Shan Missions

မၢတ်ႈထႄႇ

Chapter   ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၅

တြႃးမင်ႇၵလႃႇဢၼ်ၸဝ်ႈယေႇသုႁေႃး

၁ မိူဝ်ႈဢၼ်ႁၼ်ၵူၼ်းၸူႉၵူၼ်းတုမ်တင်းလၢႆၸိူဝ်းၼၼ်ႉမၼ်းၸဝ်ႈၶိုၼ်ႈၵႂႃႇၵႃႈၼိူဝ်လွႆလႄႈတပႄးၸဝ်ႈတင်းလၢႆၵေႃႈသုတ်ႉၸပ်းသုတ်ႉၸူးၵႃႈတီႈမၼ်းၸဝ်ႈဢေႃႈ။ 

၂ မိူဝ်ႈၼၼ်ႉမၼ်းၸဝ်ႈသင်ႇသွၼ်သုင်းမပၼ်တပႄးၸဝ်ႈၸိူဝ်းၼၼ်ႉလႄႈဝႃႈ၊-ၶဝ်ၸိူဝ်းဢၼ်ႁူဝ်ၸႂ်ၶျႃးတႅမ်ႇၼၼ်ႉမီးမင်ႇၵလႃႇဢေႃႈ။ 

၃ လွင်ႈမၼ်းၸမ်းမိူင်းၵၢင်ႁၢဝ်ၸဝ်ႈပဵၼ်မိူင်းၶဝ်ၸိူဝ်းၼၼ်ႉဢေႃႈ။ 

၄ ၶဝ်ၸိူဝ်းဢၼ်ႁူဝ်ၸႂ်ဢမ်ႇသႃႇလႄႈမႆႈၸႂ်ၶီၸႂ်ၼၼ်ႉမီးမင်ႇၵလႃႇဢေႃႈ။ လွင်ႈမၼ်းၸမ်းၶဝ်ၸိူဝ်းၼၼ်ႉတၵ်းႁွတ်ႈထိုင်တၢင်းဢၼ်သၢၵ်ႈသႃႇဢေႃႈ။ 

၅ ၶဝ်ၸိူဝ်းဢၼ်ႁူဝ်ၸႂ်ၼိမ်သိမ်ႇဢူၼ်ႈဢွၼ်ႇၼၼ်ႉမီးမင်ႇၵလႃႇဢေႃႈ။ လွင်ႈမၼ်းၸမ်းၶဝ်ၸိူဝ်းၼၼ်ႉတၵ်းလႆႈၶၢမ်ႇဢမူၺ်ႇမိူင်းၽြႃးပဵၼ်ၸဝ်ႈဢေႃႈ။ 

၆ ၶဝ်ၸိူဝ်းဢၼ်ဢိုပ်းယၢၵ်ႈတွင်ႉမႆႈပႃႇရမီႇတြႃးတၢင်းဢၼ်သိုဝ်ႈတေႃႇၼၼ်ႉမီးမင်ႇၵလႃႇဢေႃႈ။ လွင်ႈမၼ်းၸမ်းၶဝ်ၸိူဝ်းၼၼ်ႉတၵ်းႁွတ်ႈထိုင်တၢင်းဢၼ်လိူင်ႇၸႂ်ဢေႃႈ။ 

၇ ၶဝ်ၸိူဝ်းဢၼ်ၸၢင်ႊႁၵ်ႉဢိတ်းလူၼၼ်ႉမီးမင်ႇၵလႃႇဢေႃႈ။ လွင်ႈမၼ်းၸမ်းၶဝ်ၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ႁၵ်ႉဢိတ်းလူဢေႃႈ။ 

၈ ၶဝ်ၸိူဝ်းဢၼ်ႁူဝ်ၸႂ်ၶၢဝ်ၸၢင်ႇၼၼ်ႉမီးမင်ႇၵလႃႇဢေႃႈ။ လွင်ႈမၼ်းၸမ်းၶဝ်ၸိူဝ်းၼၼ်ႉတၵ်းလႆႈႁၼ်ၽြႃးပဵၼ်ၸဝ်ႈဢေႃႈ။ 

၉ ၶဝ်ၸိူဝ်းဢၼ်ႁႂ်ႈတၢင်းဢၼ်ပိူၼ်ႈၽိတ်းၵၼ်ယဵၼ်ၼၼ်ႉမီးမင်ႇၵလႃႇဢေႃႈ။ လွင်ႈမၼ်းၸမ်းၶဝ်ၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ႁွင်ႉပဵၼ်လုၵ်ႈၽြႃးပဵၼ်ၸဝ်ႈဢေႃႈ။ 

