Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၂၂ 

ယုတဢိသၵႃႇရေႇဢုတ်ႉလႆႈၸႂ်ဢဝ်ၸဝ်ႈယေႇသုဢၢပ်ႈ

၁ မိူဝ်ႈၼၼ်ႉၸမ်းပဵၼ်ၶိင်ႇဢၼ်တၵ်းၶၢမ်ႇပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈဢၼ်လႆႈၸိုဝ်ပွႆးပႃသၶႃႇၼၼ်ႉဢေႃႈ။

၂ ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းလၢႆၵျၢမ်ႇႁႃလွင်ႈဢၼ်တၵ်းလႆႈဢဝ်မၼ်းၸဝ်ႈတၢႆၸိူဝ်ႉၼင်ႇႁိုဝ်ၼၼ်ႉဢေႃႈ။ႁဵတ်းသင်လႄႈၶဝ်ၵျၢမ်ႇႁႃယူႇဝႃႈၼႆၸမ်းၵႂပ်ႈပိူဝ်ႈဢၼ်ၶဝ်ၵူဝ်ၵူၼ်းတင်းလၢႆဢေႃႈ။

၃ မိူဝ်ႈၼၼ်ႉၸႃႇတၢၼ်ႇမႃႇၼၢတ်ႈၶဝ်ႈၵႃႈၼႂ်းယုတဢိသၵႃႇရေႇဢုတ်ႉဢၼ်ပဵၼ်တပႄးၸဝ်ႈပႃးၼိုင်ႈဢၼ်ၶဝ်ႈပႃးၼႂ်းတပႄးၸဝ်ႈသိပ်းသွင်ပႃးၼၼ်ႉဢေႃႈ။

၄ မၼ်းၵႂႃႇၵႃႈတီႈယိတ်ႉပရေႃးႁိၵ်ႈလူင်ဢိၵ်ႇတင်းၵႄႇပိၵ်ႉမၢၼ်ႇၸဝ်ႈတင်းလၢႆသေယဝ်ႉတိူင်ႇပၢင်ႇလၢတ်ႈၸႃၵၼ်လူၺ်ႈလွင်ႈဢၼ်တၵ်းလႆႈဢဝ်ၸဝ်ႈယေႇသုဢၢပ်ႈပၼ်ၶဝ်ၸိူဝ်ႉၼင်ႇႁိုဝ်ၼၼ်ႉဢေႃႈ။

၅ ၶဝ်ၼၼ်ႉၸူမ်းသိူဝ်းလႄႈတၵ်းပၼ်ငိုၼ်းမၼ်း၊ဝႃႈၼႆလႆႈၸႂ်ၵၼ်ဢေႃႈ။

၆ မၼ်းၵေႃႈႁပ်ႉတုင်းဢဝ်ယဝ်ႉၸင်ႇၵျၢမ်ႇႁႃၶိင်ႇၵႃႇလႃႉဢၼ်ထုၵ်ႇတႃႇတေႁႂ်ႈလႆႈဢဝ်မၼ်းၸဝ်ႈဢၢပ်ႈပၼ်တီႈၶဝ်ၼႂ်းၶိင်ႇမိူဝ်ႈဢၼ်ၵူၼ်းၸူႉၵူၼ်းတုမ်လႂ်ဢမ်ႇမီးၼၼ်ႉဢေႃႈ။

ပွႆးပႃသၶႃႇတီႈလိုၼ်းသုတ်း

၇ ဝၼ်းပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈဝၼ်းဢၼ်တၵ်းလႆႈဢဝ်သူဝ်းဢွၼ်ႇပႃသၶႃႇတၢႆၼၼ်ႉႁွတ်ႈထိုင်မႃးယဝ်ႉလႄႈမၼ်းၸဝ်ႈပွႆႇၸႂ်ႉပေႇတရုတင်းယုဝ်းႁၢၼ်ႇၵႂႃႇလႄႈဝႃႈ၊-

၈ သူၵႂႃႇလႄႈမႄးႁႅၼ်းဝႆႉပွႆးပႃသၶႃႇပုၼ်ႈဢၼ်ႁဝ်းတၵ်းၵိၼ်ၼၼ်ႉတႃႉ၊ဝႃႈၼင်ႇၼႆဢေႃႈ။

၉ ၶဝ်ၵေႃႈလဝ်ႈထၢမ်လႄႈဝႃႈ၊-ၸဝ်ႈႁဝ်းမီးဢလူဝ်ႇၶႂ်ႈႁႂ်ႈႁဝ်းၶႃႈမႄးႁႅၼ်းဝႆႉၵႃႈတီႈလႂ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-

၁၀ တူၺ်းလူႊ။မိူဝ်ႈဢၼ်သူၶဝ်ႈၵႂႃႇၵႃႈၼႂ်းဝဵင်းပုၼ်ႉၼၼ်ႉသူတၵ်းထူပ်းႁၼ်ၵူၼ်းၵေႃႉၼိုင်ႈဢၼ်ပႃးမေႃႈၼမ်ႉၼၼ်ႉယူႇဢေႃႈ။

