ၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

ၵျၢမ်းၶၢဝ်ႇငၢဝ်ႊသတၢင်းသိူဝ်းပျေႃႇလုၵႃႇ

ၵႂၢမ်းၼမ်း

ၽူႈတႅမ်ႈၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇၼႆႉပဵၼ်တပႄးၸဝ်ႈယေႇသုပႃးၼိုင်ႈဢၼ်လႆႈမီးၸိုဝ်ႈဝႃႈလုၵႃႇၼၼ်ႉဢေႃႈ။မၼ်းဢမ်ႇၸႂ်ႈၵူၼ်းမဵဝ်းယုတ။မၼ်းပဵၼ်ၶူးမေႃယႃ၊ပဵၼ်ၵေႃႉသေႈပေႃးလုဢေႃႈ။ပဵၼ်ၵျၢမ်းဢၼ်ဢဝ်တင်းလိၵ်ႈၵရိၵ်ႉတႅမ်ႈဝႆႉမိူဝ်ႈပီႊသၢၵ်ႈၵရိၸ်ႉ A.D. ၆၀ ၼၼ်ႉဢေႃႈ။လႆႈႁူႉဝႃႈတႅမ်ႈတီႈမိူင်းဢိတလိ၊ဝဵင်းရူဝ်းမ၊ဝႃႈၼႆဢေႃႈ။

ဢဵၼ်းဢၢၼ်းၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇၸမ်း၊ၶႂ်ႈႁႂ်ႈၵူၼ်းယုမ်ႇမၢတ်ႈၸဝ်ႈယေႇသုတင်းလၢႆတၵ်းမီးဢဵၼ်ႁႅင်းၼႂ်းတၢင်းယုမ်ႇမၢတ်ႈၸဝ်ႈယေႇသုလႄႈႁေႃးမွၵ်ႇလၢတ်ႈၶၢဝ်ႇငၢဝ်းသတၢင်းသိူဝ်းပျေႃႇၵူႈတီႈၵူႈလႅၼ်ၼၼ်ႉဢေႃႈ။

လွင်ႈတၢင်းဢၼ်ၶဝ်ႈပႃးၼႂ်းၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇၸမ်း၊-

၁။ၵႂၢမ်းၼမ်း။(၁:၁)-

၂။လွင်ႈတၢင်းဢၼ်ၸဝ်ႈယေႇသုၶၢမ်ႇတၢင်းဢၼ်ၵိူတ်ႇလဵင်ႉမႃး။(၁:၅)-(၂:၅၂ )

၃။လွင်ႈတၢင်းဢၼ်မႄးႁႅၼ်းပုၼ်ႈဢမူႉတေႃႇမျၢတ်ႈၽြႃးပဵၼ်ၸဝ်ႈ။(၃:၁)-(၄:၁၃ )

၄။လွင်ႈဢမူႉတေႃႇမျၢတ်ႈၸဝ်ႈယေႇသုၼႂ်းမိူင်းၵႃႇလိလႄး။(၄:၁၄ )-(၉:၉)

၅။လွင်ႈဢမူႉတေႃႇမျၢတ်ႈၸဝ်ႈယေႇသုၼႂ်းဢိုင်ႇမိူင်းၵႃႇလိလႄး။(၉:၁၀ )-

၆။လွင်ႈဢမူႉတေႃႇမျၢတ်ႈၸဝ်ႈယေႇသုၼႂ်းမိူင်းယုတ။(၉:၅၇ )-(၁၃ :၂၈ )

၇။လွင်ႈဢမူႉတေႃႇမျၢတ်ႈၸဝ်ႈယေႇသုၼႂ်းဢိုင်ႇမိူင်းၵႃႇလိလႄး။(၁၃ :၂၉ )-(၁၉ :၂၇ )

၈။လွင်ႈတၢင်းဢၼ်ၸဝ်ႈယေႇသုၶၢမ်ႇတၢင်းတၢႆလႄႈလုၵ်ႉၵႃႈတၢင်းတၢႆၶိုၼ်းလိပ်း။(၁၉ :၂၈ )-(၂၄ :၅၃ )

Chapter ၁ ၂ ၃ ၄ ၅ ၆ ၇ ၈ ၉ ၁၀ ၁၁ ၁၂ ၁၃ ၁၄ ၁၅ ၁၆ ၁၇ ၁၈ ၁၉ ၂ ၀ ၂၁ ၂၂ ၂၃ ၂၄

၁

၁ ထေႃႇၽိလုဢၼ်လီၶႃႈဢိူၺ်း။ဢၼ်ၵူၼ်းၼမ်ၼႃႇၸီႇယၢင်ႇတႅမ်ႈဝႆႉလိၵ်ႈဢၼ်မၢတ်ႈမၢႆဝႆႉလွင်ႈတၢင်းဢထုၵ်ႉပတ်ႈတိဢၼ်လႆႈပဵၼ်မႃးယဝ်ႉထၢင်ႇထၢင်ႇသႃးသႃးၵႃႈၼႂ်းႁဝ်းလႄႈ၊

၂ ၵႃႈၼင်ႇဢၼ်ၶဝ်ၸိူဝ်းဢၼ်ပဵၼ်သၢၵ်ႈသေႇလွင်ႈတၢင်းဢၼ်တူဝ်ၸဝ်ႈၵဝ်ႇလႆႈႁၼ်ၸဵမ်မိူဝ်ႈၵေႃႇၸႃႉမၼ်းလႄႈပွင်ႁဵတ်းဢမူႉၼုၵ်ႉၵပၢတ်ႈၸဝ်ႈၸိူဝ်းၼၼ်ႉလၢတ်ႈပၼ်ဝႆႉတီႈႁဝ်းၼၼ်ႉ၊

၃ ၵဝ်ၵေႃႈၸွမ်းႁႃၸႅတ်ႈတူၺ်းဢထုၵ်ႉပတ်ႈတိၵႃႈမီးတင်းသဵင်ႈတင်းလူင်ၸႃႉၸဵမ်ငဝ်ႈႁၢၵ်ႈမၼ်းၸေးၸေးၸွတ်ႇၸွတ်ႇယဝ်ႉၸင်ႇၼင်ႇႁိုဝ်ၸဝ်ႈႁဝ်းတၵ်းႁူႉလွင်ႈတၢင်းဢၼ်ၸိုဝ်ႈဢၼ်ၸႂ်ႈၸိုင်

