Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇမႃႇၵု

Chapter    ၁    ၂     ၃     ၄     ၅     ၆     ၇     ၈     ၉     ၁၀      ၁၁     ၁၂     ၁၃     ၁၄     ၁၅     ၁၆   

၁၂

ဢူႉပမႃႇၵူၼ်းၶၢတ်ႈသူၼ်မၢၵ်ႇၸပိတ်ႉ

၁ မိူဝ်ႈၼၼ်ႉမၼ်းၸဝ်ႈဢဝ်ဢူႉပမႃႇလၢတ်ႈတီႈၶဝ်လႄႈဝႃႈၸမ်း၊-မီးၵူၼ်းၵေႃႉၼိုင်ႈမၼ်းၽုၵ်ႇသူၼ်မၢၵ်ႇၸပိတ်ႉလႄႈႁဵတ်းႁူဝ်ႉလွမ်ႉႁွပ်ႈၶူတ်ႉႁၢင်းတီႈဢၼ်တၵ်းယဵပ်ႇမၢၵ်ႇၸပိတ်ႉၼၼ်ႉလႄႈပူၵ်းထဵင်လင်ယဝ်ႉၸင်ႇၶၢတ်ႈသူၼ်ၼၼ်ႉပၼ်တီႈၶဝ်ၸိူဝ်းဢၼ်ႁဵတ်းသူၼ်တင်းလၢႆလႄႈၵႂႃႇတၢင်ႇဝၢၼ်ႈတၢင်ႇမိူင်းဢေႃႈ။ 

၂ မိူဝ်ႈဢၼ်ၶိင်ႇမၼ်းႁွတ်ႈထိုင်မႃးၼၼ်ႉမၼ်းပွႆႇၸႂ်ႉၵူၼ်းဢွၼ်ႇမၼ်းၵႂႃႇၵႃႈတီႈၶဝ်ၸိူဝ်းဢၼ်ႁဵတ်းသူၼ်ၼၼ်ႉႁႂ်ႈလႆႈၶၢမ်ႇဢဝ်မၢၵ်ႇၸပိတ်ႉၵႃႈၼႂ်းသူၼ်ၵႃႈတီႈၶဝ်ၸိူဝ်းဢၼ်ႁဵတ်းသူၼ်ၼၼ်ႉဢေႃႈ။ 

၃ ၶဝ်ၸိူဝ်းၼၼ်ႉတီႉဢဝ်ၵူၼ်းဢွၼ်ႇၼၼ်ႉသေယဝ်ႉပေႃႉယႅၼ်ႉယဝ်ႉၸင်ႇပွႆႇပႅတ်ႈမၼ်းၵႂႃႇတိၼ်လၢႆမိုဝ်းပဝ်ႇသေဢေႃႈ။ 

၄ လိုၼ်းသေၼၼ်ႉမၼ်းသမ်ႉပွႆႇၸႂ်ႉၵူၼ်းဢွၼ်ႇတၢင်ႇၵေႃႉၵႂႃႇၵႃႈတီႈၶဝ်ထႅင်ႈဢေႃႈ။ ၶဝ်ၸိူဝ်းၼၼ်ႉဢဝ်မၢၵ်ႇႁိၼ်ထိမ်ႈၸပ်းႁူဝ်မၼ်းလႄႈယႃႉသရေႇမၼ်းယဝ်ႉၸင်ႇပွႆႇပႅတ်ႈမၼ်းၵႂႃႇဢေႃႈ။ 

၅ မၼ်းသမ်ႉပွႆႇၸႂ်ႉၵူၼ်းဢွၼ်ႇမၼ်းတၢင်ႇၵေႃႉၵႂႃႇထႅင်ႈသေၵေႃႈၶဝ်ဢဝ်မၼ်းတၢႆဢေႃႈ။ ၵူၼ်းဢွၼ်ႇၵမ်ႈၽွင်ႈၵေႃႈၶဝ်ပေႃႉယႅၼ်ႉဢေႃႈ။ ၶဝ်ဢဝ်ၵမ်ႈၽွင်ႈတၢႆဢေႃႈ။ 

