Shan Missions

ၵျၢမ်းငဝ်ႈၵမ်ႇၽႃႇ

၁   ၂   ၃   ၄   ၅   ၆   ၇   ၈   ၉   ၁၀   ၁၁   ၁၂   ၁၃   ၁၄   ၁၅   ၁၆   ၁၇   ၁၈   ၁၉   ၂၀   ၂၁   ၂၂   ၂၃   ၂၄   ၂၅   ၂၆   ၂၇   ၂၈   ၂၉

၃၀   ၃၁   ၃၂   ၃၃   ၃၄   ၃၅   ၃၆   ၃၇   ၃၈   ၃၉   ၄၀   ၄၁   ၄၂   ၄၃   ၄၄   ၄၅   ၄၆   ၄၇   ၄၈   ၄၉   ၅၀   

၄၈

 မၼႃႇသေႇတင်းဢေႇၽရိမ်ႇ

၁ လိုၼ်းၼၼ်ႉၵူၼ်းၵေႃႉၼိုင်ႈမွၵ်ႇလၢတ်ႈတီႈ ယုဝ်းသႅပ်ႉလႄႈဝႃႈ၊- တူၺ်းၶႃႈလူႊ၊ပေႃႈၸဝ်ႈႁဝ်းမီးတၢင်းၶႆႈတၢင်းပဵၼ်ယူႇၶႃႈဢေႃႈ၊ ဝႃႈၼင်ႇၼႆသေယဝ်ႉမၼ်းပႃးဢဝ်မၼႃႇသေႇ တင်း ဢေႇၽရိမ်ႇ၊ လုၵ်ႈၸၢႆးမၼ်း သွင်ၵေႃႉၼၼ်ႉလႄႈၵွႃႇဢေႃႈ။

၂ ၵူၼ်းၵေႃႉၼိုင်ႈမွၵ်ႇလၢတ်ႈတီႈ ယႃႇၵုပ်ႉ လႄႈဝႃႈ၊-တူၺ်းၶႃႈလူႊ၊လုၵ်ႈၸၢႆးၸဝ်ႈႁဝ်း ယုဝ်းသႅပ်ႉ မႃးၸူးတီႈၸဝ်ႈႁဝ်းဢေႃႈ၊ဝႃႈၼင်ႇၼႆလႄႈ ဢိသရေႇလ ၵေႃႈဢဝ်ႁႅင်းလႄႈလုၵ်ႉ ၼင်ႈယူႇၵႃႈၼိူဝ်တီႈၼွၼ်းမၼ်းဢေႃႈ၊မိူဝ်ႈၼၼ်ႉယႃႇၵုပ်ႉ လၢတ်ႈတီႈ ယုဝ်းသႅပ်ႉ လႄႈဝႃႈ၊-

၃ ၽြႃးပဵၼ်ၸဝ်ႈၸဝ်ႈဢၼၼ်ႇတႃႉတၼ်းၶူဝ်း ပေႃႇမႃးတီႈၵဝ်ၵႃႈတီႈဝဵင်းလုၸမိူင်းၶႃႇၼၼ်ႇပုၼ်ႉလႄႈ ပၼ်တၢင်းလီတီႈ ၵဝ်လႄႈဝႃႈ၊-ၵဝ်တၵ်းႁႂ်ႈမႂ်းၵိူတ်ႇလဵင်ႉလုၵ်ႈလဵင်ႉလၢင်းလႄႈယႂ်ႇၽႄႈၼမ်ၵိုၼ်းမႃးဢေႃႈ။

၄ တၵ်းႁႂ်ႈမႂ်းပဵၼ်ၵူၼ်းမဵဝ်းၼမ်ၼႃႇဢေႃႈ။ၵဝ်တၵ်းပၼ်မိူင်းၼႆႉတီႈၸိူဝ်ႉၶိူဝ်းမႂ်းလိုၼ်းမႂ်းၼၼ်ႉႁႂ်ႈၶဝ်လႆႈပိူင်ႇယူႇ တႃႇသေႇဢမ်ႇထၢတ်ႇဢေႃႈ၊ဝႃႈၼင်ႇၼႆဢေႃႈ။