၄ ၵဝ်ၸင်ႇမီးတၢင်းၵျၢမ်ႇတၢင်းပွင်လႄႈတႅမ်ႈၸွမ်းၸႅၼ်ႇတၢမ်းၵၼ်သေယဝ်ႉပၼ်ငိၼ်းၵႂႃႇၶႃႈဢေႃႈ။

ပျႃႇတိၵ်ႈလွင်ႈတၢင်းဢၼ်ယုဝ်းႁၢၼ်ႇၵိူတ်ႇလဵင်ႉ

၅ ၼႂ်းၸူဝ်ႈပၢၼ်ႈၶုၼ်လူင်ႁေႇရုတ်ႉဢၼ်ဢုပ်ႉပိူင်ႇမိူင်းယုတၼၼ်ႉမီးယိတ်ႉပရေႃးႁိၵ်ႈပႃးၼိုင်ႈဢၼ်လႆႈၸိုဝ်ၸႃႇၶရိ၊ဢၼ်ၸၢပ်ႈသႅင်ႇၵၼ်တင်းမုၵ်ႉၸိူဝ်းဢၽိယၼၼ်ႉဢေႃႈ။မေးမၼ်းပဵၼ်ၸိူဝ်ႉၶိူဝ်းဢႃႇရုၼ်ႇလႄႈမီးၸိုဝ်ဝႃႈဢေးလိသၽႅတ်ႉဢေႃႈ။

၆ သွင်ၶႃၼၼ်ႉၵမ်ၵျၢင်ႉပိင်းၺၢပ်ႈတြႃးဢူႉပတေႇထႃႇဝရႃႉၽြႃးၵူႈၸိူဝ်ႉၵူႈပိူင်လႄႈဢမ်ႇမီးတီႈဢၼ်တၢင်ႇဢပျႅတ်ႈလႄႈမီးပႃႇရမီႇတၢင်းဢၼ်သိုဝ်ႈတေႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။

၇ ဢေးလိသၽႅတ်ႉပဵၼ်မေႈယိင်းဢၼ်မၼ်လႄႈၶဝ်ဢမ်ႇမီးလုၵ်ႈမီးလၢင်း။သွင်ၶႃၼၼ်ႉဢသၢၵ်ႈၵႄႇလႄႈထဝ်ႈယဝ်ႉဢေႃႈ။

၈ ၼႂ်းမိူဝ်ႈဢၼ်ၸိူဝ်ႉၶိူဝ်းၸႃႇၶရိလႆႈပုၼ်ႈၽွၼ်းဢၼ်ပွင်ႁဵတ်းၵၢၼ်ယိတ်ႉပရေႃးႁိၵ်ႈၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉၸိုင်ၵႃႈၼင်ႇထုင်းၸၢမ်ႇဢရႃႇယိတ်ႉပရေႃးႁိၵ်ႈမီးၼၼ်ႉ

၉ ၸႃႇၵွၵ်ႈတူၵ်းၵႃႈတီႈၸႃႇၶရိလႄႈမၼ်းလႆႈဢၶႂင်ႉၶဝ်ႈၵႃႈၼႂ်းႁိူၼ်းပိၵ်ႉမၢၼ်ႇထႃႇဝရႃႉၽြႃးသေယဝ်ႉဢဝ်ၼၢမ်ႇသႃႇတုတ်ႇၽႆးဢေႃႈ။

၁၀ ၼႂ်းမိူဝ်ႈဢၼ်ဢဝ်ၼၢမ်ႇသႃႇတုတ်ႇၽႆးယူႇၼၼ်ႉၵူၼ်းတင်းသဵင်ႈတင်းလူင်သူးတွင်းယူႇၵႃႈၼွၵ်ႈပိၵ်ႉမၢၼ်ႇဢေႃႈ။

၁၁ မိူဝ်ႈၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးတီႈမၼ်းလႄႈၸုၵ်းယူႇၵႃႈတီႈၽၢႆႇၶႂႃယိတ်ႉပလၢင်ႇဢၼ်တုတ်ႇၽႆးၼၢမ်ႇသႃႇၼၼ်ႉဢေႃႈ။

၁၂ ၸႃႇၶရိၼၼ်ႉမိူဝ်ႈဢၼ်ႁၼ်တမၢၼ်ႇၵၢင်ႁၢဝ်ၼၼ်ႉၸိုင်မီးၸႂ်ဢၼ်ဢမ်ႇတႄႇဢမ်ႇၼိမ်လႄႈတူၵ်းၸႂ်ဢေႃႈ။

၁၃ တမၢၼ်ႇၵၢင်ႁၢဝ်ၵေႃႈလၢတ်ႈလႄႈဝႃႈ၊-ၸႃႇၶရိဢိူၺ်း၊ယႃႇပေၵူဝ်ပေႁႄ။ပထၼႃႇဢၼ်မႂ်းႁဵတ်းၼၼ်ႉမၼ်းၸဝ်ႈထွမ်ႇဢဝ်ယဝ်ႉ။မေးမႂ်းဢေးလိသၽႅတ်ႉၼၼ်ႉတၵ်းၵိူတ်ႇလဵင်ႉမႃးလုၵ်ႈၸၢႆးဢေႃႈ။လုၵ်ႈၸၢႆးၼၼ်ႉၸိုင်တၵ်းလႆႈႁွင်ႉႁိၵ်ႈၸိုဝ်ယုဝ်းႁၢၼ်ႇဢေႃႈ။

၁၄ မႂ်းတၵ်းမီးတၢင်းဢၼ်ၸူမ်းသိူဝ်းမူၼ်ႈပျေႃႇဢေႃႈ။ၵွပ်ႈပိူဝ်ႈၵိူတ်ႇလဵင်ႉမၼ်းမႃးလႄႈၵူၼ်းၼမ်ၼႃႇၵေႃႈတၵ်းႁွတ်ႈထိုင်တၢင်းဢၼ်သိူဝ်းပျေႃႇဢေႃႈ။

၁၅ လွင်ႈမၼ်းၸမ်းမၼ်းတၵ်းပဵၼ်ၵေႃႉဢၼ်ယႂ်ႇမျၢတ်ႈၼႃႇၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။မၼ်းတၵ်းဢမ်ႇၵိၼ်ၼမ်ႉၸပိတ်ႉၼမ်ႉလဝ်ႈ။ၸႃႉၸဵမ်ၵႃႈၼႂ်းတွင်ႉမေႈမၼ်းၼၼ်ႉမၼ်းတၵ်းတဵမ်ထူၼ်ႈဝႆႉတင်းဝိၺိၺ်ႇမူတ်းၸၢင်ႇၸဝ်ႈဢေႃႈ။