၆ ၵေႃႉၼၼ်ႉမၼ်းယင်းမီးလုၵ်ႈၸၢႆးဢၼ်ႁၵ်ႉၼႃႇၵေႃႉၼိုင်ႈဢေႃႈ။ ပွၵ်ႈလိုၼ်းသုတ်းမၼ်းထၢင်ႇၶဝ်တေဢႃးၼႃႇလုၵ်ႈၸၢႆးမၼ်းယူႇ၊ဝႃႈၼႆလႄႈမၼ်းၸင်ႇပွႆႇၸႂ်ႉလုၵ်ႈၸၢႆးမၼ်းၵႂႃႇဢေႃႈ။ 

၇ ၶဝ်ၸိူဝ်းဢၼ်ႁဵတ်းသူၼ်ၸိူဝ်းၼၼ်ႉၵေႃႉၼိုင်ႈလႄႈၵေႃႉၼိုင်ႈတိူင်ႇပၢင်ႇလၢတ်ႈၸႃၵၼ်လႄႈဝႃႈ၊-ၵေႃႉၼႆႉပဵၼ်ၵေႃႉဢၼ်တၵ်းၶၢမ်ႇဢမူၺ်ႇပေႃႈမၼ်းဢေႃႈ။ 

၈ မႃးလႄႈဢဝ်မၼ်းတၢႆတႃႉႁဝ်း။ ႁဝ်းတၵ်းလႆႈဢမူၺ်ႇမၼ်းဢိူဝ်ႈ၊ဝႃႈၼင်ႇၼႆသေယဝ်ႉၶဝ်ဢွၼ်ၵၼ်တီႉဢဝ်မၼ်းယဝ်ႉၸင်ႇဢဝ်ဢွၵ်ႇၵႃႈၼွၵ်ႈသူၼ်လႄႈဢဝ်တၢႆဢေႃႈ။ 

၉ ပေႃးပဵၼ်ၸိူဝ်ႉၼင်ႇၼႆၸိုင်ၸဝ်ႈသူၼ်ၼၼ်ႉတၵ်းႁဵတ်းတီႈၶဝ်ၸိူဝ်းၼၼ်ႉၸိူဝ်ႉၼင်ႇႁိုဝ်။ မၼ်းတၵ်းမႃးယႃႉပႅတ်ႈၽဵဝ်ႈပႅတ်ႈၶဝ်ၸိူဝ်းဢၼ်ၶၢတ်ႈႁဵတ်းသူၼ်ၼၼ်ႉယဝ်ႉၸင်ႇ

တၵ်းဢဝ်သူၼ်ၼၼ်ႉၶၢတ်ႈပၼ်တီႈပိူၼ်ႈတၢင်ႇၵေႃႉဢေႃႈ။ 

၁၀ သူဢမ်ႇယၢမ်ႈလႆႈၽတ်းၼႂ်းၵျၢမ်းလိၵ်ႈဢၼ်ဝႃႈ၊-မၢၵ်ႇႁိၼ်ဢၼ်ၶဝ်ၸိူဝ်းဢၼ်ႁဵတ်းတိူၵ်ႈပႅတ်ႈဝႆႉၼၼ်ႉၵမ်းလိုၼ်းသမ်ႉပဵၼ်ႁူဝ်ၸဵင်ႇတိူၵ်ႈဢေႃႈ။ 

၁၁ လွင်ႈတီႈႁႅင်းၼႆႉပဵၼ်ထႃႇဝရႃႉၽြႃးႁဵတ်းဝႆႉဢေႃႈ၊ၵႃႈၼႂ်းတႃႁဝ်းၼႆႉၵေႃႈပဵၼ်ဢၼ်လီဢၢမ်းဢေႃႈ၊ဝႃႈၼင်ႇၼႆၼၼ်ႉႁိုဝ်။ 

၁၂ ၶဝ်ၼၼ်ႉပိူဝ်ႈဢၼ်ႁူႉလွင်ႈဢၼ်မၼ်းၸဝ်ႈႁေႃးလၢတ်ႈၵႂၢမ်းဢူႉပမႃႇတႅၵ်ႈၼိူင်းၶဝ်ၼၼ်ႉ

လႄႈၶဝ်ၵျၢမ်ႇႁႃႁႂ်ႈလႆႈတီႉဢဝ်မၼ်းၸဝ်ႈဢေႃႈ။ ၼႂ်းဝႃႈၼၼ်သေၵေႃႈပိူဝ်ႈဢၼ်ၶဝ်ၵူဝ်ၵူၼ်းၸူႉၵူၼ်းတုမ်တင်းလၢႆၸိူဝ်းၼၼ်ႉလႄႈၶဝ်ဢွၵ်ႇသေၵႃႈတီႈမၼ်းၸဝ်ႈၵႂႃႇဢေႃႈ။ 

