Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၁၁ 

တၢင်းသူးတွင်းဢၼ်ၸဝ်ႈယေႇသုသွၼ်ပၼ်

၁ မိူဝ်ႈၼၼ်ႉမၼ်းၸဝ်ႈသူးတွင်းယူႇၵႃႈၼႂ်းတီႈၼိုင်ႈလႄႈမိူဝ်ႈဢၼ်ယဝ်ႉၼၼ်ႉၸိုင်တပႄးၸဝ်ႈၵေႃႉၼိုင်ႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းၶႅၼ်းတေႃႈသွၼ်ပၼ်ႁဝ်းၶႃႈႁႂ်ႈႁဝ်းၶႃႈလႆႈသူးတွင်းမိူၼ်ၸိူဝ်ႉၼင်ႇယုဝ်းႁၢၼ်ႇသွၼ်ပၼ်တီႈတပႄးမၼ်းတင်းလၢႆၼၼ်ႉသေၵမ်းၶႃႈ၊

၂ မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-မိူဝ်ႈဢၼ်သူသူးတွင်းၼၼ်ႉလွင်ႈဢၼ်သူတၵ်းလႆႈသူးတွင်းလႄႈဝႃႈၸမ်း၊-ဢူဝ်းပေႃႈ။ႁႂ်ႈၼႃႇမႃႉၸိုဝ်သဵင်ၸဝ်ႈႁဝ်းမီးတၢင်းဢၼ်ရူဝ်ႇသေႇၵူဝ်ယမ်သေၵမ်းလူၺ်ႈတီႈၶႃႈ။ႁႂ်ႈမိူင်းၸဝ်ႈႁဝ်းတႄႇပဵၼ်သေၵမ်းလူၺ်ႈတီႈၶႃႈ။

၃ ၶႅၼ်းတေႃႈပၼ်တၢင်းၵိၼ်ဢၼ်ပေႃးၵုမ်ႇလဵင်ႉၸႂ်ၼၼ်ႉတီႈႁဝ်းၶႃႈဝၼ်းမိူဝ်ႈၼႆႉသေၵမ်းတီႈၶႃႈ။

၄ ၸိူဝ်ႉၼင်ႇဢၼ်ႁဝ်းၶႃႈပွႆႇလွတ်ႈဢပျႅတ်ႈပိူၼ်ႈတၢင်ႇၵေႃႉဢၼ်ၽိတ်းပိူင်ႈႁဝ်းၶႃႈၼၼ်ႉၶႅၼ်းတေႃႈပွႆႇလွတ်ႈဢပျႅတ်ႈႁဝ်းၶႃႈသေၵမ်းတီႈၶႃႈ၊ဝႃႈၼႆ၊သူးတွင်းတႃႉ၊ဝႃႈၼင်ႇၼႆဢေႃႈ။မၼ်းၸဝ်ႈသမ်ႉဝႃႈထႅင်ႈၸမ်း၊-

၅ ၼႂ်းသူၼႆႉၵေႃႉၼိုင်ႈမၼ်းမီးတႆးၵေႃႉၵေႃႉၼိုင်ႈဢေႃႈ။မိူဝ်ႈၶိင်ႇတဵင်ၶိုၼ်းမၼ်းၵႂႃႇၸူးတီႈႁိူၼ်းတႆးၵေႃႉမၼ်းၼၼ်ႉသေယဝ်ႉလၢတ်ႈဝႃႈ၊-

၆ တႆးၵေႃႉဢိူၺ်း၊ၵေႃႉသေႈၵဝ်ၶႃႈၵေႃႉၼိုင်ႈလုၵ်ႉသတေၢင်ႇတီႈတၢင်ႇလႅၼ်ႁွတ်ႈထိုင်မႃးၵႃႈတီႈၵဝ်ၶႃႈယဝ်ႉ။ၵဝ်ၶႃႈဢမ်ႇမီးသင်ပုၼ်ႈဢၼ်တၵ်းလဵင်ႉလူမၼ်း။

၇ ၵူႈပၼ်ၵဝ်ၶႃႈၶဝ်ႈမုၼ်းသၢမ်ႁူၺ်ႇၼိုင်ႈသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်တႆးၵေႃႉၼၼ်ႉၵေႃႈပဵၵ်ႉသမ်ႉဝႃႈပဵၼ်ၵေႃႉသေႈၵၼ်သေၵေႃႈယႃႇယူႇၵႃႈၼႂ်းႁိူၼ်းမၼ်းသေလႄႈၶိုၼ်းလၢတ်ႈဝႃႈ၊-ယႃႇပေမႃးယႃႉယူၵ်ႉၵဝ်။ၽၵ်းတူႁိူၼ်းပေႃးဢိုတ်းဝႆႉယဝ်ႉ။ၵဝ်တင်းလုၵ်ႈလၢင်းၵဝ်တင်းလၢႆၵေႃႈပေႃးၼွၼ်းယဝ်ႉ။

