Shan Missions

လိၵ်ႈဢေႃးဝႃႇတႃႉရူဝ်းမ

Chapter   ၁       ၂       ၃       ၄       ၅       ၆       ၇       ၈       ၉       ၁၀       ၁၁       ၁၂       ၁၃       ၁၄       ၁၅       ၁၆     

၁၁ 

ၵူၼ်းဢိသရေႇလဢၼ်ၵိုတ်းဢၼ်ၵျၢၼ်ႇ

၁ ၵဝ်ၶိုၼ်းထၢမ်လႄႈဝႃႈၸမ်း၊-ၸွင်ႇၽြႃးပဵၼ်ၸဝ်ႈပႄႇပႅတ်ႈမဵဝ်းၵူၼ်းမၼ်းၸဝ်ႈယဝ်ႉႁိုဝ်။ဢမ်ႇၸႂ်ႈၸိူဝ်ႉၼင်ႇၼၼ်။ၵဝ်ၼႆႉပဵၼ်ၵူၼ်းမဵဝ်းဢိသရေႇလဢေႃႈ။ပဵၼ်မဵဝ်းဢႃႇပြႁၢမ်ႇတင်းၸိူဝ်ႉၶိူဝ်းပိၼ်ႇယႃႇမိၼ်ႇဢေႃႈ။

၂ ၽြႃးပဵၼ်ၸဝ်ႈဢမ်ႇပႄႇပႅတ်ႈၵူၼ်းမၼ်းၸဝ်ႈဢၼ်မၼ်းၸဝ်ႈႁူႉၸဵမ်မိူဝ်ႈဢွၼ်ၼႆႉၼၼ်ႉ။ၸွင်ႇသူဢမ်ႇႁူႉလွင်ႈဢၼ်ပႃးၼႂ်းၵျၢမ်းလိၵ်ႈဢၼ်လၢတ်ႈလွင်ႈဢေးလိယဢၼ်မၼ်းယူႇၽၢႆႇၼိုင်ႈတင်းၵူၼ်းမဵဝ်းဢိသရေႇလသေလႄႈလဝ်ႈလၢတ်ႈၵႃႈတီႈၽြႃးပဵၼ်ၸဝ်ႈလႄႈဝႃႈ၊-

၃ ဢူဝ်း၊ထႃႇဝရႃႉၽြႃး၊ၶဝ်ဢဝ်ပရေႃးၽႅတ်ႈၸဝ်ႈႁဝ်းတင်းလၢႆတၢႆပႅတ်ႈၶႃႈယဝ်ႉ။ယိတ်ႉပလၢင်ႇၸဝ်ႈႁဝ်းတင်းလၢႆၵေႃႈၶဝ်ၵိူၼ်ႇယႃႉပႅတ်ႈတီႈၶႃႈယဝ်ႉ။ၵိုတ်းၵျၢၼ်ႇဝႆႉၵဝ်ၶႃႈၵေႃႉလဵဝ်ၵူၺ်းလႄႈၶဝ်ယင်းဢွၼ်ၵၼ်ၵျၢမ်ႇႁႃႁႂ်ႈလႆႈဢဝ်ၵဝ်ၶႃႈတၢႆၶႃႈဢေႃႈ၊ဝႃႈၼင်ႇၼႆၼၼ်ႉႁိုဝ်။

၄ မၼ်းၸဝ်ႈသမ်ႉဝႆႉပျႃႇတိၵ်ႈၸိူဝ်ႉၼင်ႇႁိုဝ်ဝႃႈၼႆၸမ်း၊-ၵူၼ်းၸဵတ်းႁဵင်ဢၼ်ဢမ်ႇၶုပ်ႉၶဝ်ႇၵႃႈတီႈၽၢႆႇၼႃႈၽြႃးပႃႇလၼၼ်ႉၵဝ်ႁႂ်ႈၵိုတ်းၵျၢၼ်ႇဝႆႉပုၼ်ႈၵဝ်ယဝ်ႉ၊ဝႃႈၼင်ႇၼႆဢေႃႈ။

၅ မိူၼ်ၼင်ႇၼၼ်ၼႂ်းၶိင်ႇၵႃႇလႃႉတေႃႈလဵဝ်ၼႆႉၵေႃႈတၢင်းဢၼ်ၵိုတ်းဢၼ်ၵျၢၼ်ႇဢၼ်မၼ်းၸဝ်ႈလိူၵ်ႈၵဵပ်းဢဝ်ၵွပ်ႈပိူဝ်ႈၵျေးၸူးၸဝ်ႈၼၼ်ႉယင်းမီးယူႇဢေႃႈ။

