Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇမႃႇၵု

Chapter    ၁    ၂     ၃     ၄     ၅     ၆     ၇     ၈     ၉     ၁၀      ၁၁     ၁၂     ၁၃     ၁၄     ၁၅     ၁၆   

၁၅

ၸဝ်ႈယေႇသုၽၢႆႇၼႃႈၶုၼ်ပိလၢတ်ႉ

၁ မိူဝ်ႈၶိင်ႇၵၢင်ၼႂ်ၼၼ်ႉၵမ်းလဵဝ်ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းၵူၼ်းထုတ်ႇၵျၢမ်းတင်းၶုၼ်တီႈလုမ်းတင်းလၢႆၸိူဝ်းၼၼ်ႉတင်းသဵင်ႈတင်းလူင်ၸူႉတုမ်တိူင်ႇပၢင်ႇၵၼ်လႄႈမတ်ႉၽုၵ်ႇၸဝ်ႈယေႇသုယဝ်ႉၸင်ႇဢဝ်ၵႂႃႇဢၢပ်ႈပၼ်တီႈၶုၼ်ပိလၢတ်ႉဢေႃႈ။ 

၂ ၶုၼ်ပိလၢတ်ႉၵေႃႈထၢမ်မၼ်းၸဝ်ႈလႄႈဝႃႈ၊-မႂ်းၸႂ်ႈၶုၼ်ႁေႃၶမ်းယုတႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈၶိုၼ်းလၢတ်ႈ

လႄႈဝႃႈ၊-မႅၼ်ႈၵႃႈၼင်ႇဢၼ်မႂ်းလၢတ်ႈၼႆႉယဝ်ႉ၊ဝႃႈၼင်ႇၼႆဢေႃႈ။ 

၃ ယိတ်ႉပရေႃးႁိၵ်ႈလူင်ၸိူဝ်းၼၼ်ႉတၢင်ႇဢပျႅတ်ႈမၼ်းၸဝ်ႈၼမ်ၼႃႇဢေႃႈ။ 

၄ ၶုၼ်ပိလၢတ်ႉသမ်ႉၶိုၼ်းထၢမ်တီႈမၼ်းၸဝ်ႈထႅင်ႈလႄႈဝႃႈ၊-မႂ်းဢမ်ႇၶိုၼ်းလၢတ်ႈၵႂၢမ်းသေၶေႃႈသေၵမ်းႁိုဝ်။ တူၺ်းလူႊၶဝ်ယူႇၽၢႆႇၼိုင်ႈတင်းမႂ်းသေလႄႈၶၢမ်ႇသၢၵ်ႈသေႇၼမ်ၼႃႇယဝ်ႉ၊ဝႃႈၼႆဢေႃႈ။ 

၅ ပဵၵ်ႉသမ်ႉဝႃႈၼင်ႇၼႆသေၵေႃႈမၼ်းၸဝ်ႈဢမ်ႇၶိုၼ်းလၢတ်ႈၵႂၢမ်းသေၶေႃႈသေၵမ်းတေႃႇထိုင်ႁွတ်ႈထၼ်ႈပေႃးၶုၼ်ပိလၢတ်ႉဢၢမ်းၼႃႇလူင်လၢင်ဢေႃႈ။ 

၆ ၼႂ်းပွႆးၼၼ်ႉၶဝ်မီးထုင်းၸၢမ်ႇဢၼ်တၵ်းလႆႈပွႆႇလွတ်ႈၵူၼ်းဢၼ်တူၵ်းထွင်ႇၵေႃႉၼိုင်ႈပၼ်တီႈၵူၼ်းတင်းလၢႆၸွမ်းၼင်ႇၵႃႈဢၼ်ၶဝ်ယွၼ်းဢဝ်ၼၼ်ႉဢေႃႈ။ 