၁၁ ၸွမ်းပႃႈလင်မၼ်းၵႂႃႇလႄႈၶဝ်ႈၵႃႈၼႂ်းႁိူၼ်းဢၼ်မၼ်းၶဝ်ႈၵႂႃႇၼၼ်ႉသေယဝ်ႉလၢတ်ႈတီႈၸဝ်ႈႁိူၼ်းၼၼ်ႉလႄႈဝႃႈ၊-သြႃႇၸဝ်ႈဝႃႈ၊-လုၵ်းၶႅၵ်ႇဢၼ်ၵဝ်ဢိၵ်ႇတင်းတပႄးၵဝ်တင်းလၢႆတၵ်းလႆႈၵိၼ်ပွႆးပႃသၶႃႇၼၼ်ႉမီးၵႃႈတီႈလႂ်၊ဝႃႈၼင်ႇၼႆတႃႉ။

၁၂ ၵေႃႉၼၼ်ႉတၵ်းၼႄပၼ်လုၵ်းလူင်ႁၢၼ်ႉၼိူဝ်ဢၼ်မႄးႁႅၼ်းဝႆႉယဝ်ႉၼၼ်ႉဢေႃႈ။မႄးႁႅၼ်းဝႆႉၵႃႈတီႈၼၼ်ႉတႃႉ၊ဝႃႈၼင်ႇၼႆဢေႃႈ။

၁၃ တပႄးၸဝ်ႈၸိူဝ်းၼၼ်ႉၵေႃႈၵႂႃႇသေယဝ်ႉထူပ်းႁၼ်ၸိူဝ်ႉၼင်ႇဢၼ်မၼ်းၸဝ်ႈသင်ႇလၢတ်ႈဝႆႉၼၼ်ႉလႄႈမေႈႁႅၼ်းပွႆးပႃသၶႃႇဝႆႉဢေႃႈ။

၁၄ မိူဝ်ႈဢၼ်ႁွတ်ႈထိုင်ၶိင်ႇၵိၼ်ၼၼ်ႉမၼ်းၸဝ်ႈၼင်ႈယူႇလူၺ်ႈၵၼ်တင်းတမၢၼ်ႇၸဝ်ႈသိပ်းသွင်ပႃးၸိူဝ်းၼၼ်ႉလႄႈလၢတ်ႈဝႃႈ၊-

၁၅ ၸူဝ်ႈဢၼ်ၵဝ်ဢမ်ႇပႆႇလႆႈၶၢမ်ႇတၢင်းတၢႆၼၼ်ႉၸိုင်ၵဝ်မီးဢလူဝ်ႇၶႂ်ႈၵိၼ်ပွႆးပႃသၶႃႇၼႆႉလူၺ်ႈၵၼ်တင်းသူၼႃႇလူင်လၢင်ဢေႃႈ။

၁၆ ၵဝ်ဝႃႈတီႈသူၸမ်းၸူဝ်ႈဢၼ်ပွႆးပႃသၶႃႇၼႆႉဢမ်ႇပႆႇယဝ်ႉတူဝ်ၼႂ်းမိူင်းၽြႃးပဵၼ်ၸဝ်ႈၼၼ်ႉၵဝ်တၵ်းဢမ်ႇၵိၼ်ထႅင်ႈဝႃႈၼင်ႇၼႆသေယဝ်ႉဢဝ်ၵွၵ်းၼမ်ႉၸပိတ်ႉလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇလၢတ်ႈလႄႈဝႃႈ၊-

၁၇ ၵေႃႉၼိုင်ႈလႄႈၵေႃႉၼိုင်ႈဢဝ်ၵွၵ်းၼႆႉယိုၼ်ႈပၼ်ၵၼ်တႃႉ။

၁၈ ၵဝ်ဝႃႈတီႈသူၸမ်းၸႃႉၸဵမ်တေႃႈလဵဝ်ၼႆႉတေႃႇထိုင်ႁွတ်ႈၸူဝ်ႈဢၼ်မိူင်းၽြႃးပဵၼ်ၸဝ်ႈဢမ်ႇပႆႇႁွတ်ႈပႆႇထိုင်ၼၼ်ႉၵဝ်တၵ်းဢမ်ႇၵိၼ်ၼမ်ႉၸပိတ်ႉၼႆႉထႅင်ႈဝႃႈၼင်ႇၼႆဢေႃႈ။

၁၉ လိုၼ်းၼၼ်ႉမၼ်းၸဝ်ႈဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇမိတ်းၶဝ်ႈမုၼ်းၼၼ်ႉလႄႈလၢတ်ႈတီႈၶဝ်လႄႈဝႃႈ၊-ၶဝ်ႈမုၼ်းၼႆႉၸမ်းပဵၼ်တူဝ်ၵဝ်ဢၼ်ၸုၼ်ႉပႅတ်ႈပုၼ်ႈသူၼၼ်ႉဢေႃႈ။ပုၼ်ႈဢၼ်တၵ်းလႆႈၶုၵ်းၸႂ်လႆႈၶႆႈၸႂ်ထူပ်းၵဝ်ၸိုင်ဢွၼ်ၵၼ်ၵိၼ်တႃႉ၊ဝႃႈၼင်ႇၼႆဢေႃႈ။

၂၀ ပိူင်လဵဝ်ၵၼ်ၵိၼ်ၶဝ်ႈၶမ်ႈသေယဝ်ႉၵွၵ်းၼမ်ႉၸပိတ်ႉၵေႃႈမၼ်းၸဝ်ႈဢဝ်လႄႈလၢတ်ႈဝႃႈ၊-ၵွၵ်းၼႆႉၸမ်းပဵၼ်ပတိၺိၺ်ႇတြႃးဢၼ်မႂ်ႇဢၼ်တႄႇယူႇၼႂ်းလိူတ်ႈၵဝ်ဢၼ်သွၼ်းလေႃႇပုၼ်ႈသူၼၼ်ႉဢေႃႈ။