၁၆ တၵ်းႁႂ်ႈၵူၼ်းၸိူဝ်ႉၶိူဝ်းဢိသရေႇလၼမ်ၼႃႇၶၢႆႉပုတ်ႈမႃးၵႃႈတီႈၽၢႆႇထႃႇဝရႃႉၽြႃးပဵၼ်ၸဝ်ႈဢေႃႈ။

၁၇ ၼင်ႇႁိုဝ်တၵ်းႁႂ်ႈပေႃႈတင်းလၢႆလုၵ်ႈတင်းလၢႆလႆႈထုၵ်ႇၵၼ်ႁင်းၽႂ်ႁင်းမၼ်းလႄႈၶဝ်ၸိူဝ်းဢၼ်ထဵင်ပႅတ်ႈၼၼ်ႉၶၢႆႉပုတ်ႈမႃးၵႃႈတီႈသဵၼ်ႈတၢင်းပိင်ႇၺႃႇသတိၵူၼ်းသိုဝ်ႈတေႃႇတင်းလၢႆလႄႈသင်၊ၼင်ႇႁိုဝ်တၵ်းႁႂ်ႈပဵၼ်မဵဝ်းၵူၼ်းဢၼ်မႄးႁႅၼ်းဝႆႉပုၼ်ႈထႃႇဝရႃႉၽြႃးလႄႈသင်၊မၼ်းတၵ်းတဵမ်ဝႆႉတင်းဝိၺိၺ်ႇဢိၵ်ႇတင်းတၼ်းၶူဝ်းဢေးလိယသေယဝ်ႉၵႂႃႇၵႃႈတီႈၽၢႆႇၼႃႈထႃႇဝရႃႉၽြႃးပဵၼ်ႈၸဝ်ႈဢေႃႈ၊ဝႃႈၼင်ႇၼႆဢေႃႈ။

၁၈ ၸႃႇၶရိၵေႃႈလဝ်ႈလၢတ်ႈတီႈတမၢၼ်ႇၵၢင်ႁၢဝ်ၼၼ်ႉလႄႈဝႃႈ၊-လွင်ႈဢၼ်တၵ်းပဵၼ်ၸိူဝ်ႉၼင်ႇၼၼ်ၸိုင်ၵဝ်ၶႃးတၵ်းလႆႈႁူႉၸိူဝ်ႉၼင်ႇႁိုဝ်ၶႃႈ။ၵဝ်ၶႃႈပဵၼ်ၵူၼ်းထဝ်ႈယဝ်ႉၶႃႈဢေႃႈ။မေးၵဝ်ၶႃႈၵေႃႈဢသၢၵ်ႈၵႄႇလႄႈထဝ်ႈၶႃႈယဝ်ႉမိူဝ်ႈဢၼ်ဝႃႈၼင်ႇၼႆၸိုင်တမၢၼ်ႇၵၢင်ႁၢဝ်ၵေႃႈၶိုၼ်းလၢတ်ႈလႄႈဝႃႈ၊-

၁၉ ၵဝ်ပဵၼ်ၵေႇပျေႇလဢၼ်လႆႈၸုၵ်းပႂ်ႉယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉဢေႃႈ။မၼ်းၸဝ်ႈပွႆႇၸႂ်ႉၵဝ်မႃးႁႂ်ႈလႆႈတၵ်ႉလၢတ်ႈမႂ်းလႄႈမွၵ်ႇလၢတ်ႈပၼ်သတၢင်းသိူဝ်းပျေႃႇၼႆႉယဝ်ႉ။တူၺ်းလူႊ။

၂၀ ၵွပ်ႈပိူဝ်ႈဢၼ်မႂ်းဢမ်ႇယုမ်ႇၵႂၢမ်းၵဝ်ဢၼ်တၵ်းတဵမ်ထူၼ်ႈမိူဝ်ႈၶိင်ႇၼၼ်ႉလႄႈၸႃႉဢဝ်တေႃႈလဵဝ်ၼႆႉၵႂႃႇတေႃႇထိုင်ႁွတ်ႈၸူဝ်ႈဢၼ်လွင်ႈတၢင်းၸိူဝ်းၼႆႉဢမ်ႇပႆႇပဵၼ်မႃးၼၼ်ႉမႂ်းတၵ်းဢႃႉလႄႈဢမ်ႇလၢတ်ႈၵႂၢမ်းလႆႈ၊ဝႃႈၼင်ႇၼႆဢေႃႈ။

၂၁ ၵူၼ်းတင်းလၢႆၵေႃႈပႂ်ႉထႃႈၸႃႇၶရိယူႇၵႃႈၼွၵ်ႈလႄႈဢၢမ်းလွင်ႈဢၼ်မၼ်းယူႇႁိုင်ၼႃႇၵႃႈၼႂ်းႁိူၼ်းပိၵ်ႉမၢၼ်ႇၸဝ်ႈၼၼ်ႉဢေႃႈ။

၂၂ မိူဝ်ႈဢၼ်မၼ်းဢွၵ်ႇမႃးၼၼ်ႉၸိုင်မၼ်းဢမ်ႇလၢတ်ႈၵႂၢမ်းလႆႈယဝ်ႉ။ၶဝ်ႁူႉလွင်ႈဢၼ်ဝႃႈမၼ်းလႆႈႁၼ်ပျႃႇတိၵ်ႈရူႇပႃႇရူင်ႇၼႂ်းပိၵ်ႉမၢၼ်ႇၸဝ်ႈယဝ်ႉၼၼ်ႉဢေႃႈ။ၸႃႇၶရိၼၼ်ႉဢႃႉယူႇလႄႈၼႄတိၼ်ၼႄမိုဝ်းတီႈၶဝ်ၵူၺ်းဢေႃႈ။

၂၃ ဝၢႆးသေၶိင်ႇဢၼ်ႁဵတ်းၵၢၼ်ယိတ်ႉပရေႃးႁိၵ်ႈသဵင်ႈယဝ်ႉၼၼ်ႉၸိုင်ၸႃႇၶရိၵႂႃႇၸူးၵႃႈတီႈႁိူၼ်းတူဝ်ၸဝ်ႈၵဝ်ႇဢေႃႈ။

၂၄ လိုၼ်းၼၼ်ႉမေးမၼ်းဢေးလိသၽႅတ်ႉပႃးပတိၵ်ႉသၼ်ႇထေႇလႄႈႁႃႈလိူၼ်တဵမ်တဵမ်ထင်ႉယူႇၵႃႈၼႂ်းႁိူၼ်းလႄႈဝႃႈ၊-

