Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၂၄ 

တၢင်းဢၼ်ၸဝ်ႈယေႇသုလုၵ်ႉၶိုၼ်းလိပ်း

၁ ဝၼ်းဢၼ်ပဵၼ်ဝၼ်းပထမၼႂ်းၸဵတ်းဝၼ်းမိူဝ်ႈၶိင်ႇႁူဝ်မိူင်းသႂ်ၼၼ်ႉၶဝ်ဢိၵ်ႇတင်းမေႈယိင်းတၢင်ႇၵေႃႉတင်းလၢႆပႃးဢဝ်တင်းၼၢမ်ႇသႃႇဢၼ်ၶဝ်မႄးႁႅၼ်းဝႆႉၼၼ်ႉလႄႈၵႂႃႇၸူးၵႃႈတီႈသၢင်းၶျႅင်းမၼ်းၸဝ်ႈဢေႃႈ။

၂ ၶဝ်လႆႈႁၼ်မၢၵ်ႇႁိၼ်ၼၼ်ႉၵိင်ႈဢွၵ်ႇသေၵႃႈတီႈၶုမ်သၢင်းၶျႅင်းၼၼ်ႉဝႆႉလႄႈ၊မိူဝ်ႈဢၼ်ၶဝ်

၃ ၶဝ်ႈၵႂႃႇၵႃႈၼႂ်းၶုမ်ၼၼ်ႉၶဝ်ဢမ်ႇထူပ်းဢမ်ႇႁၼ်တူဝ်တၢႆၸဝ်ႈယေႇသု။

၄ ၼႂ်းမိူဝ်ႈဢၼ်ၶဝ်မီးတၢင်းဢၼ်ၵႂင်ၸႂ်ယုင်ႈၸႂ်ၵွပ်ႈပိူဝ်ႈလွင်ႈတီႈႁႅင်းၼၼ်ႉယူႇၼၼ်ႉၸိုင်ၵူၼ်းသွင်ၵေႃႉဢၼ်ၼုင်ႈၶူဝ်းဢၼ်ႁိူဝ်ႈႁိူင်းၼၼ်ႉပေႃႇပေႃႇမႃးၸူၵ်းယူႇၵႃႈတီႈႁိမ်းၶဝ်ဢေႃႈ။

၅ ၼႂ်းမိူဝ်ႈဢၼ်ၶဝ်မီးၸႂ်ဢၼ်ၵူဝ်ႁႄလႄႈၵူမ်ႈၼႃႈငူပ်ႉၸပ်းလိၼ်ယူႇၼၼ်ႉၸိုင်သွင်ၵေႃႉၼၼ်ႉၵေႃႈလၢတ်ႈလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူႁႃၵေႃႉဢၼ်ဢသၢၵ်လိပ်းၼၼ်ႉၵႃႈၼႂ်းၶဝ်ၸိူဝ်းဢၼ်တၢႆၼၼ်ႉ။

၆ မၼ်းၸဝ်ႈဢမ်ႇမီးၵႃႈတီႈၼႆႉ။မၼ်းၸဝ်ႈလုၵ်ႉၶိုၼ်းယဝ်ႉ။ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်မၼ်းၸဝ်ႈလၢတ်ႈဝႆႉတီႈသူၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉမီးယူႇၼႂ်းမိူင်းၵႃႇလိလႄးပုၼ်ႉလႄႈဝႃႈ၊-

၇ လုၵ်ႈၵူၼ်းတၵ်းလႆႈၶၢမ်ႇတၢင်းဢၼ်ဢၢပ်ႈၼႂ်းမိုဝ်းၵူၼ်းႁၢႆႉတင်းလၢႆဢိၵ်ႇတင်းတၢင်းဢၼ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းဢေႃႈ။

၈ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉမၼ်းတၵ်းလုၵ်ႉၶိုၼ်းဢေႃႈ၊ဝႃႈၼင်ႇၼႆၼၼ်ႉတႃႉ၊မိူဝ်ႈဢၼ်ဝႃႈၼင်ႇၼႆၸိုင်၊

