Shan Missions

လိၵ်ႈဢေႃးဝႃႇတႃႉရူဝ်းမ

Chapter   ၁       ၂       ၃       ၄       ၅       ၆       ၇       ၈       ၉       ၁၀       ၁၁       ၁၂       ၁၃       ၁၄       ၁၅       ၁၆     

၁၃ 

တၢင်းႁဵတ်းဢၼ်ၸၢပ်ႈသႅင်ႇၵၼ်တင်းဝၢၼ်ႈမိူင်း

၁ ႁႂ်ႈၵူၼ်းၵူႈၵေႃႉႁပ်ႉတုင်းဢဝ်ဢႃႇၼႃႇတၢင်းဢၼ်ၶုၼ်ဢုပ်ႉပိူင်ႇတႃႉ။လွင်ႈမၼ်းၸမ်းပေႃးဢၶႂၢင်ႉၽြႃးပဵၼ်ၸဝ်ႈဢမ်ႇမီးၸိုင်ဢႃႇၼႃႇၶုၼ်ဢမ်ႇမီး။ဢႃႇၼႃႇၵႃႈမီးတင်းသဵင်ႈတင်းလူင်ပဵၼ်တၢင်းဢၼ်ၽြႃးပဵၼ်ၸဝ်ႈၶၢၼ်းဝႆႉဢေႃႈ။

၂ ပိူဝ်ႈၼႆလႄႈၵေႃႉဢၼ်ႁႄႉၶႅၼ်ဢႃႇၼႃႇၶုၼ်ၼၼ်ႉပဵၼ်ၵေႃႉဢၼ်ႁႄႉၶႅၼ်တၢင်းဢၼ်ၽြႃးပဵၼ်ၸဝ်ႈၸီႇယၢင်ႇဝႆႉၼၼ်ႉဢေႃႈ။ၶဝ်ၸိူဝ်းဢၼ်ႁႄႉၶႅၼ်ၸိူဝ်ႉၼင်ႇၼၼ်ၼၼ်ႉ၊တၵ်းလႆႈၶၢမ်ႇတၢင်းဢၼ်ၸီႇယၢင်ႇတြႃးဢေႃႈ။

၃ ၶုၼ်ၸမ်းပဵၼ်ပုၼ်ႈၶဝ်ၸိူဝ်းဢၼ်ႁဵတ်းဢၼ်လီဢၼ်ငၢမ်းၼၼ်ႉတၵ်းလႆႈၵူဝ်လႆႈႁႄဢမ်ႇၸႂ်ႈ။ပဵၼ်ပုၼ်ႈၶဝ်ၸိူဝ်းဢၼ်ႁဵတ်းဢၼ်ဢမ်ႇလီဢမ်ႇငၢမ်းၼၼ်ႉတၵ်းလႆႈၵူဝ်လႆႈႁႄၵူၺ်းဢေႃႈ။ၸွင်ႇမႂ်းၶႂ်ႈယူႇဢမ်ႇႁႂ်ႈလႆႈၵူဝ်လႆႈႁႄဢႃႇၼႃႇၶုၼ်ႁိုဝ်း။ႁဵတ်းဢၼ်လီဢၼ်ငၢမ်းတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင်မႂ်းတၵ်းလႆႈၶၢမ်ႇတၢင်းဢၼ်ယွင်ႈယေႃးတီႈဢႃႇၼႃႇၶုၼ်ၼၼ်ႉဢေႃႈ။

၄ ၶုၼ်ၸမ်းပဵၼ်ၵေႃႉဢၼ်ၶၢမ်ႇတၢင်းၸႂ်ႉတၢင်းသွႆၽြႃးပဵၼ်ၸဝ်ႈပုၼ်ႈဢၵျူဝ်းမႂ်းဢေႃႈ။ပေႃးမႂ်းႁဵတ်းဢၼ်ဢမ်ႇလီဢမ်ႇငၢမ်းၸိုင်ႁႂ်ႈမီးတၢင်းဢၼ်ၵူဝ်ဢၼ်ႁႄတႃႉ။လွင်ႈမၼ်းၸမ်းၶုၼ်ၼၼ်ႉယိပ်းလၢပ်ႇဝႆႉလၢႆလၢႆလွၵ်ႇလွၵ်ႇဢမ်ႇၸႂ်ႈ။မၼ်းပဵၼ်ၵေႃႉဢၼ်ၶၢမ်ႇတၢင်းၸႂ်ႉတၢင်းသွႆၽြႃးပဵၼ်ၸဝ်ႈဢၼ်ပဵၼ်ၵေႃႉဢၼ်ပိူင်ႇၸီႇယၢင်ႇတြႃးလႄႈၶိုၼ်းတွပ်ႇတႅၼ်းပၼ်တီႈၶဝ်ၸိူဝ်းဢၼ်ႁဵတ်းဢၼ်ဢမ်ႇလီဢမ်ႇငၢမ်းၼၼ်ႉဢေႃႈ။

