Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၁၆ 

ၽူႈပႂ်ႉထိင်းငိုၼ်းၶွင်ႇၶူဝ်းဢၼ်လၵ်းလႅမ်

၁ မၼ်းၸဝ်ႈသမ်ႉလၢတ်ႈတီႈတပႄးၸဝ်ႈၸိူဝ်းၼၼ်ႉထႅင်ႈလႄႈဝႃႈ၊-တီႈၵူၼ်းမၢၵ်ႈၵူၼ်းမီးၵေႃႉၼိုင်ႈမၼ်းမီးၽူႈပႂ်ႉထိင်းငိုၼ်းၶွင်ႇၶူဝ်းၵေႃႉၼိုင်ႈဢေႃႈ။မိူဝ်ႈဢၼ်ပိူၼ်ႈတၢင်ႇဢပျႅတ်ႈတီႈၽူႈပႂ်ႉထိင်းငိုၼ်းၶွင်ႇၶူဝ်းလွင်ႈဢၼ်မၼ်းယႃႉဢုၵ်ႉၸႃႇၶူဝ်းလဵင်းၸဝ်ႈမၼ်းၼၼ်ႉၸိုင်ၸဝ်ႈမၼ်းႁွင်ႉဢဝ်မၼ်းမႃးသေယဝ်ႉလၢတ်ႈဝႃႈ၊-

၂ ၵႂၢမ်းဢၼ်ၵဝ်ငိၼ်းလွင်ႈမႂ်းၼႆႉပဵၼ်ၸိူဝ်ႉၼင်ႇႁိုဝ်။ဢၢပ်ႈၸရၢင်းဢၼ်ၸၢပ်ႈသႅင်ႇၵၼ်တင်းငိုၼ်းၶွင်ၶူဝ်းၸိူဝ်းၼၼ်ႉတီႈၵဝ်တႃႉ။ၸႃႉၸဵမ်မိူဝ်ႈလဵဝ်ၼႆႉၵႂႃႇမႂ်းဢမ်ႇလႆႈႁဵတ်းၽူႈပႂ်ႉထိင်းငိုၼ်းၶွင်ၶူဝ်းၵဝ်ထႅင်ႈယဝ်ႉ၊ဝႃႈၼင်ႇၼႆဢေႃႈ။

၃ မိူဝ်ႈၼၼ်ႉၽၼ်ႇၽူႈပႂ်ႉထိင်းငိုၼ်းၶွင်ၶူဝ်းၼၼ်ႉၵျၢမ်ႇပွင်ၼႂ်းၸႂ်လႄႈဝႃႈ၊-ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်။ၸဝ်ႈၵဝ်တၵ်းၼုၵ်ႈဢဝ်ဢရႃႇၼၼ်ႉသေၵႃႈတီႈၵဝ်ယဝ်ႉ။ၵဝ်ဢမ်ႇမီးႁႅင်းႁႂ်ႈလႆႈၵႂႃႇႁဵတ်းၵူၼ်းဝဵၵ်ႉလိၼ်ၶုတ်ႉလိၼ်။ႁႂ်ႈလႆႈယွၼ်းပိူၼ်ႈၵိၼ်ၵေႃႈၵဝ်လီဢၢႆပိူၼ်ႈဢေႃႈ။

၄ ဝၢႆးသေၵဝ်တူၵ်းဢရႃႇယဝ်ႉၸိုင်ၼင်ႇႁိုဝ်ပိူၼ်ႈတၵ်းႁပ်ႉၵဝ်ၵႃႈၼႂ်းႁိူၼ်းၶဝ်ၼၼ်ႉၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်ဢၼ်ဝႃႈၼၼ်ႉၵဝ်ႁူႉယဝ်ႉ၊ဝႃႈၼင်ႇၼႆသေယဝ်ႉမၼ်းႁွင်ႉဢဝ်ၵူၼ်းဢၼ်ထုၵ်ႇၼီႈတီႈၸဝ်ႈမၼ်းၵူႈၵေႃႉမႃးသေလႄႈထၢမ်ၵေႃႉၼိုင်ႈလႄႈဝႃႈ၊-