၈ ၵဝ်ဢမ်ႇလုၵ်ႉမႃးပၼ်တီႈမႂ်းလႆႈ၊ဝႃႈၼင်ႇၼႆသေၵေႃႈ၊ၵဝ်ဝႃႈတီႈသူၸမ်း၊ၵွပ်ႈပိူဝ်ႈမၼ်းၸႂ်ဢမ်ႇလူႉလႄႈယွၼ်းယူႇတိၵ်းတိၵ်းၼၼ်ႉၵမ်းလိုၼ်းတႆးၵေႃႉမၼ်းတၵ်းလုၵ်ႉလႄႈပၼ်တီႈမၼ်းၵႃႈဢၼ်မၼ်းလူဝ်ႇၼၼ်ႉယူႇဢေႃႈ။

၉ ၵဝ်ဝႃႈထႅင်ႈၸမ်း၊ယွၼ်းတႃႉ၊ပေႃးယွၼ်းၸိုင်တၵ်းလႆႈဢေႃႈ။ႁႃတႃႉ၊ပေႃးႁႃၸိုင်တၵ်းထူပ်းႁၼ်ဢေႃႈ။တွႆႇၽၵ်းတူတႃႉ၊ပေႃးတွႆႇၸိုင်တၵ်းၽုၺ်ႇပၼ်ဢေႃႈ။

၁၀ ၵေႃႉဢၼ်ယွၼ်းၼၼ်ႉလႆႈဢေႃႈ။ၵေႃႉဢၼ်ႁႃၵေႃႈႁၼ်ဢေႃႈ။တီႈၵေႃႉဢၼ်တွႆႇၽၵ်းတူၼၼ်ႉၵေႃႈတၵ်းၽုၺ်ႇပၼ်ဢေႃႈ။

၁၁ ၼႂ်းသူၼႆႉပေႃးလုၵ်ႈလၢင်းသူယွၼ်းၵိၼ်ၶဝ်ႈမုၼ်းတီႈၵေႃႉဢၼ်ပဵၼ်ပေႃႈၼၼ်ႉၸိုင်ပေႃႈၼၼ်ႉတၵ်းပၼ်မၢၵ်ႇႁိၼ်ႁိုဝ်။

၁၂ ပေႃးယွၼ်းပႃၸိုင်တၵ်းပၼ်ငူးႁိုဝ်။ပေႃးယွၼ်းၶႆႇၸိုင်တၵ်းပၼ်မႅင်းငေႃးႁိုဝ်။

၁၃ ပဵၵ်ႉသမ်ႉသူၼႆႉပဵၼ်ၵေႃႉဢၼ်ႁၢႆႉမိူၵ်ႈယူႇသေၵေႃႈယႃႇပေႃးသူယင်းၸၢင်ႊပၼ်ၶိူင်ႈပိူင်ဢၼ်လီဢၼ်ငၢမ်းတီႈလုၵ်ႈလၢင်းသူယူႇၸိုင်ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉယဵင်ႈၶႅၼ်းတၵ်းပၼ်ဝိၺိၺ်ႇမူတ်းၸၢင်ႇၸဝ်ႈတီႈၶဝ်ၸိူဝ်းဢၼ်သူးတွင်းယွၼ်းၼၼ်ႉဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။

ၸဝ်ႈယေႇသုတင်းပေႇလၸေႇပုလ

၁၄ မိူဝ်ႈၼၼ်ႉမၼ်းၸဝ်ႈႁေႃႈၽီႁၢႆႉဢၼ်ဢႃႉၼၼ်ႉဢွၵ်ႇပႅတ်ႈလႄႈဝၢႆးသေၽီႁၢႆႉၼၼ်ႉဢွၵ်ႇၵႂႃႇယဝ်ႉၵေႃႉဢၼ်ဢႃႉၼၼ်ႉလၢတ်ႈၵႂၢမ်းမႃးဢေႃႈ။ၵူၼ်းၸူႉၵူၼ်းတုမ်တင်းလၢႆၸိူဝ်းၼၼ်ႉဢၢမ်းၼႃႇဢေႃႈ။

၁၅ ၵမ်ႈၽွင်ႈဝႃႈ၊-ၵေႃႉၼႆႉမၼ်းဢိင်ပိုင်ႈၶုၼ်ၽီႁၢႆႉလူင်ပေႇလၸေႇပုလသေလႄႈႁေႃႈၽီႁၢႆႉဢွၵ်ႇပႅတ်ႈဢေႃႈ၊ဝႃႈၼင်ႇၼႆဢေႃႈ။