တၢင်းဢၼ်ပၼ်ဢၶွၼ်ႇတီႈၶုၼ်

၁၃ လိုၼ်းၼၼ်ႉၶဝ်ပွႆႇၸႂ်ႉၽႃႇရိသေးဢိၵ်ႇတင်းတပႄးႁေႇရုတ်ႉၵမ်ႈၽွင်ႈၵႂႃႇၵႃႈတီႈမၼ်းၸဝ်ႈႁႂ်ႈလႆႈဢဝ်တင်းၵႂၢမ်းၵၢင်ဢဝ်မၼ်းၸဝ်ႈဢေႃႈ။ 

၁၄ ၶဝ်သုတ်ႉၸပ်းသုတ်ႉၸူးတီႈမၼ်းၸဝ်ႈသေယဝ်ႉလဝ်ႈထၢမ်လႄႈဝႃႈ၊သြႃႇၸဝ်ႈ၊ႁဝ်းၶႃႈႁူႉလွင်ႈဢၼ်ဝႃႈၸဝ်ႈႁဝ်းမီးသႅတ်ႈၸႃႇၸဝ်ႈႁဝ်းဢမ်ႇၵူဝ်ၽူႈလႂ်သေၵေႃႉသေၵူၼ်းၸဝ်ႈႁဝ်းယင်းဢမ်ႇတူၺ်းၼႃႈၵူၼ်းၵူၺ်းလႄႈၼႄပျႃးသဵၼ်ႈတၢင်းၽြႃးပဵၼ်ၸဝ်ႈၸိုဝ်ႈၸိုဝ်ႈၸႂ်ႈၸႂ်ႈၼၼ်ႉယူႇၶႃႈဢေႃႈ။ ၸွင်ႇႁဝ်းၶႃႈထုၵ်ႇလီပၼ်ဢၶွၼ်ႇတီႈ

ၶုၼ်ႁေႃၶမ်းၵေႇသႃႇၶႃႈႁိုဝ်။ ဢမ်ႇထုၵ်ႇလီပၼ်ၶႃႈႁိုဝ်။ တၵ်းလႆႈပၼ်ၶႃႈႁိုဝ်။ တၵ်းဢမ်ႇလႆႈပၼ်ၶႃႈႁိုဝ်၊ဝႃႈၼင်ႇၼႆဢေႃႈ။ 

၁၅ မၼ်းၸဝ်ႈႁူႉႁၼ်ၸႂ်ဢၼ်ၵူတ်ႉဢၼ်ငေႃးၶဝ်ၼၼ်ႉလႄႈမၼ်းၸဝ်ႈလၢတ်ႈဝႃႈ၊-ႁဵတ်းသင်လႄႈသူထၢမ်ယႃႉယူၵ်ႉၵဝ်။ ဢဝ်တေႇၼႃႇရီႇၶႅပ်းၼိုင်ႈမႃးတီႈၵဝ်တႃႉ၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၵေႃႈဢဝ်မႃးဢေႃႈ။ 

၁၆ မၼ်းၸဝ်ႈၵေႃႈတူၺ်းငိုၼ်းၶႅပ်းၼၼ်ႉသေယဝ်ႉထၢမ်ဝႃႈ၊-ႁၢင်ႊၼႆႉလိၵ်ႈၼႆႉပဵၼ်ႁၢင်ႊၽႂ်ပဵၼ်လိၵ်ႈၽႂ်၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၼၼ်ႉၵေႃႈလဝ်ႈလၢတ်ႈလႄႈဝႃႈ၊-ပဵၼ်ႁၢင်ႊပဵၼ်လိၵ်ႈၶုၼ်ႁေႃၶမ်းၵေႇသႃႇၶႃႈဢေႃႈ၊ဝႃႈၼင်ႇၼႆဢေႃႈ။ 

၁၇ ၸဝ်ႈယေႇသုၵေႃႈလၢတ်ႈဝႃႈ၊-ဢဝ်ၶွင်ၶုၼ်ႁေႃၶမ်းၵေႇသႃႇပၼ်တီႈၶုၼ်ႁေႃၶမ်းၵေႇသႃႇတႃႉ။ ၶွင်ၽြႃးပဵၼ်ၸဝ်ႈၵေႃႈဢဝ်ပၼ်တီႈၽြႃးပဵၼ်ၸဝ်ႈတႃႉ၊ဝႃႈၼင်ႇၼႆဢေႃႈ။ ၶဝ်ဢၢမ်းမၼ်းၸဝ်ႈၼႃႇလူင်လၢင်ဢေႃႈ။ 

