Shan Missions

လိၵ်ႈဢေႃးဝႃႇတႃႉရူဝ်းမ

Chapter   ၁       ၂       ၃       ၄       ၅       ၆       ၇       ၈       ၉       ၁၀       ၁၁       ၁၂       ၁၃       ၁၄       ၁၅       ၁၆     

၁၅ 

ၸွမ်းပုင်ႇသၢၵ်ႈသေႇၸဝ်ႈယေႇသု

၁ ပိူဝ်ႈၼႆလႄႈႁဝ်းၸိူဝ်းဢၼ်မီးႁႅင်းၼႆႉယင်းဢမ်ႇၸွမ်းဢလူဝ်ႇတူဝ်ၸဝ်ႈၵဝ်ႇလႄႈတၵ်းလႆႈယိူၼ်ႉၶၢမ်ႇတၢင်းဢၼ်ၶဝ်ႁႅင်းလဵၵ်ႉႁႅင်းၵေႇၼၼ်ႉဢေႃႈ။

၂ ၼင်ႇၼၼ်လႄႈႁဝ်းၵႃႈမီးၸိူဝ်းၼႆႉထွၵ်ႈလူၺ်ႈဢၵျူဝ်းၵေႃႉဢၼ်ၸၢပ်ႈသႅင်ႇၵၼ်တင်းႁဝ်းၼၼ်ႉသေလႄႈဢွၼ်ၵၼ်ႁဵတ်းႁႂ်ႈမၼ်းၸူမ်းၸႂ်လႄႈတႄႇႁဵတ်းမၼ်းတႃႉႁဝ်း။

၃ လွင်ႈမၼ်းၸမ်းၸဝ်ႈၶရိၸ်ႉဢမ်ႇၸွမ်းဢလူဝ်ႇတူဝ်ၸဝ်ႈၵဝ်ႇ။ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်း၊-ၵႂၢမ်းသေႉသွမ်းၶဝ်ၸိူဝ်းဢၼ်သေႉသွမ်းၸဝ်ႈႁဝ်းၼၼ်ႉလႆႈႁွတ်ႈထိုင်ၵႃႈၼိူဝ်ၵဝ်ၶႃႈဢေႃႈဝႃႈၼင်ႇၼႆဢေႃႈ။

၄ ၼင်ႇႁိုဝ်တၵ်းမီးဢၶႂၢင်ႉဢၼ်လႆႈမုင်ႈထႃႈမွင်းထႃႈၵွပ်ႈပိူဝ်ႈတၢင်းဢၼ်ယိူၼ်ႉၶၢမ်ႇဢိၵ်ႇတင်းတၢင်းဢၼ်ပၼ်ဢဵၼ်ပၼ်ႁႅင်းဢၼ်ပႃးၼႂ်းၵျၢမ်းလိၵ်ႈတင်းလၢႆဢၼ်တႅမ်ႈဝႆႉၼႂ်းၵျၢမ်းလိၵ်ႈမိူဝ်ႈဢွၼ်ၼႆႉၼၼ်ႉပဵၼ်ဢၼ်တႅမ်ႈဝႆႉပုၼ်ႈဢၼ်တၵ်းလႆႈမီးတၢင်းမုင်ႈမွင်းၼၼ်ႉဢေႃႈ။

၅ ၼင်ႇႁိုဝ်သူတၵ်းမီးသၽေႃးဢၼ်လဵဝ်ၵၼ်၊သူပ်းဢၼ်လဵဝ်ၵၼ်လႄႈယွင်ႈယေႃးၽြႃးပဵၼ်ၸဝ်ႈပေႃႈၸဝ်ႈယေႇသုၶရိၸ်ႉၼၼ်ႉၸိုင်၊