၂၅ ထႃႇဝရႃႉၽြႃးလူတူၺ်းၵဝ်ၶႃႈၼင်ႇႁိုဝ်ၵဝ်ၶႃႈတေလႆႈလွတ်ႈသေတၢင်းဢၼ်ပိူၼ်ႈသေႉသွမ်းၵႃႈၼႂ်းၵူၼ်းတင်းလၢႆၼၼ်ႉယဝ်ႉ။မၼ်းၸဝ်ႈႁဵတ်းၵျေးၸူးၸိူဝ်ႉၼင်ႇၼႆယဝ်ႉ၊ဝႃႈၼင်ႇၼႆဢေႃႈ။

ပျႃႇတိၵ်ႈလွင်ႈတၢင်းဢၼ်ၸဝ်ႈယေႇသုၵိူတ်ႇလဵင်ႉ

၂၆ မိူဝ်ႈဢၼ်ၶဝ်ႈၼႂ်းႁူၵ်းလိူၼ်ၸိုင်ၽြႃးပဵၼ်ၸဝ်ႈပွႆႇၸႂ်ႉတမၢၼ်ႇၵၢင်ႁၢဝ်ၵေႇပျေႇလမႃးၵႃႈတီႈဝဵင်းဢၼ်လႆႈၸိုဝ်ဝဵင်းၼႃႇၸရႅတ်ႉၼႂ်းမိူင်းၵႃႇလိလႄးမႃးၸူးၵႃႈတီႈၵၼ်ႇၺႃႇလုၵ်ႈယိင်းသၢဝ်ဢၼ်လႆႈမၢႆၵၼ်ဝႆႉတင်းၵေႃႉဢၼ်လႆႈၸိုဝ်ယုဝ်းသႅပ်ႉဢၼ်ပဵၼ်ၸိူဝ်ႉၶိူဝ်းတႃႇဝိတ်ႉၼၼ်ႉဢေႃႈ။

၂၇ ၵၼ်ႇၺႃႇလုၵ်ႈယိင်းသၢဝ်ၼၼ်ႉၸမ်းလႆႈၸိုဝ်ဝႃႈမႃႇရိဝႃႈၼႆဢေႃႈ။

၂၈ တမၢၼ်ႇၵၢင်ႁၢဝ်ၼၼ်ႉႁွတ်ႈမႃးၵႃႈတီႈမၼ်းသေယဝ်ႉလၢတ်ႈဝႃႈ၊-မေႈယိင်းဢၼ်လႆႈၶၢမ်ႇဢဝ်ၵျေးၸူးၽြႃးပဵၼ်ၸဝ်ႈၼႆႉဢိူၺ်း၊ႁႂ်ႈမင်ႇၵလႃႇမီးတီႈမႂ်းသေၵမ်းလူၺ်ႈ။ထႃႇဝရႃႉၽြႃးမီးယူႇလူၺ်ႈၵၼ်တင်းမႂ်းဢေႃႈ။ၼႂ်းမေႈယိင်းတင်းလၢႆၼၼ်ႉမႂ်းမီးမင်ႇၵလႃႇဢၼ်ယႂ်ႇမျၢတ်ႈၼႃႇသေပိူၼ်ႈဢေႃႈ၊ဝႃႈၼင်ႇၼႆဢေႃႈ။

၂၉ မႃႇရိၼၼ်ႉမီးၸႂ်ဢၼ်ဢမ်ႇတႄႇဢမ်ႇၼိမ်လႄႈၶႆႈၸႂ်ဝူၼ်ႉၸႂ်လႄႈဝႃႈ၊-တၢင်းဢၼ်တၵ်ႉလၢတ်ႈၼႆႉၸမ်းပဵၼ်တၢင်းဢၼ်တၵ်ႉလၢတ်ႈၸိူဝ်ႉၼင်ႇႁိုဝ်လေႃး၊ဝႃႈၼင်ႇၼႆဢေႃႈ။

၃၀ တမၢၼ်ႇၵၢင်ႁၢဝ်ၼၼ်ႉၵေႃႈလၢတ်ႈလႄႈဝႃႈ၊-မႃႇရိဢိူၺ်း၊ယႃႇပေၵူဝ်ပေႁႄ။မႂ်းလႆႈၼႃႈလႆႈတႃၵႃႈတီႈၽၢႆႇၼႃႈၽြႃးပဵၼ်ၸဝ်ႈယဝ်ႉ။

၃၁ မႂ်းတၵ်းပႃးပတိၵ်ႉသၼ်ႇထေႇလႄႈၵိူတ်ႇလဵင်ႉမႃးလုၵ်ႈၸၢႆးဢေႃႈ။လုၵ်ႈၸၢႆးၼၼ်ႉၸိုင်တၵ်းလႆႈႁွင်ႉႁိၵ်ႉၸိုဝ်ဝႃႈ၊-

၃၂ ယေႇသုဢေႃႈ။မၼ်းတၵ်းပဵၼ်ၽူႈဢၼ်ယႂ်ႇမျၢတ်ႈၼႃႇဢေႃႈ။မၼ်းတၵ်းလႆႈၶၢမ်ႇတၢင်းဢၼ်ႁွင်ႉႁိၵ်ႈဝႃႈ၊-လုၵ်ႈၽြႃးပဵၼ်ၸဝ်ႈဢၼ်သုင်ဢၼ်မျၢတ်ႈၼႃႇသေပိူၼ်ႈၼၼ်ႉဢေႃႈ။ၽြႃးပဵၼ်ၸဝ်ႈထႃႇဝရႃႉၽြႃးတၵ်းပၼ်ရႃႇၸႃႉပလၢင်ႇပေႃႈမၼ်းတႃႇဝိတ်ႉၼၼ်ႉၵႃႈတီႈမၼ်းဢေႃႈ။

၃၃ မၼ်းတၵ်းဢုပ်ႉပိူင်ႇၸိူဝ်ႉၶိူဝ်းယႃႇၵုပ်ႉတႃႇသေႇဢမ်ႇထၢတ်ႇဢေႃႈ။မိူင်းမၼ်းၵေႃႈတၵ်းဢမ်ႇမီးတီႈသုတ်းတီႈသဵင်ႈ၊ဝႃႈၼင်ႇၼႆဢေႃႈ။

