Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇမႃႇၵု

Chapter    ၁    ၂     ၃     ၄     ၅     ၆     ၇     ၈     ၉     ၁၀      ၁၁     ၁၂     ၁၃     ၁၄     ၁၅     ၁၆   

၁၄

ၸဝ်ႈယေႇသုၶၢမ်ႇဢဝ်ၽိၵ်ႉသိၵ်ႈ

၁ လိုၼ်းၼၼ်ႉပူၼ်ႉသေသွင်ဝၼ်းယဝ်ႉမီးပွႆးပႃသၶႃႇဢၼ်ဝႃႈပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉဢေႃႈ။ ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းလၢႆၵျၢမ်ႇႁႃႁႂ်ႈလႆႈႁဵတ်းပရီႉယႄႇတီႉဢဝ်မၼ်းၸဝ်ႈလႄႈဢဝ်တၢႆဢေႃႈ။ 

၂ ၼႂ်းဝႃႈၼၼ်သေၵေႃႈၶဝ်လၢတ်ႈၵၼ်လႄႈဝႃႈ၊-ၵူဝ်ၵူၼ်းတင်းလၢႆတၵ်းတူင်ႉတၵ်းတိုၼ်ႇၼႂ်းဝၼ်းပွႆးၼၼ်ႉလႄႈယႃႇပေၽူမ်ႈႁဵတ်းလူးၵွၼ်ႇ၊ဝႃႈၼင်ႇၼႆဢေႃႈ။ 

၃ ၼႂ်းမိူဝ်ႈဢၼ်မၼ်းၸဝ်ႈမီးယူႇၼႂ်းဝၢၼ်ႈပေႇထၼိတီႈႁိူၼ်းၵူၼ်းတုတ်ႈၵေႃႉၼိုင်ႈဢၼ်လႆႈၸိုဝ်သိမုၼ်ႇၼၼ်ႉလႄႈ၊ၼင်ႈယူႇၵႃႈႁိမ်းၽိူၼ်တီႈၵိၼ်ၼၼ်ႉၸိုင်၊မေႈယိင်းၵေႃႉၼိုင်ႈဢဝ်တဝ်ႈမၢၵ်ႇႁိၼ်ၽိူၵ်ႇလုၵ်ႈၼိုင်ႈဢၼ်တဵမ်ဝႆႉတင်းၼမ်ႉႁွမ်ၼႃႇတူႉၸဵတ်ႈၸဵတ်ႈဢၼ်ထိူၵ်ႈၵႃႊယႂ်ႇၼႃႇၼၼ်ႉမႃးတီႈမၼ်းၸဝ်ႈလႄႈဢဝ်တဝ်ႈမၢၵ်ႇႁိၼ်ၽိူၵ်ႇၼၼ်ႉတႅၵ်ႇယဝ်ႉၸင်ႇဢဝ်ၼမ်ႉႁွမ်ထွႁူဝ်မၼ်းၸဝ်ႈဢေႃႈ။ 

၄ ၵမ်ႈၽွင်ႈၸႂ်မႆႈၶႂ်ႈၸႃႉၼႃႇလူင်လၢင်လႄႈလၢတ်ႈဝႃႈ၊-ႁဵတ်းသင်ႁႂ်ႈၼမ်ႉႁွမ်ၼႆႉသုမ်းပႅတ်ႈလၢႆလၢႆ။ 

၅ ထုၵ်ႇလီဢဝ်ၼမ်ႉႁွမ်ၼႆႉၶၢႆလႄႈဢဝ်ၵႃႊမၼ်းၶၼ်မၼ်းဢၼ်တေလႆႈတေႇၼႃႇရီႇသၢမ်ပၢၵ်ႇၶႅပ်းလိူဝ်လိူဝ်ၸိူဝ်းၼၼ်ႉပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၼ်တင်းလၢႆၸိူဝ်းၼၼ်ႉဢိူဝ်း၊ဝႃႈၼင်ႇၼႆလႄႈတၢင်ႇဢပျႅတ်ႈတီႈမေႈယိင်းၼၼ်ႉဢေႃႈ။ 

၆ ၸဝ်ႈယေႇသုၵေႃႈလၢတ်ႈလႄႈဝႃႈ၊-ယႃႇမၼ်းတႃႉ။ ႁဵတ်းသင်လႄႈသူယႃႉယူၵ်ႉမၼ်း။ မၼ်းႁဵတ်းလွင်ႈတၢင်းဢၼ်လီဢၼ်ငၢမ်းတီႈၵဝ်ယဝ်ႉ။ 

၇ ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉမီးယူႇတီႈသူတႃႇသေႇယူႇဢေႃႈ။ ၵႃႈၼင်ႇဢၼ်သူမီးဢလူဝ်ႇၼၼ်ႉသူႁဵတ်းၵျေးၸူးတီႈၶဝ်လႆႈယူႇဢေႃႈ။ 

၈ ၵဝ်ၸမ်းမီးယူႇတီႈသူတႃႇသေႇဢမ်ႇၸႂ်ႈ။ မၼ်းႁဵတ်းၵႃႈဢၼ်မၼ်းတတ်ႈၼိုင်ႇလႆႈၼၼ်ႉယဝ်ႉ။ မၼ်းဢဝ်ၼမ်ႉႁွမ်တႃးတူဝ်ၵဝ်ႁႂ်ႈလႆႈပဵၼ်တၢင်းဢၼ်မႄးႁႅၼ်းပုၼ်ႈဢၼ်တၵ်းသၢင်းၵျူဝ်ႇၵဝ်ၼၼ်ႉဝႆႉဢွၼ်တၢင်းယဝ်ႉ။ 

