Shan Missions

မၢတ်ႈထႄႇ

Chapter   ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၂၃

ဢႃႉမင်ႇၵလႃႇၸဵတ်းပႃး

၁ မိူဝ်ႈၼၼ်ႉၸဝ်ႈယေႇသုႁေႃးလၢတ်ႈတီႈၵူၼ်းၸူႉၵူၼ်းတုမ်ဢိၵ်ႇတင်းတပႄးၸဝ်ႈတင်းလၢႆလႄႈဝႃႈ၊-

၂ ၵူၼ်းထုတ်ႇၵျၢမ်းဢိၵ်ႇတင်းၽႃႇရိသေးတင်းလၢႆၼင်ႈၵႃႈၼိူဝ်ပလၢင်ႇတီႈၼင်ႈမုဝ်းသေႇဢေႃႈ။ ပိူဝ်ႈၼႆလႄႈႁဵတ်းၸွမ်းၵႃႈၼင်ႇဢၼ်သင်ႇသွၼ်တင်းသဵင်ႈတင်းလူင်ၼၼ်ႉၼၼ်ႉတႃႉ။ 

၃ ယႃႇပေႁဵတ်းၸိူဝ်ႉၼင်ႇၶဝ်ႁဵတ်းၼၼ်ႉ။ လွင်ႈမၼ်းၸမ်းပဵၵ်ႉသမ်ႉၶဝ်ႁေႃးလၢတ်ႈသေၵေႃႈတူဝ်ၶဝ်ဢမ်ႇၵမ်ဢမ်ႇၵျၢင်ႉ။ 

၄ ၶဝ်ၸၢင်ႊမတ်ႉၸၢင်ႊၶၢတ်ႈၶူဝ်းဢၼ်ၼၵ်းၼႃႇဢၼ်ႁၢပ်ႇယၢပ်ႇတင်းလၢႆၼၼ်ႉလႄႈဢဝ်တၢင်ႇသႂ်ႇၵႃႈၼိူဝ်ႁူဝ်မႃႇပိူၼ်ႈဢေႃႈ။ တူဝ်ၶဝ်ၸမ်းယင်းဢမ်ႇၶႂ်ႈဢဝ်ၼိဝ်ႉမိုဝ်းၶၢႆႉ။ 

၅ ၶဝ်ႁဵတ်းႁႂ်ႈလွင်ႈတၢင်းၵႃႈဢၼ်ၶဝ်ႁဵတ်းတင်းသဵင်ႈတင်းလူင်ၼၼ်ႉထၢင်ႇသႃးၵႃႈတီႈၽၢႆႇၼႃႈပိူၼ်ႈဢေႃႈ။ ၸၢင်ႊႁဵတ်းႁႂ်ႈလၢၵ်ႈၽွႆးၶဝ်တင်းလၢႆၵႂင်ႈလႄႈႁႂ်ႈပူးၶူဝ်းၶဝ်တင်းလၢႆယႂ်ႇဢေႃႈ။ 

၆ ၸၢင်ႊထုၵ်ႇၸႂ်ၵျိူၵ်ႈၸႂ်တီႈၵိၼ်ဢၼ်လီဢၼ်မျၢတ်ႈသေပိူၼ်ႈၵႃႈၼႂ်းပၢင်ပွႆးလႂ်တီႈၼင်ႈဢၼ်သုင်သေပိူၼ်ႈၵႃႈၼႂ်းၸရွပ်ႈႁေႃးတြႃးလႂ်၊

၇ ၶၢမ်ႇတၢင်းဢၼ်ပိူၼ်ႈႁဵတ်းရူဝ်ႇသေႇၵူဝ်ယမ်လႄႈတၵ်ႉလၢတ်ႈၶဝ်ၵႃႈၼႂ်းၵၢတ်ႇလႂ်ၶၢမ်ႇတၢင်းဢၼ်ပိူၼ်ႈႁွင်ႉၶဝ်ဝႃႈ၊-

၈ သြႃႇၸဝ်ႈ၊သြႃႇၸဝ်ႈ၊ဝႃႈၼင်ႇၼႆလႂ်ၸိူဝ်းၼၼ်ႉဢေႃႈ။ သူၸမ်းယႃႇပေၶၢမ်ႇတၢင်းဢၼ်ပိူၼ်ႈႁွင်ႉဝႃႈသြႃႇၸဝ်ႈ။ လွင်ႈမၼ်းၸမ်းသူမီးၸဝ်ႈၶရိၸ်ႉဢၼ်ပဵၼ်သြႃႇၸဝ်ႈသူသူႇလဵဝ်ပႃးလဵဝ်ၵူၺ်းၼၼ်ႉဢေႃႈ။ 

