၊-

၈ ၼင်ႇႁိုဝ်သူတၵ်းဢမ်ႇလႆႈၵႂႃႇလႆႈၸွမ်းတၢင်းဢၼ်ပႅတ်ႉဢၼ်လႅၼ်ၸိုင်ႁဵတ်းသတိတႃႉ။ၵူၼ်းၼမ်ၼႃႇတၵ်းႁိမ်ဢဝ်ၸိုဝ်သဵင်ၵဝ်သေလႄႈပေႃႇမႃးလႄႈဝႃႈ၊-ၵဝ်ၼႆႉပဵၼ်မၼ်းၸဝ်ႈဢေႃႈ။ၶိင်ႇၵႃႇလႃႉၵေႃႈႁွတ်ႈမႃးယဝ်ႉဝႃႈၼႆယူႇဢေႃႈ။ယႃႇပေၸွမ်းပႃႈလင်ၶဝ်ၼၼ်ႉ။

၉ မိူဝ်ႈဢၼ်သူလႆႈငိၼ်းလွင်ႈဢၼ်တိုၵ်းသိုၵ်းလႂ်လွင်ႈဢၼ်ပူင်ႇၵၢၼ်ႇလႂ်ၼၼ်ႉၸိုင်ယႃႇပေမီးၸႂ်ဢၼ်ၶွၼ်းၶႅၼ်း။လွင်ႈတၢင်းၸိူဝ်းၼႆႉတၵ်းပဵၼ်မႃးဢွၼ်တၢင်းဢေႃႈ။ၼႂ်းဝႃႈၼၼ်သေၵေႃႈဢမ်ႇပႆႇပဵၼ်တီႈသုတ်းတီႈၵွႆၵမ်းလဵဝ်။

၁၀ လိူဝ်သေၼၼ်ႉၵူၼ်းမဵဝ်းၼိုင်ႈလႄႈမဵဝ်းၼိုင်ႈမိူင်းၼိုင်ႈလႄႈမိူင်းၼိုင်ႈတၵ်းၶတ်းတႃႉၵၼ်ဢေႃႈ။

၁၁ တၢင်းဢၼ်ဢိင်ႇသၼ်ႇလႂ်တၢင်းဢၼ်ဢိုပ်းတၢင်းၵိၼ်လႂ်တၢင်းဢၼ်ပဵၼ်ၵႃႇလႃႉႁႃလႅင်မိူင်းလႂ်တၵ်းပဵၼ်မႃးၵူႈတီႈၵူႈလႅၼ်ဢေႃႈ။ၵႃႈၼိူဝ်ၽႃႉၵၢင်ႁၢဝ်ၵေႃႈလွင်ႈတၢင်းဢၼ်လီၵူဝ်လီႁႄလႂ်ၼီႉမိၵ်ႈလၵ်ႈၶၼႃႇဢၼ်ယႂ်ႇၼႃႇလႂ်တၵ်းပေႃႇမႃးဢေႃႈ။

၁၂ ၸူဝ်ႈဢၼ်လွင်ႈတၢင်းၸိူဝ်းၼႆႉဢမ်ႇပႆႇပဵၼ်မႃးၼၼ်ႉၸိုင်ၵွပ်ႈပိူဝ်ႈၸိုဝ်သဵင်ၵဝ်လႄႈၶဝ်တၵ်းတီႉဢဝ်သူၼိၵ်ႈၸၢၵ်ႈငႅၼ်းသေးသူလႄႈဢဝ်သူဢၢပ်ႈပၼ်ၵႃႈတီႈၼႂ်းၸရွပ်ႈႁေႃးတြႃးလႂ်ၵႃႈတီႈၼႂ်းထွင်ႇလႂ်ဢေႃႈ။တၵ်းဢဝ်သူၵႂႃႇသူင်ႇၵႃႈတီႈၶုၼ်ႁေႃၶမ်းလႂ်ဢိၵ်ႇတင်းဢမၢတ်ႈၽွင်းမိူင်းလႂ်ဢေႃႈ။