၁၆ ၵမ်ႈၽွင်ႈၵေႃႈၼင်ႇႁိုဝ်တၵ်းလႆႈၸၢမ်းတူၺ်းယႃႉယူၵ်ႉမၼ်းၸဝ်ႈၼၼ်ႉၶဝ်ယွၼ်းၼီႉမိၵ်ႈလၵ်ႈၶၼႃႇဢၼ်ပဵၼ်ၵႃႈၼိူဝ်ၽႃႉၵၢင်ႁၢဝ်ၼၼ်ႉဢေႃႈ။

၁၇ မၼ်းၸဝ်ႈႁူႉၸႅင်ႈတၢင်းၵျၢမ်ႇတၢင်းပွင်ၶဝ်ၼၼ်ႉလႄႈလၢတ်ႈဝႃႈ၊-မိူင်းလႂ်သေဢမ်ႇဝႃႈပေႃးၽၢတ်ႇၽႄတႅၵ်ႇယၢႆႈယူႇၸိုင်ဝၢၼ်ႈမိူင်းလူႉလႅဝ်ဢေႃႈ။ႁိူၼ်းလႂ်သေဢမ်ႇဝႃႈပေႃးၽၢတ်ႇၽႄတႅၵ်ႇယၢႆႈယူႇၸိုင်တၵ်းလူမ်ႉပင်းဢေႃႈ။

၁၈ ၵႃႈၼင်ႇဢၼ်သူဝႃႈၵဝ်ဢိင်ပိုင်ႈပေႇလၸေႇပုလသေလႄႈႁေႃႈၽီႁၢႆႉဢွၵ်ႇပႅတ်ႈဢေႃႈ၊ဝႃႈၼင်ႇၼႆၼၼ်ႉ၊ပေႃးၸႃႇတၢၼ်ႇမႃႇၼၢတ်ႈဢမ်ႇထုၵ်ႇဢမ်ႇမေႃၵၼ်ၽၢတ်ႇၽႄတႅၵ်ႇယၢႆႈယူႇၸိုင်မိူင်းမၼ်းၼၼ်ႉႁဵတ်းႁိုဝ်လႄႈတၵ်းတႄႇတင်ႈလႆႈ။

၁၉ ပေႃးၵဝ်ဢိင်ပိုင်ႈပေႇလၸေႇပုလသေလႄႈႁေႃႈၽီႁၢႆႉဢွၵ်ႇပႅတ်ႈၸိုင်လုၵ်ႈလၢင်းသူသမ်ႉဢိင်ပိုင်ႈၽူႈလႂ်သေလႄႈႁေႃႈၽီႁၢႆႉႉဢွၵ်ႇပႅတ်ႈ။ပိူဝ်ႈၼႆလႄႈၶဝ်ၼၼ်ႉတၵ်းပဵၼ်ၵေႃႉဢၼ်ၸီႇယၢင်ႇတီႈသူဢေႃႈ။

၂၀ ပေႃးၵဝ်ဢိင်ပိုင်ႈၼိဝ်ႉမိုဝ်းၽြႃးပဵၼ်ၸဝ်ႈသေလႄႈႁေႃႈၽီႁၢႆႉဢွၵ်ႇပႅတ်ႈၸိုင်မိူင်းၽြႃးပဵၼ်ၸဝ်ႈႁွတ်ႈမႃးၵႃႈတီႈသူဢမၢၼ်ႇၶၼ်ပဵၼ်ယဝ်ႉ။

၂၁ ၼႂ်းမိူဝ်ႈဢၼ်ၵူၼ်းႁႅင်းၵေႃႉၼိုင်ႈယိပ်းၵမ်လၢၵ်ႈၼၢၵ်ႈၸုမ်ႇသေလႄႈပႂ်ႉႁိူၼ်းမၼ်းယူႇၼၼ်ႉၶူဝ်းလဵင်းမၼ်းဢမ်ႇလူႉဢမ်ႇႁၢႆ။

၂၂ ၵူၺ်းၵႃႈမိူဝ်ႈဢၼ်ၵေႃႉဢၼ်ယဵင်ႈၶႅၼ်းႁႅင်းသေမၼ်းၼၼ်ႉမႃးလႄႈပႄႉၼႅင်ႇမၼ်းယဝ်ႉၸိုင်တၵ်းသိမ်းဢဝ်လၢၵ်ႈၼၢၵ်ႈဢၼ်မၼ်းဢိင်ပိုင်ႈၸိူဝ်းၼၼ်ႉသေယဝ်ႉဢဝ်ၶူဝ်းဢဝ်လဵင်းမၼ်းမႅင်ႇပၼ်ၵၼ်ဢေႃႈ။

၂၃ ၵေႃႉဢၼ်ဢမ်ႇယူႇၽၢႆႇၵဝ်ၼၼ်ႉပဵၼ်ရၢၼ်ႇသူႇၵဝ်ဢေႃႈ။ၵေႃႉဢၼ်ဢမ်ႇၸူႉဢမ်ႇသိမ်းလူၺ်ႈၵၼ်တင်းၵဝ်ၼၼ်ႉပဵၼ်ၵေႃႉဢၼ်ပိူၼ်ႈမိူၵ်ပိူၼ်ႈမိူဝ်ႇပႅတ်ႈဢေႃႈ။