၉ ၶဝ်ၵေႃႈၶုၵ်းၸႂ်းလႆႈၶႆႈၸႂ်ထူပ်းၵႂၢမ်းမၼ်းၸဝ်ႈလႄႈလုၵ်ႉသေၵႃႈတီႈသၢင်းၶျႅင်းမၼ်းၸဝ်ႈလႅၼ်ႈၵႂႃႇမွၵ်ႇလၢတ်ႈလွင်ႈတၢင်းၼၼ်ႉၵူႈၸိူဝ်ႉၵူႈပိူင်တီႈတပႄးၸဝ်ႈသိပ်းဢဵတ်းပႃးဢိၵ်ႇတင်းၶဝ်ၸိူဝ်းဢၼ်ၵိုတ်းယူႇတင်းသဵင်ႈတင်းလူင်ၸိူဝ်းၼၼ်ႉဢေႃႈ။

၁၀ ၶဝ်ၸိူဝ်းဢၼ်မွၵ်ႇလၢတ်ႈလွင်းတၢင်းၸိူဝ်းၼၼ်ႉတီႈတမၢၼ်ႇၸဝ်ႈတင်းလၢႆၼၼ်ႉၸမ်းပဵၼ်မႃႇရိမႃႇၵတလ၊ယုဝ်းႁၢၼ်ႇၼ၊မႃႇရိဢၼ်ပဵၼ်မေႈယႃႇၵုပ်ႉဢိၵ်ႇတင်းမေႈယိင်းတၢင်ႇၵေႃႉတင်းလၢႆဢၼ်ပႃးလူၺ်ႈၵၼ်တင်းၶဝ်ၼၼ်ႉဢေႃႈ။

၁၁ တမၢၼ်ႇၸဝ်ႈၸိူဝ်းၼၼ်ႉထၢင်ႇဝႃႈၵႂၢမ်းၶဝ်ၼၼ်ႉပဵၼ်ၵႂၢမ်းလၢႆလၢႆလွၵ်ႇလွၵ်ႇလႄႈဢမ်ႇယုမ်ႇၶဝ်။

၁၂ ၼႂ်းဝႃႈၼၼ်သေၵေႃႈပေႇတရုလုၵ်ႉလႄႈလႅၼ်ႈၵႂႃႇၸူးၵႃႈတီႈသၢင်းၶျႅင်းမၼ်းၸဝ်ႈဢေႃႈ။မိူဝ်ႈဢၼ်ႁွတ်ႈထိုင်ၼၼ်ႉၸိုင်မၼ်းၵူမ်ႈတူၺ်းလႄႈႁၼ်ၽႃႈပိၵ်ႈၵိုတ်းၵျၢၼ်ႇဝႆႉၵူၺ်းသေယဝ်ႉဢၢမ်းလွင်ႈတီႈႁႅင်းၼၼ်ႉလႄႈၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းသေဢေႃႈ။

ၼိူဝ်ၶူၼ်တၢင်းဢၼ်ၵႂႃႇၸူးဝၢၼ်ႈဢေးမွၵ်ႈ

၁၃ လိူဝ်သေၼၼ်ႉၼႂ်းဝၼ်းၼၼ်ႉတပႄးၸဝ်ႈသွင်ၵေႃႉမိူဝ်ႈဢၼ်ပႆတၢင်းၵႂႃႇၸူးၵႃႈတီႈဝၢၼ်ႈဢေးမွၵ်ႈဢၼ်ယၢၼ်ၵၼ်တင်းဝဵင်းယေႇရုသလႅမ်ႇသီႇလၵ်းၼၼ်ႉသွင်ၶႃၵေႃႉၼိုင်ႈလႄႈၵေႃႉၼိုင်ႈ

၁၄ ဢုပ်ႇလၢတ်ႈၵၼ်လွင်ႈတၢင်းဢၼ်ပဵၼ်မႃးယဝ်ႉတင်းသဵင်ႈတင်းလူင်ၼၼ်ႉဢေႃႈ။

၁၅ ၼႂ်းမိူဝ်ႈဢၼ်ၶဝ်ယင်းတိုၵ်ႉဢုပ်ႇလၢတ်ႈၵၼ်ယူႇၼၼ်ႉၸိုင်ၸဝ်ႈယေႇသုသုတ်ႉၸမ်တီႈၶဝ်လႄႈပႆၸွမ်းလူၺ်ႈၵၼ်တင်းၶဝ်ၵႂႃႇဢေႃႈ။

၁၆ မီးတၢင်းဢၼ်ဢမ်ႇတႃသွင်ၶႃဝႆႉလႄႈသွင်ၶႃဢမ်ႇႁူႉလွင်ႈဢၼ်ဝႃႈၵေႃႉၼၼ်ႉပဵၼ်မၼ်းၸဝ်ႈၼၼ်ႉ။

