Shan Missions

မၢတ်ႈထႄႇ

Chapter ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၁၇

ႁၢင်ႊၽၢင်ၸဝ်ႈယေႇသုလႅၵ်ႈလၢႆႈ

၁ မိူဝ်ႈဢၼ်ပူၼ်ႉႁူၵ်းဝၼ်းယဝ်ႉၸဝ်ႈယေႇသုႁွင်ႉဢဝ်ပေႇတရု၊ယႃႇၵုပ်ႉ၊တင်းၼွင်ႉၸၢႆးမၼ်းယုဝ်းႁၢၼ်ႇလႄႈၵႂႃႇၵႃႈၼိူဝ်လွႆဢၼ်သုင်ၵႃႈတီႈဢၼ်ပိူၼ်ႈဢမ်ႇမီးၼၼ်ႉဢေႃႈ။ 

၂ ၵႃႈတီႈၽၢႆႇၼႃႈၶဝ်ၼၼ်ႉမၼ်းၸဝ်ႈမီးႁၢင်ႊၽၢင်ဢၼ်လၢၵ်ႇလၢႆးလႄႈၼႃႈမၼ်းၸဝ်ႈၵေႃႈႁိူဝ်ႈလႅင်းမိူၼ်ၸိူဝ်ႉၼင်ႇၵၢင်ဝၼ်းဢေႃႈ။ 

၃ ၶူဝ်းၼုင်ႈမၼ်းၸဝ်ႈၵေႃႈၽိူၵ်ႇၶၢဝ်မိူၼ်ၸိူဝ်ႉၼင်ႇဢၼ်လႅင်းဢေႃႈ။ မုဝ်းသေႇတင်းဢေးလိယၵေႃႈထၢင်ႇသႃးပေႃႇမႃးလႄႈလၢတ်ႈၵႂၢမ်းတေႃႇၵၼ်တင်းမၼ်းၸဝ်ႈဢေႃႈ။ 

၄ မိူဝ်ႈၼၼ်ႉပေႇတရုလဝ်လၢတ်ႈလႄႈဝႃႈ၊-ၸဝ်ႈႁဝ်း၊ၵႃႈတီႈၼႆႉပဵၼ်တီႈဢၼ်လီပုၼ်ႈဢၼ်ႁဝ်းၶႃႈတၵ်းယူႇသဝ်းၶႃႈဢေႃႈ။ ပေႃးၸဝ်ႈႁဝ်းမီးဢလူဝ်ႇၸိုင်ၵဝ်ၶႃႈတၵ်းႁဵတ်းသုမ်ႉသၢမ်လင်ပုၼ်ႈၸဝ်ႈႁဝ်းလင်ၼိုင်ႈပုၼ်ႈမုဝ်းသေႇလင်ၼိုင်ႈပုၼ်ႈဢေးလိယလင်ၼိုင်ႈၶႃႈဢေႃႈ၊ဝႃႈၼင်ႇၼႆဢေႃႈ။ 

၅ ၼႂ်းမိူဝ်ႈဢၼ်မၼ်းယင်းတိုၵ်ႉလဝ်လၢတ်ႈယူႇၸိူဝ်ႉၼင်ႇၼၼ်ယူႇၼၼ်ႉမွၵ်ႇၵုမ်ႈဢၼ်ႁိူဝ်ႈလႅင်းၼၼ်ႉမုင်းႁူမ်ႇၶဝ်လႄႈသဵင်ပဵၼ်မႃးၵႃႈၼႂ်းမွၵ်ႇၵုမ်ႈၼၼ်ႉလႄႈဝႃႈ၊-ၵေႃႉၼႆႉၸမ်းပဵၼ်လုၵ်ႈဢၼ်ၵဝ်ႁၵ်ႉၼႃႇၵေႃႉဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼႃႇဢေႃႈ။ 

၆ ထွမ်ႇဢဝ်ၵႂၢမ်းမၼ်းတႃႉ၊ဝႃႈၼင်ႇၼႆဢေႃႈ။ တပႄးၸဝ်ႈၸိူဝ်းၼၼ်ႉငိၼ်းသေယဝ်ႉလူမ်ႉဢူပ်ႇပူပ်ႇသေလႄႈမီးၸႂ်ဢၼ်ၵူဝ်ႁႄၼႃႇလူင်လၢင်ဢေႃႈ။ 

