Shan Missions

မၢတ်ႈထႄႇ

Chapter   ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၆

တၢင်းဢၼ်ၸႃႇၵႃႉၽေးၸွၼ်း

၁ လွင်ႈၼင်ႇႁိုဝ်သူတၵ်းဢမ်ႇႁဵတ်းသီႇလႃႉတၢင်းသိုဝ်ႈတေႃႇသူၵႃႈတီႈၽၢႆႇၼႃႈၵူၼ်းတင်းလၢႆလႄႈႁႂ်ႈပိူၼ်ႈလႆႈႁၼ်ၼၼ်ႉၸိုင်ႁဵတ်းသတိတႃႉ။ ပေႃးဢမ်ႇၼၼ်သူတၵ်းဢမ်ႇလႆႈၶၢမ်ႇဢဝ်သူးလၢပ်ႈၵႃႈတီႈပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉ။

၂ ပိူဝ်ႈၼႆလႄႈမိူဝ်ႈဢၼ်သူႁဵတ်းတႃႇၼႃႉတၢင်းဢၼ်ၽေးၸွၼ်းယိုၼ်ႈမႅင်ႇၼၼ်ႉၸိုင်ယႃႇပေပဝ်ႇပီႇပဝ်ႇၼႄးၵႃႈတီႈၽၢႆႇၼႃႈသူမိူၼ်ၸိူဝ်ႉၼင်ႇၵူၼ်းၸိူဝ်းဢၼ်ၸၢင်ႊထိမ်ႇၸၢင်ႊမႅပ်းတင်းလၢႆၶႂ်ႈႁႂ်ႈပိူၼ်ႈယွင်ႈၶဝ်လႄႈႁဵတ်းၵုႈၼႂ်းၸရွပ်ႈႁေႃးတြႃးဢိၵ်ႇတင်းၵႃႈၼႂ်းသဵၼ်ႈတၢင်းသၢႆတႃၸိူဝ်းၼၼ်ႉ။

၃ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၶဝ်ၼၼ်ႉလႆႈသူးလၢပ်ႈၶဝ်ယဝ်ႉ။ မိူဝ်ႈဢၼ်သူႁဵတ်းတႃႇၼႃႉတၢင်းဢၼ်ၽေးၸွၼ်းယိုၼ်ႈမႅင်ႇၼၼ်ႉၼင်ႇႁိုဝ်တၢင်းဢၼ်သူၽေးၸွၼ်းယိုၼ်ႈမႅင်ႇၼၼ်ႉတၵ်းပဵၼ်တဵတ်ႇတဵတ်ႇယဵၼ်ယဵၼ်ဢမ်ႇထၢင်ႇဢမ်ႇသႃးၸိုင်လွင်ႈဢၼ်မိုဝ်းၶွၼ်ၶႂႃႁဵတ်းၼၼ်ႉယႃႇပေႁႂ်ႈမိုဝ်းၶွၼ်သၢႆႉႁူႉ။

၄ ပေႃႈသူဢၼ်ႁၼ်လွင်ႈဢၼ်ဢမ်ႇထၢင်ႇဢမ်ႇသႃးၼၼ်ႉတၵ်းပၼ်ဢၵျူဝ်းတီႈသူဢေႃႈ။

တၢင်းဢၼ်သူးတွင်း

၅ မိူဝ်ႈဢၼ်သူသူးတွင်းၼၼ်ႉယႃႇပေႁဵတ်းၸိူဝ်ႉၼင်ႇၵူၼ်းဢၼ်ၸၢင်ႊထိမ်ႇၸၢင်ႊမႅပ်းၶဝ်ႁဵတ်းၼၼ်ႉ။ ၶဝ်ၼၼ်ႉၼင်ႇႁိုဝ်ပိူၼ်ႈတၵ်းႁၼ်ၸိုင်ၶႂ်ႈၸုၵ်းယူႇၼႂ်းၸရွပ်ႈႁေႃးတြႃးၵႃႈၼႂ်းတၢင်းၶွႆႈတၢင်းႁွမ်းသေလႄႈသူးတွင်းဢေႃႈ။ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၶဝ်ၼၼ်ႉလႆႈသူးလၢပ်ႈၶဝ်ယဝ်ႉ။

