Shan Missions

မၢတ်ႈထႄႇ

Chapter   ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၁၆

ယွၼ်းႁႂ်ႈႁၼ်ၼီႉမိၵ်ႈလၵ်ႈၶၼႃႇ

၁ မိူဝ်ႈၼၼ်ႉၽႃႇရိသေးဢိၵ်ႇတင်းၸတ်ႉတုၵေးတင်းလၢႆၼင်ႇႁိုဝ်တၵ်းလႆႈၸၢမ်းတူၺ်းယႃႉယုၵ်ႈမၼ်းၸဝ်ႈၼၼ်ႉၶဝ်သုတ်ႉၸပ်းသုတ်ႉၸူးလႄႈယွၼ်းႁႂ်ႈမၼ်းၸဝ်ႈၼႄပျႃးၼီႉမိၵ်ႈလၵ်ႈၶၼႃႇၵႃႈၼိူဝ်ၽႃႉၵၢင်ႁၢဝ်ဢေႃႈ။ 

၂ မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-သူၸၢင်ႊလၢတ်ႈဝႃႈပိူဝ်ႈဢၼ်ၼႃႈၽႃႉၵၢင်ႁၢဝ်လႅင်ႊၶွင်ႇၶိင်ႇႁူဝ်ၶမ်ႈလႄႈဢူႉတူႉၽႃႉၽူၼ်တၵ်းပၢင်ႇလႅင်းသႂ်ဢေႃႈ။ 

၃ ပိူဝ်ႈဢၼ်ၽႃႉၵၢင်ႁၢဝ်ဢိူမ်ႈလႅင်ႊၵမ်ႇဝႆႉၶိင်ႇၵၢင်ၼႂ်လႄႈၽူၼ်လူင်လူမ်းလူင်တၵ်းမႃးဢေႃႈ၊ဝႃႈၼႆယူႇယဝ်ႉ။ ဢူႉတူႉၽႃႉၽူၼ်ၼၼ်ႉၸိုင်သူၸၢင်ႊၶႆႈၸႂ်လႄႈႁူႉဢေႃႈ။ ၼီႉမိၵ်ႈလၵ်ႈၶၼႃႇၵၢပ်ႈၵႃႇလႃႉတင်းလၢႆၸိုင်သူဢမ်ႇၸၢင်ႊၶႆႈၸႂ်လႄႈႁူႉလႆႈႁိုဝ်။ 

၄ ၵူၼ်းမဵဝ်းဢၼ်ႁၢႆႉမိူၵ်ႈလႄႈၸၢင်ႊၵူတ်ႉၽူဝ်ၵူတ်ႉမေးၼၼ်ႉယွၼ်းၼီႉမိၵ်ႈလၵ်ႈၶၼႃႇလူင်ပေႇ။ လိူဝ်သေၼီႉမိၵ်ႈလၵ်ႈၶၼႃႇယုဝ်းၼၼၼ်ႉတၵ်းဢမ်ႇလႆႈၼႄပျႃးၼီႉမိၵ်ႈလၵ်ႈၶၼႃႇဢၼ်လႂ်တီႈၶဝ်၊ဝႃႈၼင်ႇၼႆသေယဝ်ႉ၊မၼ်းၸဝ်ႈဢွၵ်ႇသေၵႃႈတီႈၶဝ်ၼၼ်ႉၵႂႃႇဢေႃႈ။ 

ၸိူဝ်ႉပႅင်ႈၽႃႇရိသေးတင်းၸတ်ႉတုၵေး

၅ မိူဝ်ႈဢၼ်တပႄးၸဝ်ႈတင်းလၢႆၵႂႃႇၵႃႈတီႈၽင်ႇၼမ်ႉၽၢႆႇပုၼ်ႉၼၼ်ႉၸိုင်ၶဝ်လိုမ်းပႃးဢဝ်ၶဝ်ႈမုၼ်းၵႂႃႇဢေႃႈ။ 