၇ ၸဝ်ႈယေႇသုမႃးလႄႈဢဝ်မိုဝ်းတိူဝ်ႉၶဝ်လႄႈဝႃႈ၊-လုၵ်ႉတႃႉ။ ယႃႇပေၵူဝ်ပေႁႄ၊ဝႃႈၼင်ႇၼႆဢေႃႈ။ 

၈ မိူဝ်ႈဢၼ်ၶဝ်ႁႅၼ်တူၺ်းၼၼ်ႉလိူဝ်သေၸဝ်ႈယေႇသုပႃးလဵဝ်ၵူၺ်းၶဝ်ဢမ်ႇႁၼ်ၽႂ်သေၵေႃႉသေၵူၼ်း။ 

၉ ၼႂ်းမိူဝ်ႈဢၼ်ၶဝ်လူင်းသေၵႃႈၼိူဝ်လွႆမႃးယူႇၼၼ်ႉၸဝ်ႈယေႇသုသင်ႇလၢတ်ႈတီႈၶဝ်လႄႈဝႃႈ၊-

၁၀ ၸူဝ်ႈဢၼ်လုၵ်ႈၵူၼ်းဢမ်ႇပႆႇလုၵ်ႉသေၵုးတၢင်းတၢႆၶိုၼ်းလိပ်းၼၼ်ႉၸိုင်ယႃႇပလေၢတ်ႈရူႇပႃႇရူင်ႇဢၼ်သူလႆႈႁၼ်ၼႆႉတီႈၽူႈလႂ်သေၵေႃႉသေၵူၼ်း၊ဝႃႈၼင်ႇၼႆဢေႃႈ။ 

၁၁ မိူဝ်ႈၼၼ်ႉတပႄးၸဝ်ႈၸိူဝ်းၼၼ်ႉလဝ်ထၢမ်လႄႈဝႃႈ၊-ဢေးလိယတၵ်းလႆႈမႃးဢွၼ်တၢင်းဝႃႈၼႆႁဵတ်းသင်လႄႈၵူၼ်းထုတ်ႇၵျၢမ်းတင်းလၢႆဝႃႈၸိူဝ်ႉၼႆၶႃႈ၊မိူဝ်ႈဢၼ်ဝႃႈၼင်ႇၼၼ်ၸိုင်၊မၼ်းၸဝ်ႈၵေႃႈၶိုၼ်းလၢတ်ႈတီႈၶဝ်လႄႈဝႃႈ၊-ဢေးလိယတၵ်းလႆႈမႃးလႄႈမႄးႁႅၼ်းဝႆႉတင်းသဵင်ႈတင်းလူင်ဢမၢၼ်ႇၶၼ်ပဵၼ်ဢေႃႈ။ 

၁၂ ၵဝ်ဝႃႈတီႈသူၸမ်းဢေးလိယႁွတ်ႈမႃးယဝ်ႉ။ ၵူၼ်းတင်းလၢႆဢမ်ႇႁူႉၸၵ်းမၼ်းလႄႈႁဵတ်းတီႈမၼ်းၵႃႈၼင်ႇဢၼ်ၶဝ်ၶႂ်ႈႁဵတ်းၼၼ်ႉယဝ်ႉ။ မိူၼ်ၼင်ႇၼၼ်လုၵ်ႈၵူၼ်းၵေႃႈတၵ်းလႆႈၶၢမ်ႇၼႂ်းမိုဝ်းၵူၼ်းတင်းလၢႆဢေႃႈ၊ဝႃႈၼင်ႇၼႆဢေႃႈ။ 

၁၃ ၵမ်းၼၼ်ႉတပႄးၸဝ်ႈၸိူဝ်းၼၼ်ႉႁူႉလွင်ႈဢၼ်မၼ်းၸဝ်ႈလၢတ်ႈလွင်ႈယုဝ်းႁၢၼ်ႇဢၼ်ပၼ်ပပ်ႉတိၸၢမ်ႇၼၼ်ႉဢေႃႈ။ 

လုၵ်ႈဢွၼ်ႇမႃႈမူႁၢႆၶႅၼ်း

၁၄ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈၵူၼ်းၸူႉၵူၼ်းတုမ်ၸိူဝ်းၼၼ်ႉၸိုင်ၵူၼ်းၵေႃႉၼိုင်ႈသုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈၶုပ်ႉၶဝ်ႇလဝ်လၢတ်ႈလႄႈဝႃႈ၊-