၅ ၼီႈဢၼ်မႂ်းလူဝ်ႇတႅၼ်းပၼ်တီႈၸဝ်ႈၵဝ်ၼၼ်ႉမီးၼမ်ၵႃႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၵေႃႉၼၼ်ႉၵေႃႈလၢတ်ႈလႄႈဝႃႈ၊-ၵဝ်ၶႃႈထုၵ်ႇၼီႈၼမ်ႉမၼ်းပၢၵ်ႇပုင်းၶႃႈဢေႃႈ၊ဝႃႈၼင်ႇၼႆဢေႃႈ။

၆ ၽူႈပႂ်ႉထိင်းငိုၼ်းၶွင်ႇၶူဝ်းၼၼ်ႉၵေႃႈလၢတ်ႈဝႃႈ၊-ဢဝ်ၸရၢင်းမႂ်းလႄႈၼင်ႈၶၼ်ၶၼ်ၽႂ်းၽႂ်းတႃႉ။တႅမ်ႈဝႆႉႁႃႈသိပ်းၵူၺ်းတႃႉ၊ဝႃႈၼင်ႇၼႆဢေႃႈ။

၇ လိုၼ်းၼၼ်ႉမၼ်းသမ်ႉႁွင်ႉဢဝ်တၢင်ႇၵေႃႉမႃးသေလႄႈထၢမ်ဝႃႈ၊-ၼီႈဢၼ်မႂ်းထုၵ်ႇတီႈၸဝ်ႈၵဝ်ၼၼ်ႉမီးၼမ်ၵႃႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၵေႃႉၼၼ်ႉၵေႃႈဝႃႈ၊-ၵဝ်ၶႃႈထုၵ်ႇၼီႈၶဝ်ႈၵျုင်ႇပၢၵ်ႇတၢင်ၶႃႈဢေႃႈ၊ဝႃႈၼင်ႇၼႆဢေႃႈ။ၽူႈပႂ်ႉထိင်းငိုၼ်းၶွင်ၶူဝ်းၼၼ်ႉၵေႃႈလၢတ်ႈဝႃႈ၊-ဢဝ်ၸရၢင်းမႂ်းသေလႄႈတႅမ်ႈဝႆႉပႅတ်ႇသိပ်းၵူၺ်းတႃႉ၊ဝႃႈၼင်ႇၼႆဢေႃႈ။

၈ ၵွပ်ႈပိူဝ်ႈၽူႈပႂ်ႉထိင်းငိုၼ်းၶွင်ႇၶူဝ်းဢၼ်ဢမ်ႇတြႃးၼၼ်ႉႁဵတ်းတၢင်းဢၼ်လၵ်းလႅမ်ၸိူဝ်ႉၼင်ႇၼၼ်လႄႈၸဝ်ႈမၼ်းယွင်ႈမၼ်းဢေႃႈ။လွင်ႈမၼ်းၸမ်းၵူၼ်းလေႃးၵီႇတင်းလၢႆယဵင်ႈၶႅၼ်းလၵ်းလႅမ်ၼႃႇသေၵူၼ်းဢၼ်ႁွတ်ႈထိုင်ၵႃႈၼႂ်းဢၼ်လႅင်းတင်းလၢႆၼၼ်ႉဢေႃႈ။

၉ ၵဝ်သမ်ႉဝႃႈထႅင်ႈၸမ်းမိူဝ်ႈဢၼ်ၸေးၸိမ်ႇလေႃးၵီႇသဵင်ႈသုတ်းၼၼ်ႉၼင်ႇႁိုဝ်သူတၵ်းလႆႈမီးတၢင်းဢၼ်ႁပ်ႉတုင်းဢဝ်သူၵႃႈၼႂ်းသုမ်ႉထဵင်ဢၼ်တႄႇယူႇသေႇသေႇၼၼ်ႉၸိုင်ဢဝ်ၸေးၸိမ်ႇလေႃးၵီႇၼၼ်ႉသေလႄႈႁဵတ်းႁႂ်ႈမီးၵေႃႉမီးသေႈဝႆႉတႃႉ။

