Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၁၂ 

တၢင်းဢၼ်ပၼ်သတိတင်းတၢင်းဢၼ်ပၼ်ႁႅင်း

၁ မိူဝ်ႈၼၼ်ႉပိူဝ်ႈဢၼ်ၵူၼ်းလၢႆႁဵင်လၢႆမိုၼ်ႇၼမ်ၼႃႇၸူႉၵၼ်တုမ်ၵၼ်ထၼ်ႈပေႃးၵေႃႉၼိုင်ႈလႄႈၵေႃႉၼိုင်ႈယဵပ်ႇၵၼ်ၶၢမ်ႈၵၼ်ယူႇၼၼ်ႉၸိုင်မၼ်းၸဝ်ႈလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-ပႄႇပႅတ်ႈၸိူဝ်ႉပႅင်ႈၽႃႇရိသေးတင်းလၢႆဢၼ်ဝႃႈတၢင်းဢၼ်ၸၢင်ႊထိမ်ႇၸၢင်ႊမႅပ်းၼၼ်ႉတႃႉ။

၂ လွင်ႈတၢင်းဢၼ်ႁူမ်ႇဝႆႉယဝ်ႉတင်းသဵင်ႈတင်းလူင်ဢၼ်တၵ်းဢမ်ႇလႆႈၶၢမ်ႇတၢင်းဢၼ်ပိုတ်ႇဢွၵ်ႇၼႄပျႃႉၼၼ်ႉဢမ်ႇမီးသေၸိူဝ်ႉသေပိူင်။လွင်ႈတၢင်းဢၼ်သိူင်ႇဝႆႉလပ်ႉဝႆႉယဝ်ႉတင်းသဵင်ႈတင်းလူင်ဢၼ်တၵ်းဢမ်ႇလႆႈၶၢမ်ႇတၢင်းဢၼ်လႆႈႁူႉလႆႈႁၼ်ၼၼ်ႉဢမ်ႇမီးသေၸိူဝ်ႉသေပိူင်။

၃ ၵႃႈဢၼ်သူလၢတ်ႈၵႃႈၼႂ်းတီႈဢၼ်လပ်းသိင်ႇၼၼ်ႉတၵ်းပဵၼ်တၢင်းဢၼ်လႆႈငိၼ်းၵႃႈၼႂ်းတီႈဢၼ်လႅင်းဢေႃႈ။ၵႃႈဢၼ်သူလၢတ်ႈၵႃႈႁိမ်းႁူၵႃႈတီႈၼႂ်းလုၵ်းတၢင်းၼႂ်းၼၼ်ႉတၵ်းပဵၼ်တၢင်းဢၼ်ႁွင်ႉသႅၼ်ႇၵႃႈၼိူဝ်ၸွမ်ႁိူၼ်းဢေႃႈ။

ၵေႃႉသေႈၵဝ်တင်းလၢႆဢိူၺ်း။

၄ ၵဝ်ဝႃႈတီႈသူၸမ်းယႃႇပေၵူဝ်ၶဝ်ၸိူဝ်းဢၼ်ဢဝ်တူဝ်ၶၼ်ႇထႃႇတၢႆလႆႈၵူၺ်းလႄႈၵမ်းလိုၼ်းဢမ်ႇၸၢင်ႊႁဵတ်းသင်လႆႈၼၼ်ႉ။

၅ တၵ်းလႆႈၵူဝ်ၽူႈလႂ်ဝႃႈၼႆၸမ်းၵူဝ်ၵေႃႉဢၼ်ဢဝ်တူဝ်ၶၼ်ႇထႃႇတၢႆလႄႈၶျႃးတူၵ်းသႂ်ႇၵႃႈၼႂ်းငႃႈရၢႆးၼၼ်ႉတႃႉ။ၵဝ်ဝႃႈတီႈၸိုဝ်ႈတီႈၸႂ်ႈၸမ်း၊ၵူဝ်ၵေႃႉၼၼ်ႉတႃႉ။

၆ ဢဝ်တင်းၵႃႊမၼ်းၶၼ်မၼ်းဢႃႇသရီႉသွင်ၶႅပ်းသိုဝ်ႉဢဝ်ၼူၵ်ႉဢႅၼ်ႇၽႃႉလႆႈႁႃႈတူဝ်ဢမ်ႇၸႂ်ႈႁိုဝ်။ၽြႃးပဵၼ်ၸဝ်ႈဢမ်ႇလိုမ်းပႅတ်ႈၼူၵ်ႉဢႅၼ်ႇၽႃႉၼၼ်ႉသေတူဝ်။

၇ ၶူၼ်ႁူဝ်သူၵေႃႈၼပ်ႉဢၢၼ်ႇဝႆႉတင်းသဵင်ႈယူႇယဝ်ႉ။ပိူဝ်ႈၼႆလႄႈယႃႇပေၵူဝ်။သူယဵင်ႈၶႅၼ်းမျၢတ်ႈၼႃႇသေၼူၵ်ႉဢႅၼ်ႇၽႃႉၼၼ်ႉဢေႃႈ။

