Shan Missions

လိၵ်ႈဢေႃးဝႃႇတႃႉရူဝ်းမ

Chapter   ၁       ၂       ၃       ၄       ၅       ၆       ၇       ၈       ၉       ၁၀       ၁၁       ၁၂       ၁၃       ၁၄       ၁၅       ၁၆     

၅

ၵွပ်ႈတၢင်းယုမ်ႇမၢတ်ႈလႄႈႁွတ်ႈထိုင်တၢင်းသိုဝ်ႈတေႃႇ

၁ ပိူဝ်ႈၼႆလႄႈႁဝ်းမီးတၢင်းယုမ်ႇမၢတ်ႈလႄႈႁွတ်ႈထိုင်တၢင်းသိုဝ်ႈတေႃႇသေယဝ်ႉၸၢမ်ႇၸႃးတၢင်းၼိမ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈၵွပ်ႈပိူဝ်ႈၸဝ်ႈႁဝ်းၸဝ်ႈယေႇသုၶရိၸ်ႉၼၼ်ႉဢေႃႈ။

၂ ၵွပ်ႈပိူဝ်ႈၸဝ်ႈၼၼ်ႉၵူၺ်းလႄႈႁဝ်းမီးတၢင်းယုမ်ႇမၢတ်ႈႁႂ်ႈလႆႈဢၶႂၢင်ႉဢၼ်ၸၢမ်ႇၸႃးၵျေးၸူးၸဝ်ႈတီႈဢၼ်ႁဝ်းတႄႇယူႇၼၼ်ႉဢေႃႈ။ၵွပ်ႈႁွႆးၼႆႉလႄႈႁဝ်းမုင်ႈထႃႈမွင်းထႃႈမူၼ်ၽြႃးပဵၼ်ၸဝ်ႈလႄႈဢုပ်ႇဝၢဝ်းသိူဝ်းပျေႃႇဢေႃႈ။

၃ လိူဝ်သေၼၼ်ႉဢမ်ႇၵႃးႁဝ်းၶၢမ်ႇတုၵ်ႉၶႃႉတၢင်းၽၢၼ်လႄႈဢုပ်ႇဝၢဝ်းသိူဝ်းပျေႃႇဢေႃႈ။လွင်ႈမၼ်းၸမ်း၊တုၵ်ႉၶႃႉတၢင်းၽၢၼ်ၼၼ်ႉႁႂ်ႈတၢင်းဢၼ်ယိူၼ်ႉၶၢမ်ႇပဵၼ်မႃးဢေႃႈ။

၄ တၢင်းဢၼ်ယိူၼ်ႉၶၢမ်ႇၵေႃႈႁႂ်ႈဢၵျၢင်ႉတၢင်းႁဵတ်းပဵၼ်မႃးဢေႃႈ။ဢၵျၢင်ႉတၢင်းႁဵတ်းၵေႃႈႁႂ်ႈတၢင်းဢၼ်မုင်ႈထႃႈမွင်းထႃႈပဵၼ်မႃးဢေႃႈ။

၅ တၢင်းဢၼ်မုင်ႈထႃႈမွင်းထႃႈၼၼ်ႉၵၢင်းလွတ်ႈတင်းတၢင်းဢၼ်လီဢူၵ်းလီဢၢႆဢေႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်း၊ဝိၺိၺ်ႇမူတ်းၸၢင်ႇၸဝ်ႈဢၼ်မၼ်းၸဝ်ႈပၼ်တီႈႁဝ်းၼၼ်ႉဢဝ်တၢင်းႁၵ်ႉမႅတ်ႈတႃႇၽြႃးပဵၼ်ၸဝ်ႈသွၼ်းလေႃႇၼႂ်းႁူဝ်ၸႂ်ႁဝ်းဢေႃႈ။

၆ ၼႂ်းမိူဝ်ႈဢၼ်ႁဝ်းႁႅင်းဢူၼ်ႈယူႇၼၼ်ႉၸဝ်ႈၶရိၸ်ႉၶၢမ်ႇတၢင်းတၢႆပုၼ်ႈၸိူဝ်းဢၼ်ဢမ်ႇတြႃးၼၼ်ႉမိူဝ်ႈၶိင်ႇမၼ်းထုၵ်ႇၼၼ်ႉဢေႃႈ။