၁၃ ၵွပ်ႈပိူဝ်ၸိူဝ်ႉၼင်ႇၼၼ်လႄႈသူတၵ်းမီးဢၶႂၢင်ႉဢၼ်တၵ်းလႆႈၶၢမ်ႇသၢၵ်ႈသေႇၵဝ်ဢေႃႈ။

၁၄ ပိူဝ်ႈၼႆလႄႈၼင်ႇႁိုဝ်သူတၵ်းဢမ်ႇလႆႈၶႆႈၸႂ်ဝူၼ်ႉၸႂ်ဝႆႉဢွၼ်တၢင်းဢၼ်တၵ်းလႆႈၶိုၼ်းလၢတ်ႈၸိူဝ်ႉၼင်ႇႁိုဝ်ၼၼ်ႉၸိုင်ဝႆႉသတိတႃႉ။

၁၅ လွင်ႈမၼ်းၸမ်းၵဝ်တၵ်းပၼ်သူပ်းၵႂၢမ်းတင်းၺၢၼ်ႇပိင်ႇၺႃႇတီႈသူဢၼ်ရၢၼ်ႇသူႇသူတင်းသဵင်ႈတင်းလူင်တၵ်းဢမ်ႇတွပ်ႇဢမ်ႇထဵင်ဢမ်ႇႁႄႉဢမ်ႇၶႅၼ်လႆႈၼၼ်ႉဢေႃႈ။

၁၆ ပေႃႈမေႈပီႈၼွင်ႉၵေႃႉသေႈၸိူဝ်ႉၶိူဝ်းသူတၵ်းဢဝ်သူဢၢပ်ႈဢေႃႈ။

၁၇ ၵမ်ႈၽွင်ႈၵေႃႈတၵ်းဢဝ်သူတၢႆဢေႃႈ။ၵူၼ်းတင်းသဵင်ႈတင်းလူင်ၵေႃႈတၵ်းၸင်းသူၵွပ်ႈပိူဝ်ႈၸိုဝ်သဵင်ၵဝ်ဢေႃႈ။

၁၈ ၼႂ်းဝႃႈၼၼ်သေၵေႃႈၶူၼ်ႁူဝ်သူသဵၼ်ႈၼိုင်ႈၵေႃႈဢမ်ႇလႆႈလူႉလႆႈလႅဝ်။

၁၉ ၵွပ်ႈပိူဝ်ႈတၢင်းဢၼ်သူယိူၼ်ႉၶၢမ်ႇမၼ်ႈမၼ်ႈၶိူင်ႇၶိူင်ႇၼၼ်ႉသူတၵ်းလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။

၂၀ မိူဝ်ႈဢၼ်သူႁၼ်ၵူၼ်းသိုၵ်းတင်းလၢႆလွမ်ႉႁွပ်ႈဝဵင်းယေႇရုသလႅမ်ႇယူႇၼၼ်ႉၸိုင်ဝဵင်းၼၼ်ႉတၵ်းလူႉတၵ်းလႅဝ်ယဝ်ႉဝႃႈၼႆဢွၼ်ၵၼ်ႁူႉတႃႉ။

၂၁ မိူဝ်ႈၼၼ်ႉႁႂ်ႈၶဝ်ၸိူဝ်းဢၼ်မီးၼႂ်းမိူင်းယုတၼၼ်ႉပၢႆႊၶိုၼ်ႈၵႂႃႇၵႃႈၼိူဝ်လွႆပုၼ်ႉတႃႉ။ႁႂ်ႈၶဝ်ၸိူဝ်းဢၼ်မီးၼႂ်းဝဵင်းၼၼ်ႉဢွၵ်ႇၵႂႃႇၵႃႈၼွၵ်ႈဝဵင်းသေ။ယႃႇႁႂ်ႈၶဝ်ၸိူဝ်းဢၼ်မီးၼႂ်းထိူၼ်ႇၼႂ်းၶိူဝ်းတင်းလၢႆၼၼ်ႉၶဝ်ႈၵႃႈၼႂ်းဝဵင်း။