၈ ၵဝ်ဝႃႈတီႈသူၸမ်းၽူႈလႂ်သေဢမ်ႇဝႃႈၵေႃႉဢၼ်ႁပ်ႉတုင်းဢဝ်ၵဝ်ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉလုၵ်ႈၵူၼ်းၵေႃႈတၵ်းႁပ်ႉတုင်းဢဝ်ၵေႃႉၼၼ်ႉၵႃႈတီႈၽၢႆႇၼႃႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆဢေႃႈ။

၉ ၽူႈလႂ်သေဢမ်ႇဝႃႈၵေႃႉဢၼ်ထဵင်ပႅတ်ႈၵဝ်ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉၵဝ်တၵ်းထဵင်ပႅတ်ႈၵေႃႉၼၼ်ႉၵႃႈတီႈၽၢႆႇၼႃႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆဢေႃႈ။

၁၀ ၽူႈလႂ်သေဢမ်ႇဝႃႈၵေႃႉဢၼ်ၽိတ်းသူပ်းၽိတ်းၵႂၢမ်းတီႈလုၵ်ႈၵူၼ်းၼၼ်ႉႁွတ်ႈထိုင်တၢင်းဢၼ်ပွႆႇလွတ်ႈဢပျႅတ်ႈလႆႈယူႇဢေႃႈ။ၵူၺ်းၵႃႈၵေႃႉဢၼ်သေႉသွမ်းဝိၺိၺ်ႇမူတ်းၸၢင်ႇၸဝ်ႈၼၼ်ႉတၵ်းဢမ်ႇႁွတ်ႈထိုင်တၢင်းဢၼ်ပွႆႇလွတ်ႈဢပျႅတ်ႈလႆႈ။

၁၁ မိူဝ်ႈဢၼ်ၶဝ်ဢဝ်သူၵႂႃႇသူင်ႇၵႃႈတီႈၸရွပ်ႈႁေႃးတြႃးတင်းလၢႆၵႃႈတီႈၽၢႆႇၼႃႈၵူၼ်းဢၼ်ပဵၼ်ၵႄႇပဵၼ်ႁူဝ်ဢိၵ်ႇတင်းၶုၼ်တင်းလၢႆၼၼ်ႉၸိုင်သူတၵ်းလႆႈၶိုၼ်းလၢတ်ႈၸိူဝ်ႉၼင်ႇႁိုဝ်၊တၵ်းလႆႈၶိုၼ်းလၢတ်ႈၵႃႈသင်ဝႃႈၼႆယႃႇပေမႆႈၸႂ်။

၁၂ လွင်ႈမၼ်းၸမ်းလွင်ႈဢၼ်သူတၵ်းလႆႈလၢတ်ႈၸိူဝ်ႉၼင်ႇႁိုဝ်ဢၼ်ဝႃႈၼၼ်ႉဝိၺိၺ်ႇမူတ်းၸၢင်ႇၸဝ်ႈတၵ်းသင်ႇသွၼ်ပၼ်သူၼႂ်းၶိင်ႇၼႃႇရီႇၼၼ်ႉၵမ်းလဵဝ်ဢေႃႈ၊ဝႃႈၼင်ႇၼႆဢေႃႈ။

ဢူႉပမႃႇသထေးလူင်

၁၃ ၵူၼ်းဢၼ်ပႃးၼႂ်းၵူၼ်းၸူႉၵူၼ်းတုမ်ၸိူဝ်းၼၼ်ႉၵေႃႉၼိုင်ႈလၢတ်ႈလႄႈဝႃႈ၊-သြႃႇၸဝ်ႈ၊ၶႅၼ်းတေႃႈမီးဢမိင်ႉႁႂ်ႈပီႈၸၢႆးၵဝ်ၶႃႈၽႄမႅင်ႇပၼ်ဢမူၺ်ႇဢုၵ်ႉၸႃႇၶူဝ်းလဵင်းတီႈၵဝ်ၶႃႈသေၵမ်းၶႃႈမိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈထၢမ်လႄႈဝႃႈ၊-

၁၄ ၵူၼ်းၵေႃႉၼႆႉဢိူၺ်း၊ၽူႈလႂ်ၶၢၼ်းၵဝ်ဝႆႉႁႂ်ႈလႆႈပဵၼ်ၵေႃႉဢၼ်ၸီႇယၢင်ႇၽႄမႅင်ႇပၼ်ၶူဝ်းလဵင်းတီႈသူ၊ဝႃႈၼင်ႇၼႆဢေႃႈ။လိူဝ်သေၼၼ်ႉမၼ်းၸဝ်ႈလၢတ်ႈတီႈၶဝ်လႄႈဝႃႈ၊-

၁၅ ႁဵတ်းသတိလႄႈဝေႈပႅတ်ႈလွင်ႈတၢင်းဢၼ်ၸႂ်လေႃးၽႃႉပူၼ်ႉလိူဝ်ၸိူဝ်းၼၼ်ႉတႃႉ။လွင်ႈမၼ်းၸမ်းပဵၵ်ႉသမ်ႉမီးၸေးၸိမ်ႇသေၵေႃႈဢသၢၵ်ႈဢမ်ႇတႄႇယူႇၵႃႈၼႂ်းၸေးၸိမ်ႇၼၼ်ႉ၊ဝႃႈၼင်ႇၼႆဢေႃႈ။

