Shan Missions

လိၵ်ႈဢေႃးဝႃႇတႃ့ဢေးၽႅတ်ႈ

Chapter          ၁          ၂          ၃          ၄           ၅           ၆         

၁

ၵႂၢမ်းတၵ်ႉလၢတ်ႈ

၁ ၵဝ်၊ပေႃးလု၊ဢၼ်ၸွမ်းၼင်ႇဢလူဝ်ႇၽြႃးပဵၼ်ၸဝ်ႈလႄႈပဵၼ်တမၢၼ်ႇၸဝ်ႈယေႇသုၶရိၸ်ႉၼႆႉလႆႈပၼ်ငိၼ်းၵႂႃႇၵႃႈတီႈၵူၼ်းမူတ်းၸၢင်ႇတင်းလၢႆဢၼ်ယူႇၵႃႈၼႂ်းဝဵင်းဢေးၽႅတ်ႈဢၼ်ပဵၼ်ၶဝ်ၸိူဝ်းဢၼ်ယုမ်ႇမၢတ်ႈၸဝ်ႈယေႇသုၶရိၸ်ႉၼၼ်ႉဢေႃႈ။

၂ ႁႂ်ႈသူႉၵျေးၸူးဢိၵ်ႇတင်းတၢင်းၼိမ်ဢၼ်ပဵၼ်မႃးၵႃႈတီႈၸဝ်ႈပေႃႈႁဝ်းၽြႃးပဵၼ်ၸဝ်ႈဢိၵ်ႇတင်းၸဝ်ႈယေႇသုၶရိၸ်ႉၼၼ်ႉမီးၼိူဝ်သူသေၵမ်းလူၺ်ႈ။

တၢင်းလီမင်ႇၵလႃႇၼႂ်းၸဝ်ႈယေႇသု

၃ ႁႂ်ႈၽြႃးပဵၼ်ၸဝ်ႈ၊ပေႃႈၸဝ်ႈယေႇသုၶရိၸ်ႉ၊ဢၼ်

ဢိတ်းလူပၼ်ထမ်ႇမႃႉမင်ႇၵလႃႇၵူႈၸိူဝ်ႉၵူႈပိူင်ၼႂ်းလွင်ႈတၢင်းဢၼ်ၸၢပ်ႈသႅင်ႇၵၼ်တင်းမိူင်းၵၢင်ႁၢဝ်ၼႂ်းၸဝ်ႈၶရိၸ်ႉၼၼ်ႉမီးမင်ႇၵလႃႇသေၵမ်းလူၺ်ႈ။

၄ မၼ်းၸဝ်ႈလိူၵ်ႈၵဵပ်းဢဝ်ႁဝ်းၵႃႈတီႈၼႂ်းၸဝ်ႈၶရိၸ်ႉၸႃႉၸဵမ်မိူဝ်ႈၵမ်ႇၽႃႇၼႆႉယင်းဢမ်ႇပႆႇတႄႇဢမ်ႇပႆႇမီးၼၼ်ႉလႄႈႁႂ်ႈႁဝ်းလႆႈပဵၼ်ၵူၼ်းမူတ်းၸၢင်ႇလႄႈၵၢင်းလွတ်ႈတင်းဢပျႅတ်ႈၵႃႈတီႈၽၢႆႇၼႃႈမၼ်းၸဝ်ႈၵွပ်ႈပိူဝ်ႈမႅတ်ႈတႃႇၸဝ်ႈၼၼ်ႉဢေႃႈ။

၅ ၽြႃးပဵၼ်ၸဝ်ႈလိူၵ်ႈၵဵပ်းၽႄဢဝ်ႁဝ်းႁႂ်ႈလႆႈဢရႃႇလုၵ်ႈၵွပ်ႈပိူဝ်ႈၸဝ်ႈယေႇသုၶရိၸ်ႉၸွမ်းၵႃႈၼင်ႇဢၼ်ၸေႇတၼႃႇၸဝ်ႈမီးဢလူဝ်ႇၼၼ်ႉဢေႃႈ။

