ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ
Chapter ၁ ၂ ၃ ၄ ၅ ၆ ၇ ၈ ၉ ၁၀ ၁၁ ၁၂ ၁၃ ၁၄ ၁၅ ၁၆ ၁၇ ၁၈ ၁၉ ၂ ၀ ၂၁ ၂၂ ၂၃ ၂၄
၇
တၢင်းယုမ်ႇမၢတ်ႈတပ်ႉမူး
၁ မၼ်းၸဝ်ႈႁေႃးလၢတ်ႈၵႂၢမ်းတင်းသဵင်ႈတင်းမူတ်းၸိူဝ်းၼၼ်ႉတီႈပရိၵ်ႈသၢတ်ႈတင်းလၢႆယဝ်ႉၸင်ႇၶဝ်ႈၵႂႃႇၵႃႈၼႂ်းဝဵင်းၵပိူဝ်ႇၼေႇဢုမ်ႇဢေႃႈ။
၂ ၵႃႈၼႂ်းဝဵင်းၼၼ်ႉၶႃႈတပ်ႉမူးဢၼ်ၸဝ်ႈမၼ်းႁၵ်ႉၼႃႇၼၼ်ႉၵေႃႉၼိုင်ႈပဵၼ်ၵိၼ်းၼႃႇလႄႈၸမ်တတေၢႆဢေႃႈ။
၃ တပ်ႉမူးၼၼ်ႉမိူဝ်ႈဢၼ်ငိၼ်းလွင်ႈၸဝ်ႈယေႇသုၸိုင်မၼ်းပွႆႇၸႂ်ႉၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၸိူဝ်ႉၶိူဝ်းယုတၼၼ်ႉၵႂႃႇၵႃႈတီႈမၼ်းၸဝ်ႈႁႂ်ႈတွင်းပၢၼ်ႇမၼ်းၸဝ်ႈႁႂ်ႈမၼ်းၸဝ်ႈမႃးပၼ်ၵတ်းယဵၼ်ၶျၢမ်းသႃႇတီႈၶႃႈမၼ်းၼၼ်ႉဢေႃႈ။
၄ ၶဝ်ႁွတ်ႈမႃးၵႃႈတီႈၸဝ်ႈယေႇသုသေယဝ်ႉတွင်းပၢၼ်ႇၼႃႇလူင်လၢင်လႄႈဝႃႈ၊-တပ်ႉမူးၵေႃႉၼၼ်ႉပဵၼ်ၵေႃႉဢၼ်ထိူၵ်ႈၶၢမ်ႇတၢင်းဢၼ်ၸဝ်ႈႁဝ်းႁဵတ်းၵျေးၸူးပၼ်ၼၼ်ႉယူႇတီႈၶႃႈဢေႃႈ။
၅ လွင်ႈမၼ်းၸမ်းမၼ်းပဵၼ်ၵေႃႉဢၼ်ႁၵ်ႉပဵင်းၵူၼ်းမဵဝ်းႁဝ်းၶႃႈလႄႈတႄႇႁဵတ်းၸရွပ်ႈႁေႃးတြႃးပုၼ်ႈႁဝ်းၶႃႈဝႆႉၶႃႈယဝ်ႉ၊ဝႃႈၼင်ႇၼႆဢေႃႈ။
၆ ၸဝ်ႈယေႇသုၵေႃႈၵႂႃႇလူၺ်ႈၵၼ်တင်းၶဝ်ဢေႃႈ။မိူဝ်ႈဢၼ်မၼ်းၸဝ်ႈႁွတ်ႈထိုင်တီႈဢၼ်ဢမ်ႇပေႃးၵႆၵၼ်တင်းႁိူၼ်းတပ်ႉမူးၼၼ်ႉၸိုင်တပ်ႉမူးပွႆႇၸႂ်ႉၵေႃႉသေႈပီႈၼွင်ႉမၼ်းၵႂႃႇလႄႈႁႂ်ႈလႆႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းယႃႇပေႁႂ်ႈယၢပ်ႇၸႂ်ၸဝ်ႈႁဝ်းၶႃႈသေၵမ်းၶႃႈ။ၵဝ်ၶႃႈဢမ်ႇထိူၵ်ႈဢမ်ႇတၢၼ်ႇတၢင်းဢၼ်ၸဝ်ႈႁဝ်းၶႃႈတၵ်းမႃးၶဝ်ႈၵႃႈတႂ်ႈႁူမ်ႁိူၼ်းၵဝ်ၶႃႈၼႆႉတီႈၶႃႈ။
၇ ၵဝ်ၶႃႈထၢင်ႇၵဝ်ၶႃႈၼႆႉပဵၼ်ၵေႃႉဢၼ်ဢမ်ႇထိူၵ်ႈဢမ်ႇတၢၼ်ႇႁႂ်ႈလႆႈႁွတ်ႈထိုင်မႃးၵႃႈတီႈၸဝ်ႈႁဝ်းၼႆႉတီႈၶႃႈ။ပေႃးၸဝ်ႈႁဝ်းမီးဢမိင်ႉၵမ်းၼိုင်ႈၵူၺ်းၼႆၵေႃႈၵူၼ်းဢွၼ်ႇၵဝ်ၶႃႈတၵ်းလႆႈၵတ်းယဵၼ်ၶျၢမ်းသႃႇယူႇၶႃႈဢေႃႈ။