၆ ၸဝ်ႈယေႇသုၵေႃႈလၢတ်ႈလႄႈဝႃႈ၊-ႁဵတ်းသတိလႄႈဝေႈပႅတ်ႈၸိူဝ်ႉပႅင်ႈၽႃႇရိသေးဢိၵ်ႇတင်းၸတ်ႉတုၵေးတင်းလၢႆတႃႉ၊ဝႃႈၼင်ႇၼႆဢေႃႈ။ 

၇ ၶဝ်ၵေႃႈၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်လၢတ်ႈၸႃၵၼ်လႄႈဝႃႈ၊-ပိူဝ်ႈဢၼ်ႁဝ်းဢမ်ႇပႃးၶဝ်ႈမုၼ်းမႃးလႄႈမၼ်းၸဝ်ႈၸင်ႇဝႃႈၼႆယဝ်ႉ၊ဝႃႈၼင်ႇၼႆဢေႃႈ။ 

၈ ၸဝ်ႈယေႇသုငိၼ်းသေယဝ်ႉသမ်ႉလၢတ်ႈဝႃႈ၊-သူၸိူဝ်းဢၼ်ယုမ်ႇမၢတ်ႈၵေႇတင်းလၢႆၼႆႉဢိူၺ်း၊ႁဵတ်းသင်လႄႈၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်လၢတ်ႈၸႃၵၼ်ၵွပ်ႈပိူဝ်ႈဢၼ်ဢမ်ႇပႃးၶဝ်ႈမုၼ်းမႃးၼၼ်ႉၸိူဝ်ႉၼင်ႇႁိုဝ်။ 

၉ သူယင်းဢမ်ႇဢဝ်သႂ်ႇၼႂ်းၸႂ်လႄႈၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၵူၼ်းႁႃႈႁဵင်ၵိၼ်ၶဝ်ႈမုၼ်းႁႃႈႁူၺ်ႇလႄႈ

၁၀ သူၵဵပ်းဢဝ်ဢၼ်ၵိုတ်းဢၼ်ၵျၢၼ်ႇမၼ်းလႆႈလၢႆပဵတ်ႈဢိၵ်ႇတင်းလွင်ႈဢၼ်ၵူၼ်းသီႇႁဵင်ၵိၼ်ၶဝ်ႈမုၼ်းၸဵတ်းႁူၺ်ႇလႄႈသူၵဵပ်းဢဝ်ဢၼ်ၵိုတ်းဢၼ်ၵျၢၼ်ႇမၼ်းလႆႈလၢႆပဵတ်ႈၼၼ်ႉလူးၵွၼ်ႇႁိုဝ်။ 

၁၁ ႁဵတ်းႁိုဝ်လႄႈသူဢမ်ႇႁူႉလွင်ႈဢၼ်ၵဝ်ဢမ်ႇဢဝ်လွင်ႈၶဝ်ႈမုၼ်းလၢတ်ႈတီႈသူၼၼ်ႉႁိုဝ်။ ၵူၺ်းၵႃႈဝေႈပႅတ်ႈၸိူဝ်ႉပႅင်ႈၽႃႇရိသေးဢိၵ်ႇတင်းၸတ်ႉတုၵေးတင်းလၢႆတႃႉ၊ဝႃႈၼင်ႇၼႆဢေႃႈ။ 

၁၂ မိူဝ်ႈၼၼ်ႉတပႄးၸဝ်ႈၸိူဝ်းၼၼ်ႉႁူႉလွင်ႈဢၼ်မၼ်းၸဝ်ႈၶႂ်ႈဝႃႈတၵ်းလႆႈဝေႈပႅတ်ႈၸိူဝ်ႉပႅင်ႈၶဝ်ႈမုၼ်းဢမ်ႇၸႂ်ႈ။ တၵ်းလႆႈဝေႈပႅတ်ႈတၢင်းဢၼ်ၽႃႇရိသေးဢိၵ်ႇတင်းၸတ်ႉတုၵေးၶဝ်သင်ႇသွၼ်ၼၼ်ႉဢေႃႈ။ 

