Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၂၀ 

ဢမ်ႇယုမ်ႇဢႃႇၼႃႇတၼ်းၶူဝ်းၸဝ်ႈယေႇသု

၁ ၼႂ်းဝၼ်းဝၼ်းၼိုင်ႈမိူဝ်ႈဢၼ်မၼ်းၸဝ်ႈသင်ႇသွၼ်သုင်းမႃႉႁေႃးလၢတ်ႈတြႃးသတၢင်းသိူဝ်းပျေႃႇပၼ်တီႈၵူၼ်းတင်းလၢႆယူႇၵႃႈၼႂ်းပိၵ်ႉမၢၼ်ႇၸဝ်ႈၼၼ်ႉၸိုင်ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆမႃးတီႈမၼ်းၸဝ်ႈလႄႈလဝ်ႈထၢမ်လႄႈဝႃႈ၊-

၂ ၸဝ်ႈႁဝ်းဢဝ်တင်းဢၶႂၢင်ႉဢၼ်လႂ်လႄႈႁဵတ်းလွင်ႈတၢင်းၸိူဝ်းၼႆႉၶႃႈ။ၽူႈလႂ်ပၼ်ဢၶႂၢင်ႉၶႃႈ။ၶႅၼ်းတေႃႈလၢတ်ႈပၼ်တီႈႁဝ်းၶႃႈသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊

၃ မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-ၵဝ်တၵ်းထၢမ်သေၸိူဝ်ႉသေပိူင်တီႈသူလူးၵွၼ်ႇဢေႃႈ။သူၶိုၼ်းလၢတ်ႈတႃႉ။

၄ ပပ်ႉတိၸၢမ်ႇယုဝ်းႁၢၼ်ႇၼၼ်ႉပဵၼ်မႃးၵႃႈတီႈၵၢင်ႁၢဝ်ႁိုဝ်၊ပဵၼ်မႃးၵႃႈတီႈၵူၼ်းႁိုဝ်၊ဝႃႈၼင်ႇၼႆဢေႃႈ။

၅ ၶဝ်ၼၼ်ႉၵေႃႈၽွမ်ႉၵၼ်ၶႆႈၸႂ်ဝႃႈ၊-ပေႃးႁဝ်းဝႃႈပဵၼ်မႃးၵႃႈတီႈၵၢင်ႁၢဝ်ဢေႃႈ၊ဝႃႈၼႆၸိုင်မၼ်းၸဝ်ႈသမ်ႉတၵ်းထၢမ်ဝႃႈ၊-ပေႃးၼႆႁဵတ်းသင်သူဢမ်ႇယုမ်ႇမၢတ်ႈမၼ်း၊ဝႃႈၼႆယူႇယဝ်ႉ။

၆ ပေႃးႁဝ်းဝႃႈပဵၼ်မႃးၵႃႈတီႈၵူၼ်းဝႃႈၼႆၸိုင်ၵူၼ်းတင်းသဵင်ႈတင်းလူင်တၵ်းဢဝ်မၢၵ်ႇႁိၼ်ထိမ်ႈႁဝ်းဢိူဝ်း။လွင်ႈမၼ်းၸမ်းၵူၼ်းတင်းလၢႆယုမ်ႇလွင်ႈဢၼ်ဝႃႈယုဝ်းႁၢၼ်ႇပဵၼ်ပရေႃးၽႅတ်ႈဢေႃႈ။

၇ ၵႂပ်ႈၼႆလႄႈၶဝ်ၵေႃႈၶိုၼ်းလၢတ်ႈလႄႈဝႃႈ၊-လွင်ႈဢၼ်ပဵၼ်မႃးၵႃႈတီႈလႂ်ၼၼ်ႉႁဝ်းၶႃႈဢမ်ႇႁူႉၶႃႈ၊ဝႃႈၼင်ႇၼႆဢေႃႈ။