၉ သူတင်းသဵင်ႈတင်းလူင်ပဵၼ်ပီႈၼွင်ႉၵၼ်ဢေႃႈ။ ၵႃႈၼိူဝ်လိၼ်မိူင်းၼႆႉယႃႇပေႁွင်ႉၽူႈလႂ်သေၵေႃႉသေၵူၼ်းဝႃႈ၊-ပေႃႈၸဝ်ႈ။ 

၁၀ လွင်ႈမၼ်းၸမ်းသူမီးပေႃႈၸဝ်ႈၵႃႈၼိူဝ်မိူင်းၵၢင်ႁၢဝ်ပုၼ်ႉပႃးလဵဝ်ၵူၺ်းဢေႃႈ။ ယႃႇပေၶၢမ်ႇတၢင်းဢၼ်ပိူၼ်ႈႁွင်ႉဝႃႈ၊-ၸဝ်ႈ။ 

၁၁ ဢၼ်ပဵၼ်ၸဝ်ႈၼၼ်ႉမီးၸဝ်ႈၶရိၸ်ႉပႃးလဵဝ်ၵူၺ်းဢေႃႈ။ ၵေႃႉဢၼ်ပဵၼ်ၵူၼ်းလူင်ၵူၼ်းယႂ်ႇသေပိူၼ်ႈၵႃႈၼႂ်းသူၼၼ်ႉတၵ်းပဵၼ်ၵူၼ်းၸႂ်ႉၵူၼ်းသွႆသူဢေႃႈ။ 

၁၂ ၽူႈလႂ်သေဢမ်ႇဝႃႈၵေႃႉဢၼ်ယုၵ်ႉယွင်ႈတူဝ်ၸဝ်ႈၵဝ်ႇၼၼ်ႉၵေႃႉၼၼ်ႉတၵ်းလႆၶၢမ်ႇတၢင်းဢၼ်ၶျႃးတူၵ်းတီႈတႅမ်ႇဢေႃႈ။ ၽူႈလႂ်သေဢမ်ႇဝႃႈၵေႃႉဢၼ်ၶျႃးတႅမ်ႇတူဝ်ၸဝ်ႈၵဝ်ႇၼၼ်ႉၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ယုၵ်ႉယွင်ႈဢေႃႈ။ 

၁၃ ၵူၼ်းထုတ်ႇၵျၢမ်းဢိၵ်ႇတင်းၽႃႇရိသေးဢၼ်ၸၢင်ႊထိမ်ႇၸၢင်ႊမႅပ်းၶဝ်ဢိူၺ်း၊သူမီးဢႃႉမင်ႇၵလႃႇဢေႃႈ။ 

၁၄ လွင်ႈမၼ်းၸမ်းသူဢိုတ်းဝႆႉမိူင်းၵၢင်ႁၢဝ်ၸဝ်ႈၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။ တူဝ်သူၵေႃႈဢမ်ႇၶဝ်ႈ။ ၶဝ်ၸိူဝ်းၶႂ်ႈၶဝ်ႈၼၼ်ႉၵေႃႈသူႁႄႉၶႅၼ်ဝႆႉဢေႃႈ။ 

၁၅ ၵူၼ်းထုတ်ႇၵျၢမ်းဢိၵ်ႇတင်းၽႃႇရိသေးဢၼ်ၸၢင်ႊထိမ်ႇၸၢင်ႊမႅပ်းၶဝ်ဢိူၺ်း၊သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်းသူၵႂႃႇလႄႇၵႂႃႇလဵပ်ႈၵႃႈတီႈတၢင်းလွႆတၢင်းၼမ်ႉလႄႈႁႂ်ႈၵူၼ်းၵေႃႉၼိုင်ႈလႆႈၶဝ်ႈၼႂ်းၽႃႇသႃႇလႄႈၵေႃႉဢၼ်ၶဝ်ႈၼႂ်းၽႃႇသႃႇယဝ်ႉၼၼ်ႉၵေႃႈသူႁႂ်ႈပဵၼ်ၵူၼ်းမိူင်းငႃႈရၢႆးၼႃႇသတေူဝ်ၸဝ်ႈၵဝ်ႇသွင်ပုၼ်ႊဢေႃႈ။ 