၆ ပေႃးပဵၼ်ၵွပ်ႈပိူဝ်ႈၵျေးၸူးၸဝ်ႈၸိုင်ဢမ်ႇၸႂ်ႈၵွပ်ႈပိူဝ်ႈတၢင်းၵမ်တၢင်းၵျၢင်ႉဢၼ်တူဝ်ၸဝ်ႈၵဝ်ႇၵမ်ၵျၢင်ႉၼၼ်ႉပေႃးဢမ်ႇၼၼ်ၵျေးၸူးၸဝ်ႈၼၼ်ႉတၵ်းဢမ်ႇၸႂ်ႈၵျေးၸူးယဝ်ႉ။

၇ ပေႃးပဵၼ်ၼႆသမ်ႉပဵၼ်ၸိူဝ်ႉၼင်ႇႁိုဝ်။ၵူၼ်းဢိသရေႇလတင်းလၢႆဢမ်ႇထူပ်းဢမ်ႇႁၼ်ဢၼ်ၶဝ်ႁႃၼၼ်ႉ။ၶဝ်ၸိူဝ်းဢၼ်မၼ်းၸဝ်ႈလိူၵ်ႈၵဵပ်းဢဝ်ၼၼ်ႉၵူၺ်းထူပ်းႁၼ်ဢေႃႈ။ၶဝ်ၸိူဝ်းဢၼ်ၵိုတ်းၵျၢၼ်ႇၼၼ်ႉမီးၸႂ်ၵႅၼ်ႇၶႅင်ယူႇဢေႃႈ။

၈ မိူၼ်ၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊-ၽြႃးပဵၼ်ၸဝ်ႈပၼ်ၸႂ်သၽေႃးဢၼ်ၶႂ်ႈလပ်းၶႂ်ႈၼွၼ်းမၢၵ်ႇတႃဢၼ်ဢမ်ႇႁၼ်လႆႈႁူဢၼ်ဢမ်ႇငိၼ်းလႆႈၼၼ်ႉတီႈၶဝ်ႁၢၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ၊ဝႃႈၼင်ႇၼႆဢေႃႈ။

၉ ၵႂၢမ်းဢၼ်တႃႇဝိတ်ႉဝႃႈဝႆႉၸမ်း၊-ႁႂ်ႈၽိူၼ်တီႈၵိၼ်ၶဝ်ၼၼ်ႉပဵၼ်ႁဵဝ်ႉၶိုမ်းပုၼ်ႈၶဝ်၊ပဵၼ်တၢင်းဢၼ်တိူဝ်ႉမႅၼ်ႈလႄႈလူမ်ႉ၊တၢင်းဢၼ်ၸီႇယၢင်ႇဢပျႅတ်ႈဢၼ်ၶဝ်ထိူၵ်ႈၶၢမ်ႇၼၼ်ႉသေၵမ်းလူၺ်ႈ။

၁၀ ႁႂ်ႈမၢၵ်ႇတႃၶဝ်လပ်းၵႂႃႇထၼ်ႈပေႃးဢမ်ႇႁၼ်လႆႈသေၵမ်းလူၺ်ႈ။လင်ၶဝ်ၵေႃႈႁႂ်ႈၵွမ်းယူႇသေႇသေႇသေၵမ်းလူၺ်ႈ၊ဝႃႈၼင်ႇၼႆဢေႃႈ။

တၢင်းၵႄႇၶျွတ်ႈပုၼ်ႈၵူၼ်းဢိသရေႇလၵၼ်ႈၼႃႈ

၁၁ ၵဝ်ထၢမ်ထႅင်ႈၸမ်းပေႃးပဵၼ်ၸိူဝ်ႉၼင်ႇၼႆၸိုင်ၵူၼ်းဢိသရေႇလတင်းလၢႆၼၼ်ႉၶီႈလိုတ်းလႄႈလူမ်ႉတေႃႇပေႃးဢမ်ႇၸၢင်ႊလုၵ်ႉယဝ်ႉႁိုဝ်။ဢမ်ႇၸႂ်ႈၸိူဝ်ႉၼင်ႇၼၼ်။ၵွပ်ႈပိူဝ်ႈတၢင်းဢၼ်ၶဝ်ပူၼ်ႉလိူဝ်ၼၼ်ႉတၢင်းၵႄႇၶျွတ်ႈလႆႈႁွတ်ႈထိုင်မႃးတီႈၵူၼ်းတၢင်ႇၸိူဝ်ႉတၢင်ႇၶိူဝ်းလႄႈႁဵတ်းႁႂ်ႈၶဝ်မီးတၢင်းဢၼ်ၶွႆပိူၼ်ႈဢေႃႈ။