၈ ၵဝ်ၶႃႈၼႆႉပဵၵ်ႉသမ်ႉပဵၼ်ၶႃႈၵႃႈတႂ်ႈၶုၼ်သေၵေႃႈၵဝ်ၶႃႈလႆႈဢုပ်ႉပိူင်ႇၵူၼ်းသိုၵ်းတင်းလၢႆလႄႈပေႃးၵဝ်ၶႃႈလၢတ်ႈတီႈၵူၼ်းသိုၵ်းၵေႃႉၼိုင်ႈဝႃႈ၊-ၵႂႃႇတႃႉ၊ဝႃႈၼႆၵေႃႈမၼ်းတၵ်းလႆႈၵႂႃႇၶႃႈဢေႃႈ။ပေႃးဝႃႈ၊-မႃးတႃႉ၊ဝႃႈၼႆၵေႃႈမၼ်းတၵ်းလႆးမႃးၶႃႈဢေႃႈ။တီႈၵူၼ်းၸႂ်ႉၵဝ်ၶႃႈၵေႃႈပေႃးဝႃႈ၊-ႁဵတ်းဢၼ်ၼႆႉတႃႉ၊ဝႃႈၼႆၵေႃႈမၼ်းတၵ်းလႆႈႁဵတ်းၶႃႈဢေႃႈ၊ဝႃႈၼင်ႇၼႆဢေႃႈ။
၉ ၸဝ်ႈယေႇသုၼၼ်ႉမိူဝ်ႈဢၼ်ငိၼ်းၵႂၢမ်းၼၼ်ႉၸိုင်ဢၢမ်းၼႃႇလႄႈဝၢႆႇတူၺ်းၶဝ်ၸိူဝ်းဢၼ်ၸွမ်းပႃႈလင်မၼ်းၸဝ်ႈတင်းလၢႆသေယဝ်ႉလၢတ်ႈဝႃႈ၊-ၵဝ်ဝႃႈၸမ်းတၢင်းယုမ်ႇမၢတ်ႈဢၼ်ယႂ်ႇထၼ်ႇၼႆႉၵႃႈၼႂ်းၸိူဝ်ႉၶိူဝ်းဢိသရေႇလၼႆႉၵဝ်ယင်းဢမ်ႇပႆႇတွၼ်ႉႁၼ်သေပွၵ်ႈ၊ဝႃႈၼင်ႇၼႆဢေႃႈ။
၁၀ ၶဝ်ၸိူဝ်းဢၼ်တပ်ႉမူးပွႆႇၸႂ်ႉမႃးတင်းလၢႆၸိူဝ်းၼၼ်ႉမိူဝ်ႈဢၼ်ၶဝ်ၶိုၼ်းမိူဝ်းႁွတ်ႈထိုင်ၵႃႈတီႈႁိူၼ်းၸိုင်ၶဝ်ထူပ်းႁၼ်ၶႃႈဢၼ်ၸပ်းတၢင်းၶႆႈတၢင်းပဵၼ်ၼၼ်ႉယူႇလီယဝ်ႉဢေႃႈ။
ၸဝ်ႈယေႇသုႁႂ်ႈလုၵ်ႈၸၢႆးမေႈမၢႆႈလုၵ်ႉၶိုၼ်းလိပ်း
၁၁ ဝၼ်းမိူဝ်ႈၽုၵ်ႈမၼ်းၸဝ်ႈၵႂႃႇၵႃႈတီႈဝဵင်းဢၼ်လႆႈႁွင်ႉႁိၵ်ႈၸိုဝ်ၼႃႇဢိၼၼၼ်ႉလႄႈတပႄးၸဝ်ႈတင်းလၢႆဢိၵ်ႇတင်းၵူၼ်းၸူႉၵူၼ်းတုမ်ၼမ်ၼႃႇၸွမ်းပႃႈလင်မၼ်းၸဝ်ႈၵႂႃႇဢေႃႈ။
၁၂ မိူဝ်ႈဢၼ်ႁွတ်ႈၸမ်ၵႃႈတီႈႁိမ်းၽၵ်းတူဝဵင်းၼၼ်ႉၸိုင်ပိူၼ်ႈဢဝ်ၵူၼ်းတၢႆၵေႃႉၼိုင်ႈဢၼ်ပဵၼ်လုၵ်ႈၸၢႆးမေႈမၢႆႈဢၼ်မၼ်းမီးၵေႃႉလဵဝ်ၵူၺ်းၼၼ်ႉဢွၵ်ႇမႃးလႄႈၵူၼ်းဝဵင်းၼမ်ၼႃႇၵေႃႈၸွမ်းမႃးဢေႃႈ။
၁၃ ၸဝ်ႈၽြႃးၼၼ်ႉမိူဝ်ႈဢၼ်ႁၼ်မေႈယိင်းၼၼ်ႉၸိုင်မီးၸႂ်ဢၼ်ဢိတ်းလူၼႃႇလႄႈလၢတ်ႈဝႃႈ၊-
၁၄ ယႃႇပေႁွင်ႉပေႁႆႈ၊ဝႃႈၼင်ႇၼႆယဝ်ႉၸင်ႇသုတ်ႉၸမ်လႄႈဢဝ်မိုဝ်းမၼ်းၸဝ်ႈတိူဝ်ႉသႂ်ႇၵွမ်ႇဢေႃႈ။ၶဝ်ၸိူဝ်းဢၼ်ႁၢပ်ႇၵွမ်ႇၼၼ်ႉၵေႃႈၸုၵ်းၵိုတ်းၵမ်းလဵဝ်ဢေႃႈ။