၈ ၸဝ်ႈယေႇသုၵေႃႈလၢတ်ႈလႄႈဝႃႈ၊-လွင်ႈဢၼ်ၵဝ်ဢဝ်တင်းဢၶႂၢင်ႉဢၼ်လႂ်လႄႈႁဵတ်းလွင်ႈတၢင်းၸိူဝ်းၼႆႉဢၼ်ဝႃႈၼၼ်ႉၵေႃႈၵဝ်ဢမ်ႇလၢတ်ႈသူဝႃႈၼင်ႇၼႆဢေႃႈ။

ဢူႉပမႃႇၵူၼ်းၶၢတ်ႈႁဵတ်းသူၼ်

၉ မိူဝ်ႈၼၼ်ႉမၼ်းၸဝ်ႈလၢတ်ႈၵႂၢမ်းဢူႉပမႃႇတီႈပရိၵ်ႈသၢတ်ႈတင်းလၢႆလႄႈဝႃႈၸမ်း၊-ၵူၼ်းၵေႃႉၼိုင်ႈမၼ်းၽုၵ်ႇသွမ်ႈသူၼ်မၢၵ်ႇၸပိတ်ႉသေယဝ်ႉၶၢတ်ႈသူၼ်ၼၼ်ႉပၼ်တီႈၶဝ်ၸိူဝ်းဢၼ်ႁဵတ်းသူၼ်တင်းလၢႆၼၼ်ႉသေလႄႈၵႂႃႇယူႇတၢင်ႇဝၢၼ်ႈတၢင်ႇမိူင်းႁိုင်ၼႃႇဢေႃႈ။

၁၀ မိူဝ်ႈဢၼ်ၶိင်ႇဢၼ်ပိတ်းမၢၵ်ႇႁွတ်ႈထိုင်ၼၼ်ႉၸိုင်မၼ်းပွႆႇၸႂ်ႉၵူၼ်းဢွၼ်ႇမၼ်းၵႂႃႇၵႃႈတီႈၵူၼ်းၶၢတ်ႈႁဵတ်းသူၼ်ၸိူဝ်းၼၼ်ႉႁႂ်ႈလႆႈဢဝ်မၢၵ်ႇၸပိတ်ႉၵမ်ႈၽွင်ႈဢေႃႈ။ၵူၺ်းၵႃႈၶဝ်ၸိူဝ်းဢၼ်ၶၢတ်ႈႁဵတ်းသူၼ်ၸိူဝ်းၼၼ်ႉပေႃႉယႅၼ်ႉၵူၼ်းဢွၼ်ႇၼၼ်ႉသေလႄႈပွႆႇပႅတ်ႈတိၼ်လၢႆမိုဝ်းပဝ်ႇဢေႃႈ။

၁၁ လိုၼ်းၼၼ်ႉမၼ်းသမ်ႉပွႆႇၸႂ်ႉၵူၼ်းဢွၼ်ႇတၢင်ႇၵေႃႉၵႂႃႇထႅင်ႈဢေႃႈ။ၶဝ်ၸိူဝ်းဢၼ်ၶၢတ်ႈႁဵတ်းသူၼ်ၸိူဝ်းၼၼ်ႉၵေႃႈပေႃႉယႅၼ်ႉမၼ်းသေယဝ်ႉယႃႉသရေႇမၼ်းယဝ်ႉၸင်ႇပွႆႇပႅတ်ႈမၼ်းတိၼ်လၢႆမိုဝ်းပဝ်ႇဢေႃႈ။

၁၂ လိုၼ်းၼၼ်ႉမၼ်းသမ်ႉပွႆႇၸႂ်ႉၵူၼ်းဢွၼ်ႇတၢင်ႇၵေႃႉၵႂႃႇထႅင်ႈဢေႃႈ။ၶဝ်ၼၼ်ႉၵေႃႈပေႃႉယႅၼ်ႉမၼ်းလႄႈႁႂ်ႈႁွႆးတၢမ်ႇႁွႆးၶွၼ်ႉမီးၼမ်ၼႃႇသေယဝ်ႉႁေႃႈမၼ်းဢွၵ်ႇပႅတ်ႈဢေႃႈ။