၁၆ ၵူၼ်းတႃမွတ်ႇဢၼ်ၼႄတၢင်းၶဝ်ဢိူၺ်း၊သူမီးဢႃႉမင်ႇၵလႃႇဢေႃႈ။ သူဝႃႈ၊-ၽူႈလႂ်သေဢမ်ႇဝႃႈပေႃးဢဝ်ပိၵ်ႉမၢၼ်ႇၸဝ်ႈလႄႈၵိၼ်ႇဝႃႈၸိုင်ဢမ်ႇတႄႇ။ ၵူၺ်းၵႃႈပေႃးဢဝ်ၶမ်းပိၵ်ႉမၢၼ်ႇၸဝ်ႈလႄႈၵိၼ်ႇဝႃႈၸိုင်တႄႇဢေႃႈ၊ဝႃႈၼင်ႇၼႆ။ 

၁၇ ၵူၼ်းမိူၵ်ႈၵူၼ်းတႃမွတ်ႇတင်းလၢႆၶဝ်ဢိူၺ်း၊ၶိူင်ႈပိူင်ဢၼ်လႂ်ယဵင်ႈၶႅၼ်းမျၢတ်ႈ။ ၶမ်းပိၵ်ႉမၢၼ်ႇယိင်ႈၶႅၼ်းမျၢတ်ႈႁိုဝ်။ 

၁၈ ပိၵ်ႉမၢၼ်ႇဢၼ်ႁဵတ်းႁႂ်ႈၶမ်းမူတ်းၸၢင်ႇၼၼ်ႉယိင်ႈၶႅၼ်းမျၢတ်ႈႁိုဝ်။ ၼႄးၼိုင်ႈၸမ်းသူဝႃႈ၊-ၽူႈလႂ်သေဢမ်ႇဝႃႈပေႃးဢဝ်ယိၸ်ႉပလၢင်ႇလႄႈၵိၼ်ႇဝႃႈၸိုင်ဢမ်ႇတႄႇ။ ၵူၺ်းၵႃႈပေႃးဢဝ်တၢင်းပုၵ်ႉၸေႃႇဢၼ်မီးၵႃႈၼိူဝ်ယိၸ်ႉပလၢင်ႇၼၼ်ႉၵိၼ်ႇဝႃႈၸိုင်တႄႇဢေႃႈ၊ဝႃႈၼင်ႇၼႆ။ 

၁၉ ၵူၼ်းမိူၵ်ႈတႃမွတ်ႇၶဝ်ဢိူၺ်း၊တၢင်းပုၵ်ႉၸေႃႇၼၼ်ႉမျၢတ်ႈႁိုဝ်၊ယိၸ်ႉပလၢင်ႇဢၼ်ႁႂ်ႈတၢင်းပုၵ်ႉၸေႃႇမူတ်းၸၢင်ႇၼၼ်ႉမျၢတ်ႈႁိုဝ်။ ပိူဝ်ႈၼႆၸင်ႇၵေႃႉဢၼ်ဢဝ်ယိၸ်ႉပလၢင်ႇၵိၼ်ႇဝႃႈၼၼ်ႉဢဝ်ၸႃႉၸဵမ်ယိၸ်ႉပလၢင်ႇ

၂၀ ဢိၵ်ႇတင်းၵႃႈဢၼ်မီးၵႃႈၼိူဝ်ယိၸ်ႉပလၢင်ႇတင်းသဵင်ႈတင်းလူင်ၼၼ်ႉၵိၼ်ႇဝႃႈဢေႃႈ။ 

၂၁ ၵေႃႉဢၼ်ဢဝ်ပိၵ်ႉမၢၼ်ႇၸဝ်ႈၵိၼ်ႇဝႃႈၼၼ်ႉဢဝ်ၸႃႉၸဵမ်ပိၵ်ႉမၢၼ်ႇၸဝ်ႈဢိၵ်ႇတင်းၽူႈဢၼ်ၵိင်းဝၢပ်ႈယူႇၵႃႈၼႂ်းပိၵ်ႉမၢၼ်ႇၸဝ်ႈၼၼ်ႉၵိၼ်ႇဝႃႈဢေႃႈ။ 

၂၂ ၵေႃႉဢၼ်ဢဝ်မိူင်းၵၢင်ႁၢဝ်ၵိၼ်ႇဝႃႈၼၼ်ႉဢဝ်ၸဵမ်ပလၢင်ႇၽြႃးပဵၼ်ၸဝ်ႈဢိၵ်ႇတင်းၽူႈဢၼ်ၼင်ႈယူႇၵႃႈၼိူဝ်ပလၢင်ႇၼၼ်ႉၵိၼ်ႇဝႃႈဢေႃႈ။ 