၅ တေႃႈလဵဝ်ၼႆႉလုၵ်ႈၸၢႆးသွင်ၵေႃႉဢၼ်မႂ်းလႆႈၼႂ်းမိူင်းဢေႇၵႅပ်ႉတု ဝႆႉၸူဝ်ႈဢၼ်ၵဝ်ဢမ်ႇပႆႇႁွတ်ႈမႃးၵႃႈတီႈမိူင်းဢေႇၵႅပ်ႉတု ၼၼ်ႉတၵ်းလႆႈပဵၼ်လုၵ်ႈၸၢႆးၵဝ်ဢေႃႈ။ဢေႇၽရိမ်ႇတင်းမၼႃႇသေႇၼၼ်ႉတၵ်းလႆႈပဵၼ်လုၵ်ႈၸၢႆးၵဝ်မိူၼ်ၸိူဝ်ႉၼင်ႇ ရုပိၼ်ႇ တင်း သိမုၼ်ႇ ၸိူဝ်းၼၼ်ႉဢေႃႈ။

၆ လုၵ်ႈၸၢႆးမႂ်းဢၼ်တၵ်းလႆႈၵမ်းလိုၼ်းၼၼ်ႉ တၵ်းလႆႈပဵၼ်လုၵ်ႈၸၢႆးမႂ်းလႄႈၶၢမ်ႇတၢင်းဢၼ်ႁွင်ႉႁိၵ်ႈၸွမ်း ၸိုဝ်သဵင်ပီႈၸၢႆးၶဝ်ရ ၼႂ်းလွင်ႈတၢင်းဢၼ်ၶဝ်ၶၢမ်ႇဢမူၺ်ႇၼၼ်ႉဢေႃႈ။

၇ မိူဝ်ႈၵႃႇလႃႉယၢမ်းဢၼ်ၵဝ်လုၵ်ႉသေၵႃႈတီႈ ပႃႇတမ်ႇ မႃးၼၼ်ႉ ရႃႇၶေႇလ တၢႆၵႃႈတီႈႁိမ်းၵဝ်ၵႃႈတီႈ မိူင်းၶႃႇၼၼ်ႇ ၵႃႈၼႂ်းသဵၼ်ႈတၢင်းမိူဝ်ႈဢၼ်လူဝ်ႇထႅင်ႈဢိတ်းၼိုင်ႈၸမ်တၵ်းႁွတ်ႈထိုင်ဝဵင်းဢေႇၽရတ်ႉ ၼၼ်ႉဢေႃႈ။ၵဝ်သၢင်းၵျူဝ်ႇမၼ်း ၵႃႈတီႈၼၼ်ႉၵႃႈႁိမ်းသဵၼ်ႈတၢင်းဢၼ်ၵွႃႇၸူးၵႃႈတီႈဝဵင်းဢေႇၽရတ်ႉ ဢၼ်လႆႈၸိုဝ်ႈပႅတ်ႉလိႁႅမ်ႇ ၼၼ်ႉဢေႃႈ။

၈ ၵမ်းၼၼ်ႉ ဢိသရေႇလ လူႈတူၺ်းလုၵ်ႈၸၢႆးယုဝ်းသႅပ်ႉၸိူဝ်းၼၼ်ႉသေလႄႈထၢမ်ဝႃႈ၊-ၶဝ်ၸိူဝ်းၼႆႉပဵၼ်ၽူႈလႂ်၊မိူဝ်ႈဢၼ်ဝႃႈၼင်ႇၼႆၸိုင်၊ ယုဝ်းသႅပ်ႉ ၵေႃႈလၢတ်ႈတီႈ ပေႃႈမၼ်းလႄႈဝႃႈ၊-