၆ ႁဝ်းလႆႈယွင်ႈယေႃးသူႉၵျေးၸူးၸဝ်ႈဢၼ်ဢိတ်းလူပၼ်တီႈႁဝ်းၼႂ်းလုၵ်ႈၸဝ်ႈဢၼ်မၼ်းၸဝ်ႈႁၵ်ႉၼႃႇၼၼ်ႉဢေႃႈ။

၇ ၵႃႈတီႈလုၵ်ႈၸဝ်ႈၼၼ်ႉႁဝ်းလႆႈၶၢမ်ႇၵျေးၸူးတၢင်းဢၼ်ထူတ်ႇၼုၵ်ႉဢဝ်လူၺ်ႈလိူတ်ႈမၼ်းၸဝ်ႈဢၼ်ပဵၼ်တၢင်းဢၼ်ၵၢင်းလွတ်ႈတင်းဢပျႅတ်ႈ

၈ မႅၼ်ႈၼင်ႇၵျေးၸူးၸဝ်ႈဢၼ်မၼ်းၸဝ်ႈႁႂ်ႈပိင်ႇၺႃႇသတိၵူႈၸိူဝ်ႉၵူႈပိူင်ၼမ်ၵိုၼ်းတဵမ်ထူၼ်ႈဝႆႉၵႃႈတီႈႁဝ်းဢေႃႈ။

၉ မၼ်းၸဝ်ႈၼႄပျႃးတီႈႁဝ်းဢလူဝ်ႇမၼ်းၸဝ်ႈဢၼ်လိုၵ်ႉဢၼ်လမ်ႇဢၼ်မီးဝႆႉၵႃႈၼႂ်းႁူဝ်ၸႂ်မၼ်းၸဝ်ႈၼၼ်ႉဢေႃႈ။

၁၀ တၢင်းဢၼ်လိုၵ်ႉဢၼ်လမ်ႇၼၼ်ႉၸမ်းၼႂ်းၶိင်ႇၵႃႇလႃႉဢၼ်ၸေးၸုမ်ႇၼၼ်ႉမၼ်းၸဝ်ႈတၵ်းဢဝ်လွင်ႈတၢင်းဢၼ်မီးၵႃႈၼိူဝ်ၵၢင်ႁၢဝ်ၵႃႈၼိူဝ်လိၼ်မိူင်းတင်းသဵင်ႈတင်းလူင်ၸူႉၵၼ်ပွင်းၵၼ်ၵႃႈတႂ်ႈၸဝ်ႈၶရိၸ်ႉဢေႃႈ။

၁၁ ၵွပ်ႈပိူဝ်ႈမၼ်းၸဝ်ႈလိူၵ်ႈၵဵပ်းၽႄဢဝ်ႁဝ်းဝႆႉၸႃႉၸဵမ်မိူဝ်ႈဢွၼ်ၼႆႉၼၼ်ႉႁဝ်းပဵၼ်ၵေႃႉဢၼ်ၶၢမ်ႇဢမူၺ်ႇၼႂ်းၸဝ်ႈၶရိၸ်ႉၼၼ်ႉဢေႃႈ။ၵႃႈၼင်ႇဢၼ်တၢင်းၵျၢမ်ႇတၢင်းပွင်ဢလူဝ်ႇၸေႇတၼႃႇမၼ်းၸဝ်ႈမီးၼၼ်ႉမၼ်းၸဝ်ႈၸီႇယၢင်ႇႁဵတ်းပဵၼ်တင်းသဵင်ႈတင်းလူင်ဢေႃႈ။

၁၂ လွင်ႈမၼ်းၸမ်းလွင်ႈၼင်ႇႁိုဝ်ႁဝ်းၸိူဝ်းဢၼ်လႆႈမုင်ႈထႃႈမွင်းထႃႈၸဝ်ႈၶရိၸ်ႉၼၼ်ႉတၵ်းလႆႈပဵၼ်လွင်ႈတၢင်းဢၼ်ယွင်ႈယေႃးမူၼ်ၸဝ်ႈဢေႃႈ။