၁၆ မၼ်းၸဝ်ႈသမ်ႉၶိုၼ်းလၢတ်ႈၵႂၢမ်းဢူႉပမႃႇထႅင်ႈလႄႈဝႃႈ၊-တီႈသထေးၵေႃႉၼိုင်ႈလိၼ်သူၼ်မၼ်းလီလႄႈမၢၵ်ႇၶဝ်ႈမၢၵ်ႇၼမ်ႉမၼ်းၼမ်ၼႃႇဢေႃႈ။

၁၇ သထေးၵေႃႉၼၼ်ႉဝူၼ်ႉၸႂ်လႄႈဝႃႈ၊-ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်။တီႈဢၼ်တၵ်းသိမ်းဝႆႉမၢၵ်ႇၶဝ်ႈမၢၵ်ႇၼမ်ႉၸိူဝ်းၼၼ်ႉဢမ်ႇမီး၊ဝႃႈၼႆလႄႈမၼ်းမီးတၢင်းၵျၢမ်ႇတၢင်းပွင်လႄႈဝႃႈ၊-

၁၈ ၵဝ်တၵ်းမႄးႁဵတ်းႁိူၼ်းယေးဢၼ်ယဵင်ႈၶႅၼ်းယႂ်ႇၼႃႇသေၼႆႉယဝ်ႉၸင်ႇတၵ်းသိမ်းဢဝ်မၢၵ်ႇၶဝ်ႈမၢၵ်ႇၼမ်ႉဢုၵ်ႉၸႃႇၵဝ်ၵႃႈမီးတင်းသဵင်ႈတင်းလူင်ၸိူဝ်းၼၼ်ႉဝႆႉဢေႃႈ။

၁၉ တီႈဝိၺိၺ်ႇၵဝ်ၵေႃႈၵဝ်တၵ်းလၢတ်ႈလႄႈဝႃႈ၊-ဝိၺိၺ်ႇၵဝ်ဢိူၺ်း၊ပုၼ်ႈဢၼ်မႂ်းတၵ်းသုင်းတိုဝ်းၸၢမ်ႇၸႃးပီႊမိူင်းၼမ်ၼႃႇၸိုင်မႂ်းမီးဢုၵ်ႉၸႃႇၶူဝ်းလဵင်းၸူႉသိမ်းဝႆႉၼမ်ၼႃႇယဝ်ႉ။ယူႇၼိမ်ၼိမ်တႃႉ။ၵိၼ်ၶူပ်းတႃႉ။မူၼ်ႈပျေႃႇသႂၢင်ႇသိူဝ်းတႃႉ၊ဝႃႈၼႆဢေႃႈ။

၂၀ ၵူၺ်းၵႃႈၽြႃးပဵၼ်ၸဝ်ႈသမ်ႉလၢတ်ႈတီႈမၼ်းလႄႈဝႃႈ၊-ၵူၼ်းမိူၵ်ႈဢိူၺ်း၊ၼႂ်းၶိုၼ်းၼႆႉၶိင်ႇဢၼ်တၵ်းလႆႈသိမ်းဢဝ်ဝိၺိၺ်ႇမႂ်းၼၼ်ႉတၵ်းႁွတ်ႈထိုင်မႃးယူႇဢေႃႈ။ပိူဝ်ႈၼႆလႄႈဢုၵ်ႉၸႃႇၶူဝ်းလဵင်းဢၼ်မႂ်းသိမ်းဝႆႉၸိူဝ်းၼၼ်ႉၽူႈလႂ်တၵ်းပိူင်ႇ၊ဝႃႈၼင်ႇၼႆဢေႃႈ။

၂၁ ပိူင်လဵဝ်ၵၼ်ၵေႃႉဢၼ်သိမ်းပႅင်းၽၼ်ႇတႃႇဢုၵ်ႉၸႃႇပုၼ်ႈမၼ်းဝႆႉလႄႈယၢၵ်ႈၽၢၼ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈယူႇၼၼ်ႉၸမ်းမိူၼ်ၸိူဝ်ႉၼင်ႇသထေးၼၼ်ႉယဝ်ႉ၊ဝႃႈၼင်ႇၼႆဢေႃႈ။

ယႃႇပေမႆႈၸႂ်လႅင်ၸႂ်

၂၂ မၼ်းၸဝ်ႈသမ်ႉၶိုၼ်းလၢတ်ႈတီႈတပႄးၸဝ်ႈတင်းလၢႆထႅင်ႈလႄႈဝႃႈ၊-ပိူဝ်ႈၼႆလႄႈၵဝ်ဝႃႈတီႈသူၸမ်းတၵ်းလႆႈၵိၼ်ၸိူဝ်ႉၼင်ႇႁိုဝ်ဝႃႈၼႆပုၼ်ႈဢသၢၵ်ႈလႄႈသင်တၵ်းလႆႈၼုင်ႈၸိူဝ်ႉၼင်ႇႁိုဝ်ဝႃႈၼႆပုၼ်ႈတူဝ်ၵႃႇယႃႉလႄႈသင်၊ယႃႇပေမႆႈၸႂ်။