၁၂ ပေႃးတၢင်းဢၼ်ၶဝ်ပူၼ်ႉလိူဝ်ၼၼ်ႉပဵၼ်တၢင်းမၢၵ်ႈမီးပုၼ်ႈၵူၼ်းလေႃးၵီႇတင်းလၢႆလႄႈတၢင်းဢၼ်ၶဝ်သုမ်းၼၼ်ႉပဵၼ်တၢင်းမၢၵ်ႈမီးပုၼ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၸိုင်၊မိူဝ်ႈဢၼ်တဵမ်ထူၼ်ႈၼၼ်ႉတၢင်းမၢၵ်ႈမီးၶဝ်ယိင်ႈၶႅၼ်းတၵ်းယႂ်ႇၼႃႇဢမ်ႇၸႂ်ႈႁိုဝ်။

၁၃ ၵဝ်လၢတ်ႈထိုင်တီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။ၵွပ်ႈပိူဝ်ႈၵဝ်ပဵၼ်တမၢၼ်ႇၸဝ်ႈဢၼ်ၸၢပ်ႈသႅင်ႇၵၼ်တင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉလႄႈၵဝ်လႆႈႁဵတ်းယႂ်ႇႁဵတ်းလူင်ဢေႃႈ။

၁၄ ၵဝ်မုင်မွင်းတၵ်းလႆႈပဵၼ်တၢင်းဢၼ်ႁဵတ်းႁႂ်ႈၶဝ်ၸိူဝ်းဢၼ်ပဵၼ်ၸိူဝ်ႉၶိူဝ်းၵဝ်ၼၼ်ႉလႆႈၶွႆသေယဝ်ႉလႆႈတၢင်းၵႄႇၶျွတ်ႈဢဝ်ၵမ်ႈၽွင်ႈၸိုင်ၵဝ်ၸင်ႇလႆႈဝႃႈဢေႃႈ။

၁၅ ပေႃးတၢင်းဢၼ်မၼ်းၸဝ်ႈပႄႇပႅတ်ႈၶဝ်ၼၼ်ႉပဵၼ်လွင်ႈတၢင်းဢၼ်ႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းၵူၼ်းလေႃးၵီႇတင်းလၢႆၸိုင်တၢင်းဢၼ်မၼ်းၸဝ်ႈတၵ်းၶိုၼ်းႁပ်ႉတုင်းဢဝ်ၶဝ်ၼၼ်ႉတၵ်းပဵၼ်ၸိူဝ်ႉၼင်ႇတၢင်းဢၼ်လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉဢမ်ႇၸႂ်ႈႁိုဝ်။

၁၆ ပေႃးၶဝ်ႈမုၼ်းလိပ်းဢၼ်ၼူတ်ႈဢွၼ်တၢင်းၼၼ်ႉမူတ်းၸၢင်ႇၸိုင်၊တၵ်းမူတ်းၸၢင်ႇတင်းၵွင်ႊဢေႃႈ။ပေႃးႁၢၵ်ႈမၼ်းမူတ်းၸၢင်ႇၸိုင်ၵိင်ႇမၼ်းၶႃႊမၼ်းတင်းလၢႆၵေႃႈတၵ်းမူတ်းၸၢင်ႇဢေႃႈ။

၁၇ ပေႃးၵိင်ႇမၼ်းၶႃႊမၼ်းၵမ်ႈၽွင်ႈႁၵ်းယဝ်ႉလႄႈသမ်ႉဢဝ်ၵိင်ႇသၼ်ႇလုၼ်ႇဢၼ်မီးပၵတိလိူင်းၵႅမ်းဢၼ်ပဵၼ်သူၼၼ်ႉၽုၵ်ႇသိုပ်ႇသႂ်ႇၵႃႈတီႈတေႃသၼ်ႇလုၼ်ႇၼၼ်ႉလႄႈႁႂ်ႈလႆႈၵိၼ်ဢေႃးၸႃႇတူၼ်ႈသၼ်ႇလုၼ်ႇၼၼ်ႉၸိုင်သူယႃႇပေဢုပ်ႇဝၢဝ်းမူင်မႅၼ်သေႉသွမ်းတီႈၵိင်ႇမၼ်းၶႃႊမၼ်းဢၼ်ႁၵ်းၵႂႃႇၸိူဝ်းၼၼ်ႉ။