၁၅ မၼ်းၸဝ်ႈၵေႃႈလၢတ်ႈလႄႈဝႃႈ၊-လုၵ်ႈဢွၼ်ႇၼႆႉဢိူၺ်း၊လုၵ်ႉတႃႉ။ၵဝ်မီးဢမိင်ႉတီႈမႂ်းဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်လုၵ်ႈဢွၼ်ႇဢၼ်တၢႆၵႂႃႇယဝ်ႉၼၼ်ႉၵေႃႈလုၵ်ႉၼင်ႈသေလႄႈလၢတ်ႈၵႂၢမ်းမႃးဢေႃႈ။မၼ်းၸဝ်ႈၵေႃႈၶိုၼ်းဢဝ်မၼ်းဢၢပ်ႈပၼ်တီႈမေႈမၼ်းဢေႃႈ။
၁၆ ၵူၼ်းတင်းသဵင်ႈတင်းလူင်ႁွတ်ႈထိုင်တၢင်းဢၼ်ၵူဝ်ႁႄၼႃႇလႄႈဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈလႄႈဝႃႈ၊-ပရေႃးၽႅတ်ႈဢၼ်ယႂ်ႇပေႃႇမႃးၵႃႈၼႂ်းႁဝ်းယဝ်ႉ။ၽြႃးပဵၼ်ၸဝ်ႈမႃးလူမႃးတူၺ်းၵူၼ်းမဵဝ်းမၼ်းၸဝ်ႈယဝ်ႉ၊ဝႃႈၼင်ႇၼႆဢေႃႈ။
၁၇ သတၢင်းသဵင်ၶၢဝ်ႇမၼ်းၸဝ်ႈၸွတ်ႇသႃႇႁူင်ႁၢင်းၵႂႃႇၸႃႉၸဵမ်မိူင်းယုတၵႃႈတီႈႁိမ်းႁွမ်းၵူႈတီႈၵူႈလႅၼ်ဢေႃႈ။
ၸဝ်ႈယေႇသုတင်းယုဝ်းႁၢၼ်ႇ
၁၈ တပႄးယုဝ်းႁၢၼ်ႇတင်းလၢႆမွၵ်ႇလၢတ်ႈလွင်ႈတၢင်းတင်းသဵင်ႈတင်းလူင်ၸိူဝ်းၼၼ်ႉတီႈသြႃႇၶဝ်ဢေႃႈ။
၁၉ ယုဝ်းႁၢၼ်ႇၵေႃႈႁွင်ႉဢဝ်တပႄးမၼ်းသွင်ၵေႃႉယဝ်ႉၸင်ႇပွႆႇၸႂ်ႉၵႂႃႇၸူးၵႃႈတီႈၸဝ်ႈယေႇသုလႄႈႁႂ်ႈၶဝ်လဝ်ႈထၢမ်မၼ်းၸဝ်ႈဝႃႈ၊-ၸဝ်ႈႁဝ်းပဵၼ်ၸဝ်ႈဢၼ်တၵ်းမႃးၼၼ်ႉၶႃႈႁိုဝ်၊ဢမ်ႇၼၼ်လႄႈႁဝ်းၶႃႈတၵ်းလႆႈမုင်ႈထႃႈမွင်းထႃႈတၢင်ႇၵေႃႉလူးၵွၼ်ႇၶႃႈႁိုဝ်၊ဝႃႈၼင်ႇၼႆဢေႃႈ။
၂၀ ၶဝ်ၼၼ်ႉၵေႃႈႁွတ်ႈထိုင်ၵႃႈတီႈမၼ်းၸဝ်ႈသေယဝ်ႉလဝ်ႈလၢတ်ႈလႄႈဝႃႈ၊-ယုဝ်းႁၢၼ်ႇဢၼ်ပၼ်ပပ်ႉတိၸၢမ်ႇၼၼ်ႉပွႆႇၸႂ်ႉႁဝ်းၶႃႈမႃးႁႂ်ႈလႆႈလဝ်ႈထၢမ်ဝႃႈ၊-ၸဝ်ႈႁဝ်းပဵၼ်ၸဝ်ႈဢၼ်တၵ်းမႃးၼၼ်ႉၶႃႈႁိုဝ်။ဢမ်ႇၼၼ်ၵေႃႈတၵ်းလႆႈမုင်ႈထႃႈမွင်းထႃႈတၢင်ႇၵေႃႉလူးၵွၼ်ႇၶႃႈႁိုဝ်၊ဝႃႈၼင်ႇၼႆဢေႃႈ။
၂၁ မိူဝ်ႈၶိင်ႇၼႃႇရီႇၼၼ်ႉၸဝ်ႈယေႇသုႁႂ်ႈၵူၼ်းၼမ်ၼႃႇၵၢင်းလွတ်ႈတင်းတၢင်းၶႆႈတၢင်းပဵၼ်တၢင်းဢၼ်ၽီႁၢႆႉၶဝ်ႈၼၼ်ႉဢေႃႈ။တီႈၶဝ်ၸိူဝ်းဢၼ်တႃမွတ်ႇၼၼ်ႉၵေႃႈမၼ်းၸဝ်ႈႁဵတ်းႁႂ်ႈတႃၶဝ်ႁၼ်မႃးဢေႃႈ။
၂၂ မိူဝ်ႈၼၼ်ႉၸဝ်ႈယေႇသုၶိုၼ်းလၢတ်ႈတီႈၶဝ်ၼၼ်ႉလႄႈဝႃႈ၊-သူၵႂႃႇလႄႈလဝ်ႈလၢတ်ႈတီႈယုဝ်းႁၢၼ်ႇၵႃႈဢၼ်သူလႆႈငိၼ်းၵႃႈဢၼ်သူလႆႈႁၼ်တင်းလၢႆၼႆႉတႃႉ။ၶဝ်ၸိူဝ်းဢၼ်တႃမွတ်ႇၼၼ်ႉလႆႈႁၼ်မႃးဢေႃႈ။ၶဝ်ၸိူဝ်းဢၼ်တိၼ်လူႉၼၼ်ႉလႆႈပႆတၢင်းၵႂႃႇဢေႃႈ။