၂၃ ၵူၼ်းထုတ်ႇၵျၢမ်းဢိၵ်ႇတင်းၽႃႇရိသေးဢၼ်ၸၢင်ႊထိမ်ႇၸၢင်ႊမႅပ်းၶဝ်ဢိူၺ်း၊သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်းပဵၵ်ႉသမ်ႉသူလူႇတၢၼ်းဢိမ်ၶိမ်း၊ၸမုတ်ႉ၊ၸီႇယႃႇ၊သိပ်းပုၼ်ႊပုၼ်ႊၼိုင်ႈယူႇသေၵေႃႈသူဝႆႉၵိုတ်းပႅတ်ႈတၢင်းဢၼ်ယိင်ႈၶႅၼ်းယႂ်ႇၵႃႈၼႂ်းပိင်းၺၢပ်ႈတြႃးဢၼ်ပဵၼ်တၢင်းဢၼ်ၸီႇယၢင်ႇၸွမ်းၼင်ႇတြႃးတင်းဢၼ်ဢိတ်းလူပိူၼ်ႈတင်းဢၼ်ပႂ်ႉသႅတ်ႈၸႃႇလႂ်ၸိူဝ်းၼၼ်ႉဢေႃႈ။ တၵ်းလႆႈၵမ်ၵျၢင်ႉလွင်ႈတၢင်းၸိူဝ်းၼႆႉဢေႃႈ။ လွင်ႈတၢင်းဢၼ်ဝႃႈဝႆႉဢွၼ်တၢင်းၸိူဝ်းၼၼ်ႉၵေႃႈဢမ်ႇလႆႈဝႆႉၵိုတ်း။ 

၂၄ ၵူၼ်းတႃမွတ်ႇဢၼ်ၼႄတၢင်းၶဝ်ဢိူၺ်း၊သူၸႅတ်ႈၼမ်ႉဢဝ်မႅင်းလဵတ်းဢွၼ်ႇဢွၵ်ႇပႅတ်ႈသေလႄႈသမ်ႉဢိုၼ်ၵိၼ်ၵလႃႇဢုၵ်ႉဢေႃႈ။ 

၂၅ ၵူၼ်းထုတ်ႇၵျၢမ်းဢိၵ်ႇတင်းၽႃႇရိသေးဢၼ်ၸၢင်ႊထိမ်ႇၸၢင်ႊမႅပ်းၶဝ်ဢိူၺ်း၊သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်းသူသုၵ်ႈလၢင်ႉၵွၵ်းတင်းပၢၼ်ႉၽၢႆႇတၢင်းၼွၵ်ႈမၼ်းၵူၺ်းဢေႃႈ။ ၽၢႆႇတၢင်းၼႂ်းမၼ်းၸမ်းမီးတဵမ်ဝႆႉတင်းလေႃးၽႃႉႁၢႆႉမိူၵ်ႈယူႇဢေႃႈ။ 

၂၆ ၽႃႇရိသေးဢၼ်တႃမွတ်ႇၼႆႉဢိူၺ်း၊သုၵ်ႈလၢင်ႉၵွၵ်းတင်းပၢၼ်ႉၼၼ်ႉၽၢႆႇတၢင်းၼႂ်းမၼ်းဢွၼ်တၢင်းတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်ၽၢႆႇတၢင်းၼွၵ်ႈမၼ်းတၵ်းမူတ်းသႂ်ဢေႃႈ။ 

၂၇ ၵူၼ်းထုတ်ႇၵျၢမ်းဢိၵ်ႇတင်းၽႃႇရိသေးဢၼ်ၸၢင်ႊထိမ်ႇၸၢင်ႊမႅပ်းၶဝ်ဢိူၺ်း၊သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်းသူမိူၼ်ၸိူဝ်ႉၼင်ႇသၢင်းၶျႅင်းဢၼ်တႃးထုၼ်ၽိူၵ်ႇဢၼ်ၶၢဝ်ၼၼ်ႉဢေႃႈ။ ၽၢႆႇတၢင်းၼွၵ်ႈမၼ်းတႄႉႁၢင်ႊလီယူႇဢေႃႈ။ ၽၢႆႇတၢင်းၼႂ်းမၼ်းၸမ်းမီးတဵမ်ဝႆႉတင်းလုပ်ႇၵူၼ်းတၢႆဢိၵ်ႇတင်းဢၼ်ဝူၺ်ႇဢၼ်ႁင်ႈၵူႈၸိူဝ်ႉၵူႈပိူင်ဢေႃႈ။ 