၇ ၵေႃႉဢၼ်တၵ်းၶၢမ်ႇတၢင်းတၢႆပုၼ်ႈၵေႃႉဢၼ်သိုဝ်ႈတေႃႇၼၼ်ႉဢမ်ႇၸၢင်ႊပေႃးမီး။ၵေႃႉဢၼ်ႁတ်းၶၢမ်ႇတၢင်းတၢႆပုၼ်ႈၵူၼ်းလီၼၼ်ႉၸၢင်ႊၶေးတၵ်းမီးယူႇၵေႃႈၼႂ်းလွင်ႈတၢင်းဢၼ်ၸဝ်ႈၶရိၸ်ႉၶၢမ်ႇတၢင်းတၢႆပုၼ်ႈႁဝ်း

၈ မိူဝ်ႈဢၼ်ႁဝ်းယင်းပဵၼ်ၶဝ်ၸိူဝ်းဢၼ်မီးဢပျႅတ်ႈယူႇၼၼ်ႉၸိုင်ပဵၼ်တၢင်းဢၼ်ၽြႃးပဵၼ်ၸဝ်ႈၼႄပျႃးထၢင်ႇထၢင်ႇသႃးသႃးၵႃႈတီႈႁဝ်းလွင်ႈဢၼ်မၼ်းၸဝ်ႈႁၵ်ႉႁဝ်းထၢၼ်ႇလႂ်ဢၼ်ဝႃႈၼၼ်ႉဢေႃႈ။

၉ ပိူဝ်ႈၼႆလႄႈတေႃႈလဵဝ်ၼႆႉႁဝ်းႁွတ်ႈထိုင်တၢင်းသိုဝ်ႈတေႃႇၵွပ်ႈပိူဝ်ႈလိူတ်ႈၸဝ်ႈယဝ်ႉၸင်ႇၵွပ်ႈပိူဝ်ႈၸဝ်ႈၼၼ်ႉႁဝ်းတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်သေၵႃႈၼႂ်းၸႂ်မႆႈၶႆႈၸႃႉမၼ်းၸဝ်ႈၼၼ်ႉဢေႃႈ၊ဝႃႈၼႆႁဝ်းယဵင်ႈၶႅၼ်းမီးတီႈဢၼ်မုင်ႈထႃႈမွင်းထႃႈဢေႃႈ။

၁၀ လွင်ႈမၼ်းၸမ်း၊ပဵၵ်ႉသမ်ႉႁဝ်းပဵၼ်ရၢၼ်ႇသူႇသေၵေႃႈပေႃးႁဝ်းလႆႈၶၢမ်ႇမိၵ်ႈသႁႃႇယႃႉတင်းဢၼ်ထုၵ်ႇၵၼ်တင်းၽြႃးပဵၼ်ၸဝ်ႈၵွပ်ႈပိူဝ်ႈတၢင်းဢၼ်လုၵ်ႈမၼ်းၸဝ်ႈၶၢမ်ႇတၢင်းတၢႆၼၼ်ႉၸိုင်၊ႁဝ်းႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်ယဝ်ႉၸင်ႇတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၵွပ်ႈပိူဝ်ႈဢသၢၵ်ႈၸဝ်ႈၼၼ်ႉဢေႃႈ၊ဝႃႈၼႆ၊ႁဝ်းယဵင်ႈၶႅၼ်းမီးတီႈမုင်ႈထႃႈမွင်းထႃႈဢေႃႈ။

၁၁ လိူဝ်သေၼၼ်ႉဢမ်ႇၵႃးတေႃႈလဵဝ်ၼႆႉႁဝ်းၶၢမ်ႇမိၵ်ႈသႁႃႇယႃႉတၢင်းဢၼ်ထုၵ်ႇၵၼ်ၵွပ်ႈပိူဝ်ႈၸဝ်ႈႁဝ်းၸဝ်ႈယေႇသုၶရိၸ်ႉၼၼ်ႉယဝ်ႉၸင်ႇမီးတၢင်းဢၼ်ဢုပ်ႇဝၢဝ်းသိူဝ်းပျေႃႇၼႂ်းၽြႃးပဵၼ်ၸဝ်ႈၵွပ်ႈပိူဝ်ႈၸဝ်ႈၼၼ်ႉဢေႃႈ။

ၸဝ်ႈယေႇသုပဵၼ်ငဝ်ႈႁၢၵ်ႈတၢင်းၵႄႇၶျွတ်ႈ

၁၂ ၸိူဝ်ႉၼင်ႇဢၼ်ဢပျႅတ်ႈတြႃးၶဝ်ႈမႃးၼႂ်းလေႃးၵႃႉၼႆႉၵွပ်ႈပိူဝ်ႈၵူၼ်းၵေႃႉၼိုင်ႈလႄႈတြႃးတၢင်းတၢႆၶဝ်ႈမႃးၼႂ်းလေႃးၵႃႉၼႆႉၵွပ်ႈပိူဝ်ႈဢပျႅတ်ႈတြႃးၼၼ်ႉၵူၼ်းတင်းသဵင်ႈတင်းလူင်ၵွပ်ႈပိူဝ်ႈမီးဢပျႅတ်ႈလႄႈႁွတ်ႈထိုင်တၢင်းတၢႆဢေႃႈ။