၂၃ ၶဝ်ၸိူဝ်းဢၼ်ပဵၼ်တုတ်ႈၼၼ်ႉလႆႈႁွတ်ႈထိုင်တၢင်းဢၼ်မူတ်းသႂ်ဢေႃႈ။ၶဝ်ၸိူဝ်းဢၼ်ႁူၼူၵ်ႇၼၼ်ႉလႆႈငိၼ်းမႃးဢေႃႈ။ၶဝ်ၸိူဝ်းဢၼ်တၢႆယဝ်ႉၼၼ်ႉလႆႈႁွတ်ႈထိုင်တၢင်းဢၼ်လုၵ်ႉၶိုၼ်းလိပ်းဢေႃႈ။ၶဝ်ၸိူဝ်းဢၼ်ၽၢၼ်ၼၼ်ႉၵေႃႈလႆႈငိၼ်းသတၢင်းသိူဝ်းပျေႃႇဢေႃႈ။ၵွပ်ႈပိူဝ်ႈၵဝ်လႄႈၵေႃႉဢၼ်ၸႂ်ဢမ်ႇလူႉၼၼ်ႉမီးမင်ႇၵလႃႇဢေႃႈ၊ဝႃႈၼင်ႇၼႆဢေႃႈ။
၂၄ ဝၢႆးလင်ၶဝ်ၸိူဝ်းဢၼ်ယုဝ်းႁၢၼ်ႇပွႆႇၸႂ်ႉမႃးၼၼ်ႉၶိုၼ်းမိူဝ်းၵႂႃႇယဝ်ႉၸိုင်ၸဝ်ႈယေႇသုဢဝ်လွင်ႈယုဝ်းႁၢၼ်ႇလၢတ်ႈတီႈပရိၵ်ႈသၢတ်ႈတင်းလၢႆလႄႈဝႃႈ၊-သူဢွၵ်ႇၵႂႃႇၵႃႈတီႈၼႂ်းထိူၼ်ႇပုၼ်ႉႁႂ်ႈလႆႈလူလႆႈတူၺ်းလွင်ႈၸိူဝ်ႉၼင်ႇႁိုဝ်။ဢွၵ်ႇၵႂႃႇႁႂ်ႈလႆႈလူလႆႈတူၺ်းမႆႉဢေႃႈဢၼ်လူမ်းထူဝ်းၼၼ်ႉႁိူဝ်။
၂၅ ဢမ်ႇၼၼ်ႁႂ်ႈလႆႈလူလႆႈတူၺ်းလွင်ႈၸိူဝ်ႉၼင်ႇႁိုဝ်။ႁႂ်ႈလႆႈလူလႆႈတူၺ်းၶဝ်ၸိူဝ်းဢၼ်ၼုင်ႈမႆႊၶူဝ်းလဵင်းဢၼ်ဢူၼ်ႈဢၼ်ဢွၼ်ႇၼၼ်ႉႁိုဝ်။ၶဝ်ၸိူဝ်းဢၼ်ၼုင်ႈမႆႊၶူဝ်းလဵင်းဢၼ်ႁၢင်ႊလီလႄႈၵိၼ်ၶူပ်းဢၼ်လီဢၼ်ငၢမ်းၼၼ်ႉၸၢင်ႊယူႇၵႃႈၼႂ်းႁိူၼ်းၶုၼ်ဢေႃႈ။
၂၆ ဢမ်ႇၼၼ်ၵေႃႈသူဢွၵ်ႇၵႂႃႇႁႂ်ႈလႆႈလူလႆႈတူၺ်းလွင်ႈၸိူဝ်ႉၼင်ႇႁိုဝ်။ဢွၵ်ႇၵႂႃႇႁႂ်ႈလႆႈလူလႆႈတူၺ်းပရေႃးၽႅတ်ႈႁိုဝ်။ၸႂ်ႈယဝ်ႉ။ၵဝ်ဝႃႈမၼ်းပဵၼ်ၵေႃႉဢၼ်ယႂ်ႇဢၼ်မျၢတ်ႈၼႃႇသပရေေႃးၽႅတ်ႈဢေႃႈ။
၂၇ ဢၼ်မႃးၼႂ်းၵျၢမ်းလိၵ်ႈမီးဝႆႉလႄႈဝႃႈၸမ်း၊-တူၺ်းလူႊ။ၵဝ်တၵ်းပွႆႇၸႂ်ႉတမၢၼ်ႇၵဝ်ၵႃႈတီႈၽၢႆႇၼႃႈမႂ်းဢၼ်တၵ်းမႄးႁႅၼ်းသဵၼ်ႈတၢင်းမႂ်းၼၼ်ႉဢေႃႈ၊ဝႃႈၼင်ႇၼႆၼၼ်ႉၶႂ်ႈဝႃႈၵေႃႉၼၼ်ႉယဝ်ႉ။
၂၈ ၵဝ်ဝႃႈၸမ်းၼႂ်းၶဝ်ၸိူဝ်းဢၼ်ၵိူတ်ႇလဵင်ႉမႃးၵႃႈၼႂ်းမေႈယိင်းတင်းလၢႆၼၼ်ႉပရေႃးၽႅတ်ႈဢၼ်ယႂ်ႇမျၢတ်ႈၼႃႇသေယုဝ်းႁၢၼ်ႇၼၼ်ႉဢမ်ႇမီးသေၵေႃႉသေၵူၼ်း။ၼႂ်းဝႃႈၼၼ်သေၵေႃႈၵေႃႉဢၼ်လဵၵ်ႉသေပိူၼ်ႈၵႃႈၼႂ်းမိူင်းၽြႃးပဵၼ်ၸဝ်ႈၼၼ်ႉယဵင်ႈၶႅၼ်းယႂ်ႇမျၢတ်ႈၼႃႇသေၵေႃႉၼၼ်ႉဢေႃႈ။