၁၀ ၵေႃႉဢၼ်မီးသႅတ်ႈၸႃႇၵႃႈတီႈလွင်ႈတၢင်းဢၼ်လဵၵ်ႉဢၼ်ၵေႇသေပိူၼ်ႈၼၼ်ႉၵႃႈတီႈလွင်ႈတၢင်းဢၼ်ယႂ်ႇဢၼ်လူင်ၵေႃႈတၵ်းမီးသႅတ်ႈၸႃႇယူႇဢေႃႈ။ၵေႃႉဢၼ်ဢမ်ႇမီးသႅတ်ႈၸႃႇၵႃႈတီႈလွင်ႈတၢင်းဢၼ်လဵၵ်ႉဢၼ်ၵေႇသေပိူၼ်ႈၼၼ်ႉၵႃႈတီႈလွင်ႈတၢင်းဢၼ်ယႂ်ႇဢၼ်လူင်ၼၼ်ႉၵေႃႈတၵ်းဢမ်ႇမီးသႅတ်ႈၸႃႇ။

၁၁ ပိူဝ်ႈၼႆလႄႈပေႃးသူဢမ်ႇမီးသႅတ်ႈၸႃႇၵႃႈတီႈၸေးၸိမ်ႇလေႃးၵီႇၼၼ်ႉၸိုင်ၽူႈလႂ်တၵ်းဢဝ်ၸေးၸိမ်ႇဢၼ်ၸိုဝ်ႈဢၼ်ၸႂ်ႈၼၼ်ႉဢၢပ်ႈပၼ်တီႈသူ။

၁၂ ပေႃးသူယင်းဢမ်ႇမီးသႅတ်ႈၸႃႇၵႃႈၼိူဝ်ၶွင်ၶူဝ်းပိူၼ်ႈတၢင်ႇၵေႃႉၸိုင်သူတၵ်းမီးသႅတ်ႈၸႃႇၵႃႈၼိူဝ်ၶွင်ၶူဝ်းတူဝ်ၸဝ်ႈၵဝ်ႇၸိူဝ်ႉၼင်ႇႁိုဝ်။

၁၃ ၵူၼ်းၸႂ်ႉၵူၼ်းသွႆၵေႃႉလႂ်သေဢမ်ႇဝႃႈဢမ်ႇၶၢမ်ႇတၢင်းဢၼ်ၸဝ်ႈသွင်ၸဝ်ႈၸႂ်ႉသွႆၼၼ်ႉလႆႈ။တၵ်းၸင်းၸဝ်ႈၵေႃႉၼိုင်ႈလႄႈႁၵ်ႉၸဝ်ႈၵေႃႉၼိုင်ႈဢေႃႈ။တၵ်းဢိင်ပိုင်ႈၸဝ်ႈၵေႃႉၼိုင်ႈလႄႈႁဵတ်းဢမ်ႇပေႃးၼင်ႇႁိုဝ်တီႈၸဝ်ႈၵေႃႉၼိုင်ႈဢေႃႈ။သူဢမ်ႇၶၢမ်ႇတၢင်းဢၼ်ၽြႃးပဵၼ်ၸဝ်ႈၸႂ်ႉသွႆဢိၵ်ႇတင်းတၢင်းဢၼ်ၸေးၸိမ်ႇလေႃးၵီႇၸႂ်ႉသွႆၼၼ်ႉလႆႈ၊ဝႃႈၼင်ႇၼႆဢေႃႈ။

၁၄ ၽႃႇရိသေးဢၼ်ၸႂ်ၸပ်းၸႂ်ၸွႆးငိုၼ်းၼၼ်ႉငိၼ်းၵႂၢမ်းၼၼ်ႉသေယဝ်ႉႁဵတ်းပျၢၵ်ႈႁဵတ်းၶူဝ်မၼ်းၸဝ်ႈဢေႃႈ။မၼ်းၸဝ်ႈၵေႃႈလၢတ်ႈလႄႈဝႃႈ၊-

၁၅ ပဵၵ်ႉသမ်ႉသူႁဵတ်းၸိူဝ်ႉၼင်ႇႁၢင်ႊသိုဝ်ႈတေႃႇၵႃႈတီႈၽၢႆႇၼႃႈၵူၼ်းတင်းလၢႆသေၵေႃႈၽြႃးပဵၼ်ၸဝ်ႈႁူႉႁၼ်ႁူဝ်ၸႂ်သူယူႇဢေႃႈ။လွင်ႈတၢင်းဢၼ်ၸွမ်းၼင်ႇသၽေႃးၵူၼ်းလႄႈႁဝ်းဝႃႈပဵၼ်ဢၼ်လီဢၼ်မျၢတ်ႈၼၼ်ႉပဵၼ်လွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။