၁၈ ပေႃးဢုပ်ႇဝၢဝ်းမူင်မႅၼ်ၸိုင်သူထုၵ်ႇလီၶုၵ်းၸႂ်လႆႈလွင်ႈဢၼ်ဝႃႈ၊ႁၢၵ်ႈဢမ်ႇဢိင်သူ။သူဢိင်ႁၢၵ်ႈဢေႃႈ။ပေႃးသူၶိုၼ်းလၢတ်ႈလႄႈဝႃႈ၊-

၁၉ ၵိင်ႇမၼ်းၶႃႊမၼ်းၸိူဝ်းၼၼ်ႉၶၢမ်ႇတၢင်းဢၼ်ႁၵ်းပႅတ်ႈႁႂ်ႈလႆႈဢဝ်ႁဝ်းၽုၵ်ႇသိုပ်ႇသႂ်ႇယဝ်ႉဝႃႈၼင်ႇၼႆၸိုင်ၸႂ်ႈယဝ်ႉ။

၂၀ ပိူဝ်ႈဢၼ်ၶဝ်ၼၼ်ႉဢမ်ႇမီးၸႂ်ဢၼ်ယုမ်ႇမၢတ်ႈလႄႈၶဝ်လႆႈၶၢမ်ႇတၢင်းဢၼ်ႁၵ်းပႅတ်ႈဢေႃႈ။သူၸမ်းတႄႇယူႇၵွပ်ႈပိူဝ်ႈတၢင်းယုမ်ႇမၢတ်ႈၵူၺ်းဢေႃႈ။

၂၁ ယႃႇပေႁႂ်ႈမီးၸႂ်ဢၼ်သုင်။ႁႂ်ႈမီးၸႂ်ဢၼ်ၵူဝ်ႁႄတႃႉ။လွင်ႈမၼ်းၸမ်း၊ပေႃးၽြႃးပဵၼ်ၸဝ်ႈယင်းဢမ်ႇသေလၢႆၵိင်ႇမၼ်းၸဝ်ႈၸိုင်သူၵေႃႈမၼ်းၸဝ်ႈတၵ်းဢမ်ႇသေလၢႆ။

၂၂ ၵွပ်ႈႁွႆးၼႆႉလႄႈၶုၵ်းၸႂ်လႆႈၶႆႈၸႂ်ထူပ်းၵျေးၸူးမၼ်းၸဝ်ႈဢိၵ်ႇတင်းတၢင်းဢၼ်ၽြႃးပဵၼ်ၸဝ်ႈၸီႇယၢင်ႇဢၼ်ႁႅင်းယႂ်ႇၼႃႇတင်းသွင်ပႃးၼၼ်ႉတႃႉ။တီႈၶဝ်ၸိူဝ်းဢၼ်လူမ်ႉၼၼ်ႉပဵၼ်တၢင်းဢၼ်မၼ်းၸဝ်ႈၸီႇယၢင်ႇႁႅင်းယႂ်ႇၼႃႇဢေႃႈ။ပေႃးသူတႄႇယူႇၼႂ်းၵျေးၸူးၸဝ်ႈၸိုင်တီႈသူၼႆႉပဵၼ်ၵျေးၸူးၸဝ်ႈဢေႃႈ။ပေႃးဢမ်ႇၼၼ်သူၵေႃႈတၵ်းလႆႈၶၢမ်ႇတၢင်းဢၼ်တႅပ်းၽၼ်းပႅတ်ႈဢေႃႈ။

၂၃ ပေႃးၶဝ်ယင်းဢမ်ႇႁႂ်ႈၸႂ်ဢၼ်ဢမ်ႇယုမ်ႇမၢတ်ႈၶဝ်ၼၼ်ႉတူႈဢမ်ႈၵႅၼ်ႇၶႅင်ၸိုင်ၶဝ်တၵ်းလႆႈဢၶႂၢင်ႉဢၼ်ၶိုၼ်းၽုၵ်ႇသိုပ်ႇသႂ်ႇၵႃႈတီႈတူၼ်ႈဢေႃႈ။ၽြႃးပဵၼ်ၸဝ်ႈတတ်ႈၼိုင်ႇလႆႈႁႂ်ႈလႆႈဢဝ်ၶဝ်ၶိုၼ်းၽုၵ်ႇသိုပ်ႇသႂ်ႇယူႇဢေႃႈ။

