Shan Missions

လိၵ်ႈဢေႃးဝႃႇတႃႉရူဝ်းမ

Chapter   ၁       ၂       ၃       ၄       ၅       ၆       ၇       ၈       ၉       ၁၀       ၁၁       ၁၂       ၁၃       ၁၄       ၁၅       ၁၆     

၆

တၢင်းတၢႆၼႂ်းဢပျႅတ်ႈ

၁ ပေႃးပဵၼ်ၸိူဝ်ႉၼင်ႇၼႆၸိုင်ႁဝ်းတၵ်းဝႃႈၸိူဝ်ႉၼင်ႇႁိုဝ်။ၼင်ႇႁိုဝ်ၵျေးၸူးၸဝ်ႈယဵင်ႈၶႅၼ်းတၵ်းယႂ်ႇမႃးၼမ်မႃးၼၼ်ႉၸွင်ႇႁဝ်းတၵ်းလႆႈႁဵတ်းဢပျႅတ်ႈယူႇႁိုဝ်။

၂ ဢမ်ႇၸႂ်ႈၸိူဝ်ႉၼင်ႇၼၼ်။ႁဝ်းၸိူဝ်းဢၼ်တၢႆယဝ်ႉၵႃႈၼႂ်းဢပျႅတ်ႈတြႃးၼၼ်ႉတၵ်းၶိုၼ်းဢသၢၵ်ႈလိပ်းၼႂ်းတြႃးၼၼ်ႉလႆႈထႅင်ႈၸိူဝ်ႉၼင်ႇႁိုဝ်။

၃ ၸွင်ႇသူဢမ်ႇႁူႉလွင်ႈဢၼ်ဝႃႈ၊ႁဝ်းၸိူဝ်းဢၼ်ၶၢမ်ႇဢဝ်ပပ်ႉတိၸၢမ်ႇၼႂ်းၸဝ်ႈယေႇသုၶရိၸ်ႉၼၼ်ႉလႆႈၶၢမ်ႇဢဝ်ပပ်ႉတိၸၢမ်ႇၼႂ်းတၢင်းတၢႆမၼ်းၸဝ်ႈယဝ်ႉၼၼ်ႉႁိုဝ်။

၄ ၵွပ်ႈႁွႆးၼႆႉလႄႈပိူဝ်ႈဢၼ်ႁဝ်းလႆႈၶၢမ်ႇဢဝ်ပပ်ႉတိၸၢမ်ႇၼႂ်းတၢင်းတၢႆမၼ်းၸဝ်ႈၼၼ်ႉႁဝ်းလႆႈၶၢမ်ႇတၢင်းဢၼ်သၢင်းၵျူဝ်ႇလူၺ်ႈၵၼ်တင်းမၼ်းၸဝ်ႈဢေႃႈ။လွင်ႈမၼ်းၸမ်း၊ၸိူဝ်ႉၼင်ႇဢၼ်ၸဝ်ႈၶရိၸ်ႉလုၵ်ႉၵႃႈတၢင်းတၢႆၶိုၼ်းလိပ်းၵွပ်ႈပိူဝ်ႈၽုင်းတၼ်းၶူဝ်းပေႃႈၸဝ်ႈၼၼ်ႉ၊ႁဝ်းၵေႃႈတေလႆႈပႆၵႃႈၼႂ်းဢသၢၵ်ႈဢၼ်မႂ်ႇၼၼ်ႉဢေႃႈ။

၅ ၼႄးၼိုင်ႈၸမ်းပေႃးႁဝ်းႁူမ်ႈပွင်းလူၺ်ႈၵၼ်တင်းမၼ်းၸဝ်ႈၼႂ်းတၢင်းတၢႆမၼ်းၸဝ်ႈၸိုင်ဢမၢၼ်ႇၶၼ်ပဵၼ်ႁဝ်းတၵ်းႁူမ်ႈပွင်းလူၺ်ႈၵၼ်တင်းမၼ်းၸဝ်ႈၼႂ်းတၢင်းဢၼ်မၼ်းၸဝ်ႈလုၵ်ႉၶိုၼ်းလိပ်းၼၼ်ႉဢေႃႈ။