၉ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵႃႈတီႈဢၼ်ႁေႃးလၢတ်ႈတြႃးသတၢင်းသိူဝ်းပျေႃႇၵႃႈၼိူဝ်လိၼ်မိူင်းၵူႈတီႈၵူလႅၼ်ၼၼ်ႉတၵ်းလႆႈမွၵ်ႇလၢတ်ႈလွင်ႈဢၼ်မၼ်းႁဵတ်းၼႆႉႁႂ်ႈလႆႈပဵၼ်ပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်းမၼ်းၼၼ်ႉဢေႃႈ၊ဝႃႈၼင်ႇၼႆဢေႃႈ။ 

၁၀ မိူဝ်ႈၼၼ်ႉယုတဢိသၵႃႇရေႇဢုတ်ႉဢၼ်ၶဝ်ႈပႃးၼႂ်းသိပ်းသွင်ပႃးၼၼ်ႉၵႂႃႇၵႃႈတီႈယိတ်ႉပရေႃးႁိၵ်ႈလူင်တင်းလၢႆႁႂ်ႈလႆႈဢဝ်မၼ်းၸဝ်ႈဢၢပ်ႈဢေႃႈ။ 

၁၁ ၶဝ်ၼၼ်ႉငိၼ်းသေယဝ်ႉသိူဝ်းၸူမ်း

ၼႃႇလႄႈတၵ်းပၼ်ငိုၼ်းမၼ်းဝႃႈၼႆလႆႈၸႂ်ၵၼ်ဢေႃႈ။ လိုၼ်းၼၼ်ႉမၼ်းၵျၢမ်ႇႁႃၶိင်ႇၵႃႇလႃႉဢၼ်ထုၵ်ႇဢၼ်မႅၼ်ႈဢၼ်တၵ်းလႆႈဢဝ်မၼ်းၸဝ်ႈဢၢပ်ႈပၼ်တီႈၶဝ်ၸိူဝ်းၼၼ်ႉဢေႃႈ။ 

ၶဝ်ႈၶမ်ႈၸဝ်ႈယေႇသု

၁၂ ဝၼ်းပထမပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈဝၼ်းဢၼ်ဢဝ်သူဝ်းပႃသၶႃႇတၢႆၼၼ်ႉတပႄးၸဝ်ႈတင်းလၢႆသုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈလဝ်ႈထၢမ်လႄႈဝႃႈ၊-

၁၃ ၸဝ်ႈႁဝ်းမီးဢလူဝ်ႇၶႂ်ႈႁႂ်ႈႁဝ်းၶႃႈၵႂႃႇမႄးႁႅၼ်းပုၼ်ႈဢၼ်ၸဝ်ႈႁဝ်းတၵ်းလႆႈၵိၼ်ပွႆးပႃသၶႃႇၼၼ်ႉၵႃႈတီႈလႂ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈပွႆႇၸႂ်ႉတပႄးၸဝ်ႈသွင်ၵေႃႉၵႂႃႇလႄႈသင်ႇလၢတ်ႈဝႃႈ၊-

၁၄ သူၶဝ်ႈၵႂႃႇၵႃႈၼႂ်းဝဵင်းၼၼ်ႉတႃႉ။ သူတၵ်းထူပ်းႁၼ်ၵေႃႉဢၼ်ပႃးမေႃႈၼမ်ႉၵေႃႉၼိုင်ႈယူႇဢေႃႈ။ ၸွမ်းပႃႈလင်မၼ်းၵႂႃႇလႄႈလၢတ်ႈၵႃႈတီႈၸဝ်ႈႁိူၼ်းဢၼ်မၼ်းၶဝ်ႈၵႂႃႇၼၼ်ႉလႄႈဝႃႈ၊-သြႃႇၸဝ်ႈထၢမ်ဝႃႈ၊-လုၵ်းၶႅၵ်ႇဢၼ်ၵဝ်ဢိၵ်ႇတင်းတပႄးၵဝ်တင်းလၢႆတၵ်းၵိၼ်ပွႆးပႃသၶႃႇၼၼ်ႉမီးၵႃႈတီႈလႂ်၊ဝႃႈၼင်ႇၼႆတႃႉ။ 

၁၅ ၵေႃႉၼၼ်ႉတၵ်းၼႄပၼ်လုၵ်းလူင်ႁၢၼ်ႉၼိူဝ်ဢၼ်မႄးႁႅၼ်းဝႆႉယဝ်ႉၼၼ်ႉဢေႃႈ။ သူမႄးႁႅၼ်းဝႆႉၵႃႈတီႈလုၵ်းၼၼ်ႉပုၼ်ႈၵဝ်တႃႉ၊ဝႃႈၼင်ႇၼႆဢေႃႈ။ 

၁၆ တပႄးၸဝ်ႈၸိူဝ်းၼၼ်ႉၵေႃႈဢွၵ်ႇၵႂႃႇလႄႈၶဝ်ႈၵႃႈၼႂ်းဝဵင်းယဝ်ႉၸင်ႇထူပ်းႁၼ်ၸိူဝ်ႉၼင်ႇဢၼ်မၼ်းၸဝ်ႈသင်ႇလၢတ်ႈဝႆႉၼၼ်ႉသေယဝ်ႉမႄးႁႅၼ်းပွႆးပႃသၶႃႇဢေႃႈ။ 

၁၇ မိူဝ်ႈဢၼ်ႁွတ်ႈထိုင်ၶိင်ႇႁူဝ်ၶမ်ႈၸိုင်မၼ်းၸဝ်ႈဢိၵ်ႇတင်းတပႄးၸဝ်ႈသိပ်းသွင်ပႃးၸိူဝ်းၼၼ်ႉမႃးလႄႈၵိၼ်ယူႇၼၼ်ႉၸိုင်ၸဝ်ႈယေႇသုလၢတ်ႈလႄႈဝႃႈ၊-