၁၀ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသေးၵွပ်ႈပိူဝ်ႈတြႃးတၢင်းဢၼ်သိုဝ်ႈတေႃႇၼၼ်ႉမီးမင်ႇၵလႃႇဢေႃႈ။ လွင်ႈမၼ်းၸမ်းမိူင်းၵၢင်ႁၢဝ်ၸဝ်ႈပဵၼ်မိူင်းၶဝ်ၸိူဝ်းၼၼ်ႉဢေႃႈ။ 

၁၁ ၵွပ်ႈပိူဝ်ႈၵဝ်လႄႈမိူဝ်ႈဢၼ်ပိူၼ်ႈသေႉသွမ်းၼိၵ်ႈၸၢၵ်ႈငႅၼ်းသေးသူတၢင်ႇဢပျႅတ်ႈသူၵူႈၸိူဝ်ႉၵူႈပိူင်ဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉသူမီးမင်ႇၵလႃႇဢေႃႈ။ သိူဝ်းၸူမ်းမူၼ်ႈပျေႃႇတႃႉ။ လွင်ႈမၼ်းၸမ်းသူးလၢပ်ႈသူယႂ်ႇၼႃႇၵႃႈၼႂ်းမိူင်းၵၢင်ႁၢဝ်ပုၼ်ႉဢေႃႈ။ 

၁၂ ၶဝ်ယင်းၼိၵ်ႈၸၢၵ်ႈငႅၼ်းသေးပရေႃးၽႅတ်ႈဢၼ်ပေႃႇမႃးဢွၼ်တၢင်းသူတင်းလၢႆၼၼ်ႉယဝ်ႉ။ 

ၵိူဝ်တင်းဢၼ်လႅင်း

၁၃ သူပဵၼ်ၵိူဝ်လေႃးၵၼႆႉဢေႃႈ။ ၵိူဝ်ၸမ်းပေႃးဢၼ်ၸဵမ်းမၼ်းႁၢႆၵႂႃႇၸိုင်တၵ်းၶိုၼ်းလႆႈဢၼ်ၸဵမ်းမၼ်းၸိူဝ်ႉၼင်ႇႁိုဝ်။ လိူဝ်သေဢဝ်ထိမ်ႈပႅတ်ႈၵႃႈၼွၵ်ႈလႄႈၶၢမ်ႇပိူၼ်ႈယဵပ်ႇပိူၼ်ႈၶၢမ်ႈၼၼ်ႉဢမ်ႇပွင်ႇလွင်ႈၵႃႈသင်သေဢိတ်း။ 

၁၄ သူပဵၼ်ဢၼ်လႅင်းလေႃးၵၼႆႉဢေႃႈ။ ဝဵင်းဢၼ်တႄႇဝႆႉၵႃႈၼိူဝ်ပၢႆၸိၵ်းလွႆၼၼ်ႉဢမ်ႇၸၢင်ႊလပ်ႉလႆႈ။ 

၁၅ ၵူၼ်းႁဝ်းၼႆႉတႆႈၵွၵ်းၽႆးသေလႄႈဢဝ်ႁူမ်ႇဝႆႉၵႃႈတႂ်ႈပဵတ်ႈဢမ်ႇၸႂ်ႈ။ ၼင်ႇႁိုဝ်ၵူၼ်းႁိူၼ်းၵူၼ်းယေးတင်းသဵင်ႈတင်းလူင်တၵ်းလႆႈႁၼ်ဢၼ်လႅင်းမၼ်းၸိုင်ယၢမ်ႈဢဝ်တၢင်ႇဝႆႉၵႃႈၼိူဝ်ၽိူၼ်တႆႈၽႆးၼၼ်ႉဢေႃႈ။ 

၁၆ ပိူင်လဵဝ်ၵၼ်ၼင်ႇႁိုဝ်ပိူၼ်ႈတၵ်းႁၼ်တၢင်းၵမ်တၢင်းၵျၢင်ႉသူဢၼ်လီဢၼ်ငၢမ်းၼၼ်ႉသေလႄႈယွင်ႈယေႃးပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉၸိုင်ႁႂ်ႈဢၼ်လႅင်းသူလႅင်းပႃႈၼႃႈပိူၼ်ႈတႃႉ။ 

