Mat 20

မၢတ်ႈထႄႇ

Chapter ၁ ၂ ၃ ၄ ၅ ၆ ၇ ၈ ၉ ၁၀ ၁၁ ၁၂ ၁၃ ၁၄ ၁၅ ၁၆ ၁၇ ၁၈ ၁၉ ၂၀ ၂၁ ၂၂ ၂၃ ၂၄ ၂၅ ၂၆ ၂၇ ၂၈

၂၀

ဢူႉပမႃႇၵူၼ်းႁဵတ်းသူၼ်မၢၵ်ႇၸပိတ်ႉ

၁ မိူင်းၵၢင်ႁၢဝ်ၸဝ်ႈၸမ်းမိူၼ်ၸိူဝ်ႉၼင်ႇၸဝ်ႈသူၼ်ဢၼ်ဢွၵ်ႇၵႂႃႇၵၢင်ၼႂ်ၸဝ်ႉၸဝ်ႉႁႂ်ႈလႆႈၸၢင်ႈဢဝ်ၵူၼ်းဢၼ်တၵ်းႁဵတ်းသူၼ်မၢၵ်ႇၸပိတ်ႉမၼ်းၼၼ်ႉဢေႃႈ။

၂ မၼ်းတၵ်းပၼ်ၼိုင်ႈဝၼ်းတေႇၼႃႇရီႇၼိုင်ႈၶႅပ်း၊ဝႃႈၼႆလႆႈၸႂ်ၵၼ်တင်းၸိူဝ်းဢၼ်တၵ်းႁဵတ်းသူၼ်ၼၼ်ႉယဝ်ႉၸင်ႇပွႆႇၸႂ်ႉၶဝ်ၵႂႃႇၵႃႈၼႂ်းသူၼ်မၢၵ်ႇၸပိတ်ႉမၼ်းဢေႃႈ။

၃ မိူဝ်ႈသၢမ်ၼႃႇရီႇၸမ်ၸမ်ၼၼ်ႉမၼ်းသမ်ႉဢွၵ်ႇၵႂႃႇလႄႈထူပ်းႁၼ်ၵူၼ်းတၢင်ႇတီႈဢၼ်ဢမ်ႇမီးၵၢၼ်ႁဵတ်းလႄႈၸုၵ်းယူႇၵႃႈၼႂ်းၵၢတ်ႇၼၼ်ႉ၊မၼ်းလၢတ်ႈတီႈၶဝ်လႄႈဝႃႈ၊-

၄ သူၵႂႃႇၵႃႈတီႈသူၼ်မၢၵ်ႇၸပိတ်ႉၵဝ်ပုၼ်ႉတႃႉ။ ၵဝ်တၵ်းပၼ်ထုၵ်ႇထုၵ်ႇဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၼၼ်ႉၵေႃႈၵႂႃႇဢေႃႈ။

၅ ထိုင်ၶိင်ႇႁူၵ်းၼႃႇရီႇၸမ်ၸမ်မၼ်းသမ်ႉဢွၵ်ႇၵႂႃႇလႄႈႁဵတ်းၸိူဝ်ႉၼင်ႇၵမ်းဢွၼ်တၢင်းၼၼ်ႉဢေႃႈ။

၆ သိပ်းဢိတ်းၼႃႇရီႇၸမ်ၸမ်ၵေႃႈမၼ်းသမ်ႉဢွၵ်ႇၵႂႃႇလႄႈထူပ်းႁၼ်ၵူၼ်းတၢင်ႇတီႈဢၼ်ၸုၵ်းယူႇၼၼ်ႉမၼ်းထၢမ်တီႈၶဝ်လႄႈဝႃႈ၊-