၁၃ ၵႃႈတီႈမၼ်းၸဝ်ႈၼၼ်ႉသူလႆႈထွမ်ႇလႆႈငိၼ်းသမ်ႇမႃႇတြႃးဢၼ်ဝႃႈတြႃးသတၢင်းသိူဝ်းပျေႃႇဢၼ်ၸၢပ်ႈသႅင်ႇၵၼ်တင်းတၢင်းဢၼ်ၵႄႇၶျွတ်ႈဢဝ်ၼႂ်းတၢင်းဢၼ်ယုမ်ႇမၢတ်ႈၸဝ်ႈၶရိၸ်ႉၼၼ်ႉသေယဝ်ႉလႆႈၶၢမ်ႇဢဝ်တၢင်းဢၼ်ဝိၺိၺ်ႇမူတ်းၸၢင်ႇၸဝ်ႈဢၼ်ၸၢပ်ႈသႅင်ႇၵၼ်တင်းၵတိၸဝ်ႈၼၼ်ႉတွၵ်ႇတၼ်းသိၵ်ႈဝႆႉယဝ်ႉ။

၁၄ ဝိၺိၺ်ႇၸဝ်ႈၼၼ်ႉပဵၼ်ၸရၢၼ်ႇဢမူၺ်ႇႁဝ်းတေႃႇထိုင်ႁွတ်ႈၶိင်ႇၵႃႇလႃႉဢၼ်မၼ်းၸဝ်ႈထူတ်ႇဢဝ်ၶဝ်ၸိူဝ်းဢၼ်မၼ်းၸဝ်ႈထိူၵ်ႈပိူင်ႇဢိၵ်ႇတင်းလွင်ႈတၢင်းဢၼ်ယွင်ႈယေႃးမူၼ်ၸဝ်ႈၼၼ်ႉဢေႃႈ။

သူးတွင်းပုၼ်ႈၺၢၼ်ႇပိင်ႇၺႃႇ

၁၅ ပိူဝ်ႈၼႆလႄႈၵဝ်လႆႈငိၼ်းလွင်ႈတၢင်းဢၼ်သူယုမ်ႇမၢတ်ႈၸဝ်ႈယေႇသုဢိၵ်ႇတင်းလွင်ႈတၢင်းဢၼ်သူႁၵ်ႉၵူၼ်းမူတ်းၸၢင်ႇတင်းသဵင်ႈတင်းလူင်ၼၼ်ႉသေယဝ်ႉ

၁၆ ၵဝ်ဢဝ်လွင်ႈသူယွင်ႈယေႃးၵျေးၸူးၸဝ်ႈယူႇသေႇသေႇလႄႈႁဵတ်းတၢင်းဢၼ်သူးတွင်းပထၼႃႇပုၼ်ႈသူယူႇဢေႃႈ။

၁၇ တီႈႁႅင်းဢၼ်ၵဝ်သူးတွင်းၼၼ်ႉၸမ်းႁႂ်ႈပေႃႈၸဝ်ႈဢၼ်မူၼ်ယႂ်ႇလႄႈပဵၼ်ၽြႃးၸဝ်ႈႁဝ်းၸဝ်ႈယေႇသုၶရိၸ်ႉၼၼ်ႉပၼ်ပိင်ႇၺႃႇတင်းၺၢၼ်ႇဢၼ်ၸၢင်ႊၶုတ်းမူင်ႇၸီးၸွင်ႇႁူႉလႆႈၼၼ်ႉတီႈသူႁႂ်ႈသူလႆႈႁူႉၸၵ်းမၼ်းၸဝ်ႈလီလီငၢမ်းငၢမ်း၊ႁႂ်ႈမၢၵ်ႇတႃႁူဝ်ၸႂ်သူသႂ်လႅင်းလီ၊ႁႂ်ႈသူလႆႈႁူႉလွင်ႈတၢင်းဢၼ်တၵ်းလႆႈမုင်ႈထႃႈမွင်းထႃႈ

