Shan Missions

လိၵ်ႈဢေႃးဝႃႇတႃ့ၵလႃႇတိ

Chapter        ၁          ၂          ၃          ၄          ၅          ၆       

၂

ၸိူဝ်းၸဝ်ႈလႂ်ႁပ်ႉတုင်းဢဝ်ပေႃးလု

၁ ဝၢႆးသေပူၼ်ႉသိပ်းသီႇပီႊယဝ်ႉၸိုင်၊ၵဝ်ႁွင်ႉဢဝ်တိတုလႄႈသမ်ႉၵႂႃႇၵႃႈတီႈဝဵင်းယေႇရုသလႅမ်ႇလူၺ်ႈၵၼ်တင်းပႃႇၼပဢေႃႈ။ၵဝ်ၵႂႃႇၸွမ်းၼင်ႇပျႃႇတိၵ်ႈၸဝ်ႈသေလႄႈႁေႃးမွၵ်ႇလၢတ်ႈတြႃးသတၢင်းသိူဝ်းပျေႃႇဢၼ်ၵဝ်ႁေႃးလၢတ်ႈၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉဢေႃႈ။

၂ ၵဝ်တဵတ်ႇတဵတ်ႇမွၵ်ႇလၢတ်ႈတီႈၶဝ်ၸိူဝ်းဢၼ်ပဵၼ်ၵူၼ်းဢွၼ်ႁူဝ်ၼၼ်ႉၼင်ႇႁိုဝ်လွင်ႈတၢင်းဢၼ်ၵဝ်ပွင်ႁဵတ်းမႃးဢိၵ်ႇတင်းလွင်ႈတၢင်းဢၼ်ၵဝ်တၵ်းပွင်ႁဵတ်းၵမ်းလိုၼ်းၸိူဝ်းၼၼ်ႉတၵ်းဢမ်ႇလႆႈပဵၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉဢေႃႈ။

၃ ၶဝ်ယင်းဢမ်ႇႁဵတ်းပႄႉႁဵတ်းၼႅင်ႇႁႂ်ႈတိတု၊ဢၼ်ပဵၼ်မဵဝ်းၵူၼ်းႁေႇလသဢၼ်ပႃးလူၺ်ႈၵၼ်တင်းၵဝ်ၼၼ်ႉႁႂ်ႈမၼ်းၶၢမ်ႇတၢင်းဢၼ်ထိူဝ်ႁိမ်း။ၵွပ်ႈပိူဝ်ႈၶဝ်ၸိူဝ်းဢၼ်ႁဵတ်းၼင်ႇႁၢင်ႊပဵၼ်ပီႈပဵၼ်ၼွင်ႉႁဝ်းဢၼ်ပိူၼ်ႈဢဝ်တင်းပရိယႄႇသေလႄႈ

၄ သႂၢင်းသႂ်ႇၵႃႈၼႂ်းႁဝ်းၼၼ်ႉမီးတၢင်းၵျၢမ်ႇတၢင်းပွင်ႁႂ်ႈလႆႈလၵ်ႉလွမ်တူၺ်းတၢင်းလွတ်ႈလႅဝ်းႁဝ်းဢၼ်ႁဝ်းလႆႈၸၢမ်ႇၸႃးၵွပ်ႈပိူဝ်ႈၸဝ်ႈယေႇသုၶရိၸ်ႉၼၼ်ႉလႄႈႁဵတ်းႁႂ်ႈႁဝ်းတၵ်းလႆႈပဵၼ်ၶႃႈၼၼ်ႉဢေႃႈ။

၅ ၼင်ႇႁိုဝ်တြႃးသတၢင်းသိူဝ်းပျေႃႇဢၼ်ၸိုဝ်ႈဢၼ်ၸႂ်ႈတၵ်းလႆႈတႄႇယူႇၼႂ်းသူၸိုင်ႁဝ်းဢမ်ႇႁပ်ႉတုင်းဢဝ်တၢင်းဢၼ်ၶဝ်သင်ႇသွၼ်ၼၼ်ႉသေၵႅပ်ႉဢွၼ်ႇၵမ်းဢွၼ်ႇၼိုင်ႈ။

