Shan Missions

လိၵ်ႈဢေႃးဝႃႇတႃ့ဢေးၽႅတ်ႈ

Chapter          ၁          ၂          ၃          ၄           ၅           ၆         

၃

ပေႃးလုပဵၼ်တမၢၼ်ႇၸဝ်ႈပုၼ်ႈၵူၼ်းတၢင်ႇၸိူဝ်ႉတၢင်ႇၶိူဝ်း

၁ ၵွပ်ႈပိူဝ်ႈလွင်ႈတီႈႁႅင်းၼႆႉလႄႈၵဝ်၊ပေႃးလု၊ၽူႈတူၵ်းၵႅၼ်းၸဝ်ႈယေႇသုၶရိၸ်ႉ၊လႆႈၶၢမ်ႇတူၵ်းၵႅၼ်းပုၼ်ႈသူၸိူဝ်းဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉဢေႃႈ။

၂ ၵႃႈၼင်ႇဢၼ်သူလႆႈငိၼ်းသူႉၵျေးၸူးၽြႃးပဵၼ်ၸဝ်ႈဢၼ်မၼ်းၸဝ်ႈထွၵ်ႈလူၺ်ႈဢၵျူဝ်းသူသေလႄႈပၼ်တီႈၵဝ်ၼၼ်ႉဢေႃႈ။

၃ ၵဝ်လႆႈၶၢမ်ႇဢဝ်ဢေႃႈ။လွင်ႈတၢင်းၼႆႉၸမ်းၵႃႈၼင်ႇဢၼ်ၵဝ်တႅမ်ႈဝႆႉယဝ်ႉဢိတ်းၼိုင်ႈမိူဝ်ႈဢွၼ်တၢင်းၼၼ်ႉၽြႃးပဵၼ်ၸဝ်ႈဢဝ်တင်းပျႃႇတိၵ်ႈၸဝ်ႈလႄႈၼႄပျႃးလွင်ႈတၢင်းဢၼ်လိုၵ်ႉဢၼ်လမ်ႇတီႈၵဝ်ဢေႃႈ။

၄ ပေႃးသူၽတ်းတူၺ်းလိၵ်ႈၼၼ်ႉၸိုင်သူတၵ်းႁူႉလွင်ႈဢၼ်ဝႃႈၵဝ်ႁူႉၸႅင်ႈလွင်ႈတၢင်းဢၼ်လိုၵ်ႉဢၼ်လမ်ႇၸဝ်ႈၶရိၸ်ႉၼၼ်ႉဢေႃႈ။

၅ ၼႂ်းၶိင်ႇၵႃႇလႃႉတၢင်ႇတီႈမိူဝ်ႈၼၼ်ႉမၼ်းၸဝ်ႈဢမ်ႇၼႄပျႃးတၢင်းဢၼ်လိုၵ်ႉဢၼ်လမ်ႇတီႈၵူၼ်းတင်းလၢႆမိူၼ်ၸိူဝ်ႉၼင်ႇဢၼ်မၼ်းၸဝ်ႈဢဝ်တင်းဝိၺိၺ်ႇၸဝ်ႈသေလႄႈၽုၺ်ႇဢွၵ်ႇၼႄပျႃးၵႃႈတီႈတမၢၼ်ႇၸဝ်ႈဢၼ်မူတ်းၸၢင်ႇဢိၵ်ႇတင်းၵႃႈတီႈပရေႃးၽႅတ်ႈတင်းလၢႆၶိင်ႇတေႃႈလဵဝ်ၼႆႉ။

၆ တၢင်းဢၼ်လိုၵ်ႉဢၼ်လမ်ႇၼၼ်ႉၸမ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႆႈၶၢမ်ႇဢမူၺ်ႇလူၺ်ႈၵၼ်တင်းၵူၼ်းယုတတင်းလၢႆယူႇပဵၼ်တူဝ်ဢၼ်လဵဝ်ၵၼ်ယူႇသေလႄႈလႆႈသိူၵ်ႈသမ်ႇၵတိၸဝ်ႈယူႇၼႂ်းၸဝ်ႈၶရိၸ်ႉၵွပ်ႈပိူဝ်ႈတြႃးသတၢင်းသိူဝ်းပျေႃႇၼၼ်ႉဢေႃႈ။