၂၃ ဢသၢၵ်ႈမျၢတ်ႈသေတၢင်းၵိၼ်ဢမ်ႇၸႂ်ႈႁိုဝ်။တူဝ်ၵႃႇယႃႉမျၢတ်ႈသေတၢင်းၼုင်ႈဢမ်ႇၸႂ်ႈႁိုဝ်။

၂၄ တူၺ်းၵႃလမ်တင်းလၢႆလႄႈၶႆႈၸႂ်ဝူၼ်ႉၸႂ်တႃႉ။ၼူၵ်ႉၸိူဝ်းၼၼ်ႉဢမ်ႇဝၢၼ်ႇဢမ်ႇသွမ်ႈၸိူဝ်ႉၽၼ်း။ဢမ်ႇပၢတ်ႇၶဝ်ႈထိူဝ်ၶဝ်ႈ၊ဢမ်ႇမီးယွင်မီးယေး၊ဢမ်ႇမီးတိူၵ်ႈၽၼ်ႇတႃႇၶူဝ်းလဵင်း။ၼႂ်းဝႃႈၼၼ်သေၵေႃႈၽြႃးပဵၼ်ၸဝ်ႈလဵင်ႉလူၶဝ်ဝႆႉယူႇဢေႃႈ။သူယင်းမျၢတ်ႈၼႃႇသေၼူၵ်ႉၸိူဝ်းၼၼ်ႉဢမ်ႇၸႂ်ႈႁိုဝ်။

၂၅ ၵွပ်ႈပိူဝ်ႈတၢင်းဢၼ်မႆႈၸႂ်ၶီၸႂ်ၼၼ်ႉၼႂ်းသူၼႆႉၽူႈလႂ်တၵ်းႁႂ်ႈၸူဝ်ႈတႃႇဢသၢၵ်ႈတူဝ်ၸဝ်ႈၵဝ်ႇယၢဝ်းမႃးလႆႈထႅင်ႈသေဝၼ်းၼိုင်ႈ။

၂၆ ပေႃးသူဢမ်ႇတတ်ႈၼိုင်ႇလႆႈလွင်ႈတၢင်းဢၼ်လဵၵ်ႉဢၼ်ၼွႆႉသေပိူၼ်ႈၼႆႉၸိုင်ႁဵတ်းႁိုဝ်လႄႈမႆႈၸႂ်ၶီၸႂ်လူၺ်ႈလွင်ႈဢၼ်ၵိုတ်းဢၼ်ၵျၢၼ်ႇတင်းလၢႆၸိူဝ်းၼၼ်ႉ။

၂၇ ၶႆႈၸႂ်တူၺ်းတူၼ်ႈမွၵ်ႇၼၢင်းပၢၼ်းတင်းလၢႆယႂ်ႇမႃးၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇႁိုဝ်ၼၼ်ႉတႃႉ။တူၼ်ႈမွၵ်ႇၸိူဝ်းၼၼ်ႉဢမ်ႇႁဵတ်းတၢင်းႁဵတ်းဢမ်ႇပၼ်ႇဢမ်ႇတေႃး။ၼႂ်းဝႃႈၼၼ်သေၵေႃႈၵဝ်ဝႃႈတီႈသူၸမ်းတၢင်းၼုင်ႈတၢင်းမႆႊၸဝ်ႈမူၼ်ယႂ်ႇၶုၼ်ႁေႃၶမ်းသေႃးလမုၼ်ႇၼၼ်ႉယင်းဢမ်ႇၶိုတ်းတူၼ်ႈမွၵ်ႇၼၼ်ႉသေတူၼ်ႈ။

၂၈ သူၸိူဝ်းဢၼ်ယုမ်ႇမၢတ်ႈၵေႇတင်းလၢႆၼႆႉဢိူၺ်း။ပေႃးၽြႃးပဵၼ်ၸဝ်ႈဢဝ်တၢင်းၼုင်ႈတၢင်းမႆႊႁူမ်ႇလူမ်ႈတူၼ်ႈယိူဝ်ႈတူၼ်ႈယႃႈၵႃႈၼႂ်းထိူၼ်ႇဢၼ်ဢသၢၵ်ႈလိပ်းယူႇဝၼ်းမိူဝ်ႈၼႆႉၵူၺ်းလႄႈဝၼ်းမိူဝ်ႈၽုၵ်ႈလႆႈၶၢမ်ႇတၢင်းဢၼ်ဢဝ်ၶျႃးသႂ်ႇၵႃႈၼႂ်းမုၵ်ႈၽႆးၼၼ်ႉၸိုင်မၼ်းၸဝ်ႈယဵင်ႈၶႅၼ်းတၵ်းဢဝ်တၢင်းၼုင်ႈတၢင်းမႆႊႁူမ်ႇလူမ်ႈသူၼႃႇသေၼၼ်ႉဢမ်ႇၸႂ်ႈႁိုဝ်။