၇ မိူဝ်ႈၼၼ်ႉမီးၵူၼ်းၵေႃႉၼိုင်ႈဢၼ်မီးၸိုဝ်ပႃႇရၢပ်ႉပဢၼ်လႆႈၶၢမ်ႇတၢင်းဢၼ်မတ်ႉၽုၵ်ႇဝႆႉႁူမ်ႈလူၺ်ႈၵၼ်တင်းၵူၼ်းဢၼ်လုၵ်ႉၽိုၼ်ႉဢၼ်လႆႈဢဝ်ဢသၢၵ်ႈပိူၼ်ႈတၢႆၼႂ်းမိူဝ်ႈဢၼ်ၶဝ်လုၵ်ႉၽိုၼ်ႉၼၼ်ႉဢေႃႈ။ 

၈ မိူဝ်ႈဢၼ်ၵူၼ်းၸူႉၵူၼ်းတုမ်ၸိူဝ်းၼၼ်ႉၶိုၼ်ႈၸူးတွင်းပၢၼ်ႇႁႂ်ႈႁဵတ်းၵႃႈၼင်ႇဢၼ်ယၢမ်ႈႁဵတ်းၼၼ်ႉၸိုင်၊ၶုၼ်ပိလၢတ်ႉၵေႃႈၶိုၼ်းထၢမ်လႄႈဝႃႈ၊-

၉သူၶႂ်ႈႁႂ်ႈၵဝ်ပွႆႇလွတ်ႈၶုၼ်ႁေႃၶမ်းယုတၼႆႉႁိုဝ်၊ဝႃႈၼင်ႇၼႆဢေႃႈ။ 

၁၀ ႁဵတ်းသင်လႄႈထၢမ်ၸိူဝ်ႉၼင်ႇၼႆဝႃႈၼႆၸမ်းၶုၼ်ပိလၢတ်ႉႁူႉလွင်ႈဢၼ်ယိတ်ႉပရေႃးႁိၵ်ႈလူင်ၸိူဝ်းၼၼ်ႉမီးၸႂ်ဢၼ်သီႇၵေႉႁေႈတႃတေႃႇမၼ်းၸဝ်ႈလႄႈၸင်ႇဢဝ်မၼ်းၸဝ်ႈဢၢပ်ႈၼၼ်ႉၵူၺ်းဢေႃႈ။ 

၁၁ ယိတ်ႉပရေႃးႁိၵ်ႈလူင်ၸိူဝ်းၼၼ်ႉတိုၵ်းယူင်းၸူဝ်းဢဝ်ၵူၼ်းၸူႉၵူၼ်းတုမ်တင်းလၢႆႁႂ်ႈၶဝ်ယွၼ်းၶုၼ်ႁႂ်ႈပွႆႇလွတ်ႈပႃႇရၢပ်ႉပပၼ်တီႈၶဝ်ဢေႃႈ။ 

၁၂ ၶုၼ်ပိလၢတ်ႉၵေႃႈသမ်ႉၶိုၼ်းထၢမ်ထႅင်ႈလႄႈဝႃႈ၊-ၵဝ်တၵ်းလႆႈႁဵတ်းတီႈၵေႃႉဢၼ်သူႁွင်ႉႁိၵ်ႈၶုၼ်ႁေႃၶမ်း

ယုတၼႆႉၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၵေႃႈၶိုၼ်းႁွင်ႉသႅၼ်ႇထႅင်ႈလႄႈဝႃႈ၊-

၁၃ ဢဝ်မၼ်းတွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းသေၵမ်းၶႃႈ၊ဝႃႈၼင်ႇၼႆဢေႃႈ။ ၶုၼ်ပိလၢတ်ႉၵေႃႈထၢမ်လႄႈဝႃႈ၊-

၁၄ ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်။ မၼ်းႁဵတ်းဢပျႅတ်ႈၵႃႈသင်၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ယဵင်ႈၶႅၼ်းႁွင်ႉသႅၼ်ႇလႄႈဝႃႈ၊-ဢဝ်မၼ်းတွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းသေၵမ်းၶႃႈ၊ဝႃႈၼင်ႇၼႆဢေႃႈ။ 