၁၅ ၸဝ်ႈႁဝ်း၊ဢိတ်းလူလုၵ်ႈၸၢႆးၵဝ်ၶႃႈသေၵမ်းၶႃႈ။ မၼ်းၸပ်းတၢင်းပဵၼ်မႃႈမူလႄႈလႆႈၶၢမ်ႇၵိၼ်းၼႃႇလူင်လၢင်ၶႃႈဢေႃႈ။ 

၁၆ ၸၢင်ႊလူမ်ႉတူၵ်းၵႃႈၼႂ်းၽႆးၵႃႈၼႂ်းၼမ်ႉၶိူဝ်းၶိူဝ်းယႂ်းယႂ်းၶႃႈဢေႃႈ။ ၵဝ်ၶႃႈဢဝ်မၼ်းမႃးတီႈတပႄးၸဝ်ႈႁဝ်းတင်းလၢႆၵေႃႈၶဝ်ဢမ်ႇႁဵတ်းႁႂ်ႈမၼ်းႁၢႆၶႅၼ်းလႆႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-

၁၇ ၵူၼ်းမဵဝ်းဢၼ်ဢမ်ႇမီးတၢင်းယုမ်ႇမၢတ်ႈလႄႈႁူဝ်ၶႅင်ၼႆႉဢိူၺ်း၊ၵဝ်တၵ်းလႆႈမီးယူႇလူၺ်ႈၵၼ်တင်းသူႁိုင်ၵႃႈႁိုဝ်။ တၵ်းလႆႈယိူၼ်ႉၶၢမ်ႇသူႁိုင်ၵႃႈႁိုဝ်။ 

၁၈ ဢဝ်လုၵ်ႈဢွၼ်ႇၼၼ်ႉမႃးတီႈၵဝ်တႃႉ၊ဝႃႈၼင်ႇၼႆဢေႃႈ။ ၸဝ်ႈယေႇသုသင်ႇသွၼ်သုင်းမလႄႈၽီႁၢႆႉၼၼ်ႉပၢႆႊဢွၵ်ႇၵႂႃႇသေယဝ်ႉလုၵ်ႈဢွၼ်ႇၼၼ်ႉၵေႃႈၶႅၼ်းမႃးၶိင်ႇၼႃႇရီႇၼၼ်ႉၵမ်းလဵဝ်ဢေႃႈ။ 

၁၉ မိူဝ်ႈဢၼ်ပိူၼ်ႈဢမ်ႇမီးၼၼ်ႉတပႄးၸဝ်ႈၸိူဝ်းၼၼ်ႉသုတ်ႉၸပ်းသုတ်ႉၸူးတီႈၸဝ်ႈယေႇသုလႄႈလဝ်လၢတ်ႈဝႃႈ၊-ႁဵတ်ႈသင်လႄႈႁဝ်းၶႃႈဢမ်ႇႁေႃႈၽီႁၢႆႉၼၼ်ႉဢွၵ်ႇပႅတ်ႈလႆႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈလၢတ်ႈလႄႈဝႃႈ၊-

၂၀ ပိူဝ်ႈဢၼ်သူဢမ်ႇမီးတၢင်းယုမ်ႇမၢတ်ႈလႄႈသူဢမ်ႇႁေႃႈဢွၵ်ႇပႅတ်ႈလႆႈ။ ၵဝ်ဝႃႈတီႈၸိုဝ်ႈတီႈၸႂ်ႈၸမ်းပေႃးသူမီးတၢင်းယုမ်ႇမၢတ်ႈဢၼ်ယႂ်ႇတၢၼ်ႇၽၼ်းၽၵ်းၵၢတ်ႇမဵတ်ႉၼိုင်ႈၵူၺ်းၼႆၵေႃႈမိူဝ်ႈဢၼ်သူလၢတ်ႈတီႈလွႆၼႆႉလႄႈဝႃႈ၊-ၶၢႆႉတီႈမႂ်းတႃႉ၊ဝႃႈၼႆၼၼ်ႉမၼ်းတၵ်းၶၢႆႉဢေႃႈ။ 

၂၁ ဢၼ်သူႁဵတ်းလႄႈဢမ်ႇပဵၼ်လႆႈၼၼ်ႉဢမ်ႇမီႈၵႃႈသင်သေၸိူဝ်ႉသေပိူင်။ ၼႂ်းဝႃႈၼၼ်သေၵေႃႈလိူဝ်သေၵွပ်ႈပိူဝ်ႈတၢင်းဢၼ်သူးတွင်းလႄႈၵမ်တၢင်းၵိၼ်ၼၼ်ႉၵူၺ်းမဵဝ်းၼၼ်ႉဢမ်ႇၸၢင်ႊဢွၵ်ႇ၊ဝႃႈၼင်ႇၼႆဢေႃႈ။ 