ၽူဝ်မေးမိူဝ်ႈဢၼ်လုၵ်ႉၶိုၼ်းလိပ်း

၁၈ ၸတ်ႉတုၵေးဢၼ်ယုမ်ႇဝႃႈတၢင်းဢၼ်လုၵ်ႉၶိုၼ်းလိပ်းဢမ်ႇမီး၊ဢၼ်ဝႃႈၸိူဝ်းၼၼ်ႉ၊သုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈလဝ်ႈထၢမ်လႄႈဝႃႈ၊-

၁၉ သြႃႇၸဝ်ႈ၊မုဝ်းသေႇၸီႇယၢင်ႇတႅမ်ႈဝႆႉပၼ်တီႈႁဝ်းၶႃႈဝႃႈ၊-ပေႃးပီႈၸၢႆးယင်းဢမ်ႇမီးလုၵ်ႈမီးလၢင်းလႄႈတၢႆၵႂႃႇၸိုင်မေးမၼ်းဢၼ်ၵိုတ်းဝႆႉၼၼ်ႉၼွင်ႉၸၢႆးမၼ်းတၵ်းလႆႈသိမ်းဢဝ်လႄႈႁႂ်ႈၸိူဝ်ႉၶိူဝ်းပီႈၸၢႆးမၼ်းသိုပ်ႇၵႂႃႇဢမ်ႇၶၢတ်ႇဝႃႈၼင်ႇၼႆဝႆႉတီႈႁဝ်းၶႃႈယဝ်ႉ။ 

၂၀ မီးပီႈၼွင်ႉၸဵတ်းၵေႃႉၶႃႈဢေႃႈ။ ပီႈၸၢႆးၵေႃႉယႂ်ႇဢဝ်မေးသေယဝ်ႉယင်းဢမ်ႇမီးလုၵ်ႈမီးလၢင်းလႄႈတၢႆၵႂႃႇၶႃႈဢေႃႈ။ 

၂၁ ၼွင်ႉၸၢႆးမၼ်းၵေႃႉယႂ်ႇသိမ်းဢဝ်မေးမၼ်းဢေႃႈ။ ယင်းဢမ်ႇမီးလုၵ်ႈမီးလၢင်းလႄႈသမ်ႉတၢႆၵႂႃႇၶႃႈဢေႃႈ။ 

၂၂ မိူၼ်ၼင်ႇၼၼ်ၸႃႉၸဵမ်ၵေႃႉတတိယၵေႃႉၼိုင်ႈယဝ်ႉၵေႃႉၼိုင်ႈၶဝ်ပီႈၼွင်ႉၸဵတ်းၵေႃႉဢဝ်မေႈယိင်းၼၼ်ႉသေၵေႃႈဢမ်ႇမီးလုၵ်ႈလၢင်းၶႃႈ။ တီႈလိုၼ်းသုတ်းမေႈယိင်းၼၼ်ႉၵေႃႈတၢႆၵႂႃႇၶႃႈဢေႃႈ။ 

၂၃ ပိူဝ်ႈၼႆလႄႈၼႂ်းၶိင်ႇၵႃႇလႃႉမိူဝ်ႈဢၼ်လုၵ်ႉၶိုၼ်းၼၼ်ႉမိူဝ်ႈဢၼ်ၶဝ်လုၵ်ႉၶိုၼ်းမႃးၼၼ်ႉမေႈယိင်းၵေႃႉၼၼ်ႉတၵ်းပဵၼ်မေးၵေႃႉလႂ်ၶႃႈ။ ၶဝ်တင်းၸဵတ်းၵေႃႉယင်းပေႃးလႆႈဢဝ်မေႈယိင်းၵေႃႉၼၼ်ႉၶႃႈယဝ်ႉ၊ဝႃႈၼင်ႇၼႆဢေႃႈ။ 

၂၄ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ပိူဝ်ႈဢၼ်သူဢမ်ႇႁူႉၵျၢမ်းလိၵ်ႈဢိၵ်တင်းတၼ်းၶူဝ်းၽြႃးပဵၼ်ၸဝ်ႈလႄႈသူၽိတ်းပိူင်ႈယဝ်ႉ။ 