၂၉ ၸႃႉၸဵမ်ၵူၼ်းၵဵပ်းၶွၼ်ႇတင်းလၢႆၵူၼ်းတင်းသဵင်ႈတင်းလူင်ၸိူဝ်းၼၼ်ႉမိူဝ်ႈဢၼ်လႆႈငိၼ်းၵႂၢမ်းၼၼ်ႉၸိုင်ပိူဝ်ႈဢၼ်ၶဝ်လႆႈၶၢမ်ႇဢဝ်ပပ်ႉတိၸၢမ်ႇဢၼ်ယုဝ်းႁၢၼ်ႇပၼ်ၼၼ်ႉယဝ်ႉလႄႈဢွၼ်ၵၼ်ယွင်ႈယေႃးၵျေးၸူးတၢင်းဢၼ်သိုဝ်ႈတေႃႇတီႈၽြႃးပဵၼ်ၸဝ်ႈဢေႃႈ။
၃၀ ၽႃႇရိသေးဢိၵ်ႇတင်းၵူၼ်းမေႃၵျၢမ်းတင်းလၢႆၸမ်းပိူဝ်ႈဢၼ်ၶဝ်ဢမ်ႇလႆႈၶၢမ်ႇဢဝ်ပပ်ႉတိၸၢမ်ႇယုဝ်းႁၢၼ်ႇလႄႈၶဝ်ပႄႇပႅတ်ႈၵျေးၸူးဢၼ်ၽြႃးပဵၼ်ၸဝ်ႈဢၼ်မႄးႁႅၼ်းပုၼ်ႈၶဝ်ၼၼ်ႉဢေႃႈ။
၃၁ ပိူဝ်ႈၼႆလႄႈတီႈၵူၼ်းမဵဝ်းၼႆႉၸိုင်တၵ်းလႆႈၼႄပျႃးဢူႉပမႃႇပုင်ႇမၼ်းၸိူဝ်ႉၼင်ႇႁိုဝ်။
၃၂ တၵ်းမိူၼ်ၸိူဝ်ႉၼင်ႇဢၼ်လႂ်။မိူၼ်ၸိူဝ်ႉၼင်ႇလုၵ်ႈဢွၼ်ႇတင်းလၢႆဢၼ်ၼင်ႈယူႇၵႃႈၼႂ်းၵၢတ်ႇသေလႄႈၵေႃႉၼိုင်ႈလႄႈၵေႃႉၼိုင်ႈႁွင်ႉသႅၼ်ႇတီႈၵၼ်လႄႈဝႃႈ၊-ပဵၵ်ႉသမ်ႉႁဝ်းပဝ်ႇပီႇၼႄသူသေၵေႃႈသူဢမ်ႇၵႃႈဢမ်ႇဝႅၼ်။ပဵၵ်ႉသမ်ႉႁဝ်းထိုင်ၸႂ်ပွင်ႉၶင်းသေၵေႃႈသူဢမ်ႇႁွင်ႉဢမ်ႇႁႆႈဝႃႈၼင်ႇၼႆဢေႃႈ။
၃၃ လွင်ႈမၼ်းၸမ်းယုဝ်းႁၢၼ်ႇဢၼ်ပၼ်ပပ်ႉတိၸၢမ်ႇၼၼ်ႉမၼ်းဢမ်ႇၵိၼ်ၶဝ်ႈမုၼ်းဢမ်ႇသူတ်ႉၼမ်ႉၸပိတ်ႉလႄႈသူဝႃႈ၊-မၼ်းပဵၼ်ၵူၼ်းဢၼ်ၽီႁၢႆႉၶဝ်ႈဝႃႈၼင်ႇၼႆဢိူဝ်ႈ။
၃၄ မိူဝ်ႈဢၼ်လုၵ်ႈၵူၼ်းမႃးလႄႈယင်းၵိၼ်ယင်းသူတ်ႉၼၼ်ႉသူသမ်ႉဝႃႈ၊-တူၺ်းလူႊၵေႃႉၼႆႉပဵၼ်ၵေႃႉဢၼ်ၵိၼ်ပူၼ်ႉၵိၼ်လိူဝ်ၵေႃႉဢၼ်ၵိၼ်ၼမ်ႉၸပိတ်ႉပူၼ်ႉလိူဝ်ၵေႃႉဢၼ်ႁဵတ်းၵေႃႉႁဵတ်းသေႈလူၺ်ႈၵၼ်တင်းၵူၼ်းၵဵပ်းၶွၼ်ႇဢိၵ်ႇတင်းၵူၼ်းဢၼ်မီးဢပျႅတ်ႈတင်းလၢႆၸိူဝ်းၼၼ်ႉဝႃႈၼႆလူင်ပေႇ၊ဝႃႈၼင်ႇၼႆဢေႃႈ။
၃၅ ၼႂ်းဝႃႈၼၼ်သေၵေႃႈပိင်ႇၺႃႇတြႃးပဵၼ်ဢၼ်သိုဝ်ႈတေႃႇၼႂ်းလုၵ်ႈလၢင်းမၼ်းတင်းသဵင်ႈတင်းလူင်ဢေႃႈ၊ဝႃႈၼင်ႇၼႆဢေႃႈ။
မေႈယိင်းဢၼ်မီးဢပျႅတ်ႈၵေႃႉၼိုင်ႈပၼ်ၽိၵ်ႉသိၵ်ႈၸဝ်ႈယေႇသု