၃၄ မႃႇရိၵေႃႈထၢမ်တီႈတမၢၼ်ႇၵၢင်ႁၢဝ်ၼၼ်ႉလႄႈဝႃႈ၊-ပိူဝ်ႈဢၼ်ၵဝ်ၶႃႈယင်းဢမ်ႇလႆႈတိူဝ်ႉလႆႈထုၵ်ႇၵၼ်တင်းၵူၼ်းၸၢႆးလႄႈလွင်ႈတီႈႁႅင်းၼႆႉတၵ်းပဵၼ်လႆႈၸိူဝ်ႉၼင်ႇႁိုဝ်ၶႃႈ၊ဝႃႈၼင်ႇၼႆဢေႃႈ။

၃၅ တမၢၼ်ႇၵၢင်ႁၢဝ်ၵေႃႈၶိုၼ်းလၢတ်ႈလႄႈဝႃႈ၊-ဝိၺိၺ်ႇမူတ်းၸၢင်ႇၸဝ်ႈတၵ်းလူင်းမႃးၵႃႈၼိူဝ်မႂ်းလႄႈမူၼ်တၼ်းၶူဝ်းၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈၼၼ်ႉတၵ်းႁူမ်ႇလူမ်ႈမႂ်းဢေႃႈ။ၵွပ်ႈပိူဝ်ႈလွင်ႈတီႈႁႅင်းၼႆႉလႄႈလုၵ်ႈၸၢႆးဢၼ်မူတ်းၸၢင်ႇၼၼ်ႉတၵ်းလႆႈၶၢမ်ႇတၢင်းဢၼ်ႁွင်ႉႁိၵ်ႈလုၵ်ႈၽြႃးပဵၼ်ၸဝ်ႈဢေႃႈ။

၃၆ တူၺ်းလူႊ၊ဢေးလိသၽႅတ်ႉ၊ဢၼ်ပဵၼ်ယႃႈထဝ်ႈဢၼ်လႆႈႁွင်ႉႁိၵ်ႈမေႈယိင်းဢၼ်မၼ်၊ဢၼ်ပဵၼ်ပီႈၼွင်ႉမႂ်းၼၼ်ႉယင်းပေႃးပႃးပတိၵ်ႉသၼ်ႇထေႇဝႆႉၶဝ်ႈၼႂ်းႁူၵ်းလိူၼ်ယဝ်ႉ။

၃၇ ၵႂၢမ်းၽြႃးပဵၼ်ၸဝ်ႈဢၼ်ဢမ်ႇပႃးတၼ်းၶူဝ်းၼၼ်ႉဢမ်ႇမီးသေၶေႃႈ၊မိူဝ်ႈဢၼ်ဝႃႈၼင်ႇၼႆၸိုင်မႃႇရိၵေႃႈလၢတ်ႈလႄႈဝႃႈ၊-

၃၈ ၵဝ်ၶႃႈၼႆႉပဵၼ်ၶႃႈၸဝ်ႈၽြႃးၶႃႈဢေႃႈ။ၵႃႈၼင်ႇဢၼ်ၵႂၢမ်းၸဝ်ႈႁဝ်းမီးၼၼ်ႉႁႂ်ႈပဵၼ်တီႈၵဝ်ၶႃႈသေၵမ်းၶႃႈ၊ဝႃႈၼင်ႇၼႆယဝ်ႉၸင်ႇတမၢၼ်ႇၵၢင်ႁၢဝ်ၵေႃႈဢွၵ်ႇသေၵႃႈတီႈၼၼ်ႉၵႂႃႇဢေႃႈ။

၃၉ ဝၢႆးၼၼ်ႉမႃႇရိလုၵ်ႉလႄႈၵႂႃႇၵႃႈတီႈဝဵင်းဢၼ်မီးၼႂ်းႁူၺ်ႈၼႂ်းလွႆဢၼ်မီးၼႂ်းဢိုင်ႇမိူင်းယုတၼၼ်ႉယဝ်ႉၸင်ႇ

၄၀ ၶဝ်ႈၵႃႈၼႂ်းႁိူၼ်းၸႃႇၶရိလႄႈတၵ်ႉလၢတ်ႈဢေးလိသၽႅတ်ႉဢေႃႈ။

၄၁ ၼႂ်းမိူဝ်ႈဢၼ်ဢေးလိသၽႅတ်ႉငိၼ်းၵႂၢမ်းဢၼ်တၵ်ႉလၢတ်ႈၼၼ်ႉၸိုင်လုၵ်ႈဢွၼ်ႇဢၼ်မီးၼႂ်းတွင်ႉမၼ်းၼၼ်ႉၵျွၵ်းဝႅၼ်ၵမ်းလဵဝ်ဢေႃႈ။

၄၂ ဢေးလိသၽႅတ်ႉၼၼ်ႉတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈလႄႈႁဵတ်းတင်းသဵင်ဢၼ်ယႂ်ႇၼႃႇမွၵ်ႇလၢတ်ႈလႄႈဝႃႈ၊-ၼႂ်းမေႈယိင်းတင်းလၢႆၼႆႉမႂ်းမီးမင်ႇၵလႃႇဢၼ်ယႂ်ႇမျၢတ်ႈၼႃႇသေပိူၼ်ႈဢေႃႈ။မၢၵ်ႇတွင်ႉမႂ်းၼႆႉၵေႃႈမီးမင်ႇၵလႃႇဢၼ်ယႂ်ႇမျၢတ်ႈၼႃႇဢေႃႈ။

၄၃ ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈၵဝ်ၶႃႈလႆႈၶၢမ်ႇသူႉၵျေးၸူးတေႃႇထိုင်ႁွတ်ႈထၼ်ႈပေႃးမေႈၸဝ်ႈၽြႃးၵဝ်ၶႃႈမႃးၸူးတီႈၵဝ်ၶႃႈ။

၄၄ တူၺ်းလူႊၼႂ်းမိူဝ်ႈဢၼ်ၵဝ်ၶႃႈငိၼ်းၵႂၢမ်းဢၼ်မႂ်းၼၢင်းတၵ်ႉလၢတ်ႈၵဝ်ၶႃႈယူႇၼၼ်ႉလုၵ်ႈဢွၼ်ႇဢၼ်မီးၼႂ်းတွင်ႉၵဝ်ၶႃႈၼႆႉမီးၸႂ်ဢၼ်သိူဝ်းၸူမ်းလႄႈၵျွၵ်းဝႅၼ်ယူႇၶႃႈဢေႃႈ။