၂၁ ၼႂ်းဝႃႈၼၼ်သေၵေႃႈတူၺ်းလူႊမိုဝ်းၵေႃႉဢၼ်တၵ်းဢဝ်ၵဝ်ဢၢပ်ႈၼၼ်ႉမီးယူႇလူၺ်ႈၵၼ်တင်းၵဝ်ၵႃႈၼိူဝ်ၽိူၼ်တီႈၵိၼ်ၼႆႉဢေႃႈ။

၂၂ လုၵ်ႈၵူၼ်းတၵ်းလႆႈၵႂႃႇၵႃႈၼင်ႇဢၼ်မၼ်းၸဝ်ႈမၵ်းၶၢၼ်းဝႆႉၼၼ်ႉဢေႃႈ။ၼႂ်းဝႃႈၼၼ်သေၵေႃႈၵေႃႉဢၼ်ဢဝ်လုၵ်ႈၵူၼ်းဢၢပ်ႈၼၼ်ႉမီးဢႃႉမင်ႇၵလႃႇဢေႃႈ၊ဝႃႈၼင်ႇၼႆဢေႃႈ။

၂၃ ၶဝ်ၵေႃႈၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လွင်ႈဢၼ်ဝႃႈၼႂ်းၶဝ်ၼၼ်ႉပဵၼ်ၽူႈလႂ်ဢၼ်တၵ်းႁဵတ်းလွင်ႈတီႈႁႅင်းၼႆႉၼၼ်ႉဢေႃႈ။

၂၄ လိူဝ်သေၼၼ်ႉၵွပ်ႈပိူဝ်ႈဢၼ်ၶဝ်ၵေႃႉၼိုင်ႈလႄႈၵေႃႉၼိုင်ႈမီးတၢင်းဢၼ်လၢတ်ႈၵၼ်ထဵင်ၵၼ်လူၺ်ႈလွင်ႈဢၼ်ဝႃႈၼႂ်းၶဝ်ၼၼ်ႉၽူႈလႂ်တၵ်းပဵၼ်ၵေႃႉဢၼ်ယဵင်ႈၶႅၼ်းယႂ်ႇမျၢတ်ႈၼႃႇသေပိူၼ်ႈၼၼ်ႉၸိုင်မၼ်းၸဝ်ႈလၢတ်ႈလႄႈဝႃႈ၊-

၂၅ ၶုၼ်ႁေႃၶမ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉဢုပ်ႉပိူင်ႇၶဝ်ဢေႃႈ။ၶဝ်ၸိူဝ်းဢၼ်ဝႆႉဢႃႇၼႃႇတင်းလၢႆၼၼ်ႉၵေႃႈၶဝ်ဝႃႈၶဝ်ပဵၼ်ၸဝ်ႈၵျေးၸူးဢေႃႈ။သူၸမ်းဢမ်ႇလႆႈႁဵတ်းၸိူဝ်ႉၼင်ႇၼၼ်။

၂၆ ၼႂ်းသူၼႆႉႁႂ်ႈၵေႃႉဢၼ်ႁဵတ်းၵူၼ်းယႂ်ႇၼိူဝ်ပိူၼ်ႈၼၼ်ႉပဵၼ်ၸိူဝ်ႉၼင်ႇၵူၼ်းဢွၼ်ႇတႃႉ။ၵေႃႉဢၼ်ဢုပ်ႉပိူင်ႇၵေႃႈႁႂ်ႈပဵၼ်ၸိူဝ်ႉၼင်ႇၵူၼ်းၸႂ်ႉၵူၼ်းသွႆတႃႉ။

၂၇ ၽူႈလႂ်ယဵင်ႈၶႅၼ်းယႂ်ႇမျၢတ်ႈၼႃႇသေပိူၼ်ႈ။ၵေႃႉဢၼ်ၼင်ႈယူႇၵႃႈတီႈႁိမ်းၽိူၼ်တီႈၵိၼ်ၼၼ်ႉယႂ်ႇမျၢတ်ႈႁိုဝ်။ၵေႃႉဢၼ်ႁဵတ်းလဵင်ႉႁဵတ်းလူၼၼ်ႉယႂ်ႇမျၢတ်ႈႁိုဝ်။ၵေႃႉဢၼ်ၼင်ႈယူႇၵႃႈႁိမ်းၽိူၼ်တီႈၵိၼ်ၼၼ်ႉယႂ်ႇမျၢတ်ႈဢမ်ႇၸႂ်ႈႁိုဝ်။ၼႂ်းဝႃႈၼၼ်သေၵေႃႈၵဝ်ပဵၼ်ၸိူဝ်ႉၼင်ႇၵေႃႉဢၼ်ႁဵတ်းလဵင်ႉႁဵတ်းလူၼၼ်ႉၵႃႈတီႈၼႂ်းသူၼႆႉဢေႃႈ။