၆ ႁႂ်ႈၽြႃးပဵၼ်ၸဝ်ႈၸဝ်ႈဢၼ်ပၼ်တၢင်းဢၼ်ယိူၼ်ႉၶၢမ်ႇဢိၵ်ႇတင်းတၢင်းဢၼ်ပၼ်ဢဵၼ်ပၼ်ႁႅင်းၼၼ်ႉ၊ဢိတ်းလူပၼ်သူႁႂ်ႈသူၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်ၸွမ်းၼင်ႇဢလူဝ်ႇၸဝ်ႈယေႇသုၶရိၸ်ႉသေလႄႈမီးႁူဝ်ၸႂ်ဢၼ်လဵဝ်ၵၼ်သေၵမ်းလူၺ်ႈ။

၇ ၼင်ႇႁိုဝ်တၵ်းႁႂ်ႈမူၼ်ၽုင်းၽြႃးပဵၼ်ၸဝ်ႈထၢင်ႇသႃးၸိုင်ၸိူဝ်ႉၼင်ႇဢၼ်ၸဝ်ႈၶရိၸ်ႉႁပ်ႉဢဝ်သူၼၼ်ႉ၊သူၵေႃႉၼိုင်ႈလႄႈၵေႃႉၼိုင်ႈၵေႃႈၼင်ႇၵၼ်ၵၼ်ႁပ်ႉတုင်းဢဝ်ၵၼ်တႃႉ။

၈ ၵဝ်သမ်ႉဝႃႈထႅင်ႈၸမ်းၸဝ်ႈယေႇသုၶရိၸ်ႉၼၼ်ႉထွၵ်ႈလူၺ်ႈသႅတ်ႈၸႃႇၽြႃးပဵၼ်ၸဝ်ႈသေလႄႈမႃးၶၢမ်ႇႁဵတ်းၶႃႈၶဝ်ၸိူဝ်းဢၼ်ထိူဝ်ႁိမ်းၼၼ်ႉလႄႈႁဵတ်းႁႂ်ႈၵတိၸဝ်ႈဢၼ်ပၼ်ဝႆႉတီႈပူႇမွၼ်ႇႁဝ်းၼၼ်ႉလႆႈတႄႇယူႇလႄႈႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႆႈယွင်ႈယေႃးဢၢမ်းဢေႃးၵရူႉၼႃႇၽြႃးပဵၼ်ၸဝ်ႈဢေႃႈ။

၉ ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်း၊-ၵွပ်ႈႁွႆးၼႆႉလႄႈၵဝ်ၶႃႈတၵ်းယွင်ႈယေႃးၸဝ်ႈႁဝ်းၵႃႈတီႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉလႄႈႁဵတ်းၵႂၢမ်းထေႃးပၼႃႇၵႃႈတီႈၼႃႇမႃႉၸိုဝ်ႈသဵင်ၸဝ်ႈႁဝ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။

၁၀ ဢၼ်သမ်ႉဝႃႈထႅင်ႈၸမ်း၊-ၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်ဢိူၺ်း၊ၸူမ်းသိူဝ်းလူၺ်ႈၵၼ်တင်းၵူၼ်းၽြႃးပဵၼ်ၸဝ်ႈတင်းလၢႆတႃႉ၊ဝႃႈၼင်ႇၼႆဢေႃႈ။

၁၁ ဢၼ်သမ်ႉဝႃႈထႅင်ႈၵမ်းၼိုင်ႈၸမ်းၵူၼ်းမဵဝ်းၵႃႈမီးတင်းသဵင်ႈတင်းလူင်ၶဝ်ဢိူၺ်း၊ယွင်ႈယေႃးထႃႇဝရႃႉၽြႃးတႃႉ။ၸိူဝ်ႉၶိူဝ်းၵူၼ်းၵႃႈမီးတင်းသဵင်ႈတင်းလူင်ၶဝ်ဢိူၺ်း၊ဢိူၼ်ႉယွင်ႈမၼ်းၸဝ်ႈတႃႉ၊ဝႃႈၼင်ႇၼႆဢေႃႈ။