၉ ပဵၼ်လုၵ်ႈၸၢႆးၵဝ်ၶႃႈဢၼ်ၽြႃးပဵၼ်ၸဝ်ႈဢိတ်းလူပၼ်တီႈၵဝ်ၶႃႈ ၵႃႈၼႂ်းတီႈၼႆႉၼၼ်ႉၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ဢိသရေႇလ ၵေႃႈလၢတ်ႈလႄႈဝႃႈ၊-ဢဝ်ၶဝ်မႃးၸူးၵႃႈတီႈၵဝ်တႃႉ။ၵဝ်တၵ်းပၼ်တၢင်းလီတီႈၶဝ်ဢေႃႈ၊ ဝႃႈၼင်ႇၼႆဢေႃႈ။

၁၀ မၢၵ်ႇတႃ ဢိသရေႇလ ၼၼ်ႉၵွပ်ႈပိူဝ်ႈဢၼ်ဢသၢၵ်ႈမၼ်းယႂ်ႇၼႃႇၼၼ်ႉလႄႈမူဝ်းၵွႃႇ ထၢၼ်ႈပေႃးဢမ်ႇႁၼ်လႆႈလီလီ။ ယုဝ်းသႅပ်ႉ ဢဝ်လုၵ်ႈၸၢႆးမၼ်းၸိူဝ်းၼၼ်ႉသုတ်ႉၸူးၸမ်ၸမ်လႄႈမၼ်းၸုပ်ႇၼူမ်ႈၶဝ်လႄႈ ၵွတ်ႇ ဢုမ်ႈၶဝ်ဢေႃႈ။

၁၁ ဢိသရေႇလၵေႃႈလၢတ်ႈတီႈယုဝ်းသႅပ်ႉလႄႈဝႃႈ၊-ၵဝ်ဢမ်ႇထၢင်ႇၵဝ်တၵ်းလႆႈႁၼ်ၼႃႈမႂ်းယဝ်ႉ။ၵူၺ်းၵႃႈတေႃႈလဵဝ်ၼႆႉ ၸိူဝ်ႉၶိူဝ်းမႂ်းၵေႃႈၽြႃးပဵၼ်ၸဝ်ႈ ၼႄပျႃႉတီႈၵဝ်ယဝ်ႉ၊ဝႃႈၼင်ႇၼႆဢေႃႈ။

၁၂ ယုဝ်းသႅပ်ႉ ၵေႃႈဢဝ်သွင်ၶႃ ဢွၵ်ႇသေၵႃႈတီႈၼႂ်းၵႄႈႁူဝ်ၶဝ်ႇမၼ်းလႄႈ ၵူမ်ႈၵွမ်းႁူဝ်ၵႃႈၼိူဝ်လိၼ်ယူႇဢေႃႈ။

၁၃ ၵမ်းၼၼ်ႉယုဝ်းသႅပ်ႉဢဝ်မိုဝ်းၶွၼ်ၶႂႃမၼ်းယိပ်းဢဝ် ဢေႇၽရိမ်ႇ ပၼ်တီႈၽၢႆႇၶွၼ်သၢႆႉ ဢိသရေႇလ၊ ဢဝ်မိုဝ်းၶွၼ်သၢႆႉမၼ်းယိပ်းဢဝ် မၼႃႇသေႇ ပၼ်တီႈၽၢႆႇၶႂႃ ဢိသရေႇလ လႄႈဢဝ်သုတ်ႉၸူးၸမ်ၸမ်ဢေႃႈ။

၁၄ မၼႃႇသေႇ ပဵၼ်လုၵ်ႈတူၼ်ႈသေတႃႉၵေႃႈ ဢိသရေႇလ ၼၼ်ႉယိုၼ်းမိုဝ်းၶွၼ်ၶႂႃမၼ်းလႄႈ တၢင်ႇသႂ်ႇၵႃႈၼိူဝ်ႁူဝ်ဢေႇၽရိမ်ႇၵေႃႉဢၼ်ဢသၢၵ်ႈလဵၵ်ႉၼၼ်ႉသေယဝ်ႉ ဢဝ်မိုဝ်းၶွၼ်သၢႆႉ မၼ်းတၢင်ႇသႂ်ႇၵႃႈၼိူဝ်ႁူဝ်မၼႃႇသေႇဢေႃႈ။