၂၅ လွင်ႈမၼ်းၸမ်းမိူဝ်ႈဢၼ်လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉဢမ်ႇၸၢင်ႊႁဵတ်းတၢင်းဢၼ်ဢဝ်မေးတၢင်းဢၼ်ဢၢပ်ႈပၼ်ၵၼ်လႄႈတပေဵၼ်ၸိူဝ်ႉၼင်ႇတမၢၼ်ႇၵၢင်ႁၢဝ်တင်းလၢႆၼၼ်ႉဢေႃႈ။ 

၂၆ လိူဝ်သေၼၼ်ႉလွင်ႈၶဝ်ၸိူဝ်းဢၼ်တၢႆယဝ်ႉတင်းလၢႆတၵ်းလုၵ်ႉၶိုၼ်းၼၼ်ႉသူဢမ်ႇယၢမ်ႈလႆႈၽတ်းၼႂ်းၵျၢမ်းမုဝ်းသေႇဢၼ်လၢတ်ႈဝႆႉၵႃႈၼႂ်းယုမ်း

မႆႈၽႆးၼၼ်ႉဝႃႈ၊-ၽြႃးပဵၼ်ၸဝ်ႈမီးဢမိင်ႉဝႃႈ၊-ၵဝ်ပဵၼ်ၽြႃးဢႃႇပြႁၢမ်ႇ၊ၽြႃးဢိၸၢၵ်ႉ၊ၽြႃးယႃႇၵုပ်ႉဢေႃႈ၊ဝႃႈၼင်ႇၼႆၼၼ်ႉႁိုဝ်။ 

၂၇ ၽြႃးပဵၼ်ၸဝ်ႈပဵၼ်ၽြႃးၵူၼ်းတၢႆဢမ်ႇၸႂ်ႈ။ ပဵၼ်ၽြႃးၶဝ်ၸိူဝ်းဢၼ်ဢသၢၵ်ႈလိပ်းယူႇၼၼ်ႉဢေႃႈ။ ပိူဝ်ႈၼႆလႄႈသူၽိတ်းပိူင်ႈၼႃႇလူင်လၢင်ယဝ်ႉ၊ဝႃႈၼင်ႇၼႆဢေႃႈ။ 

ပိင်းၺၢပ်ႈဢၼ်ယႂ်ႇမျၢတ်ႈၼႃႇသေပိူၼ်ႈ

၂၈ ၵူၼ်းထုတ်ႇၵျၢမ်းၵေႃႉၼိုင်ႈမိူဝ်ႈဢၼ်ငိၼ်းၶဝ်လၢတ်ႈၸႃထဵင်ၵၼ်ယူႇၼၼ်ႉလႄႈႁူႉႁၼ်လွင်ႈဢၼ်မၼ်းၸဝ်ႈၶိုၼ်းလၢတ်ႈပၼ်တီႈၶဝ်လီလီငၢမ်းငၢမ်းၼၼ်ႉၸိုင်မၼ်းသုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈလဝ်ႈထၢမ်လႄႈဝႃႈ၊-ၼႂ်းပိင်းၺၢပ်ႈၵႃႈမီးတင်းသဵင်ႈတင်းလူင်ၼၼ်ႉပိင်းၺၢပ်ႈဢၼ်လႂ်ယဵင်ႈၶႅၼ်းယႂ်ႇမျၢတ်ႈၼႃႇသေပိူၼ်ႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-

၂၉ ၼႂ်းပိင်းၺၢပ်ႈၵႃႈမီႈတင်းသဵင်ႈတင်းလူင်ၼၼ်ႉပိင်းၺၢပ်ႈဢၼ်ယႂ်ႇမျၢတ်ႈၼႃႇသေပိူၼ်ႈၸမ်းမဵဝ်းဢိသရေႇလၶဝ်ဢိူၺ်း၊ထွမ်ႇငိၼ်းတႃႉ။ ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈႁဝ်းဢေႃႈ။ ထႃႇဝရႃႉၽြႃးပဵၼ်သူႇလဵဝ်ၵူၺ်းဢေႃႈ။ 