၁၃ ၵူၺ်းၵႃႈၸူဝ်ႈဢၼ်ဢမ်ႇပႆႇမီးပိင်းၺၢပ်ႈတြႃးၼၼ်ႉဢပျႅတ်ႈယင်းပေႃးမီးၼႂ်းလေႃးၵႃႉၼႆႉယဝ်ႉ။ၼႂ်းဝႃႈၼၼ်သေၵေႃႈၸူဝ်ဢၼ်ဢမ်ႇပႆႇမီးပိင်းၺၢပ်ႈတြႃးၼၼ်ႉဢမ်ႇမၢတ်ႈဢမ်ႇတွင်းဢပျႅတ်ႈဝႆႉ။

၁၄ ၸႃႉၸဵမ်ပၢၼ်ဢႃႇတမ်ႇတေႃႇထိုင်ႁွတ်ႈပၢၼ်မုဝ်းသေႇၼၼ်ႉတြႃးတၢင်းတၢႆလႆႈဢုပ်ႉပိူင်ႇဢေႃႈ။ၵေႃႉဢၼ်ဢမ်ႇၽိတ်းပိူင်ႈမိူၼ်ၸိူဝ်ႉၼင်ႇဢႃႇတၢမ်ႇၽိတ်းပိူင်ႈၼၼ်ႉသေၵေႃႈလႆႈၶၢမ်ႇတၢင်းဢၼ်တြႃးတၢင်းတၢႆဢုပ်ႉပိူင်ႇဢေႃႈ။ဢႃႇတၢမ်ႇၼၼ်ႉပဵၼ်ပုင်ႇပမႃႇၵေႃႉဢၼ်တၵ်းမႃးၵမ်းလိုၼ်းၼၼ်ႉဢေႃႈ။

၁၅ ၼႂ်းဝႃႈၼၼ်သေၵေႃႈသူႉၵျေးၸူးၸဝ်ႈၸမ်းဢမ်ႇမိူၼ်ၵၼ်တင်းဢပျႅတ်ႈတြႃး။လွင်ႈမၼ်းၸမ်း၊ၵွပ်ႈပိူဝ်ႈၵူၼ်းၵေႃႉၼိုင်ႈၽိတ်းပိူင်ႈလႄႈၵူၼ်းၼမ်ၼႃႇလႆႈႁွတ်ႈထိုင်တၢင်းတၢႆဢေႃႈ။ၵွပ်ႈပိူဝ်ႈၵေႃႉၼိုင်ႈဢၼ်ပဵၼ်ၸဝ်ႈယေႇသုၼၼ်ႉလႄႈၵျေးၸူးၽြႃးပဵၼ်ၸဝ်ႈတင်းဢၵျူဝ်းၵျေးၸူးၸဝ်ႈၼၼ်ႉယဵင်ႈၶႅၼ်းတဵမ်ထူၼ်ႈလူၼ်ႉလိူဝ်ဝႆႉပုၼ်ႈၵူၼ်းၼမ်ၼႃႇဢေႃႈ။

လိူဝ်သေၼၼ်ႉလွင်ႈတၢင်းဢၼ်ပဵၼ်မႃးၵွပ်ႈပိူဝ်ႈၵူၼ်းၵေႃႉၼိုင်ႈၽိတ်းပိူင်ႈ၊ဢိၵ်ႇတင်းလွင်ႈသူႉၵျေးၸူးၸဝ်ႈၼၼ်ႉ၊ဢမ်ႇမိူၼ်ၵၼ်။

၁၆ လွင်ႈမၼ်းၸမ်း၊ၼႂ်းလွင်ႈတၢင်းဢၼ်ၸီႇယၢင်ႇတြႃးၼၼ်ႉၵွပ်ႈပိူဝ်ႈဢပျႅတ်ႈဢၼ်ၼိုင်ႈလႄႈတၵ်းလႆႈၶၢမ်ႇတၢမ်ႇဝႃႈၼႆၸီႇယၢင်ႇဝႆႉဢေႃႈ။ၼႂ်းလွင်ႈသူႉၵျေးၸူးၸဝ်ႈၼၼ်ႉၸမ်း၊မီးဢပျႅတ်ႈၼမ်ၼႃႇယူႇသေၵေႃႈႁႂ်ႈလွတ်ႈတႃႉဝႃႈၼႆၸီႇယၢင်ႇဝႆႉဢေႃႈ။