၁၃ မိူဝ်ႈၼၼ်ႉၸဝ်ႈသူၼ်ၵေႃႈလၢတ်ႈလႄႈဝႃႈ၊-ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်။ၵဝ်တၵ်းပွႆႇၸႂ်ႉလုၵ်ႈၸၢႆးဢၼ်ၵဝ်ႁၵ်ႉၼႃႇၼၼ်ႉၵႂႃႇဢေႃႈ။မိူဝ်ႈဢၼ်ၶဝ်ႁၼ်မၼ်းၼၼ်ႉၶဝ်ၸၢင်ႊၶေးရူဝ်ႇသေႇမၼ်းယူႇဢိူဝ်ႈ၊ဝႃႈၼင်ႇၼႆဢေႃႈ။

၁၄ ၶဝ်ၸိူဝ်းဢၼ်ႁဵတ်းသူၼ်ၸိူဝ်းၼၼ်ႉမိူဝ်ႈဢၼ်ႁၼ်လုၵ်ႈၸၢႆးမၼ်းမႃးၼၼ်ႉၸိုင်ၶဝ်ၵေႃႉၼိုင်ႈလႄႈၵေႃႉၼိုင်ႈတိူင်ႇပၢင်ႇလၢတ်ႈၸႃၵၼ်လႄႈဝႃႈ၊-ၵေႃႉၼႆႉပဵၼ်ၵေႃႉဢၼ်တၵ်းၶၢမ်ႇဢမူၺ်ႇပေႃႈမၼ်းဢိူဝ်ႈ။မႃးလႄႈဢဝ်မၼ်းတၢႆတႃႉႁဝ်း။ပေႃးႁဵတ်းၸိူဝ်ႉၼႆၸိုင်ႁဝ်းတၵ်းလႆႈဢမူၺ်ႇမၼ်းယူႇဢိူဝ်ႈ၊ဝႃႈၼင်ႇၼႆသေယဝ်ႉ၊ၶဝ်ဢဝ်မၼ်းဢွၵ်ႇၵႃႈတီႈၼွၵ်ႈသူၼ်သေယဝ်ႉဢဝ်မၼ်းတၢႆပႅတ်ႈဢေႃႈ။

၁၅ ပေႃးပဵၼ်ၸိူဝ်ႉၼင်ႇၼၼ်ၸိုင်ၸဝ်ႈသူၼ်ၼၼ်ႉတၵ်းႁဵတ်းတီႈၶဝ်ၸိူဝ်းဢၼ်ၶၢတ်ႈႁဵတ်းသူၼ်ၸိူဝ်းၼၼ်ႉၸိူဝ်ႉၼင်ႇႁိုဝ်။

၁၆ မၼ်းတၵ်းမႃးလႄႈယႃႉၽဵဝ်ႈပႅတ်ႈၶဝ်ၸိူဝ်းဢၼ်ၶၢတ်ႈႁဵတ်းသူၼ်ၼၼ်ႉသေယဝ်ႉတၵ်းဢဝ်သူၼ်ၼၼ်ႉပၼ်တီႈပိူၼ်ႈတၢင်ႇၵေႃႉဢေႃႈ၊ဝႃႈၼႆမၼ်းၸဝ်ႈဝႃႈၼင်ႇၼႆဢေႃႈ။ပရိၵ်ႈသၢတ်ႈၸိူဝ်းၼၼ်ႉငိၼ်းသေယဝ်ႉလဝ်ႈလၢတ်ႈလႄႈဝႃႈ၊-ယႃႇႁႂ်ႈပဵၼ်ၸိူဝ်ႉၼင်ႇၼၼ်သေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈတူၺ်းၶဝ်သေလႄႈလၢတ်ႈဝႃႈ၊-