၁၈ ၵဝ်ဝႃႈတီႈၸိုဝ်ႈတီႈၸႂ်ၸမ်းၼႂ်းသူၼႆႉၵေႃႉၼိုင်ႈဢၼ်ၵိၼ်ယူႇလူၺ်ႈၵၼ်တင်းၵဝ်ၼႆႉတၵ်းဢဝ်ၵဝ်ဢၢပ်ႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်

၁၉ ၶဝ်ၼၼ်ႉၸႂ်လဵၵ်ႉၸႂ်ဢူၼ်ႈၼႃႇလႄႈၵေႃႉၼိုင်ႈယဝ်ႉၵေႃႉၼိုင်ႈႁင်းၽႂ်ႁင်းမၼ်းလဝ်ႈထၢမ်လႄႈဝႃႈ၊-ပဵၼ်ၵဝ်ၶႃႈၶႃႈႁိုဝ်၊ပဵၼ်ၵဝ်ၶႃႈၶႃႈႁိုဝ်၊ဝႃႈၼင်ႇၼႆဢေႃႈ။ 

၂၀ မၼ်းၸဝ်ႈၵေႃႈလၢတ်ႈလႄႈဝႃႈ၊-ၵေႃႉဢၼ်ၸူၵ်းၵႃႈၼႂ်းဝၢၼ်ႇႁူမ်ႈၵၼ်တင်းၵဝ်ၼၼ်ႉတၵ်းဢဝ်ၵဝ်ဢၢပ်ႈဢေႃႈ။ 

၂၁ လုၵ်ႈၵူၼ်းတၵ်းလႆႈၵႂႃႇၵႃႈၼင်ႇဢၼ်မႃးၼႂ်းၵျၢမ်းလိၵ်ႈၼၼ်ႉဢေႃႈ။ ၼႂ်းဝႃႈၼၼ်သေၵေႃႈၵေႃႉဢၼ်ဢဝ်လုၵ်ႈၵူၼ်းဢၢပ်ႈၼၼ်ႉမီးဢႃႉမင်ႇၵလႃႇဢေႃႈ။ ပေႃးၵေႃႉၼၼ်ႉဢမ်ႇလႆႈၶၢမ်ႇတၢင်းဢၼ်ၵိူတ်ႇလဵင်ႉမႃးၸိုင်ယဵင်ႈၶႅၼ်းတၵ်းလီဢေႃႈ၊ဝႃႈၼင်ႇၼႆဢေႃႈ။ 

၂၂ ၼႂ်းမိူဝ်ႈဢၼ်ၶဝ်ၵိၼ်ယူႇၼၼ်ႉၸိုင်မၼ်းၸဝ်ႈဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇမိတ်းၶဝ်ႈမုၼ်းၼၼ်ႉပၼ်တီႈၶဝ်လႄႈဝႃႈ၊-ဢွၼ်ၵၼ်ဢဝ်လႄႈၵိၼ်တႃႉ။ ၶဝ်ႈမုၼ်းၼႆႉၸမ်းပဵၼ်တူဝ်ၵဝ်ဢေႃႈ၊ဝႃႈၼင်ႇၼႆဢေႃႈ။ 

၂၃ ၵွၵ်းၵေႃႈမၼ်းၸဝ်ႈဢဝ်လႄႈယွင်ႈယေႃးၵျေးၸူးၸဝ်ႈယဝ်ႉၸင်ႇပၼ်တီႈၶဝ်လႄႈၶဝ်ၵႃႈမီးတင်းသဵင်ႈတင်းလူင်ၵေႃႈဢွၼ်ၵၼ်ၵိၼ်ဢေႃႈ။ မၼ်းၸဝ်ႈသမ်ႉလၢတ်ႈလႄႈဝႃႈ၊-

၂၄ ၵွၵ်းၼႆႉၸမ်းပဵၼ်လိူတ်ႈၵဝ်ဢၼ်ၸၢပ်ႈသႅင်ႇၵၼ်တင်းပတိၺိၺ်ႇတြႃးဢၼ်မႂ်ႇလႄႈသွၼ်းလေႃႇပုၼ်ႈၵူၼ်းၼမ်ၼႃႇဢေႃႈ။ 

၂၅ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵဝ်တၵ်းဢမ်ႇၵိၼ်ၼမ်ႉၸပိတ်ႉၼႆႉတေႃႇထိုင်ႁွတ်ႈဝၼ်းဢၼ်ၵဝ်တၵ်းၵိၼ်မဵဝ်းဢၼ်မႂ်ႇၵႃႈၼႂ်းမိူင်းၽြႃးပဵၼ်ၸဝ်ႈပုၼ်ႉၼၼ်ႉဝႃႈၼင်ႇၼႆဢေႃႈ။ 

၂၆ လိုၼ်းၼၼ်ႉၶဝ်ႁဵတ်းၵႂၢမ်းယဝ်ႉၸင်ႇဢွၵ်ႇၵႂႃႇၸူးၵႃႈတီႈလွႆသၼ်ႇလုၼ်ႇပုၼ်ႉသေဢေႃႈ။ 

ၸဝ်ႈယေႇသုလၢတ်ႈလွင်ႈပေႇတရုတၵ်းထဵင်ပႅတ်ႈမၼ်းၸဝ်ႈ

၂၇ မိူဝ်ႈၼၼ်ႉၸဝ်ႈယေႇသုလၢတ်ႈလႄႈဝႃႈ၊-သူၵႃႈမီးတင်းသဵင်ႈတင်းလူင်ၸႂ်တၵ်းလူႉၵွပ်ႈပိူဝ်ႈၵဝ်ဢေႃႈ။ လွင်ႈဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈၸမ်း၊-ၵဝ်တၵ်းပေႃႉယႅၼ်ႉၵေႃႉဢၼ်လဵင်ႉဢၼ်ထိင်းသူဝ်းၼၼ်ႉတၢႆလႄႈသူဝ်းတင်းလၢႆၵေႃႈတၵ်းလႆႈၽၢတ်ႇၽႄၵၼ်ဢေႃႈ၊ဝႃႈၼႆ၊မီးမႃးၼင်ႇၼႆဢေႃႈ။ 