၃၀ ၽြႃးပဵၼ်ၸဝ်ႈမႂ်းထႃႇဝရႃႉၽြႃးၸိုင်မႂ်းတၵ်းလႆႈပႃးတင်းႁူဝ်ၸႂ်သဵင်ႈသဵင်ႈပႃးတင်းဝိၺိၺ်ႇသဵင်ႈသဵင်ႈပႃးတင်းၺၢၼ်ႇၵႃႈမီးတင်းသဵင်ႈတင်းလူင်တင်းၵႃႈဢၼ်ၵတ်ႉဢၼ်ၶၼ်တင်းသဵင်ႈတင်းလူင်သေလႄႈႁၵ်ႉဢေႃႈ၊ဝႃႈၼင်ႇၼႆၼၼ်ႉပဵၼ်ပထမပိင်းၺၢပ်ႈဢေႃႈ။ 

၃၁ လိူဝ်သေၼၼ်ႉတုတိယပိင်းၺၢပ်ႈဢၼ်ဝႃႈ၊-ၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉၸိုင်မႂ်းတၵ်းလႆႈႁၵ်ႉမိူၼ်ၸိူဝ်ႉၼင်ႇႁၵ်ႉတူဝ်ၸဝ်ႈၵဝ်ႇၼၼ်ႉဢေႃႈ၊ဢၼ်ဝႃႈၼၼ်ႉမိူၼ်ၸိူဝ်ႉၼင်ႇပထမပိင်းၺၢပ်ႈဢေႃႈ။ ပိင်းၺၢပ်ႈဢၼ်ယႂ်ႇမျၢတ်ႈၼႃႇသပေိင်းၺၢပ်ႈၸိူဝ်းၼႆႉဢမ်ႇမီးယဝ်ႉ၊ဝႃႈၼင်ႇၼႆဢေႃႈ။ 

၃၂ ၵူၼ်းထုတ်ႇၵျၢမ်းၼၼ်ႉၵေႃႈလဝ်ႈလၢတ်ႈလႄႈဝႃႈ၊-လီၶႃႈယဝ်ႉသြႃႇၸဝ်ႈ။ ၸဝ်ႈႁဝ်းလၢတ်ႈပၼ်ၸိုဝ်ႈၸိုဝ်ႈၸႂ်ႈၸႂ်ႈၶႃႈယဝ်ႉ။ ၽြႃးပဵၼ်ၸဝ်ႈမီးသူႇလဵဝ်ၵူၺ်းၶႃႈဢေႃႈ။ လိူဝ်သေမၼ်းၸဝ်ႈၼၼ်ႉၽြႃးပဵၼ်ၸဝ်ႈတၢင်ႇတီႈတၢင်ႇပႃးဢမ်ႇမီးၶႃႈ။ 

၃၃ တၢင်းဢၼ်ပႃးတင်းႁူဝ်ၸႂ်သဵင်ႈသဵင်ႈတင်းၺၢၼ်ႇၵႃႈဢၼ်မီးတင်းသဵင်ႈတင်းလူင်တင်းဝိၺိၺ်ႇသဵင်ႈသဵင်ႈတင်းၵႃႈဢၼ်ၵတ်ႉဢၼ်ၶၼ်တင်းသဵင်ႈတင်းလူင်သေ

လႄႈႁၵ်ႉမၼ်းၸဝ်ႈဢိၵ်ႇတင်းတၢင်းဢၼ်ႁၵ်ႉၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇမိူၼ်ၸိူဝ်ႉၼင်ႇႁၵ်ႉတူဝ်ၸဝ်ႈၵဝ်ႇၼၼ်ႉယဵင်ႈၶႅၼ်းယႂ်ႇမျၢတ်ႈၼႃႇသေတၢင်းဢၼ်ပုၵ်ႉၸေႃႇတူဝ်ယိၸ်ႉတင်းလၢႆဢၼ်ဢဝ်ၽႆးတုတ်ႇဢိၵ်ႇတင်းယိၸ်ႉၵူႈၸိူဝ်ႉၵူႈပိူင်ၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။ 

၃၄ မိူဝ်ႈဢၼ်ၸဝ်ႈယေႇသုႁူႉႁၼ်လွင်ႈဢၼ်မၼ်းဢဝ်တင်းပိင်ႇၺႃႇသတိသေလႄႈၶိုၼ်းလဝ်ႈလၢတ်ႈၸိူဝ်ႉၼင်ႇၼၼ်ၼၼ်ႉၸိုင်မၼ်းၸဝ်ႈလၢတ်ႈလႄႈဝႃႈ၊-မႂ်းၼႆႉဢမ်ႇၵႆၵၼ်တင်းမိူင်းၽြႃးပဵၼ်ၸဝ်ႈယဝ်ႉ၊ဝႃႈၼင်ႇၼႆဢေႃႈ။ လိုၼ်းၼၼ်ႉၽူႈလႂ်ၵေႃႈဢမ်ႇႁတ်းလဝ်ႈႁတ်းထၢမ်တီႈမၼ်းၸဝ်ႈသေၶေႃႈသေၵမ်း။ 