၁၂ လၢႆးသမ်ႉဢိသႃႇယဝႃႈထႅင်ႈၸမ်း၊-ႁၢၵ်ႈယေႇသေႇတၵ်းဢွၵ်ႇလႄႈပဵၼ်ၵေႃႉဢၼ်ပေႃႇမႃးႁႂ်ႈလႆႈဢုပ်ႉပိူင်ႇၵူၼ်းတင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။ၵေႃႉၼၼ်ႉၸိုင်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတၵ်းဢွၼ်ၵၼ်ဢိင်ပိုင်ႈဢေႃႈ၊ဝႃႈၼင်ႇၼႆဢေႃႈ။

၁၃ ႁႂ်ႈၽြႃးပဵၼ်ၸဝ်ႈၸဝ်ႈဢၼ်မုင်ႈထႃႈမွင်းထႃႈၼၼ်ႉႁႂ်ႈသူမီးတင်းၸႂ်ဢၼ်ယုမ်ႇမၢတ်ႈသေလႄႈတဵမ်ဝႆႉတင်းတၢင်းဢၼ်ၸူမ်းသိူဝ်းတၢင်းၼိမ်သေၵမ်းလူၺ်ႈ။ႁႂ်ႈသူလႆႈတဵမ်ဝႆႉတင်းတၢင်းဢၼ်မုင်ႈထႃႈမွင်းထႃႈၵွပ်ႈတၼ်းၶူဝ်းဝိၺိၺ်ႇမူတ်းၸၢင်ႇၸဝ်ႈၼၼ်ႉသေၵမ်းလူၺ်ႈ။

ၵွပ်ႈသင်လႄႈပေႃးလုလႆႈတႅမ်ႈလိၵ်ႈၽိုၼ်ၼႆႉ

၁၄ ပီႈၼွင်ႉၶဝ်ဢိူၺ်း၊ၵဝ်တူၵ်းၵၢင်ၸႂ်လွင်ႈဢၼ်ဝႃႈသူၼႆႉတဵမ်ဝႆႉတင်းပၵတိသၽေႃးဢၼ်လီဢၼ်ငၢမ်းလႄႈႁူႉၸႅင်ႈလွင်ႈတၢင်းၵူႈၸိူဝ်ႉၵူႈပိူင်ယူႇတတ်ႈၼိုင်ႇလႆႈလွင်ႈဢၼ်ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်သင်ႇသွၼ်သုင်းမႃႉပၼ်ၵၼ်ယူႇဢေႃႈ။

၁၅ ၵူၺ်းၵႃႈၼင်ႇႁိုဝ်ၵဝ်တၵ်းလႆႈပွင်ႁဵတ်းဢမူႉတၢင်းဢၼ်ႁေႃးလၢတ်ႈတြႃးသတၢင်းသိူဝ်းပျေႃႇၽြႃးပဵၼ်ၸဝ်ႈလႄႈပဵၼ်ၵေႃႉဢၼ်ပႂ်ႉဢမူႉၸဝ်ႈယေႇသုၶရိၸ်ႉ

၁၆ ၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ႁႂ်ႈတၢင်းပုၵ်ႉၸေႃႇၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢၼ်ဝိၺိၺ်ႇမူတ်းၸၢင်ႇၸဝ်ႈႁႂ်ႈမူတ်းၸၢင်ႇၼၼ်ႉလႆႈပဵၼ်တီႈဢၼ်ထုၵ်ႇၸႂ်ၸဝ်ႈၸိုင်ၵဝ်ပိုင်ႈဢိင်ၵျေးၸူးဢၼ်ၽြႃးပဵၼ်ၸဝ်ႈဢၢပ်ႈပၼ်တီႈၵဝ်ၼၼ်ႉသေလႄႈပၼ်သတိသူယူႇႁတ်းႁတ်းႁၢၼ်ႁၢၼ်ဢေႃႈ။