၂၂ လွင်ႈမၼ်းၸမ်းၶိင်ႇမိူဝ်ႈဝၼ်းၼၼ်ႉပဵၼ်ၶိင်ႇဝၼ်းဢၼ်ၸီႇယၢင်ႇတၢမ်ႇႁႂ်ႈၵႃႈဢၼ်တႅမ်ႈဝႆႉၼႂ်းၵျၢမ်းလိၵ်ႈၼၼ်ႉလႆႈတဵမ်ထူၼ်ႈဢေႃႈ။

၂၃ ဝၼ်းမိူဝ်ႈၼၼ်ႉတီႈမေႈယိင်းဢၼ်တူဝ်ဢမ်ႇသႃႇဢိၵ်ႇတင်းမေႈယိင်းဢၼ်မီးလုၵ်ႈဢွၼ်ႇဢၼ်ဢမ်ႇပႆႇၽၢတ်ႇၼူမ်းတင်းလၢႆၼၼ်ႉတၵ်းမီးဢႃႉမင်ႇၵလႃႇဢေႃႈ။လွင်ႈမၼ်းၸမ်းတုၵ်ႉၶႃႉတၢင်းၽၢၼ်ဢၼ်ယႂ်ႇၼႃႇၼၼ်ႉတၵ်းပဵၼ်မႃးၵႃႈၼိူဝ်လိၼ်မိူင်းၼႆႉလႄႈတေႃးသႃႉတင်းၸႂ်မႆႈတၵ်းႁွတ်ႈမႃးၵႃႈၼိူဝ်ၵူၼ်းမဵဝ်းၼႆႉဢေႃႈ။

၂၄ ၶဝ်တၵ်းႁွတ်ႈထိုင်တၢင်းလူႉတၢင်းလႅဝ်လူၺ်ႈၽေးလၢပ်ႇၽေးလႅဝ်းဢေႃႈ။တၵ်းတီႉဢဝ်ၶဝ်ၵႂႃႇၵႃႈတီႈတၢင်ႇဝၢၼ်ႈတၢင်ႇမိူင်းၵူႈတီႈၵူႈလႅၼ်ပုၼ်ႉဢေႃႈ။ၸူဝ်ႈဢၼ်ၶိင်ႇၵႃႇလႃႉၵူၼ်းတၢင်ႇၸိူဝ်ႉတၢင်ႇၶိူဝ်းဢမ်ႇပႆႇတဵမ်ထူၼ်ႈၼၼ်ႉၸိုင်ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉတၵ်းဢဝ်တိၼ်ယဵပ်ႇယမ်ဝဵင်းယေႇရုသလႅမ်ႇဢေႃႈ။

၂၅ မိူဝ်ႈၼၼ်ႉပုၵ်ႉပႃႉၼီႉမိၵ်ႈလၵ်ႈၶၼႃႇတၵ်းပေႃႇမႃးၼႂ်းၵၢင်ဝၼ်းလိူၼ်လၢဝ်တင်းလၢႆဢေႃႈ။ၵႃႈၼိူဝ်လိၼ်မိူင်းၼႆႉၵေႃႈတၵ်းပဵၼ်တၢင်းဢၼ်ၵူၼ်းၵူႈၸိူဝ်ႉၵူႈမဵဝ်းဢမ်ႇတႄႇဢမ်ႇၼိမ်လႄႈမႆႈၸႂ်ၶီၸႂ်တၢင်းဢၼ်သဵင်လႅင်းၼမ်ႉပိုပ်ႈၼမ်ႉၼမ်ႉသမ်ႇမုၵ်ႉတြႃႇဢူၼ်ဢဵၼ်မေႃးမႄးၼႃႇလူင်လၢင်