ၸဝ်ႈၶရိၸ်ႉပဵၼ်လုၵ်ႈၽူႈလႂ်

၃၅ မိူဝ်ႈဢၼ်ၸဝ်ႈယေႇသုသင်ႇသွၼ်သုင်းမႃႉပၼ်ၵႃႈၼႂ်းပိၵ်ႉမၢၼ်ႇၸဝ်ႈယူႇၼၼ်ႉၸိုင်မၼ်းၸဝ်ႈလၢတ်ႈလႄႈဝႃႈ၊-ၸဝ်ႈၶရိၸ်ႉပဵၼ်လုၵ်ႈတႃႇဝဵတ်ႉဢေႃႈ၊ဝႃႈၼႆႁဵတ်းႁိုဝ်လႄႈၵူၼ်းထုတ်ႇၵျၢမ်းတင်းလၢႆဝႃႈၸိူဝ်ႉၼႆ။ 

၃၆ တႃႇဝိတ်ႉၼၼ်ႉပႃးတင်းဝိၺိၺ်ႇမူတ်းၸၢင်ႇၸဝ်ႈသေလႄႈဝႃႈ၊-ထႃႇဝရႃႉၽြႃးလၢတ်ႈတီႈၵဝ်ၶႃႈလႄႈဝႃႈ၊-ၸူဝ်ႈဢၼ်ၵဝ်ဢမ်ႇပႆႇဢဝ်ရၢၼ်ႇသူႇမႂ်းတင်းလၢႆၶျႃးဝႆႉႁႂ်ႈပဵၼ်တီႈတၢင်ႇတိၼ်မႂ်းၼၼ်ႉၸိုင်ၼင်ႈယူႇၵႃႈတီႈၽၢႆႇၶႂႃၵဝ်တႃႉ၊ဝႃႈၼင်ႇၼႆဢေႃႈ။ 

၃၇ ပိူဝ်ႈၼႆလႄႈၸဝ်ႈၶရိၸ်ႉၼၼ်ႉပေႃးတႃႇဝိတ်ႉႁွင်ႉဝႃႈၸဝ်ႈႁဝ်း၊ဝႃႈၼင်ႇၼႆၸိုင်တၵ်းပဵၼ်လုၵ်ႈမၼ်းလႆႈၸိူဝ်ႉၼင်ႇႁိူဝ်၊ဝႃႈၼင်ႇၼႆဢေႃႈ။ ၵူၼ်းၸူႉၵူၼ်းတုမ်ၼမ်ၼႃႇမီးတင်းၸႂ်ဢၼ်သိူဝ်းဢၼ်ပျေႃႇထွမ်ႇငိၼ်းၵႂၢမ်းမၼ်းၸဝ်ႈဢေႃႈ။ 

၃၈ ၼႂ်းမိူဝ်ႈဢၼ်မၼ်းၸဝ်ႈသင်ႇသွၼ်သုင်းမႃႉပၼ်ယူႇၸိူဝ်ႉၼင်ႇၼၼ်ယူႇၼၼ်ႉၸိုင်မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊-ဝေႈပႅတ်ႈၵူၼ်းထုတ်ႇၵျၢမ်းတင်းလၢႆတႃႉ။ ၶဝ်ၼၼ်ႉထုၵ်ႇၸႂ်ၵျိူၵ်ႈၸႂ်တၢင်းဢၼ်ၼုင်ႈသိူဝ်ႈဢၼ်ယၢဝ်းသေလႄႈၵႂႃႇလႄႇၵႂႃႇလၢဝ်းယူႇ

၃၉ ၶၢမ်ႇဢဝ်တၢင်းဢၼ်ပိူၼ်ႈႁဵတ်းရူဝ်ႇသေႇၵူဝ်ယမ်လႄႈတၵ်ႉလၢတ်ႈၶဝ်ၵႃႈၼႂ်းၵၢတ်ႇလႂ်တီႈၼင်ႈဢၼ်သုင်ဢၼ်မျၢတ်ႈၵႃႈၼႂ်းၸရွပ်ႈႁေႃးတြႃးလႂ်တီႈၼင်ႈဢၼ်လီဢၼ်မျၢတ်ႈၵႃႈႁိမ်းတီႈၵိၼ်ၵႃႈၼႂ်းပွႆးလႂ်ၸိူဝ်းၼၼ်ႉဢေႃႈ။ 