၂၈ သူပဵၼ်ၵေႃႉဢၼ်ႁူမ်ႈလူၺ်ႈၵၼ်တင်းၵဝ်ယူႇၼႂ်းမိူဝ်ႈဢၼ်ၵဝ်လႆႈၶၢမ်ႇတၢင်းဢၼ်ၸၢမ်းတူၺ်းယႃႉယူၵ်ႈၼၼ်ႉဢေႃႈ။

၂၉ ၸိူဝ်ႉၼင်ႇဢၼ်ၸဝ်ႈပေႃႈၵဝ်ပၼ်မိူင်းတီႈၵဝ်ၼၼ်ႉၵဝ်တၵ်းပၼ်ဢၶႂၢင်ႉတီႈသူဢၼ်သူတၵ်းလႆႈၵိၼ်ၵႃႈတီႈၽိူၼ်တီႈၵိၼ်ၵဝ်ၼႂ်းမိူင်းၵဝ်

၃၀ ဢိၵ်ႇတင်းဢၶႂၢင်ႉဢၼ်တၵ်းလႆႈၼင်ႈၵႃႈၼိူဝ်ပလၢင်ႇတြႃးသေလႄႈၸီႇယၢင်ႇၵူၼ်းဢိသရေႇလသိပ်းသွင်မဵဝ်းၼၼ်ႉဢေႃႈ။

၃၁ သိမုၼ်ႇဢိူၺ်း၊သိမုၼ်ႇဢိူၺ်း။ပိူဝ်ႈဢၼ်ၸႃႇတၢၼ်ႇမႃႇၼၢတ်ႈယွၼ်းဢၶႂၢင်ႉႁႂ်ႈလႆႈၶိုင်သူတူၵ်းၸိူဝ်ႉၼင်ႇဢၼ်ၶိုင်သၢၼ်ၶဝ်ႈၵျုင်ႇတူၵ်းၼၼ်ႉလႄႈၼင်ႇႁိုဝ်တၢင်းယုမ်ႇမၢတ်ႈမႂ်းတၵ်းဢမ်ႇလူႉၸိုင်ၵဝ်သူးတွင်းပုၼ်ႈမႂ်းယဝ်ႉ။

၃၂ မိူဝ်ႈဢၼ်မႂ်းၶိုၼ်းလႆႈသတိၼၼ်ႉႁႂ်ႈပီႈၼွင်ႉမႂ်းတင်းလၢႆမၼ်ႈၶိူင်ႇတႃႉ၊မိူဝ်ႈဢၼ်မၼ်းၸဝ်ႈဝႃႈၼင်ႇၼႆၸိုင်မၼ်းၵေႃႈလဝ်ႈလၢတ်ႈလႄႈဝႃႈ၊-

၃၃ ၸဝ်ႈႁဝ်း။ၵဝ်ၶႃႈၼႆႉၼင်ႇႁိုဝ်တၵ်းလႆႈၸွမ်းလူၺ်ႈၵၼ်တင်းၸဝ်ႈႁဝ်းၵႂႃႇၵႃႈတီႈထွင်ႇလႂ်ၵႃႈတီႈတၢင်းဢၼ်ဢဝ်တၢႆလႂ်ၼၼ်ႉၵေႃႈတၼ်းဝႆႉယူႇၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈလၢတ်ႈလႄႈဝႃႈ၊-

၃၄ ပေႇတရုဢိူၺ်း၊ၵဝ်ဝႃႈတီႈမႂ်းၸမ်းၼႂ်းဝၼ်းမိူဝ်ႈၼႆႉၸူဝ်ႈဢၼ်ၵႆႇဢမ်ႇပႆႇၶၼ်ၼၼ်ႉမႂ်းတၵ်းတွပ်ႇထဵင်ဝႃႈမႂ်းဢမ်ႇႁူႉၸၵ်းၵဝ်၊ဝႃႈၼႆထူၼ်ႈထိုင်သၢမ်ပွၵ်ႈဢေႃႈ၊ဝႃႈၼင်ႇၼႆဢေႃႈ။

၃၅ မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊-မိူဝ်ႈဢွၼ်တၢင်းမိူဝ်ႈဢၼ်ၵဝ်ပွႆႇၸႂ်ႉသူၵႂႃႇၼၼ်ႉယင်းဢမ်ႇလႆႈပႃးထူင်ငိုၼ်း၊ထူင်ပႃး၊ၶႅပ်းတိၼ်လႄႈၵႂႃႇၼၼ်ႉၸိုင်ၸွင်ႇသူလူဝ်ႇထႅင်ႈသေၸိူဝ်ႉသေပိူင်ႁိုဝ်၊မိူဝ်ႈဢၼ်ထၢမ်ဝႃႈၼင်ႇၼႆၸိုင်ၶဝ်ၵေႃႈလၢတ်ႈလႄႈဝႃႈ၊-ဢမ်ႇလူဝ်ႇသေၸိူဝ်ႉသေပိူင်ၶႃႈ၊ဝႃႈၼင်ႇၼႆသေယဝ်ႉ၊မၼ်းၸဝ်ႈၵေႃႈလၢတ်ႈလႄႈဝႃႈ၊-