၂၄ ၽီဢၼ်ၵူဝ်ႈၵိူၵ်ႇၼၼ်ႉမိူဝ်ႈဢၼ်ဢွၵ်ႇသေၵႃႈၼႂ်းၵူၼ်းၵႂႃႇယဝ်ႉၸိုင်ၸၢင်ႊၵႂႃႇလႄႇၵႃႈၼႂ်းတီႈဢၼ်ႁႅင်ႈဢၼ်ႁွင်တင်းလၢႆလႄႈႁႃတၢင်းၼိမ်ဢေႃႈ။

၂၅ မိူဝ်ႈဢၼ်ဢမ်ႇထူပ်းဢမ်ႇႁၼ်ၼၼ်ႉမၼ်းဝႃႈ၊-ၵဝ်တၵ်းၶိုၼ်းမိူဝ်းၸူးၵႃႈတီႈႁိူၼ်းဢၼ်ၵဝ်ဢွၵ်ႇမႃးယဝ်ႉၼၼ်ႉလူးၵွၼ်ႇဝႃႈၼင်ႇၼႆသေယဝ်ႉမိူဝ်ႈဢၼ်ၶိုၼ်းႁွတ်ႈထိုင်ၸိုင်မၼ်းထူပ်းႁၼ်ႁိူၼ်းၼၼ်ႉမီးတၢင်းဢၼ်မႄးပတ်းမႄးၽဵဝ်ႈဝႆႉယူႇဢေႃႈ။

၂၆ မၼ်းသမ်ႉၶိုၼ်းၵႂႃႇႁွင်ႉဢဝ်ၽီဢၼ်ႁၢႆႉမိူၵ်ႈၼႃႇသေမၼ်းၼၼ်ႉၸဵတ်းတူဝ်မႃးၶဝ်ႈယူႇၵႃႈၼႂ်းၵူၼ်းၵေႃႉၼၼ်ႉဢေႃႈ။ၵေႃႉၼၼ်ႉၵေႃႈဢၼ်မၼ်းပဵၼ်ၵမ်းလိုၼ်းၼၼ်ႉယဵင်ႈၶႅၼ်းႁၢႆႉၼႃႇသေဢၼ်မၼ်းပဵၼ်ဢွၼ်တၢင်းၼၼ်ႉဢေႃႈ၊ဝႃႈၼင်ႇၼႆဢေႃႈ။

၂၇ ၼႂ်းမိူဝ်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼၼ်ယူႇၼၼ်ႉၸိုင်မေႈယိင်းၵေႃႉၼိုင်ႈယူႇၵႃႈၼႂ်းၵူၼ်းၸူႉၵူၼ်းတုမ်ၼၼ်ႉသေလႄႈလဝ်ႈလၢတ်ႈလႄႈဝႃႈ၊-တွင်ႉဢၼ်ပႃးၸဝ်ႈႁဝ်းဢိၵ်ႇတင်းၼူမ်းဢၼ်ၸဝ်ႈႁဝ်းၸုပ်ႇၵိၼ်ၼၼ်ႉမီးမင်ႇၵလႃႇဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊

၂၈ မၼ်းၸဝ်ႈၵေႃႈလၢတ်ႈလႄႈဝႃႈ၊-ၵေႃႉဢၼ်ထွမ်ႇဢဝ်ၼုၵ်ႉၵပၢတ်ႈတြႃးၸဝ်ႈလႄႈၵမ်ၵျၢင်ႉၼၼ်ႉမီးမင်ႇၵလႃႇဢၼ်မျၢတ်ႈၼႃႇဢေႃႈ၊ဝႃႈၼင်ႇၼႆဢေႃႈ။

လၵ်ႈၶၼႃႇယုဝ်းၼ

၂၉ မိူဝ်ႈဢၼ်ၵူၼ်းၸူႉၵူၼ်းတုမ်တင်းလၢႆၼမ်ၵိုၼ်းမႃးၼႃႇလူင်လၢင်ၼၼ်ႉၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-ၵူၼ်းမဵဝ်းၼႆႉပဵၼ်မဵဝ်းဢၼ်ႁၢႆႉမိူၵ်ႈဢေႃႈ။ၶဝ်ယွၼ်းၼီႉမိၵ်ႈလၵ်ႈၶၼႃႇလႄႈလိူဝ်သေၼီႉမိၵ်ႈလၵ်ႈၶၼႃႇပရေႃးၽႅတ်ႈယုဝ်းၼၼၼ်ႉတၵ်းဢမ်ႇလႆႈၼႄပျႃးၼီႉမိၵ်ႈလၵ်ႈၶၼႃႇဢၼ်လႂ်တီႈၶဝ်။