၆ မိူဝ်ႈဢၼ်သူသူးတွင်းၼၼ်ႉၶဝ်ႈၵႃႈၼႂ်းလုၵ်းတၢင်းၼႂ်းလႄႈဢိုတ်းၽၵ်းတူယဝ်ႉၸင်ႇသူးတွင်းၵႃႈတီႈပေႃႈသူဢၼ်မီးယူႇၵႃႈတီႈဢၼ်ဢမ်ႇထၢင်ႇဢမ်ႇသႃးၼၼ်ႉတႃႉ။ ပေႃႈသူဢၼ်ႁၼ်လွင်ႈတၢင်းဢၼ်ဢမ်ႇထၢင်ႇဢမ်ႇသႃးၼၼ်ႉတၵ်းပၼ်သူးလၢပ်ႈဢေႃႈ။

၇ မိူဝ်ႈဢၼ်သူသူးတွင်းၼၼ်ႉယႃႇပေရုတ်ႈၵႂၢမ်းဢၼ်လၢႆလၢႆယူႇၶိူဝ်းၶိူဝ်းယႂ်းယႂ်းမိူၼ်ၼင်ႇၵူၼ်းသႃႇသၼႃႇပႃႉၶဝ်ႁဵတ်းၼၼ်ႉ။

၈ ၶဝ်ထၢင်ႇဝႃႈၵွပ်ႈပိူဝ်ႈၵႂၢမ်းၼမ်လႄႈတၵ်းတဵမ်ထူၼ်ႈဢေႃႈ။ ယႃႇပေႁဵတ်းၸိူဝ်ႉၼင်ႇၶဝ်ၼၼ်ႉ။ လွင်ႈမၼ်းၸမ်းၸူဝ်ႈဢၼ်သူယင်းဢမ်ႇပႆႇယွၼ်းၼၼ်ႉပေႃႈသူယင်းပေႃးႁူႉလွင်ႈဢၼ်သူလူဝ်ႇၵႃႈမီးတင်းသဵင်ႈတင်းလူင်ၼၼ်ႉဢေႃႈ။

၉ ပိူဝ်ႈၼႆလႄႈသူတၵ်းလႆႈသူးတွင်းလႄႈဝႃႈ၊-ပေႃႈႁဝ်းၶႃႈဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉ၊ႁႂ်ႈၼႃႇမႃႉၸိုဝ်သဵင်ၸဝ်ႈႁဝ်းမီးတၢင်းဢၼ်ရူဝ်ႇသေႇၵူဝ်ယမ်သေၵမ်းလူၺ်ႈတီႈၶႃႈ။

၁၀ ႁႂ်ႈမိူင်းၸဝ်ႈႁဝ်းတႄႇပဵၼ်သေၵမ်းလူၺ်ႈတီႈၶႃႈ။ ၸိူဝ်ႉၼင်ႇဢၼ်ဢလူဝ်ႇၸဝ်ႈႁဝ်းတဵမ်ထူၼ်ႈဝႆႉၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉ

၁၁ ၵႃႈၼိူဝ်လိၼ်မိူင်းၼႆႉၵေႃႈႁႂ်ႈတဵမ်ထူၼ်ႈသေၵမ်းလူၺ်ႈတီႈၶႃႈ။ ၶႅၼ်းတေႃႈပၼ်တၢင်းၵိၼ်ဢၼ်ပေႃးၵုမ်ႇလဵင်ႉၸႂ်ၼၼ်ႉတီႈႁဝ်းၶႃႈဝၼ်းမိူဝ်ႈၼႆႉသေၵမ်းတီႈၶႃႈ။

၁၂ ၸိူဝ်ႉၼင်ႇဢၼ်ႁဝ်းၶႃႈပွႆႇလွတ်ႈဢပျႅတ်ႈပိူၼ်ႈတၢင်ႇၵေႃႉဢၼ်ၽိတ်းႁဝ်းၶႃႈၼၼ်ႉၶႅၼ်းတေႃႈပွႆႇလွတ်ႈဢပျႅတ်ႈႁဝ်းၶႃႈသေၵမ်းၶႃႈ။

၁၃ ယႃႇပေႁႂ်ႈလႆႈၸွမ်းၵႂႃႇၵႃႈတီႈဢပျႅတ်ႈတၢင်းဢၼ်ၸူဝ်းၵႂႃႇၸူဝ်းပႆၼၼ်ႉလႄႈၶႅၼ်းတေႃႈၵႄႇသႄႇထွတ်ႇထူၺ်ႈဢဝ်သေၵႃႈၼႂ်းလွင်ႈတၢင်းဢၼ်ဢမ်ႇလီဢမ်ႇငၢမ်းၼၼ်ႉသေၵမ်းတီႈၶႃႈ၊ဝႃႈၼႆသူးတွင်းတႃႉ။