၁၅ မၼ်းၵေႃႈပၼ်တၢင်းလီတီႈယုဝ်းသႅပ်ႉလႄႈလၢတ်ႈဝႃႈ၊-ႁႂ်ႈၽြႃးပဵၼ်ၸဝ်ႈဢၼ်ပေႃႈၵဝ် ဢႃႇပြႁမ်ႇ တင်း ဢိၸၵ်ႉၵွႃႇမႃးယူႇၽၢႆႇၼႃႈမၼ်းၸဝ်ႈ၊ ၽြႃးပဵၼ်ၸဝ်ႈဢၼ်လဵင်ႉလူၵဝ်ၸူဝ်ႈဢသၢၵ်ႈ တေႃႇထိုင်ႁွတ်ႈဝၼ်းမိူဝ်ႈၼႆႉ

၁၆ တမၢၼ်ႇၵၢင်ႁၢဝ် ဢၼ်ၵႄႇၶျွတ်ႈဢဝ်ၵဝ်သေၵႃႈၼႂ်းဢၼ်ဢမ်ႇလီဢမ်ႇငၢမ်း တင်းသဵင်ႈတင်းလူင်ၼၼ်ႉပၼ်တၢင်းလီတီႈလုၵ်ႈဢွၼ်ႇၸိူဝ်းၼႆႉသေၵမ်းလူၺ်ႈ။ႁႂ်ႈဢဝ်တင်းၼႃႇမႃႉၸိုဝ်သဵင်ၵဝ် ဢိၵ်ႇတင်းၼႃႇမႃႉၸိုဝ်ႈသဵင်ပေႃႈၵဝ် ဢႃႇပြႁမ်ႇ တင်း ဢိၸၵ်ႉ ၸိူဝ်းၼၼ်ႉထၢပ်ႈထႅင်ႈလႄႈႁွင်ႉႁိၵ်ႈသွင်ၶႃသေၵမ်းလူၺ်ႈ။ႁႂ်ႈၶဝ်ယႂ်ႇၽႄႈၼမ်ၵိုၼ်းမႃးၵႃႈၼိူဝ်လိၼ်မိူင်းၼႆႉသေၵမ်းလူၺ်ႈ၊ ဝႃႈ ၼင်ႇၼႆဢေႃႈ။

၁၇ ယုဝ်းသႅပ်ႉႁၼ်ပေႃႈမၼ်းဢဝ်မိုဝ်းၶွၼ်ၶႂႃတၢင်ႇသႂ်ႇၵႃႈၼိူဝ်ႁူဝ်ဢေႇၽရိမ်ႇၼၼ်ႉလႄႈ ဢမ်ႇၶိုတ်းၸႂ်ပဵင်းၸႂ်သေယဝ်ႉ မၼ်းယုၵ်ႉဢဝ်မိုဝ်းပေႃႈမၼ်းသေၵႃႈၼိူဝ်ႁူဝ်ဢေႇၽရိမ်ႇသေယဝ်ႉ ႁႂ်လႆႈၶၢႆႉၵွႃႇတၢင်ႇသႂ်ႇၵႃႈ ၼိူဝ်ႁူဝ် မၼႃႇသေႇ ၼၼ်ႉဢေႃႈ။

၁၈ ယုဝ်းသႅပ်ႉလၢတ်ႈတီႈပေႃႈမၼ်းလႄႈဝႃႈ၊-ဢမ်ႇၸႂ်ႈၶႃႈပေႃႈဢိူၺ်း၊ၵေႃႉၼႆႉပဵၼ်လုၵ်ႈတူၼ်ႈၶႃႈဢေႃႈ။ဢဝ်မိုဝ်းၶွၼ်ၶႂႃႇပေႃႈႁဝ်းတၢင်ႇသႂ်ႇၵႃႈၼိူဝ်ႁူဝ်မၼ်းသေၵမ်း၊ ဝႃႈၼင်ႇၼႆဢေႃႈ။