၆ ပုၼ်ႈၶဝ်ၸိူဝ်းဢၼ်ပဵၼ်ၵူၼ်းဢွၼ်ႁူဝ်ၶဝ်ၼၼ်ႉပဵၵ်ႉသမ်ႉၶဝ်ႈပဵၼ်ၵူၼ်းၸိူဝ်ႉႁိုဝ်သေၵေႃႈၶဝ်ႇဢမ်ႇႁဵတ်းႁႂ်ႈၸႂ်ၵဝ်ပႅၵ်ႇပိူင်ႈ။ၽြႃးပဵၼ်ၸဝ်ႈဢမ်ႇတူၺ်းၼႃႈၵူၼ်း။ၶဝ်ၸိူဝ်းၼၼ်ႉဢမ်ႇႁဵတ်းႁႂ်ႈလွင်ႈတၢင်းဢၼ်လၢၵ်ႇပိူင်ႈလိူဝ်တွၼ်းမႃးတီႈၵဝ်။

၇ မၼ်းၸဝ်ႈႁဵတ်းႁႂ်ႈပေႇတရုလႆႈပဵၼ်တမၢၼ်ႇၸဝ်ႈၼႂ်းၶဝ်ၸိူဝ်းဢၼ်ၶၢမ်ႇတၢင်းဢၼ်ထိူဝ်ႁိမ်းၼၼ်ႉလႄႈႁဵတ်းႁႂ်ႈၵဝ်ပဵၼ်တမၢၼ်ႇၸဝ်ႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉဢေႃႈ။

၈ ၸိူဝ်ႉၼင်ႇဢၼ်မၼ်းၸဝ်ႈဢၢပ်ႈပၼ်တြႃးသတၢင်းသိူဝ်းပျေႃႇၵႃႈတီႈပေႇတရုႁႂ်ႈလႆႈပဵၼ်တမၢၼ်ႇၸဝ်ႈၵႃႈၼႂ်းၵူၼ်းဢၼ်ထိူဝ်ႁိမ်းၼၼ်ႉမၼ်းၸဝ်ႈဢၢပ်ႈပၼ်ၵႃႈတီႈၵဝ်ႁႂ်ႈလႆႈပဵၼ်တမၢၼ်ႇၸဝ်ႈၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းဢေႃႈ။

၉ မိူဝ်ႈဢၼ်ၶဝ်ႁူႉၵျေးၸူးဢၼ်ၵဝ်လႆႈၶၢမ်ႇဢဝ်ၼၼ်ႉၸိုင်ယႃႇၵုပ်ႉၵေႇၽတင်းယုဝ်းႁၢၼ်ႇ၊ဢၼ်ပိူၼ်ႈဢိင်ပိူင်ၸိူဝ်းၼၼ်ႉၵေႃႈပၼ်တၢင်းဢၼ်တၢင်ႇမိုဝ်းၶွၼ်ၶႂႃၵႃႈတီႈၵဝ်တင်းပႃႇၼပဢေႃႈ။ၶဝ်လႆႈၸႂ်ဝႃႈႁဝ်းထုၵ်ႇလီၵႂႃႇၸူးၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈၶဝ်ၵေႃႈထုၵ်ႇလီၵႂႃႇၸူးၵႃႈတီႈၶဝ်ၸိူဝ်းဢၼ်ထိူဝ်ႁိမ်းၸိူဝ်းၼၼ်ႉဢေႃႈ။

၁၀ ၶဝ်မီးဢလူဝ်ႇၶႂ်ႈႁႂ်ႈႁဝ်းၶုၵ်းၸႂ်လႆႈၶႆႈၸႂ်ထူပ်းၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉဢေႃႈ။လွင်ႈတၢင်းၼၼ်ႉၸိုင်ၵဝ်မီးတၢင်းဢၼ်ၶႂ်ႈၶတ်းၸႂ်ႁဵတ်းဢေႃႈ။

၁၁ မိူဝ်ႈဢၼ်ပေႇတရုႁွတ်ႈမႃးၵႃႈတီႈဝဵင်းဢၼ်ႇတိဢုၵ်ႉၼၼ်ႉၸိုင်ပိူဝ်ႈဢၼ်မီးလွင်ႈဢၼ်တၵ်းတၢင်ႇဢပျႅတ်ႈၵႃႈတီႈမၼ်းလႄႈၵဝ်လႆႈဝႃႈလႆႈထဵင်ႁႄႉၶႅၼ်မၼ်းဢေႃႈ။