၁၅ ၶုၼ်ပိလၢတ်ႉၵေႃႈမီးဢလူဝ်ႇၶႂ်ႈႁႂ်ႈၵူၼ်းတင်းလၢႆပျေႇၸႂ်လႄႈမၼ်းပွႆႇလွတ်ႈပႃႇရၢပ်ႉပပၼ်တီႈၶဝ်ဢေႃႈ။ ၸဝ်ႈယေႇသုၸမ်းၶဝ်ပေႃႉယႅၼ်ႉယဝ်ႉၸင်ႇဢဝ်ဢၢပ်ႈပၼ်ၵႂႃႇႁႂ်ႈလႆႈတွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းဢေႃႈ။ 

လုၵ်ႈသိုၵ်းလႂ်ႁဵတ်းလူလၢႆၸဝ်ႈယေႇသု

၁၆ မိူဝ်ႈၼၼ်ႉၵူၼ်းသိုၵ်းတင်းလၢႆဢဝ်မၼ်းၸဝ်ႈၵႂႃႇၵႃႈၼႂ်းတလၢင်းၵၢင်မၢၼ်ႈႁိူၼ်းတပ်ႉၶုၼ်ၼၼ်ႉသေယဝ်ႉႁႂ်ႈၵူၼ်းသိုၵ်းတင်းတပ်ႉမႃးၸူႉၵၼ်တုမ်ၵၼ်ယဝ်ႉၸင်ႇဢဝ်ၶူဝ်းၼုင်ႈဢၼ်လႅင်ႊၵမ်ႇၼုင်ႈပၼ်မၼ်းၸဝ်ႈဢေႃႈ။ 

၁၇ ၶဝ်ဢဝ်ၼၢမ်သၢၼ်ႁဵတ်းပၢၼ်းၵုမ်းသေယဝ်ႉတၢင်ႇသႂ်ႇၵႃႈၼိူဝ်ႁူဝ်မၼ်းၸဝ်ႈသေယဝ်ႉတၵ်ႉလၢတ်ႈဝႃႈ၊-

၁၈ ၶုၼ်ႁေႃၶမ်းယုတတီႈၶႃႈဢိူၺ်း၊ႁႂ်ႈၸဝ်ႈႁဝ်းမီးမင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆဢေႃႈ။ 

၁၉ ၶဝ်ဢဝ်မႆႉဢေႃႈပေႃႉယႅၼ်ႉႁူဝ်မၼ်းၸဝ်ႈသေယဝ်ႉထုမ်ႇၼမ်ႉလၢႆးသႂ်ႇတီႈမၼ်းၸဝ်ႈယဝ်ႉၸင်ႇၶုပ်ႉၶဝ်ႇၵူမ်ႈမူပ်ႇပၼ်မၼ်းၸဝ်ႈဢေႃႈ။ 

၂၀ လိုၼ်းသေၶဝ်ႁဵတ်းပျၢၵ်ႈတီႈမၼ်းၸဝ်ႈယဝ်ႉၶဝ်လွၼ်ႈထွတ်ႇဢဝ်ၶူဝ်းၼုင်ႈဢၼ်

လႅင်ႊၵမ်ႇၼၼ်ႉသေလႄႈသမ်ႉၶိုၼ်းဢဝ်ၶူဝ်းၼုင်ႈမၼ်းၸဝ်ႈၼုင်ႈပၼ်ယဝ်ႉၸင်ႇဢဝ်ဢွၵ်ႇၵႂႃႇႁႂ်ႈလႆႈတွၵ်ႇၵႃႈၼိူဝ်သဝ်လၵ်းဝႃးမိုဝ်းဢေႃႈ။ 

ၸဝ်ႈယေႇသုၶၢမ်ႇတၢင်းတၢႆ

၂၁ ၶဝ်ၼၼ်ႉႁဵတ်းပႄႉႁဵတ်းၼႅင်ႇႁႂ်ႈသိမုၼ်ႇဢၼ်ပဵၼ်ၵူၼ်းမိူင်းၵုရေႇၼေႇဢၼ်ပဵၼ်ပေႃႈဢႃႇလေႇၸၼ်းတြႃးတင်းရုၽုဢၼ်လုၵ်ႉသေၵႃႈတီႈဝၢၼ်ႈထိူၼ်ႇပႆတၢင်းမႃးၼၼ်ႉႁၢပ်ႇဢဝ်သဝ်လၵ်းဝႃးမိုဝ်းမၼ်းၸဝ်ႈၵႂႃႇဢေႃႈ။ 