၂၈ ၼႂ်းဝႃႈၼၼ်သေၵေႃႈၵဝ်လုၵ်ႉၶိုၼ်းၶိုၼ်းယဝ်ႉၸင်ႇတၵ်းၵႂႃႇၵႃႈတီႈမိူင်းၵႃႇလိလႄးပုၼ်ႉဢွၼ်တၢင်းသူဢေႃႈ၊ဝႃႈၼင်ႇၼႆဢေႃႈ။ ပေႇတရုၵေႃႈလၢတ်ႈလႄႈဝႃႈ၊-

၂၉ ပဵၵ်ႉသမ်ႉၶဝ်ၸိူဝ်းၼႆႉတင်းသဵင်ႈတင်းလူင်ၸႂ်လူႉသေၵေႃႈၵဝ်ၶႃႈၸႂ်တၵ်းဢမ်ႇလူႉၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈလၢတ်ႈလႄႈဝႃႈ၊-

၃၀ ၵဝ်ဝႃႈတီႈၸိုဝ်ႈတီႈၸႂ်ႈၸမ်းတေႃႇႁွတ်ႈၶိင်ႇတဵင်ၶိုၼ်းမိူဝ်ႈၼႆႉၸူဝ်ႈဢၼ်ၵႆႇဢမ်ႇပႆႇၶၼ်သွင်ပွၵ်ႈၼၼ်ႉမႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈဝႃႈၼင်ႇၼႆဢေႃႈ။ 

၃၁ မၼ်းၵေႃႈယဵင်ႈၶႅၼ်းၶိုၼ်းလဝ်ႈလၢတ်ႈၵႂၢမ်းၵႅၼ်ႇၶႅင်ၼႃႇလူင်လၢင်လႄႈဝႃႈ၊-ပဵၵ်ႉသမ်ႉၵဝ်ၶႃႈတၵ်းလႆႈတၢႆလူၺ်ႈၵၼ်တင်းၸဝ်ႈႁဝ်းသေၵေႃႈယႃႇၵဝ်ၶႃႈတၵ်းဢမ်ႇပႄႇပႅတ်ႈၸဝ်ႈႁဝ်းၶႃႈၵူၺ်း၊ဝႃႈၼင်ႇၼႆဢေႃႈ။ ၶဝ်တင်းသဵင်ႈတင်းလူင်ၸိူဝ်းၼၼ်ႉၵေႃႈလဝ်ႈလၢတ်ႈမိူၼ်မိူၼ်ၵၼ်ဢေႃႈ။ 

ၸဝ်ႈယေႇသုသူးတွင်းၼႂ်းသူၼ်ၵေႇသသေႇမၼိ

၃၂ မိူဝ်ႈၼၼ်ႉၶဝ်ႁွတ်ႈထိုင်ၵႃႈတီႈဢၼ်လႆႈၸိုဝ်ၵေႇသသေႇမၼိၼၼ်ႉယဝ်ႉၸင်ႇမၼ်းၸဝ်ႈသင်ႇလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-ၼႂ်းမိူဝ်ႈဢၼ်ၵဝ်ယင်းတိုၵ်ႉသူးတွင်းယူႇၼၼ်ႉၸိုင်သူၼင်ႈပႂ်ႉၵႃႈတီႈၼႆႉ

တႃႉ၊ဝႃႈၼင်ႇၼႆသေယဝ်ႉမၼ်းၸဝ်ႈႁွင်ႉဢဝ်ပေႇတရု၊ယႃႇၵုပ်ႉတင်းယုဝ်းႁၢၼ်ႇၵႂႃႇဢေႃႈ။ 

၃၃ မၼ်းၸဝ်ႈႁွတ်ႈထိုင်တၢင်းဢၼ်ၵႂင်ၸႂ်ယုင်ႈၸႂ်တၢင်းဢၼ်ယၢပ်ႇၸႂ်ၵိၼ်းၸႂ်ၼႃႇလူင်လၢင်ဢေႃႈ။ 

၃၄ ၵမ်းၼၼ်ႉမၼ်းၸဝ်ႈလၢတ်ႈတီႈၶဝ်လႄႈဝႃႈ၊-ႁူဝ်ၸႂ်ၵဝ်ၼၵ်းၵိၼ်းၼႃႇထၼ်ႈပေႃးၸမ်တၵ်းတၢႆယဝ်ႉ။ ယူႇၵႃႈတီႈၼႆႉလႄႈပႂ်ႉထႃႈယူႇတႃႉ၊ဝႃႈၼင်ႇၼႆဢေႃႈ။ 

၃၅ မၼ်းၸဝ်ႈပူၼ်ႉသေၵႃႈတီႈၼၼ်ႉၵႂႃႇဢိတ်းဢွၼ်ႇၼိုင်ႈယဝ်ႉၸင်ႇၶုပ်ႉမူပ်ႇၵႃႈၼိူဝ်လိၼ်လႄႈပေႃးၶိင်ႇၼႃႇရီႇၼၼ်ႉတၵ်းပူၼ်ႉမၼ်းၸဝ်ႈၵႂႃႇလႆႈၸိုင်ၼင်ႇႁိုဝ်တၵ်းပူၼ်ႉၵႂႃႇၼၼ်ႉမၼ်းၸဝ်ႈသူးတွင်းလႄႈဝႃႈ၊-