၂၆ တၢင်းဢၼ်ၵူၼ်းတင်းလၢႆၸႂ်လူႉၵွပ်ႈပိူဝ်ႈဢၼ်ၵူဝ်ႁႄလႄႈမုင်ႈတူၺ်းၽေးဢၼ်တၵ်းပဵၼ်မႃးၵႃႈၼိူဝ်လိၼ်မိူင်းၼႆႉၼၼ်ႉၸိူဝ်းၼၼ်ႉဢေႃႈ။လွင်ႈမၼ်းၸမ်းတၼ်းၶူဝ်းၵၢင်ႁၢဝ်တင်းလၢႆသၼ်ႇၶွၼ်းဝႆဢေႃႈ။

၂၇ မိူဝ်ႈၼၼ်ႉၵူၼ်းတင်းလၢႆတၵ်းလႆႈႁၼ်လုၵ်ႈၵူၼ်းပႃးတင်းမူၼ်တၼ်းၶူဝ်းဢႃႇၼူႉၽေႃႇမၼ်းၸဝ်ႈဢၼ်ယႂ်ႇၼႃႇၼၼ်ႉသေလႄႈမႃးၵႃႈၼိူဝ်မွၵ်ႇၵုမ်ႈဢေႃႈ။

၂၈ မိူဝ်ႈဢၼ်လွင်ႈတၢင်းၸိူဝ်းၼႆႉၸႃႉပဵၼ်မႃးၼၼ်ႉၸိုင်ၵွပ်ႈပိူဝ်ႈၶိင်ႇဢၼ်တၵ်းထူတ်ႇဢဝ်သူၼၼ်ႉၸမ်တၵ်းႁွတ်ႈထိုင်မႃးယဝ်ႉလႄႈမုင်ႈတူၺ်းလႄႈငွၵ်ႈႁူဝ်တႃႉ၊ဝႃႈၼင်ႇၼႆဢေႃႈ။

၂၉ မၼ်းၸဝ်ႈသမ်ႉဢဝ်ၵႂၢမ်းဢူႉပမႃႇလၢတ်ႈထႅင်ႈလႄႈဝႃႈၸမ်း၊-တူၺ်းတူၼ်ႈမၢၵ်ႇလိူဝ်ႇသၢင်းၽေႃးဢိၵ်ႇတင်းတူၼ်ႈမႆႉတင်းသဵင်ႈတင်းလူင်တႃႉ။

၃၀ မိူဝ်ႈဢၼ်မႂ်ႊမၼ်းဢွၵ်ႇမႃးၼၼ်ႉၸိုင်သူႁူႉႁၼ်လွင်ႈဢၼ်ၸမ်တၵ်းႁွတ်ႈထိုင်ၶိင်ႇႁႅင်ႈၼၼ်ႉဢေႃႈ။

၃၁ မိူၼ်ၼင်ႇၼၼ်မိူဝ်ႈဢၼ်သူလႆႈႁၼ်လွင်ႈတၢင်းၸိူဝ်းၼႆႉပဵၼ်မႃးယူႇၼၼ်ႉၸိုင်ႁူႉလွင်ႈဢၼ်ဝႃႈမိူင်းၽြႃးပဵၼ်ၸဝ်ႈၸမ်တၵ်းတႄႇပဵၼ်ယဝ်ႉ၊ဢၼ်ဝႃႈၼၼ်ႉတႃႉ။

၃၂ ၵဝ်ဝႃႈတီႈၸိုဝ်ႈတီႈၸႂ်ႈၸမ်းလွင်ႈတၢင်းတင်းသဵင်ႈတင်းလူင်ၸိူဝ်းၼႆႉတၵ်းပဵၼ်မႃးၸူဝ်ႈဢၼ်ၵူၼ်းဢၼ်မီးယူႇတေႃႈလဵဝ်ၸိူဝ်းၼႆႉဢမ်ႇပႆႇသဵင်ႈပႆႇမူတ်းၼၼ်ႉဢေႃႈ။