၃၆ ၽႃႇရိသေးၵေႃႉၼိုင်ႈႁွင်ႉပၢင်းမၼ်းၸဝ်ႈႁႂ်ႈမၼ်းၸဝ်ႈလႆႈၵိၼ်တၢင်းၵိၼ်လူၺ်ႈၵၼ်တင်းမၼ်းလႄႈမၼ်းၸဝ်ႈၵေႃႈၶဝ်ႈၵႂႃႇၵႃႈၼႂ်းႁိူၼ်းၽႃႇရိသေးၼၼ်ႉသေယဝ်ႉၼင်ႈယူႇႁိမ်းတီႈၵိၼ်ဢေႃႈ။
၃၇ ၵႃႈၼႂ်းဝဵင်းၼၼ်ႉမီးမေႈယိင်းဢၼ်မီးဢပျႅတ်ႈၼၼ်ႉၵေႃႉၼိုင်ႈဢေႃႈ။မိူဝ်ႈဢၼ်မၼ်းႁူႉလွင်ႈဢၼ်မၼ်းၸဝ်ႈၼင်ႈယူႇႁိမ်းတီႈၵိၼ်ၵႃႈၼႂ်းႁိူၼ်းၽႃႇရိသေးၼၼ်ႉၸိုင်မၼ်းဢဝ်တဝ်ႈၼမ်ႉႁွမ်မၢၵ်ႇႁိၼ်ၽိူၵ်ႇလုၵ်ႉၼိုင်ႈမႃးလႄႈ
၃၈ ၸုၵ်းၵႃႈတီႈၽၢႆႇလင်ႁိမ်းတိၼ်မၼ်းၸဝ်ႈသေယဝ်ႉႁွင်ႉႁႆႈလႄႈႁႂ်ႈၼမ်ႉတႃမၼ်းတူၵ်းသႂ်ႇၵႃႈၼိူဝ်တိၼ်မၼ်းၸဝ်ႈဢေႃႈ။လိုၼ်းၼၼ်ႉမၼ်းသမ်ႉဢဝ်ၶူၼ်ႁူဝ်မၼ်းၸဵတ်ႉတိၼ်မၼ်းၸဝ်ႈသေယဝ်ႉၼူမ်တိၼ်မၼ်းၸဝ်ႈလႄႈဢဝ်ၼမ်ႉႁွမ်တႃးပၼ်ဢေႃႈ။
၃၉ မိူဝ်ႈဢၼ်ၽႃႇရိသေးဢၼ်ႁွင်ႉပၢင်းမၼ်းၸဝ်ႈမႃးၼၼ်ႉႁၼ်ၸိုင်မၼ်းထၢင်ႇၼႂ်းၸႂ်လႄႈဝႃႈ၊-ပေႃးၵေႃႉၼႆႉပဵၼ်ပရေႃးၽႅတ်ႈၸိုင်မၼ်းထုၵ်ႇလီႁူႉလွင်ႈမေႈယိင်းၵေႃႉဢၼ်တိူဝ်ႉတိၼ်မၼ်းၸဝ်ႈယူႇၼၼ်ႉပဵၼ်မေႈယိင်းၸိူဝ်ႉၼင်ႇႁိူဝ်ဢၼ်ဝႃႈၼၼ်ႉယူႇဢိူဝ်ႈ။မၼ်းပဵၼ်မေႈယိင်းဢၼ်မီးဢပျႅတ်ႈဢေႃႈ။
၄၀ ၵမ်းၼၼ်ႉၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-သိမုၼ်ႇဢိူၺ်း၊ၵဝ်မီးတီႈလၢတ်ႈပိူင်ၼိုင်ႈတီႈမႂ်းဢေႃႈ။မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈလဝ်ႈလၢတ်ႈလႄႈဝႃႈ၊-သြႃႇၸဝ်ႈ၊လၢတ်ႈသေၵမ်းၶႃႈ၊ဝႃႈၼင်ႇၼႆယဝ်ႉၸင်ႇ၊မၼ်းၸဝ်ႈၵေႃႈလၢတ်ႈလႄႈဝႃႈ၊-
၄၁ တီႈၸဝ်ႈငိုၼ်းၵေႃႉၼိုင်ႈမၼ်းမီးၵူၼ်းထုၵ်ႇၼီႈမၼ်းသွင်ၵေႃႉဢေႃႈ။ၵေႃႉၼိုင်ႈထုၵ်ႇၼီႈတေႇၼႃႇရီႇႁႃႈပၢၵ်ႇၶႅပ်းဢေႃႈ။ၵေႃႉၼိုင်ႈသမ်ႉထုၵ်ႇၼီႈတေႇၼႃႇရီႇႁႃႈၶႅပ်းဢေႃႈ။
၄၂ သွင်ၶႃဢမ်ႇမီးဢၼ်တၵ်းတႅၼ်းပၼ်ၼီႈလႄႈၸဝ်ႈငိုၼ်းၶၢင်းပၼ်ၼီႈတီႈၶဝ်သွင်ၵေႃႉၼၼ်ႉဢေႃႈ။ပေႃးပဵၼ်ၸိူဝ်ႉၼင်ႇၼႆၸိုင်ၼႂ်းၶဝ်သွင်ၵေႃႉၼၼ်ႉၵေႃႉလႂ်ယဵင်ႈၶႅၼ်းတၵ်းႁၵ်ႉၸဝ်ႈငိုၼ်းၼၼ်ႉမိူဝ်ႈဢၼ်ဝႃႈၼင်ႇၼႆၸိုင်သိမုၼ်ႇၵေႃႈလဝ်ႈလၢတ်ႈလႄႈဝႃႈ၊-