ႁႂ်ႈၵျၢမ်းပိင်းၺၢပ်ႈတဵမ်ထူၼ်ႈ

၁၇ ယႃႇပေထၢင်ႇဝႃႈၵဝ်မႃးႁႂ်ႈလႆႈယႃႉၵျၢမ်းပိင်းၺၢပ်ႈတိတင်းၵျၢမ်းဢၼႃႇၵၢတ်ႈတိ။ ၵဝ်မႃးႁႂ်ႈလႆႈယႃႉဢမ်ႇၸႂ်ႈ။ 

၁၈ ၵဝ်မႃးႁႂ်ႈလႆႈတဵမ်ထူၼ်ႈဢေႃႈ။ ၵဝ်ဝႃႈတီႈၸိုဝ်ႈတီႈၸႂ်ႈၸမ်းတေႃႇထိုင်ႁွတ်ႈၵၢင်ႁၢဝ်တင်းလိၼ်မိူင်းသုတ်းသဵင်ႈၵႂႃႇသေၵေႃႈၸူဝ်ႈဢၼ်ၵျၢမ်းပိင်းၺၢပ်ႈတိဢမ်ႇပႆႇလႆႈတဵမ်ထူၼ်ႈၼၼ်ႉတူဝ်လိၵ်ႈဢၼ်လဵၵ်ႉသေပိူၼ်ႈၼႂ်းၵျၢမ်းၼၼ်ႉတူဝ်ၼိုင်ႈၵေႃႈတၵ်းဢမ်ႇလႆႈလူႉလႆႈလႅဝ်။ 

၁၉ ၽူႈလႂ်သေဢမ်ႇဝႃႈၵေႃႉဢၼ်တူဝ်ၸဝ်ႈၵဝ်ႇပူၼ်ႉလိူဝ်ပိင်းၺၢပ်ႈဢၼ်လဵၵ်ႉသေပိူၼ်ႈသပေႃးပႃးလႄႈသမ်ႉသင်ႇသွၼ်ပၼ်ပိူၼ်ႈၸိူဝ်ႉၼင်ႇၼၼ်ၼၼ်ႉၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ႁွင်ႉပဵၼ်ၵေႃႉဢၼ်လဵၵ်ႉသေပိူၼ်ႈၵႃႈၼႂ်းမိူင်းၵၢင်ႁၢဝ်ၸဝ်ႈဢေႃႈ။ 

၂၀ ၽူႈလႂ်သေဢမ်ႇဝႃႈၵေႃႉဢၼ်တူဝ်ၸဝ်ႈၵဝ်ႇၵမ်ၵျၢင်ႉလႄႈသင်ႇသွၼ်ပၼ်ပိူၼ်ႈၼၼ်ႉၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ႁွင်ႉပဵၼ်ၵေႃႉဢၼ်ယႂ်ႇသေပိူၼ်ႈၵႃႈၼႂ်းမိူင်းၵၢင်ႁၢဝ်ၸဝ်ႈဢေႃႈ။ ၵဝ်ဝႃႈတီႈသူၸမ်းပေႃးတၢင်းသိုဝ်ႈတေႃႇသူယင်းဢမ်ႇပူၼ်ႉဢမ်ႇလိူဝ်သတေၢင်းသိုဝ်ႈတေႃႇၽႃႇရိသေးတင်းၵူၼ်းထုတ်ႇၵျၢမ်းၸိူဝ်းၼၼ်ႉၸိုင်သူတၵ်းဢမ်ႇလႆႈၶဝ်ႈၵႃႈၼႂ်းမိူင်ႈၵၢင်ႁၢဝ်ၸဝ်ႈ။ 

တၢင်းဢၼ်ဢဝ်ဢသၢၵ်ႈၵူၼ်းတၢႆ

၂၁ သူလႆႈငိၼ်းလွင်ႈဢၼ်ပိင်းၺၢပ်ႈဝႆႉၵႃႈတီႈၵူၼ်းမိူဝ်ႈၵွၼ်ႇၼၼ်ႉလႄႈဝႃႈ၊-ယႃႇပေဢဝ်ဢသၢၵ်ႈၵူၼ်းတၢႆ။ ၽူႈလႂ်သေဢမ်ႇဝႃႈၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉတၵ်းထိူၵ်ႈၶၢမ်ႇတၢင်းဢၼ်ၸီႇယၢင်ႇဢပျႅတ်ႈဢေႃႈ၊ဝႃႈၼင်ႇၼႆယဝ်ႉ။ ၵဝ်ပိင်းၺၢပ်ႈၸမ်းၵေႃႉဢၼ်ၸႂ်မႆႈၶႂ်ႈၸႃႉပီႈၼွင်ႉမၼ်းၼၼ်ႉတၵ်းထိူၵ်ႈၶၢမ်ႇတၢင်းဢၼ်ၸီႇယၢင်ႇဢပျႅတ်ႈဢေႃႈ။ 