ပေႇတရုယိုၼ်ၸဝ်ႈယေႇသုပဵၼ်လုၵ်ႈၽြႃးပဵၼ်ၸဝ်ႈ

၁၃ မိူဝ်ႈဢၼ်ၸဝ်ႈယေႇသုၵႂႃႇၵႃႈတီႈဢိုင်ႇဝဵင်းၵေႇသရိၽိလိပ်ႉပုၼၼ်ႉၸိုင်မၼ်းၸဝ်ႈထၢမ်တပႄးမၼ်းၸဝ်ႈၸိူဝ်းၼၼ်ႉလႄႈဝႃႈ၊-

၁၄ ၵူၼ်းတင်းလၢႆဝႃႈလုၵ်ႈၵူၼ်းပဵၼ်ၽူႈလႂ်၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၵေႃႈလဝ်လၢတ်ႈလႄႈဝႃႈ၊-

၁၅ ၵမ်ႈၽွင်ႈဝႃႈပဵၼ်ယုဝ်းႁၢၼ်ႇဢၼ်ပၼ်ပပ်ႉတိၸၢမ်ႇၼၼ်ႉၶႃႈဢေႃႈ။ ၵမ်ႈၽွင်ႈသမ်ႉဝႃႈပဵၼ်ယေႇရမိ၊ဢမ်ႇၼၼ်ၵေႃႈပဵၼ်ပရေႃးၽႅတ်ႈသပေႃးပႃးၶႃႈဢေႃႈ၊ဝႃႈၼင်ႇၼႆဢေႃႈ။ မၼ်းၸဝ်ႈသမ်ႉထၢမ်ထႅင်ႈလႄႈဝႃႈ၊-သူသမ်ႉဝႃႈၵဝ်ပဵၼ်ၽူႈလႂ်မိူဝ်ႈဢၼ်ဝႃႈၼင်ႇၼႆၸိုင်၊-

၁၆ သိမုၼ်ႇပေႇတရုၵေႃႈၶိုၼ်းလဝ်လၢတ်ႈလႄႈဝႃႈ၊-ၸဝ်ႈႁဝ်းပဵၼ်ၸဝ်ႈၶရိၸ်ႉ၊လုၵ်ႈၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။ 

၁၇ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-သိမုၼ်ႇပႃႇယုဝ်းၼဢိူၺ်း၊မႂ်းမီးမင်ႇၵလႃႇဢေႃႈ။ လွင်ႈမၼ်းၸမ်းၼိူဝ်ႉလိူတ်ႈမႂ်းၽုၺ်ႇၼႄလွင်ႈတၢင်းၼႆႉတီႈမႂ်းဢမ်ႇၸႂ်ႈ။ 

၁၈ ပဵၼ်ပေႃႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉၽုၺ်ႇၼႄပၼ်မႂ်းဢေႃႈ။ ၵဝ်သမ်ႉဝႃႈတီႈမႂ်းထႅင်ႈၸမ်းမႂ်းပဵၼ်ပေႇတရုဢေႃႈ။ ၵႃႈၼိူဝ်မၢၵ်ႇႁိၼ်ၼႆႉၵဝ်တၵ်းႁႂ်ႈၸိူဝ်းၸဝ်ႈတႄႇပဵၼ်ဢေႃႈ။ 

၁၉ ၸိူဝ်းၸဝ်ႈၼၼ်ႉၽၵ်းတူမိူင်းမႃႇရၼတၵ်းဢမ်ႇပႄႉၼႅင်ႇလႆႈ။ သေႃးမိူင်းၵၢင်ႁၢဝ်ၵေႃႈၵဝ်တၵ်းပၼ်တီႈမႂ်းဢေႃႈ။ ၵႃႈဢၼ်မႂ်းမတ်ႉၽုၵ်ႇဝႆႉၵႃႈၼိူဝ်လိၼ်မိူင်းၼႆႉၼၼ်ႉတၵ်းလႆႈၶၢမ်ႇတၢင်းဢၼ်မတ်ႉၽုၵ်ႇဝႆႉၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။ၵႃႈဢၼ်မႂ်းပွႆႇလွတ်ႈၵႃႈၼိူဝ်လိၼ်မိူင်းၼႆႉၼၼ်ႉတၵ်းလႆႈၶၢမ်ႇတၢင်းဢၼ်ပွႆႇလွတ်ႈၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ၊ဝႃႈၼင်ႇၼႆသေယဝ်ႉ၊