၃၀ ၸိူဝ်ႉၼင်ႇဢၼ်ယုဝ်းၼပဵၼ်ၼီႉမိၵ်ႈလၵ်ႈၶၼႃႇတီႈၵူၼ်းဝဵင်းၼိၼေႇဝုၺ်ႇတင်းလၢႆၼၼ်ႉလုၵ်ႈၵူၼ်းတၵ်းပဵၼ်ၼီႉမိၵ်ႈလၵ်ႈၶၼႃႇတီႈၵူၼ်းမဵဝ်းၼႆႉဢေႃႈ။

၃၁ ၶိင်ႇမိူဝ်ႈဢၼ်ၸီႇယၢင်ႇတြႃးၼၼ်ႉၼၢင်းႁေႃၶမ်းမိူင်းတၢင်းၸၢၼ်းတၵ်းၸုၵ်းယူႇၽၢႆႇၼိုင်ႈသေလႄႈႁႂ်ႈၵူၼ်းမဵဝ်းၼႆႉလႆႈၶၢမ်ႇတၢင်းသုမ်းဢေႃႈ။လွင်ႈမၼ်းၸမ်းၼၢင်းႁေႃၶမ်းၼၼ်ႉလုၵ်ႉသေၵႃႈတီႈႁိမ်းလႅၼ်လိၼ်သုတ်းပုၼ်ႉႁွတ်ႈမႃးႁႂ်ႈလႆႈထွမ်ႇလႆႈငိၼ်းၵႂၢမ်းပိင်ႇၺႃႇၶုၼ်လူင်သေႃးလမုၼ်ႇဢေႃႈ။ၵႃႈတီႈၼႆႉၸမ်းမီးၵေႃႉဢၼ်ယဵင်ႈၶႅၼ်းယႂ်ႇမျၢတ်ႈၼႃႇသေသေႃးလမုၼ်ႇၼၼ်ႉဢေႃႈ။

၃၂ ၶိင်ႇမိူဝ်ႈဢၼ်ၸီႇယၢင်ႇတြႃးၼၼ်ႉၸိုင်ၵူၼ်းဝဵင်းၼိၼေႇဝုၺ်ႇၸိူဝ်းၼၼ်ႉတၵ်းၸုၵ်းယူႇၽၢႆႇၼိုင်ႈသေလႄႈႁႂ်ႈၵူၼ်းမဵဝ်းၼႆႉလႆႈၶၢမ်ႇတၢင်းသုမ်းဢေႃႈ။လွင်ႈမၼ်းၸမ်းၶဝ်ၼၼ်ႉၵွပ်ႈပိူဝ်ႈၵႂၢမ်းဢၼ်ယုဝ်းၼႁေႃးလၢတ်ႈၼၼ်ႉလႄႈၶုၵ်းၸႂ်လႆႈမႆႈၸႂ်ဢေႃႈ။ၵႃႈတီႈၼႆႉၸမ်းမီးၵေႃႉဢၼ်ယႂ်ႇမျၢတ်ႈၼႃႇသေယုဝ်းၼၼၼ်ႉဢေႃႈ။

ၵွၵ်းၽႆးတူဝ်ၵႃႇယႃႉ

၃၃ ၵူၼ်းႁဝ်းၼႆႉတႆႈၵွၵ်းၽႆးသေလႄႈဢဝ်ႁူမ်ႇဝႆႉၵႃႈတီႈဢၼ်ႁႄႉဢၼ်လပ်ႉၵႃႈတႂ်ႈပဵတ်ႈဢမ်ႇၸႂ်ႈ။ၼင်ႇႁိုဝ်ၶဝ်ၸိူဝ်းဢၼ်ၶဝ်ႈမႃးၼႂ်းႁိူၼ်းတင်းလၢႆတၵ်းလႆႈႁၼ်ဢၼ်လႅင်းမၼ်းၸိုင်ၸၢင်ႊဢဝ်တၢင်ႇဝႆႉၵႃႈၼိူဝ်ၽိူၼ်တီႈတႆႈၽႆးဢေႃႈ။

၃၄ ၵွၵ်းၽႆးတူဝ်ၵႃႇယႃႉၸမ်းပဵၼ်မၢၵ်ႇတႃဢေႃႈ။ပိူဝ်ႈၼႆလႄႈမိူဝ်ႈဢၼ်မၢၵ်ႇတႃမႂ်းသႂ်လီၼၼ်ႉတၵ်းလႅင်းတင်းတူဝ်ဢေႃႈ။မိူဝ်ႈဢၼ်မၢၵ်ႇတႃမႂ်းဢမ်ႇသႂ်လီၼၼ်ႉတၵ်းလပ်းသိင်ႇတင်းတူဝ်ဢေႃႈ။