၂၂ ၶဝ်ဢဝ်မၼ်းၸဝ်ႈၵႂႃႇၵႃႈတီႈလွႆၵေႃးလၵေႃးထဢၼ်ၶႂ်ႈပွင်ႇဝႃႈလွႆၵွၵ်းႁူဝ်ၼၼ်ႉယဝ်ႉၸင်ႇ

၂၃ ဢဝ်ၼမ်ႉပုင်းယေႇဢၼ်လေႃးၵၼ်တင်းမူႉရၢၼ်းၼၼ်ႉပၼ်တီႈမၼ်းၸဝ်ႈဢေႃႈ။ မၼ်းၸဝ်ႈဢမ်ႇၶၢမ်ႇဢမ်ႇဢဝ်။ 

၂၄ ၶဝ်ဢဝ်မၼ်းၸဝ်ႈတွၵ်ႇၵႃႈၼိူဝ်သဝ်လၵ်းဝႃးမိုဝ်းယဝ်ႉၸင်ႇဢဝ်ၶူဝ်းၼုင်ႈမၼ်းၸဝ်ႈတူၵ်းၸႃႇၵွၵ်ႉလွင်ႈဢၼ်ၽူႈလႂ်တၵ်းလႆႈဢဝ်ဢၼ်လႂ်ၼၼ်ႉသေလႄႈၽႄမႅင်ႇပၼ်ၵၼ်ဢေႃႈ။ 

၂၅ ၶိင်ႇဢၼ်မၼ်းၸဝ်ႈၶၢမ်ႇတၢင်းဢၼ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းၼၼ်ႉပဵၼ်ၶိင်ႇသၢမ်ၼႃႇရီႇဢေႃႈ။ 

၂၆ လိၵ်ႈဢၼ်တႅမ်ႈလႄႈၽုၺ်ႇၼႄဢပျႅတ်ႈမၼ်းၸဝ်ႈၼၼ်ႉၸမ်းတႅမ်ႈဝႆႉဝႃႈ၊-ၵေႃႉၼႆႉပဵၼ်ၶုၼ်ႁေႃၶမ်းယုတဢေႃႈ၊ဝႃႈၼင်ႇၼႆဢေႃႈ။ 

၂၇ မိူဝ်ႈၼၼ်ႉၶဝ်ဢဝ်ၸူၼ်သွင်ၵေႃႉတွၵ်ႇၵႃႈၼိူဝ်သဝ်လၵ်းဝႃးမိုဝ်းသေယဝ်ႉပုၵ်းတင်ႈဝႆႉတီႈၽၢႆႇၶႂႃမၼ်းၸဝ်ႈၵေႃႉၼိုင်ႈတီႈၽၢႆႇသၢႆႉမၼ်းၸဝ်ႈၵေႃႉၼိုင်ႈဢေႃႈ။ 

၂၈ ဢၼ်မႃးၼႂ်းၵျၢမ်းလိၵ်ႈလႄႈဝႃႈ၊-မၼ်းလႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးလူၺ်ၵၼ်တင်းၶဝ်ၸိူဝ်းဢၼ်ဢမ်ႇတြႃးတင်းလၢႆၼၼ်ႉဢေႃႈ၊ဝႃႈၼင်ႇၼႆၼၼ်ႉလႆႈတဵမ်ထူၼ်ႈမိူဝ်ႈၼၼ်ႉဢေႃႈ။ 