၂၀ ၼင်ႇႁိုဝ်ၶဝ်တၵ်းဢမ်ႇမွၵ်ႇလၢတ်ႈၵႃႈတီႈၽူလႂ်လွင်ႈဢၼ်ဝႃႈမၼ်းၸဝ်ႈပဵၼ်ၸဝ်ႈၶရိၸ်ႉၼၼ်ႉၸိုင်မၼ်းၸဝ်ႈပၼ်သတိတီႈတပႄးၸဝ်ႈၸိူဝ်းၼၼ်ႉဢေႃႈ။ 

ၸဝ်ႈယေႇသုလၢတ်ႈလွင်ႈၶၢမ်ႇတၢင်းတၢႆ

၂၁ ၸဵမ်မိူဝ်ႈၼၼ်ႉလႄႈမၼ်းၸဝ်ႈတေႇၸႃႉၼႄပျႃးလွင်ႈဢၼ်တၵ်းလႆႈၵႂႃႇၵႃႈတီႈဝဵင်းယေႇရုသလႅမ်ႇလွင်ႈဢၼ်တၵ်းလႆႈၶၢမ်ႇၼႃႇလူင်လၢင်ၵႃႈၼႂ်းမိုဝ်းၵူၼ်းဢၼ်ပဵၼ်ၵႄႇပဵၼ်ႁူဝ်ယိတ်ႉပရေႃးႁိၵ်ႈလူင်တင်းၵူၼ်းထုတ်ႇၵျၢမ်းတင်းလၢႆလွင်ႈဢၼ်တၵ်းလႆႈၶၢမ်ႇတၢင်းတၢႆလွင်ႈဢၼ်တၵ်းလုၵ်ႉၶိုၼ်းလိပ်းၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉတီႈတပႄးၸဝ်ႈၸိူဝ်းၼၼ်ႉဢေႃႈ။ 

၂၂ ပေႇတရုႁွင်ႉမၼ်းၸဝ်ႈၸူးႁိမ်းမၼ်းလႄႈလၢတ်ႈဝႃႈ၊-ၸဝ်ႈႁဝ်း၊ႁႂ်ႈလွင်ႈတၢင်းၼႆႉၵႆၵၼ်တင်းၸဝ်ႈႁဝ်းသေၵမ်းၶႃႈ။ လွင်ႈတၢင်းၼႆႉတၵ်းဢမ်ႇလႆႈပဵၼ်တီႈၸဝ်ႈႁဝ်းၶႃႈ၊ဝႃႈၼင်ႇၼႆဢေႃႈ။ 

၂၃ မၼ်းၸဝ်ႈဝၢႆႇၼႃႈၸူးသေလႄႈလၢတ်ႈတီႈပေႇတရုဝႃႈ၊-ၸႃႇတၢၼ်ႇမႃႇၼၢတ်ႈဢိူၺ်း၊သုတ်ႉပႃႈလင်ၵဝ်တႃႉ။ မႂ်းပဵၼ်လွင်ႈတၢင်းဢၼ်တၵ်းႁဵတ်းႁႂ်ႈၵဝ်ၶီႈလိုတ်းလႄႈလူမ်ႉဢေႃႈ။ ၸႂ်မႂ်းဢမ်ႇၸပ်းဢမ်ႇၸွႆးလွင်ႈဢၼ်ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈၼၼ်ႉ။ ၸႂ်ၸပ်းၸႂ်ၸွႆးလွင်ႈဢၼ်ၸၢပ်ႈသႅင်ႇၵၼ်တင်းၵူၼ်းတင်းလၢႆၼၼ်ႉၵူၺ်းဢေႃႈ၊ဝႃႈၼင်ႇၼႆဢေႃႈ။ 