၁၂ လွင်ႈမၼ်းၸမ်းၸူဝ်ႈဢၼ်ၵူၼ်းၵမ်ႈၽွင်ႈဢၼ်လုၵ်ႉသေၵႃႈတီႈယႃႇၵုပ်ႉမႃးၼၼ်ႉဢမ်ႇပႆႇႁွတ်ႈထိုင်မႃးၵႃႈတီႈႁဝ်းၼၼ်ႉၸိုင်မၼ်းၵိၼ်တၢင်းၵိၼ်လူၺ်ႈၵၼ်တင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆယူႇဢေႃႈ။ၵူၺ်းၵႃႈမိူဝ်ႈဢၼ်ၶဝ်ႁွတ်ႈထိုင်မႃးၼၼ်ႉၸိုင်မၼ်းတူၺ်းၼႃႈၶဝ်ၸိူဝ်းဢၼ်ထိူဝ်ႁိမ်းၸိူဝ်းၼၼ်ႉသေယဝ်ႉမၼ်းဢမ်ႇႁတ်းႁဵတ်းၵေႃႉႁဵတ်းသေႈလူၺ်ႈၵၼ်တင်းၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉလႄႈမၼ်းယူႇႁင်းၵူၺ်းမၼ်းသေဢေႃႈ။

၁၃ ၵူၼ်းယုတဢၼ်ၵိုတ်းယူႇၸိူဝ်းၼၼ်ႉၵေႃႈထိမ်ႇမႅပ်းလူၺ်ႈၵၼ်တင်းမၼ်းထၼ်ႈပေႃးႁဵတ်းႁႂ်ႈပႃႇၼပၸွမ်းၵႃႇၽၢႆႇၶဝ်ၵွပ်ႈပိူဝ်ႈတၢင်းဢၼ်ၶဝ်ထိမ်ႇမႅပ်းၼၼ်ႉဢေႃႈ။

၁၄

မိူဝ်ႈဢၼ်ၵဝ်ႁၼ်လွင်ႈဢၼ်ၶဝ်ဢမ်ႇႁဵတ်းသိုဝ်ႈသိုဝ်ႈတေႃႇတေႃႇမႅၼ်ႈၸွမ်းၼင်ႇတြႃးသတၢင်းသိူဝ်းပျေႃႇဢၼ်မၢၼ်ႇဢၼ်မႅၼ်ႈၼၼ်ႉၸိုင်ၵဝ်လၢတ်ႈတီႈပေႇတရုၵႃႈတီႈၽၢႆႇၼႃႈၶဝ်တင်းသဵင်ႈတင်းလူင်လႄႈဝႃႈ၊-

၁၅ ပေႃးမႂ်းပဵၼ်ၵူၼ်းယုတလႄႈယင်းဢမ်ႇၵမ်ဢမ်ႇၵျၢင်ႉၸွမ်းၼင်ႇထုင်းၸၢမ်ႇၵူၼ်းယုတ၊သမ်ႉၵမ်ၵျၢင်ႉၸွမ်းၼင်ႇထုင်းၸၢမ်ႇၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၸိုင်ႁဵတ်းသင်လႄႈမႂ်းႁဵတ်းပႄႉႁဵတ်းၼႅင်ႇႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၵမ်ၵျၢင်ႉၸွမ်းထုင်းၸၢမ်ႇၵူၼ်းယုတ။

ႁဝ်းပဵၼ်ၵူၼ်းယုတၸွမ်းၼင်ႇၸႃႇတိၸိူဝ်ႉၶိူဝ်းဢေႃႈ။ႁဝ်းဢမ်ႇၸႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢပျႅတ်ႈထၢင်ႇသႃးယူႇၼၼ်ႉ။

၁၆ ႁဝ်းႁူႉလွင်ႈဢၼ်ၵူၼ်းဢမ်ႇႁွတ်ႈထိုင်တၢင်းဢၼ်သိုဝ်ႈတေႃႇလႆႈၵွပ်ႈပိူဝ်ႈတၢင်းၵမ်တၢင်းၵျၢင်ႉပိင်းၺၢပ်ႈတြႃးၼၼ်ႉ။ႁွတ်ႈထိုင်တၢင်းဢၼ်သိုဝ်ႈတေႃႇၵွပ်ႈပိူဝ်ႈတၢင်းဢၼ်ယုမ်ႇမၢတ်ႈၸဝ်ႈယေႇသုၶရိၸ်ႉဢေႃႈ။လႆႈႁွတ်ႈထိုင်တၢင်းဢၼ်သိုဝ်ႈတေႃႇၵွပ်ႈပိူဝ်ႈတၢင်းၵမ်တၢင်းၵျၢင်ႉပိင်းၺၢပ်ႈတြႃးဢမ်ႇၸႂ်ႈ။ႁဝ်းလႆႈယုမ်ႇမၢတ်ႈၸဝ်ႈယေႇသုၶရိၸ်ႉႁႂ်ႈလႆႈႁွတ်ႈထိုင်တၢင်းဢၼ်သိုဝ်ႈတေႃႇၵွပ်ႈပိူဝ်ႈတၢင်းဢၼ်ယုမ်ႇမၢတ်ႈၸဝ်ႈၶရိၸ်ႉၼၼ်ႉယဝ်ႉ။လွင်ႈမၼ်းၸမ်းၵွပ်ႈပိူဝ်ႈတၢင်းၵမ်တၢင်းၵျၢင်ႉပိင်းၺၢပ်ႈတြႃးလႄႈၽူႈလႂ်ၵေႃႈဢမ်ႇႁွတ်ႈထိုင်တၢင်းဢၼ်သိုဝ်ႈတေႃႇလႆႈ။