၂၉ ပိူဝ်ႈၼႆလႄႈတၵ်းလႆႈၵိၼ်လႆႈၶူပ်းၸိူဝ်ႉၼင်ႇႁိုဝ်ဝႃႈၼႆယႃႇပေလႅင်ၸႂ်။လွင်ႈတၢင်းဢၼ်မႆႈၸႂ်ၶီၸႂ်ၵေႃႈယႃႇပေႁႂ်ႈမီး။

၃၀ ၵူၼ်းလေႃးၵီႇတင်းလၢႆၸၢင်ႊလႄႇႁႃလွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉယူႇဢေႃႈ။

၃၁ သူၸမ်းႁႃမိူင်းၽြႃးပဵၼ်ၸဝ်ႈတႃႉ။

၃၂ လိုၼ်းၼၼ်ႉမၼ်းၸဝ်ႈတၵ်းပၼ်လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉထႅင်ႈဢေႃႈ။ၽုင်သူဝ်းဢွၼ်ႇၼႆႉဢိူၺ်း၊သူယႃႇပေၵူဝ်။ပေႃႈသူမီးဢလူဝ်ႇၶႂ်ႈပၼ်မိူင်းတီႈသူဢေႃႈ။

၃၃ ဢဝ်ဢုၵ်ႉၸႃႇၶူဝ်းလဵင်းသူၶၢႆသေလႄႈၽေးၸွၼ်းယိုၼ်ႈမႅင်ႇပၼ်တီႈၵူၼ်းဢၼ်ယၢၵ်ႈဢၼ်ၽၢၼ်တင်းလၢႆတႃႉ။ႁဵတ်းထူင်ပႃးဢၼ်ဢမ်ႇၸၢင်ႊၵဝ်ႇၸၢင်ႊမွင်တင်းလၢႆဢၼ်ဝႃႈၽၼ်ႇတႃႇဢၼ်ဢမ်ႇသုတ်းဢမ်ႇသဵင်ႈလႆႈၵႃႈၼိူဝ်မိူင်းၵၢင်ႁၢဝ်တီႈဢၼ်ၽူႈလၵ်ႉဢမ်ႇႁွတ်ႈဢမ်ႇထိုင်ဢမ်ႇမုင်ႈတူၺ်းလႆႈဢမ်ႇလၵ်ႉဢဝ်လႆႈၼၼ်ႉတႃႉ။

၃၄ လွင်ႈမၼ်းၸမ်းႁူဝ်ၸႂ်သူၸၢင်ႊမီးၵႃႈတီႈဢၼ်ၽၼ်ႇတႃႇဢုၵ်ႉၸႃႇသူမီးၼၼ်ႉဢေႃႈ။

တၢင်းဢၼ်ပႂ်ႉထႃႈ

၃၅ သူႁတ်ႉသၢႆဢႅဝ်သူသေလႄႈတႆႈၵွၵ်းၽႆးယူႇတႃႉ။

၃၆ ႁႂ်ႈပဵၼ်ၸိူဝ်ႉၼင်ႇၶႃႈတင်းလၢႆဢၼ်ပႂ်ႉၸဝ်ႈၶဝ်ဢၼ်တၵ်းလုၵ်ႉသေၵႃႈတီႈပွႆးသွင်ႇမင်ႇၵလႃႇၶိုၼ်းမႃးၼၼ်ႉတႃႉ။ပႂ်ႉႁႂ်ႈလႆႈၽုၺ်ႇၽၵ်းတူပၼ်ၵမ်းလဵဝ်မိူဝ်ႈဢၼ်မၼ်းမႃးလႄႈတွႆႇၽၵ်းတူၼၼ်ႉတႃႉ။

၃၇ ၶႃႈၸိူဝ်းဢၼ်ၸဝ်ႈၶဝ်ၶိုၼ်းမႃးလႄႈထူပ်းႁၼ်ၶဝ်ပႂ်ႉယူႇၼၼ်ႉမီးမင်ႇၵလႃႇဢေႃႈ။ၵဝ်ဝႃႈတီႈၸိုဝ်ႈတီႈၸႂ်ႈၸမ်းၸဝ်ႈၼၼ်ႉတၵ်းႁတ်ႉသၢႆဢႅဝ်သေလႄႈႁႂ်ႈၶႃႈၸိူဝ်းၼၼ်ႉၼင်ႈယူႇႁိမ်းတီႈၵိၼ်သေယဝ်ႉတူဝ်မၼ်းတၵ်းမႃးလႄႈႁဵတ်းလဵင်ႉႁဵတ်းလူၶဝ်ဢေႃႈ။

၃၈ ၵၢင်ၶိုၼ်းၶိင်ႇဢၼ်ႁႆႇသွင်မွင်းသေဢမ်ႇဝႃႈ၊ၶိင်ႇဢၼ်ႁႆႇသၢမ်မွင်းသေဢမ်ႇဝႃႈ၊ပေႃးၸဝ်ႈမၼ်းမႃးလႄႈထူပ်းႁၼ်ၸိူဝ်ႉၼင်ႇၼၼ်ၸိုင်ၶႃႈၸိူဝ်းၼၼ်ႉမီးမင်ႇၵလႃႇဢေႃႈ။