၅ ပိူဝ်ႈၼႆလႄႈတၵ်းလႆႈႁပ်ႉတုင်းဢဝ်ဢႃႇၼႃႇၶုၼ်ၵွပ်ႈပိူဝ်ႈၵူဝ်တၢင်းဢၼ်ၸီႇယၢင်ႇပၼ်တၢမ်ႇၼၼ်ႉၵူၺ်းဢမ်ႇၸႂ်ႈ။တၵ်းလႆႈႁပ်ႉတုင်းဢဝ်ၸွမ်းလူၺ်ႈၸႂ်ဢၼ်ႁူႉတူဝ်ၸဝ်ႈၵဝ်ႇၼၼ်ႉဢေႃႈ။

၆ ၵွပ်ႈပိူဝ်ႈလွင်ႈၼၼ်ႉလႄႈသူပၼ်ၶွၼ်ႇဢေႃႈ။ၶုၼ်တင်းလၢႆၼၼ်ႉပဵၼ်ၵေႃႉဢၼ်ပွင်ႁဵတ်းဢမူႉၽြႃးပဵၼ်ၸဝ်ႈလွၼ်ႉလွၼ်ႉဢေႃႈ။

၇ ပိူဝ်ႈၼႆလႄႈပၼ်ၸွမ်းၵႃႈၼင်ႇဢၼ်ၵူၼ်းၵူႈၵေႃႉထိူၵ်ႈပၼ်ၼၼ်ႉတႃႉ။ပေႃးလူဝ်ႇပၼ်ၶွၼ်ႇၸိုင်ပၼ်ၶွၼ်ႇတႃႉ။ပေႃးလူဝ်ႇပၼ်ဢၼ်ၵဵပ်းၵၢင်ၵေႃႈပၼ်တီႈၵေႃႉဢၼ်ထိူၵ်ႈၶၢမ်ႇဢဝ်တၢင်းဢၼ်ၵဵပ်းၵၢင်ၼၼ်ႉတႃႉ။ပၼ်တၢင်းဢၼ်ရူဝ်ႇသေႇတီႈၵေႃႉဢၼ်ထိူၵ်ႈၶၢမ်ႇတၢင်းဢၼ်ရူဝ်ႇသေႇၼၼ်ႉတႃႉ။ပၼ်ၵုင်ႇမူၼ်တီႈၵေႃႉဢၼ်ၵိုင်ႇထိူၵ်ႈၶၢမ်ႇၵုင်ႇမူၼ်ၼၼ်ႉတႃႉ။

တၢင်းႁဵတ်းဢၼ်ၸၢပ်ႈသႅင်ႇၵၼ်တင်းပိူၼ်ႈ

၈ လိူဝ်သေတၢင်းႁၵ်ႉမႅတ်ႈတႃႇဢၼ်တေလႆႈႁၵ်ႉပိူၼ်ႈၼၼ်ႉယႃႇပေႁႂ်ႈလႆႈထုၵ်ႇၼီႈသေၸိူဝ်ႉသေပိူင်တီႈၽူႈလႂ်သေၵေႃႉသေၵူၼ်း။ၵေႃႉဢၼ်ႁၵ်ႉပိူၼ်ႈၼၼ်ႉပဵၼ်ၵေႃႉဢၼ်ႁဵတ်းႁႂ်ႈပိင်းၺၢပ်ႈတြႃးတဵမ်ထူၼ်ႈယဝ်ႉ။

၉ လွင်ႈမၼ်းၸမ်းယႃႇပေၽိတ်းပိူင်ႈမေးပိူၼ်ႈယႃႇပေဢဝ်ဢသၢၵ်ႈၵူၼ်းတၢႆယႃႇပလေၵ်ႉဢုၵ်ႉၸႃႇပိူၼ်ႈယႃႇပေၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ၊ယႃႇပေမီးၸႂ်ဢၼ်ၸပ်းၸွႆးၶႂ်ႈလႆႈဢုၵ်ႉၸႃႇပိူၼ်ႈ၊ဝႃႈၼႆ၊ၸႃႉၸဵမ်ပိင်းၺၢပ်ႈၸိူဝ်းၼႆႉလႄႈပိင်းၺၢပ်ႈၵႃႈမီးတင်းသဵင်ႈတင်းလူင်ပဵၼ်ဢၼ်တဵမ်ထူၼ်ႈၼႂ်းပိင်းၺၢပ်ႈပႃးၼိုင်ႈဢၼ်ဝႃႈ၊-ႁၵ်ႉၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉမိူၼ်ၸိူဝ်ႉၼင်ႇႁၵ်ႉတူဝ်ၸဝ်ႈၵဝ်ႇၼၼ်ႉတႃႉ၊ဝႃႈၼင်ႇၼႆၼၼ်ႉဢေႃႈ။