၂၄ မိူဝ်ႈၼၼ်ႉၸဝ်ႈယေႇသုလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-ပေႃးသေၵေႃႉသေၵူၼ်းမီးဢလူဝ်ႇၶႂ်ႈၸွမ်းပႃႈလင်ၵဝ်ၸိုင်ႁႂ်ႈမၼ်းပႄႇပႅတ်ႈဢလူဝ်ႇတူဝ်ၸဝ်ႈၵဝ်ႇသေလႄႈႁၢပ်ႇဢဝ်သဝ်လၵ်းဝႃးမိုဝ်းတူဝ်ၸဝ်ႈၵဝ်ႇသေယဝ်ႉၸွမ်းပႃႈလင်ၵဝ်တႃႉ။ 

၂၅ လွင်ႈမၼ်းၸမ်းၽူႈလႂ်သေဢမ်ႇဝႃႈၵေႃႉဢၼ်မီးဢလူဝ်ႇၶႂ်ႈၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉတၵ်းသုမ်းဢသၢၵ်ႈဢေႃႈ။ ၽူႈလႂ်သေဢမ်ႇဝႃႈၵေႃႉဢၼ်သုမ်းဢသၢၵ်ႈပုၼ်ႈၵဝ်ၼၼ်ႉၵေႃႉၼၼ်ႉတၵ်းထူပ်းဢသၢၵ်ႈဢေႃႈ။ 

၂၆ ၵူၼ်းသေၵေႃႉသေၵူၼ်းပဵၵ်ႉသမ်ႉလႆႈပိူင်ႇလေႃးၵၼႆႉတင်းသဵင်ႈတင်းလူင်သေၵေႃႈပေႃးသုမ်းဝိၺိၺ်ႇတူဝ်ၸဝ်ႈၵဝ်ႇၸိုင်တၵ်းမီးဢၵျုဝ်းၵႃႈသင်။ တၵ်းဢဝ်တင်းဢုၵ်ႉၸႃႇဢၼ်လႂ်လႄႈထူတ်ႇဢဝ်ဝိၺိၺ်ႇတူဝ်ၸဝ်ႈၵဝ်ႇလႆႈ။ 

၂၇ လုၵ်ႈၵူၼ်းတၵ်းပႃးတင်းၽုင်းဢႃႇၼူႉၽေႃႇပေႃႈၸဝ်ႈဢိၵ်ႇတင်းတမၢၼ်ႇၵၢင်ႁၢဝ်တင်းလၢႆသေလႄႈမႃးဢေႃႈ။ မိူဝ်ႈၼၼ်ႉမၼ်းၸဝ်ႈတၵ်းပၼ်သူးလၢပ်ႈတီႈၵူႈၵေႃႉၵူႈၵူၼ်းႁင်းၽႂ်ႁင်းမၼ်းၸွမ်းၵႃႈၼင်ႇတၢင်းၵမ်တၢင်းၵျၢင်ႉၶဝ်ၼၼ်ႉဢေႃႈ။ 

၂၈ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵူၼ်းၵမ်ႈၽွင်ႈဢၼ်ၸုၵ်းယူႇၵႃႈတီႈၼႆႉၸူဝ်ႈဢၼ်ၶဝ်ဢမ်ႇပႆႇလႆႈႁၼ်လုၵ်ႈၵူၼ်းမႃးတႄႇမိူင်းၸဝ်ႈၼၼ်ႉၶဝ်တၵ်းဢမ်ႇလႆႈႁွတ်ႈထိုင်တၢင်းတၢႆၵူၺ်း၊ဝႃႈၼင်ႇၼႆဢေႃႈ။