၁၄ ပေႃးသူပွႆႇလွတ်ႈဢပျႅတ်ႈပိူၼ်ႈတၢင်ႇၵေႃႉၸိုင်ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉၵေႃႈတၵ်းပွႆႇလွတ်ႈဢပျႅတ်ႈသူယူႇဢေႃႈ။

၁၅ ပေႃးသူယင်းဢမ်ႇပွႆႇလွတ်ႈဢပျႅတ်ႈပိူၼ်ႈတၢင်ႇၵေႃႉၸိုင်ပေႃႈသူၼၼ်ႉၵေႃႈတၵ်းဢမ်ႇပွႆႇလွတ်ႈဢပျႅတ်ႈသူ။

တၢင်းဢၼ်ၵမ်တၢင်းၵိၼ်

၁၆ မိူဝ်ႈဢၼ်သူၵမ်တၢင်းၵိၼ်ၼၼ်ႉယႃႇႁႂ်ႈမီးၼႃႈဢူၼ်ႈၼႃႈငဝ်မိူၼ်ၸိူဝ်ႉၼင်ႇၵူၼ်းၸိူဝ်းဢၼ်ၸၢင်ႊထိမ်ႇၸၢင်ႊမႅပ်းၶဝ်ႁဵတ်းၼၼ်ႉ။ ၶဝ်ၼၼ်ႉၼင်ႇႁိုဝ်ပိူၼ်ႈတၵ်းႁူႉလွင်ႈဢၼ်ၶဝ်ၵမ်တၢင်းၵိၼ်ၼၼ်ႉၶဝ်ၸၢင်ႊမေႃယႃႉၼႃႈယႃႉတႃၶဝ်ဢေႃႈ။ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၶဝ်လႆႈသူးလၢပ်ႈၶဝ်ယဝ်ႉ။

၁၇ မိူဝ်ႈဢၼ်သူၵမ်တၢင်းၵိၼ်ၼၼ်ႉၼင်ႇႁိုဝ်ပိူၼ်ႈတၵ်းဢမ်ႇႁူႉလွင်ႈဢၼ်သူၵမ်တၢင်းၵိၼ်ၼၼ်ႉလႄႈႁႂ်ႈပေႃႈသူဢၼ်မီးယူႇၵႃႈတီႈဢၼ်ဢမ်ႇထၢင်ႇဢမ်ႇသႃးၼၼ်ႉတၵ်းႁၼ်ၵူၺ်းၸိုင်တႃးႁူဝ်လႄႈသုၵ်ႈၼႃႈသူတႃႉ။

၁၈ ပေႃႈသူဢၼ်ႁၼ်လွင်ႈတၢင်းဢၼ်ဢမ်ႇထၢင်ႇဢမ်ႇသႃးၼၼ်ႉတၵ်းပၼ်သူးလၢပ်ႈတီႈသူဢေႃႈ။

တၢင်းဢၼ်သိမ်းပႅင်းၽၼ်ႇတႃႇ

၁၉ ယႃပေသိမ်းပႅင်းၽၼ်ႇတႃႇဢုၵ်ႉၸႃႇၵုႈၼိူဝ်လိၼ်မိူင်းတီႈဢၼ်ႁေႃတင်းမႅင်းၸၢင်ႊယႃႉဢၼ်ၽူႈလၵ်ႉၸၢင်ႊမုင်ႈတူၺ်းလႄႈလၵ်ႉဢဝ်လႆႈၼၼ်ႉ။

၂၀ သိမ်းပႅင်းၽၼ်ႇတႃႇဢုၵ်ႉၸႃႇၵႃႈၼိူဝ်မိူင်းၵၢင်ႁၢဝ်တီႈဢၼ်ႁေႃတင်းမႅင်းဢမ်ႇၸၢင်ႊယႃႉဢၼ်ၽူႈလၵ်ႉဢမ်ႇၸၢင်ႊမုင်ႈတူၺ်းလႄႈလၵ်ႉဢဝ်လႆႈၼၼ်ႉတႃႉ။

၂၁ လွင်ႈမၼ်းၸမ်းႁူဝ်ၸႂ်သူၸၢင်ႊမီးၵႃႈတီႈဢၼ်ၽၼ်ႇတႃႇဢုၵ်ႉၸႃႇသူမီးၼၼ်ႉဢေႃႈ။

၂၂ ၵွၵ်းၽႆးတူဝ်ၵႃႇယႃႉၸမ်းပဵၼ်မၢၵ်ႇတႃဢေႃႈ။ ပိူဝ်ႈၼႆလႄႈပေႃးမၢၵ်ႇတႃမႂ်းသႂ်လႅင်းၸိုင်တၵ်းလႅင်းတင်းတူဝ်ဢေႃႈ။