၁၇ မၼ်းၸဝ်ႈၵေႃႈထၢမ်လႄႈဝႃႈ၊ၵႂၢမ်းဢၼ်သူမီးတၢင်းဢၼ်ၼႃႈလူႉတႃမႃႇပႆတၢင်းလႄႈၵေႃႉၼိုင်ႈလႄႈၵေႃႉၼိုင်ႈဢုပ်ႇလၢတ်ႈၵၼ်ယူႇၼႆႉၸမ်းပဵၼ်လွင်ႈတၢင်းၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၼႂ်းသွင်ၶႃၼၼ်ႉၵေႃႉၼိုင်ႈဢၼ်လႆႈၸိုဝ်ၵလေႃႇၽၼၼ်ႉလၢတ်ႈလႄႈဝႃႈ၊-

၁၈ မႂ်းပဵၼ်ၶႅၵ်ႇဝဵင်းယေႇရုသလႅမ်ႇလႄႈမႂ်းဢမ်ႇႁူႉလွင်ႈဢၼ်ပဵၼ်မႃးၵႃႈၼႂ်းဝဵင်းၼၼ်ႉႁိုဝ်၊ဝႃႈၼင်ႇၼႆဢေႃႈ။မၼ်းၸဝ်ႈၵေႃႈထၢမ်လႄႈဝႃႈ၊-

၁၉ ပဵၼ်လွင်ႈတၢင်းၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်သွင်ၶႃႈၵေႃႈလၢတ်ႈလႄႈဝႃႈ၊-ပဵၼ်လွင်ႈၸဝ်ႈယေႇသုၵူၼ်းဝဵင်းၼႃႇၸရႅတ်ႉၼၼ်ႉဢိူဝ်း။မၼ်းပဵၼ်ပရေႃးၽႅတ်ႈဢၼ်တဵမ်ဝႆႉတင်းၵႂၢမ်းဢၼ်မီးႁႅင်းတၼ်းၶူဝ်းဢိၵ်ႇတင်းမိုဝ်းဢၼ်မီးႁႅင်းတၼ်းၶူဝ်းၵႃႈတီႈၽၢႆႇၼႃႈၽြႃးပဵၼ်ၸဝ်ႈဢိၵ်ႇတင်းၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ဢေႃႈ။

၂၀ ၵေႃႉၼၼ်ႉယိတ်ႉပရေႃးႁိၵ်ႈလူင်ဢိၵ်ႇတင်းၶုၼ်ႁဝ်းတင်းလၢႆဢဝ်မၼ်းၸဝ်ႈဢၢပ်ႈႁႂ်ႈလႆႈတၢႆလႄႈဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းယဝ်ႉ။

၂၁ မိူဝ်ႈဢွၼ်ၼၼ်ႉႁဝ်းလႆႈဢွၼ်ၵၼ်မုင်ႈထႃႈမွင်းထႃႈဝႃႈၵေႃႉၼၼ်ႉတၵ်းပဵၼ်ၵေႃႉဢၼ်တၵ်းထူတ်ႇဢဝ်ၵူၼ်းမဵဝ်းဢိသရေႇလ၊ဝႃႈၼႆယူႇယဝ်ႉ။

၂၂ လွင်ႈတၢင်းၼႆႉပဵၼ်မႃးလႆႈသၢမ်ဝၼ်းယဝ်ႉ။မေႈယိင်းဢၼ်ပဵၼ်ၵေႃႉပဵၼ်သေႈၵၼ်တင်းႁဝ်းၼၼ်ႉၵမ်ႈၽွင်ႈၶဝ်ၵႂႃႇၸူးၵႃႈတီႈသၢင်းၶျႅင်းမၼ်းၸဝ်ႈၶိင်ႇၵၢင်ၼႂ်ၸဝ်ႉၸဝ်ႉလႄႈ