၁၇ ၵျၢမ်းလိၵ်ႈဢၼ်ဝႃႈ၊-မၢၵ်ႇႁိၼ်ဢၼ်ၶဝ်ၸိူဝ်းဢၼ်ႁဵတ်းတိူၵ်ႈပႅတ်ႈဝႆႉၼၼ်ႉၵမ်းလိုၼ်းသမ်ႉပဵၼ်မၢၵ်ႇႁိၼ်ႁူဝ်ၸဵင်ႇတိူၵ်ႈဢေႃႈ၊ဢၼ်ဝႃႈၼၼ်ႉၶႂ်ႈဝႃႈပွင်ႇၸိူဝ်ႉၼင်ႇႁိုဝ်။

၁၈ ၽူႈလႂ်သေဢမ်ႇဝႃႈၵေႃႉဢၼ်တူၵ်းသႂ်ႇၵႃႈၼိူဝ်မၢၵ်ႇႁိၼ်ၼၼ်ႉၵေႃႉၼၼ်ႉတၵ်းႁၵ်းဢေႃႈ။ၵႃႈၼိူဝ်ၽူႈလႂ်သေဢမ်ႇဝႃႈဢၼ်မၢၵ်ႇႁိၼ်ၼၼ်ႉတူၵ်းသႂ်ႇၼၼ်ႉၵေႃႉၼၼ်ႉတၵ်းလႅဝ်ပဵၼ်မုၼ်ႈပဵၼ်ၽွင်ၵႂႃႇဢေႃႈ၊ဝႃႈၼင်ႇၼႆဢေႃႈ။

၁၉ မိူဝ်ႈၼၼ်ႉယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းလၢႆၸိူဝ်းၼၼ်ႉၵွပ်ႈပိူဝ်ႈၶဝ်ႁူႉလွင်ႈဢၼ်မၼ်းၸဝ်ႈဢဝ်ၵႂၢမ်းဢူႉပမႃႇၼႆႉႁေႃးလၢတ်ႈၶိတ်ႉၶဝ်ၼၼ်ႉလႄႈၶဝ်ၵျၢမ်ႇႁႃႁႂ်ႈလႆႈတီႉဢဝ်မၼ်းၸဝ်ႈဢေႃႈ။ၼႂ်းဝႃႈၼၼ်သေၵေႃႈၶဝ်ၵူဝ်ၵူၼ်းတင်းလၢႆဢေႃႈ။

တၢင်းဢၼ်ပၼ်ၶွၼ်ႇၶုၼ်

၂၀ မိူဝ်ႈၼၼ်ႉၶဝ်လွမ်တူၺ်းမၼ်းၸဝ်ႈယူႇလႄႈပွႆႇၸႂ်ႉၵူၼ်းၽၢႆႇၼႂ်းဢၼ်ႁဵတ်းၼင်ႇႁၢင်ႊပဵၼ်ၵူၼ်းသိုဝ်ႈတေႃႇၼၼ်ႉၵႂႃႇၵႃႈတီႈမၼ်းၸဝ်ႈႁႂ်ႈလႆႈႁႃဢပျႅတ်ႈၼႂ်းၵႂၢမ်းမၼ်းၸဝ်ႈလႄႈဢဝ်မၼ်းၸဝ်ႈဢၢပ်ႈပၼ်ၵႃႈၼႂ်းမိုဝ်းၶုၼ်ဝဵင်းတင်းၶုၼ်မိူင်းတင်းလၢႆၼၼ်ႉဢေႃႈ။