၁၉ ပေႃႈမၼ်းသမ်ႉထဵင်ပႅတ်ႈလႄႈဝႃႈ၊- ၵဝ်ႁူႉယူႇဢေႃႈ၊လုၵ်ႈၸၢႆးၵဝ်ဢိူၺ်း။ၵဝ်ႁူႉယူႇဢေႃႈ။မၼ်းတၵ်းပဵၼ်မုၵ်ႉၵူၼ်းၸိူဝ်းၵူၼ်းလႄႈယႂ်ႇမျၢတ်ႈၼႃႇဢေႃႈ။ၵူၺ်းၵႃႈၼွင်ႉၸၢႆးမၼ်း ယိင်ႈၶႅၼ်းတၵ်းယႂ်ႇမျၢတ်ႈၼႃႇသေမၼ်းဢေႃႈ။ၸိူဝ်ႉၶိူဝ်းမၼ်းၵေႃႈတၵ်းလႆႈပဵၼ်ၵူၼ်းမဵဝ်းၵူၼ်း ၼမ်ၼႃႇဢေႃႈ၊ဝႃႈၼင်ႇၼႆဢေႃႈ။

၂၀ လၢႆးသမ်ႉၼႂ်းဝၼ်းၼၼ်ႉမၼ်းပၼ်တၢင်းလီတီႈၶဝ်လႄႈဝႃႈ၊- ၼႂ်းမႂ်းၼႆႉၵူၼ်းဢိသရေႇလ တင်းလၢႆတၵ်းပၼ်တၢင်းလီလႄႈလၢတ်ႈဝႃႈ၊-ႁႂ်ႈၽြႃးပဵၼ်ၸဝ်ႈႁႂ်ႈမႂ်းပဵၼ်ၸိူဝ်ႉၼင်ႇဢေႇၽရိမ်ႇ ဢိၵ်ႇတင်း မၼႃႇသေႇ ၼၼ်ႉသေၵမ်းလူၺ်ႈ၊ဝႃႈၼင်ႇၼႆသေယဝ်ႉၶျႃးပၼ်ဢေႇၽရိမ်ႇ ဢွၼ်တၢင်းမၼႃႇသေႇၸိူဝ်ႉၼင်ႇၼၼ်ဢေႃႈ။

၂၁ဢိသရေႇလ ၵေႃႈလၢတ်ႈတီႈယုဝ်းသႅပ်ႉလႄႈဝႃႈ၊-ၵဝ်တၵ်းတၢႆယဝ်ႉဢေႃႈ။ၵူၺ်းၵႃႈၽြႃးပဵၼ်ၸဝ်ႈတၵ်းမီးယူႇလူၺ်ႈၵၼ်တင်းမႂ်းလႄႈ သမ်ႉဢဝ်မႂ်းႁႂ်ႈၶိုၼ်းမိူဝ်းၵွႃႇၸူး ၵႃႈတီႈမိူင်းတီႈဢၼ်ပူႇမွၼ်ႇမႂ်းယူႇပုၼ်ႉဢေႃႈ။

၂၂ လိူဝ်သေၼၼ်ႉ ၵဝ်ဢဝ်ပုၼ်ႈတႃႇဢၼ်ၵဝ်ပၼ်တီႈမႂ်းဢၼ်ၵဝ်ဢဝ်တင်းလၢပ်ႇၵဝ်ၵၢင်ႇၵဝ် ၼုၵ်ႈဢဝ်ၵႃႈၼႂ်းမိုဝ်းၵူၼ်းဢႃႇမေႃႇရိ ၸိူဝ်းၼၼ်ႉပၼ်တီႈမႂ်းယိင်ႈၶႅၼ်းလိူဝ်တွၼ်းၼႃႇသေ ဢၼ်ၵဝ်ပၼ်တီႈပီႈဢၢႆႈမႂ်းၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။