၂၃ မိူဝ်ႈဢၼ်ဢမ်ႇထူပ်းဢမ်ႇႁၼ်တူဝ်တၢႆမၼ်းၸဝ်ႈၼၼ်ႉၶဝ်ၶိုၼ်းမႃးမွၵ်ႇလၢတ်ႈလွင်ႈဢၼ်ၶဝ်လႆႈႁၼ်ရူႇပႃႇရူင်ႇဢၼ်တမၢၼ်ႇၵၢင်ႁၢဝ်တင်းလၢႆပေႃႇမႃးတီႈၶဝ်လႄႈဝႃႈ၊-မၼ်းၸဝ်ႈဢသၢၵ်ႈလိပ်းယူႇဢေႃႈ၊ဝႃႈၼင်ႇၼႆလႄႈႁဝ်းမီးတၢင်းဢၼ်ၵႂင်ၸႂ်ယုင်ႈၸႂ်ယူႇဢိူဝ်ႈ။

၂၄ မိူဝ်ႈၼၼ်ႉၵူၼ်းၼႂ်းႁဝ်းၵမ်ႈၽွင်ႈၵေႃႈၵႂႃႇၸူးၵႃႈတီႈသၢင်းၶျႅင်းမၼ်းၸဝ်ႈပုၼ်ႉလႄႈပဵၵ်ႉသမ်ႉထူပ်းႁၼ်ၸိူဝ်ႉၼင်ႇဢၼ်မေႈယိင်းၸိူဝ်းၼၼ်ႉလၢတ်ႈၼၼ်ႉသေၵေႃႈဢမ်ႇလႆႈထူပ်းႁၼ်တူဝ်မၼ်းၸဝ်ႈ၊ဝႃႈၼင်ႇၼႆဢေႃႈ။

၂၅ မၼ်းၸဝ်ႈၵေႃႈလၢတ်ႈတီႈသွင်ၵေႃႉၼၼ်ႉလႄႈဝႃႈ၊-သူၸိူဝ်းဢၼ်ႁူဝ်ၸႂ်ၼိုၵ်းၼႃႇလႄႈဢမ်ႇမီးၺၢၼ်ႇဢၼ်တၵ်းလႆႈယုမ်ႇၵႂၢမ်းဢၼ်ပရေႃးၽႅတ်ႈတင်းလၢႆႁေႃးလၢတ်ႈဝႆႉၼၼ်ႉဢိူၺ်း၊

၂၆ ၸဝ်ႈၶရိၸ်ႉတၵ်းလႆႈၶၢမ်ႇလွင်ႈတၢင်းၸိူဝ်ႉၼင်ႇၼၼ်သေလႄႈၶဝ်ႈၸၢမ်ႇၸႃးမူၼ်ၸေးၸိမ်ႇမၼ်းၸဝ်ႈဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။

၂၇ မိူဝ်ႈၼၼ်ႉမၼ်းၸဝ်ႈဢဝ်ၸႃႉၸဵမ်ၵျၢမ်းမုဝ်းသေႇဢိၵ်ႇတင်းၵျၢမ်းပရေႃးၽႅတ်ႈတင်းလၢႆၽုၺ်ႇဢွၵ်ႇၼႄပျႃးဢထိၵ်ႈပႄႇၵျၢမ်းလိၵ်ႈဢၼ်လၢတ်ႈလူၺ်ႈလွင်ႈမၼ်းၸဝ်ႈၵႃႈမီးတင်းသဵင်ႈတင်းလူင်ၼၼ်ႉပၼ်ၶဝ်ဢေႃႈ။

၂၈ ၵမ်းၼၼ်ႉၶဝ်ႁွတ်ႈထိုင်ၵႃႈတီႈႁိမ်းဝၢၼ်ႈဢၼ်ၶဝ်တၵ်းၵႂႃႇၼၼ်ႉလႄႈမၼ်းၸဝ်ႈႁဵတ်းၸိူဝ်ႉၼင်ႇႁၢင်ႊတၵ်းပူၼ်ႉဝၢၼ်ႈၼၼ်ႉၵႂႃႇဢေႃႈ။

၂၉ သွင်ၶႃၵေႃႈၸူဝ်းဢဝ်မၼ်းၸဝ်ႈၼႃႇလူင်လၢင်လႄႈဝႃႈ၊-လိုဝ်ႈသဝ်းၶဝ်ႈယူႇလူၺ်ႈၵၼ်တင်းႁဝ်းၶႃႈသေၵမ်းၶႃႈ။ပဵၼ်ၶိင်ႇႁူဝ်ၶမ်ႈၶႃႈယဝ်ႉ။ဝၼ်းၵေႃႈတူၵ်းၶႃႈယဝ်ႉ၊ဝႃႈၼင်ႇၼႆဢေႃႈ။ပိူဝ်ႈၼႆလႄႈမၼ်းၸဝ်ႈၵေႃႈၶဝ်ႈလႄႈႁႂ်ႈလႆႈယူႇလူၺ်ႈၵၼ်တင်းသွင်ၶႃဢေႃႈ။