၂၁ ၶဝ်လဝ်ႈလၢတ်ႈလႄႈဝႃႈ၊-သြႃႇၸဝ်ႈ၊ႁဝ်းၶႃႈႁူႉလွင်ႈဢၼ်ၸဝ်ႈႁဝ်းသင်ႇသွၼ်သုင်းမႃႉပၼ်သိုဝ်ႈသိုဝ်ႈတေႃႇတေႃႇလွင်ႈဢၼ်ၸဝ်ႈႁဝ်းယင်းဢမ်ႇတူၺ်းၼႃႈၵူၼ်းလႄႈၼႄပျႃးသဵၼ်ႈတၢင်းၽြႃးပဵၼ်ၸဝ်ႈၸိုဝ်ႈၸိုဝ်ႈၸႂ်ႈၸႂ်ႈၼၼ်ႉၶႃႈဢေႃႈ။

၂၂ ၸွင်ႇႁဝ်းၶႃႈထုၵ်ႇလီပၼ်ဢၶွၼ်ႇတီႈၶုၼ်ႁေႃၶမ်းၵေႇသႃႇယူႇၶႃႈႁိုဝ်၊ဢမ်ႇထုၵ်ႇလီပၼ်ႁိုဝ်၊ဝႃႈၼင်ႇၼႆဢေႃႈ။

၂၃ မၼ်းၸဝ်ႈႁူႉႁၼ်ပရိယႄႇၶဝ်ၼၼ်ႉလႄႈလၢတ်ႈဝႃႈ၊-ႁဵတ်းသင်လႄႈသူၸၢမ်းတူၺ်းယႃႉယူၵ်ႉၵဝ်။ၼႄပျႃႉတေႇၼႃႇရီႇၶႅပ်းၼိုင်ႈလူ။

၂၄ ႁၢင်ႊၼႆႉလိၵ်ႈၼႆႉပဵၼ်ႁၢင်ႊၽႂ်ပဵၼ်လိၵ်ႈၽႂ်မိူဝ်ႈဢၼ်ဝႃႈၼင်ႇၼႆၸိုင်ၶဝ်ၼၼ်ႉၵေႃႈလဝ်ႈလၢတ်ႈလႄႈဝႃႈ၊-ပဵၼ်ႁၢင်ႊပဵၼ်လိၵ်ႈၶုၼ်ႁေႃၶမ်းၵေႇသႃႇၶႃႈဢေႃႈ၊ဝႃႈၼင်ႇၼႆဢေႃႈ။

၂၅ မၼ်းၸဝ်ႈၵေႃႈလၢတ်ႈလႄႈဝႃႈ၊-ဢဝ်ၶွင်ၶုၼ်ႁေႃၶမ်းၵေႇသႃႇပၼ်တီႈၶုၼ်ႁေႃၶမ်းၵေႇသႃႇတႃႉ။ၶွင်ၽြႃးပဵၼ်ၸဝ်ႈၵေႃႈဢဝ်ပၼ်တီႈၽြႃးပဵၼ်ၸဝ်ႈတႃႉ၊ဝႃႈၼင်ႇၼႆဢေႃႈ။

၂၆ ၶဝ်ဢမ်ႇႁၼ်ဢပျႅတ်ႈၵႃႈၼႂ်းၵႂၢမ်းမၼ်းၸဝ်ႈၵႃႈတီႈၽၢႆႇၼႃႈၵူၼ်းတင်းလၢႆလႆႈလႄႈဢၢမ်းလွင်ႈၵႂၢမ်းမၼ်းၸဝ်ႈဢၼ်ၶိုၼ်းလၢတ်ႈၼၼ်ႉသေယဝ်ႉယူႇတဵတ်ႇတဵတ်ႇယူႇဢေႃႈ။

တၢင်းဢၼ်လုၵ်ႉၶိုၼ်းလိပ်း

၂၇ ၸတ်ႉတုၵေးဢၼ်ယုမ်ႇဝႃႈ၊-တၢင်းဢၼ်လုၵ်ႉၶိုၼ်းလိပ်းဢမ်ႇမီး၊ဢၼ်ဝႃႈၼၼ်ႉၵမ်ႈၽွင်ႈသုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈလဝ်ႈထၢမ်ဝႃႈ၊-သြႃႇၸဝ်ႈ၊မုဝ်းသေႇၸီႇယၢင်ႇတႅမ်ႈဝႆႉတီႈႁဝ်းၶႃႈလႄႈဝႃႈ၊-