၃၅ ၼင်ႇႁိုဝ်ဢၼ်လႅင်းၼႂ်းမႂ်းၼၼ်ႉတၵ်းဢမ်ႇပဵၼ်ဢၼ်လပ်းသိင်ႇၸိုင်ႁဵတ်းသတိတႃႉ။

၃၆ ပေႃးဢမ်ႇပႃးဢင်ႇၵႃႇဢၼ်လပ်းသိင်ႇသေဢၼ်လႄႈလႅင်းယူႇတင်းတူဝ်ၸိုင်တၵ်းလႅင်းယူႇတင်းသဵင်ႈတင်းမူတ်းမိူၼ်ၸိူဝ်ႉၼင်ႇၵွၵ်းၽႆးဢၼ်ႁိူဝ်ႈလႅင်းၼႃႇၼၼ်ႉဢေႃႈ၊ဝႃႈၼင်ႇၼႆဢေႃႈ။

ဢႃႉမင်ႇၵလႃႇႁူၵ်းပႃး

၃၇ ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉလၢတ်ႈၸိူဝ်ႉၼင်ႇၼၼ်ယူႇၼၼ်ႉၽႃႇရိသေးၵေႃႉၼိုင်ႈႁွင်ႉပၢင်းမၼ်းၸဝ်ႈႁႂ်ႈမၼ်းၸဝ်ႈၵိၼ်တၢင်းၵိၼ်လူၺ်ႈၵၼ်တင်းမၼ်းလႄႈမၼ်းၸဝ်ႈၵေႃႈၶဝ်ႈၵႂႃႇၵႃႈၼႂ်းႁိူၼ်းမၼ်းသေယဝ်ႉၼင်ႈယူႇၵႃႈတီႈႁိမ်းတီႈၵိၼ်ၼၼ်ႉဢေႃႈ။

၃၈ ၸူဝ်ႈဢၼ်ဢမ်ႇပႆႇၵိၼ်တၢင်းၵိၼ်ၼၼ်ႉၽႃႇရိသေးႁၼ်မၼ်းၸဝ်ႈဢမ်ႇႁဵတ်းတၢင်းဢၼ်မူတ်းသႂ်သုၵ်ႈၼမ်ႉၼၼ်ႉၸိုင်မီးတၢင်းဢၼ်ဢၢမ်းၼႃႇဢေႃႈ။

၃၉ မၼ်းၸဝ်ႈၵေႃႈလၢတ်ႈလႄႈဝႃႈ၊-သူၸိူဝ်းဢၼ်ပဵၼ်ၽႃႇရိသေးၼႆႉသူသုၵ်ႈလၢင်ႉၵွၵ်းဢိၵ်ႇတင်းပၢၼ်ႉၽၢႆႇပႃႈၼွၵ်ႈမၼ်းၵူၺ်းဢေႃႈ။ၵႃႈၼႂ်းသူၼၼ်ႉၸမ်းမီးတဵမ်ဝႆႉတင်းလွင်ႈတၢင်းဢၼ်ႁိမ်ဢဝ်ဢိၵ်ႇတင်းတၢင်းဢၼ်ႁၢႆႉဢၼ်မိူၵ်ႈယူႇဢေႃႈ။

၄၀ ၵူၼ်းမိူၵ်ႈတင်းလၢႆၶဝ်ဢိူၺ်း၊ၵေႃႉဢၼ်ၽၢၼ်ႇသၢင်းႁဵတ်းပဵၼ်ၽၢႆႇပႃႈၼွၵ်ႈၼၼ်ႉၽၢႆႇပႃႈၼႂ်းၵေႃႈၽၢၼ်ႇသၢင်းႁဵတ်းပဵၼ်ဢမ်ႇၸႂ်ႈႁိုဝ်။

၄၁ လွင်ႈတၢင်းဢၼ်ယဵင်ႈၶႅၼ်းလီၸမ်းဢဝ်ၵႃႈဢၼ်မီးၽၢႆႇပႃႈၼႂ်းၼၼ်ႉတင်းသဵင်ႈတင်းမူတ်းပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်တင်းလၢႆၼၼ်ႉတႃႉ။ပေႃးႁဵတ်းၸိူဝ်ႉၼင်ႇၼႆၸိုင်လွင်ႈတၢင်းၵႃႈမီးတင်းသဵင်ႈတင်းလူင်တၵ်းမူတ်းသႂ်တီႈသူဢေႃႈ။