၂၈ မိူၼ်ၼင်ႇၼၼ်သူမိူၼ်ၼင်ႇႁၢင်ႊသိုဝ်ႈတေႃႇၽၢႆႇတၢင်းၼွၵ်ႈၵႃႈတီႈၽၢႆႇၼႃႈပိူၼ်ႈဢေႃႈ။ ၽၢႆႇတၢင်းၼႂ်းၸမ်းမီးတဵမ်ဝႆႉတင်းတၢင်းဢၼ်ၸၢင်ႊထိမ်ႇၸၢင်ႊမႅပ်းဢိၵ်ႇတင်းတၢင်းၵမ်တၢင်းၵျၢင်ႉဢၼ်ဢမ်ႇတြႃးၼၼ်ႉဢေႃႈ။ 

၂၉ ၵူၼ်းထုတ်ႇၵျၢမ်းဢိၵ်ႇတင်းၽႃႇရိသေးဢၼ်ၸၢင်ႊထိမ်ႇၸၢင်ႊမႅပ်းၶဝ်ဢိူၺ်း၊သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်းသူမႄးတႄႇမႄးႁဵတ်းပႃႇႁဵဝ်ႈပရေႃးၽႅတ်ႈတင်းလၢႆသေလႄႈႁၢင်ႈၶိူင်ႈသၢင်းၶျႅင်းၵူၼ်းဢၼ်သိုဝ်ႈတေႃႇၸိူဝ်းၼၼ်ႉဝႆႉသေယဝ်ႉလၢတ်ႈဝႃႈ၊

၃၀ သင်ႁဝ်းမီးၼႂ်းၸူဝ်ႈပၢၼ်ပူႇပေႃႈႁဝ်းၸိုင်ႁဝ်းတၵ်းဢမ်ႇၶဝ်ႈပႃးၼႂ်းတၢင်းဢၼ်ထွၵ်ႇလိူတ်ႈပရေႃးၽႅတ်ႈၸိူဝ်းၼၼ်ႉ၊ဝႃႈၼႆဢေႃႈ။ 

၃၁ ပေႃးပဵၼ်ၸိူဝ်ႉၼႆၸိုင်သူပဵၼ်ၸိူဝ်ႉၶိူဝ်းၶဝ်ၸိူဝ်းဢၼ်ဢဝ်ပရေႃးၽႅတ်ႈတင်းလၢႆတၢႆၼၼ်ႉယဝ်ႉ၊ဝႃႈၼႆတူဝ်သူၶၢမ်ႇသၢၵ်ႈသေႇတူဝ်သူယူႇဢေႃႈ။ 

၃၂ ပိူဝ်ႈၼႆလႄႈႁႂ်ႈပမႃႇၼႃႉတၢင်းၵမ်တၢင်းၵျၢင်ႉပူႇပေႃႈသူဢၼ်ဢမ်ႇပႆႇထူၼ်ႈပႆႇတဵမ်ၼၼ်ႉတဵမ်ထူၼ်ႈတႃႉ။ 

၃၃ ၶိူဝ်းငူးႁၢႆႉၶဝ်ဢိူၺ်း၊သူတၵ်းၵၢင်းလွတ်ႈတင်းဢပျႅတ်ႈငႃႈရၢႆးလႆႈၸိူဝ်ႉၼင်ႇႁိုဝ်။ 

၃၄ ပိူဝ်ႈဢၼ်မီးၼင်ႇၼႆလႄႈတူၺ်းလူႊၵဝ်ပွႆႇၸႂ်ႉပရေႃးၽႅတ်ႈဢိၵ်ႇတင်းပိင်ႇၺႃႇသိတင်းၵူၼ်းထုတ်ႇၵျၢမ်းတင်းလၢႆမႃးတီႈသူဢေႃႈ။ ၼႂ်းၶဝ်ၼၼ်ႉသူတၵ်းၼိၵ်ႈၸၢၵ်ႈငႅၼ်းသေးလႄႈဢဝ်ၵမ်ႈၽွင်ႈတၢႆဢေႃႈ။ တၵ်းပေႃႉယႅၼ်ႉၵမ်ႈၽွင်ႈၵႃႈၼႂ်းၸရွပ်ႈႁေႃးတြႃးတင်းလၢႆလႄႈႁေႃႈဢွၵ်ႇပႅတ်ႈသေၵႃႈတီႈဝဵင်းၼိုင်ႈယဝ်ႉဝဵင်းၼိုင်ႈသေယဝ်ႉလိုပ်ႈလမ်းၸွမ်းဢေႃႈ။ 