၇ ၵဝ်လႆႈထိုင်ပဵၼ်သြႃႇဢၼ်ႁေႃးလၢတ်ႈတြႃးၼၼ်ႉၵႃႈၼင်ႇဢၼ်လႆႈၶၢမ်ႇဢဝ်ၵျေးၸူးၽြႃးပဵၼ်ၸဝ်ႈဢၼ်မၼ်းၸဝ်ႈဢိတ်းလူပၼ်တီႈၵဝ်ၸွမ်းၵႃႈၼင်ႇဢၼ်တၼ်းၶူဝ်းၸဝ်ႈပွင်ႁဵတ်းၼၼ်ႉယဝ်ႉ။

၈ မၼ်းၸဝ်ႈပၼ်ၵျေးၸူးၼၼ်ႉတီႈၵဝ်ဢၼ်ပဵၼ်ၵေႃႉဢၼ်ယဵင်ႈၶႅၼ်းလဵၵ်ႉၼႃႇသေၵေႃႉဢၼ်လဵၵ်ႉသေပိူၼ်ႈၵႃႈၼႂ်းၵူၼ်းမူတ်းၸၢင်ႇတင်းသဵင်ႈတင်းလူင်ၼၼ်ႉလႄႈႁႂ်ႈၵဝ်လႆႈႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈၶရိၸ်ႉဢၼ်ၸႅတ်ႈထၢမ်ၸႅတ်ႈတူၺ်းလႄႈ

၉ ဢမ်ႇႁူႉႁၼ်သဵင်ႈလႆႈၼၼ်ႉ၊ၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢိၵ်ႇတင်းလွင်ႈသႃႇသၼႃႇဢၼ်ၸၢပ်ႈသႅင်ႇၵၼ်တင်းတၢင်းဢၼ်လိုၵ်ႉဢၼ်လမ်ႇဢၼ်သိူင်ႇဝႆႉၼႂ်းၽြႃးပဵၼ်ၸဝ်ႈၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၵႃႈမီး၊ၸႃႉၸဵမ်ၵၢပ်ႈၵႃႇလႃႉမိူဝ်ႈဢွၼ်ၼႆႉၼၼ်ႉလႆႈထၢင်ႇသႃးမႃးတီႈၵူၼ်းတင်းသဵင်ႈတင်းလူင်ၼၼ်ႉယဝ်ႉ။

၁၀ ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်းလွင်ႈၼင်ႇႁိုဝ်ၺၢၼ်ႇၽြႃးပဵၼ်ၸဝ်ႈတၵ်းလႆႈထၢင်ႇသႃးတီႈဢၼ်ထွတ်ႈဢၼ်မျၢတ်ႈ

၁၁ တီႈဢႃႇၼႃႇတင်းလၢႆၵႃႈၼႂ်းတီႈၵၢင်ႁၢဝ်ၵွပ်ႈပိူဝ်ႈၸိူဝ်းၸဝ်ႈၼၼ်ႉၸိုင်မၼ်းၸဝ်ႈဢဝ်ၸဝ်ႈႁဝ်းၸဝ်ႈယေႇသုၶရိၸ်ႉလႄႈႁဵတ်းႁႂ်ႈတၢင်းၵျၢမ်ႇတၢင်းပွင်ထႃႇဝရႃႉၼၼ်ႉတဵမ်ထူၼ်ႈဢေႃႈ။

၁၂ ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈၵႃႈၼႂ်းမၼ်းၸဝ်ႈၼၼ်ႉလႄႈႁဝ်းမီးၸႂ်ဢၼ်ႁတ်းႁၢၼ်လႆႈဢၶႂၢင်ႉဢၼ်လႆႈသုတ်ႉၸမ်လႄႈၶၢမ်ႇဢဝ်တၢင်းဢၼ်မၼ်းၸဝ်ႈဢိတ်းလူၼၼ်ႉဢေႃႈ။၁၃ ပိူဝ်ႈၼႆလႄႈမိူဝ်ႈဢၼ်သူႁၼ်တုၵ်ႉၶႃႉတၢင်းၽၢၼ်ဢၼ်ၵဝ်လႆႈၶၢမ်ႇၼၼ်ႉၸိုင်သူယႃႇပေၸႂ်လူႉ။လွင်ႈတၢင်းၼၼ်ႉၸမ်းပဵၼ်မူၼ်သရေႇဢေႃႈ။

ဢဵၼ်ႁႅင်းၼႂ်းဝိၺိၺ်ႇမူတ်းၸၢင်ႇၸဝ်ႈ

၁၄ ၵွပ်ႈပိူဝ်ႈလွင်ႈတၢင်းဢၼ်ဝႃႈမႃးယဝ်ႉၼၼ်ႉလႄႈၵဝ်ၶုပ်ႉမူပ်ႇသူးတွင်းၵႃႈတီႈၽၢႆႇၼႃႈပေႃႈၸဝ်ႈႁဝ်းၸဝ်ႈယေႇသုၶရိၸ်ႉဢၼ်ပဵၼ်ၸဝ်ႈဢၼ်ပၼ်ၸိုဝ်ပၼ်သဵင်