၃၆ တေႃႈလဵဝ်ၼႆႉၸမ်းႁႂ်ႈၵေႃႉဢၼ်မီးထူင်ငိုၼ်းၼၼ်ႉပႃးဢဝ်သေၵမ်းလူၺ်ႈ။ႁႂ်ႈၵေႃႉဢၼ်မီးထူင်ပႃးၼၼ်ႉပႃးဢဝ်သေၵမ်းလူၺ်ႈ။ႁႂ်ႈၵေႃႉဢၼ်ဢမ်ႇမီးလၢပ်ႇၼၼ်ႉၶၢႆၶူဝ်းၼုင်ႈတၢင်းမႆႊမၼ်းသေလႄႈသိုဝ်ႉဢဝ်သေၵမ်းလူၺ်ႈ။

၃၇ လွင်ႈမၼ်းၸမ်းတီႈၼႂ်းၵျၢမ်းလိၵ်ႈမီးဝႆႉဢၼ်ဝႃႈ၊-ၵေႃႉၼၼ်ႉလႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇတြႃးၼၼ်ႉဢေႃႈ၊ဝႃႈၼင်ႇၼႆၼၼ်ႉတၵ်းလႆႈတဵမ်ထူၼ်ႈၵႃႈတီႈၵဝ်တေႃႈလဵဝ်ၼႆႉဢေႃႈ။လွင်ႈတၢင်းဢၼ်ၸၢပ်ႈသႅင်ႇၵၼ်တင်းၵဝ်ၸိုင်ႁွတ်ႈထိုင်တၢင်းဢၼ်ယဝ်ႉတူဝ်ယဝ်ႉဢေႃႈ၊ဝႃႈၼင်ႇၼႆဢေႃႈ။

၃၈ ၶဝ်ၼၼ်ႉၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းတူၺ်းသေၵမ်းၶႃႈ။မီးလၢပ်ႇသွင်မၢၵ်ႈၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-ပေႃးယဝ်ႉ၊ဝႃႈၼင်ႇၼႆဢေႃႈ။

ၸဝ်ႈယေႇသုသူးတွင်းၼိူဝ်လွႆသၼ်ႇလုၼ်ႇ

၃၉ လိုၼ်းၼၼ်ႉမၼ်းၸဝ်ႈဢွၵ်ႇသေယဝ်ႉၵႂႃႇၸူးၵႃႈတီႈလွႆသၼ်ႇလုၼ်ႇၵႃႈၼင်ႇဢၼ်မၼ်းၸဝ်ႈယၢမ်ႈၵႂႃႇၼၼ်ႉလႄႈတပႄးၸဝ်ႈတင်းလၢႆၵေႃႈၸွမ်းပႃႈလင်မၼ်းၸဝ်ႈၵႂႃႇဢေႃႈ။

၄၀ မၼ်းၸဝ်ႈႁွတ်ႈထိုင်ၵႃႈတီႈၼၼ်ႉသေယဝ်ႉလၢတ်ႈလႄႈဝႃႈ၊-ၼင်ႇႁိုဝ်သူတၵ်းဢမ်ႇလႆႈၶၢမ်ႇတၢင်းဢၼ်ၸၢမ်းတူၺ်းယႃႉယူၵ်ႉၸိုင်ဢွၼ်ၵၼ်သူးတွင်းတႃႉ၊ဝႃႈၼင်ႇၼႆယဝ်ႉၸင်ႇ

၄၁ ၽၢတ်ႇယၢၼ်ၵၼ်တင်းၶဝ်ၵႂႃႇၵႆဢိတ်းၼိုင်ႈသေယဝ်ႉၶုပ်ႉၶဝ်ႇလႄႈသူးတွင်းလႄႈဝႃႈ၊-

၄၂ ဢူဝ်းပေႃႈ၊ပေႃးဢလူဝ်ႇၸဝ်ႈႁဝ်းမီးၸိုင်ႁႂ်ႈၵွၵ်းၼႆႉပိူင်ႈသေၵဝ်ၶႃႈသေၵမ်းၶႃႈ။ၼႂ်းဝႃႈၼၼ်သေၵေႃႈယႃႇပေႁႂ်ႈလႆႈပဵၼ်ၸွမ်းဢလူဝ်ႇၵဝ်ၶႃႈ။ႁႂ်ႈပဵၼ်ၸွမ်းၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။

၄၃ မိူဝ်ႈၼၼ်ႉတမၢၼ်ႇၵၢင်ႁၢဝ်ပေႃႇမႃးလႄႈပၼ်ႁႅင်းတီႈမၼ်းၸဝ်ႈဢေႃႈ။မၼ်းၸဝ်ႈၶၢမ်ႇဝူၺ်ႇတၼႃႇၼမ်ၼႃႇလူင်လၢင်သေလႄႈယဵင်ႈၶႅၼ်းၶတ်းၸႂ်သူးတွင်းယူႇဢေႃႈ။

၄၄ ႁိူဝ်ႇမၼ်းၸဝ်ႈဢၼ်ဢွၵ်ႇၼၼ်ႉၸမ်းပဵၼ်ၸိူဝ်ႉၼင်ႇယွတ်ႇလိူတ်ႈလူင်ဢၼ်တူၵ်းၵႃႈၼိူဝ်လိၼ်ၼၼ်ႉဢေႃႈ။