၁၇ ပိူဝ်ႈၼႆလႄႈၵဝ်မီးလွင်ႈဢၼ်ဢိင်ပိုင်ႈၸဝ်ႈယေႇသုၶရိၸ်ႉလႄႈသိူဝ်းပျေႃႇဢုပ်ႇဝၢဝ်းၼႂ်းလွင်ႈတၢင်းၵႃႈဢၼ်ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈၼၼ်ႉဢေႃႈ။

၁၈ လွင်ႈၼင်ႇႁိုဝ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတၵ်းထွမ်ႇဢဝ်ၵွပ်ႈပိူဝ်ႈၵႂၢမ်းၵွပ်ႈပိူဝ်ႈတၢင်းၵမ်တၢင်းၵျၢင်ႉၼၼ်ႉၵဝ်ႁတ်းလၢတ်ႈလွင်ႈတၢင်းဢၼ်ၸဝ်ႈၶရိၸ်ႉဢဝ်ၵဝ်ႁဵတ်းၵႃႈမီးတင်းသဵင်ႈတင်းလူင်ၼၼ်ႉဢေႃႈ။

၁၉ ၵဝ်ဢိင်ၵျေးၸူးၸဝ်ႈသေလႄႈႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈၶရိၸ်ႉတင်းသဵင်ႈတင်းမူတ်းၼႂ်းတၢင်းဢၼ်ၼႄပျႃးတၼ်းၶူဝ်းၼႂ်းၼီႉမိၵ်ႈလၢၵ်ႈၶၼႃႇလႂ်၊ၼႂ်းတၢင်းဢၼ်လီဢၢမ်းလႂ်ဢိၵ်ႇတင်းၼႂ်းတၼ်းၶူဝ်းဝိၺိၺ်ႇမူတ်းၸၢင်ႇၸဝ်ႈၼၼ်ႉၸႃႉၸဵမ်ဝဵင်းယေႇရုသလိမ်ႇတေႃႇထိုင်ႁွတ်ႈမိူင်းဢိလိရိၵမ်ႇ၊ၵူႈတီႈၵူႈလႅၼ်မႃးယဝ်ႉ။

၂၀ ၼင်ႇႁိုဝ်ၵဝ်ယင်းဢမ်ႇထၢပ်ႈထႅင်ႈလႄႈတႄႇႁဵတ်းၵႃႈၼိူဝ်ငဝ်ႈႁၢၵ်ႈတိူၵ်ႈဢၼ်ပိူၼ်ႈတၢင်ႇၵေႃႉတႄႇဝႆႉၼၼ်ႉၸိုင်ၵဝ်မီးၸႂ်ဢၼ်ၶႂ်ႈႁေႃးလၢတ်ႈတြႃးသတၢင်းသိူဝ်းပျေႃႇတီႈၶဝ်ၸိူဝ်းဢၼ်ဢမ်ႇပႆႇတွၼ်ႉငိၼ်းၼႃႇမႃႉၸိုဝ်ႈသဵင်ၸဝ်ႈယေႇသုၶရိၸ်ႉၼၼ်ႉဢေႃႈ။

၂၁ မႅၼ်ႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊-ၶဝ်ၸိူဝ်းဢၼ်ဢမ်ႇပႆႇလႆႈၶၢမ်ႇတၢင်းဢၼ်လၢတ်ႈၼႄလွင်ႈၵေႃႉၼၼ်ႉတၵ်းလႆႈႁၼ်ဢေႃႈ။ၶဝ်ၸိူဝ်းဢၼ်ဢမ်ႇပႆႇတွၼ်ႉလႆႈငိၼ်းလွင်ႈၵေႃႉၼၼ်ႉတၵ်းလႆႈႁူႉပွင်ႇဢေႃႈ၊ဝႃႈၼင်ႇၼႆၼၼ်ႉဢေႃႈ။