၄၀ ၶဝ်ၼၼ်ႉၸၢင်ႊႁိမ်ႁူင်ႇသိမ်းပႅင်းဢဝ်ႁိူၼ်းမေႈမုၵ်ႉမေႈမၢႆတင်းလၢႆလႄႈႁဵတ်းၼင်ႇႁၢင်ႊပဵၼ်ၵူၼ်းလီၵူၼ်းငၢမ်းသေယဝ်ႉၸၢင်ႊဢဝ်တင်းၵႂၢမ်းဢၼ်ယၢဝ်းၼႃႇလူင်လၢင်ၼၼ်ႉလႄႈသူးတွင်းဢေႃႈ။ ၶဝ်ၼၼ်ႉယဵင်ႈၶႅၼ်းတၵ်းလႆႈၶၢမ်ႇတၢမ်ႇဢၼ်ယႂ်ႇၼႃႇဢေႃႈ၊ဝႃႈၼင်ႇၼႆဢေႃႈ။ 

တၢင်းလူႇမႄႈမၢႆႈ

၄၁ လိုၼ်းၼၼ်ႉမၼ်းၸဝ်ႈၼင်ႈယူႇၵႃႈတီႈၽၢႆႇပႃႈၼႃႈတိူၵ်ႈၽၼ်ႇတႃႇၸဝ်ႈသေယဝ်ႉတူၺ်းၵူၼ်းၸူႉၵူၼ်းတုမ်တင်းလၢႆဢဝ်ငိုၼ်းဢဝ်တွင်းသႂ်ႇၵႃႈၼႂ်းတိူၵ်ႈၽၼ်ႇတႃႇၸဝ်ႈယူႇၼၼ်ႉဢေႃႈ။ ၵူၼ်းမၢၵ်ႈၵူၼ်းမီးၼမ်ၼႃႇဢဝ်ငိုၼ်းသႂ်ႇၼမ်ၼႃႇဢေႃႈ။ 

၄၂ မေႈမုၵ်ႉမေႈမၢႆႈဢၼ်ၽၢၼ်ၼၼ်ႉၵေႃႉၼိုင်ႈမႃးလႄႈဢဝ်တွင်းလႅင်ႊသွင်ၶႅပ်းဢၼ်ၵႃႊမၼ်းတၢၼ်ႇပႅၵ်ႉသၢၼ်ႇၶႅပ်းၼိုင်ႈၸမ်ၸမ်ၵူၺ်းၼၼ်ႉသႂ်ႇဢေႃႈ။ 

၄၃ မၼ်းၸဝ်ႈႁွင်ႉဢဝ်တပႄးၸဝ်ႈတင်းလၢႆမႃးလႄႈလၢတ်ႈဝႃႈ၊-ၵဝ်ဝႃႈတီႈၸိုဝ်ႈတီႈၸႂ်ႈၸမ်းမေႈမုၵ်ႉမေႈမၢႆႈဢၼ်ၽၢၼ်ၼႆႉယဵင်ႈၶႅၼ်းသႂ်ႇၼမ်ၼႃႇသေၶဝ်ၸိူဝ်းဢၼ်သႂ်ႇၵႃႈၼႂ်းတိူၵ်ႈၽၼ်ႇတႃႇၸဝ်ႈၸိူဝ်းၼၼ်ႉဢေႃႈ။ 

၄၄ လွင်ႈမၼ်းၸမ်းၶဝ်ၸိူဝ်းၼၼ်ႉၼုၵ်ႉဢဝ်ၵႃႈၼႂ်းၸေးၸိမ်ႇဢၼ်ၶဝ်မီးၼမ်ၼႃႇၼၼ်ႉၵူၺ်းလႄႈသႂ်ႇဢေႃႈ။ မေႈယိင်းၵေႃႉၼႆႉၸမ်းၼုၵ်ႉဢဝ်ၵႃႈၼႂ်းတၢင်းၽၢၼ်မၼ်းဢၼ်မၼ်းမီးပုၼ်ႈဢၼ်တၵ်လဵင်ႉဢသၢၵ်ႈမၼ်းၼၼ်ႉလႄႈသႂ်ႇယဝ်ႉဝႃႈၼင်ႇၼႆဢေႃႈ။