၃၆ ဢူဝ်းပေႃႈၸဝ်ႈ၊ၸဝ်ႈႁဝ်းတတ်ႈၼိုင်ႇလႆႈၵူႈၸိူဝ်ႉၵူႈပိူင်တီႈၶႃႈဢေႃႈ။ ႁႂ်ႈၵွၵ်းၼႆႉပိူင်ႈသေၵဝ်ၶႃႈသေၵမ်းတီႈၶႃႈ။ ၼႂ်းဝႃႈၼၼ်သေၵေႃႈယႃႇႁႂ်ႈပဵၼ်ၸွမ်းၵႃႈၼင်ႇဢၼ်ဢလူဝ်ႇၵဝ်ၶႃႈမီးၼၼ်ႉသေၵမ်းၶႃႈ။ ႁႂ်ႈပဵၼ်ၸွမ်းၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးၼၼ်ႉသေၵမ်းၶႃႈ၊ဝႃႈၼင်ႇၼႆဢေႃႈ။ 

၃၇ မၼ်းၸဝ်ႈၶိုၼ်းမႃးလႄႈထူပ်းႁၼ်ၶဝ်ၼွၼ်းလပ်းယူႇဢေႃႈ။ မၼ်းၸဝ်ႈလၢတ်ႈတီႈပေႇတရုလႄႈဝႃႈ၊-မႂ်းၼွၼ်းလပ်းယူႇႁိုဝ်း။ ၼင်ႇႁိုဝ်တၵ်းလႆႈပႂ်ႉၼႃႇရီႇၼိုင်ႈၵူၺ်းၸိုင်မႂ်းဢမ်ႇတတ်ႈၼိုင်ႇလႆႈႁိုဝ်။ 

၃၈ လွင်ႈၼင်ႇႁိုဝ်တၵ်းဢမ်ႇလႆႈၶၢမ်ႇတၢင်းဢၼ်ၸၢမ်းတူၺ်းယႃႉယူၵ်ႉၸိုင်သူးတွင်းလႄႈပႂ်ႉထႃႈယူႇတႃႉ။ 

၃၉ ပဵၵ်ႉသမ်ႉၸႂ်ဝိၺိၺ်ႇမီးဢလူဝ်ႇသေၵေႃႈတူဝ်ဢမ်ႇမီးႁႅင်း၊ဝႃႈၼင်ႇၼႆယဝ်ႉၸင်ႇမၼ်းၸဝ်ႈသမ်ႉၵႂႃႇထႅင်ႈလႄႈသူးတွင်းၸိူဝ်ႉၼင်ႇဢၼ်သူးတွင်းဢွၼ်တၢင်းၼၼ်ႉဢေႃႈ။ 

၄၀ လိုၼ်းၼၼ်ႉမၼ်းၸဝ်ႈသမ်ႉၶိုၼ်းမႃးတီႈဢၼ်ၶဝ်မီးၼၼ်ႉထႅင်ႈလႄႈထူပ်းႁၼ်ၶဝ်ၼွၼ်းလပ်းယူႇၵွပ်ႈပိူဝ်ႈမၢၵ်ႇတႃၶဝ်ၼၵ်းၼႃႇလူင်လၢင်ၼၼ်ႉဢေႃႈ။ ၶဝ်ဢမ်ႇႁူႉလွင်ႈဢၼ်ၶဝ်တၵ်းၶိုၼ်းလႆႈလဝ်ႈလၢတ်ႈတီႈမၼ်းၸဝ်ႈၸိူဝ်ႉၼင်ႇႁိုဝ်ၼၼ်ႉ။ 

၄၁ လိုၼ်းၼၼ်ႉမၼ်းၸဝ်ႈသမ်ႉၶိုၼ်းမႃးၵႃႈတီႈဢၼ်ၶဝ်မီးၼၼ်ႉထူၼ်ႈထိုင်သၢမ်ပွၵ်ႈလႄႈလၢတ်ႈဝႃႈ၊-သူယင်းၼွၼ်းလပ်းၼွၼ်းလီယူႇႁိုဝ်း။ ပေႃးယဝ်ႉ။ ၶိင်ႇမၼ်းႁွတ်ႈမႃးယဝ်ႉ။ တူၺ်းလူႊလုၵ်ႈၵူၼ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းႁၢႆႉတင်းလၢႆယဝ်ႉ။ 

၄၂ ဢွၼ်ၵၼ်လုၵ်ႉတႃႉ။ ၵႂႃႇတႃႉႁဝ်း။ ၵေႃႉဢၼ်ဢဝ်ၵဝ်ဢၢပ်ႈၼၼ်ႉႁွတ်ႈမႃးယဝ်ႉ၊ဝႃႈၼင်ႇၼႆဢေႃႈ။ 

ၸဝ်ႈယေႇသုၶၢမ်ႇတၢင်းဢၼ်တီႉဢဝ်

၄၃ ၼႂ်းမိူဝ်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼၼ်ယူႇၼၼ်ႉၸိုင်ယုတဢိသၵႃႇရေႇဢုတ်ႉဢၼ်ပႃးၼႂ်းသိပ်းသွင်ပႃးၼၼ်ႉမႃးၵမ်းလဵဝ်ဢေႃႈ။ ၵူၼ်းၸူႉၵူၼ်းတုမ်ဢၼ်ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆပွႆႇၸႂ်ႉမႃးၸိူဝ်းၼၼ်ႉၵေႃႈပႃးတင်းၶွၼ်ႉတင်းလၢပ်ႇၸွမ်းမႃးဢေႃႈ။ 