၆ လိူဝ်သေၼၼ်ႉႁဝ်းႁူႉလွင်ႈဢၼ်ဝႃႈ၊ၼင်ႇႁိုဝ်တၵ်းပဵၼ်တၢင်းဢၼ်ယႃႉပႅတ်ႈတူဝ်ဢပျႅတ်ႈတြႃးလႄႈၵမ်းလိုၼ်းတၵ်းဢမ်ႇလႆႈၶၢမ်ႇတၢင်းၸႂ်ႉတၢင်းသွႆဢပျႅတ်ႈတြႃးၸိုင်၊ၵူၼ်းၵဝ်ႇႁဝ်းၼႆႉလႆႈၶၢမ်ႇတၢင်းဢၼ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းလူၺ်ႈၵၼ်တင်းမၼ်းၸဝ်ႈယဝ်ႉ။

၇ ၵေႃႉဢၼ်တၢႆၼၼ်ႉလႆႈၵၢင်းလွတ်ႈသေၵႃႈၼႂ်းမိုဝ်းဢပျႅတ်ႈတြႃးဢေႃႈ။

၈ ပေႃးႁဝ်းတၢႆလူၺ်ႈၵၼ်တင်းၸဝ်ႈၶရိၸ်ႉၸိုင်ႁဝ်းယုမ်ႇလွင်ႈဢၼ်ဝႃႈႁဝ်းတၵ်းလႆႈလုၵ်ႉၶိုၼ်းလိပ်းလူၺ်ႈၵၼ်တင်းမၼ်းၸဝ်ႈဢေႃႈ။

၉ ႁဝ်းႁူႉလွင်ႈဢၼ်ၸဝ်ႈၶရိၸ်ႉလုၵ်ႉၵႃႈတၢင်းတၢႆၶိုၼ်းလိပ်းသေယဝ်ႉဢမ်ႇၶိုၼ်းတၢႆထႅင်ႈသေပွၵ်ႈလႄႈၵမ်းလိုၼ်းၵေႃႈတြႃးတၢင်းတၢႆဢမ်ႇလႆႈဢုပ်ႉပိူင်ႇမၼ်းၸဝ်ႈ။

၁၀ ၼႂ်းလွင်ႈတၢင်းဢၼ်မၼ်းၸဝ်ႈၶၢမ်ႇတၢင်းတၢႆၼၼ်ႉမၼ်းၸဝ်ႈၶၢမ်ႇၵႃႈတီႈဢပျႅတ်ႈတြႃးပွၵ်ႈလဵဝ်ၵူၺ်းဢေႃႈ။ၼႂ်းလွင်ႈတၢင်းဢၼ်မၼ်းၸဝ်ႈဢသၢၵ်ႈလိပ်းၼၼ်ႉမၼ်းၸဝ်ႈလိပ်းၵႃႈတီႈၽြႃးပဵၼ်ၸဝ်ႈဢေႃႈ။

၁၁ မိူၼ်ၼင်ႇၼၼ်သူၵေႃႈတၵ်းလႆႈမၢတ်ႈဝႃႈတူဝ်သူၵေႃႈလႆႈတၢႆၵႃႈၼႂ်းဢပျႅတ်ႈတြႃးလႄႈသမ်ႉလႆႈဢသၢၵ်ႈလိပ်းတီႈၽြႃးပဵၼ်ၸဝ်ႈၼႂ်းၸဝ်ႈယေႇသုၶရိၸ်ႉၼၼ်ႉဢေႃႈ။

၁၂ ပိူဝ်ႈၼႆလႄႈယႃႇပေႁႂ်ႈဢပျႅတ်ႈတြႃးလႆႈဢုပ်ႉပိူင်ႇတူဝ်ၶိင်းသူဢၼ်ၸၢင်ႊတၢႆၼၼ်ႉလႄႈၸွမ်းတၢင်းဢၼ်ၸွႆးၸပ်းဢလူဝ်ႇမၼ်း။ယႃႇပေႁႂ်ႈဢင်ႇၵႃႇတူဝ်သူလႆႈပဵၼ်လၢၵ်ႈၼၢၵ်ႈတူႉၸရိူၵ်ႈၼႂ်းဢပျႅတ်ႈတြႃးၼၼ်ႉ။