၂၉ ၶဝ်ၸိူဝ်းဢၼ်ၵႂႃႇမႃးၵႃႈတီႈႁိမ်းမၼ်းၸဝ်ႈၸိူဝ်းၼၼ်ႉၵေႃႈသေႉသွမ်းတၢင်ႇဢပျႅတ်ႈတီႈမၼ်းၸဝ်ႈဝၢႆႇႁူဝ်ၶွၼ်းႁူဝ်တူဝ်ၸဝ်ႈၵဝ်ႇယူႇသေလႄႈလၢတ်ႈဝႃႈ၊-ႁေႉ၊ၵေႃႉဢၼ်တယေႃႉပႅတ်ႈပိၵ်ႉမၢၼ်ႇၸဝ်ႈလႄႈၼႂ်းသၢမ်ဝၼ်းၵူၺ်းတၵ်းၶိုၼ်းမႄးႁဵတ်းၼႆႉဢိူၺ်း၊တူဝ်ၸဝ်ႈၵဝ်ႇၵႄႇၶျွတ်ႈဢဝ်တူဝ်ၸဝ်ႈၵဝ်ႇလႄႉ။ 

၃၀ လူင်းသေၵႃႈၼိူဝ်သဝ်လၵ်းဝႃးမိုဝ်းမႃးလႄႈ၊ဝႃႈၼင်ႇၼႆဢေႃႈ။ 

၃၁ မိူၼ်ၼင်ၼၼ်ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းလၢႆၸိူဝ်းၼၼ်ႉၵေႃႈၵေႃႉၼိုင်ႈလႄႈၵေႃႉၼိုင်ႈႁဵတ်းပျၢၵ်ႈႁဵတ်းၶူဝ်တေႃႇၵၼ်လႄႈဝႃႈ၊-ၵေႃႉၼႆႉၸၢင်ႊၵႄႇၶျွတ်ႈဢဝ်ပိူၼ်ႈဢိူဝ်း။ တူဝ်ၸဝ်ႈၵဝ်ႇဢမ်ႇၵႄႇၶျွတ်ႈဢဝ်တူဝ်ၸဝ်ႈၵဝ်ႇလူင်ပေႇ။ 

၃၂ ၼင်ႇႁိုဝ်ႁဝ်းတၵ်းႁၼ်လႄႈယုမ်ႇမၢတ်ႈၼၼ်ႉတေႃႈလဵဝ်ၼႆႉႁႂ်ႈၸဝ်ႈၶရိၸ်ႉၶုၼ်ႁေႃၶမ်းဢိသရေႇလၼႆႉလူင်းသေၵႃႈၼိူဝ်သဝ်လၵ်းဝႃးမိုဝ်းၼႆႉမႃးသေၵမ်း၊ဝႃႈၼင်ႇၼႆဢေႃႈ။ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းႁိမ်းမၼ်းၸဝ်ႈၼၼ်ႉၵေႃႈသေႉသွမ်းတၢင်ႇဢပျႅတ်ႈမၼ်းၸဝ်ႈဢေႃႈ။ 

၃၃ မိူဝ်ႈဢၼ်ႁွတ်ႈထိုင်ၶိင်ႇႁူၵ်းၼႃႇရီႇၸိုင်ၸႃႉၸဵမ်ၶိင်ႇၼၼ်ႉတေႃႇထိုင်ႁွတ်ႈၵဝ်ႈၼႃႇရီႇပဵၼ်

ဢၼ်လပ်းသိင်ႇၵႂႃႇၽိတ်းၽိတ်းတင်းမိူင်းဢေႃႈ။ 

၃၄ မိူဝ်ႈၶိင်ႇၵဝ်ႈၼႃႇရီႇၼၼ်ႉၸဝ်ႈယေႇသုႁဵတ်းတင်းသဵင်ဢၼ်ယႂ်ႇၼႃႇႁွင်ႉလႄႈဝႃႈ၊-ဢေးလိ၊ဢေးလိ၊လႃႇမႃႇသႃႇပၵ်ႉသၼိ၊ဝႃႈၼင်ႇၼႆဢေႃႈ။ မၼ်းပွင်ႇ

ဝႃႈ၊-ၽြႃးၵဝ်ၶႃႈ၊ၽြႃးၵဝ်ၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸုၼ်ႉပႅတ်ႈၵဝ်ၶႃႈတီႈၶႃႈ၊ဝႃႈၼင်ႇၼႆဢေႃႈ။ 