၂၈ ပေႃးၵေႃႉဢၼ်ပဵၼ်ပီႈၸၢႆးမီးမေးလႄႈသမ်ႉဢမ်ႇမီးလုၵ်ႈလၢင်းသေယဝ်ႉတၢႆၵႂႃႇၸိုင်ၼင်ႇႁိုဝ်ၸိူဝ်ႉၶိူဝ်းပီႈၸၢႆးမၼ်းတၵ်းသိုပ်ႇၵႂႃႇဢမ်ႇၶၢတ်ႇၼၼ်ႉၼွင်ႉၸၢႆးမၼ်းတၵ်းလႆႈသိမ်းဢဝ်မေးမၼ်းဢေႃႈ၊ဝႃႈၼင်ႇၼႆၶႃႈဢေႃႈ။

၂၉ မီးပီႈၼွင်ႉၸဵတ်းၵေႃႉၶႃႈဢေႃႈ။ပီႈၸၢႆးၵေႃႉယႂ်ႇဢဝ်မေးလႄႈဢမ်ႇမီးလုၵ်ႈမီးလၢင်းလႄႈတၢႆၵႂႃႇၶႃႈဢေႃႈ။

၃၀ ၼွင်ႉၸၢႆးမၼ်းၵေႃႉယႂ်ႇသိမ်းဢဝ်မေးမၼ်းၼၼ်ႉသေယဝ်ႉၵေႃႈယင်းဢမ်ႇမီးလုၵ်ႈမီးလၢင်းလႄႈတၢႆၵႂႃႇၶႃႈဢေႃႈ။

၃၁ မိူၼ်ၼင်ႇၼၼ်ၸႃႉၸဵမ်ၵေႃႉတတိယၵေႃႉၼိုင်ႈယဝ်ႉၵေႃႉၼိုင်ႈၶဝ်ပီႈၼွင်ႉၸဵတ်းၵေႃႉလႆႈဢဝ်မေႈယိင်းၼၼ်ႉလႄႈယင်းဢမ်ႇမီးလုၵ်ႈမီးလၢင်းလႄႈတၢႆၵႂႃႇၶႃႈဢေႃႈ။

၃၂ လိုၼ်းၼၼ်ႉမေႈယိင်းၵေႃႉၼၼ်ႉၵေႃႈတၢႆၵႂႃႇၶႃႈဢေႃႈ။

၃၃ ပေႃးပဵၼ်ၼႆၸိုင်ၼႂ်းၶိင်ႇၵႃႇလႃႉမိူဝ်ႈဢၼ်လုၵ်ႉၶိုၼ်းၼၼ်ႉမေႈယိင်းၵေႃႉၼၼ်ႉတၵ်းပဵၼ်မေးၵေႃႉလႂ်ၶႃႈ။ၶဝ်ၸဵတ်းၵေႃႉၼၼ်ႉယင်းပေႃးလႆႈဢဝ်မေႈယိင်းၼၼ်ႉၵူႈၵေႃႉယဝ်ႉၶႃႈ၊ဝႃႈၼင်ႇၼႆဢေႃႈ။

၃၄ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵူၼ်းၽဝႃႉတေႃႈလဵဝ်ၼႆႉၸၢင်ႊႁဵတ်းတၢင်းဢၼ်ဢဝ်မေးတၢင်းဢၼ်ဢၢပ်ႈပၼ်ၵၼ်ယူႇဢေႃႈ။

၃၅ ၶဝ်ၸိူဝ်းဢၼ်ထိူၵ်ႈလႆႈၶၢမ်ႇၸၢတ်ႈၼႃႈဢိၵ်ႇတင်းတၢင်းဢၼ်လုၵ်ႉၵႃႈတၢင်းတၢႆၶိုၼ်းလိပ်းၸိူဝ်းၼၼ်ႉၸမ်းတေဢမ်ႇႁဵတ်းတၢင်းဢၼ်ဢဝ်မေးတၢင်းဢၼ်ဢၢပ်ႈပၼ်ၵၼ်။