၃၃ ပဵၵ်ႉသမ်ႉၽႃႉၵၢင်ႁၢဝ်တင်းလိၼ်မိူင်းၼႆႉတၵ်းႁၢႆလၢႆသေၵေႃႈၵႂၢမ်းၵဝ်ၼႆႉတၵ်းဢမ်ႇႁၢႆလၢႆ။သူႁဵတ်းသတိတီႈတူဝ်သူတႃႉ။

၃၄ ပေႃးဢမ်ႇၼၼ်ၼႂ်းမိူဝ်ႈဢၼ်ႁူဝ်ၸႂ်ယင်းတိုၵ်ႉယၢပ်ႇၸႂ်ယုင်ႈၸႂ်ယူႇၵွပ်ႈပိူဝ်ႈတၢင်းၵိၼ်တၢင်းၶူပ်းတၢင်းဢၼ်ၶႆႈၸႂ်ဝူၼ်ႉၸႂ်လူၺ်ႈလွင်ႈလေႃးၵီႇၸိူဝ်းၼၼ်ႉယူႇၼၼ်ႉသူယင်းဢမ်ႇႁူႉဢမ်ႇႁၼ်လႄႈဝၼ်းၼၼ်ႉတၵ်းထူပ်းမႅၼ်ႈသူဢေႃႈ။

၃၅ ဝၼ်းၼၼ်ႉတၵ်းႁူမ်ႇမႅၼ်ႈၶဝ်ၸိူဝ်းဢၼ်ယူႇၵႃႈၼိူဝ်လိၼ်မိူင်းတင်းသဵင်ႈတင်းလူင်မိူၼ်ၸိူဝ်ႉၼင်ႇၶႄတမ်ႇငႃႈၼၼ်ႉဢေႃႈ။

၃၆ ၼင်ႇႁိုဝ်သူတၵ်းပႄႉၼႅင်ႇႁႂ်ႈလႆႈမီးတၢင်းဢၼ်ၵၢင်းလွတ်ႈတင်းလွင်ႈတၢင်းဢၼ်ပဵၼ်မႃးၸိူဝ်းၼၼ်ႉလႄႈႁွတ်ႈထိုင်ၵႃႈတီႈၽၢႆႇၼႃႈလုၵ်ႈၵူၼ်းၸိုင်သူးတွင်းတႃႇသေႇလႄႈပႂ်ႉထႃႈယူႇတႃႉ၊ဝႃႈၼင်ႇၼႆဢေႃႈ။

၃၇ ၶိင်ႇၵၢင်ဝၼ်းမၼ်းၸဝ်ႈသင်ႇသွၼ်သုင်းမႃႉၵႃႈၼႂ်းပိၵ်ႉမၢၼ်ႇၸဝ်ႈဢေႃႈ။မိူဝ်ႈဢၼ်ႁွတ်ႈထိုင်ၶိင်ႇၵၢင်ၶမ်ႈၸိုင်မၼ်းၸဝ်ႈၶိုၼ်ႈၵႂႃႇၵႃႈၼိူဝ်လွႆဢၼ်လႆႈၸိုဝ်လွႆႈသၼ်ႇလုၼ်ႇၼၼ်ႉလႄႈႁႂ်ႈပူၼ်ႉၶိုၼ်းဢေႃႈ။

၃၈ ၵၢင်ၼႂ်ၸဝ်ႉၸဝ်ႉၵူၼ်းတင်းသဵင်ႈတင်းလူင်ၵႂႃႇၸူးတီႈမၼ်းၸဝ်ႈၵႃႈၼႂ်းပိၵ်ႉမၢၼ်ႇၸဝ်ႈႁႂ်ႈလႆႈထွမ်ႇလႆႈငိၼ်းၵႂၢမ်းမၼ်းၸဝ်ႈဢေႃႈ။