၄၂ ၽႃႇရိသေးတင်းလၢႆၶဝ်ဢိူၺ်း၊သူမီးဢႃႉမင်ႇၵလႃႇဢေႃႈ။လွင်ႈမၼ်းၸမ်းသူလူႇတၢၼ်းၸႃႉၸဵမ်ဢိမ်ၶိမ်းလႄႈၽၵ်းႁၢၼ်တူၼ်ႈယိူဝ်ႈတူၼ်ႈယႃႈၵူႈၸိူဝ်ႉၵူႈပိူင်သိပ်းပုၼ်ႊပုၼ်ႊၼိုင်ႈသေၵေႃႈသူယင်းဝႆႉၵိုတ်းပႅတ်ႈတၢင်းဢၼ်ၸီႇယၢင်ႇၸွမ်းၼင်ႇတြႃးဢိၵ်ႇတင်းတၢင်းဢၼ်ႁၵ်ႉၽြႃးပဵၼ်ၸဝ်ႈၼၼ်ႉဢေႃႈ။လွင်ႈတၢင်းဢၼ်ဝႃႈၵမ်းလိုၼ်းၸိူဝ်းၼႆႉၸိုင်သူတၵ်းလႆႈၵမ်ၵျၢင်ႉဢေႃႈ။လွင်ႈတၢင်းဢၼ်ဝႃႈဢွၼ်တၢင်းၸိူဝ်းၼၼ်ႉၵေႃႈဢမ်ႇလႆႈဝႆႉၵိုတ်းပႅတ်ႈ။

၄၃ ၽႃႇရိသေးတင်းလၢႆၶဝ်ဢိူၺ်း၊သူမီးဢႃႉမင်ႇၵလႃႇဢေႃႈ။လွင်ႈမၼ်းၸမ်း၊သူထုၵ်ႇၸႂ်ၵျိူၵ်ႈၸႂ်တီႈၼင်ႈဢၼ်သုင်ဢၼ်မျၢတ်ႈၵႃႈၼႂ်းၸရွပ်ႈႁေႃးတြႃးတင်းလၢႆဢိၵ်ႇတင်းတၢင်းဢၼ်ပိူၼ်ႈႁဵတ်းရူဝ်ႇသေႇၵူဝ်ယမ်လႄႈတၵ်ႉလၢတ်ႈသူၵႃႈၼႂ်းၵၢတ်ႇၼႂ်းသႃးၼၼ်ႉဢေႃႈ။

၄၄ သူမီးဢႃႉမင်ႇၵလႃႇဢေႃႈ။လွင်ႈမၼ်းၸမ်းသူမိူၼ်ၸိူဝ်ႉၼင်ႇၶုမ်သၢင်းၶျႅင်းဢၼ်ႁူမ်ႇဝႆႉၼၼ်ႉဢေႃႈ။ၶဝ်ၸိူဝ်းဢၼ်ၵႂႃႇမႃးယူႇၵႃႈၼိူဝ်ၶုုမ်သၢင်းၶျႅင်းၼၼ်ႉဢမ်ႇႁူႉလွင်ႈဢၼ်ၶုမ်သၢင်းၶျႅင်းမီးၵႃႈတႂ်ႈၼၼ်ႉ၊ဝႃႈၼင်ႇၼႆဢေႃႈ။

၄၅ ၵူၼ်းမေႃၵျၢမ်းၵေႃႉၼိုင်ႈၵေႃႈၶိုၼ်းလၢတ်ႈလႄႈဝႃႈ၊-ၸဝ်ႈႁဝ်း၊ပေႃးဝႃႈၸိူဝ်ႉၼင်ႇၼႆၸိုင်ၸဝ်ႈႁဝ်းသေႉသွမ်းတၢင်ႇဢပျႅတ်ႈတီႈႁဝ်းၶႃႈၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈလၢတ်ႈလႄႈဝႃႈ၊-

၄၆ ၵူၼ်းမေႃၵျၢမ်းတင်းလၢႆၶဝ်ဢိူၺ်း၊သူမီးဢႃႉမင်ႇၵလႃႇဢေႃႈ။လွင်ႈမၼ်းၸမ်းသူၸၢင်ႊဢဝ်ၶူဝ်းဢၼ်ၼၵ်းၼႃႇၼၼ်ႉတၢင်ႇသႂ်ႇၵႃႈၼိူဝ်ႁူဝ်မႃႇပိူၼ်ႈတၢင်ႇၵေႃႉဢေႃႈ။သူၸမ်းယင်းဢမ်ႇဢဝ်တင်းၼိဝ်ႉမိုဝ်းသူတိူဝ်ႉ။

၄၇ သူမီးဢႃႉမင်ႇၵလႃႇဢေႃႈ။လွင်ႈမၼ်းၸမ်းသူတႄႇႁဵတ်းသၢင်းၶျႅင်းပရေႃးၽႅတ်ႈဢၼ်ပူႇမွၼ်ႇသူဢဝ်တၢႆၼၼ်ႉဢေႃႈ။

၄၈ သူပဵၼ်သၢၵ်ႈသေႇလႄႈသူႁပ်ႉတုင်းဢဝ်တၢင်းႁဵတ်းတၢင်းသၢင်ႈပူႇမွၼ်ႇသူၼႂ်းတၢင်းဢၼ်ၶဝ်ဢဝ်ပရေႃးၽႅတ်ႈတင်းလၢႆတၢႆၼၼ်ႉလႄႈသူတႄႇႁဵတ်းသၢင်းၶျႅင်းၶဝ်ၼၼ်ႉဢေႃႈ။