၂၃ ပေႃးမၢၵ်ႇတႃမႂ်းဢမ်ႇလီၸိုင်တၵ်းလပ်းသိင်ႇတင်းတူဝ်ဢေႃႈ။ ပေႃးဢၼ်လႅင်းဢၼ်မီးၼႂ်းမႂ်းၼၼ်ႉပဵၼ်ဢၼ်လပ်းသိင်ႇၸိုင်ဢၼ်လပ်းသိင်ႇၼၼ်ႉလပ်းသိင်ႇၼႃႇလူင်လၢင်ဢေႃႈ။

၂၄ ၵေႃႉလႂ်ၵေႃႈဢမ်ႇၶၢမ်ႇတၢင်းဢၼ်ၸဝ်ႈသွင်ပႃးၸႂ်ႉသွႆၼၼ်ႉလႆႈ။ တၵ်းၸင်းၸဝ်ႈပႃးၼိုင်ႈလႄႈႁၵ်ႉၸဝ်ႈပႃးၼိုင်ႈဢေႃႈတၵ်းဢိင်ပိုင်ႈၸဝ်ႈပႃးၼိုင်ႈလႄႈႁဵတ်းဢမ်ႇၼပ်ႉဢမ်ႇၶၢၼ်းၸဝ်ႈပႃးၼိုင်ႈဢေႃႈ။ သူဢမ်ႇၶၢမ်ႇတၢင်းဢၼ်ၽြႃးပဵၼ်ၸဝ်ႈၸႂ်ႉသွႆဢိၵ်ႇတင်းတၢင်းဢၼ်ၸေးၸိမ်ႇလေႃးၵီႇၸႂ်ႉသွႆၼၼ်ႉလႆႈ။

ယႃႇပေမႆႈၸႂ်လႅင်ၸႂ်

၂၅ ပိူဝ်ႈၼႆလႄႈၵဝ်ဝႃႈတီႈသူၸမ်းပုၼ်ႈဢသၢၵ်ႈၸိုင်တၵ်းလႆႈၵိၼ်ၸိူဝ်ႉၼင်ႇႁိုဝ်။ ပုၼ်ႈတူဝ်ၵႃႇယႃႉၸိုင်တၵ်းလႆႈၼုင်ႈၸိူဝ်ႉႁိုဝ်ဝႃႈၼႆယႃႇပေမႆႈၸႂ်။ ဢသၢၵ်ႈမျၢတ်သေတၢင်းၵိၼ်ဢမ်ႇၸႂ်ႈႁိုဝ်း။

၂၆ တူဝ်ၵႃႇယႃႉမျၢတ်ႈသတေၢင်းၼုင်ႈဢမ်ႇၸႂ်ႈႁိုဝ်း။ တူၺ်းၼူၵ်ႉဢၼ်မိၼ်ၵႃႈၼိူဝ်ၵၢင်ႁၢဝ်ၸိူဝ်းၼၼ်ႉတႃႉ။ ၼူၵ်ႉၸိူဝ်းၼၼ်ႉဢမ်ႇဝၢၼ်ႇဢမ်ႇသွမ်ႈၸိူဝ်ႉၽၼ်း။ ဢမ်ႇပၢတ်ႇဢမ်ႇထိူဝ်ဢမ်ႇၸူႉဢမ်ႇသိမ်းၵႃႈၼႂ်းယွင်ၼႂ်းယေး။ ၼႂ်းဝႃႈၼၼ်သေၵေႃႈပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉလဵင်ႉလူၶဝ်ဝႆႉယူႇဢေႃႈ။ သူယင်းမျၢတ်ႈသေၼူၵ်ႉၸိူဝ်းၼၼ်ႉဢမ်ႇၸႂ်ႈႁိူဝ်။

၂၇ ၵွပ်ႈပိူဝ်ႈတၢင်းဢၼ်မႆႈၸႂ်ၶီၸႂ်ၼၼ်ႉၼႂ်းသူၼႆႉၽူႈလႂ်တၵ်းႁဵတ်းႁႂ်ႈၸူဝ်ႈတႃႇဢသၢၵ်ႈတူဝ်ၸဝ်ႈၵဝ်ႇယိုၼ်းယၢဝ်းမႃးလႆႈထႅင်ႈဢိတ်းၼိုင်ႈ။ ႁဵတ်းႁိုဝ်လႄႈမႆႈၸႂ်ပုၼ်ႈတၢင်းၼုင်ႈတၢင်းမႆႊ။