၄၃ ၵဝ်ၶႃႈထၢင်ႇၵေႃႉဢၼ်လႆႈၶၢမ်ႇတၢင်းဢၼ်ၶၢင်းပၼ်ၼီႈၼမ်ၼမ်ၼၼ်ႉယဵင်ႈၶႅၼ်းတၵ်းႁၵ်ႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-ၵႃႈၼင်ႇဢၼ်မႂ်းလၢတ်ႈၼႆႉၸႂ်ႈယဝ်ႉ၊ဝႃႈၼင်ႇၼႆယဝ်ႉၸင်ႇ၊
၄၄ ဝၢႆႇတူၺ်းမေႈယိင်းၼၼ်ႉသေယဝ်ႉလၢတ်ႈတီႈသိမုၼ်ႇလႄႈဝႃႈ၊-မႂ်းႁၼ်မေႈယိင်းၼႆႉႁိုဝ်။မိူဝ်ႈဢၼ်ၵဝ်ၶဝ်ႈမႃးၵႃႈၼႂ်းႁိူၼ်းမႂ်းၼၼ်ႉမႂ်းဢမ်ႇပၼ်ၼမ်ႉသုၵ်ႈတိၼ်တီႈၵဝ်။
၄၅ မေႈယိင်းၵေႃႉၼႆႉၸမ်းၼမ်ႉတႃမၼ်းတူၵ်းသႂ်ႇၵႃႈၼိူဝ်တိၼ်ၵဝ်လႄႈဢဝ်ၶူၼ်ႁူဝ်မၼ်းၸဵတ်ႉယဝ်ႉ။မႂ်းဢမ်ႇၼူမ်ၵဝ်။မၼ်းၸမ်းၸႃႉၸဵမ်ၶိင်ႇမိူဝ်ႈဢၼ်ၵဝ်ၶဝ်ႈမႃးၵႃႈၼႂ်းႁိူၼ်းၼႆႉမၼ်းၼူမ်တိၼ်ၵဝ်ယူႇဢေႃႈ။
၄၆ မႂ်းဢမ်ႇဢဝ်ၼမ်ႉႁွမ်တႃးႁူဝ်ၵဝ်။မၼ်းၸမ်းဢဝ်တင်းၼမ်ႉႁွမ်တႃးတိၼ်ၵဝ်ယဝ်ႉ။
၄၇ ပိူဝ်ႈၼႆလႄႈၵဝ်ဝႃႈၸမ်းမၼ်းႁၵ်ႉၼမ်ၼႃႇလႄႈမၼ်းၵၢင်းလွတ်ႈတင်းဢပျႅတ်ႈၼမ်ၼႃႇယဝ်ႉ။ၵေႃႉဢၼ်ႁၵ်ႉၵေႇၼၼ်ႉၵၢင်းလွတ်ႈတင်းဢပျႅတ်ႈၵေႇဢေႃႈ၊ဝႃႈၼင်ႇၼႆဢေႃႈ။
၄၈ တီႈမေႈယိင်းၼၼ်ႉၵေႃႈမၼ်းၸဝ်ႈလၢတ်ႈလႄႈဝႃႈ၊-ဢပျႅတ်ႈမႂ်းလႆႈၶၢမ်ႇတၢင်းဢၼ်ပွႆႇလွတ်ႈယဝ်ႉ၊ဝႃႈၼင်ႇၼႆဢေႃႈ။
၄၉ ၶဝ်ၸိူဝ်းဢၼ်ၼင်ႈယူႇႁိမ်းတီႈၵိၼ်လူၺ်ႈၵၼ်တင်းမၼ်းၸဝ်ႈတင်းလၢႆၼၼ်ႉၵေႃႈထၢင်ႇၼႂ်းၸႂ်လႄႈဝႃႈ၊-ၵေႃႉဢၼ်ပွႆႇလွတ်ႈဢပျႅတ်ႈၼႆႉပဵၼ်ၽူႈလႂ်၊ဝႃႈၼင်ႇၼႆဢေႃႈ။
၅၀ မၼ်းၸဝ်ႈၵေႃႈလၢတ်ႈတီႈမေႈယိင်းၼၼ်ႉလႄႈဝႃႈ၊-တၢင်းယုမ်ႇမၢတ်ႈမႂ်းၵႄႇၶျွတ်ႈဢဝ်မႂ်းယဝ်ႉ။ၵႂႃႇၼိမ်ၼိမ်တႃႉ၊ဝႃႈၼင်ႇၼႆဢေႃႈ။
ထမ်ႇမႃႉ ၵျၢမ်းၵဝ်ႇ
ၵျၢမ်းငဝ်ႈၵမ်ႇၽႃႇ ၵျၢမ်းဢၼ်ဢွၵ်ႇၵွႃႇ ၵျၢမ်းဢၼ်ႁဵတ်းဝၢတ်ႈ
ၵျၢမ်းဢၼ်ယူႇၼႂ်းထိူၼ်ႇ ၵျၢမ်းဢၼ်ႁေႃးတြႃး လိၵ်ႈမၢတ်ႈလွင်ႈယေႃးသု
လိၵ်ႈမၢတ်ႈလွင်ႈၵူၼ်းလူင်ဢၼ်ၸီႇယၢင်ႇတြႃး ဝုတ်ႉထုရုထ
ထမ်ႇမႃႉရႃႇၸဝၢင်ႇၽိုၼ်ပထမ ထမ်ႇမႃႉရႃႇၸဝၢင်ႇၽိုၼ်တုတိယ
ထမ်ႇမႃႉရႃႇၸဝၢင်ႇၽိုၼ်တတိယ ထမ်ႇမႃႉရႃႇၸဝၢင်ႇၽိုၼ်ၸတုၵ်ႉထ