၁၅ ၵႃႈတီႈၵူၼ်းႁိူၼ်းၵူၼ်းယေးတင်းသဵင်ႈတင်းလူင်ဢၼ်မီးၵႃႈၼိူဝ်ၵၢင်ႁၢဝ်ဢိၵ်ႇတင်းၵႃႈၼိူဝ်လိၼ်မိူင်းၼႆႉၼၼ်ႉယူႇဢေႃႈ။

၁၆ လွင်ႈဢၼ်သူးတွင်းၼၼ်ႉၸမ်းလွင်ႈၼင်ႇႁိုဝ်မၼ်းၸဝ်ႈတၵ်းဢိတ်းလူပၼ်တီႈသူမႅၼ်ႈၸွမ်းၼင်ႇဢၼ်မၼ်းၸဝ်ႈတဵမ်ထူၼ်ႈၼမ်ၵိုၼ်းၼၼ်ႉႁႂ်ႈၵူၼ်းၽၢႆႇတၢင်းၼႂ်းသူမီးႁႅင်းမၼ်ႈၶိူင်ႇၵွပ်ႈပိူဝ်ႈဝိၺိၺ်ႇၸဝ်ႈ

၁၇ ဢိၵ်ႇတင်းႁႂ်ႈၸဝ်ႈၶရိၸ်ႉလႆႈၵိင်းဝၢပ်ႈယူႇၵႃႈၼႂ်းႁူဝ်ၸႂ်သူၵွပ်ႈပိူဝ်ႈတၢင်းယုမ်ႇမၢတ်ႈဢိၵ်ႇတင်းလွင်ႈၼင်ႇႁိုဝ်သူတၵ်းမီးတၢင်းဢၼ်ၽုၵ်ႇသွမ်ႈယူႇၼႂ်းမႅတ်ႈတႃႇတၢင်းဢၼ်တႄႇၶျႃးငဝ်ႈႁၢၵ်ႈတိူၵ်ႈဝႆႉသေယဝ်ႉ

၁၈ တတ်ႈၼိုင်ႇႁႂ်ႈလႆႈႁူႉႁၼ်ၼႃႈယၢဝ်းၼႃႈပွတ်းဢၼ်သုင်ဢၼ်လိုၵ်ႉမႅတ်ႈတႃႇၸဝ်ႈၶရိၸ်ႉမိူၼ်ၸိူဝ်ႉၼင်ႇၵူၼ်းမူတ်းၸၢင်ႇတင်းသဵင်ႈတင်းလူင်ၼၼ်ႉလႄႈ

၁၉ ႁူႉမႅတ်ႈတႃႇၸဝ်ႈဢၼ်ဢဝ်တင်းၺၢၼ်ႇတူဝ်ၸဝ်ႈၵဝ်ႇဢမ်ႇႁူႉလႆႈၼၼ်ႉဢိၵ်ႇတင်းလွင်ႈၼင်ႇႁိုဝ်သူတၵ်းတဵမ်ဝႆႉတင်းတၢင်းဢၼ်ၽြႃးပဵၼ်ၸဝ်ႈတဵမ်ထူၼ်ႈၵႃႈမီးတင်းသဵင်ႈတင်းလူင်ၼၼ်ႉၸိုင်ၵဝ်သူးတွင်းပၼ်သူယူႇဢေႃႈ။

၂၀ ႁႂ်ႈမၼ်းၸဝ်ႈၸွမ်းၼင်ႇတၼ်းၶူဝ်းမၼ်းၸဝ်ႈဢၼ်တတ်ႈၼိုင်ႇလႆႈၼၼ်ႉႁႂ်ႈလႆႈႁဵတ်းဢၼ်ယဵင်ႈၶႅၼ်းယႂ်ႇၼႃႇသေၵႃႈဢၼ်ႁဝ်း

၂၁ ၵျၢမ်ႇပွင်တွင်းပၢၼ်ႇၼၼ်ႉယုၵ်ႉယွင်ႈယႂ်ႇၼႃႇၵႃႈၼႂ်းၸိူဝ်းၸဝ်ႈၵွပ်ႈပိူဝ်ႈၸဝ်ႈယေႇသုၶရိၸ်ႉၵူႈၵမ်ႇၽႃႇသိုပ်ႇသိုပ်ႇတၢမ်ႈတၢမ်ႈသေၵမ်းလူၺ်ႈ။ဢႃႈမိၼ်ႈ။