၂၂ ၽူႈလႂ်ၽႂ်သေဢမ်ႇဝႃႈၵေႃႉဢၼ်ဝႃႈတီႈပီႈၼွင်ႉမၼ်းဝႃႈ၊-ရႃႇၵ၊ဝႃႈၼႆၼၼ်ႉထိူၵ်ႈၶၢမ်ႇတၢင်းဢၼ်ၸီႇယၢင်ႇၵႃႈတီႈလုမ်းလူင်ဢေႃႈ။ ၽူႈလႂ်သေဢမ်ႇဝႃႈၵေႃႉဢၼ်လူလၢႆၸွၵ်ႇၵႃးပီႈၼွင်ႉမၼ်းလႄႈဝႃႈ၊ၵူၼ်းငိူဝ်ႈ၊ဝႃႈၼႆၼၼ်ႉထိူၵ်ႈၶၢမ်ႇၽႆးငႃႈရၢႆးဢေႃႈ။ 

၂၃ ပိူဝ်ႈၼႆလႄႈမိူဝ်ႈဢၼ်မႂ်းဢဝ်တၢင်းပုၵ်ႉၸေႃႇမႃးၵႃႈတီႈယိၸ်ႉပလၢင်ႇႁႂ်ႈလႆႈပုၵ်ႉၸေႃႇၼၼ်ႉပေႃးမႂ်းသမ်ႉယင်းၶုၵ်းၸႂ်လႆႈလွင်ႈဢၼ်ဝႃႈပီႈၼွင်ႉမႂ်းမီးတီႈတၢင်ႇဢပျႅတ်ႈၵႃႈၼိူဝ်မႂ်းဢိတ်းၼိုင်ႈယူႇ၊ဝႃႈၼႆၸိုင်

၂၄ တမ်းဝႆႉတၢင်းပုၵ်ႉၸေႃႇမႂ်းၵႃႈတီႈၽၢႆႇၼႃႈယိၸ်ႉပလၢင်ႇသေယဝ်ႉၶိုၼ်းၵႂႃႇႁ်ႈလႆႈထုၵ်ႇမေႃၵၼ်တင်းပီႈၼွင်ႉမႂ်းၼၼ်ႉဢွၼ်တၢင်းယဝ်ႉၸင်ႇၶိုၼ်းမႃးလႄႈႁဵတ်းတၢင်းဢၼ်ပုၵ်ႉၸေႃႇတႃႉ။ 

၂၅ ၼႂ်းမိူဝ်ႈဢၼ်မႂ်းပႆတၢင်းၵႂႃႇယူႇလူၺ်ႈၵၼ်တင်းၵေႃႉဢၼ်ႁဵတ်းဢမူႉသႂ်ႇတီႈမႂ်းၼၼ်ႉၸိုင်ၼင်ႇႁိုဝ်မၼ်းတၵ်းပျေႇၸႂ်ၵႃႈၼႂ်းတၢင်းၼၼ်ႉၸိုင်ၸဵဝ်းႁဵတ်းၶၼ်ၶၼ်ဝႆးဝႆးတႃႉ။ ပေႃးဢမ်ႇၼၼ်ၵေႃႉဢၼ်ႁဵတ်းဢမူႉသႂ်ႇတီႈမႂ်းၼၼ်ႉတၵ်းဢဝ်မႂ်းဢၢပ်ႈတီႈၶုၼ်ႁေႃၶမ်းဢေႃႈ။ ၶုၼ်ႁေႃၶမ်းၵေႃႈတၵ်းဢဝ်မႂ်းဢၢပ်ႈတီႈၵႄႇဢွၼ်ႇၸၢႆးလႄႈတၵ်းၶင်မႂ်းဝႆႉၵႃႈၼႂ်းထွင်ႇဢေႃႈ။ 