ရႃႇၸဝၢင်ႇၶျူၵ်ႉၽိုၼ်ပထမ ရႃႇၸဝၢင်ႇၶျူၵ်ႉၽိုၼ်တုတိယ
လိၵ်ႈမၢတ်ႈလွင်ႈဢေႇၸရ လိၵ်ႈမၢတ်ႈလွင်ႈၼေႇႁမိ ဝုတ်ႉထုဢေးသတႃႇ
ဝုတ်ႉထုယေႃႇၽ ၵျၢမ်းသႃႇလၢမ်ႇ ၵျၢမ်းလိၵ်ႈသုၵ်ႉတၢမ်ႇ
လိၵ်ႈႁဵတ်းၵႂၢမ်းသေႃးလမုၼ်ႇ ၵျၢမ်းဢၼႃႇၵၢတ်ႈတိဢိသႃႇယ
ၵျၢမ်းဢၼႃႇၵၢတ်ႈတိယေႇရမိ တၢင်းဢၼ်ယေႇရမိပွင်ႉၶင်းပွင်ႉဝႃႈ
ၵျၢမ်းဢၼႃႇၵၢတ်ႈတိယေႇၸၵျေႇလ ၵျၢမ်းဢၼႃႇၵၢတ်ႈတိတၢၼ်ႇယေႇလ
ၵျၢမ်းဢၼႃႇၵၢတ်ႈတိႁူဝ်ႇသေႇ ၵျၢမ်းဢၼႃႇၵၢတ်ႈတိယုဝ်းဢေႇလ
ၵျၢမ်းဢၼႃႇၵၢတ်ႈတိဢႃႇမုတ်ႉ ပျႃႇတိၵ်ႉယူႇပႃႇရုင်ႇဢေႃႇပတိ
ၵျၢမ်းဢၼႃႇၵၢတ်ႈတိမိၶႃႇ ၵျၢမ်းဢၼႃႇၵၢတ်ႈတိၼႃႇႁူမ်ႇ
ၵျၢမ်းဢၼႃႇၵၢတ်ႈတိႁပၵ်ႉၵုၵ်ႉ ၵျၢမ်းဢၼႃႇၵၢတ်ႈတိၸေႇပၼိ
ၵျၢမ်းဢၼႃႇၵၢတ်ႈတိႁၵ်ႉၵေး ၵျၢမ်းဢၼႃႇၵၢတ်ႈတိၸႃႇၶရိ
ထမ်ႇမႃႉ ၵျၢမ်းမႂ်ႇ
ၶၢဝ်ႇငၢဝ်းသတၢင်းသိူဝ်းပျေႃႇမၢတ်ႈထႄႇ ၶၢဝ်ႇငၢဝ်းသတၢင်းသိူဝ်းပျေႃႇမႃႇၵု
ၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ ၶၢဝ်ႇငၢဝ်းသတၢင်းသိူဝ်းပျေႃႇယုဝ်းႁၢၼ်ႇ
ဝုတ်ႉထုတမၢၼ်ႇၸဝ်ႈ လိၵ်ႈဢေႃးဝႃႇတႃႉရူဝ်းမ
လိၵ်ႈဢေႃးဝႃႇတႃႉၵေႃ:ရဵၼ်ႇထုၽိုၼ်ပထမ
လိၵ်ႈဢေႃးဝႃႇတႃႉၵေႃ:ရဵၼ်ႇထုၽိုၼ်တုတိယ လိၵ်ႈဢေႃးဝႃႇတႃႉၵလႃႇတိ
လိၵ်ႈဢေႃးဝႃႇတႃႉဢေးၽႅတ်ႈ လိၵ်ႈဢေႃးဝႃႇတႃႉၽိလိပ်ႉပိ
လိၵ်ႈဢေႃးဝႃႇတႃႉထိၵ်ႈသႃႇလေႃးၼိၵ်ႈၽိုၼ်ပထမ
လိၵ်ႈဢေႃးဝႃႇတႃႉထိၵ်ႈသႃႇလေႃးၼိၵ်ႈၽိုၼ်တုတိယ
လိၵ်ႈဢေႃးဝႃႇတႃႉတိမေႃးသေႇၽိုၼ်ပထမ
လိၵ်ႈဢေႃးဝႃႇတႃႉတိမေႃးသေႇၽိုၼ်တုတိယ လိၵ်ႈဢေႃးဝႃႇတႃႉတိတု
လိၵ်ႈဢေႃးဝႃႇတႃႉၽိလေႇမုၼ်ႇ လိၵ်ႈဢေႃးဝႃႇတႃႉႁေႇပြႄး
လိၵ်ႈဢေႃးဝႃႇတႃႉယႃႇၵုပ်ႉ လိၵ်ႈဢေႃးဝႃႇတႃႉပေႇတရုၽိုၼ်ပထမ
လိၵ်ႈဢေႃးဝႃႇတႃႉပေႇတရုၽိုၼ်တုတိယ
လိၵ်ႈဢေႃးဝႃႇတႃႉယုဝ်းႁၢၼ်ႇၽိုၼ်ပထမ
လိၵ်ႈဢေႃးဝႃႇတႃႉယုဝ်းႁၢၼ်ႇၽိုၼ်တုတိယ
လိၵ်ႈဢေႃးဝႃႇတႃႉယုဝ်းႁၢၼ်ႇၽိုၼ်တတိယ
လိၵ်ႈဢေႃးဝႃႇတႃႉယုတ ၵျၢမ်းပျႃႇတိၵ်ႈ