၃၀ ၼႂ်းမိူဝ်ဢၼ်မၼ်းၸဝ်ႈၼင်ႈယူႇၵႃႈတီႈႁိမ်းၽိူၼ်တီႈၵိၼ်လူၺ်ႈၵၼ်တင်းသွင်ၶႃယူႇၼၼ်ႉၸိုင်မၼ်းၸဝ်ႈဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇမိတ်းၶဝ်ႈမုၼ်းပၼ်တီႈသွင်ၶႃဢေႃႈ။

၃၁ မိူဝ်ႈၶိင်ႇၼၼ်ႉမၢၵ်ႇတႃသွင်ၶႃၽုၺ်ႇလႅင်းလႄႈသွင်ၶႃလႆႈႁူႉလွင်ႈဢၼ်ဝႃႈၵေႃႉၼၼ်ႉပဵၼ်ၸဝ်ႈယေႇသုၼၼ်ႉဢေႃႈ။

၃၂ မိူဝ်ႈၼၼ်ႉမၼ်းၸဝ်ႈလပ်ႉႁၢႆၵႂႃႇသေဢေႃႈ။သွင်ၶႃၵေႃႈၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်လႄႈဝႃႈ၊-ၼႂ်းမိူဝ်ႈဢၼ်မၼ်းၸဝ်ႈႁေႃးလၢတ်ႈပၼ်တီႈႁႃးလႄႈၽုၺ်ႇဢွၵ်ႇၼႄပျႃးဢထိၵ်ႈပႄႇၵျၢမ်းလိၵ်ႈတီႈႁႃးၵႃႈၼႂ်းၵၢင်တၢင်းၼၼ်ႉႁူဝ်ၸႂ်ႁႃးဢူၼ်ႈဢွၼ်ႇမႃးဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။

၃၃ သွင်ၶႃၵေႃႈလုၵ်ႉၵမ်းလဵဝ်သေယဝ်ႉၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇလႄႈထူပ်းႁၼ်တပႄးၸဝ်ႈသိပ်းဢဵတ်းပႃးဢိၵ်ႇတင်းၵေႃႉသေႈၶဝ်ဢၼ်ၸူႉၵၼ်တုမ်ၵၼ်လၢတ်ႈၸႃၵၼ်ယူႇၼၼ်ႉဢေႃႈ။

၃၄ ၶဝ်ဝႃႈ၊-ၸဝ်ႈၽြႃးလုၵ်ႉၶိုၼ်းဢမၢၼ်ႇၶၼ်ပဵၼ်ယဝ်ႉ။မၼ်းၸဝ်ႈၼႄပျႃးတူဝ်မၼ်းၸဝ်ႈတီႈသိမုၼ်ႇယဝ်ႉ၊

၃၅ မိူဝ်ႈဢၼ်ယင်းတိုၵ်ႉဝႃႈၸိူဝ်ႉၼင်ႇၼႆယူႇၼၼ်ႉသွင်ၶႃၵေႃႈမွၵ်ႈလၢတ်ႈလွင်ႈဢၼ်ပဵၼ်မႃးၵႃႈၼႂ်းၵၢင်တၢင်းဢိၵ်ႇတင်းလွင်ႈဢၼ်ၶဝ်လႆႈႁူႉပဵၼ်မၼ်းၸဝ်ႈၼႂ်းမိူဝ်ႈဢၼ်မိတ်းၶဝ်ႈမုၼ်းၼၼ်ႉဢေႃႈ။

ၸဝ်ႈယေႇသုၼႄတူဝ်မၼ်းၸဝ်ႈတီႈတပႄးၸဝ်ႈ

၃၆ ၼႂ်းမိူဝ်ႈဢၼ်ၶဝ်ၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်ၸိူဝ်ႉၼင်ႇၼၼ်ယူႇၼၼ်ႉၸိုင်မၼ်းၸဝ်ႈပေႃႇမႃးၸုၵ်းယူႇၵႃႈၼႂ်းၶိုင်ႈၵၢင်ၶဝ်သေလႄႈလၢတ်ႈဝႃႈ၊-ႁႂ်ႈတၢင်းၼိမ်မီးတီႈသူသေၵမ်းလူၺ်ႈ၊ဝႃႈၼင်ႇၼႆဢေႃႈ။

