Shan Missions

လိၵ်ႈဢေႃးဝႃႇတႃ့ဢေးၽႅတ်ႈ

Chapter          ၁          ၂          ၃          ၄           ၅           ၆         

၆

လုၵ်ႈလၢင်း၊ပေႃႈမေႈ၊ၸဝ်ႈၶႃႈ

၁ လုၵ်ႈလၢင်းၶဝ်ဢိူၺ်း၊ထွမ်ႇဢဝ်ၵႂၢမ်းပေႃႈၵႂၢမ်းမေႈသူၸွမ်းၵႃႈၼင်ႇဢၼ်မႅၼ်ႈတင်းဢလူဝ်ၸဝ်ႈၽြႃးၼၼ်ႉတႃႉ။လွင်ႈတၢင်းဢၼ်ထွမ်ႇဢဝ်ၵႂၢမ်းပေႃႈၵႂၢမ်းမေႈၼၼ်ႉပဵၼ်လွင်ႈတၢင်းဢၼ်ၸွမ်းတြႃးဢေႃႈ။

၂ ၼင်ႇႁိုဝ်မႂ်းတၵ်းလႆႈလီလႆႈပဵၼ်လႄႈဢသၢၵ်ႈမႂ်းတၵ်းယိုၼ်းယၢဝ်းၵႃႈၼႂ်းမိူင်းၸဝ်ႈၼၼ်ႉၸိုင်ႁဵတ်းတၢင်းဢၼ်ရူဝ်ႇသေႇၵူဝ်ယမ်ပေႃႈမေႈမႂ်းတႃႉ။

၃ ပိင်းၺၢပ်ႈၼႆႉၸမ်းပဵၼ်ပထမပိင်းၺၢပ်ႈဢၼ်ၸၢပ်ႈသႅင်ႇၵၼ်တင်းၵတိၸဝ်ႈၼၼ်ႉဢေႃႈ။

၄ ပေႃႈၶဝ်ဢိူၺ်း၊ယႃႇပေႁဵတ်းလွင်ႈတၢင်းဢၼ်တေႁဵတ်းႁႂ်ႈလုၵ်ႈလၢင်းသူၸႂ်မႆႈၶႂ်ႈၸႃႉၼိူဝ်သူ။ႁဵတ်းတၢင်းဢၼ်သင်ႇသွၼ်သုင်းမႃႉၽိုၵ်းၵႅင်ႉပၼ်ႁႂ်ႈၶဝ်ယႂ်ႇမႃးၼႂ်းၸဝ်ႈၽြႃးတႃႉ။

၅ ၶႃႈၶဝ်ဢိူၺ်းယင်းဢမ်ႇမီးႁူဝ်ၸႂ်သွင်ၽၢႆႇသွင်ပႃႈသေယဝ်ႉမီးတၢင်းဢၼ်ရူဝ်ႇသေႇၵူဝ်ယမ်ၸဝ်ႈလေႃးၵီႇသူမိူၼ်ၸိူဝ်ႉၼင်ႇဢၼ်သူထွမ်ႇဢဝ်ၵႂၢမ်းၸဝ်ႈၶရိၸ်ႉၼၼ်ႉတႃႉ။

ထွမ်ႇဢဝ်ႁဵတ်းၸွမ်းတႂ်ႈတႃၶဝ်ႁႂ်ႈလႆႈထုၵ်ႇၸႂ်ၶဝ်ၼၼ်ႉၵူၺ်းဢမ်ႇၸႂ်ႈ။

၆ ထွမ်ႇဢဝ်ႁဵတ်းၸွမ်းမိူၼ်ၼင်ႇၶႃႈၸဝ်ႈၶရိၸ်ႉၼၼ်ႉလႄႈပႃးတင်းၸႂ်ၸေႇတၼႃႇသေယဝ်ႉႁဵတ်းသၢင်ႈမိူၼ်ၼင်ႇႁဵတ်းသၢင်ႈၸွမ်းဢလူဝ်ႇၽြႃးပဵၼ်ၸဝ်ႈၼၼ်ႉတႃႉ။