၁၆ ၸူဝ်ႈဢၼ်ယုဝ်းႁၢၼ်ႇဢမ်ႇပႆႇၽႅဝ်မႃးၼၼ်ႉၸိုင်မီးၵျၢမ်းပိင်းၺၢပ်ႈတိတင်းၵျၢမ်းဢၼႃႇၵၢတ်ႈတိယူႇဢေႃႈ။ၸႃႉၸဵမ်ၸူဝ်ႈပၢၼ်ၼၼ်ႉမၼ်းလႄႇႁေႃးလၢတ်ႈတြႃးသတၢင်းသိူဝ်းပျေႃႇဢၼ်ၸၢပ်ႈသႅင်ႇၵၼ်တင်းမိူင်းၽြႃးပဵၼ်ၸဝ်ႈယူႇဢေႃႈ။ၵူၼ်းတင်းလၢႆၵေႃႈၶတ်းၸႂ်ႁႂ်ႈလႆႈၶဝ်ႈၵႃႈၼႂ်းမိူင်းၸဝ်ႈဢေႃႈ။

၁၇ ၵၢင်ႁၢဝ်တင်းလိၼ်မိူင်းယင်းတလေူႉလႅဝ်ငၢႆႈသေၸမ်ႈမိုၵ်ႉၸမ်ႈၼိုင်ႈဢၼ်လဵၵ်ႉသေပိူၼ်ႈၼႂ်းၵျၢမ်းပိင်းၺၢပ်ႈတိတူၵ်းႁၢႆၼၼ်ႉဢေႃႈ။

၁၈ ၽူႈလႂ်သေဢမ်ႇဝႃႈၵေႃႉဢၼ်ပႅတ်ႈမေးမၼ်းသေလႄႈသမ်ႉဢဝ်မေးထႅင်ႈတၢင်ႇၵေႃႉၼၼ်ႉၵေႃႉၼၼ်ႉၽိတ်းပိူင်ႈၵႃႇမေႇသုဢေႃႈ။ၵေႃႉဢၼ်ဢဝ်မေႈႁၢင်ႉၼၼ်ႉၵေႃႈၽိတ်းပိူင်ႈမေးပိူၼ်ႈဢေႃႈ၊ဝႃႈၼင်ႇၼႆဢေႃႈ။

သထေးလူင်တင်းၵူၼ်းယွၼ်း

၁၉ မၼ်းၸဝ်ႈသမ်ႉဝႃႈထႅင်ႈၸမ်း၊-မီးသထေးၵေႃႉၼိုင်ႈဢေႃႈ။မၼ်းၼုင်ႈမႆႊၶုဝ်းၼုင်ႈဢၼ်လႅင်ႊၵမ်ႇဢိၵ်ႇတင်းပိၵ်ႈၶျေႃးသေလႄႈမူၼ်ႈပျေႃႇယူႇၵႃႈၼႂ်းၵႃႇမၵုင်ႇၵူႈဝၼ်းဢေႃႈ။

၂၀ မီးၵူၼ်းၽၢၼ်ၵေႃႉၼိုင်ႈဢၼ်လႆႈၸိုဝ်လႃႇၸရုၼၼ်ႉပဵၼ်တုမ်ႇၸဵပ်းတင်းတူဝ်လႄႈမီးၸႂ်ဢၼ်ၶႂ်ႈၵဵပ်းၵိၼ်ၶဝ်ႈဢၼ်ယွႆႊဢၼ်ယဵမ်းဢၼ်တူၵ်းၵႃႈတႂ်ႈၽိူၼ်တီႈၵိၼ်သထေးလူင်ၼၼ်ႉလႄႈမၼ်းၼွၼ်းၶူတ်းယူႇၵႃႈတီႈၽၢႆႇၼႃႈၽၵ်းတူႁိူၼ်းသထေးလူင်ၼၼ်ႉဢေႃႈ။