၂၂ ၼႂ်းမိူဝ်ႈဢၼ်ၶဝ်ယူႇၵႃႈၼႂ်းမိူင်းၵႃႇလိလႄးယူႇၼၼ်ႉၸိုင်ၸဝ်ႈယေႇသုလၢတ်ႈတီႈၶဝ်လႄႈဝႃႈ၊-လုၵ်ႈၵူၼ်းတၵ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းတင်းလၢႆဢေႃႈ။ 

၂၃ ၶဝ်တၵ်းဢဝ်မၼ်းတၢႆဢေႃႈ။ မၼ်းတၵ်းလုၵ်ႉၶိုၼ်းၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉဢေႃႈ၊ဝႃႈၼင်ႇၼႆလႄႈၶဝ်ၼၼ်ႉၸႂ်လဵၵ်ႉၼႃႇလူင်လၢင်ဢေႃႈ။ 

ငိုၼ်းၶွၼ်ႇၵျွင်းၽြႃး

၂၄ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈဝဵင်းၵပိူဝ်ႇၼေႇဢုမ်ႇၼၼ်ႉၸိုင်ၶဝ်ၸိူဝ်းဢၼ်ၵဵပ်းငိုၼ်းၶွၼ်ႇၵျွင်းၽြႃးၼၼ်ႉမႃးတီႈပေႇတရုလႄႈထၢမ်ဝႃႈ၊-သြႃႇမႂ်းဢမ်ႇပၼ်ငိုၼ်းၶွၼ်ႇၵျွင်းၽြႃးဢမ်ႇၸႂ်ႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈလၢတ်ႈလႄႈဝႃႈ၊-

၂၅ ၸႂ်ႈၶႃႈယဝ်ႉ၊ဝႃႈၼင်ႇၼႆဢေႃႈ။ မိူဝ်ႈဢၼ်မၼ်းၶဝ်ႈၵႂႃႇၵႃႈၼႂ်းႁိူၼ်းၸိုင်ၸဝ်ႈယေႇသုလၢတ်ႈလႄႈဝႃႈ၊-သိမုၼ်ႇဢိူၺ်း၊မႂ်းထၢင်ႇၸိူဝ်ႉၼင်ႇႁိုဝ်။ 

၂၆ ၶုၼ်ႁေႃၶမ်းလေႃးၵီႇတင်းလၢႆၵဵပ်းဢဝ်ၶွၼ်ႇတီႈၽူႈလႂ်။ ၵဵပ်းဢဝ်တီႈပိူၼ်ႈႁိုဝ်၊ၵဵပ်းဢဝ်တီႈလုၵ်ႈလၢင်းၶဝ်ႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈလၢတ်ႈလႄႈဝႃႈ၊-ၵဵပ်းဢဝ်တီႈပိူၼ်ႈၶႃႈဢေႃႈ၊ဝႃႈၼင်ႇၼႆဢေႃႈ။ ၸဝ်ႈယေႇသုၵေႃႈလၢတ်ႈတီႈမၼ်းလႄႈဝႃႈ၊-

၂၇ ပေႃးပဵၼ်ၸိူဝ်ႉၼႆၸိုင်လုၵ်ႈလၢင်းၶဝ်လွတ်ႈၶွၼ်ႇဢေႃႈ။ ၼႂ်းဝႃႈၼၼ်သေၵေႃႈလွင်ႈၼင်ႇႁိုဝ်ႁဝ်းတၵ်းဢမ်ႇလႆႈၽိတ်းပိူင်ႈၶဝ်ၸိုင်ၵႂႃႇၵႃႈတီႈၼွင်ပုၼ်ႉသေယဝ်ႉၶျႃးမဵတ်းလႄႈၽုၺ်ႇဢႃႈသူပ်းပႃဢၼ်လႆႈဢွၼ်တၢင်းၼၼ်ႉတႃႉ။ မႂ်းတၵ်းထူပ်းႁၼ်သတႃႇတေႇၶႅပ်းၼိုင်ႈဢေႃႈ။ ဢဝ်ဢၼ်ၼၼ်ႉလႄႈပၼ်တီႈၶဝ်ႁႂ်ႈပဵၼ်ပုၼ်ႈဢၶွၼ်ႇၵဝ်တင်းမႂ်းတႃႉ၊ဝႃႈၼင်ႇၼႆဢေႃႈ။