Shan Missions

လိၵ်ႈဢေႃးဝႃႇတႃႉရူဝ်းမ

Chapter   ၁       ၂       ၃       ၄       ၅       ၆       ၇       ၈       ၉       ၁၀       ၁၁       ၁၂       ၁၃       ၁၄       ၁၅       ၁၆     

၁၀ 



၁ ပီႈၼွင်ႉၶဝ်ဢိူၺ်း၊ၵဝ်မီးၸႂ်ၸေႇတၼႃႇဢိၵ်ႇတင်းတၢင်းဢၼ်သူးတွင်းတီႈၽြႃးပဵၼ်ၸဝ်ႈၶႂ်ႈႁႂ်ႈၵူၼ်းယုတတင်းလၢႆလႆႈတၢင်းၵႄႇၶျွတ်ႈယူႇဢေႃႈ။

၂ ပဵၵ်ႉသမ်ႉဝႃႈတၢင်းဢၼ်ၶဝ်မီးၸႂ်ႁႅင်းယႂ်ႇၵႃႈၼႂ်းၽြႃးပဵၼ်ၸဝ်ႈၼၼ်ႉဢမ်ႇတႄႇၼိူဝ်တၢင်းႁူႉႁၼ်သေၵေႃႈယႃႇလွင်ႈဢၼ်ၶဝ်မီးၸႂ်ႁႅင်းယႂ်ႇၵႃႈၼႂ်းၽြႃးပဵၼ်ၸဝ်ႈၼၼ်ႉၵဝ်ၶၢမ်ႇသၢၵ်ႈသေႇပုၼ်ႈၶဝ်လႆႈယူႇဢေႃႈ။

၃ ပိူဝ်ႈဢၼ်ၶဝ်ယင်းဢမ်ႇႁူႉလွင်ႈဢၼ်ဝႃႈတြႃးတၢင်းသိုဝ်ႈတေႃႇၼၼ်ႉလုၵ်ႉၵႃႈတီႈၽြႃးပဵၼ်ၸဝ်ႈမႃးလႄႈၶဝ်ဢမ်ႇႁပ်ႉတုင်းဢဝ်။ၶဝ်ၵျၢမ်ႇႁႃႁႂ်ႈလႆႈတၢင်းသိုဝ်ႈတေႃႇႁင်းၶဝ်ဢေႃႈ။

၄ ၸဝ်ႈၶရိၸ်ႉပဵၼ်တီႈသုတ်းတီႈၵွႆပိင်းၺၢပ်ႈတြႃးဢေႃႈ။ၶဝ်ၸိူဝ်းဢၼ်ယုမ်ႇမၢတ်ႈၵႃႈမီးတင်းသဵင်ႈတင်းလူင်ၼၼ်ႉတၵ်းႁွတ်ႈထိုင်တၢင်းဢၼ်သိုဝ်ႈတေႃႇဢေႃႈ။

၅ မုဝ်းသေႇတႅမ်ႈဝႆႉလွင်ႈတြႃးသိုဝ်ႈတေႃႇဢၼ်ၸၢပ်ႈသႅင်ႇၵၼ်တင်းပိင်းၺၢပ်ႈတြႃးၼၼ်ႉလႄႈဝႃႈ၊-ၵေႃႉဢၼ်ၵမ်ၵျၢင်ႉပိင်းၺၢပ်ႈတြႃးၼၼ်ႉတၵ်းလႆႈလိပ်းၸွမ်းပိင်းၺၢပ်ႈတြႃးဢေႃႈ၊ဝႃႈၼင်ႇၼႆဢေႃႈ။

၆ တြႃးတၢင်းသိုဝ်ႈတေႃႇဢၼ်ၸၢပ်ႈသႅင်ႇၵၼ်တင်းတၢင်းဢၼ်ယုမ်ႇမၢတ်ႈၼၼ်ႉၸမ်း၊-ယႃႇပေဝႃႈၼႂ်းႁူဝ်ၸႂ်လႄႈဝႃႈၽူႈလႂ်တၵ်းၶိုၼ်ႈၵႃႈၼိူဝ်ၵၢင်ႁၢဝ်ပုၼ်ႉႁႂ်ႈလႆႈဢဝ်ၸဝ်ႈၶရိၸ်ႉလူင်းမႃး။

၇ ၽူႈလႂ်တၵ်းလူင်းၵႂႃႇၵႃႈတီႈဢၼ်လိုၵ်ႉဢၼ်လမ်ႇပုၼ်ႉလႄႈႁႂ်ႈလႆႈဢဝ်ၸဝ်ႈၶရိၸ်ႉလုၵ်ႉၵႃႈတီႈတၢင်းတၢႆၶိုၼ်းမႃး၊ဝႃႈၼင်ႇၼႆၼၼ်ႉဢေႃႈ။လွင်ႈၼႆႉၶႂ်ႈဝႃႈပွင်ႇသင်။တြႃးၸဝ်ႈၸမ်ၵၼ်တင်းမႂ်းဢေႃႈ။