၃၉ ပေႃးၸဝ်ႈႁိူၼ်းႁူႉၶိင်ႇၼႃႇရီႇဢၼ်ၽူႈလၵ်ႉတၵ်းမႃးၼၼ်ႉၸိုင်မၼ်းတၵ်းပႂ်ႉယူႇလႄႈဢမ်ႇပၼ်ႁိူၼ်းမၼ်းႁႂ်ႈလႆႈၶၢမ်ႇတၢင်းဢၼ်မုင်ႈတူၺ်းလႄႈလၵ်ႉဢဝ်ၼၼ်ႉဝႃႈၼႆသူႁူႉယူႇဢေႃႈ။

၄၀ ပိူဝ်ႈၼႆလႄႈသူမႄးႁႅၼ်းဝႆႉတႃႉ။လွင်ႈမၼ်းၸမ်းၶိင်ႇၼႃႇရီႇဢၼ်သူဢမ်ႇၽၢင်ႉဢမ်ႇထိူမ်ၼၼ်ႉလုၵ်ႈၵူၼ်းတၵ်းမႃးဢေႃႈ၊ဝႃႈၼင်ႇၼႆဢေႃႈ။

၄၁ ပေႇတရုၵေႃႈလဝ်ႈထၢမ်လႄႈဝႃႈ၊-ၸဝ်ႈႁဝ်း၊ၸဝ်ႈႁဝ်းလၢတ်ႈဢူႉပမႃႇပၼ်တီႈႁဝ်းၶႃႈၶႃႈႁိုဝ်း။လၢတ်ႈပၼ်တီႈၵူၼ်းတင်းသဵင်ႈတင်းလူင်ၶႃႈႁိုဝ်း၊မိူဝ်ႈဢၼ်ဝႃႈၼင်ႇၼႆၸိုင်၊

၄၂ ၸဝ်ႈၽြႃးၵေႃႈလၢတ်ႈလႄႈဝႃႈ၊-ၽၼ်ႇတႃႇၸူဝ်းဢၼ်မီးသႅတ်ႈၸႃႇတင်းသတိဢၼ်ၸဝ်ႈမၼ်းၶၢၼ်းဝႆႉၵႃႈၼိူဝ်ၵူၼ်းႁိူၼ်းၵူၼ်းယေးတင်းလၢႆႁႂ်ႈလႆႈၽႄမႅင်ႇပၼ်တၢင်းၵိၼ်တၢင်းၶူပ်းတီႈၶဝ်ၼႂ်းမိူဝ်ႈဢၼ်ၶိင်ႇထုၵ်ႇၼၼ်ႉၸမ်းပဵၼ်ၽူႈလႂ်။

၄၃ ၶႃႈဢၼ်ၸဝ်ႈမၼ်းၶိုၼ်းမႃးလႄႈထူပ်းႁၼ်မၼ်းႁဵတ်းၸိူဝ်ႉၼင်ႇၼၼ်ယူႇၼၼ်ႉမီးမင်ႇၵလႃႇဢေႃႈ။

၄၄ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၸဝ်ႈမၼ်းတၵ်းၶၢၼ်းၶႃႈၼၼ်ႉႁႂ်ႈလႆႈဢုပ်ႉၵႃႈၼိူဝ်ဢုၵ်ႉၸႃႇၶူဝ်းလဵင်းမၼ်းၵႃႈမီးတင်းသဵင်ႈတင်းလူင်ဢေႃႈ။

၄၅ ပေႃးဢမ်ႇပဵၼ်ၸိူဝ်ႉၼင်ႇၼၼ်လႄႈပေႃးၶႃႈၼၼ်ႉသမ်ႉထၢင်ႇၼႂ်းၸႂ်ဝႃႈ၊-ၸဝ်ႈၵဝ်တၵ်းၼၢၼ်းမႃးယူႇဢိူဝ်ႈ၊ဝႃႈၼင်ႇၼႆလႄႈယႅၼ်ႉထုပ်ႉၶႃႈၼင်ႇၵၼ်ၸဵမ်ယိင်းၸဵမ်ၸၢႆးယူႇ၊ၵိၼ်ၶူပ်းမဝ်းလဝ်ႈယူႇၸိုင်၊

၄၆ ၶိင်ႇၼႃႇရီႇဝၼ်းဢၼ်မၼ်းဢမ်ႇၽၢင်ႉဢမ်ႇထိူမ်ၼၼ်ႉၸဝ်ႈမၼ်းတၵ်းၶိုၼ်းႁွတ်ႈၽႅဝ်မႃးလႄႈတႅပ်းၶႃႈၼၼ်ႉပဵၼ်သွင်ပွတ်းသေယဝ်ႉဢဝ်မၼ်းဝႆႉလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇမီးသႅတ်ႈၸႃႇၸိူဝ်းၼၼ်ႉဢိူဝ်ႈ။