၄၄ ၵေႃႉဢၼ်ဢဝ်မၼ်းၸဝ်ႈဢၢပ်ႈၼၼ်ႉႁဵတ်းတီႈမၢတ်ႈတီႈတွင်းဝႆႉတီႈၶဝ်ၸိူဝ်းၼၼ်ႉလႄႈဝႃႈ၊-ၵေႃႉဢၼ်ၵဝ်ၸုပ်ႇၼူမ်ၼၼ်ႉပဵၼ်မၼ်းယဝ်ႉ။ တီႉဢဝ်မၼ်းလႄႈႁဵတ်းတင်းသတိဢဝ်ၵႂႃႇတႃႉ၊ဝႃႈၼင်ႇၼႆဝႆႉဢေႃႈ။ 

၄၅ မိူဝ်ႈဢၼ်မၼ်းႁွတ်ႈထိုင်ၸိုင်မၼ်းသုတ်ႉၸပ်းသုတ်ႉၸူးတီႈမၼ်းၸဝ်ႈၵမ်းလဵဝ်လႄႈဝႃႈ၊-ၸဝ်ႈႁဝ်းၸဝ်ႈႁဝ်း၊ဝႃႈၼင်ႇၼႆသေယဝ်ႉ၊ၸုပ်ႇၼူမ်ႈမၼ်းၸဝ်ႈဢေႃႈ။ 

၄၆ -၄၇ ၶဝ်ၵေႃႈယိပ်းၵမ်တီႉဢဝ်မၼ်းၸဝ်ႈဢေႃႈ။ ၵူၼ်းဢၼ်ၸုၵ်းယူႇႁိမ်းၼၼ်ႉၵေႃႉၼိုင်ႈထွတ်ႇဢဝ်လၢပ်ႇမၼ်းဢွၵ်ႇယဝ်ႉၸင်ႇၼ်းၶႃႈယိတ်ႉပရေႃးႁိၵ်ႈလူင်ၵေႃႉၼိုင်ႈလႄႈဝၢၼ်ႁူမၼ်းၶၢတ်ႇၵႂႃႇဢေႃႈ။ 

၄၈ ၸဝ်ႈယေႇသုၵေႃႈလၢတ်ႈတီႈၶဝ်လႄႈဝႃႈ၊-သူပႃးဢဝ်တင်းလၢပ်ႇတင်းၶွၼ်ႉမႃးႁႂ်ႈလႆႈတီႉဢဝ်ၵဝ်မိူၼ်ၼင်ႇတီႉဢဝ်ၸူၼ်ၼၼ်ႉလူင်ပေႇ။ 

၄၉ မိူဝ်ႈဢၼ်ၵဝ်မီးယူႇလူၺ်ႈၵၼ်တင်းသူၵႃႈၼႂ်းပိၵ်ႉမၢၼ်ႇၸဝ်ႈၵူႈဝၼ်းလႄႈသင်ႇသွၼ်ပၼ်ယူႇၼၼ်ႉႁဵတ်းသင်သူဢမ်ႇတီႉဢဝ်ၵဝ်။ လွင်ႈတၢင်းၼႆႉၸမ်းလွင်ႈၼင်ႇႁိုဝ်ၵျၢမ်းလိၵ်တၵ်းတဵမ်ထူၼ်ႈၸိုင်ၸင်ႇပဵၼ်ဢေႃႈ၊ဝႃႈၼင်ႇၼႆဢေႃႈ။ 

၅၀ မိူဝ်ႈၼၼ်ႉတပႄးၸဝ်ႈတင်းသဵင်ႈတင်းလူင်ၸုၼ်ႉပႅတ်ႈမၼ်းၸဝ်ႈသေလႄႈဢွၼ်ၵၼ်လႅၼ်ႈပၢႆႊဢေႃႈ။ 

၅၁ ၵူၼ်းၼုမ်ႇဢၼ်မီးတူဝ်ပူၺ်လႄႈၵူၺ်းဢဝ်ၽႃႈမႆႊၽိုၼ်ၼိုင်ႈမႆႊသုမ်ႇတူဝ်မၼ်းဝႆႉယူႇၼၼ်ႉၸွမ်းပႃႈလင်မၼ်းၸဝ်ႈၵႂႃႇဢေႃႈ။ 

၅၂ မိူဝ်ႈဢၼ်ၶဝ်တီႉဢဝ်မၼ်းၸဝ်ႈၼၼ်ႉမၼ်းၵေႃႈပႅတ်ႈၽႃႈမႆႊမၼ်းသေယဝ်ႉဢွၵ်ႇပႆႊၵႂႃႇတူဝ်ပူၺ်ဢေႃႈ။ ၽၢႆႇၼႃႈၶုၼ်ယိတ်ႉပရေႃးႁိၵ်ႈၶဝ်ဢဝ်ၸဝ်ႈယေႇသုၵႂႃႇသူင်ႇၵႃႈတီႈၶုၼ်ယိတ်ႉပရေႃးႁိၵ်ႈဢေႃႈ။ 

၅၃ ၵႃႈတီႈၼၼ်ႉယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းၵူၼ်းထုတ်ႇၵျၢမ်းတင်းလၢႆၸူႉၵၼ်တုမ်ၵၼ်ယူႇဢေႃႈ။ 

၅၄ ပေႇတရုၵေႃႈယူႇၵႆၵႆလႄႈၸွမ်းမၼ်းၸဝ်ႈၵႂႃႇထိုင်ႁွတ်ႈၵႃႈၼႂ်းတလၢင်းၵၢင်မၢၼ်ႈႁိူၼ်းၶုၼ်ယိတ်ႉပရေႃးႁိၵ်ႈၼၼ်ႉယဝ်ႉၸင်ႇၼင်ႈယူႇလူၺ်ႈၵၼ်တင်းၵူၼ်းဢွၼ်ႇၶုၼ်တင်းလၢႆလႄႈဢွမ်ႇၽႆးယူႇဢေႃႈ။ 