၃၆ ၶဝ်ၼၼ်ႉတၵ်းၵၢင်းလွတ်ႈတင်းတၢင်းတၢႆယူႇတႃႇသေႇလႄႈပဵၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ဢမ်ႇၵႃးပိူဝ်ႈဢၼ်ပဵၼ်ၵူၼ်းဢၼ်လုၵ်ႉၶိုၼ်းၼၼ်ႉလႄႈပဵၼ်လုၵ်ႈၽြႃးပဵၼ်ၸဝ်ႈဢေႃႈ။

၃၇ လိူဝ်သေၼၼ်ႉလွင်ႈၶဝ်ၸိူဝ်းဢၼ်တၢႆယဝ်ႉတင်းလၢႆတၵ်းလုၵ်ႉၶိုၼ်းၼၼ်ႉမုဝ်းသေႇၽုၺ်ႇဢွၵ်ႇၼႄပျႃးၼႂ်းတၢင်းဢၼ်မၼ်းလၢတ်ႈလူၺ်ႈလွင်ႈယုမ်းမႆႈၽႆးတီႈဢၼ်မၼ်းႁွင်ႉထႃႇဝရႃႉၽြႃးၼၼ်ႉလႄႈဝႃႈ၊ၽြႃးဢႃႇပြႁၢမ်ႇၽြႃးဢိၸၢၵ်ႉ၊ၽြႃးယႃႇၵုပ်၊ႉဝႃႈၼင်ႇၼႆၼၼ်ႉမႃးယဝ်ႉ။

၃၈ မၼ်းၸဝ်ႈပဵၼ်ၽြႃးၵူၼ်းတၢႆဢမ်ႇၸႂ်ႈ။ပဵၼ်ၽြႃးၵူၼ်းလိပ်းဢေႃႈ။လွင်ႈမၼ်းၸမ်းၵူၼ်းတင်းသဵင်ႈတင်းလူင်ဢသၢၵ်ႈလိပ်းယူႇၼႂ်းၽြႃးပဵၼ်ၸဝ်ႈဢေႃႈ၊ဝႃႈၼင်ႇၼႆဢေႃႈ။

၃၉ ၵူၼ်းထုတ်ႇၵျၢမ်းၵမ်ႈၽွင်ႈၵေႃႈၶိုၼ်းလဝ်ႈလၢတ်ႈလႄႈဝႃႈ၊-သြႃႇၸဝ်ႈ၊ၵႂၢမ်းၸဝ်ႈႁဝ်းၼႆႉလီၼႃႇၶႃႈဢေႃႈ၊ဝႃႈၼင်ႇၼႆဢေႃႈ။

၄၀ ၵမ်းလိုၼ်းၶဝ်ဢမ်ႇႁတ်းထၢမ်ထႅင်ႈတီႈမၼ်းၸဝ်ႈသေၸိူဝ်ႉသေပိူင်။

ၸဝ်ႈယေႇသုပဵၼ်လုၵ်ႈၽူႈလႂ်

၄၁ မၼ်းၸဝ်ႈၵေႃႈလၢတ်ႈလႄႈဝႃႈ၊-ၸဝ်ႈၶရိၸ်ႉပဵၼ်လုၵ်ႈတႃႇဝိတ်ႉဢေႃႈ၊ဝႃႈၼႆႁဵတ်းႁိုဝ်လႄႈၶဝ်ဝႃႈၸိူဝ်ႉၼင်ႇၼႆ။