၄၅ ႁႂ်ႈမေႈယိင်းဢၼ်ယုမ်ႇမၢတ်ႈၵႂၢမ်းၸဝ်ႈၽြႃးတၵ်းလႆႈတဵမ်ထူၼ်ႈၼၼ်ႉမီးမင်ႇၵလႃႇသေၵမ်း၊ဝႃႈၼင်ႇၼႆဢေႃႈ။

၄၆ မႃႇရိၵေႃႈလၢတ်ႈလႄႈဝႃႈ၊-ႁူဝ်ၸႂ်ၵဝ်ယွင်ႈယေႃးၸဝ်ႈၽြႃးဢေႃႈ။

၄၇ ဝိၺိၺ်ႇၵဝ်မီးတၢင်းဢၼ်သိူဝ်းၸူမ်းၼႂ်းၽြႃးပဵၼ်ၸဝ်ႈၸဝ်ႈဢၼ်ၵႄႇၶျွတ်ႈဢဝ်ၵဝ်ၼၼ်ႉဢေႃႈ။

၄၈ လွင်ႈမၼ်းၸမ်းမၼ်းၸဝ်ႈလူတူၺ်းၶႃႈမၼ်းၸဝ်ႈဢၼ်ၶျႃးတႅမ်ႇၼႆႉယူႇယဝ်ႉ။တူၺ်းလူႊ။ၸႃႉၸဵမ်မိူဝ်ႈလဵဝ်ၼႆႉၵူၼ်းသိုပ်ႇသိုပ်ႇတၢမ်ႈတၢမ်ႈတင်းသဵင်ႈတင်းလူင်တၵ်းႁွင်ႉႁိၵ်ႈၵဝ်ပဵၼ်ၵေႃႉဢၼ်မီးမင်ႇၵလႃႇယဝ်ႉ။

၄၉ ၸဝ်ႈဢၼ်တဵမ်ဝႆႉတင်းတၼ်းၶူဝ်းၼၼ်ႉႁဵၼ်းပၼ်လွင်ႈတၢင်းဢၼ်ယႂ်ႇဢၼ်မျၢတ်ႈၼႃႇတီႈၵဝ်ယဝ်ႉ။ၼႃႇမႃႉၸိုဝ်သဵင်မၼ်းၸဝ်ႈၼၼ်ႉပဵၼ်တီႈဢၼ်ထုၵ်ႇလီရူဝ်ႇသေႇၵူဝ်ယမ်ၼႃႇဢေႃႈ။

၅၀ ၵျေးၸူးဢၼ်မၼ်းၸဝ်ႈဢိတ်းလူၼၼ်ႉမီးယူႇတႃႇသေႇဢမ်ႇထၢတ်ႇတီႈၶဝ်ၸိူဝ်းဢၼ်ၵူဝ်ယမ်မၼ်းၸဝ်ႈၼၼ်ႉဢေႃႈ။

၅၁ မၼ်းၸဝ်ႈဢဝ်တင်းၶႅၼ်မိုဝ်းမၼ်းၸဝ်ႈၼႄပျႃးတၼ်းၶူဝ်းဢေႃႈ။မၼ်းၸဝ်ႈဢဝ်ၶဝ်ၸိူဝ်းဢၼ်ၸႂ်မႃႇၼႃႉပႅၼ်သုင်ၼၼ်ႉၸတ်းပိုၼ်ပႅတ်ႈဢေႃႈ။

၅၂ မၼ်းၸဝ်ႈဢဝ်ၶုၼ်တင်းလၢႆၶျႃးတူၵ်းသေၵႃႈၼိူဝ်ရႃႇၸႃႉပလၢင်ႇလႄႈယုၵ်ႉယွင်ႈၶဝ်ၸိူဝ်းဢၼ်ၸႂ်ၶျႃးတႅမ်ႇၼၼ်ႉယဝ်ႉ။

၅၃ မၼ်းၸဝ်ႈလဵင်ႉလူၶဝ်ၸိူဝ်းဢၼ်ဢိုပ်းယၢၵ်ႈၼၼ်ႉလီလီငၢမ်းငၢမ်းလႄႈပွႆႇပဵတ်ႈၶဝ်ၸိူဝ်းဢၼ်ၸၢင်ႊမၢၵ်ႈၸၢင်ႊမီးၼၼ်ႉၵႂႃႇတိၼ်လၢႆမိုဝ်းပဝ်ႇယဝ်ႉ။

၅၄ ၵႃႈၼင်ႇဢၼ်ဝႆႉပျႃႇတိၵ်ႈၸဝ်ႈၵႃႈတီႈပူႇပေႃႈႁဝ်းၼၼ်ႉၼင်ႇႁိုဝ်တၵ်းၶုၵ်းၸႂ်လႆႈၶႆႈၸႂ်ထူပ်းႁႂ်ႈလႆႈႁဵတ်းၵျေးၸူးတၢင်းဢၼ်ဢိတ်းလူတီႈဢႃႇပြႁၢမ်ႇ

၅၅ ဢိၵ်ႇတင်းၸိူဝ်ႉၶိူဝ်းမၼ်းတႃႇသေႇဢမ်ႇထၢတ်ႇၼၼ်ႉၸိုင်မၼ်းၸဝ်ႈၸွႆႈထႅမ်မႃႉၸႃႉၶႃႈမၼ်းၸဝ်ႈမဵဝ်းဢိသရေႇလၼၼ်ႉယဝ်ႉ၊ဝႃႈၼင်ႇၼႆဢေႃႈ။

၅၆ မႃႇရိၵေႃႈယူႇတီႈဢေးလိသၽႅတ်ႉၼၼ်ႉသၢမ်လိူၼ်ၸမ်ၸမ်ယဝ်ႉၸင်ႇၶိုၼ်းမိူဝ်းၵႃႈတီႈႁိူၼ်းတူဝ်ၸဝ်ႈၵဝ်ႇဢေႃႈ။

တၢင်းဢၼ်ယုဝ်းႁၢၼ်ႇၵိူတ်ႇလဵင်ႉ

၅၇ ဢေးလိသၽႅတ်ႉၵိူတ်ႇလဵင်ႉမႃးလုၵ်ႈၸၢႆးဢေႃႈ။

၅၈ မိူဝ်ႈဢၼ်ၵူၼ်းႁိမ်းႁိူၼ်းႁိမ်းယေးဢိၵ်ႇတင်းၸိူဝ်ႉၶိူဝ်းမၼ်းတင်းလၢႆလႆႈႁူႉလႆႈငိၼ်းလွင်ႈဢၼ်ၸဝ်ႈၽြႃးႁဵတ်းတၢင်းဢၼ်ဢိတ်းလူဢၼ်ယႂ်ႇၼႃႇတီႈဢေးလိသၽႅတ်ႉၼၼ်ႉၸိုင်ၶဝ်မီးၸႂ်ဢၼ်သိူဝ်းၸူမ်းလူၺ်ႈၵၼ်တင်းမၼ်းဢေႃႈ။