၄၉ ပိူဝ်ႈၼႆလႄႈဢၼ်ၺၢၼ်ႇၽြႃးပဵၼ်ၸဝ်ႈၸီႇယၢင်ႇဝႆႉၼၼ်ႉၸမ်းတၵ်းပွႆႇၸႂ်ႉပရေႃးၽႅတ်ႈဢိၵ်ႇတင်းတမၢၼ်ႇၸဝ်ႈတင်းလၢႆၵႂႃႇၵႃႈတီႈဢၼ်ၶဝ်မီးၼၼ်ႉဢေႃႈ။ၶဝ်တၵ်းၼိၵ်ႈၸၢၵ်ႈငႅၼ်းသေးၵမ်ႈၽွင်ႈဢေႃႈ။

၅၀ တၵ်းဢဝ်တၢႆၵမ်ႈၽွင်ႈဢေႃႈ။ပိူဝ်ႈၼႆလႄႈၵွပ်ႈပိူဝ်ႈပရေႃးၽႅတ်ႈတင်းသဵင်ႈတင်းလူင်ဢၼ်လႆႈၶၢမ်ႇလိူတ်ႈထွၵ်ႇပႅတ်ႈယဝ်ႉၸႃႉၸဵမ်မိူဝ်ႈၵမ်ႇၽႃႇၸႃႉတႄႇၼၼ်ႉဢၼ်ပဵၼ်ၸႃႉၸဵမ်လိူတ်ႈဢႃႇပေႇလတေႃႇထိုင်လိူတ်ႈၸႃႇၶရိၸ်ႉဢၼ်လႆႈဢဝ်တၢႆယဝ်ႉၼႂ်းၵႄႈဝူင်ႈၵၢင်ႁိူၼ်းပိၵ်ႉမၢၼ်ႇၸဝ်ႈတင်းယိတ်ႉပလၢင်ႇၼၼ်ႉၵူၼ်းဢၼ်မီးယူႇတေႃႈလဵဝ်တင်းလၢႆၸိူဝ်းၼႆႉတၵ်းလႆႈၶၢမ်ႇတၢင်းဢၼ်ၸႅတ်ႈထၢမ်ၸီႇယၢင်ႇဢေႃႈ။

၅၁ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵူၼ်းဢၼ်မီးယူႇတေႃႈလဵဝ်တင်းလၢႆၸိူဝ်းၼႆႉတၵ်းလႆႈၶၢမ်ႇတၢင်းဢၼ်ၸႅတ်ႈထၢမ်ၸီႇယၢင်ႇဢေႃႈ။

၅၂ ၵူၼ်းမေႃၵျၢမ်းတင်းလၢႆၶဝ်ဢိူၺ်း၊သူမီးဢႃႉမင်ႇၵလႃႇဢေႃႈ။လွင်ႈမၼ်းၸမ်းသူသိမ်းဢဝ်ဝႆႉသေႃးဢၼ်ၽုၺ်ႇပိင်ႇၺႃႇၼၼ်ႉယဝ်ႉ။သူၵေႃႈဢမ်ႇၶဝ်ႈ။တီႈၶဝ်ၸိူဝ်းဢၼ်ၶႂ်ႈၶဝ်ႈၼၼ်ႉၵေႃႈသူႁႄႉၶႅၼ်ဝႆႉဢေႃႈ၊ဝႃႈၼင်ႇၼႆဢေႃႈ။

၅၃ ၼႂ်းမိူဝ်ႈဢၼ်မၼ်းၸဝ်ႈလၢတ်ႈတီႈပရိၵ်ႈသၢတ်ႈၸိူဝ်ႉၼင်ႇၼႆယူႇၼၼ်ႉၸိုင်ၵူၼ်းထုတ်ႇၵျၢမ်းဢိၵ်ႇတင်းၽႃႇရိသေးတင်းလၢႆၶတ်းၶဵင်ႇမၼ်းၸဝ်ႈၼႃႇလူင်လၢင်လႄႈတိုၵ်းယူင်းၸူဝ်းဢဝ်မၼ်းၸဝ်ႈႁႂ်ႈမၼ်းၸဝ်ႈလၢတ်ႈၵႂၢမ်းၼမ်ၼမ်ၼင်ႇႁိုဝ်တၵ်းလႆႈႁႃလွင်ႈဢၼ်တၵ်းလႆႈတၢင်ႇဢပျႅတ်ႈတီႈမၼ်းၸဝ်ႈဢေႃႈ။ၶဝ်လွမ်တူၺ်းၵျၢမ်ႇႁႃႁႂ်ႈလႆႈၵဵပ်းၵႂၢမ်းမၼ်းၸဝ်ႈဢေႃႈ။