၂၁ မႃတင်းလၢႆၵေႃႈမႃႈလႄႈလေးတုမ်ႇၸဵပ်းမၼ်းဢေႃႈ။

၂၂ ဝၼ်းၼိုင်ႈၵူၼ်းၽၢၼ်ၵေႃႉၼၼ်ႉတၢႆၵႂႃႇလႄႈတမၢၼ်ႇၵၢင်ႁၢဝ်တင်းလၢႆဢဝ်မၼ်းၵႂႃႇသူင်ႇၵႃႈတီႈၼႂ်းဝၢင်ႁူဝ်ဢူၵ်းဢႃႇပြႁၢမ်ႇဢေႃႈ။သထေးလူင်ၼၼ်ႉၵေႃႈတၢႆၵႂႃႇလႄႈလႆႈၶၢမ်ႇတၢင်းဢၼ်သၢင်းၵျူဝ်ႇဢေႃႈ။

၂၃ မၼ်းလႆႈၶၢမ်ႇဝူၺ်ႇတၼႃႇၼမ်ၼႃႇလူင်လၢင်ၵႃႈၼႂ်းမိူင်းမႃႇရၼႃႉပုၼ်ႉလႄႈမၼ်းမုင်ႈတူၺ်းလႆႈႁၼ်ဢႃႇပြႁၢမ်ႇမီးယူႇတီႈဢၼ်ၵႆၼႃႇဢိၵ်ႇတင်းလႃႇၸရုမီးယူႇၵႃႈၼႂ်းဝၢင်ႁူဝ်ဢူၵ်းမၼ်းၼၼ်ႉၸိုင်၊မၼ်းႁွင်ႉသႅၼ်ႇလႄႈဝႃႈ၊ပေႃႈဢႃႇပြႁၢမ်ႇၶႃႈဢိူၺ်း။

၂၄ ဢိတ်းလူၵဝ်ၶႃႈသေၵမ်းၶႃႈ။ၵဝ်ၶႃႈလႆႈၶၢမ်ႇၵိၼ်းၼႃႇလူင်လၢင်ၵႃႈၼႂ်းၽႆးလူင်ၼႆႉဢေႃႈ။ပွႆႇၸႂ်ႉလႃႇၸရုမႃးႁႂ်ႈဢဝ်တင်းပၢႆမိုဝ်းမၼ်းၸုမ်ႇၼမ်ႉသေလႄႈႁႂ်ႈလိၼ်ႉၵဝ်ၶႃႈလႆႈၵတ်းသေၵမ်းၶႃႈ၊ဝႃႈၼင်ႇၼႆဢေႃႈ။

၂၅ ဢႃႇပြႁၢမ်ႇၵေႃႈလၢတ်ႈလႄႈဝႃႈ၊-လုၵ်ႈၸၢႆးၵဝ်ဢိူၺ်း။ၶုၵ်းၸႂ်လႆႈၶႆႈၸႂ်ထူပ်းမိူဝ်ႈဢၼ်မႂ်းယင်းဢသၢၵ်ႈလိပ်းယူႇၼၼ်ႉမႂ်းၵတ်းယဵၼ်ၶျၢမ်းသႃႇၵႃႈႁိုဝ်၊လႃႇၸရုလႆႈၶၢမ်ႇတၢင်းယၢၵ်ႈတၢင်းၽၢၼ်ၸိူဝ်ႉၼင်ႇႁိုဝ်ၼၼ်ႉတႃႉ။တေႃႈလဵဝ်ၼႆႉၸမ်းမၼ်းမီးလွင်ႈတၢင်းဢၼ်သၢၵ်ႈသႃႇၵႃႈတီႈၼႆႉဢေႃႈ။

၂၆ မႂ်းသမ်ႉလႆႈၶၢမ်ႇတုၵ်ႉၶႃႉဝူၺ်ႇတၼႃႇဢေႃႈ။လိူဝ်သေၼၼ်ႉဢမ်ႇၵႃးၼႂ်းဝူင်ႈၵၢင်ႁဝ်းတင်းမႂ်းၼၼ်ႉမီးႁိုၵ်းလူင်ဢၼ်လိုၵ်ႉၼႃႇဢေႃႈ။ပိူဝ်ႈၼႆလႄႈၵေႃႉဢၼ်ၶႂ်ႈလုၵ်ႉသေၵႃႈတီႈၼႆႉၶၢမ်ႈၵႂႃႇၸူးၵႃႈတီႈဢၼ်မႂ်းမီးပုၼ်ႉၼၼ်ႉၵေႃႈဢမ်ႇၶၢမ်ႈၵႂႃႇလႆႈ။