၃၅ ၵူၼ်းၵမ်ႈၽွင်ႈဢၼ်ၸုၵ်းယူႇၵႃႈတီႈႁိမ်းၼၼ်ႉငိၼ်းလႄႈလၢတ်ႈဝႃႈ၊-တူၺ်းလူႊမၼ်းႁွင်ႉႁႃဢေးလိယဢေႃႈ၊ဝႃႈၼင်ႇၼႆဢေႃႈ။ 

၃၆ ၵူၼ်းၵေႃႉၼိုင်ႈၶုၼ်ႇလႅၼ်ႈၵႂႃႇဢဝ်ႁဵပ်းၼမ်ႉဢၼ်ၼိုင်ႈၸုမ်ႇၼမ်ႉပုင်းယေႇသေယဝ်ႉသႂ်ႇပၢႆမႆႉဢေႃႈသေလႄႈပၼ်ႁႂ်ႈမၼ်းၸဝ်ႈၵိၼ်လႄႈဝႃႈ၊-ယႃႇမၼ်းတႃႉ။ ဢေးလိယတၵ်းမႃးၶျႃး

မၼ်းလူင်းႁိုဝ်တၵ်းဢမ်ႇမႃးၶျႃးမၼ်းလူင်းႁိုဝ်ဢၼ်ဝႃႈၼၼ်ႉႁဝ်းပႂ်ႉတူၺ်းလူးၵွၼ်ႇတႃႉႁဝ်း၊ဝႃႈၼင်ႇၼႆဢေႃႈ။ 

၃၇ ၸဝ်ႈယေႇသုႁဵတ်းတင်းသဵင်ဢၼ်ယႂ်ႇၼႃႇႁွင်ႉသေယဝ်ႉပူတ်းၸႂ်မၼ်းၸဝ်ႈသေဢေႃႈ။ 

၃၈ မိူဝ်ႈၼၼ်ႉၽႃႈၵင်ႈႁိူၼ်းပိၵ်ႉမၢၼ်ႇၸဝ်ႈသိၵ်ႇၶၢတ်ႇၵႂႃႇၸႃႉၸဵမ်ၵႃႈၼိူဝ်တေႃႇထိုင်ႁွတ်ႈၵႃႈတႂ်ႈဢေႃႈ။ 

၃၉ တပ်ႉမူးဢၼ်ၸုၵ်းတေႃႇၼႃႈၵၼ်တင်းမၼ်းၸဝ်ႈယူႇၼၼ်ႉမိူဝ်ႈဢၼ်လႆႈႁၼ်မၼ်းၸဝ်ႈႁွင်ႉသေလႄႈပူတ်းၸႂ်ၸိူဝ်ႉၼင်ႇၼၼ်ၼၼ်ႉၸိုင်မၼ်းလၢတ်ႈဝႃႈ၊-ၸႂ်ႈတႄႉယဝ်ႉ။ ၵေႃႉၼႆႉပဵၼ်လုၵ်ႈၽြႃးပဵၼ်ၸဝ်ႈတႄႉဢေႃႈ၊ဝႃႈၼင်ႇၼႆဢေႃႈ။ 

၄၀ မေႈယိင်းတင်းလၢႆၵေႃႈယူႇတီႈဢၼ်ၵႆသေလႄႈလွမ်တူၺ်းယူႇဢေႃႈ။ ၼႂ်းမေႈယိင်းၸိူဝ်းၼၼ်ႉပႃးမႃႇရိမႃႇၵတလ၊မႃႇရိဢၼ်ပဵၼ်မေႈယႃႇၵုပ်ႉတင်းယုဝ်းသေႇ၊သႃႇလုမ်ႇဢၼ်ၸွမ်းပႃႈလင်ၸဝ်ႈသေလႄႈႁဵတ်းလဵင်ႉႁဵတ်းလူမၼ်းၸဝ်ႈၼႂ်းမိူဝ်ႈဢၼ်မၼ်းၸဝ်ႈမီးယူႇၼႂ်းမိူင်းၵႃႇလိလႄးၼၼ်ႉဢေႃႈ။ 