၅၉ ၼႂ်းဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉၶဝ်မႃးႁႂ်ႈလႆႈပၼ်တၢင်းဢၼ်ထိူဝ်ႁိမ်းတီႈလုၵ်ႈဢွၼ်ႇၼၼ်ႉလႄႈမိူဝ်ႈဢၼ်ဢၢင်ႈတၵ်းပၼ်ၸိုဝ်လုၵ်ႈဢွၼ်ႇၸွမ်းၼင်ႇၸိုဝ်ပေႃႈမၼ်းၸႃႇၶရိၼၼ်ႉၸိုင်ဢေးလိသၽႅတ်ႉလၢတ်ႈဝႃႈ၊-

၆၀ ဢမ်ႇၸႂ်ႈၵူၺ်း။တၵ်းလႆႈႁွင်ႉႁိၵ်ႈၸိုဝ်မၼ်းဝႃႈ၊-ယုဝ်းႁၢၼ်ႇဢေႃႈ၊ဝႃႈၼင်ႇၼႆလႄႈၶဝ်ၼၼ်ႉၵေႃႈလၢတ်ႈလႄႈဝႃႈ၊-

၆၁ ၵႃႈၼႂ်းၸိူဝ်ႉၶိူဝ်းမၼ်းၼၼ်ႉဢၼ်လႆႈႁွင်ႉႁိၵ်ႈၸိုဝ်ၸွမ်းမၼ်းယင်းဢမ်ႇပႆႇမီးသေၵေႃႉသေၵူၼ်း၊ဝႃႈၼင်ႇၼႆဢေႃႈ။

၆၂ ၵူၺ်းၵႃႈလွင်ႈဢၼ်ပေႃႈမၼ်းတၵ်းၶႂ်ႈႁႂ်ႈႁွင်ႉႁိၵ်ႈၸိုဝ်လုၵ်ႈၸၢႆးမၼ်းၸိူဝ်ႉၼင်ႇႁိုဝ်ၼၼ်ႉၶဝ်ၼႄတိၼ်ၼႄမိုဝ်းႁဵတ်းလၵ်ႈၶၼႃႇသေလႄႈထၢမ်ၸႃႇၶရိဢေႃႈ။

၆၃ ၸႃႇၶရိၵေႃႈယွၼ်းဢဝ်ပပ်ႉလႄႈတႅမ်ႈတူဝ်လိၵ်ႈလႄႈဝႃႈ၊-ၸိုဝ်မၼ်းတၵ်းလႆႈပဵၼ်ယုဝ်းႁၢၼ်ႇဢေႃႈ၊ဝႃႈၼင်ႇၼႆလႄႈၶဝ်တင်းသဵင်ႈတၢင်းလူင်ဢၢမ်းၼႃႇဢေႃႈ။

၆၄ မိူဝ်ႈၶိင်ႇၼၼ်ႉၵမ်းလဵဝ်ၸႃႇၶရိၽုၺ်ႇသူပ်းမၼ်းလႄႈဢဵၼ်လိၼ်ႉမၼ်းလႅတ်းမႃးသေယဝ်ႉလၢတ်ႈၵႂၢမ်းယွင်ႈယေႃးၵျေးၸူးၽြႃးပဵၼ်ၸဝ်ႈမႃးၵမ်းလဵဝ်ဢေႃႈ။

၆၅ ၵူၼ်းႁိမ်းႁိူၼ်းႁိမ်းယေးၵႃႈမီးတင်းသဵင်ႈတင်းလူင်ၸိူဝ်းၼၼ်ႉမီးတၢင်းဢၼ်တိုၼ်ႇၼႃႇဢေႃႈ။လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉၸွတ်ႇသႃႇႁူင်ႈႁၢင်းၵႂႃႇတီႈဢၼ်ပဵၼ်ႁူၺ်ႈပဵၼ်လွႆမိူင်းယုတၼၼ်ႉဢေႃႈ။

၆၆ ၶဝ်ၸိူဝ်းဢၼ်ငိၼ်းတင်းသဵင်ႈတင်းလူင်ၸိူဝ်းၼၼ်ႉၵေႃႈမၢတ်ႈတွင်းဝႆႉၼႂ်းႁူဝ်ၸႂ်လႄႈဝႃႈ၊-လုၵ်ႈဢွၼ်ႇၵေႃႉၼႆႉတၵ်းပဵၼ်ၵူၼ်းၸိူဝ်ႉၼင်ႇႁိုဝ်ၼေႃး၊ဝႃႈၼင်ႇၼႆဢေႃႈ။

၆၇ မိုဝ်းထႃႇဝရႃႉၽြႃးၵေႃႈမီးယူႇလူၺ်ႈၵၼ်တင်းမၼ်းဢေႃႈ။

၆၈ ပေႃႈမၼ်းၸႃႇၶရိၼၼ်ႉတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈယူႇသေလႄႈႁဵတ်းပရေႃးၽႅတ်ႈလႄႈဝႃႈ၊-

၆၉ ႁႂ်ႈထႃႇဝရႃႉၽြႃးဢၼ်ပဵၼ်ၽြႃးၸိူဝ်ႉၶိူဝ်းဢိသရေႇလၼၼ်ႉမီးမင်ႇၵလႃႇသေၵမ်းလူၺ်ႈ။

၇၀ လွင်ႈမၼ်းၸမ်းၵႃႈၼင်ႇဢၼ်မၼ်းၸဝ်ႈဢဝ်သူပ်းပရေႃးၽႅတ်ႈဢၼ်မူတ်းၸၢင်ႇ

၇၁ ဢၼ်ပေႃႇမႃးမိူဝ်ႈၵွၼ်ႇဢွၼ်တင်းလၢႆၼၼ်ႉလႄႈပၼ်ပျႃႇတိၵ်ႈမၼ်းၸဝ်ႈဝႆႉ

၇၂ ၼင်ႇႁိုဝ်တၵ်းလႆႈႁဵတ်းၵျေးၸူးတၢင်းဢၼ်ဢိတ်းလူတီႈပူႇမွၼ်ႇႁဝ်းလႄႈသင်၊ၼင်ႇႁိုဝ်တၵ်းၶုၵ်းၸႂ်လႆႈၶႆႈၸႂ်ထူပ်း