၂၆ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၸူဝ်ႈဢၼ်မႂ်းဢမ်ႇပႆႇယေႃႇငိုၼ်းတေႃႇထိုင်ႁွတ်ႈငိုၼ်းမႂ်းပေႃးသဵင်ႈပေႃးမူတ်းဢမ်ႇၵိုတ်းသေၶႅပ်းၼၼ်ႉမႂ်းတၵ်းဢမ်ႇလႆႈဢွၵ်ႇထွင်ႇ။ 

တၢင်းဢၼ်ၽိတ်းမေးပိူၼ်ႈ

၂၇ သူလႆႈငိၼ်းၵျၢမ်းပိင်းၺၢပ်ႈမီးဝႆႉလႄႈဝႃႈ၊-ယႃႇပေၽိတ်းမေးပိူၼ်ႈ၊ဝႃႈၼင်ႇၼႆယဝ်ႉ။ 

၂၈ ၵဝ်ပိင်းၺၢပ်ႈၸမ်းၵေႃႉဢၼ်ပႃးတင်းၸႂ်ၵီႉလေႇသႃႇသေလႄႈတူၺ်းမေးပိူၼ်ႈၼၼ်ႉၵေႃႉၼၼ်ႉၵႃႈၼႂ်းႁူဝ်ၸႂ်မၼ်းပေႃးၽိတ်းပိူင်ႈမေးပိူၼ်ႈယဝ်ႉ။ 

၂၉ ပေႃးမၢၵ်ႇတႃၶွၼ်ၶႂႃမႂ်းႁဵတ်းႁႂ်ႈမႂ်းၽိတ်းပိူင်ႈၸိုင်ၶွၵ်းဢွၵ်ႇပႅတ်ႈသတေႃႉ။ ဢင်ႇၵႃႇဢၼ်ၼိုင်ႈလူႉသေၵေႃႈယဵင်ႈၶႅၼ်းတၵ်းလီသေတူၵ်းငႃႈရၢႆးတင်းတူဝ်ဢေႃႈ။ 

၃၀ မိူၼ်ၼင်ႇၼၼ်ပေႃးမိုဝ်းၶွၼ်ၶႂႃမႂ်းႁဵတ်းႁႂ်ႈမႂ်းၽိတ်းပိူင်ႈၸိုင်တႅပ်းပႅတ်ႈသတေႃႉ။ ဢင်ႇၵႃႇဢၼ်ၼိုင်ႈလူႉသေၵေႃႈယဵင်ႈၶႅၼ်းတၵ်းလီသေတူၵ်းငႃႈရၢႆးတင်းတူဝ်ဢေႃႈ။ 

တၢင်းဢၼ်ပႅတ်ႈမေး

လၢႆးသမ်ႉၵျၢမ်းပိင်းၺၢပ်ႈမီးဝႆႉလႄႈဝႃႈ၊-

၃၁ ပေႃးၶႂ်ႈပႅတ်ႈမေးၸိုင်ႁႂ်ႈပၼ်လိၵ်ႈဢၼ်ပုတ်းဢၼ်ၶၢတ်ႇတီႈမေးမၼ်းတႃႉ၊ဝႃႈၼင်ႇၼႆယဝ်ႉ။ 

၃၂ ၵဝ်ပိင်းၺၢပ်ႈၸမ်းလိူဝ်သေၵွပ်ႈပိူဝ်ႈတၢင်းဢၼ်ၽိတ်းၵႃႇမေႇသုမိၵ်ႉသႃႇၸႃႇရႃႇၼၼ်ႉၵူၺ်းၽူႈလႂ်သေဢမ်ႇဝႃႈၵေႃႉဢၼ်ပႅတ်ႈမေးမၼ်းၼၼ်ႉႁဵတ်းႁႂ်ႈမေးမၼ်းပဵၼ်ၵေႃႉဢၼ်ၽိတ်းပိူင်ႈယဝ်ႉ။ ၵေႃႉဢၼ်ဢဝ်မႄႈႁၢင်ႉၼၼ်ႉၵေႃႈၽိတ်းပိူင်ႈမေးပိူၼ်ႈယဝ်ႉ။ 