၅၅ ယိတ်ႉပရေႃးႁိၵ်ႈလူင်ဢိၵ်ႇတင်းၶုၼ်တီႈလုမ်းလူင်တင်းသဵင်ႈတင်းလူင်ၵေႃႈႁႃသၢၵ်ႈသေႇႁႂ်ႈလႆႈဢဝ်ၸဝ်ႈယေႇသုတၢႆသေၵေႃႈဢမ်ႇထူပ်းဢမ်ႇလႆႈ။ 

၅၆ ၵူၼ်းၼမ်ၼႃႇယူႇၽၢႆႇၼိုင်ႈတင်းမၼ်းၸဝ်ႈသေလႄႈၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈသေၵေႃႈလွင်ႈတၢင်းဢၼ်ၶဝ်ၶၢမ်ႇသၢၵ်ႈသေႇၼၼ်ႉဢမ်ႇမႅၼ်ႈၵၼ်။ 

၅၇ ၵူၼ်းၵမ်ႈၽွင်ႈလုၵ်ႉလႄႈၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈလႄႈဝႃႈ၊-

၅၈ ႁဝ်းၶႃႈလႆႈငိၼ်းၵေႃႉၼႆႉမၼ်းလၢတ်ႈဝႃႈ၊-ၵဝ်တၵ်းယႃႉပႅတ်ႈပိၵ်ႉမၢၼ်ႇၸဝ်ႈဢၼ်ဢဝ်မိုဝ်းၵူၼ်းႁဵတ်းၼႆႉသေလႄႈၼႂ်းသၢမ်ဝၼ်းၵဝ်တၵ်းၶိုၼ်းႁဵတ်းပိၵ်ႉမၢၼ်ႇၸဝ်ႈဢၼ်မႂ်ႇလင်ၼိုင်ႈဢၼ်ဢမ်ႇဢဝ်မိုဝ်းၵူၼ်းႁဵတ်းၼၼ်ႉဢေႃႈ၊ဝႃႈၼင်ႇၼႆၶႃႈယဝ်ႉ၊ဝႃႈၼင်ႇၼႆဢေႃႈ။ 

၅၉ ၼႂ်းဝႃႈၼၼ်သေၵေႃႈလွင်ႈဢၼ်ၶဝ်ၶၢမ်ႇသၢၵ်ႈသေႇၼၼ်ႉဢမ်ႇမႅၼ်ႈၵၼ်။ ၶုၼ်ယိတ်ႉပရေႃးႁိၵ်ႈၼၼ်ႉလုၵ်ႉၸုၵ်းယူႇၵႃႈၼႂ်းၶိုင်ႈၵၢင်ၶဝ်သေလႄႈထၢမ်ၸဝ်ႈယေႇသုလႄႈဝႃႈ၊-

၆၀ မႂ်းဢမ်ႇၶိုၼ်းလၢတ်ႈၵႃႈသင်သေဢိတ်းႁိုဝ်။ ၶဝ်ၼႆႉယူႇၽၢႆႇၼိုင်ႈၵၼ်တင်းမႂ်းသေလႄႈၶၢမ်ႇသၢၵ်ႈသေႇယူႇယဝ်ႉဢမ်ႇၸႂ်ႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈယူႇတဵတ်ႇတဵတ်ႇယူႇလႄႈဢမ်ႇၶိုၼ်းလၢတ်ႈၵႂၢမ်းသေၶေႃႈသေၵမ်း။ 

၆၁ ၶုၼ်ယိတ်ႉပရေႃးႁိၵ်ႈလူင်ၵေႃႈသမ်ႉၶိုၼ်းထၢမ်ထႅင်ႈလႄႈဝႃႈ၊-မႂ်းပဵၼ်ၸဝ်ႈၶရိၸ်ႉလုၵ်ႈၽြႃးပဵၼ်ၸဝ်ႈဢၼ်မီးမင်ႇၵလႃႇၼၼ်ႉၸႂ်ႈတႄႉႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈယေႇသုၵေႃႈလၢတ်ႈဝႃႈ၊-

၆၂ ၵဝ်ပဵၼ်ဢေႃႈ။ မိူဝ်းၼႃႈထႃႈလိုၼ်းသူတၵ်းလႆႈႁၼ်လုၵ်ႈၵူၼ်းၼင်ႈယူႇၵႃႈတီႈၽၢႆႇၶႂႃတၼ်းၶူဝ်းၸဝ်ႈသေလႄႈမႃးၵႃႈၼိူဝ်မွၵ်ႇၵုမ်ႈပုၼ်ႉဢေႃႈ၊ဝႃႈၼင်ႇၼႆဢေႃႈ။ 

၆၃ မိူဝ်ႈၼၼ်ႉၶုၼ်ယိတ်ႉပရေႃးႁိၵ်ႈလူင်ၸၵ်ႉသိၵ်ႇၶူဝ်းၼုင်ႈတူဝ်ၸဝ်ႈၵဝ်ႇသေလႄႈသမ်ႉၶိုၼ်းထၢမ်လႄႈဝႃႈ၊-ႁဝ်းတၵ်းလူဝ်ႇသၢၵ်ႈသေႇဢၼ်လႂ်ထႅင်ႈလူးၵွၼ်ႇ။ 

၆၄ သူလႆႈငိၼ်းၵႂၢမ်းဢၼ်လၢတ်ႈပူၼ်ႉလၢတ်ႈလိူဝ်ၽြႃးပဵၼ်ၸဝ်ႈၼၼ်ႉယဝ်ႉ။ သူထၢင်ႇၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈထိူၵ်ႈၶၢမ်ႇတၢင်းတၢႆယဝ်ႉဝႃႈၼႆၶဝ်တင်းသဵင်တင်းလူင်ၸိူဝ်းၼၼ်ႉၽွမ်ႉၵၼ်ၸီႇယၢင်ႇဢေႃႈ။ 