ဢၢင်ႈဢၢၼ်းပေႃးလုမိူဝ်းၼႃႈ

၂၂ ပိူဝ်ႈၼႆလႄႈဢၶႂၢင်ႉဢၼ်ၵဝ်တၵ်းလႆႈမႃးၵႃႈတီႈသူၼၼ်ႉဢမ်ႇပေႃးမီး။ဢၼ်ႁႄႉၶႅၼ်မီးၼမ်ၼႃႇဢေႃႈ။

၂၃ တေႃႈလဵဝ်ၼႆႉဢွင်ႈတီႈၵႃႈတီႈၼႆႉဢမ်ႇမီးတီႈဢၼ်ၵဝ်တၵ်းလႆႈႁဵတ်းၼၼ်ႉယဝ်ႉ။ၵဝ်မီးဢလူဝ်ႇၶႂ်ႈမႃးၵႃႈတီႈဢၼ်သူမီးၼၼ်ႉၶိင်ႇၵႃႇလႃႉႁိုင်ၼႃႇယဝ်ႉ။

၂၄ မိူဝ်ႈဢၼ်ၵဝ်ၵႂႃႇၸူးမိူင်းသပေႇၼိၼၼ်ႉၵဝ်မုင်ႈထႃႈမွင်းထႃႈလွင်ႈဢၼ်တၵ်းလႆႈထူပ်းႁၼ်သူၵႃႈတီႈတၢင်းဢၼ်ၵဝ်ၵႂႃႇၼၼ်ႉလႄႈယူႇလူၺ်ႈၵၼ်တင်းသူတေႃႇႁွတ်ႈဢလူဝ်ႇၵဝ်လႆႈတဵမ်ထူၼ်ႈတၢၼ်ႇတၢၼ်ႇယဝ်ႉၸင်ႇၵဝ်တၵ်းၶၢမ်ႇဢဝ်ၵျေးၸူးတၢင်းဢၼ်သူတၵ်းၸွမ်းသူင်ႇၵဝ်ႁႂ်ႈၵဝ်လႆႈၵႂႃႇၸူးမိူင်းၼၼ်ႉဢေႃႈ။

၂၅ မိူဝ်ႈလဵဝ်ၼႆႉၵဝ်တၵ်းၵႂႃႇၵႃႈတီႈဝဵင်းယေႇရုသလႅမ်ႇပုၼ်ႉလႄႈႁဵတ်းလဵင်ႉႁဵတ်းလူၵူၼ်းမူတ်းၸၢင်ႇတင်းလၢႆဢေႃႈ။

၂၆ လွင်ႈမၼ်းၸမ်းၵူၼ်းမိူင်းမႃႇၵေႇတေႃးၼိဢိၵ်ႇတင်းၵူၼ်းမိူင်းဢၶႃႇယတင်းလၢႆပႃးတင်းၸႂ်ၸေႇတၼႃႇသေလႄႈလူႇတၢၼ်းၶူဝ်းပုၼ်ႈၵူၼ်းမူတ်းၸၢင်ႇဢၼ်ယၢၵ်ႈဢၼ်ၽၢၼ်ၵႃႈၼႂ်းဝဵင်းယေႇရုသလႅမ်ႇၸိူဝ်းၼၼ်ႉယဝ်ႉ။ၶဝ်မီးၸႂ်ၸေႇတၼႃႇဢေႃႈ။

၂၇ လွင်ႈမၼ်းၸမ်းၶဝ်ပဵၼ်ၵေႃႉဢၼ်ထုၵ်ႇလီၶိုၼ်းတႅၼ်းၼီႈၵျေးၸူးဢေႃႈ။ပေႃးၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႆႈမႅင်ႇဢဝ်တၢင်းလီဝိၺိၺ်ႇလူၺ်ႈၵၼ်တင်းၵူၼ်းယုတတင်းလၢႆၸိုင်ၶဝ်ထုၵ်ႇလီဢဝ်ဢုၵ်ႉၸႃႇလေႃးၵီႇလႄႈလူႇတၢၼ်းႁဵတ်းလဵင်ႉႁဵတ်းလူဢေႃႈ။