တၢင်းဢၼ်ၵိၼ်ႇဝႃႈ

၃၃ လၢႆးသမ်ႉသူလႆႈငိၼ်းလွင်ႈဢၼ်ပိင်းၺၢပ်ႈဝႆႉၵႃႈတီႈၵူၼ်းမိူဝ်ႈၵွၼ်ႇဢွၼ်ၼၼ်ႉလႄႈဝႃႈ-ဢမ်ႇလႆႈႁဵတ်းတၢင်းဢၼ်ၵိၼ်ႇဝႃႈဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။ ၵႃႈၼင်ႇဢၼ်ႁဵတ်းတၢင်းဢၼ်ၵိၼ်ႇဝႃႈၼၼ်ႉႁႂ်ႈမၼ်ႈၶိူင်ႇပႃႈၼႃႈၽြုးပဵၼ်ၸဝ်ႈတႃႉ၊ဝႃႈၼင်ႇၼႆယဝ်ႉ။ 

၃၄ ၵဝ်ပိင်းၺၢပ်ႈၸမ်းဢမ်ႇလႆႈႁဵတ်းတၢင်းဢၼ်ၵိၼ်ႇဝႃႈသေဢိတ်း။ ဢမ်ႇလႆႈဢဝ်မိူင်းၵၢင်ႁၢဝ်ႁဵတ်းတၢင်းဢၼ်ၵိၼ်ႇဝႃႈ။ 

၃၅ မိူင်းၵၢင်ႁၢဝ်ပဵၼ်ပလၢင်ႇၽြႃးပဵၼ်ၸဝ်ႈဢေႃႈ။ ဢမ်ႇလႆႈဢဝ်လိၼ်မိူင်းႁဵတ်းတၢင်းဢၼ်ၵိၼ်ႇဝႃႈ။ လိၼ်မိူင်းပဵၼ်တီႈတၢင်ႇတိၼ်ၽြႃးပဵၼ်ၸဝ်ႈဢေႃႈ။ ဢမ်ႇလႆႈဢဝ်ဝဵင်းယေႇရုသလႅမ်ႇႁဵတ်းတၢင်းဢၼ်ၵိၼ်ႇဝႃႈ။ 

၃၆ ပဵၼ်ဝဵင်းမႁႃႇၶုၼ်လူင်ဢေႃႈ။ ဢမ်ႇလႆႈဢဝ်ႁူဝ်တူဝ်ၸဝ်ႈၵဝ်ႇႁဵတ်းတၢင်းဢၼ်ၵိၼ်ႇဝႃႈ။ လွင်ႈမၼ်းၸမ်းသူဢမ်ႇၸၢင်ႊႁဵတ်းႁႂ်ႈၶူၼ်ႁူဝ်ၽိူၵ်ႇလႆႈလမ်လႆႈသေသဵၼ်ႈ။ 

၃၇ ၵႂၢမ်းမႂ်းဢၼ်ၸႂ်ႈၼၼ်ႉႁႂ်ႈပဵၼ်ဢၼ်ၸႂ်ႈၵူၺ်းတႃႉ။ ၵႂၢမ်းဢၼ်လိူဝ်ပႅၼ်သေၼႆႉၸမ်းၸၢပ်ႈသႅင်ႇၵၼ်တင်းလွင်ႈတၢင်းဢၼ်ဢမ်ႇလီဢေႃႈ။ 

တၢင်းဢၼ်တွပ်ႇသူၺ်ႈ

၃၈ သူလႆႈငိၼ်းလွင်ႈဢၼ်ၵျၢမ်းပိင်းၺၢပ်ႈမီးဝႆႉလႄႈဝႃႈ၊-မၢၵ်ႇတႃပုၼ်ႈမၢၵ်ႇတႃ၊ၶဵဝ်ႈပုၼ်ႈၶဵဝ်ႈ၊ဝႃႈၼင်ႇၼႆယဝ်ႉ။ ၵဝ်ပိင်းၺၢပ်ႈၸမ်းယႃႇပေႁၢမ်ႈတၢပ်ႈႁႄႉၶႅၼ်ၵေႃႉဢၼ်ဢမ်ႇလီၼၼ်ႉ။ 

၃၉ ပေႃးပိူၼ်ႈတူပ်းၵႅမ်ႈမႂ်းၽၢၵ်ႇၼိုင်ႈၸိုင်ဝၢႆႇပၼ်ၵႅမ်ႈမႂ်းၽၢၵ်ႇၼိုင်ႈလူးၵွၼ်ႇတႃႉ။ 