၁၇ ၼႂ်းမိူဝ်ႈဢၼ်ႁဝ်းႁႃႁႂ်ႈလႆႈႁွတ်ႈထိုင်တၢင်းဢၼ်သိုဝ်ႈတေႃႇၼႂ်းၸဝ်ႈၶရိၸ်ႉၼၼ်ႉၸိုင်ႁဝ်းလႆႈႁူႉႁၼ်ဢပျႅတ်ႈထၢင်ႇသႃးမႃးၼႂ်းႁဝ်းၸွင်ႇႁဝ်းတေဝႃႈၸဝ်ႈၶရိၸ်ႉၼၼ်ႉႁဵတ်းႁႂ်ႈဢပျႅတ်ႈၼမ်ၵိုၼ်းမႃးႁိုဝ်။

၁၈ ဢမ်ႇၸႂ်ႈၸိူဝ်ႉၼင်ႇၼၼ်။ပေႃးၵဝ်သမ်ႉၶိုၼ်းတႄႇႁဵတ်းဢၼ်ၵဝ်ၵိူၼ်ႇယႃႉပႅတ်ႈမိူဝ်ႈဢွၼ်ၼၼ်ႉၸိုင်ၵဝ်ပဵၼ်ၵေႃႉဢၼ်ၽိတ်းပိူင်ႈတြႃးဢေႃႈ။

၁၉ လွင်ႈမၼ်းၸမ်းၵွပ်ႈပိူဝ်ႈပိင်းၺၢပ်ႈတြႃးလႄႈၵဝ်တၢႆၵႃႈတီႈၼႂ်းတၢင်းဢၼ်ၸၢပ်ႈသႅင်ႇၵၼ်တင်းပိင်းၺၢပ်ႈတြႃးၼၼ်ႉသေယဝ်ႉၵဝ်တၵ်းလႆႈဢသၢၵ်ႈလိပ်းပုၼ်ႈၽြႃးပဵၼ်ၸဝ်ႈဢေႃႈ။

၂၀ ၵဝ်လႆႈၶၢမ်ႇတၢႆလူၺ်ႈၵၼ်တင်းၸဝ်ႈၶရိၸ်ႉၵႃႈၼိူဝ်သဝ်လၵ်းဝႃးမိုဝ်းၼၼ်ႉယဝ်ႉ။ၵဝ်တၢႆယဝ်ႉ။ၵူၺ်းၵႃႈၸဝ်ႈၶရိၸ်ႉလိပ်းယူႇၵႃႈၼႂ်းၵဝ်ဢေႃႈ။ဢသၢၵ်ႈဢၼ်ၵဝ်လိပ်းၼႂ်းတူဝ်ၶၼ်ႇထႃႇၼႆႉတႄႇယူႇၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလုၵ်ႈၽြႃးပဵၼ်ၸဝ်ႈဢၼ်ႁၵ်ႉၵဝ်လႄႈဢဝ်တူဝ်ၸဝ်ႈၵဝ်ႇၸုၼ်ႉပႅတ်ႈပုၼ်ႈၵဝ်ၼၼ်ႉဢေႃႈ။

၂၁ ၵဝ်ဢမ်ႇပႄႇပႅတ်ႈၵျေးၸူးၽြႃးပဵၼ်ၸဝ်ႈ။ပေႃးဢိင်ပိုင်ႈပိင်းၺၢပ်ႈတြႃးသေလႄႈႁွတ်ႈထိုင်တၢင်းဢၼ်သိုဝ်ႈတေႃႇလႆႈၸိုင်တၢင်းဢၼ်ၸဝ်ႈၶရိၸ်ႉၶၢမ်ႇတၢင်းတၢႆၼၼ်ႉတၵ်းပဵၼ်လၢႆလၢႆဢမ်ႇပွင်ႇလွင်ႈၵႃႈသင်ယဝ်ႉ။