၁၇ လိူဝ်သေၼၼ်ႉပေႃးတြႃးတၢင်းတၢႆလႆႈဢုပ်ႉပိူင်ႇၵွပ်ႈပိူဝ်ႈၵူၼ်းၵေႃႉၼိုင်ႈၽိတ်းပိူင်ႈၼၼ်ႉၸိုင်ၵွပ်ႈပိူဝ်ႈၵေႃႉၼိုင်ႈဢၼ်ပဵၼ်ၸဝ်ႈယေႇသုၶရိၸ်ႉၼၼ်ႉၶဝ်ၸိူဝ်းဢၼ်လႆႈၶၢမ်ႇဢဝ်ၵျေးၸူးၸဝ်ႈၼမ်ၵိုၼ်းၼႃႇဢိၵ်ႇတင်းတၢင်းဢၼ်မၼ်းၸဝ်ႈသႂၢင်းသႂ်ႇပၼ်ၼႂ်းတၢင်းဢၼ်သိုဝ်ႈတေႃႇၼၼ်ႉယဵင်ႈၶႅၼ်းလႆႈၸၢမ်ႇၸႃးၼႂ်းဢသၢၵ်ႈဢေႃႈ။

၁၈ ပိူဝ်ႈၼႆလႄႈၸိူဝ်ႉၼင်ႇဢၼ်ၵူၼ်းတင်းသဵင်ႈတင်းလူင်ထူပ်းတၢင်းဢၼ်ၸီႇယၢင်ႇဢပျႅတ်ႈၵွပ်ႈပိူဝ်ႈတၢင်းဢၼ်ၵူၼ်းၵေႃႉၼိုင်ႈၽိတ်းပိူင်ႈၼၼ်ႉ၊ၵူၼ်းတင်းသဵင်ႈတင်းလူင်လႆႈဢၶႂၢင်ႉႁွတ်ႈထိုင်တၢင်းဢၼ်သိုဝ်ႈတေႃႇဢၼ်ၸၢပ်ႈသႅင်ႇၵၼ်တင်းဢသၢၵ်ႈၼၼ်ႉၵွပ်ႈပိူဝ်ႈတၢင်းသိုဝ်ႈတေႃႇၵေႃႉၼိုင်ႈၼၼ်ႉဢေႃႈ။

၁၉ လွင်ႈမၼ်းၸမ်းၸိူဝ်ႉၼင်ႇဢၼ်ၵူၼ်းၼမ်ၼႃႇလႆႈပဵၼ်ၵူၼ်းမီးဢပျႅတ်ႈၵွပ်ႈပိူဝ်ႈတၢင်းဢၼ်ၵူၼ်းၵေႃႉၼိုင်ႈဢမ်ႇထွမ်ႇဢဝ်ၼၼ်ႉၵူၼ်းၼမ်ၼႃႇတၵ်းလႆႈႁွတ်ႈထိုင်တၢင်းဢၼ်သိုဝ်ႈတေႃႇၵွပ်ႈပိူဝ်ႈၵေႃႉၼိုင်ႈထွမ်ႇဢဝ်ၼၼ်ႉဢေႃႈ။

၂၀ လိူဝ်သေၼၼ်ႉပိင်းၺၢပ်ႈတြႃးၶဝ်ႈမႃးလႄႈဢပျႅတ်ႈဢၼ်ၽိတ်းပိူင်ႈၼၼ်ႉၵေႃႈလႆႈယႂ်ႇၼမ်မႃးဢေႃႈ။ၼႂ်းဝႃႈၼၼ်သေၵေႃႈၼႂ်းလွင်ႈဢၼ်ဢပျႅတ်ႈယႂ်ႇမႃးၼမ်မႃးၼၼ်ႉၵျေးၸူးၸဝ်ႈယဵင်ႈၶႅၼ်းပျေႉၸုမ်ႇၼမ်ၵိုၼ်းၼႃႇဢေႃႈ။

၂၁ ၸိူဝ်ႉၼင်ႇဢၼ်ဢပျႅတ်ႈတြႃးလႆႈဢုပ်ႉပိူင်ႇၼႂ်းတၢင်းတၢႆၼၼ်ႉၵျေးၸူးတြႃးတၵ်းလႆႈဢုပ်ႉပိူင်ႇၼႂ်းတၢင်းဢၼ်သိုဝ်ႈတေႃႇလႄႈလႆႈထႃႇဝရႃႉဢသၢၵ်ႈၵွပ်ႈပိူဝ်ႈၸဝ်ႈႁဝ်းၸဝ်ႈယေႇသုၶရိၸ်ႉၼၼ်ႉဢေႃႈ။