၂၄ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်းပေႃးတႅပ်းၽၼ်းပႅတ်ႈသူသေၵႃႈတီႈတူၼ်ႈသၼ်ႇလုၼ်ႇဢၼ်မီးပၵတိလိူင်းၵႅမ်းၼၼ်ႉလႄႈၶိုၼ်းဢဝ်ၵိင်ႇပၵတိမၼ်းၽုၵ်ႇသိုပ်ႇသႂ်ႇၵႃႈတီႈတူၼ်ႈသၼ်ႇလုၼ်ႇဢၼ်လီၼၼ်ႉၸိုင်ၶဝ်ၸိူဝ်းဢၼ်ပဵၼ်ၵိင်ႇပၵတိဢၼ်လီၼၼ်ႉယဵင်ႈၶႅၼ်းတၵ်းလႆႈဢၶႂၢင်ႉဢဝ်ၽုၵ်ႇသိုပ်ႇသႂ်ႇၵႃႈတီႈတူၼ်ႈသၼ်ႇလုၼ်ႇတူဝ်ၸဝ်ႈၵဝ်ႇၼၼ်ႉဢမ်ႇၸႂ်ႈႁိုဝ်။

၂၅ ပီႈၼွင်ႉၶဝ်ဢိူၺ်း၊ၵဝ်ဢမ်ႇၶႂ်ႈႁႂ်ႈသူယင်းဢမ်ႇႁူႉလွင်ႈတၢင်းဢၼ်လိုၵ်ႉဢၼ်လမ်ႇၼႆႉ။ယႃႇပေမီးၸႂ်ပႅၼ်သုင်။ၵူၼ်းဢိသရေႇလၶဝ်လႆႈမီးတၢင်းဢၼ်ၵႅၼ်ႇၶႅင်တေႃႇထိုင်ႁွတ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၶဝ်ႈထိုင်မႃးမူတ်းၼၼ်ႉဢေႃႈ။

၂၆ ၼင်ႇၼၼ်လႄႈၵူၼ်းဢိသရေႇလတင်းသဵင်ႈတင်းလူင်တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်မႅၼ်ႈၼင်ႇဢၼ်မႃးၼႂ်းၵျၢမ်းလိၵ်ႈၼၼ်ႉလႄႈဝႃႈ၊-ၸဝ်ႈဢၼ်ပွႆႇလွတ်ႈၼၼ်ႉတၵ်းပေႃႇမႃးၵႃႈၼိူဝ်လွႆၸိဢုၼ်ႇလႄႈဢဝ်လွင်ႈတၢင်းဢၼ်ဢမ်ႇတြႃးဝေႈဢွၵ်ႇပႅတ်ႈသေၵႃႈၼႂ်းၵူၼ်းၸိူဝ်ႉၶိူဝ်းယႃႇၵုပ်ႉဢေႃႈ။

၂၇ မိူဝ်ႈဢၼ်ၵဝ်ပွႆႇလွတ်ႈဢပျႅတ်ႈၶဝ်ၼၼ်ႉၸိုင်ပဵၼ်ပတိၺိၺ်ႇတြႃးဢၼ်ၵဝ်ပၼ်တီႈၶဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။

၂၈ ၵွပ်ႈပိူဝ်ႈတြႃးသတၢင်းသိူဝ်ႈပျေႃႇၼၼ်ႉၶဝ်ပဵၼ်ရၢၼ်ႇသူႇၽြႃးပဵၼ်ၸဝ်ႈပုၼ်ႈဢၵျူဝ်းသူဢေႃႈ။ၵွပ်ႈပိူဝ်ႈတၢင်းဢၼ်လိူၵ်ႈၵဵပ်းဢဝ်ၼၼ်ႉၶဝ်ပဵၼ်ၵေႃႉႁၵ်ႉၽြႃးပဵၼ်ၸဝ်ႈၵွပ်ႈပိူဝ်ႈပူႇမွၼ်ႇၶဝ်တင်းလၢႆၼၼ်ႉဢေႃႈ။

၂၉ လွင်ႈမၼ်းၸမ်ၵျေးၸူးတၢင်းဢၼ်ၽြႃးပဵၼ်ၸဝ်ႈဢိတ်းလူပၼ်၊ဢိၵ်ႇတင်းတၢင်းဢၼ်မၼ်းၸဝ်ႈႁွင်ႉဢဝ်ၼၼ်ႉဢမ်ႇမီးတၢင်းဢၼ်ၶိုၼ်းၽွၵ်ႈပျၢၼ်ႇ။