၇ ႁဵတ်းသင်လႄႈသူယင်းဢမ်ႇႁဵတ်းၵၢၼ်လႄႈၸုၵ်းယူႇၵႃႈတီႈၼႆႉတင်းဝၼ်းၸိူဝ်ႉၼႆ၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၼၼ်ႉၵေႃႈလၢတ်ႈလႄႈဝႃႈ၊-ၽူႈလႂ်ၵေႃႈဢမ်ႇၸၢင်ႈႁဝ်းၶႃႈ၊ဝႃႈၼင်ႇၼႆဢေႃႈ။ မၼ်းၵေႃႈလၢတ်ႈလႄႈဝႃႈ၊-သူၵႂႃႇႁဵတ်းၵၢၼ်ၵႃႈၼႂ်းသူၼ်မၢၵ်ႇၸပိတ်ႉၵဝ်တႃႉ၊ဝႃႈၼင်ႇၼႆဢေႃႈ။

၈ မိူဝ်ႈဢၼ်ထိုင်ၶိင်ႇႁူဝ်ၶမ်ႈၸိုင်ၸဝ်ႈသူၼ်မၢၵ်ႇၸပိတ်ႉၼၼ်ႉလၢတ်ႈတီႈၸရေးမၼ်းလႄႈဝႃႈ၊-ႁွင်ႉၶဝ်ၸိူဝ်းဢၼ်ႁဵတ်းသူၼ်ၼၼ်ႉမႃးတႃႉ။ ပၼ်ၵႃႊမၼ်းၶၼ်မၼ်းၵႃႈတီႈၶဝ်ၸႃႉၸဵမ်ၶဝ်ၸိူဝ်းဢၼ်ၶဝ်ႈႁဵတ်းလိုၼ်းတေႃႇထိုင်ၶဝ်ၸိူဝ်းဢၼ်ၶဝ်ႈႁဵတ်းဢွၼ်တၢင်းၸိူဝ်းၼၼ်ႉတႃႉ၊ဝႃႈၼင်ႇၼႆဢေႃႈ။

၉ ၶဝ်ၸိူဝ်းဢၼ်ၶဝ်ႈႁဵတ်းမိူဝ်ႈၶိင်ႇသိပ်းဢဵတ်းၼႃႇရီႇၸမ်ၸမ်ၼၼ်ႉမႃးလႄႈၶၢမ်ႇဢဝ်ၵႃႈႁႅင်းယေႈၵေႃႉတေႇၼႃႇရီႇၼိုင်ႈၶႅပ်းဢေႃႈ။

၁၀ မိူဝ်ႈဢၼ်ၶဝ်ၸိူဝ်းဢၼ်ၶဝ်ႈႁဵတ်းဢွၼ်တၢင်းမႃးၼၼ်ႉပဵၵ်ႉသမ်ႉၶဝ်ထၢင်ႇဝႃႈၶဝ်ယဵင်ႈၶႅၼ်းတၵ်းလႆႈၼမ်သေၵေႃႈၶဝ်လႆႈယေႈၵေႃႉတေႇၼႃႇရီႇၼိုင်ႈၶႅပ်းၼင်ႇၵဝ်ႇဢေႃႈ။

၁၁ မိူဝ်ႈဢၼ်ၶဝ်လႆႈၶၢမ်ႇဢဝ်ၸိူဝ်ႉၼင်ႇၼၼ်ၼၼ်ႉၶဝ်သေႉသွမ်းတၢင်ႇဢပျႅတ်ႈတီႈၸဝ်ႈသူၼ်ၼၼ်ႉလႄႈဝႃႈ၊-

၁၂ ၶဝ်ၸိူဝ်းဢၼ်ၶဝ်ႈႁဵတ်းလိုၼ်းၼၼ်ႉပဵၵ်ႉသမ်ႉႁဵတ်းၼႃႇရီႇၼိုင်ႈၵူၺ်းသေၵေႃႈၸဝ်ႈႁဝ်းပၼ်မိူၼ်ၵၼ်တင်းႁဝ်းၶႃႈဢၼ်ႁၢပ်ႇၼၵ်းၼႃၶၢမ်ႇတၢင်းဢၼ်လႅတ်ႇမႆႈတင်းဝၼ်းၼၼ်ႉလူင်ပေႇ၊ဝႃႈၼင်ႇၼႆဢေႃႈ။