၁၈ ၼႂ်းတၢင်းဢၼ်မၼ်းၸဝ်ႈႁွင်ႉဢဝ်သူၼၼ်ႉပဵၼ်ၸိူဝ်ႉၼင်ႇႁိုဝ်၊လွင်ႈဢၼ်မူၼ်ၸေးၸိမ်ႇဢမူၺ်ႇၸဝ်ႈဢၼ်ၵူၼ်းမူတ်းၸၢင်ႇတင်းလၢႆလႆႈၶၢမ်ႇဢဝ်ၼၼ်ႉယႂ်ႇၼႃႇၵႃႈႁိုဝ်၊

၁၉ တၼ်းၶူဝ်းၸဝ်ႈဢၼ်ယႂ်ႇလူင်ယႂ်ႇလၢင်ဢၼ်မၼ်းၸဝ်ႈဢဝ်တင်းႁႅင်းဢၼ်ယႂ်ႇၼႃႇၼႄပျႃးတီႈႁဝ်းၸိူဝ်းဢၼ်ယုမ်ႇမၢတ်ႈၼၼ်ႉယႂ်ႇၼႃႇၵႃႈႁိုဝ်ၼၼ်ႉၸိုင်ၵဝ်ႁဵတ်းသူးတွင်းပထၼႃႇဢေႃႈ။

၂၀ တၼ်းၶူဝ်းၸဝ်ႈၼၼ်ႉပဵၼ်မႁႃႇႁႅင်းတၼ်းၶူဝ်းဢႃႇၼူႉၽေႃႇဢၼ်ပွင်ႁဵတ်းၼႂ်းၸဝ်ႈၶရိၸ်ႉၼႂ်းတၢင်းဢၼ်မၼ်းၸဝ်ႈႁႂ်ႈၸဝ်ႈၶရိၸ်ႉလုၵ်ႉသေၵႃႈတၢင်းတၢႆၶိုၼ်းလိပ်းမႃးလႄႈႁႂ်ႈလႆႈယူႇတီႈဢၼ်သုင်မျၢတ်ႈ

၂၁ ၵႃႈတီႈၽၢႆႇၶႂႃမၼ်းၸဝ်ႈၵႃႈၼႂ်းမိူင်းၵၢင်ႁၢဝ်ဢၼ်သုင်မျၢတ်ႈၼႃႇသေၸႃႉၸဵမ်ဢၼ်ထွတ်ႈဢၼ်မျၢတ်ႈဢႃႇၼႃႇတၼ်းၶူဝ်းတၢင်းဢၼ်ဢုပ်ႉပိူင်ႇတင်းသဵင်ႈတင်းလူင်၊ၼႃႇမႃႉၸိုဝ်သဵင်ဢၼ်တၵ်းမီးမႃးၸၢတ်ႈၼႆႉၸၢတ်ႈၼႃႈတင်းသဵင်ႈတင်းလူင်ၼၼ်ႉဢေႃႈ။

၂၂ ၽြႃးပဵၼ်ၸဝ်ႈဢဝ်လွင်ႈတၢင်းၵႃႈမီးတင်းသဵင်ႈတင်းလူင်ၶျႃးဝႆႉၵႃႈတႂ်ႈတိၼ်မၼ်းၸဝ်ႈႁႂ်ႈမၼ်းၸဝ်ႈပဵၼ်ႁူဝ်ဢၼ်ဢုပ်ႉပိူင်ႇလွင်ႈတၢင်းၵႃႈမီးတင်းသဵင်ႈတင်းလူင်ပုၼ်ႈၸိူဝ်းၸဝ်ႈဢေႃႈ။

၂၃ၸိူဝ်းၸဝ်ႈၼၼ်ႉၸမ်း၊ပဵၼ်တူဝ်ၸဝ်ႈၶရိၸ်ႉပဵၼ်တၢင်းဢၼ်ယဝ်ႉတူဝ်လီငၢမ်းၼႂ်းလွင်ႈတၢင်းတင်းသဵင်ႈတင်းလူင်ၼႂ်းမၼ်းၸဝ်ႈဢေႃႈ။