၂၈ ပိူဝ်ႈၼႆၸင်ႇၵဝ်ပွင်ႁဵတ်းႁႂ်ႈလၵ်ႈသွင်ႇၼၼ်ႉယင်းဢမ်ႇႁူင်ႈဢမ်ႇႁၢႆလႄႈႁွတ်ႈၽႅဝ်သေယဝ်ႉၵဝ်တၵ်းၸွမ်းတၢင်းၵႂႃႇၵႃႈႁိမ်းသူလႄႈၵႂႃႇမိူင်းသပေႇၼိပုၼ်ႉဢေႃႈ။

၂၉ မိူဝ်ႈဢၼ်ၵဝ်ႁွတ်ႈထိုင်တီႈသူၼၼ်ႉၸိုင်ၵဝ်တၵ်းပႃးဢဝ်တင်းတၢင်းလီမင်ႇၵလႃႇတဵမ်တဵမ်ထူၼ်ႈထူၼ်ႈဢၼ်မီးၼႂ်းၸဝ်ႈယေႇသုၶရိၸ်ႉၼၼ်ႉလႄႈမႃးဢေႃႈ။

၃၀ ပီႈၼွင်ႉၶဝ်ဢိူၺ်း၊ၵဝ်ဢဝ်လွင်ႈၸဝ်ႈႁဝ်းၸဝ်ႈယေႇသုၶရိၸ်ႉဢိၵ်ႇတင်းမႅတ်ႈတႃႇၵရူႉၼႃႇဝိၺိၺ်ႇၸဝ်ႈသေလႄႈတိုၵ်းယူင်းသူႁႂ်ႈသူၶတ်းၸႂ်လူၺ်ႈၵၼ်တင်းၵဝ်လႄႈႁဵတ်းသူးတွင်းပထၼႃႇတီႈၽြႃးပဵၼ်ၸဝ်ႈ

၃၁ လွင်ႈၼင်ႇႁိုဝ်ၵဝ်တၵ်းလႆႈၵၢင်းလွတ်ႈသေၵႃႈၼႂ်းမိုဝ်းၶဝ်ၸိူဝ်းဢၼ်တွပ်ႇဢၼ်ထဵင်ၼႂ်းမိူင်းယုတၼၼ်ႉဢိၵ်ႇတင်းလွင်ႈၼင်ႇႁိုဝ်တၢင်းဢၼ်ၵဝ်ႁဵတ်းလဵင်ႉႁဵတ်းလူပုၼ်ႈဝဵင်းယေႇရုသလႅမ်ႇၼၼ်ႉ

၃၂ တၵ်းထုၵ်ႇၸႂ်ၵူၼ်းမူတ်းၸၢင်ႇတင်းလၢႆလွင်ႈၼင်ႇႁိုဝ်ၵဝ်တၵ်းပႃးတင်းၸႂ်ဢၼ်သိူဝ်းပျေႃႇလႄႈႁွတ်ႈထိုင်မႃးၵႃႈတီႈသူမႅၼ်ႈၸွမ်းၼင်ႇဢလူဝ်ႇၽြႃးပဵၼ်ၸဝ်ႈသေယဝ်ႉႁႂ်ႈၶိုၼ်းပဵၼ်ဢဵၼ်ႁႅင်းဢၼ်မႂ်ႇဢေႃႈ။

၃၃ ႁႂ်ႈၽြႃးပဵၼ်ၸဝ်ႈၸဝ်ႈတၢင်းၼိမ်ၼၼ်ႉတႄႇယူႇလူၺ်ႈၵၼ်တင်းသူၵႃႈမီးတင်းသဵင်ႈတင်းလူင်သေၵမ်းလူၺ်ႈ။ဢႃႈမိၼ်ႈ။