၁၃ ၸဝ်ႈသူၼ်ၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ပီႈၼွင်ႉဢိူၺ်း၊ၵဝ်ဢမ်ႇႁဵတ်းလွင်ႈတၢင်းဢၼ်ဢမ်ႇတြႃးၼိူဝ်သူ။

၁၄ တေလႆႈပၼ်တေႇၼႃႇရီႇၶႅပ်းၼိုင်ႈဝႃႈၼႆႁဝ်းလႆႈၸႂ်ၵၼ်ယဝ်ႉဢမ်ႇၸႂ်ႈႁိုဝ်။ ဢဝ်ၵႃႊႁႅင်းသူလႄႈၵႂႃႇတႃႉ။ ၵဝ်မီးဢလူဝ်ႇၶႂ်ႈပၼ်တီႈၶဝ်ၸိူဝ်းဢၼ်ႁဵတ်းလိုၼ်းၼၼ်ႉမိူၼ်ၵၼ်တင်းသူဢေႃႈ။

၁၅ ၵႃႈၼင်ႇဢၼ်ၵဝ်ၶႂ်ႈဢဝ်ၶွင်တူဝ်ၸဝ်ႈၵဝ်ႇႁဵတ်းၼၼ်ႉၵဝ်ဢမ်ႇလႆႈႁဵတ်းႁိုဝ်။ ပိူဝ်ႈဢၼ်ၵဝ်ၸႂ်လီလႄႈဢမ်ႇထုၵ်ႇတႃသူႁိုဝ်၊ဝႃႈၼင်ႇၼႆဢေႃႈ။

၁၆ မိူၼ်ၼင်ႇၼၼ်ၶဝ်ၸိူဝ်းဢၼ်တူၵ်းလိုၼ်းၼၼ်ႉတၵ်းတူၵ်းဢွၼ်တၢင်းဢေႃႈ။ ၶဝ်ၸိူဝ်းဢၼ်တူၵ်းဢွၼ်တၢင်းၼၼ်ႉတၵ်းတူၵ်းလိုၼ်းဢေႃႈ။ ပဵၵ်ႉသမ်ႉၶဝ်ၸိူဝ်းဢၼ်မၼ်းၸဝ်ႈႁွင်ႉဢဝ်ၼၼ်ႉၼမ်ၼႃႇသေၵေႃႈၶဝ်ၸိူဝ်းဢၼ်မၼ်းၸဝ်ႈလိူၵ်ႈၵဵပ်းဢဝ်ၼၼ်ႉၵေႇၼႃႇဢေႃႈ၊ဝႃႈၼင်ႇၼႆဢေႃႈ။

ၸဝ်ႈယေႇသုလၢတ်ႈလွင်ႈၶၢမ်ႇတၢင်းတၢႆ

၁၇ ၼႂ်းမိူဝ်ႈဢၼ်ၸဝ်ႈယေႇသုၶိုၼ်ႈၵႂႃႇၵႃႈတီႈဝဵင်းယေႇရုသလႅမ်ႇယူႇၼၼ်ႉၸိုင်ၵႃႈတီႈၵၢင်တၢင်းမၼ်းၸဝ်ႈႁွင်ႉဢဝ်တပႄးၸဝ်ႈသိပ်းသွင်ပႃးၵႂႃႇၵႃႈတီႈဢၼ်ပိူၼ်ႈဢမ်ႇမီးၼၼ်ႉသေယဝ်ႉလၢတ်ႈလႄႈဝႃႈ၊-တူၺ်းလူႊ၊ႁဝ်းၶိုၼ်ႈၵႂႃႇၵႃႈတီႈဝဵင်းယေႇရုသလႅမ်ႇယူႇဢေႃႈ။

၁၈ လုၵ်ႈၵူၼ်းတၵ်းၶၢမ်ႇတၢင်းဢၼ်ဢၢပ်ႈတီႈယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းလၢႆဢေႃႈ။