၄၁ မေႈယိင်းတၢင်ႇၵေႃႉၼမ်ၼႃႇဢၼ်လုၵ်ႉသေၵႃႈတီႈဝဵင်းယေႇရုသလႅမ်ႇၸွမ်းပႃႈလင်မၼ်းၸဝ်ႈမႃးၸိူဝ်းၼၼ်ႉၵေႃႈမီးဢေႃႈ။ 

၄၂ ပိူဝ်ႈဢၼ်ဝၼ်းၼၼ်ႉပဵၼ်ဝၼ်းၽိတ်ႈလႄႈမိူဝ်ႈဢၼ်ႁွတ်ႈထိုင်ၶိင်ႇၵၢင်ၶမ်ႈၼၼ်ႉယုဝ်းသႅပ်ႉ၊ဢၼ်ပဵၼ်ၵူၼ်းဝဵင်းဢရိမသေႇဢၼ်ပဵၼ်ၶုၼ်တီႈလုမ်းလူင်ဢၼ်မီးသရေႇဢၼ်ပဵၼ်ၵေႃႉဢၼ်

၄၃ မုင်ႈထႃႈမွင်းထႃႈမိူင်းၽြႃးပဵၼ်ၸဝ်ႈၼၼ်ႉမၼ်းၶဝ်ႈၸူးတီႈၶုၼ်ပိလၢတ်ႉႁတ်းႁတ်းႁၢၼ်ႁၢၼ်သေလႄႈယွၼ်းဢဝ်တူဝ်တၢႆၸဝ်ႈယေႇသုဢေႃႈ။ 

၄၄ မိူဝ်ႈဢၼ်လႆႈႁူႉမၼ်းၸဝ်ႈတၢႆယဝ်ႉၼၼ်ႉၶုၼ်ပိလၢတ်ႉမီးတၢင်းဢၼ်ဢၢမ်းၼႃႇလူင်လၢင်သေယဝ်ႉႁွင်ႉဢဝ်တပ်ႉမူးမႃးလႄႈထၢမ်ဝႃႈ၊-ၸွင်ႇမၼ်းၸဝ်ႈတၢႆယဝ်ႉႁိုဝ်၊ဢၼ်ဝႃႈၼၼ်ႉဢေႃႈ။ 

၄၅ မိူဝ်ႈဢၼ်ငိၼ်းၵႂၢမ်းတပ်ႉမူးလွင်ႈဢၼ်မၼ်းၸဝ်ႈတၢႆယဝ်ႉၼၼ်ႉၸိုင်မၼ်းဢဝ်တူဝ်တၢႆၸဝ်ႈယေႇသုဢၢပ်ႈပၼ်တီႈယုဝ်းသႅပ်ႉဢေႃႈ။ 

၄၆ ယုဝ်းသႅပ်ႉၵေႃႈၶျႃးတူဝ်တၢႆမၼ်းၸဝ်ႈလူင်းယဝ်ႉၸင်ႇဢဝ်တင်းပိၵ်ႈၶျေႃးၶဵၼ်းႁေႃႇသေယဝ်ႉသႂၢင်းသႂ်ႇဝႆႉၵႃႈၼႂ်းၶုမ်သၢင်းၶျႅင်းဢၼ်ၶုတ်ႉမုင်ဝႆႉၵႃႈၼႂ်းမၢၵ်ႇႁိၼ်ၼၼ်ႉဢေႃႈ။ ၶႅပ်းမၢၵ်ႇႁိၼ်ၶႅပ်းၼိုင်ႈၵေႃႈမၼ်းၵိင်ႈလႄႈဢိုတ်းႁူးၶုမ်သၢင်းၶျႅင်းဝႆႉဢေႃႈ။ 

၄၇ မႃႇရိမႃႇၵတလတင်းမႃႇရိဢၼ်ပဵၼ်မေႈယုဝ်းသေႇၼၼ်ႉၶဝ်ႁူႉႁၼ်တီႈဢၼ်ဝႆႉတူဝ်တၢႆမၼ်းၸဝ်ႈၼၼ်ႉဢေႃႈ။