၄၂ တႃႇဝိတ်ႉလၢတ်ႈဝႆႉၼႂ်းၵျၢမ်းသႃႇလၢမ်ႇၼၼ်ႉလႄႈဝႃႈ၊-ထႃႇဝရႃႉၽြႃးလၢတ်ႈတီႈၸဝ်ႈၵဝ်ၶႃႈလႄႈဝႃႈ၊-

၄၃ ၸူဝ်ႈဢၼ်ၵဝ်ဢမ်ႇပႆႇဢဝ်ရၢၼ်ႇသူႇမႂ်းတင်းလၢႆၶျႃးဝႆႉႁႂ်ႈလႆႈပဵၼ်တီႈတၢင်ႇတိၼ်မႂ်းၼၼ်ႉၸိုင်ၼင်ႈယူႇၵႃႈတီႈၽၢႆႇၶႂႃၵဝ်တႃႉ၊ဝႃႈၼင်ႇၼႆဢေႃႈ။

၄၄ ပိူဝ်ႈၼႆလႄႈၸဝ်ႈၶရိၸ်ႉၼၼ်ႉပေႃးတႃႇဝိတ်ႉႁွင်ႉဝႃႈ၊ၸဝ်ႈႁဝ်းဝႃႈၼႆၸိုင်တၵ်းပဵၼ်လုၵ်ႈမၼ်းလႆႈၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။

၄၅ ၼႂ်းမိူဝ်ႈဢၼ်ပရိၵ်ႈသၢတ်ႈၸိူဝ်းၼၼ်ႉယင်းတိုၵ်ႉထွမ်ႇငိၼ်းယူႇၼၼ်ႉၸိုင်မၼ်းၸဝ်ႈသမ်ႉလၢတ်ႈတီႈတပႄးၸဝ်ႈတင်းလၢႆထႅင်ႈလႄႈဝႃႈ၊-

၄၆ ဝေႈပႅတ်ႈၵူၼ်းထုတ်ႇၵျၢမ်းတင်းလၢႆတႃႉ။ၶဝ်ၼၼ်ႉမီးဢလူဝ်ႇၶႂ်ႈၼုင်ႈသိူဝ်ႈဢၼ်ယၢဝ်းသေလႄႈၵႂႃႇလႄႇၵႂႃႇလၢဝ်းလႄႈထုၵ်ႇၸႂ်ၵျိူၵ်ႈၸႂ်တၢင်းဢၼ်ပိူၼ်ႈႁဵတ်းရူဝ်ႇသေႇၵူဝ်ယမ်လႄႈတၵ်ႉလၢတ်ႈၶဝ်ၵႃႈၼႂ်းၵၢတ်ႇလႂ်၊တီႈဢၼ်သုင်ဢၼ်မျၢတ်ႈၼႂ်းၸရွပ်ႈႁေႃးတြႃးလႂ်၊တီႈၼင်ႈဢၼ်လီဢၼ်မျၢတ်ႈၵႃႈႁိမ်းတီႈၵိၼ်ၵႃႈၼႂ်းပွႆးလႂ်ၸိူဝ်းၼၼ်ႉဢေႃႈ။

၄၇ ၶဝ်ၼၼ်ႉၸၢင်ႊႁိမ်ႁူင်ႇသိမ်းပႅင်းႁိူၼ်းမေႈမုၵ်ႉမေႈမၢႆႈတင်းလၢႆလႄႈၸၢင်ႊႁဵတ်းၼင်ႇႁၢင်ႊၵူၼ်းလီၵူၼ်းငၢမ်းသေလႄႈဢဝ်တင်းၵႂၢမ်းဢၼ်ယၢဝ်းၼႃႇလူင်လၢင်ၼၼ်ႉသေယဝ်ႉသူးတွင်းဢေႃႈ။ၶဝ်ၼၼ်ႉယဵင်ႈၶႅၼ်းတၵ်းလႆႈၶၢမ်ႇတၢမ်ႇဢၼ်ယႂ်ႇၼႃႇဢေႃႈ၊ဝႃႈၼင်ႇၼႆဢေႃႈ။