၃၇ ၶဝ်ၼၼ်ႉတူၵ်းၸႂ်လႄႈႁွတ်ႈထိုင်တၢင်းဢၼ်ၵူဝ်ႁႄသေလႄႈထၢင်ႇဝႃႈပဵၼ်ၽဵတ်ႇဢေႃႈ။မၼ်းၸဝ်ႈၵေႃႈလၢတ်ႈလႄႈဝႃႈ၊-ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈမီးတၢင်းဢၼ်သၼ်ႇၶွၼ်းဝႆယူႇ။

၃၈ ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈတၢင်းဢၼ်ၶႆႈၸႂ်ဝူၼ်ႉၸႂ်ၵူႈၸိူဝ်ႉၵူႈပိူင်ဢွၵ်ႇမႃးၼႂ်းႁူဝ်ၸႂ်သူ။

၃၉ တူၺ်းမိုဝ်းၵဝ်တင်းတိၼ်ၵဝ်လူးၵွၼ်ႇတႃႉ။ပဵၼ်တူဝ်ၵဝ်ဢေႃႈ။ယိပ်းၵမ်တူၺ်းၵဝ်လူးၵွၼ်ႇတႃႉ။

၄၀ ၽဵတ်ႇဢမ်ႇမီးလုပ်ႇမီးၼိူဝ်ႉမိူၼ်ၸိူဝ်ႉၼင်ႇဢၼ်သူလႆႈႁၼ်ၵဝ်မီးၼႆႉ၊ဝႃႈၼင်ႇၼႆသေလႄႈၼႄပျႃႉမိုဝ်းၸဝ်ႈတိၼ်ၸဝ်ႈတီႈၶဝ်ၼၼ်ႉဢေႃႈ။

၄၁ ၼႂ်းမိူဝ်ႈဢၼ်ၶဝ်မီးတၢင်းဢၼ်သိူဝ်းပျေႃႇၼႃႇဢၢမ်းၼႃႇဢမ်ႇယုမ်ႇလႆႈၼၼ်ႉၸိုင်၊မၼ်းၸဝ်ႈၵေႃႈထၢမ်လႄႈဝႃႈ၊-

၄၂ တီႈသူမီးတၢင်းၵိၼ်သေၸိူဝ်ႉသေပိူင်ႁိုဝ်၊ဝႃႈၼင်ႇၼႆလႄႈၶဝ်ၵေႃႈဢဝ်ပႃပိင်ႈပွတ်းၼိုင်ႈဢိၵ်ႇတင်းၶႅပ်းၽိုင်ႈပၼ်တီႈမၼ်းၸဝ်ႈဢေႃႈ။

၄၃ မၼ်းၸဝ်ႈဢဝ်လႄႈၵိၼ်ၵႃႈတီႈၽၢႆႇၼႃႈၶဝ်ဢေႃႈ။

မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊-ၵႂၢမ်းဢၼ်ၵဝ်ႁေႃးလၢတ်ႈတီႈသူၼႂ်းၶိင်ႇမိူဝ်ႈဢၼ်ၵဝ်ယင်းတိုၵ်ႉမီးယူႇလူၺ်ႈၵၼ်တင်းသူယူႇၼၼ်ႉလႄႈဝႃႈ၊-

၄၄ ၵႃႈဢၼ်တႅမ်ႈဝႆႉလွင်ႈၵဝ်ၼႂ်းၵျၢမ်းလိၵ်ႈပိင်းၺၢပ်ႈတိမုဝ်းသေႇၵႃႈၼႂ်းၵျၢမ်းလိၵ်ႈပရေႃးၽႅတ်ႈတင်းလၢႆၵႃႈၼႂ်းၵျၢမ်းသႃႇလၢမ်ႇၼၼ်ႉတင်းသဵင်ႈတင်းလူင်တၵ်းလႆႈတဵမ်ထူၼ်ႈဢေႃႈ၊ဝႃႈၼင်ႇၼႆၼၼ်ႉပဵၼ်တီႈႁႅင်းၼႆႉဢေႃႈ၊ဝႃႈၼင်ႇၼႆဢေႃႈ။