၄၀ ၵေႃႉဢၼ်ႁဵတ်းဢမူႉတီႈမႂ်းလႄႈဢဝ်သိူဝ်ႈမႂ်းၼၼ်ႉပၼ်ၽႃႈမႆႊမႂ်းလူးၵွၼ်ႇတႃႉ။ ၽူႈလႂ်သေဢမ်ႇဝႃႈၵေႃႉဢၼ်ႁဵတ်းပႄႉႁဵတ်းၼႅင်ႇဢႃႉထမ်ႇမႃႉ

၄၁ ႁႂ်ႈမႂ်းၸွမ်းမၼ်းၵႂႃႇလၵ်းၼိုင်ႈၼၼ်ႉၸွမ်းမၼ်းၵႂႃႇထႅင်ႈသွင်လၵ်းလူးၵွၼ်ႇတႃႉ။ 

၄၂ တီႈၵေႃႉဢၼ်ယွၼ်းတီႈမႂ်းၼၼ်ႉပၼ်တႃႉ။ ၵေႃႉဢၼ်ၶႂ်ႈၵူႈၶႂ်ႈယိမ်ၼၼ်ႉၵေႃႈယႃႇပပေိုၼ်ႉပပေႅတ်ႈ။ 

တေလႆႈႁၵ်ႉရၢၼ်ႇသူႇ

၄၃ သူလႆႈငိၼ်းလွင်ႈဢၼ်ပိင်းၺၢပ်ႈဝႆႉလႄႈဝႃႈ၊-ႁၵ်ႉၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉတႃႉ။ 

၄၄ ၸင်းရၢၼ်ႇသူႇမႂ်းတႃႉ၊ဝႃႈၼင်ႇၼႆယဝ်ႉ။ ၵဝ်ပိင်းၺၢပ်ႈၸမ်းႁၵ်ႉရၢၼ်ႇသူႇသူတႃႉ။ သူးတွင်းပုၼ်ႈၶဝ်ၸိူဝ်းဢၼ်ယႃႉယူၵ်ႉသူၸိူဝ်းၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်သူတၵ်းပဵၼ်လုၵ်ႈပေႃႈသူဢၼ်မီးၵႃႈၼိူဝ်မိူင်းၵၢင်ႁၢဝ်ၼၼ်ႉဢေႃႈ။ 

၄၅ လွင်ႈမၼ်းၸမ်းပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉႁႂ်ႈၵၢင်ဝၼ်းဢွၵ်ႇၵႃႈၼိူဝ်ၵူၼ်းဢၼ်လီၵူၼ်းဢၼ်ဢမ်ႇလီတင်းလၢႆဢေႃႈ။ မၼ်းၸဝ်ႈႁႂ်ႈၽူၼ်တူၵ်းၵႃႈၼိူဝ်ၵူၼ်းဢၼ်သိုဝ်ႈတေႃႇၵူၼ်းဢၼ်ဢမ်ႇသိုဝ်ႈတေႃႇတင်းလၢႆဢေႃႈ။ 

၄၆ ပေႃးသူႁၵ်ႉၶဝ်ၸိူဝ်းဢၼ်ႁၵ်ႉသူၼၼ်ႉၵူၺ်းၸိုင်တၵ်းလႆႈသူးလၢပ်ႈၵႃႈသင်။ 

၄၇ ၶဝ်ၸိူဝ်းဢၼ်ၵဵပ်းၶွၼ်ႇတင်းလၢႆၼၼ်ႉႁဵတ်းၸိူဝ်ႉၼႆယူႇဢမ်ႇၸႂ်ႈႁိုဝ်း။ ပေႃးတၵ်းလၢတ်ႈတေႃႇၵၼ်တင်းပီႈၼွင်ႉသူၵူၺ်းၸိုင်တၵ်းမျၢတ်ႈတွၼ်းလိူဝ်ၸိူဝ်ႉၼင်ႇႁိုဝ်။ 

၄၈ ၵူၼ်းသႃႇသၼႃႇပႃႉတင်းလၢႆၵေႃႈႁဵတ်းၸိူဝ်ႉၼႆယူႇဢမ်ႇၸႂ်ႈႁိုဝ်း။ ပိူဝ်ႈၼႆလႄႈၸိူဝ်ႉၼင်ႇဢၼ်ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၸေးၸုမ်ႇၼၼ်ႉသူၵေႃႈႁႂ်ႈလႆႈၸေးၸုမ်ႇတႃႉ။