၁၉ ၶဝ်ၼၼ်ႉတၵ်းၸီႇယၢင်ႇႁႂ်ႈမၼ်းတၢႆဢေႃႈ။ ၶဝ်တၵ်းဢဝ်မၼ်းဢၢပ်ႈပၼ်တီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆႁႂ်ႈလႆႈၶၢမ်ႇႁဵတ်းပျၢၵ်ႈႁဵတ်းၶူဝ်ႁႂ်ႈလႆႈဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းဢေႃႈ။ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉမၼ်းတၵ်းလုၵ်ႉၶိုၼ်းဢေႃႈ၊ဝႃႈၼင်ႇၼႆဢေႃႈ။

မႄႈယွၼ်းဢရႃႇပုၼ်ႈလုၵ်ႈၸၢႆး

၂၀ မိူဝ်ႈၼၼ်ႉမေးၸေႇပေႇတေးသုတ်ႉၸပ်းသုတ်ႉၸူးတီႈမၼ်းၸဝ်ႈၶုပ်ႉမူပ်ႇသေလႄႈယွၼ်းဢၶႂင်ႉတီႈမၼ်းၸဝ်ႈပုၼ်ႈလုၵ်ႈၸၢႆးမၼ်းသွင်ၵေႃႉဢေႃႈ။

၂၁ မၼ်းၸဝ်ႈထၢမ်လႄႈဝႃႈ၊-မႂ်းၶႂ်ႈယွၼ်းၸိူဝ်ႉၼင်ႇႁိုဝ်၊ဝႃႈၼႆဢေႃႈ။ မၼ်းၵေႃႈလဝ်လၢတ်ႈလႄႈဝႃႈ၊-ၵႃႈၼႂ်းမိူင်းၸဝ်ႈႁဝ်းၼၼ်ႉၶႅၼ်းတေႃႈပၼ်ဢၶႂၢင်ႉႁႂ်ႈလုၵ်ႈၸၢႆးၵဝ်ၶႃႈသွင်ၵေႃႉၼႆႉလႆႈၼင်ႈၵႃႈတီႈၽၢႆႇၶႂႃၸဝ်ႈႁဝ်းၵေႃႉၼိုင်ႈၵႃႈတီႈၽၢႆႇသၢႆႉၸဝ်ႈႁဝ်းၵေႃႉၼိုင်ႈသေၵမ်းၶႃႈ၊ဝႃႈၼင်ႇၼႆဢေႃႈ။

၂၂ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-သူယင်းဢမ်ႇႁူႉလွင်ႈဢၼ်သူယွၼ်းၼၼ်ႉ။ ၸွင်ႇသူတၵ်းၵိၼ်လႆႈၵွၵ်းဢၼ်ၵဝ်ၸမ်တၵ်းလႆႈၵိၼ်ၼၼ်ႉႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၵေႃႈလဝ်လၢတ်ႈလႄႈဝႃႈ၊-ႁဝ်းၶႃႈၵိၼ်လႆႈယူႇၶႃႈ၊ဝႃႈၼင်ႇၼႆဢေႃႈ။

၂၃ မၼ်းၸဝ်ႈၵေႃႈလၢတ်ႈလႄႈဝႃႈ၊-ၵွၵ်းၵဝ်ၸိုင်သူတၵ်းလႆႈၵိၼ်ယူႇဢေႃႈ။ ၼႂ်းဝႃႈၼၼ်သေၵေႃႈဢၶႂင်ႉဢၼ်တၵ်းလႆႈၼင်ႈၵႃႈတီႈၽၢႆႇၶႂႃၵဝ်ၵႃႈတီႈၽၢႆႇသၢႆႉၵဝ်ၼၼ်ႉဢမ်ႇသႅင်ႇၵဝ်တၵ်းလႆႈပၼ်။ ပုၼ်ႈႁင်းၽႂ်ႁင်းမၼ်းၵႃႈၼင်ႇဢၼ်ပေႃႈၵဝ်မႄးႁႅၼ်းဝႆႉၼၼ်ႉတၵ်းပဵၼ်ပုၼ်ႈၶဝ်ယူႇဢေႃႈ၊ဝႃႈၼင်ႇၼႆဢေႃႈ။