၇၃ ပတိၺိၼ်ႇတြႃးဢၼ်မူတ်းၸၢင်ႇဢၼ်ဝႃႈၵတိၸဝ်ႈဢၼ်မၼ်းၸဝ်ႈတိူင်ႇဝႃႈဝႆႉတီႈပေႃႈႁဝ်းဢႃႇပြႁၢမ်ႇၼၼ်ႉလႄႈဝႃႈ၊-

၇၄ မၼ်းၸဝ်ႈတၵ်းပၼ်ဢၶႂၢင်ႉႁႂ်ႈႁဝ်းလႆႈၵၢင်းလွတ်ႈၵႃႈၼႂ်းမိုဝ်းရၢၼ်ႇသူႇတင်းလၢႆလႄႈႁႂ်ႈလႆႈႁဵတ်းဝၢတ်ႈၵႃႈတီႈၽၢႆႇၼႃႈၽြႃးပဵၼ်ၸဝ်ႈ

၇၅ ႁတ်းႁတ်းႁၢၼ်ႁၢၼ်ၵႃႈၼႂ်းပႃႇရမီႇတၢင်းဢၼ်သိုဝ်ႈတေႃႇတေႃႇၸူဝ်ဢသၢၵ်ႈလႄႈ လုၵ်ႈလၢင်းၵဝ်ဢၼ်ပဵၼ်သူၸိူဝ်းၼႆႉတၵ်းလႆႈၶၢမ်ႇတၢင်းဢၼ်ႁွင်ႉႁိၵ်ႈပရေႃးၽိတ်ႈဢၼ်သုင်မျၢတ်ႈၼႃႇဢေႃႈ။

၇၆ လွင်ႈမၼ်းၸမ်းသူတၵ်းၵႂႃႇၽၢႆႇၼႃႈမၼ်းၸဝ်ႈႁႂ်ႈလႆႈမႄးႁဵၼ်းသဵၼ်ႈတၢင်းပုၼ်ႈမၼ်းၸဝ်ႈလႄႈ

၇၇ တၵ်းလႆႈႁႂ်ႈမဵဝ်းၵူၼ်းမၼ်းၸဝ်ႈဢၼ်ႁူႉၸႅင်ႈလွင်ႈတၢင်းဢၼ်လွတ်ႈဢပျႅတ်ႈလႄႈႁွတ်ႈထိုင်ထိုင်တၢင်းဢၼ်ၵႄႇၶျွတ်ႈဢဝ်ၵွပ်ႈပိူဝ်ႈၵျေးၸူးတၢင်းဢၼ်ဢိတ်းလူၽြႃးပဵၼ်ၸဝ်ႈႁဝ်းၼၼ်ႉဢေႃႈ။

၇၈ ၵွပ်ႈပိူဝ်ႈၵျေးၸူးတၢင်းဢၼ်ဢိတ်းလူၽြႃးပဵၼ်ၸဝ်ႈၼၼ်ႉဢႃႇရုင်ႇသၢႆဢရွင်ႇၵၢင်ဝၼ်းလုၵ်ႉသေၵႃႈတီႈၵၢင်ႁၢဝ်ၶိုၼ်ႈမႃးၵႃႈၼိူဝ်ႁဝ်းႁႂ်ႈလႆႈပၼ်ဢၼ်လႅင်းတီႈၶဝ်ၸိူဝ်းဢၼ်ယူႇၼႂ်းလပ်းသိင်ႇတီႈႁူမ်ႈတၢင်းတၢႆတင်းလၢႆၼၼ်ႉလႄႈ

ၼႄပျႃးသဵၼ်ႈတၢင်းဢၼ်ၼိမ်သိမ်ႇတီႈႁဝ်းယဝ်ႉဝႃႈၼင်ႇၼႆဢေႃႈ။

၇၉ လုၵ်ႈဢွၼ်ႇၼၼ်ႉယႂ်ႇမႃးလႄႈတၢင်းႁူႉတၢင်းႁၼ်ၽႄၵႂၢင်ႈၼမ်မႃးဢေႃႈ။

၈၀ ၸူဝ်ႈဢၼ်ဢမ်ႇပႆႇထိုင်ၶိင်ႇဢၼ်ဢွၵ်ႇၸိုဝ်ဢွၵ်ႇသဵင်ၵႃႈၼႂ်းၵူၼ်းဢိသရေႇလတင်းလၢႆၼၼ်ႉမၼ်းယူႇၵႃႈတီႈၼႂ်းထိူၼ်ႇဢေႃႈ။

ထမ်ႇမႃႉ ၵျၢမ်းၵဝ်ႇ

ၵျၢမ်းငဝ်ႈၵမ်ႇၽႃႇ ၵျၢမ်းဢၼ်ဢွၵ်ႇၵွႃႇ ၵျၢမ်းဢၼ်ႁဵတ်းဝၢတ်ႈ

ၵျၢမ်းဢၼ်ယူႇၼႂ်းထိူၼ်ႇ ၵျၢမ်းဢၼ်ႁေႃးတြႃး လိၵ်ႈမၢတ်ႈလွင်ႈယေႃးသု

လိၵ်ႈမၢတ်ႈလွင်ႈၵူၼ်းလူင်ဢၼ်ၸီႇယၢင်ႇတြႃး ဝုတ်ႉထုရုထ

ထမ်ႇမႃႉရႃႇၸဝၢင်ႇၽိုၼ်ပထမ ထမ်ႇမႃႉရႃႇၸဝၢင်ႇၽိုၼ်တုတိယ

ထမ်ႇမႃႉရႃႇၸဝၢင်ႇၽိုၼ်တတိယ ထမ်ႇမႃႉရႃႇၸဝၢင်ႇၽိုၼ်ၸတုၵ်ႉထ

ရႃႇၸဝၢင်ႇၶျူၵ်ႉၽိုၼ်ပထမ ရႃႇၸဝၢင်ႇၶျူၵ်ႉၽိုၼ်တုတိယ

လိၵ်ႈမၢတ်ႈလွင်ႈဢေႇၸရ လိၵ်ႈမၢတ်ႈလွင်ႈၼေႇႁမိ ဝုတ်ႉထုဢေးသတႃႇ

ဝုတ်ႉထုယေႃႇၽ ၵျၢမ်းသႃႇလၢမ်ႇ ၵျၢမ်းလိၵ်ႈသုၵ်ႉတၢမ်ႇ