၄၇ ၶႃႈဢၼ်ႁူႉဢလူဝ်ႇၸဝ်ႈမၼ်းယူႇၼၼ်ႉၵေႃႈယင်းဢမ်ႇမႄးဢမ်ႇႁႅၼ်းဝႆႉဢမ်ႇႁဵတ်းၸွမ်းဢလူဝ်ႇၸဝ်ႈမၼ်းၼၼ်ႉတၵ်းလႆႈၶၢမ်ႇတၢမ်ႇၼမ်ၼႃႇဢေႃႈ။

၄၈ ၵေႃႉဢၼ်ဢမ်ႇႁူႉဢလူဝ်ႇၸဝ်ႈမၼ်းလႄႈႁဵတ်းမႅၼ်ႈလွင်ႈတၢင်းဢၼ်ထိူၵ်ႈၶၢမ်ႇတၢမ်ႇၼၼ်ႉၸမ်းတၵ်းလႆႈၶၢမ်ႇတၢမ်ႇၵေႇၵေႇဢေႃႈ။ၽူႈလႂ်သေဢမ်ႇဝႃႈၵေႃႉဢၼ်လႆႈၶၢမ်ႇၵျေးၸူးၼမ်ၼႃႇၼၼ်ႉၵေႃႉၼၼ်ႉတၵ်းလႆႈတႅၼ်းပၼ်ၼမ်ၼမ်ဢေႃႈ။တီႈၽူႈလႂ်သေဢမ်ႇဝႃႈၵေႃႉဢၼ်လႆႈၶၢမ်ႇတၢင်းဢၼ်ဢဝ်ဢုၵ်ႉၸႃႇဢၢပ်ႈဝႆႉၼမ်ၼမ်ၼၼ်ႉတီႈၵေႃႉၼၼ်ႉတၵ်းယွၼ်းဢဝ်ၼမ်ၼမ်ဢေႃႈ။

ႁႂ်ႈၽၢတ်ႇၵၼ်ယၢၼ်ၵၼ်

၄၉ ၵဝ်မႃးႁႂ်ႈလႆႈပွႆႇၽႆးၵႃႈၼိူဝ်လိၼ်မိူင်းဢေႃႈ။ၸူဝ်ႈဢၼႆ်းၼၼ်ႉဢမ်ႇပႆႇၸပ်းၸိုင်ဢလူဝ်ႇၵဝ်ဢမ်ႇပႆႇတဵမ်ထူၼ်ႈ။

၅၀ ပပ်ႉတိၸၢမ်ႇဢၼ်ၼိုင်ႈၵေႃႈၵဝ်မီးလွင်ႈဢၼ်တၵ်းလႆႈၶၢမ်ႇဢေႃႈ။ၸူဝ်ႈဢၼ်ၵဝ်ဢမ်ႇပႆႇလႆႈၶၢမ်ႇပပ်ႉတိၸၢမ်ႇၼၼ်ႉၸိုင်ၵဝ်မီးတၢင်းဢၼ်ၵိတ်ႇၸႂ်ၵႅၼ်းၸႂ်ယူႇဢေႃႈ။

၅၁ သူထၢင်ႇၵဝ်မႃးႁႂ်ႈလႆႈပၼ်တၢင်းၼိမ်ၵႃႈၼိူဝ်လိၼ်မိူင်းၼႆႉႁိုဝ်။ၵဝ်မႃးႁႂ်ႈလႆႈပၼ်ၸိူဝ်ႉၼင်ႇၼၼ်ဢမ်ႇၸႂ်ႈ။ၵဝ်မႃးႁႂ်ႈၵေႃႉၼိုင်ႈလႄႈၵေႃႉၼိုင်ႈၽၢတ်ႇၵၼ်ယၢၼ်ၵၼ်ဢေႃႈ၊ဝႃႈၼင်ႇၼႆဢေႃႈ။

၅၂ လွင်ႈၸိူဝ်ႉၼင်ႇႁိုဝ်ဝႃႈၼႆၸမ်းၸႃႉၸဵမ်တေႃႈလဵဝ်ၼႆႉလႄႈၵူၼ်းႁႃႈၵေႃႉဢၼ်ယူႇၵႃႈၼႂ်းႁိူၼ်းလင်ၼိုင်ႈၼၼ်ႉသွင်ၵေႃႉမုၵ်ႉၼိုင်ႈ၊သၢမ်ၵေႃႉမုၵ်ႉၼိုင်ႈ၊ၵေႃႉၼိုင်ႈလႄႈၵေႃႉၼိုင်ႈတၵ်းၽၢတ်ႇၵၼ်ဢေႃႈ။

၅၃ ပေႃႈတင်းလုၵ်ႈၸၢႆး၊လုၵ်ႈၸၢႆးတင်းပေႃႈ၊မေႈတင်းလုၵ်ႈယိင်းလုၵ်ႈယိင်းတင်းမေႈ၊ဢွၵ်ႇၼၢႆးတင်းလုၵ်ႈပႂ်ႉလုၵ်ႈပႂ်ႉတင်းဢွၵ်ႇၼၢႆးၵေႃႉၼိုင်ႈလႄႈၵေႃႉၼိုင်ႈတၵ်းၽၢတ်ႇၵၼ်ၽႄၵၼ်ဢေႃႈ၊ဝႃႈၼင်ႇၼႆဢေႃႈ။