၄၅ သူးတွင်းၸိူဝ်ႉၼင်ႇၼၼ်ယဝ်ႉၸင်ႇမၼ်းၸဝ်ႈလုၵ်ႉသေလႄႈမိူဝ်ႈဢၼ်ၶိုၼ်းမႃးၸူးၵႃႈတီႈဢၼ်တပႄးၸဝ်ႈတင်းလၢႆမီးၼၼ်ႉၸိုင်လႆႈထူပ်းႁၼ်ၶဝ်ၼွၼ်းလပ်းယူႇၵွပ်ႈပိူဝ်ႈဢၼ်ၶဝ်မီးတၢင်းဢၼ်ၸႂ်လဵၵ်ႉၸႂ်ဢူၼ်ႈၼႃႇၼၼ်ႉဢေႃႈ။

၄၆ မၼ်းၸဝ်ႈၵေႃႈလၢတ်ႈတီႈၶဝ်လႄႈဝႃႈ၊-ႁဵတ်းႁိုဝ်လႄႈသူၼွၼ်းလပ်းယူႇ။ၼင်ႇႁိုဝ်တၵ်းဢမ်ႇလႆႈၶၢမ်ႇတၢင်းဢၼ်ၸၢမ်းတူၺ်းယႃႉယူၵ်ႉၸိုင်လုၵ်ႉလႄႈဢွၼ်ၵၼ်သူးတွင်းတႃႉ၊ဝႃႈၼင်ႇၼႆဢေႃႈ။

ၸဝ်ႈယေႇသုၶၢမ်ႇတၢင်းဢၼ်တီႉဢဝ်

၄၇ ၼႂ်းမိူဝ်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼႆယူႇၼၼ်ႉၸိုင်ယုတဢိသၵႃႇရေႇဢုတ်ႉဢၼ်ၶဝ်ႈပႃးၼႂ်းတပႄးၸဝ်ႈသိပ်းသွင်ပႃးၼၼ်ႉဢွၼ်ႁူဝ်ၵူၼ်းၸူႉၵူၼ်းတုမ်ၼမ်ၼႃႇမႃးလႄႈသုတ်ႉၸပ်းသုတ်ႉၸူးတီႈၸဝ်ႈယေႇသုသေယဝ်ႉႁႂ်ႈလႆႈၼူမ်မၼ်းၸဝ်ႈဢေႃႈ။

၄၈ ၸဝ်ႈယေႇသုၵေႃႈထၢမ်လႄႈဝႃႈ၊-ယုတဢိူၺ်း၊မႂ်းႁဵတ်းတၢင်းဢၼ်ၼူမ်သေလႄႈဢဝ်လုၵ်ႈၵူၼ်းဢၢပ်ႈႁိုဝ်၊ဝႃႈၼင်ႇၼႆဢေႃႈ။

၄၉ ၶဝ်ၸိူဝ်းဢၼ်ပႃးလူၺ်ႈၵၼ်တင်းမၼ်းၸဝ်ႈၸိူဝ်းၼၼ်ႉႁၼ်လွင်ႈတၢင်းဢၼ်တၵ်းပဵၼ်မႃးၼၼ်ႉသေယဝ်ႉလဝ်ႈထၢမ်လႄႈဝႃႈ၊-

၅၀ ၸဝ်ႈႁဝ်းႁဝ်းၶႃႈတၵ်းလႆႈဢဝ်လၢပ်ႇၽၼ်းၶႃႈႁိုဝ်၊ဝႃႈၼင်ႇၼႆသေယဝ်ႉၵေႃႉၼိုင်ႈၽၼ်းၶႃႈယိတ်ႉပရေႃးႁိၵ်ႈလူင်လႄႈဝၢၼ်ႁူမၼ်းၽၢႆႇၶႂႃၶၢတ်ႇတူၵ်းၵႂႃႇဢေႃႈ။

၅၁ ၸဝ်ႈယေႇသုၵေႃႈလၢတ်ႈလႄႈဝႃႈ၊-ပေႃးတႃႉ၊ဝႃႈၼင်ႇၼႆလႄႈဢဝ်မိုဝ်းမၼ်းၸဝ်ႈတိူဝ်ႉသႂ်ႇဝၢၼ်ႁူၵေႃႉၼၼ်ႉသေယဝ်ႉႁႂ်ႈႁူမၼ်းၶိုၼ်းလီမႃးဢေႃႈ။

၅၂ မိူဝ်ႈၼၼ်ႉၸဝ်ႈယေႇသုလၢတ်ႈတီႈယိတ်ႉပရေႃးႁိၵ်ႈလူင်ဢိၵ်ႇတင်းၵႄႇပိၵ်ႉမၢၼ်ႇၸဝ်ႈတင်းၵူၼ်းဢၼ်ပဵၼ်ၵႄႇပဵၼ်ႁူဝ်ဢၼ်ႁွတ်ႈမႃးၵႃႈတီႈမၼ်းၸဝ်ႈတင်းလၢႆၸိူဝ်းၼၼ်ႉလႄႈဝႃႈ၊-သူပႃးဢဝ်လၢပ်ႇဢဝ်ၶွၼ်ႉမႃးႁႂ်ႈလႆႈတီႉဢဝ်ၵဝ်မိူၼ်ၸိူဝ်ႉၼင်ႇဢၼ်တီႉဢဝ်ၵူၼ်းၸူၼ်ၼၼ်ႉလူင်ပေႇ။