၆၅ မိူဝ်ႈၼၼ်ႉၵမ်ႈၽွင်ႈထုမ်ႇၼမ်ႉလၢႆးသႂ်ႇတီႈမၼ်းၸဝ်ႈဢေႃႈ။ ၶဝ်ႁူမ်ႇသုမ်ႇၼႃႈမၼ်းၸဝ်ႈယဝ်ႉၸင်ႇဢဝ်တႃမိုဝ်းထုပ်ႉသႂ်ႇမၼ်းၸဝ်ႈလႄႈဝႃႈ၊-ႁဵတ်းပရေႃးၽႅတ်ႈလႄႈႁေႃးလၢတ်ႈလူး၊ဝႃႈၼင်ႇၼႆဢေႃႈ။ ၵူၼ်းဢွၼ်ႇၶုၼ်တင်းလၢႆၵေႃႈပေႃႉထုပ်ႉမၼ်းၸဝ်ႈဢေႃႈ။ 

ပေႇတရုထဵင်ပႅတ်ႈၸဝ်ႈယေႇသု

၆၆ ၼႂ်းမိူဝ်ႈဢၼ်ပေႇတရုမီးယူႇၵႃႈတႂ်ႈၼႂ်းတလၢင်းဢၼ်မီးၵႄႈႁိူၼ်းၼၼ်ႉၸိုင်မေႈယိင်းၵေႃႉၼိုင်ႈဢၼ်ပဵၼ်ၵူၼ်းၸႂ်ႉၵူၼ်းသွႆၶုၼ်ယိတ်ႉပရေႃးႁိၵ်ႈၼၼ်ႉမႃးလႄႈႁၼ်ပေႇတရုဢွမ်ႇၽႆးယူႇၼၼ်ႉမၼ်းယႅၵ်ႉတူၺ်းၸေးၸေးၸွတ်ႇၸွတ်ႇသေယဝ်ႉလၢတ်ႈဝႃႈ၊-

၆၇ မႂ်းပဵၼ်ၵေႃႉဢၼ်ယူႇလူၺ်ႈၵၼ်တင်းၸဝ်ႈယေႇသုၵူၼ်းဝဵင်းၼႃႇၸရႅတ်ႉၼၼ်ႉဢိူဝ်းဝႃႈၼႆလႄႈပေႇတရုၵေႃႈထဵင်ပႅတ်ႈလႄႈဝႃႈ၊-

၆၈ ၵဝ်ဢမ်ႇႁူႉလွင်ႈဢၼ်မႂ်းလၢတ်ႈၼႆႉ၊ဝႃႈၼင်ႇၼႆယဝ်ႉၸင်ႇဢွၵ်ႇၵႂႃႇၵႃႈၼွၵ်ႈပႃႈၼႃႈတလၢင်းဢၼ်မီးၵႄႈႁိူၼ်းၼၼ်ႉဢေႃႈ။ မိူဝ်ႈၼၼ်ႉၵႆၶၼ်ဢေႃႈ။ 

၆၉ လိုၼ်းၼၼ်ႉမေႈယိင်းၵေႃႉၼိုင်ႈႁၼ်မၼ်းသေယဝ်ႉသမ်ႉလၢတ်ႈတီႈၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းၼၼ်ႉလႄႈဝႃႈ၊-ၵေႃႉၼႆႉၶဝ်ႈပႃးၼႂ်းၶဝ်ၸိူဝ်းၼၼ်ႉဢိူဝ်ႈ၊မိူဝ်ႈဢၼ်ဝႃႈၼင်ႇၼႆၸိုင်၊ပေႇတရုၵေႃႈသမ်ႉၶိုၼ်းထဵင်ပႅတ်ႈထႅင်ႈဢေႃႈ။ 

၇၀ လိုၼ်းသေၼၼ်ႉဢမ်ႇပေႃးႁိုင်ၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းၼၼ်ႉၵေႃႈလၢတ်ႈတီႈပေႇတရုလႄႈဝႃႈ၊-ၸႂ်တႄႉဢိူဝ်ႈ။ မႂ်းပဵၼ်ၵေႃႉဢၼ်ၶဝ်ႈပႃးၼႂ်းၶဝ်ၸိူဝ်းၼၼ်ႉဢိူဝ်း။ လွင်ႈမၼ်းၸမ်းမႂ်းပဵၼ်ၵူၼ်းမိူင်းၵႃႇလိလႄးဢိူဝ်ႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈတိူင်ႇလႄႈၵိၼ်ႇလၢတ်ႈဝႃႈ၊-

၇၁ ၵဝ်ဢမ်ႇႁူႉၸၵ်းၵေႃႉဢၼ်သူလၢတ်ႈၼၼ်ႉ၊ဝႃႈၼင်ႇၼႆဢေႃႈ။ 

၇၂ ၵမ်းၼၼ်ႉၵႆႇသမ်ႉၶၼ်ထႅင်ႈပွၵ်ႈၼိုင်ႈဢေႃႈ။ မိူဝ်ႈၶိင်ႇၼၼ်ႉပေႇတရုၶုၵ်းၸႂ်လႆႈၵႂၢမ်းဢၼ်ၸဝ်ႈယေႇသုလၢတ်ႈတီႈမၼ်းလႄႈဝႃႈ၊-

ၸူဝ်ႈဢၼ်ၵႆႇဢမ်ႇပႆႇၶၼ်သွင်ပွၵ်ႈၼၼ်ႉမႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈ၊ဝႃႈၼင်ႇၼႆၼၼ်ႉလႄႈ၊မၼ်းႁွင်ႉႁႆႈဢေႃႈ။