၁၃ ဢဝ်တူဝ်ၸဝ်ႈၵဝ်ႇသၢၵ်ႈၵၢပ်ႈၵႃႈတီႈၽြႃးပဵၼ်ၸဝ်ႈၸိူဝ်ႉၼင်ႇဢၼ်ပဵၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ႁဵတ်းႁႂ်ႈဢသၢၵ်ႈၶိုၼ်းလိပ်းမႃးၼၼ်ႉတႃႉ။ဢၢင်ႇၵႃႇတူဝ်သူတင်းလၢႆၵေႃႈႁႂ်ႈပဵၼ်လၢၵ်ႈၼၢၵ်ႈသူႉၸရိူၵ်ႈလႄႈသၢၵ်ႈၵၢပ်ႈတီႈၽြႃးပဵၼ်ၸဝ်ႈတႃႉ။

၁၄ ၵႃႈၼင်ႇဢၼ်သူဢမ်ႇမီးၵႃႈတႂ်ႈပိင်းၺၢပ်ႈတြႃးလႄႈမီးၵႃႈတႂ်ႈၵျေးၸူးတြႃးၵူၺ်းၼၼ်ႉဢပျႅတ်ႈတြႃးတၵ်းဢမ်ႇလႆႈဢုပ်ႉပိူင်ႇၵႃႈၼိူဝ်သူ။

ပဵၼ်ၶႃႈတြႃးတၢင်းသိုဝ်ႈတေႃႇ

၁၅ ၵွပ်ႈႁွႆးၼႆႉၸိုင်၊တၵ်းပဵၼ်ၸိူဝ်ႉၼင်ႇႁို်ဝ်။ႁဝ်းၼႆႉပိူဝ်ႈဢၼ်ဢမ်ႇမီးၵႃႈတႂ်ႈပိင်းၺၢပ်ႈတြႃး။မီးၵႃႈတႂ်ႈၵျေးၸူးတြႃးလႄႈတၵ်းလႆႈႁဵတ်းဢပျႅတ်ႈတူႉၸရိူၵ်ႈႁိုဝ်း။

၁၆ ဢမ်ႇၸႂ်ႈၸိူဝ်ႉၼင်ႇၼၼ်။ပေႃးသူႁဵတ်းၶႃႈၵႃႈတီႈဢပျႅတ်ႈတြႃးဢၼ်ၸၢပ်ႈသႅင်ႇၵၼ်တင်းတၢင်းတၢႆသေဢမ်ႇဝႃႈ၊ႁဵတ်းၶႃႈၵႃႈတီႈတြႃးတၢင်းဢၼ်ထွမ်ႇဢဝ်ဢၼ်ၸၢပ်ႈသႅင်ႇၵၼ်တင်းတၢင်းဢၼ်ႁွတ်ႈထိုင်တၢင်းသိုဝ်ႈတေႃႇၼၼ်ႉသေဢမ်ႇဝႃႈ၊ႁဵတ်းၶႃႈတီႈၽူႈလႂ်သေဢမ်ႇဝႃႈ၊ၸွင်ႇသူဢမ်ႇႁူႉလွင်ႈဢၼ်ဝႃႈၵေႃႉၼၼ်ႉပဵၼ်ၸဝ်ႈသူၼၼ်ႉႁိုဝ်။

၁၇ ပဵၵ်ႉသမ်ႉသူယၢမ်ႈပဵၼ်ၶႃႈဢပျႅတ်ႈတြႃးသေၵေႃႈပိူဝ်ႈဢၼ်သူဢဝ်တင်းႁူဝ်ၸႂ်ထွမ်ႇဢဝ်ၵႂၢမ်းၼႄးဢူႉပတေႇတင်းလၢႆဢၼ်လႆႈၶၢမ်ႇဢဝ်မႃးယဝ်ႉၼၼ်ႉလႄႈၵျေးၸူးၽြႃးပဵၼ်ၸဝ်ႈပဵၼ်ဢၼ်ယႂ်ႇၼႃႇဢေႃႈ။