၅၃ မိူဝ်ႈဢၼ်ၵဝ်ယင်းမီးယူႇလူၺ်ႈၵၼ်တင်းသူၵႃႈၼႂ်းပိၵ်ႉမၢၼ်ႇၸဝ်ႈယူႇၵူႈဝၼ်းၼၼ်ႉသူဢမ်ႇယိုၼ်ႈမိုဝ်းလႄႈတီႉၵဝ်ယိပ်းၵဝ်။ၼႂ်းဝႃႈၼၼ်သေၵေႃႈၶိင်ႇတေႃႈလဵဝ်ၼႆႉၸမ်းပဵၼ်ၶိင်ႇသူဢေႃႈ။တၼ်းၶူဝ်းဢၼ်လပ်းသိင်ႇၵေႃႈပဵၼ်ဢေႃႈ၊ဝႃႈၼင်ႇၼႆဢေႃႈ။

ပေႇတရုထဵင်ပႅတ်ႈၸဝ်ႈယေႇသု

၅၄ ၶဝ်ၼၼ်ႉတီႉၵမ်ဢဝ်မၼ်းၸဝ်ႈသေလႄႈဢဝ်ၵႂႃႇသူင်ႇၵႃႈတီႈႁိူၼ်းၶုၼ်ယိတ်ႉပရေႃးႁိၵ်ႈဢေႃႈ။ပေႇတရုၵေႃႈယူႇၵႆၵႆသေလႄႈၸွမ်းတူၺ်းမၼ်းၸဝ်ႈၵႂႃႇဢေႃႈ။

၅၅ ၶဝ်သႂ်ႇၽႆးၵႃႈၼႂ်းၵၢင်တလၢင်းဢၼ်မီးၵႄႈႁိူၼ်းၼၼ်ႉလႄႈၸူႉၵၼ်တုမ်ၵၼ်ၼင်ႈယူႇလူၺ်ႈၵၼ်ဢေႃႈ။ပေႇတရုၵေႃႈၼင်ႈယူႇၵႃႈၼႂ်းၶဝ်ၼၼ်ႉဢေႃႈ။

၅၆ မေႈယိင်းၵေႃႉၼိုင်ႈဢၼ်ပဵၼ်ၵူၼ်းၸႂ်ႉၵူၼ်းသွႆၼၼ်ႉႁၼ်မၼ်းၼင်ႈယူႇၵႃႈတီႈႁိမႆ်းးၼၼ်ႉသေယဝ်ႉယႅၵ်ႉတူၺ်းမၼ်းၸေးၸေးၸွတ်ႇၸွတ်ႇလႄႈဝႃႈ၊-

၅၇ ၵေႃႉၼႆႉပဵၼ်ၵေႃႉဢၼ်ယူႇလူၺ်ႈၵၼ်တင်းၸဝ်ႈယေႇသုၼၼ်ႉဢိူဝ်း၊မိူဝ်ႈဢၼ်ဝႃႈၼင်ႇၼႆၸိုင်၊ပေႇတရုၵေႃႈထဵင်ပႅတ်ႈလႄႈဝႃႈ၊-မေႈယိင်းဢိူၺ်း၊ၵဝ်ဢမ်ႇႁူႉၸၵ်းၵေႃႉၼၼ်ႉဝႃႈၼင်ႇၼႆဢေႃႈ။

၅၈ လိုၼ်းၼၼ်ႉဢမ်ႇပေႃးႁိုင်ၵူၼ်းတၢင်ႇၵေႃႉသမ်ႉႁၼ်မၼ်းသေယဝ်ႉလၢတ်ႈဝႃႈ၊-မႂ်းပဵၼ်ၵေႃႉဢၼ်ၶဝ်ႈပႃးၼႂ်းၶဝ်ၼၼ်ႉဢိူဝ်ႈ၊မိူဝ်ႈဢၼ်ဝႃႈၼင်ႇၼႆၸိုင်၊ပေႇတရုၵေႃႈလၢတ်ႈလႄႈဝႃႈ၊-ၵေႃႉဢိူၺ်း၊ၵဝ်ဢမ်ႇၶဝ်ႈပႃးၵူၺ်း၊ဝႃႈၼင်ႇၼႆဢေႃႈ။

၅၉ လိုၼ်းၼၼ်ႉႁိုင်သေၼႃႇရီႇၼိုင်ႈယဝ်ႉၵူၼ်းတၢင်ႇၵေႃႉၵေႃႈလၢတ်ႈတႄႉတႄႉဝႃႈဝႃႈလႄႈဝႃႈ၊-ၸႂ်တႄႉဢိူဝ်ႈ။ၵေႃႉၼႆႉပဵၼ်ၵေႃႉဢၼ်ယူႇလူၺ်ႈၵၼ်တင်းၵေႃႉၼၼ်ႉဢိူဝ်ႈ။

၆၀ လွင်ႈမၼ်းၸမ်းမၼ်းပဵၼ်ၵူၼ်းမိူင်းၵႃႇလိလႄးဢိူဝ်ႈ၊မိူဝ်ႈဢၼ်ဝႃႈၼင်ႇၼႆၸိုင်၊ပေႇတရုၵေႃႈလၢတ်ႈလႄႈဝႃႈ၊-ၵေႃႉဢိူၺ်း၊ၵဝ်ဢမ်ႇႁူႉလွင်ႈဢၼ်မႂ်းလၢတ်ႈၸိူဝ်းၼႆႉ၊ဝႃႈၼင်ႇၼႆဢေႃႈ။