၂၄ တပႄးၸဝ်ႈသိပ်းပႃးၸိူဝ်းၼၼ်ႉလႆႈငိၼ်းသေယဝ်ႉၸႂ်မႆႈၶႂ်ႈၸႃႉတီႈပီႈၼွင်ႉသွင်ၵေႃႉၼၼ်ႉဢေႃႈ။

၂၅ ၸဝ်ႈယေႇသုႁွင်ႉဢဝ်ၶဝ်လႄႈလၢတ်ႈဝႃႈ၊-ၶဝ်ၸိူဝ်းဢၼ်ပဵၼ်ၶုၼ်ၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉၸၢင်ႊဢုပ်ႉပိူင်ႇဢေႃႈ။ ၶဝ်ၸိူဝ်းဢၼ်ပဵၼ်ၵူၼ်းယႂ်ႇၵူၼ်းလူင်တင်းလၢႆၵေႃႈၸၢင်ႊဝႆႉဢႃႇၼႃႇဢေႃႈ၊ဝႃႈၼႆသူႁူႉယူႇဢေႃႈ။

၂၆ ၼႂ်းသူၸမ်းဢမ်ႇလႆႈပဵၼ်ၸိူဝ်ႉၼင်ႇၼၼ်။ ၼႂ်းသူၼႆႉၽူႈလႂ်သေဢမ်ႇဝႃႈၵေႃႉဢၼ်ၶႂ်ႈပဵၼ်ၵူၼ်းယႂ်ႇသူၼၼ်ႉႁႂ်ႈလႆႈပဵၼ်ၵူၼ်းၸႂ်ႉၵူၼ်းသွႆသူတႃႉ။

၂၇ ၼႂ်းသူၼႆႉၽူႈလႂ်သေဢမ်ႇဝႃႈၵေႃႉဢၼ်ၶႂ်ႈပဵၼ်ႁူဝ်သူၼၼ်ႉၵေႃႈႁႂ်ႈလႆႈပဵၼ်ၶႃႈသူတႃႉ။ မိူၼ်ၼင်ႇၼၼ်လုၵ်ႈၵူၼ်းမႃးႁႂ်ႈလႆႈၸႂ်ႉၵိၼ်ပိူၼ်ႈဢမ်ႇၸႂ်ႈ။

၂၈ မႃးႁႂ်ႈလႆႈၶၢမ်ႇတၢင်းဢၼ်ပိူၼ်ႈၸႂ်ႉဢိၵ်ႇတင်းႁႂ်ႈလႆႈၸုၼ်ႉဢသၢၵ်ႈတူဝ်ၸဝ်ႈၵဝ်ႇသေလႄႈထူတ်ႇဢဝ်ၵူၼ်းၼမ်ၼႃႇဢေႃႈ၊ဝႃႈၼင်ႇၼႆဢေႃႈ။

ၵူၼ်းတႃမွတ်ႇသွင်ၵေႃႉၶိုၼ်းႁၼ်မႃး

၂၉ ၼႂ်းမိူဝ်ႈဢၼ်ၶဝ်ဢွၵ်ႇသေၵႃႈၼႂ်းဝဵင်းယေႇရိၶုဝ်းၵႂႃႇယူႇၼၼ်ႉၸိုင်ၵူၼ်းၸူႉၵူၼ်းတုမ်ၼမ်ၼႃႇၸွမ်းပႃႈလင်မၼ်းၸဝ်ႈယူႇဢေႃႈ။

၃၀ ၵူၼ်းတႃမွတ်ႇသွင်ၵေႃႉဢၼ်ၼင်ႈယူႇၵႃႈတီႈႁိမ်းတၢင်းၼၼ်ႉမိူဝ်ႈဢၼ်လႆႈငိၼ်းလွင်ႈဢၼ်ၸဝ်ႈယေႇသုၸွမ်းတၢင်းၵႂႃႇယူႇၼၼ်ႉၸိုင်သွင်ၶႃႁွင်ႉသႅၼ်ႇလႄႈဝႃႈ၊-ၸဝ်ႈႁဝ်း၊လုၵ်ႈတႃႇဝိတ်ႉတီႈၶႃႈ၊ဢိတ်းလူႁဝ်းၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။