၈ မီးယူႇၵႃႈၼႂ်းသူပ်းမႂ်းၵႃႈၼႂ်းႁူဝ်ၸႂ်မႂ်းဢေႃႈ၊ဝႃႈၼႆဢေႃႈ။မိူဝ်ႈဢၼ်ဝႃႈၸိူဝ်ႉၼင်ႇၼႆၼၼ်ႉၶႂ်ႈဝႃႈတြႃးတၢင်းယုမ်ႇမၢတ်ႈဢၼ်ႁဝ်းႁေႃးလၢတ်ႈၼႆႉဢေႃႈ။

၉ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်း၊ပေႃးမႂ်းဢဝ်တင်းသူပ်းမႂ်းယိုၼ်ဝႃႈယေႇသုပဵၼ်ၸဝ်ႈဝႃႈၼႆလႄႈဢဝ်တင်းႁူဝ်ၸႂ်မႂ်းယုမ်ႇမၢတ်ႈလွင်ႈဢၼ်ဝႃႈ၊ၽြႃးပဵၼ်ၸဝ်ႈႁႂ်ႈမၼ်းၸဝ်ႈလုၵ်ႉသေၵႃႈတၢင်းတၢႆၶိုၼ်းလိပ်းမႃးဢေႃႈ၊ဝႃႈၼႆၸိုင်မႂ်းတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။

၁၀ လႆႈဢဝ်တင်းႁူဝ်ၸႂ်ယုမ်ႇမၢတ်ႈလႄႈႁွတ်ႈထိုင်တၢင်းဢၼ်သိုဝ်ႈတေႃႇဢေႃႈ။လႆႈဢဝ်တင်းသူပ်းႁပ်ႉတုင်းဢဝ်လႄႈလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။

၁၁ ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်း၊-ၽူႈလႂ်သေဢမ်ႇဝႃႈ၊ၵေႃႉဢၼ်ဢိင်ပိုင်ႈမၼ်းၸဝ်ႈၼၼ်ႉတၵ်းဢမ်ႇမီးတၢင်းဢၼ်ဢူၵ်းဢၢႆဝႃႈၼင်ႇၼႆဢေႃႈ။

၁၂ ၵႃႈၼႂ်းမၼ်းၸဝ်ႈၼၼ်ႉဢမ်ႇမီးၵူၼ်းမဵဝ်းယုတ၊ၵူၼ်းမဵဝ်းႁေႇလသ၊ဢမ်ႇပႅၵ်ႇဢမ်ႇပိူင်ႈၵၼ်။ၸဝ်ႈဢၼ်ဢုပ်ႉပိူင်ႇၵူၼ်းတင်းလၢႆၼၼ်ႉမီးသူႇလဵဝ်ပႃးလဵဝ်ၵူၺ်းလႄႈပၼ်တၢင်းလီယႂ်ႇၼမ်ၼႃႇၵႃႈၼိူဝ်ၶဝ်ၸိူဝ်းဢၼ်ႁွင်ႉႁႃမၼ်းၸဝ်ႈၼၼ်ႉဢေႃႈ။

၁၂ လွင်ႈမၼ်းၸမ်းၶဝ်ၸိူဝ်းဢၼ်ႁွင်ႉႁႃၼႃႇမႃႉၸိုဝ်ႈသဵင်ၸဝ်ႈၼၼ်ႉၵူႈၵေႃႉတၵ်းလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။

တၢင်းဢၼ်လူဝ်ႇၵေႃႉဢၼ်ႁေႃးတြႃးသတၢင်းသိူဝ်းပျေႃႇ

၁၃ ၼႂ်းဝႃႈၼၼ်ႉသေၵေႃႈပေႃးၶဝ်ယင်းဢမ်ႇယုမ်ႇမၢတ်ႈၸိုင်ၶဝ်တၵ်းႁွင်ႉႁႃမၼ်းၸဝ်ႈလႆႈၸိူဝ်ႉၼင်ႇႁိုဝ်။ပေႃးၶဝ်ယင်းဢမ်ႇလႆႈငိၼ်းၸိုင်၊ၶဝ်တၵ်းယုမ်ႇမၢတ်ႈလႆႈၸိူဝ်ႉၼင်ႇႁိုဝ်။

၁၄ ပေႃးဢမ်ႇမီးၵေႃႉဢၼ်ႁေႃးလၢတ်ႈပၼ်ၸိုင်ၶဝ်တၵ်းငိၼ်းလႆႈၸိူဝ်ႉၼင်ႇႁိုဝ်။ပေႃးဢမ်ႇပွႆႇၸႂ်ႉၶဝ်ၵႂႃႇၸိုင်ၶဝ်တၵ်းႁေႃးလၢတ်ႈလႆႈၸိူဝ်ႉၼင်ႇႁိုဝ်။

၁၅ မႅၼ်ႈၼင်ႇဢၼ်ၵျၢမ်းလိၵ်ႈမႃးလႄႈဝႃႈ၊-တိၼ်ၶဝ်ၸိူဝ်းဢၼ်ႁေႃးမွၵ်ႇလၢတ်ႈသတၢင်းသိူဝ်းပျေႃႇၼၼ်ႉႁၢင်ႊလီၼႃႇလူင်လၢင်ဢေႃႈ၊ဝႃႈၼင်ႇၼႆဢေႃႈ။