၆၁ ၼႂ်းမိူဝ်ႈဢၼ်မၼ်းယင်းတိုၵ်ႉလၢတ်ႈၵႂၢမ်းၸိူဝ်ႉၼင်ႇၼႆယူႇၼၼ်ႉၵႆႇၶၼ်ၵမ်းလဵဝ်ဢေႃႈ။မိူဝ်ႈၼၼ်ႉၸဝ်ႈၽြႃးဝၢႆႇတူၺ်းပေႇတရုဢေႃႈ။ပေႇတရုၵေႃႈၶုၵ်းၸႂ်လႆႈၶႆႈၸႂ်ထူပ်းၵႂၢမ်းဢၼ်မၼ်းၸဝ်ႈလၢတ်ႈဝႆႉဝႃႈ၊-

၆၂ ၸူဝ်ႈဢၼ်ၵႆႇဢမ်ႇပႆႇၶၼ်ၼၼ်ႉၸိုင်မႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈဢၼ်ဝႃႈၼၼ်ႉသေယဝ်ႉ၊မၼ်းဢွၵ်ႇၵႂႃႇၵႃႈၼွၵ်ႈလႄႈႁွင်ႉႁႆႈၼႃႇလူင်လၢင်ဢေႃႈ။

ၼႂ်းလုမ်းလူင်

၆၃ ၶဝ်ၸိူဝ်းဢၼ်ယိပ်းၵမ်ဢဝ်မၼ်းၸဝ်ႈယူႇၼၼ်ႉႁဵတ်းပျၢၵ်ႈႁဵတ်းၶူဝ်မၼ်းၸဝ်ႈသေလႄႈယႅၼ်ႉထုပ်ႉမၼ်းၸဝ်ႈဢေႃႈ။

၆၄ ၶဝ်ႁူမ်ႇသုမ်ႇၼႃႈမၼ်းၸဝ်ႈသေယဝ်ႉလၢတ်ႈလႄႈဝႃႈ၊-ၶႅၼ်းတေႃႈႁဵတ်းပရေႃးၽႅတ်ႈလႄႈလၢတ်ႈလူး။

၆၅ ၵေႃႉလႂ်ပေႃႉယႅၼ်ႉၸဝ်ႈႁဝ်းဝႃႈၼင်ႇၼႆဢေႃႈ။လိူဝ်သေၼၼ်ႉၶဝ်ဢဝ်တင်းၵႂၢမ်းၼမ်ၼႃႇသေႉသွမ်းမၼ်းၸဝ်ႈဢေႃႈ။

၆၆ မိူဝ်ႈဢၼ်မိူင်းလႅင်းၸိုင်ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းတင်းလၢႆဢိၵ်ႇတင်းယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းလၢႆၸူႉၵၼ်တုမ်ၵၼ်သေယဝ်ႉဢဝ်မၼ်းၸဝ်ႈၵႂႃႇၵႃႈတီႈလုမ်းလူင်ယဝ်ႉၸင်ႇလၢတ်ႈလႄႈဝႃႈ၊-

၆၇ ပေႃးမႂ်းပဵၼ်ၸဝ်ႈၶရိၸ်ႉၸိုင်လၢတ်ႈပၼ်တီႈႁဝ်းတႃႉ၊ဝႃႈၼင်ႇၼႆဢေႃႈ။

၆၈ မၼ်းၸဝ်ႈၵေႃႈလၢတ်ႈလႄႈဝႃႈ၊-ပေႃးၵဝ်လၢတ်ႈၸိုင်သူဢမ်ႇယုမ်ႇ။

၆၉ ပေႃးၵဝ်ထၢမ်ၸိုင်သူဢမ်ႇၶိုၼ်းလၢတ်ႈ။ၸႃႉၸဵမ်တေႃႈလဵဝ်ၼႆႉလႄႈလုၵ်ႈၵူၼ်းတၵ်းၼင်ႈယူႇၵႃႈတီႈၽၢႆႇၶႂႃတၼ်းၶူဝ်းၽြႃးပဵၼ်ၸဝ်ႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်တင်းသဵင်ႈတင်းလူင်ၵေႃႈလၢတ်ႈလႄႈဝႃႈ၊-

၇၀ ပေႃးပဵၼ်ၸိူဝ်ႉၼင်ႇၼႆၸိုင်မႂ်းပဵၼ်လုၵ်ႈၽြႃးပဵၼ်ၸဝ်ႈႁိုဝ်၊ဝႃႈၼင်ႇၼႆလႄႈမၼ်းၸဝ်ႈၵေႃႈလၢတ်ႈလႄႈဝႃႈ၊-သူလၢတ်ႈၸွမ်းၵႃႈၼင်ႇဢၼ်ၵဝ်ပဵၼ်ၼၼ်ႉဢေႃႈ၊ဝႃႈၼင်ႇၼႆဢေႃႈ။

၇၁ ၶဝ်ၸိူဝ်းၼၼ်ႉၵေႃႈလၢတ်ႈလႄႈဝႃႈ၊-ႁဝ်းတၵ်းလူဝ်ႇသၢၵ်ႈသေႇဢၼ်လႂ်ထႅင်ႈလူးၵွၼ်ႇ။တူဝ်ႁဝ်းလႆႈငိၼ်းၵႂၢမ်းဢၼ်ဢွၵ်ႇသူပ်းမၼ်းၼၼ်ႉယဝ်ႉ၊ဝႃႈၼင်ႇၼႆဢေႃႈ။