၃၀ မိူဝ်ႈဢွၼ်ၼၼ်ႉသူယင်းဢမ်ႇထွမ်ႇဢဝ်ၵႂၢမ်းၽြႃးပဵၼ်ၸဝ်ႈသေၵေႃႈတေႃႈလဵဝ်ၼႆႉလႆႈၶၢမ်ႇတၢင်းဢၼ်မၼ်းၸဝ်ႈဢိတ်းလူၵွပ်ႈပိူဝ်ႈတၢင်းဢၼ်ၶဝ်ဢမ်ႇထွမ်ႇဢဝ်ၼၼ်ႉဢေႃႈ။

၃၁ မိူၼ်ၼင်ႇၼၼ်ၶဝ်ၵေႃႈၼင်ႇႁိုဝ်တၵ်းလႆႈၶၢမ်ႇတၢင်းဢၼ်မၼ်းၸဝ်ႈဢိတ်းလူၸိူဝ်ႉၼင်ႇဢၼ်သူလႆႈၶၢမ်ႇတၢင်းဢၼ်မၼ်းၸဝ်ႈဢိတ်းလူၼၼ်ႉၸိုင်ၶဝ်ဢမ်ႇထွမ်ႇဢဝ်လႄႈယူႇဢေႃႈ။

၃၂ ၼင်ႇႁိုဝ်တၵ်းမီးဢၶႂၢင်ႉတၢင်းဢၼ်ဢိတ်းလူၵူၼ်းၵႃႈမီးတင်းသဵင်ႈတင်းလူင်ၼၼ်ႉၸိုင်၊ၽြႃးပဵၼ်ၸဝ်ႈဢဝ်ၶဝ်ၶျူၵ်ႈဝႆႉၼႂ်းတၢင်းဢၼ်ဢမ်ႇထွမ်ႇဢမ်ႇဢဝ်ၼၼ်ႉဢေႃႈ။

၃၃ ၺၢၼ်ႇတင်းပိင်ႇၺႃႇၽြႃးပဵၼ်ၸဝ်ႈလိုၵ်ႉလမ်ႇယႂ်ႇၵႂၢင်ႈၼႃႇလူင်လၢင်လူင်ပေႇ။

တၢင်းဢၼ်မၼ်းၸဝ်ႈၸီႇယၢင်ႇတင်းလၢႆၼၼ်ႉၸႅတ်ႈထၢမ်လႄႈဢမ်ႇသဵင်ႈလႆႈ။သဵၼ်ႈတၢင်းဢၼ်မၼ်းၸဝ်ႈၵႂႃႇတင်းလၢႆၼၼ်ႉၵေႃႈႁႃလႄႈဢမ်ႇႁူႉဢမ်ႇထိုင်လႆႈ။

၃၄ ၽူႈလႂ်ႁူႉၸႂ်ထႃႇဝရႃႉၽြႃး။ၽူႈလႂ်ယၢမ်ႈလႆႈႁဵတ်းၵေႃႉႁဵတ်းသေႈဢၼ်တိူင်ႇပၢင်ႇႁူမ်ႈၵၼ်တင်းမၼ်းၸဝ်ႈ။

၃၅ ၼင်ႇႁိုဝ်မၼ်းၸဝ်ႈတၵ်းလႆႈတွပ်ႇတႅၼ်းၶိုၼ်းၵျေးၸူးၸိုင်ၽူႈလႂ်ယၢမ်ႈလႆႈႁဵတ်းၵျေးၸူးတီႈမၼ်းၸဝ်ႈ။

၃၆ ၵႃႈဢၼ်မီးတင်းသဵင်ႈတင်းလူင်ပဵၼ်မႃးၵႃႈၼႂ်းမၼ်းၸဝ်ႈ၊ပဵၼ်မႃးၵွပ်ႈပိူဝ်ႈမၼ်းၸဝ်ႈပဵၼ်မႃးပုၼ်ႈမၼ်းၸဝ်ႈဢေႃႈ။ႁႂ်ႈမူၼ်ၽုင်းၸဝ်ႈယႂ်ႇၼႃႇၵူႈၵမ်ႇၽႃႇသိုပ်ႇသိုပ်ႇတၢမ်ႈတၢမ်ႈသေၵမ်းလူၺ်ႈ။ဢႃႈမိၼ်ႈ။