၇ ၶၢမ်ႇတၢင်းဢၼ်ၸႂ်ႉသွႆမိူၼ်ၸိူဝ်ႉၼင်ႇၶၢမ်ႇတၢင်းဢၼ်ၵူၼ်းၸႂ်ႉသွႆၼၼ်ႉဢမ်ႇၸႂ်ႈလႄႈမိူၼ်ၸိူဝ်ႉၼင်ႇၸဝ်ႈၶရိၸ်ႉၸႂ်ႉသွႆၼၼ်ႉတႃႉ။

၈ လွင်ႈမၼ်းၸမ်းပဵၼ်ၶႃႈသေဢမ်ႇဝႃႈ၊ပဵၼ်ၵူၼ်းလွတ်ႈသေဢမ်ႇဝႃႈ၊တၵ်းလႆႈၶၢမ်ႇဢဝ်ဢၵျူဝ်းမင်ႇၵလႃႇၵႃႈတီႈၸဝ်ႈၽြႃးၸွမ်းၵႃႈၼင်ႇဢၼ်ထုၵ်ႇဢၼ်လီဢၼ်ၶဝ်ႁဵတ်းၼၼ်ႉၵူႈၵေႃႉဢေႃႈ၊ဝႃႈၼႆမၢတ်ႈတွင်းဝႆႉတႃႉ။

၉ ၶဝ်ၸိူဝ်းဢၼ်ပဵၼ်ၸဝ်ႈၶဝ်ဢိူၺ်း၊ယႃႇပေႁဵတ်းတၢင်းဢၼ်ၸၢင်ႊလွၵ်ႇၸၢင်ႊငိူတ်ႈတီႈၶႃႈၸိူဝ်းၼၼ်ႉသေလႄႈသိူၵ်ႈသမ်ႇၶဝ်လီလီတႃႉ။ႁူႉမၢတ်ႈလွင်ႈဢၼ်ဝႃႈၸဝ်ႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉဢမ်ႇတူၺ်းၼႃႈၽူႈလႂ်ဢၼ်ဝႃႈၼၼ်ႉတႃႉ။

လၢၵ်ႈၼၢၵ်ႈၸုမ်ႇၽြႃးပဵၼ်ၸဝ်ႈ

၁၀ ၵႂၢမ်းဢၼ်ယင်းၵိုတ်းယင်းၵျၢၼ်ႇၸမ်းမီးတၢင်းဢၼ်မၼ်းၶိုင်ႇယူႇၼႂ်းၸဝ်ႈၽြႃးဢိၵ်ႇတင်းၼႂ်းဢႁူင်ႇတၼ်းၶူဝ်းၸဝ်ႈတႃႉ။

၁၁ လွင်ႈၼင်ႇႁိုဝ်တၵ်းႁႄႉၶႅၼ်ပရိယႄႇမႃႇၼၢတ်ႈလႆႈၼၼ်ႉၸိုင်ဢဝ်လၢၵ်ႈၼၢၵ်ႈၸုမ်ႇၽြႃးပဵၼ်ၸဝ်ႈၼုင်ႈမႆတႃႉ။လွင်ႈမၼ်းၸမ်းႁဝ်းလႆႈတႃႉလႆႈၶဵင်ႇလႆႈတိုၵ်းတေႃးၵၼ်တင်းရၢၼ်ႇသူႇဢၼ်မီးၼိူဝ်ႉမီးလိူတ်ႈၼၼ်ႉဢမ်ႇၸႂ်ႈ။

၁၂ ႁဝ်းလႆႈတႃႉလႆႈၶဵင်ႇလႆႈတိုၵ်းတေႃးၵၼ်တင်းၶုၼ်ဢၼ်ဢုပ်ႉပိူင်ႇလႂ်၊ၶုၼ်ဢႃႇၼႃႇ၊ၶုၼ်ဢၼ်ဢုပ်ႉပိူင်ႇၼႂ်းလပ်းသိင်ႇလေႃးၵီႇ၊ၽီႁၢႆႉဢၼ်ယူႇၵႃႈၼိူဝ်ၽႃႉၵၢင်ႁၢဝ်လႂ်ၸိူဝ်းၼၼ်ႉဢေႃႈ။