၂၇ ၵေႃႉဢၼ်ၶႂ်ႈလုၵ်ႉသေၵႃႈတီႈၼၼ်ႉၶၢမ်ႈမႃးၵႃႈတီႈဢၼ်ႁဝ်းမီးၼႆႉၵေႃႈဢမ်ႇၶၢမ်ႈမႃးလႆႈ၊ဝႃႈၼင်ႇၼႆဢေႃႈ။

၂၈ သထေးၼၼ်ႉၵေႃႈလၢတ်ႈလႄႈဝႃႈ၊-ပေႃႈဢိူၺ်း၊ပေႃးပဵၼ်ၸိူဝ်ႉၼင်ႇၼႆၸိုင်ၵဝ်ၶႃႈမီးၼွင်ႉၸၢႆးႁႃႈၵေႃႉၶႃႈဢေႃႈ။ၼင်ႇႁိုဝ်ၶဝ်တၵ်းဢမ်ႇႁွတ်ႈထိုင်ၵႃႈတီႈဢၼ်ၵဝ်ၶႃႈလႆႈၶၢမ်ႇၵိၼ်းၼႃႇလူင်လၢင်ၼႆႉၸိုင်ၸဝ်ႈႁဝ်းၶႅၼ်းတေႃႈပွႆႇၸႂ်ႉလႃႇၸရုၵႂႃႇၵႃႈတီႈႁိူၼ်းပေႃႈၵဝ်ႈၶႃႈၼၼ်ႉသေယဝ်ႉႁႂ်ႈမၼ်းၵႂႃႇၶၢမ်ႇသၢၵ်ႈသေႇလၢတ်ႈပၼ်တီႈၶဝ်သေၵမ်းၶႃႈ။ၵဝ်ၶႃႈတွင်းပၢၼ်ႇၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ဢႃႇပြႁၢမ်ႇၵေႃႈလၢတ်ႈလႄႈဝႃႈ၊-

၂၉ တီႈၼွင်ႉၸၢႆးမႂ်းၸိူဝ်းၼၼ်ႉမီးဝႆႉၸႃႉၸဵမ်မုဝ်းသေႇဢိၵ်ႇတင်းပရေႃးၽႅတ်ႈတင်းလၢႆယူႇဢေႃႈ။ႁႂ်ႈၶဝ်ထွမ်ႇဢဝ်ၵႂၢမ်းပရေႃးၽႅတ်ႈၸိူဝ်းၼၼ်ႉတႃႉ၊ဝႃႈၼင်ႇၼႆဢေႃႈ။

၃၀ မၼ်းသမ်ႉလၢတ်ႈဝႃႈ၊-ဢမ်ႇၸႂ်ႈၶႃႈပေႃႈဢႃႇပြႁၢမ်ႇၶႃႈဢိူၺ်း။ပေႃးၵူၼ်းဢၼ်တၢႆယဝ်ႉသေၵေႃႉၵေႃႉလုၵ်ႉၶိုၼ်းလႄႈၵႂႃႇၵႃႈတီႈၶဝ်ၸိုင်ၶဝ်တၵ်းၶုၵ်းၸႂ်လႆႈမႆႈၸႂ်ယူႇၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ဢႃႇပြႁၢမ်ႇၵေႃႈလၢတ်ႈလႄႈဝႃႈ၊-

၃၁ ပေႃးၶဝ်ယင်းဢမ်ႇထွမ်ႇဢဝ်ၵႂၢမ်းမုဝ်းသေႇတင်းၵႂၢမ်းပရေႃးၽႅတ်ႈတင်းလၢႆၸိူဝ်းၼၼ်ႉၸိုင်ပဵၵ်ႉသမ်ႉဝႃႈၵူၼ်းသေၵေႃႉၵေႃႉလုၵ်ႉသေၵႃႈတၢင်းတၢႆၶိုၼ်းလိပ်းယဝ်ႉသေၵေႃႈၶဝ်တၵ်းဢမ်ႇယုမ်ႇၵူၺ်း၊ဝႃႈၼင်ႇၼႆဢေႃႈ။