၄၅ မိူဝ်ႈၼၼ်ႉမၼ်းၸဝ်ႈၽုၺ်ႇႁူဝ်ၸႂ်ၶဝ်ႁႂ်ႈၶဝ်လႆႈႁူႉၵျၢမ်းလိၵ်ႈသေယဝ်ႉလၢတ်ႈလႄႈဝႃႈ၊-

၄၆ ၵျၢမ်းလိၵ်ႈမႃးၸိူဝ်ႉၼင်ႇၼႆဢေႃႈ။ၸဝ်ႈၶရိၸ်ႉတၵ်းလႆႈၶၢမ်ႇတၢင်းတၢႆလႄႈၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉတၵ်းလႆႈလုၵ်ႉသေၵႃႈတၢင်းတၢႆၶိုၼ်းလိပ်းဢေႃႈ။

၄၇ ဢိင်ပိုင်ႈၼႃႇမႃႉၸိုဝ်သဵင်မၼ်းၸဝ်ႈသေလႄႈတၵ်းလႆႈႁေႃးလၢတ်ႈတြႃးတၢင်းဢၼ်ၶုၵ်းၸႂ်လႆႈမႆႈၸႂ်ဢိၵ်ႇတင်းတြႃးတၢင်းဢၼ်ပွႆႇလွတ်ႈဢပျႅတ်ႈၼၼ်ႉၸႃႉၸဵမ်ၵႃႈတီႈဝဵင်းယေႇရုသလႅမ်ႇဢိၵ်ႇတင်းၵူၼ်းမဵဝ်းၵႃႈမီးတင်းသဵင်ႈတင်းလူင်ၼၼ်ႉဢေႃႈ။

၄၈ သူၵေႃႈပဵၼ်သၢၵ်ႈသေႇလွင်ႈတီႈႁႅင်းၸိူဝ်းၼႆႉဢေႃႈ။ၵႃႈၼင်ႇဢၼ်ၵတိပေႃႈၵဝ်မီးၼၼ်ႉၵဝ်တၵ်းႁဵတ်းတီႈသူလူးၵွၼ်ႇဢေႃႈ။

၄၉ ပိူဝ်ႈၼႆလႄႈၸူဝ်ႈဢၼ်သူဢမ်ႇပႆႇၶၢမ်ႇဢဝ်တၼ်းၶူဝ်းၵႃႈတီႈၵၢင်ႁၢဝ်ၼၼ်ႉသူယူႇၵႃႈၼႂ်းဝဵင်းၼႆႉလူးၵွၼ်ႇတႃႉ၊ဝႃႈၼင်ႇၼႆဢေႃႈ။

ၸဝ်ႈယေႇသုၵျွႃးၶိုၼ်ႈၵႂႃႇမိူင်းၵၢင်ႁၢဝ်

၅၀ လိုၼ်းၼၼ်ႉမၼ်းၸဝ်ႈဢွၼ်ႁူဝ်ၶဝ်ဢွၵ်ႇသေၵႃႈၼႂ်းဝဵင်းၵႂႃႇထိုင်ႁွတ်ႈဝၢၼ်ႈပေႇထၼိယဝ်ႉၸင်ႇယုၵ်ႉမိုဝ်းမၼ်းၸဝ်ႈလႄႈပၼ်တၢင်းလီတီႈၶဝ်ဢေႃႈ။

၅၁ ၼႂ်းမိူဝ်ႈဢၼ်မၼ်းၸဝ်ႈပၼ်တၢင်းလီယူႇၼၼ်ႉမၼ်းၸဝ်ႈၽၢတ်ႇယၢၼ်ၵၼ်တင်းၶဝ်လႄႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ပုၼ်ႉသေဢေႃႈ။

၅၂ ၶဝ်ၼၼ်ႉၶုပ်ႉမူပ်ႇၵူဝ်းၵႂၢႆႇမၼ်းၸဝ်ႈသေယဝ်ႉမီးၸႂ်ဢၼ်သိူဝ်းပျေႃႇၼႃႇလူင်လၢင်လႄႈၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇသေဢေႃႈ။ၶဝ်ၼၼ်ႉတၢင်ႇၵျေးၸူးၽြႃးပဵၼ်ၸဝ်ႈလႄႈယွင်ႈယေႃးၽြႃးပဵၼ်ၸဝ်ႈၵႃႈၼႂ်းပိၵ်ႉမၢၼ်ႇၸဝ်ႈယူႇတႃႇသေႇဢေႃႈ။