၁၃ ပိူဝ်ႈၼႆလႄႈယိပ်းၵမ်ဢဝ်လၢၵ်ႈၼၢၵ်ႈၸုမ်ႇၽြႃးပဵၼ်ၸဝ်ႈသေယဝ်ႉႁႄႉၶႅၼ်ၼႂ်းၶိင်ႇၵႃႇလႃႉဝၼ်းဢၼ်ႁၢႆႉမိူၵ်ႈၼၼ်ႉသေလႄႈၸုၵ်းၶၢမ်ႇႁႂ်ႈလွင်ႈတၢင်းၵႃႈမီးတင်းသဵင်ႈတင်းလူင်ယဝ်ႉတူဝ်တႃႉ။

၁၄ ဢဝ်သၢႆဢႅဝ်ဢၼ်ဝႃႈသႅတ်ႈၸႃႇတြႃးၼၼ်ႉႁတ်ႉတႃႉ။ဢဝ်ၶိူင်ႈဢၼ်ႁႄႉႁူဝ်ဢူၵ်းဢၼ်ဝႃႈပႃႇရမီႇတၢင်းဢၼ်သိုဝ်ႈတေႃႇၼၼ်ႉၼုင်ႈမႆႊတႃႉ။

၁၅ ဢဝ်သွၵ်းတိၼ်ဢၼ်ဝႃႈတၢင်းဢၼ်မႄးဝႆႉပုၼ်ႈဢၼ်တၵ်းႁေႃးလၢတ်ႈတြႃးသတၢင်းသိူဝ်းပျေႃႇဢၼ်ၵိုင်ႇၵၼ်တင်းတၢင်းၼိမ်ၼၼ်ႉတိုဝ်းလႄႈၸုၵ်းၶၢမ်ႇတႃႉ။

၁၆ သုင်းတိုဝ်းလွႃးဢၼ်ဝႃႈတၢင်းယုမ်ႇမၢတ်ႈဢၼ်ႁႄႉမွတ်ႇလၢၵ်ႈၼၢၵ်ႈၸၢၵ်ႈၽႆးဢၼ်မႃႇၼၢတ်ႈယိုဝ်းထိမ်ႈၼၼ်ႉတႃႉ။

၁၇ တိုဝ်းမွၵ်ႇႁူဝ်လဵၵ်းဢၼ်ဝႃႈတၢင်းဢၼ်ၵႄႇၶျွတ်ႈဢဝ်ဢိၵ်ႇတင်းယိပ်းၵမ်လၢပ်ႇဝိၺိၺ်ႇၸဝ်ႈဢၼ်ဝႃႈၼုၵ်ႈၵပၢတ်ႈၽြႃးပဵၼ်ၸဝ်ႈၼၼ်ႉတႃႉ။

၁၈ ၵူႈၶိင်ႇၵူႈမိူဝ်ႈပႃးတင်းဝိၺိၺ်ႇၸဝ်ႈသေလႄႈဢဝ်တင်းတၢင်းဢၼ်ႁဵတ်းသူးတွင်းပထၼႃႇၵူႈၸိူဝ်ႉၵူႈပိူင်ၼၼ်ႉသေလႄႈသူးတွင်းတႃႉ။ႁႅင်းယင်းဢမ်ႇဢူၼ်ႈၸႂ်ယင်းဢမ်ႇလူႉလႄႈႁဵတ်းသူးတွင်းပထၼႃႇပုၼ်ႈၵဝ်ဢိၵ်ႇတင်းၵူၼ်းမူတ်းၸၢင်ႇတင်းသဵင်ႈတင်းလူင်သေလႄႈပႂ်ႉယူႇတႃႉ။