၃၅ ပိူဝ်ႈၼႆလႄႈလိူတ်ႈၵူၼ်းဢၼ်သိုဝ်ႈတေႃႇၵႃႈဢၼ်ထွၵ်ႇပႅတ်ႈယဝ်ႉၵႃႈၼိူဝ်လိၼ်မိူင်းတင်းသဵင်ႈတင်းလူင်ၸႃႉၸဵမ်လိူတ်ႈဢႃႇပေႇလဢၼ်သိုဝ်ႈတေႃႇၼၼ်ႉတေႃႇထိုင်ႁွတ်ႈလိူတ်ႈၸႃႇၶရိ၊လုၵ်ႈၸၢႆးပႃႇရၵိ၊ဢၼ်သူဢဝ်တၢႆၼႂ်းၵႄဝူင်ႈၵၢင်ပိၵ်ႉမၢၼ်ႇၸဝ်ႈတင်းယိၸ်ႉပလၢင်ႇၼၼ်ႉတၵ်းႁွတ်ႈၽႅဝ်ၵႃႈၼိူဝ်ႁူဝ်သူဢေႃႈ။ 

၃၆ ၵဝ်ဝႃႈတီႈၸိုဝ်ႈတီႈၸႂ်ႈၸမ်းလွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉတၵ်းႁွတ်ႈၽႅဝ်ၵႃႈၼိူဝ်ႁူဝ်ၵူၼ်းတင်းလၢႆဢၼ်မီးယူႇတေႃႈလဵဝ်ၸိူဝ်းၼႆႉၼၼ်ႉဢေႃႈ။ 

၃၇ ဢူဝ်း၊ဝဵင်းယေႇရုသလႅမ်ႇ၊ဝဵင်းယေႇရုသလႅမ်ႇ၊ဢၼ်ဢဝ်ပရေႃးၽႅတ်ႈတင်းလၢႆတၢႆလႄႈဢဝ်မၢၵ်ႇႁိၼ်ထိမ်ႈၶဝ်ၸိူဝ်းဢၼ်ပွႆႇၸႂ်ႉမႃးၵႃႈတီႈမႂ်းတင်းလၢႆၼၼ်ႉဢိူၺ်း၊ၸိူဝ်ႉၼင်ႇဢၼ်ၵႆႇမႄႈႁႂ်ႈလုၵ်ႈဢွၼ်ႇမၼ်းၸူႉၵၼ်တုမ်ၵၼ်ၵႃႈတႂ်ႈပိၵ်ႇမၼ်းၼၼ်ႉၵဝ်မီးဢလူဝ်ႇၶႂ်ႈႁႂ်ႈလုၵ်ႈဢွၼ်ႇမႂ်းမႃးၸူႉၵၼ်တုမ်ၵၼ်ယူႇဢမ်ႇႁူႉလၢႆၽဝ်ႇလၢႆပွၵ်ႈယဝ်ႉ။ မႂ်းၸမ်းယင်းဢမ်ႇမီးဢလူဝ်ႇ။ 

၃၈ တူၺ်းလူႊ၊ႁိူၼ်းသူၼၼ်ႉၵိုတ်းဝႆႉတီႈသူလႄႈပဵၼ်တီႈဢၼ်ၽိတ်ႇၵူၼ်းယၢဝ်ၵူၼ်းဢေႃႈ။ 

၃၉ ၵဝ်ဝႃႈတီႈသူၸမ်းတေႃႇထိုင်ႁွတ်ႈၸူဝ်ႈဢၼ်သူဢမ်ႇပႆႇလၢတ်ႈဝႃႈ၊-ႁႂ်ႈၵေႃႉဢၼ်ပႃးတင်းဢၶႂၢင်ႉထႃႇဝရႃႉၽြႃးမႃးၼၼ်ႉမီးမင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆၼၼ်ႉၸႃႉၸဵမ်တေႃႈလဵဝ်ၼႆႉၵႂႃႇသူတၵ်းဢမ်ႇလႆႈႁၼ်ၼႃႈၵဝ်၊ဝႃႈၼင်ႇၼႆဢေႃႈ။