၁၈ ပိူဝ်ႈဢၼ်သူလႆႈလွတ်ႈဢွၵ်ႇသေၵႃႈၼႂ်းဢပျႅတ်ႈတြႃးယဝ်ႉလႄႈ၊သူပဵၼ်ၶႃႈတြႃးတၢင်းသိုဝ်ႈတေႃႇဢေႃႈ။ပိူဝ်ႈဢၼ်သူၺၢၼ်ႇၵေႇၼႃႇလႄႈၵဝ်ဢဝ်တင်းၵႂၢမ်းလေႃးၵီႇဝေႃးႁႃႇရႃႉလႄႈဝႃႈၸွမ်းၼင်ႇၸႃႇတိပၵတိဢေႃႈ။

၁၉ ၸိူဝ်ႉၼင်ႇဢၼ်သူဢဝ်ဢင်ႇၵႃႇတူဝ်သူဢၢပ်ႈပၼ်ၼႂ်းတြႃးတၢင်းဢၼ်ၵူဝ်ႈၵိူၵ်ႇဢိၵ်ႇတင်းဢႃႉထမ်ႇမႃႉတြႃးလႄႈၶၢမ်ႇႁဵတ်းၶႃႈႁႂ်ႈပဵၼ်ပုၼ်ႈဢႃႉထမ်ႇမႃႉၼၼ်ႉတေႃႈလဵဝ်ၼႆႉဢဝ်ဢင်ႇၵႃႇတူဝ်သူဢၢပ်ႈပၼ်ၼႂ်းတြႃးတၢင်းသိုဝ်ႈတေႃႇႁႂ်ႈပဵၼ်ပုၼ်ႈတၢင်းမူတ်းၸၢင်ႇၼၼ်ႉလႄႈၶၢမ်ႇႁဵတ်းၶႃႈမၼ်းၸဝ်ႈတႃႉ။

၂၀ ၼႂ်းၶိင်ႇမိူဝ်ႈဢၼ်သူပဵၼ်ၶႃႈဢပျႅတ်ႈတြႃးယူႇၼၼ်ႉၸိုင်သူလွတ်ႈဢွၵ်ႇၵႃႈၼႂ်းမိုဝ်းတြႃးတၢင်းသိုဝ်ႈတေႃႇဢေႃႈ။

၂၁ မိူဝ်ႈဢၼ်သူႁဵတ်းလွင်ႈတၢင်းဢၼ်ပူၼ်ႉမႃးဢၼ်သူလႆႈလီဢူၵ်းလီဢၢႆတေႃႈလဵဝ်ၼႆႉၼၼ်ႉသူလႆႈဢၵျူဝ်းၵႃႈသင်။တီႈသုတ်းတီႈၵွႆႈလွင်ႈတၢင်းၸိူဝ်းၼၼ်ႉၸမ်း၊ပဵၼ်တၢင်းတၢႆဢေႃႈ။

၂၂ တေႃႈလဵဝ်ၼႆႉၸမ်းၵႃႈၼင်ႇဢၼ်သူလွတ်ႈဢွၵ်ႇသေၵႃႈၼႂ်းမိုဝ်းဢပျႅတ်ႈတြႃးလႄႈပဵၼ်ၶႃႈၽြႃးပဵၼ်ၸဝ်ႈၼၼ်ႉသူလႆႈဢၵျူဝ်းတၢင်းမူတ်းၸၢင်ႇဢေႃႈ။ၼႂ်းတီႈသုတ်းတီႈၵွႆပုၼ်ႉၵေႃႈသူတၵ်းလႆႈထႃႇဝရႃႉဢသၢၵ်ႈဢေႃႈ။

၂၃ ၵႃႊၶၼ်ဢပျႅတ်ႈတြႃးၸမ်းပဵၼ်တၢင်းတၢႆဢေႃႈ။

သူႉၵျေးၸူးဢၼ်ၽြႃးပဵၼ်ၸဝ်ႈပၼ်ၼၼ်ႉၸမ်းပဵၼ်ထႃႇဝရႃႉဢသၢၵ်ႈၵႃႈၼႂ်းၸဝ်ႈႁဝ်းၸဝ်ႈယေႇသုၶရိၸ်ႉဢေႃႈ။