၁၀ တၢင်းႁၵ်ႉမႅတ်ႈတႃႇဢမ်ႇယႃႉဢၵျူဝ်းၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉ။ပိူဝ်ႈၼႆလႄႈတၢင်းႁၵ်ႉမႅတ်ႈတႃႇၼၼ်ႉပဵၼ်တၢင်းဢၼ်ႁႂ်ႈပိင်းၺၢပ်ႈတြႃးတဵမ်ထူၼ်ႈဢေႃႈ။

တၢင်းႁဵတ်းဢၼ်ၸၢပ်ႈသႅင်ႇၵၼ်တင်းဝၼ်းဢၼ်ၵႄႇၶျွတ်ႈ

၁၁ လိူဝ်သေၼၼ်ႉႁဝ်းႁူႉၶိင်ႇၵႃႇလႃႉယူႇဢေႃႈ။ပဵၼ်ၶိင်ႇဢၼ်တၵ်းလႆႈတိုၼ်ႇမႃးသေၵႃႈၼႂ်းတၢင်းဢၼ်ႁဝ်းၼွၼ်းလပ်းတေႃႈလဵဝ်ၼႆႉၼၼ်ႉယဝ်ႉ။လွင်ႈမၼ်းၸမ်းတၢင်းဢၼ်ၵႄႇၶျွတ်ႈဢဝ်ႁဝ်းၼၼ်ႉတေႃႈလဵဝ်ၼႆႉယဵင်ႈၶႅၼ်းၸမ်မႃးၼႃႇသမေိူဝ်ႈဝၼ်းဢၼ်ႁဝ်းၸႃႉပဵၼ်ၵူၼ်းယုမ်ႇမၢတ်ႈၼၼ်ႉဢေႃႈ။

၁၂ ၶိင်ႇၵၢင်ၶိုၼ်းၸမ်တၵ်းသဵင်ႈလႄႈၶိင်ႇၵၢင်ဝၼ်းၸမ်တၵ်းႁွတ်ႈထိုင်ယဝ်ႉ။ပႄႇပႅတ်ႈတၢင်းႁဵတ်းတၢင်းသၢင်ႈဢၼ်လပ်းသိင်ႇၼၼ်ႉသေလႄႈဢွၼ်ၵၼ်ဢဝ်လၢၵ်ႈၼၢၵ်ႈဢၼ်လႅင်းဢၼ်ၸေးၸုမ်ႇၼၼ်ႉတိုဝ်းၼုင်ႈတႃႉႁဝ်း။

၁၃ ဝေႈပႅတ်ႈပွႆးလၢမ်းမဝ်းလဝ်ႈမဝ်းၵမ်၊တၢင်းဢၼ်ႁဵတ်းမေႇထုင်ႇဢၼ်ဢမ်ႇတြႃးၵီႉလေႇသႃႇဢၼ်ၵူဝ်ႈၵိူၵ်ႇ၊တၢင်းဢၼ်ၽိတ်းၵၼ်တၢင်းဢၼ်ၶႄႉၶဵင်ႇၵၼ်ၸိူဝ်းၼၼ်ႉသေလႄႈဢွၼ်ၵၼ်ၵမ်ၵျၢင်ႉသၢင်ႈႁဵတ်းတၢင်းၵမ်တၢင်းၵျၢင်ႉဢၼ်လီဢၼ်ငၢမ်းမိူၼ်ၸိူဝ်ႉၼင်ႇၼႂ်းၶိင်ႇၵၢင်ဝၼ်းၼၼ်ႉတႃႉႁဝ်း။

၁၄ ဢဝ်ၸဝ်ႈယေႇသုၶရိၸ်ႉၼုင်ႈမႆႊတႃႉ။ယႃႇပေၸွမ်းဢလူဝ်ႇတၢင်းဢၼ်တူဝ်ၶိင်းၸပ်းၸွႆးၼၼ်ႉ။