၁၉ ၵွပ်ႈပိူဝ်ႈၵဝ်လႆႈၶၢမ်ႇတၢင်းဢၼ်ဢဝ်တင်းၸိူၵ်ႈလဵၵ်းမတ်ႉၽုၵ်ႇဝႆႉၵွပ်ႈပိူဝ်ႈတြႃးသတၢင်းသိူဝ်းပျေႃႇၼၼ်ႉလႄႈၵဝ်လႆႈပဵၼ်သၢၼ်ႇတမၢၼ်ႇၸဝ်ႈၼႂ်းၸိူၵ်ႈလဵၵ်းဢေႃႈ။

၂၀ လွင်ႈၼင်ႇႁိုဝ်ၵဝ်တၵ်းမီးဢၶႂၢင်ႉဢၼ်လႆႈပိုတ်ႇသူပ်းႁတ်းႁတ်းႁၢၼ်ႁၢၼ်သေယဝ်ႉၽုၺ်ႇဢွၵ်ႇၼႄပျႃႉလွင်ႈတၢင်းဢၼ်လိုၵ်ႉဢၼ်လမ်ႇတြႃးဢိၵ်ႇတင်းလွင်ႈၼင်ႇႁိုဝ်ၵဝ်တၵ်းလႆႈႁေႃးလၢတ်ႈႁတ်းႁတ်းႁၢၼ်ႁၢၼ်ၵႃႈၼင်ႇဢၼ်ထုၵ်ႇလီႁေႃးလၢတ်ႈၼၼ်ႉၸိုင်၊သူးတွင်းပုၼ်ႈၵဝ်တႃႉ။

တၢင်းလီမင်ႇၵလႃႇ

၂၁ လွင်ႈၼင်ႇႁိုဝ်သူတၵ်းလႆႈႁူႉလွင်ႈတၢင်းဢၼ်ပဵၼ်မႃးၵႃႈတီႈၵဝ်ၼၼ်ႉၸိုင်၊တုၶိၵ်ႉ၊ဢၼ်ပဵၼ်ၼွင်ႉဢၼ်ၵဝ်ႁၵ်ႉ၊ဢၼ်ပဵၼ်သြႃႇဢၼ်မီးသႅတ်ႈၸႃႇၵႃႈတီႈၸဝ်ႈၽြႃးၼၼ်ႉတၵ်းမွၵ်ႇလၢတ်ႈလွင်ႈတၢင်းတင်းသဵင်ႈတင်းလူင်တီႈသူဢေႃႈ။

၂၂ ၵွပ်ႈလွင်ႈၼႆႉလႄႈၵဝ်ပွႆႇၸႂ်ႉမၼ်းၵႂႃႇတီႈသူႁႂ်ႈသူလႆႈႁူႉလွင်ႈႁဝ်းဢိၵ်ႇတင်းႁႂ်ႈမၼ်းလႆႈႁဵတ်းႁႂ်ႈႁူဝ်ၸႂ်သူသၢၵ်ႈသႃႇဢေႃႈ။

ႁႂ်ႈတၢင်းၼိမ်ဢိၵ်ႇတင်းတၢင်းႁၵ်ႉမႅတ်ႈတႃႇ၊တၢင်းယုမ်ႇမၢတ်ႈ၊ဢၼ်ပဵၼ်မႃးၵႃႈတီႈၽြႃးပေႃႈၸဝ်ႈတင်းၸဝ်ႈယေႇသုၶရိၸ်ႉၼၼ်ႉမီးၵႃႈၼိူဝ်ပီႈၼွင်ႉတင်းလၢႆသေၵမ်းလူၺ်ႈ။

ႁႂ်ႈၵျေးၸူးၸဝ်ႈမီးၵႃႈၼိူဝ်ၶဝ်ၸိူဝ်းဢၼ်ႁၵ်ႉၸဝ်ႈယေႇသုၶရိၸ်ႉတင်းသဵင်ႈတင်းလူင်ၼၼ်ႉဢမၢၼ်ႇၶၼ်ပဵၼ်သေၵမ်းလူၺ်ႈ။ဢႃႈမိၼ်ႈ။