၂၈ ၶႆႈၸႂ်တူၺ်းတူၼ်ႈမွၵ်ႇဢၼ်မီးၼႂ်းထိူၼ်ႇတင်းလၢႆၸိူဝ်းၼၼ်ႉယႂ်ႇမႃးၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇႁိုဝ်ၼၼ်ႉတႃႉ။ တူၼ်ႈၸိူဝ်းၼၼ်ႉဢမ်ႇႁဵတ်းတၢင်းႁဵတ်းဢမ်ႇပၼ်ႇဢမ်ႇတေႃး။

၂၉ ၼႂ်းဝႃႈၼၼ်သေၵေႃႈၵဝ်ဝႃႈတီႈသူၸမ်းၶူဝ်းၼုင်ႈတၢင်းမႆႊၸဝ်ႈမူၼ်ယႂ်ႇၶုၼ်ႁေႃးၶမ်းသေႃးလမုၼ်ႇၼၼ်ႉယင်းဢမ်ႇၶိုတ်းတူၼ်ႈၸိူဝ်းၼၼ်ႉသေတူၼ်ႈ။

၃၀ သူၸိူဝ်းဢၼ်ယုမ်ႇမၢတ်ႈၵေႇတင်းလၢႆၼႆႉဢိူၺ်း၊ပေႃးၽြႃးပဵၼ်ၸဝ်ႈဢဝ်တၢင်းၼုင်ႈတၢင်းမႆႊႁူမ်ႇလူမ်ႈတူၼ်ႈယိူဝ်ႈတူၼ်ႈယႃႈၵႃႈၼႂ်းထိူၼ်ႇဢၼ်ဢသၢၵ်ႈလိပ်းဝၼ်းမိူဝ်ႈၼႆႉၵူၺ်းလႄႈဝၼ်းမိူဝ်ႈၽုၵ်ႈလႆႈၶၢမ်ႇတၢင်းဢၼ်ဢဝ်ၶျႃးသႂ်ႇၵႃႈၼႂ်းမုၵ်ႉၽႆးၼၼ်ႉၸိုင်

၃၁ မၼ်းၸဝ်ႈယဵင်ႈၶႅၼ်းတၵ်းဢဝ်ၶူဝ်းၼုင်ႈတၢင်းမႆႊႁူမ်ႇလူမ်ႈသူလိူဝ်တွၼ်းၼႃႇသေၼၼ်ႉဢမ်ႇၸႂ်ႈႁိုဝ်။ ပိူဝ်ႈၼႆလႄႈတၵ်းလႆႈၵိၼ်ၸိူဝ်ႉၼင်ႇႁိုဝ်၊တၵ်းလႆႈၼုင်ႈၸိူဝ်ႉၼင်ႇႁိုဝ်၊ဝႃႈၼႆယႃႇပေမႆႈၸႂ်။

၃၂ ၵူၼ်းလေႃးၵီႇတင်းလၢႆၸၢင်ႊမေႃႁႃဢဝ်လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉယူႇဢေႃႈ။ ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉႁူႉလွင်ႈဢၼ်သူလူဝ်ႇၵႃႈမီးတင်းသဵင်ႈတင်းလူင်ၸိူဝ်းၼၼ်ႉယူႇဢေႃႈ။

၃၃ ႁႃမိူင်းၽြႃးပဵၼ်ၸဝ်ႈတင်းတြႃးတၢင်းဢၼ်သိုဝ်ႈတေႃႇဢွၼ်တၢင်းတႃႉ။ လိုၼ်းၼၼ်ႉၸင်ႇမၼ်းၸဝ်ႈတၵ်းပၼ်ၵႃႈမီးတင်းသဵင်ႈတင်းလူင်ၸိူဝ်းၼၼ်ႉထႅင်ႈဢေႃႈ။

၃၄ ပိူဝ်ႈၼႆလႄႈပုၼ်ႈတႃႇဝၼ်းမိူဝ်ႈၽုၵ်ႈယႃႇပေမႆႈၸႂ်။ ဝၼ်းမိူဝ်ႈၽုၵ်ႈၼၼ်ႉတၵ်းမႆႈၸႂ်ပုၼ်ႈတူဝ်ၸဝ်ႈၵဝ်ႇယူႇဢေႃႈ။ လွင်ႈတၢင်းဢၼ်ဢမ်ႇလီဢမ်ႇထုၵ်ႇဝၼ်းမိူဝ်ႈၼႆႉၸမ်းပေႃးၵုမ်ႇပုၼ်ႈဝၼ်းမိူဝ်ႈၼႆႉယဝ်ႉ။