၅၄ မၼ်းၸဝ်ႈသမ်ႉၶိုၼ်းလၢတ်ႈတီႈၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉထႅင်ႈလႄႈဝႃႈ၊-မိူဝ်ႈဢၼ်သူႁၼ်ၽႃႉၽူၼ်ၶိုၼ်ႈမႃးၵႃႈတီႈၼႃႈၽႃႉတၢင်းဝၼ်းတူၵ်းၸိုင်သူၵေႃႉၼိုင်ႈလႄႈၵေႃႉၼိုင်ႈၸၢင်ႊလၢတ်ႈၵၼ်လႄႈဝႃႈ၊-ၽူၼ်တၵ်းတူၵ်းဢေႃႈ၊ဝႃႈၼင်ႇၼႆဢေႃႈ။ၵႃႈၼင်ႇဢၼ်ဝႃႈၼၼ်ႉၵေႃႈၸၢင်ႊပဵၼ်မႃးဢေႃႈ။

၅၅ မိူဝ်ႈဢၼ်သူႁၼ်လူမ်းၼႃႈတၢင်းၸၢၼ်းထူဝ်းမႃးၼၼ်ႉၸိုင်သူၸၢင်ႊလၢတ်ႈၵၼ်လႄႈဝႃႈ၊-လႅတ်ႇတၵ်းမႆႈၼႃႇလူင်လၢင်ဢေႃႈ၊ဝႃႈၼင်ႇၼႆဢေႃႈ။ၵႃႈၼင်ႇဢၼ်ဝႃႈၼၼ်ႉၵေႃႈၸၢင်ႊပဵၼ်ဢေႃႈ။

၅၆ သူၸိူဝ်းဢၼ်ၸၢင်ႊထိမ်ႇၸၢင်ႊမႅပ်းၼႆႉဢိူၺ်း၊သူၶႆႈၸႂ်ၼႃႈလိၼ်မိူင်းဢိၵ်ႇတင်းၼႃႈၽႃႉၵၢင်ႁၢဝ်လႄႈႁူႉလႆႈဢေႃႈ။ႁဵတ်းၸိူဝ်ႉၼင်ႇႁိုဝ်လႄႈသူၶႆႈၸႂ်လွင်ႈၵၢပ်ႈၵႃႇလႃႉၶိင်ႇတေႃႈလဵဝ်ၼႆႉလႄႈဢမ်ႇႁူႉလႆႈ။

၅၇ လိူဝ်သေၼၼ်ႉသူၶႆႈၸႂ်လူၺ်ႈလွင်ႈတြႃးတၢင်းဢၼ်သိုဝ်ႈတေႃႇလႄႈဢမ်ႇႁူႉလႆႈၵွပ်ႈပိူဝ်ႈၸိူဝ်ႉၼင်ႇႁိုဝ်။

၅၈ မိူဝ်ႈဢၼ်မႂ်းၵႂႃႇၸူးယူႇၵႃႈတီႈၶုၼ်လူင်လူၺ်ႈၵၼ်တင်းၵေႃႉဢၼ်ႁဵတ်းဢမူႉသႂ်ႇတီႈမႂ်းၼၼ်ႉၸိုင်ၵႃႈတီႈၵၢင်တၢင်းၼၼ်ႉၶတ်းၸႂ်ႁဵတ်းႁႂ်ႈဢမူႉၼၼ်ႉယဝ်ႉတူဝ်တႃႉ။ပေႃးဢမ်ႇၼၼ်ၵေႃႉဢၼ်ႁဵတ်းဢမူႉၼၼ်ႉတၵ်းတိုတ်ႉၸၼ်ဢဝ်မႂ်းၵႂႃႇၸူးၵႃႈတီႈၶုၼ်လူင်လႄႈၶုၼ်လူင်ၼၼ်ႉၵေႃႈတၵ်းဢဝ်မႂ်းဢၢပ်ႈပၼ်တီႈၵႄႇဢွၼ်ႇၸၢႆးလႄႈၵႄႇဢွၼ်ႇၸၢႆးၵေႃႈတၵ်းဢဝ်မႂ်းၶင်ဝႆႉၵႃႈၼႂ်းထွင်ႇဢေႃႈ။

၅၉ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၸူဝ်ႈဢၼ်မႂ်းဢမ်ႇပႆႇယေႃႇငိုၼ်းတေႃႇထိုင်ႁွတ်ႈထၼ်ႈပေႃးငိုၼ်းမႂ်းဢမ်ႇၵိုတ်းသေၶႅပ်းၼၼ်ႉမႂ်းဢမ်ႇလႆႈဢွၵ်ႇထွင်ႇ၊ဝႃႈၼင်ႇၼႆဢေႃႈ။