၃၁ ပဵၵ်ႉသမ်ႉၵူၼ်းၸူႉၵူၼ်းတုမ်ၸိူဝ်းၼၼ်ႉႁိုတ်းၶဝ်ႁႂ်ႈၶဝ်ယူႇတဵတ်ႇတဵတ်ႇယဵၼ်ယဵၼ်သေၵေႃႈၶဝ်ၼၼ်ႉယဵင်ႈၶႅၼ်းႁွင်ႉသႅၼ်ႇလႄႈဝႃႈ၊-ၸဝ်ႈႁဝ်း၊လုၵ်ႈတႃႇဝိတ်ႉတီႈၶႃႈ၊ဢိတ်းလူႁဝ်းၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။

၃၂ ၸဝ်ႈယေႇသုၸင်ႇၵိုတ်းသေယဝ်ႉႁွင်ႉၶဝ်လႄႈထၢမ်ဝႃႈ၊-ၶႂ်ႈႁႂ်ႈၵဝ်ႁဵတ်းတီႈသူၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊

၃၃ သွင်ၶႃၵေႃႈလဝ်လၢတ်ႈလႄႈဝႃႈ၊-ၸဝ်ႈႁဝ်း၊ႁဵတ်းႁႂ်ႈမၢၵ်ႇတႃႁဝ်းၶႃႈႁၼ်မႃးသေၵမ်းၶႃႈ၊ဝႃႈၼင်ႇၼႆဢေႃႈ။

၃၄ ၸဝ်ႈယေႇသုမီးၸႂ်ဢၼ်ဢိတ်းလူလႄႈတိူဝ်ႉသႂ်ႇမၢၵ်ႇတႃၶဝ်ဢေႃႈ။ မၢၵ်ႇတႃၶဝ်ၼၼ်ႉႁၼ်မႃးၵမ်းလဵဝ်လႄႈၶဝ်ၵေႃႈၸွမ်းပႃႈလင်မၼ်းၸဝ်ႈၵႂႃႇဢေႃႈ။

ထမ်ႇမ ၵျၢမ်းၵဝ်ႇ

ၵျၢမ်းငဝ်ႈၵမ်ႇၽႃႇ ၵျၢမ်းဢၼ်ဢွၵ်ႇၵွႃႇ ၵျၢမ်းဢၼ်ႁဵတ်းဝၢတ်ႈ

ၵျၢမ်းဢၼ်ယူႇၼႂ်းထိူၼ်ႇ ၵျၢမ်းဢၼ်ႁေႃးတြႃး လိၵ်ႈမၢတ်ႈလွင်ႈယေႃးသု

လိၵ်ႈမၢတ်ႈလွင်ႈၵူၼ်းလူင်ဢၼ်ၸီႇယၢင်ႇတြႃး ဝုတ်ႉထုရုထ

ထမ်ႇမႃႉရႃႇၸဝၢင်ႇၽိုၼ်ပထမ ထမ်ႇမႃႉရႃႇၸဝၢင်ႇၽိုၼ်တုတိယ

ထမ်ႇမႃႉရႃႇၸဝၢင်ႇၽိုၼ်တတိယ ထမ်ႇမႃႉရႃႇၸဝၢင်ႇၽိုၼ်ၸတုၵ်ႉထ

ရႃႇၸဝၢင်ႇၶျူၵ်ႉၽိုၼ်ပထမ ရႃႇၸဝၢင်ႇၶျူၵ်ႉၽိုၼ်တုတိယ

လိၵ်ႈမၢတ်ႈလွင်ႈဢေႇၸရ လိၵ်ႈမၢတ်ႈလွင်ႈၼေႇႁမိ ဝုတ်ႉထုဢေးသတႃႇ

ဝုတ်ႉထုယေႃႇၽ ၵျၢမ်းသႃႇလၢမ်ႇ ၵျၢမ်းလိၵ်ႈသုၵ်ႉတၢမ်ႇ ၵျၢမ်းလိၵ်ႈတေႇသၼႃႇ