ၼႂ်းဝႃႈၼၼ်သေၵေႃႈၵူၼ်းယုတတင်းသဵင်ႈတင်းလူင်ထွမ်ႇဢဝ်သတၢင်းသိူဝ်းပျေႃႇဢမ်ႇၸႂ်ႈ။

၁၆ ၵႂၢမ်းဢၼ်ပရေႃးၽႅတ်ႈဢိသႃႇယႁေႃးလၢတ်ႈဝႆႉလႄႈဝႃႈၸမ်း၊-ဢူဝ်းထႃႇဝရႃႉၽြႃး၊ၵႂၢမ်းသတၢင်းသဵင်ၶၢဝ်ႇဢၼ်ႁဝ်းၶႃႈႁေႃးလၢတ်ႈၼႆႉၽူႈလႂ်ယုမ်ႇတီႈၶႃႈ၊ဝႃႈၼင်ႇၼႆဢေႃႈ။

၁၇ ပိူဝ်ႈၼႆလႄႈတၢင်းယုမ်ႇမၢတ်ႈပဵၼ်ၵွပ်ႈပိူဝ်ႈတၢင်းဢၼ်လႆႈထွမ်ႇလႆႈငိၼ်းဢေႃႈ။လႆႈထွမ်ႇလႆႈငိၼ်းၼုၵ်ႈၵပၢတ်ႈၽြႃးပဵၼ်ၸဝ်ႈဢေႃႈ။

၁၈ ၼႂ်းဝႃႈၼၼ်သေၵေႃႈၵဝ်လႆႈထၢမ်ၸမ်း၊ၸွင်ႇၶဝ်ဢမ်ႇလႆႈငိၼ်းႁိုဝ်။လႆႈငိၼ်းဢမၢၼ်ႇၶၼ်ပဵၼ်ယဝ်ႉ။သဵင်ၶဝ်ၸွတ်ႇတူဝ်ၵႂႃႇၵႃႈၼိူဝ်လိၼ်မိူင်းၵူႈတီႈၵူႈလႅၼ်လႄႈၵႂၢမ်းၶဝ်ၵေႃႈၽႅဝ်ၵႂႃႇတေႃႇထိုင်ႁွတ်ႈတီႈႁိမ်းလႅၼ်သုတ်းလိၼ်မိူင်းပုၼ်ႉယဝ်ႉ၊ဝႃႈၼႆမီးမႃးၼင်ႇၼႆဢေႃႈ။

၁၉ ၵဝ်သမ်ႉထၢမ်ထႅင်ႈၸမ်းၵူၼ်းဢိသရေႇလတင်းလၢႆဢမ်ႇႁူႉလွင်ႈၼႆႉႁိုဝ်။မိူဝ်ႈဢွၼ်တၢင်းၼၼ်ႉမုဝ်းသေႇလၢတ်ႈဝႆႉဝႃႈ၊-ၵဝ်တၵ်းဢဝ်ၵူၼ်းမဵဝ်းဢၼ်ဢမ်ႇလႆႈလွင်ႈၼၼ်ႉႁဵတ်းႁႂ်ႈသူလႆႈမီးၸႂ်ဢၼ်သီႇၵေႉႁေႈတႃဢေႃႈ။ၵဝ်တၵ်းဢဝ်ၵူၼ်းမဵဝ်းဢၼ်ဢမ်ႇမီးပိင်ႇၺႃႇၼၼ်ႉႁဵတ်းႁႂ်ႈၶဝ်ၸႂ်မႆႈၸႂ်ႁၢႆႉဢေႃႈဝႃႈၼင်ႇၼႆဢေႃႈ။

၂၀ ဢိသႃႇယယဵင်ႈၶႅၼ်းလၢတ်ႈလႅင်းလႅင်းလႄႈဝႃႈ၊-ၶဝ်ၸိူဝ်းဢၼ်ဢမ်ႇႁႃၵဝ်ၼၼ်ႉလႆႈထူပ်းႁၼ်ၵဝ်ယဝ်ႉ။တီႈၶဝ်ၸိူဝ်းဢၼ်ဢမ်ႇထၢမ်ႁႃၵဝ်ၼၼ်ႉၵဝ်ၼပျေႃႉထၢင်ႇထၢင်ႇသႃးသႃးယဝ်ႉ၊ဝႃႈၼင်ႇၼႆဢေႃႈ။

၂၁ မၼ်းၸဝ်ႈဢဝ်လွင်ႈၵူၼ်းဢိသရေႇလတင်းလၢႆလႄႈဝႃႈထႅင်ႈၸမ်း၊-ၵဝ်လႆႈၵီႈၽႃႇမိုဝ်းၵဝ်တင်းဝၼ်းတေႃႇၵူၼ်းမဵဝ်းဢၼ်ဢမ်ႇထွမ်ႇဢမ်ႇဢဝ်လႄႈထဵင်ပႅတ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။